Lehe Yè Sọgan Wleawuna Owanyi Nujọnu Tọn Do
“Owanyi wẹ amasin gbẹgaa tọn; owanyi wẹ ogbẹ̀.”—Living to Purpose, gbọn Joseph Johnson dali, 1871.
NAWẸ mẹde nọ plọn nado do owanyi hia gbọn? Be gbọn walọ mẹdopodopo lẹ tọn pinplọn dali wẹ ya? Gbọn owe alọgọnamẹ tọn lẹ hihia dali wẹ ya? Kavi gbọn sinemoto fẹnnuwiwa tọn lẹ pinpọn dali? Paali. Gbẹtọvi lẹ nọ plọn nado do owanyi hia to tintan whenu gbọn apajlẹ po oplọn he mẹjitọ yetọn lẹ na yé po dali. Ovi lẹ na plọn zẹẹmẹ owanyi tọn eyin, to lẹdo owanyi zohunhunnọ tọn de mẹ, yé mọ bọ mẹjitọ yetọn lẹ nọ na núdùdù yé bo nọ basi hihọ́na yé, nọ dọho hẹ yé, bo nọ tindo ojlo nujọnu tọn to yé mẹ. Yé sọ nọ plọn nado do owanyi hia eyin mẹjitọ yetọn lẹ plọn yé nado setonuna nunọwhinnusẹ́n dagbe po oylan po tọn lẹ.
Owanyi nujọnu tọn zẹ̀ numọtolanmẹ tintindo poun go. E nọ yinuwa na dagbe hugan mẹdevo lẹ tọn to whepoponu, yèdọ eyin yé ma tlẹ yọ́n pinpẹn etọn to gigọ́mẹ to ojlẹ lọ mẹ, ehe nọ saba jọ to whẹho ovi lẹ tọn mẹ eyin e bẹ mẹplọnlọ-domẹgo owanyinọ hẹn. Apajlẹ pipé mẹhe do owanyi matin ṣejannabi tọn hia wẹ Mẹdatọ lọ lọsu. Apọsteli Paulu wlan dọmọ: “Ovi ṣie, hiẹ vlẹ mẹplọnlọ Oklunọ tọn blo, agbọ́ sọ pé we whenuena yè gbọn alọ etọn mẹ do to wiwọhẹ we blo; na ewọ he Oklunọ yiwanna wẹ e nọ wọhẹ.”—Heblu lẹ 12:5, 6.
Mẹjitọ lẹ emi, nawẹ mì sọgan hodo apajlẹ Jehovah tọn to owanyi didohia whẹndo mìtọn mẹ gbọn? Podọ nawẹ apajlẹ he mì zedai to haṣinṣan mìtọn hẹ ode awetọ mẹ taidi asu po asi po yin nujọnu sọ?
Mì Plọn Owanyi Ovi Mìtọn lẹ Gbọn Apajlẹ Mìtọn Gblamẹ
Eyin asu de wẹ hiẹ yin, be a nọ wleyẹyi, kavi yí nukun nuhọakuẹ tọn do pọ́n asi towe, bo nọ yinuwa hẹ ẹ to yẹyi po sisi po mẹ ya? Eyin asi wẹ hiẹ yin, be a nọ yiwanna asu towe bosọ nọ nọgodona ẹn ya? Biblu dọ dọ asu po asi po ni yiwanna bosọ nọ na sisi yede. (Efesunu lẹ 5:28; Titu 2:4) Eyin yé wàmọ, ovi yetọn lẹ nọ mọ owanyi Klistiani tọn to nuwiwa mẹ tlọlọ. Lehe enẹ na yin nuplọnmẹ huhlọnnọ he họakuẹ taun de do sọ!
Mẹjitọ lẹ sọ nọ ze owanyi daga to whégbè eyin yé tẹdo nujinọtedo he yiaga whẹndo tọn lẹ go gando onú lẹ taidi ayidedai, walọdagbe, gọna yanwle po nujọnu lẹ zizedo otẹn tintan mẹ po go. Lẹdo aihọn pé, gbẹtọ lẹ ko mọdọ Biblu yin alọgọ daho de to nujinọtedo whẹndo tọn mọnkọtọn lẹ zizedai mẹ, bọ gbẹzan yetọn nọ do kunnudenu hia dọ Biblu yin “gbingbọ́n sọn Jiwheyẹwhe mẹ [bosọ] yin alenọ ga na mẹpinplọn, na wọhẹmẹ, na anademẹ, na nuplọnmẹ he tin to dodo mẹ.” (2 Timoti 3:16) Na nugbo tọn, mẹsusu mọdọ nunọwhinnusẹ́n walọyizan tọn po anademẹ gbẹzan tọn po heyin mimọ to Yẹwhehodidọ Osó ji tọn kẹdẹ mẹ lẹ yọn-na-yizan tlala.—Matiu, weta 5 jẹ 7.
To whenuena whẹndo lọ blebu dín anademẹ sọn Jiwheyẹwhe dè bo tẹdo nujinọtedo etọn lẹ go, dopodopo yetọn nọ tindo numọtolanmẹ hihọ́ tọn bọ ovi lẹ nọ yiwanna mẹjitọ yetọn lẹ bo nọ na sisi yé. To adà awetọ mẹ, to owhé he gbè dẹgbè-awe, nujinọtedo he ma sọgbe, kavi he ma lodo lẹ tin te, apọ̀ sọgan nọ ṣì ovi lẹ, bọ yé na nọ gblehomẹ bo ṣiatẹ.—Lomunu lẹ 2:21; Kọlọsinu lẹ 3:21.
Etẹwẹ dogbọn mẹjitọ godoponọ lẹ dali? Be yewlẹ ma sọgan plọn ovi yetọn lẹ nado do owanyi hia wẹ ya? E mayin mọ dandan. Dile etlẹ yindọ nudepope ma sọgan nọ̀ otẹn azọ́nwiwa dopọ onọ̀-po-otọ́ dagbe de po tọn mẹ, numimọ ko dohia dọ jẹhẹnu kanṣiṣa whẹndo tọn lẹ sọgan sú odò mẹjitọ dopo he matin lọ tọn jẹ obá de mẹ. Eyin mẹjitọ godoponọ de wẹ hiẹ yin, dovivẹnu nado yí nunọwhinnusẹ́n Biblu tọn lẹ do yizan mẹ to owhé towe gbè. Mọwẹ, howhinwhẹn dopo dọna mí dọmọ: “Yí ayiha towe do dotudo OKLUNỌ go; a dẹ́ hlan dewe tọn dali blo. Yọ́n ẹn to aliho towe lẹpo ji, ewọ nasọ jlọ omọ́ towe”—he bẹ omọ́ mẹjitọ-yinyin tọn hẹn.—Howhinwhẹn lẹ 3:5, 6; Jakobu 1:5.
Jọja dagbe susu yin pinpọn e go whẹ́n to whédo mẹjitọ-godoponọ tọn lẹ mẹ bọ yé sọ to Jiwheyẹwhe sẹ̀n po nugbonọ-yinyin po todin to agun fọtọ́n susu Kunnudetọ Jehovah tọn lẹ tọn mẹ lẹdo aihọn pé. Kunnudenu de wẹ ehe yin dọ mẹjitọ godoponọ lẹ lọsu sọgan tindo kọdetọn dagbe to nupinplọn ovi yetọn lẹ gando owanyi go mẹ.
Lehe Mẹlẹpo Sọgan Wleawuna Owanyi Do
Biblu dọ dọdai dọ “owanyi hẹnnumẹ tọn” ma na tin to ‘azán godo tọn lẹ’ mẹ, enẹ wẹ yindọ kanṣiṣa pẹkipẹki jọwamọ tọn he hagbẹ whẹndo tọn lẹ nọ saba tindo na ode awetọ na busẹ. (2 Timoti 3:1, 3) Etomọṣo, mẹhe tlẹ whẹ́n to lẹdo he mẹ owanyi sisosiso matin te lẹ sọgan plọn nado wleawuna owanyi. Gbọnna? Gbọn nupinplọn sọn Jehovah, mẹhe yin Asisa tangan owanyi tọn he nọ do owanyi sisosiso hia mẹhe lẹhlan ẹn po ahundopo po lẹpo dè dali. (1 Johanu 4:7, 8) “Whenuena otọ́ ṣie po onọ̀ ṣie po gbẹ́ mi dai, whenẹnu wẹ OKLUNỌ na dealọyi mi,” wẹ psalm-kantọ dopo dọ.—Psalm 27:10.
Jehovah do owanyi etọn hia mí to aliho voovo mẹ. Ehelẹ bẹ anademẹ otọ́ tọn gbọn Biblu gblamẹ, alọgọ gbigbọ wiwe tọn, po godonọnamẹ zohunhunnọ mẹmẹsunnu Klistiani tọn lẹ po hẹn. (Psalm 119:97-105; Luku 11:13; Heblu lẹ 10:24, 25) Gbadopọnna lehe awuwledainanu atọ̀n ehelẹ sọgan gọalọna we nado hẹn owanyi towe jideji na Jiwheyẹwhe po kọmẹnu lẹ po do.
Anademẹ Otọ́ Tọn He Nọ Whanmẹ
Nado wleawuna kọndopọ zohunhunnọ hẹ mẹde, mí dona yọ́n omẹ lọ ganji. Gbọn ede didohia to Biblu mẹ dali, Jehovah ylọ mí nado dọnsẹpọ ewọ. Ṣigba, Biblu hihia ma ko pé gba. Mí dona yí nuplọnmẹ etọn lẹ do yizan mẹ bo mọ ale he e nọ hẹnwa lẹ. (Psalm 19:7-10) “Yẹn wẹ OKLUNỌ Jiwheyẹwhe towe, he plọn we na ale, he plan we gbọn aliho he ji hiẹ na gbọ̀n,” wẹ Isaia 48:17 dọ. Mọwẹ, Jehovah heyin apajlẹ pipé owanyi tọn, nọ plọn mí na ale mítọn—e mayin na e jlo na yí osẹ́n po gbedide he mayin dandan tọn lẹ po do glọnalina mẹdekannujẹ mítọn wutu wẹ gba.
Oyọnẹn he pegan Biblu tọn sọ nọ gọalọna mí nado hẹn owanyi mítọn jideji hlan gbẹtọvi hatọ lẹ. Ehe yinmọ na nugbo Biblu tọn plọn mí lehe Jiwheyẹwhe nọ pọ́n gbẹtọ lẹ hlan do bosọ do nunọwhinnusẹ́n he dona nọ deanana nuyiwa mítọn lẹ hẹ ode awetọ hia wutu. Po nudọnamẹ mọnkọtọn po, mí tindo dodonu he lodo de nado yiwanna kọmẹnu mítọn lẹ. Apọsteli Paulu dọmọ: ‘Ehe wẹ yẹn to dẹ̀ho na zọnmii, dọ owanyi mìtọn ni to susudeji to oyọnẹn he pegan mẹ podọ to wuntuntun gigọ́ mẹ.’—Filippinu lẹ 1:9.
Nado basi dohia lehe ‘oyọnẹn he pegan’ sọgan deanana owanyi do tọn, lẹnnupọndo nugbo dodonu tọn heyin didọ to Owalọ lẹ 10:34, 35 mẹ ji dọmọ: “Jiwheyẹwhe ma yin mẹnukuntahopọntọ gba: ṣigba to akọta lẹpo mẹ, mẹhe dibusi i, bo wazọ́n dodo, wẹ yè kẹalọyi to e dè.” Eyin Jiwheyẹwhe nọ dawhẹna gbẹtọ lẹ sinai do dodowiwa po obu jijọ-di-Jiwheyẹwhe tọn yetọn po ji, bọ e mayin do akọta kavi akọ̀ he mẹ yé wá sọn ji, be e ma jẹ dọ mílọsu ni nọ pọ́n gbẹtọvi hatọ mítọn lẹ hlan po mẹnukuntamahopọn mọnkọtọn po ya?—Owalọ lẹ 17:26, 27; 1 Johanu 4:7-11, 20, 21.
Owanyi—Sinsẹ́n Gbigbọ Jiwheyẹwhe Tọn De
Kẹdẹdile jikun he jà do jipa de ji do ganmẹ nọ yidogọna jibẹwawhé dagbe de do, gbigbọ Jiwheyẹwhe tọn sọgan wleawuna jẹhẹnu lẹ he Biblu ylọ dọ ‘sinsẹ́n gbigbọ tọn’ do mẹhe dotoai lẹ mẹ. (Galatianu lẹ 5:22, 23) Tintan to sinsẹ́n ehe mẹ wẹ owanyi. (1 Kọlintinu lẹ 13:13) Ṣigba nawẹ mí nọ mọ gbigbọ Jiwheyẹwhe tọn yí gbọn? Aliho tangan dopo wẹ gbọn odẹ̀ gblamẹ. Eyin mí hodẹ̀ na gbigbọ Jiwheyẹwhe tọn, e na na ẹn mí. (Luku 11:9-13) Be hiẹ nọ to dẹ̀ho ‘zọnmii’ nado mọ gbigbọ wiwe yí ya? Eyin hiẹ nọ wàmọ, whenẹnu sinsẹ́n họakuẹ etọn, ehe bẹ owanyi hẹn, dona sọawuhia taun to gbẹzan towe mẹ.
Ṣigba, gbigbọ wunmẹ devo tin he nọ wazọ́n sọta gbigbọ Jiwheyẹwhe tọn. Biblu ylọ ẹ dọ “gbigbọ aihọn tọn.” (1 Kọlintinu lẹ 2:12; Efesunu lẹ 2:2) Huhlọn ylankan de wẹ e yin, podọ Satani Lẹgba, heyin “ahọvi aihọn” gbẹtọvi he jẹla sọn Jiwheyẹwhe dè tọn wẹ yin asisa etọn. (Johanu 12:31) Taidi jẹhọn he nọ fọ́n afinfin po ogbó po dote, “gbigbọ aihọn tọn” nọ fọ́n ojlo ylankan he nọ hù owanyi sudo bo nọ ze madogán agbasalan tọn daga lẹ dote.—Galatianu lẹ 5:19-21.
Gbẹtọ lẹ nọ joawuna gbigbọ ylankan enẹ to whenue yé hùn yede do nùvo hlan linlẹn yanwle agbasanu bibẹpli ṣejannabi tọn, walọ danuwiwa tọn lẹ, po pọndohlan gblezọn owanyi tọn he gbayipe to aihọn lọ mẹ po. Eyin hiẹ jlo nado hẹn owanyi nujọnu tọn jideji, hiẹ dona nọavunte gligli sọta gbigbọ aihọn tọn. (Jakobu 4:7) Ṣigba, ma ganjẹ huhlọn dewe tọn go blo; biọ alọgọ sọn Jehovah dè. Gbigbọ etọn—yèdọ huhlọn he klohugan to wẹkẹ mẹ lọ—sọgan hẹn we lodo bo hẹn we tindo kọdetọn dagbe.—Psalm 121:2.
Plọn Owanyi sọn Mẹmẹsunnu Klistiani Tọn lẹ Dè
Kẹdẹdile ovi lẹ nọ plọn nado do owanyi hia gbọn numimọ etọn tintindo to whégbè dali do, mímẹpo—jọja po mẹhomẹ po—sọgan hẹn owanyi jideji gbọn gbẹdido hẹ Klistiani devo lẹ dali. (Johanu 13:34, 35) Na nugbo tọn, dopo to azọngban tangan agun Klistiani tọn lẹ mẹ wẹ nado wleawuna lẹdo he mẹ mẹdopodopo sọgan ‘dozolanmẹna ode awetọ hlan owanyi po azọ́n dagbe lẹ po kọ̀n’ te.—Heblu lẹ 10:24.
Mẹhe “yè hẹn agbọ́pe . . . bosọ hẹn apọṣi” to aihọn he ma tindo owanyi he lẹdo mí pé ehe mẹ lẹ nọ yọ́n pinpẹn owanyi enẹ tọn taun. (Matiu 9:36) Numimọ ko dohia dọ haṣinṣan owanyinọ mẹhowhe tọn lẹ sọgan sú odò owanyi he mayin didohiamẹ to ovuwhenu tọn. Enẹwutu, lehe e yin nujọnu do sọ, dọ Klistiani he ko klan yede do wiwe lẹpo ni nọ yí zohunhun do dokuavọna mẹyọyọ he ṣẹṣẹ jẹ gbẹdo hẹ yé ji lẹ!
“Owanyi Ma Nọ Gbọvọ Gbede”
Biblu dọ dọ “owanyi ma nọ gbọvọ gbede.” (1 Kọlintinu lẹ 13:8) Nawẹ e yinmọ gbọn? Apọsteli Paulu dọna mí dọ: “Owanyi nọ jiya dẹn, e sọ jọmẹ; onú ma nọ vẹun na owanyi; owanyi ma nọ yigo, e masọ nọ kla. E ma nọ hẹn ede wà onú jẹagọ, e ma nọ dín onú etọn titi, yè ma nọ hẹn ẹn gblehomẹ apla, e ma nọ lẹn ylankan.” (1 Kọlintinu lẹ 13:4, 5) E họnwun dọ, owanyi ehe mayin linlẹn apọ̀nmẹ tọn kavi numọtolanmẹ he ma siso de gba. Kakatimọ—mẹhe to dido e hia lẹ yọnẹn bosọ nọ kẹalọyi flumẹjijẹ po awufiẹsa gbẹmẹ tọn lẹ po, ṣigba yé ma nọ dike ehe ni hẹn owanyi he yé tindo na hatọ yetọn lẹ gble. Owanyi mọnkọtọn yin “pọninọ gbesisọ tọn” nugbonugbo.—Kọlọsinu lẹ 3:12-14.
Lẹnnupọndo apajlẹ viyọnnu Klistiani owhe 17-mẹvi Corée tọn de tọn ji. To whenuena e jẹ Jehovah Jiwheyẹwhe sẹ̀n ji, whẹndo etọn jẹagọdo bọ e dona tọ́nsọn owhé lọ gbè. Ṣigba, kakati nado gblehomẹ, e hodẹ̀ gando whẹho lọ go, bo dike Ohó po gbigbọ Jiwheyẹwhe tọn po ni deanana nulẹnpọn etọn. Enẹgodo, e nọ wlanwe hlan whẹndo etọn gbọzangbọzan, bo nọ do owanyi sisosiso he e tindo na yé hia to wekanhlanmẹ etọn lẹ mẹ. To godo mẹ, mẹdaho etọn sunnu awe lẹ jẹ Biblu plọn ji bo ko yin Klistiani he ko klan yede do wiwe lẹ todin. Onọ̀ etọn po nọvisunnu etọn pẹvi po lọsu kẹalọyi nugbo Biblu tọn. To agọgbọnẹnmẹ, otọ́ etọn, he jẹagọdo e sinsinyẹn dai, ko diọ pọndohlan etọn. Viyọnnu Kunnudetọ lọ wlan dọ: “Mímẹpo wlealọ hẹ Klistiani hatọ lẹ, podọ whẹndo mítọn bẹ omẹ 23 he to sinsẹ̀n-basi to pọmẹ hẹn todin.” Awhangbigba nankọ die na owanyi!
Be hiẹ jlo na wleawuna owanyi nujọnu tọn bosọ gọalọna mẹdevo lẹ nado wà onú dopolọ ya? To whelọnu lo lẹhlan Jehovah, heyin Asisa jẹhẹnu họakuẹ enẹ tọn. Mọwẹ, yí Ohó etọn do ahun mẹ, nọ hodẹ̀ na gbigbọ wiwe, bo nọ dogbẹ́ hẹ mẹmẹsunnu Klistiani tọn lẹ to gbesisọmẹ. (Isaia 11:9; Matiu 5:5) Lehe e nọ hẹn ahun jaya do sọ nado yọnẹn dọ mẹylankan depope ma na tin ba to madẹnmẹ, bọ mẹhe nọ do owanyi nujọnu Klistiani tọn hia lẹ kẹdẹ wẹ na pò! Na nugbo tọn, owanyi wẹ yin họnhungan ayajẹ po ogbẹ̀ po tọn.—Psalm 37:10, 11; 1 Johanu 3:14.
[Yẹdide to weda 6]
Odẹ̀ po Ohó Jiwheyẹwhe tọn pinplọn po na gọalọ- na mí nado wleawuna owanyi nujọnu tọn