‘Mì Wá Dè E Yẹn Nasọ Fakọna Mì’

“Mì Gbọ Mí Ni Nọ Wà Dagbe Hlan Omẹ Popo”

AZỌNGBAN tangan Jesu tọn wẹ nado dọyẹwheho bo plọnmẹ wẹndagbe Ahọluduta Jiwheyẹwhe tọn tọn. (Malku 1:14; Luku 8:1) Na hodotọ Klisti tọn lẹ jlo nado hodo apajlẹ etọn wutu, yé pọ́n azọ́n owẹ̀n Biblu tọn gando Ahọluduta Jiwheyẹwhe tọn go pinplọnmẹ hlan taidi nuwiwa titengbe hugan lọ to gbẹzan yetọn mẹ. (Luku 6:40) Na nugbo tọn, homẹmiọnnamẹnu wẹ e yin na Kunnudetọ Jehovah tọn lẹ nado mọ lehe owẹ̀n Ahọluduta lọ tọn nọ hẹn kọfanamẹ tẹgbẹ̀ tọn wá na mẹhe kẹalọyi i lẹ do—kẹdẹdile e wà do to whenuena Jesu tin to aigba ji.—Matiu 11:28-30.

To yidogọmẹ na Ohó Jiwheyẹwhe tọn pinplọnmẹ, Jesu wazọ́n dagbe devo lẹ, taidi awutunọ lẹ hinhẹn jẹ gángán po núdùdù nina mẹhe huvẹ to hùhù lẹ po. (Matiu 14:14-21) Mọdopolọ, Kunnudetọ Jehovah tọn lẹ nọ yí nuyiwa he nọ gọalọna mẹhe tin to nuhudo mẹ lẹ dogọ azọ́n Biblu pinplọnmẹ tọn yetọn. Na nugbo tọn, Owe-wiwe nọ hẹn Klistiani lẹ pegan ‘na azọ́n dagbe lẹpo’ bo nọ dotuhomẹna yé nado ‘wà dagbe hlan omẹ popo.’—2 Timoti 3:16, 17; Galatianu lẹ 6:10.

“Mẹmẹsunnu Mítọn lẹ Tin to Finẹ”

To septembre 1999, aigba sisọsisọ nuvasudo tọn de whàn Taiwan. To osun vude godo, jikun wududu po yujẹhọn sinsinyẹn lẹ po hẹn dopo to nugbajẹmẹji jọwamọ tọn he ylan hugan to whenuho Venezuela tọn mẹ wá. To agọe pete, singigọ sinsinyẹn de gbà otò Mozambique tọn. To nujijọ atọ̀n lẹpo mẹ, Kunnudetọ Jehovah tọn lẹ yawu wá otẹn lọ mẹ po agbàn núdùdù, osin, amasin, avọ̀, gòhọ, po nuyizan nudida tọn lẹ po tọn na mẹhe adán gbò lẹ. Mẹdezejotọ he yin doto-zọ́nwatọ lẹ wleawuna dotowhé ojlẹ gli tọn lẹ nado penukundo mẹhe gbleawu lẹ go, podọ họ̀gbátọ lẹ ze yedelẹ jo nado gbá ohọ̀ yọyọ lẹ na mẹhe hẹn owhé yetọn bu lẹ.

Alọgọ he wá do ganmẹ ehe yinuwado mẹhe adán gbò lẹ ji. “To whenue mí ma tindo todido de ba, mẹmẹsunnu mítọn lẹ tin to finẹ,” wẹ Malyori, he owhé etọn họ́ to yujẹhọn Venezuela tọn mẹ dọ. To whenuena mẹdezejotọ lẹ gbá ohọ̀ yọyọ vẹnpẹn de na whẹndo etọn godo, Malyori dọmọ: “Mí ma yọ́n lehe mí na dopẹ́ na Jehovah do na nuhe e ko wà na mí lẹpo!” Podọ to whenuena mẹhe singigọ gbà to Mozambique lẹ mọ họnhungan ohọ̀ yọyọ he yè gbá na yé lẹ tọn yí, yemẹpo wẹ kọngbedopọ to ohàn Ahọluduta lọ tọn “Jehovah Wẹ Fibẹtado Mítọn” jiji mẹ.a

Mẹdezejotọ lẹ mọ kọfanamẹ to alọgigọna mẹhe tin to nuhudo mẹ lẹ mẹ ga. “Homẹ ṣie hùn dọ yẹn yọn-na-yizan na mẹmẹsunnu he ko jiya susu ehelẹ,” wẹ Marcelo he wazọ́n taidi doto mẹgopọntọ to osla fibẹtado-dintọ lẹ tọn de mẹ to Mozambique dọ. Huang, mẹdezejotọ de sọn Taiwan dọmọ: “Ayajẹ daho wẹ e yin nado tindo mahẹ to núdùdù po gòhọ po hinhẹn yì na mẹmẹsunnu he tin to nuhudo mẹ lẹ. E hẹn yise ṣie lodo tlala.”

Tito-to-Whinnu Mẹdezejo Tọn de He Wazọ́n

Azọ́n mẹdezejo tọn ko sọ hẹn kọfanamẹ gbigbọmẹ tọn wá na gàntọ fọtọ́n donù ao susu lẹdo aihọn pé. Gbọnna? To owhe agọe tọn lẹ mẹ, Kunnudetọ Jehovah tọn lẹ ko wleawuna owe sinai do Biblu ji lẹ na gàntọ hugan 30 000 he tin to nudi ganpa 4 000 delẹ mẹ to États-Unis kẹdẹ. To yidogọ mẹ, Kunnudetọ lẹ nọ dla ganpa lẹ pọ́n to fie e yọnbasi te nado plọn Biblu hẹ gàntọ lẹ bo deanana opli Klistiani tọn lẹ. Be gàntọ lọ lẹ mọaleyi ya?

Gàntọ delẹ he to Biblu plọn jẹ nuplọnmẹ kọfanamẹ Ohó Jiwheyẹwhe tọn tọn lẹ má hẹ gàntọ hatọ yetọn lẹ ji. Taidi kọdetọn de, pipli gàntọ lẹ tọn tin to ganpa susu mẹ lẹdo aihọn pé todin he nọ sẹ̀n Jehovah to pọmẹ. “Pipli mítọn to vùnvùn,” wẹ gàntọ de to Oregon, États-Unis, to 2001 dọ. “Mí tindo lilatọ Ahọluduta tọn 7 bo to anadena plọnmẹ Biblu 38. Hugan omẹ 25 wẹ nọ wá opli togunmẹho tọn po Oplọn Atọ̀họ̀-Nuhihọ́ Lọ Tọn po tẹnmẹ, podọ omẹ 39 wẹ pli na Oflin [okú Klisti tọn]. Omẹ atọ̀n dogọ na yin bibaptizi to madẹnmẹ!”

Ale po Ayajẹ lẹ Po

Mẹhe nọ penukundo gànpamẹ go lẹ ko doayi e go dọ tito-to-whinnu mẹdezejo tọn ehe wazọ́n. Ale dẹn-to-aimẹ tito-to-whinnu mẹdezejo ehe tọn wẹ yinuwado yé ji hugan. Linlin dopo dọmọ: “Na owhe ao he tito-to-whinnu ehe ko do tin-to-aimẹ, gàntọ heyin bibaptizi to gànpamẹ taidi Kunnudetọ Jehovah tọn bo yin didetọn de matin he lẹkọwa ganpa lọ mẹ—to vogbingbọnmẹ na sọha nudi 50-60 to kanweko ji mẹhe nọ lẹkọwa gànpamẹ lẹ tọn.” Na kọdetọn he kọ̀n Kunnudetọ mẹdezejotọ lẹ ko jẹ whàn ẹn wutu, sinsẹ̀ngán ganpa de tọn to Idaho dọ to wekanhlanmẹ he e dohlan tatọ́-tẹnnọ Kunnudetọ Jehovah tọn lẹ tọn mẹ dọmọ: “Dile etlẹ yindọ na dee titi yẹn ma kọngbedopọ hẹ nuyise mìtọn lẹ, titobasinanu mìtọn whàn mi taun.”

Alọgigọna mẹhe tin to gànpamẹ lẹ sọ yin alemọyinu na mẹdezejotọ lẹ ga. To anadidena opli de hẹ pipli gàntọ he ji ohàn Ahọluduta tọn de na ojlẹ tintan lẹ godo, mẹdezejotọ de wlan dọmọ: “Tulinamẹnu wẹ e yin nado mọdọ sunnu 28 kọnawudopọ to ohàn pipà tọn jiji hlan Jehovah mẹ. Podọ yé ji ohàn lọ po ogbè lele po! Lẹblanulọkẹyi nankọtọn die nado tin to nujijọ mọnkọtọn tẹnmẹ!” Mẹdezejotọ de he dla ganpa lẹ pọ́n to Arizona dọmọ: “Dona nankọtọn die e ko yin nado tindo mahẹ to azọ́n vonọtaun ehe mẹ!”

Kunnudetọ mẹdezejotọ lẹ lẹdo aihọn pé kọngbedopọ hẹ Jesu, mẹhe dọmọ: ‘Nado namẹ do ayajẹ hú nado mọyi.’ (Owalọ lẹ 20:35) Yé sọ mọ dọ tudohomẹnamẹ Biblu tọn hihodo nado nọ wà dagbe hlan omẹ popo yin kọfanamẹnu na nugbo tọn.—Howhinwhẹn lẹ 11:25.

[Nudọnamẹ odò tọn]

[Yẹdide to weda 8]

Venezuela

Taïwan

Mozambique