Nado Yin Vivọji—Be Enẹ Wẹ Aliho Whlẹngán Tọn Ya?

ETẸWẸ na yin gblọndo towe eyin mẹde kanse we dọ, “Be hiẹ ko yin vivọji ya?” Lẹdo aihọn pé, yisenọ livi susu wẹ na yigbe po nujikudo po dọ, “Mọwẹ!” Yé yise dọ nado yin vivọji wẹ nọ dohiagona Klistiani nugbo lẹpo, podọ enẹ wẹ aliho dopo akàn lọ nado mọ whlẹngán. Linlẹn yetọn sọgbe hẹ pọndohlan he nukọntọ sinsẹ̀n tọn susu tindo, taidi sinsẹ̀n-nuplọnmẹtọ Robert C. Sproul tọn, he dọmọ: “Eyin mẹde ma yin vivọji, . . . be e ma ko yin Klistiani.”

Be hiẹ lọsu yise dọ nado yin vivọji wẹ na whlẹn we gán ya? Eyin mọ wẹ, ayihaawe ma tin dọ hiẹ na jlo na gọalọna hẹnnumẹ po họntọn towe lẹ po nado mọ aliho enẹ bosọ bẹ zọnlinzinzin to aliho lọ ji jẹeji. Ṣigba nado wàmọ, yé dona mọnukunnujẹ vogbingbọn he tin to mẹhe yin vivọji po mẹhe ma yin mọ po ṣẹnṣẹn. Nawẹ hiẹ na basi zẹẹmẹ vọji tọn na yé gbọn?

Mẹsusu yise dọ “vọji” zẹẹmẹdo pàdido nado sẹ̀n Jiwheyẹwhe po Klisti po bo gbọnmọ dali tọ́n sọn ninọmẹ haṣinṣan matindo hẹ Jiwheyẹwhe tọn mẹ biọ haṣinṣan dagbe de tintindo hẹ ẹ tọn mẹ. Na nugbo tọn, wezẹhomẹ agọe tọn de basi zẹẹmẹ mẹhe yin vivọji de tọn taidi “Klistiani de he vọ́ gbemima yise etọn tọn basi, titengbe to whenuena nude yinuwadeji taun to sinsẹ̀n etọn mẹ godo.”—Merriam-Webster’s Collegiate Dictionary—Eleventh Edition.

Be e ma na paṣa we dọ Biblu ma kọngbedopọ hẹ zẹẹmẹ enẹ ya? Be hiẹ na jlo nado yọ́n nugbo he Ohó Jiwheyẹwhe tọn plọnmẹ gando vọji go ya? Matin ayihaawe, sọwhiwhe yíyí do lẹnnupọndo hosọ ehe ji na hẹn ale wá na we. Etẹwutu? Na nukunnumọjẹnumẹ he sọgbe tintindo gando vọji go na yinuwado gbẹzan towe po todido sọgodo tọn towe po ji.

Etẹwẹ Biblu Plọnmẹ?

To Johanu 3:1-12 mẹ, mí mọ hodidọ lọ “vọ́ gbẹtọ jì,” he basi zẹẹmẹ hodọdopọ ojlofọndotenamẹ tọn de he wá aimẹ to Jesu po nukọntọ sinsẹ̀n tọn de po ṣẹnṣẹn to Jelusalẹm. Hiẹ na mọ kandai Biblu tọn enẹ blebu to apotin he bọdego mẹ. Mí na tuli we nado hia ẹ po sọwhiwhe po.

To kandai lọ mẹ, Jesu zinnudo adà voovo he gando vọji go ji.a Na nugbo tọn, hodọdopọ Jesu tọn gọalọna mí nado mọ gblọndo na kanbiọ titengbe atọ́n ehelẹ:

◼ Nawẹ vọji yin nujọnu sọ?

◼ Be mílọsu wẹ sọgan basi nudide nado yin vivọji ya?

◼ Etẹwẹ yin lẹndai etọn?

◼ Nawẹ mẹde nọ yin vivọji gbọn?

◼ Diọdo tẹwẹ e nọ hẹnwa to haṣinṣan mẹlọ tọn hẹ Jiwheyẹwhe mẹ?

Mì gbọ mí ni gbadopọnna kanbiọ ehelẹ dopodopo.

[Nudọnamẹ odò tọn]

[Apotin/Yẹdide to weda 4]

“Yè Ma Sọgan Nọma Vọ́ Mì Jì”

“Dawe de tin to Falesi lẹ mẹ, he yè nọ ylọ Nikodemi, ogán Ju lẹ tọn de: ewọ lọ wẹ wá Jesu dè to zánmẹ, bo dọhlan ẹn, dọ, Labbi, míwlẹ yọnẹn dọ, mẹplọntọ sọn Jiwheyẹwhe dè wá wẹ hiẹ: na mẹhe sọgan basi ohia he hiẹ to bibasi helẹ de ma tin, adavo Jiwheyẹwhe tin po e po. Jesu gblọn bo dọhlan ẹn, dọ, Nugbo, nugbo, wẹ yẹn dọhlan we, Adavo yè vọ́ gbẹtọ jì, ewọ ma sọgan mọ ahọluduta Jiwheyẹwhe tọn. Nikodemi sọ dọhlan ẹn, dọ, Nawẹ yè sọgan jì gbẹtọ do, whenuena e ko whẹ́n pó? E sọgan sọ vọ́ ohò onọ̀ etọn tọn mẹ biọ whla awetọ bo yin jiji? Jesu gblọn dọmọ, Nugbo, nugbo, wẹ yẹn dọhlan we, Adavo yè yí osin po [gbigbọ] po do jì gbẹtọ ewọ ma sọgan biọ ahọluduta Jiwheyẹwhe tọn mẹ. Ehe yè jì gbọn agbasa dali agbasa wẹ; ehe yè jì gbọn [gbigbọ] dali gbigbọ wẹ. Avò vò we blo, na yẹn dọhlan we, dọ, Yè ma sọgan nọma vọ́ mì jì wutu. Jẹhọn to yìnyìn do fihe e jlo, hiẹ sọ sè ogbè etọn, ṣigba hiẹ ma yọ́n fihe e sọn wá, podọ fihe e jei: mọkẹdẹ wẹ mẹdepope he yè jì gbọn [gbigbọ] dali. Nikodemi sọ gblọn, bo dọhlan ẹn, dọ, Nawẹ onú helẹ sọgan wà do yinmọ? Jesu sọ gblọn bo dọhlan ẹn dọmọ, Hiẹ wẹ mẹplọntọ Islaeli tọn lọ bo ma yọ́n onú helẹ gba? Nugbo, nugbo, wẹ yẹn dọhlan we, Míwlẹ to nuhe mí yọnẹn lẹ dọ, bosọ to kunnu nuhe mí mọ lẹ tọn de; mìwlẹ masọ yí kunnude mítọn. Eyin yẹn dọ onú aihọn he tọn lẹ na mì, bọ mì ma yise, nawẹ mì na yise do, eyin yẹn dọ onú olọn tọn na mì?”—Johanu 3:1-12.

Yinyin Vivọji—Nawẹ E Yin Nujọnu Sọ?

SỌN bẹjẹeji hodọdopọ Jesu tọn hẹ Nikodemi jẹ vivọnu, Jesu zinnudeji dọ nado yin vivọji kavi lẹzun mẹvọji, yin nujọnu taun. Nawẹ e hẹn enẹ họnwun gbọn?

Pọ́n lehe Jesu zinnudo nujọnu-yinyin vọji tọn ji to hodọdopọ etọn hẹ Nikodemi mẹ do. E dọmọ: ‘Adavo yè vọ́ gbẹtọ jì, ewọ ma sọgan mọ ahọluduta Jiwheyẹwhe tọn.’ (Johanu 3:3) Hogbe lọ “adavo” po “ma sọgan” po zinnudeji dọ dandannu wẹ e yin nado yin vivọji. Di apajlẹ: Eyin mẹde dọ dọ, “Adavo owhè hùn, e ma yinmọ mí ma sọgan mọ hinhọ̀n okle tọn,” nuhe dọ e te wẹ yindọ, owhè dona hùn dandan whẹpo mí nido mọ hinhọ́n okle tọn. To aliho dopolọ mẹ, Jesu dohia dọ dandannu wẹ e yin dọ mẹde ni yin vivọji nado sọgan mọ Ahọluduta Jiwheyẹwhe tọn.

To godo mẹ, nado de ayihaawe depope he sọgan fọ́n do hosọ ehe ji sẹ̀ mlẹnmlẹn, Jesu dọmọ: ‘Yè ma sọgan nọma vọ́ mì ji.’ (Johanu 3:7) Sọgbe hẹ nuhe Jesu dọ, e họnwun dọ nubiọtomẹsi de—yèdọ dandannu de—wẹ e yin dọ mẹde ni yin vivọji whẹpo nido “biọ ahọluduta Jiwheyẹwhe tọn mẹ.”—Johanu 3:5.

Na vọji yin nujọnu to nukun Jesu tọn mẹ wutu, Klistiani lẹ dona hẹn ẹn diun dọ yé mọnukunnujẹ hosọ ehe mẹ ganji. Di apajlẹ, be a lẹndọ Klistiani de sọgan de nado yin vivọji ya?

[Nudọnamẹ tangan lẹ to weda 5]

“Adavo owhè hùn, e ma yinmọ mí ma sọgan mọ hinhọ̀n okle tọn”

Yinyin Vivọji—Be Nudide Mẹdetiti Tọn Wẹ Ya?

MẸNU wẹ nọ hẹn vọji yọnbasi? To whenuena sinsẹ̀ngán delẹ to tulina todoaitọ yetọn lẹ nado lẹzun Klistiani he yin vivọji, yé nọ dlẹnalọdo hogbe Jesu tọn lẹ dọmọ: “Yè ma sọgan nọma vọ́ mì jì.” (Johanu 3:7) Sinsẹ̀ngán enẹlẹ nọ yí hogbe ehelẹ zan taidi gbedide de bo nọ dọmọ, “Hiẹ dona yin vivọji!” Gbọnmọ dali, yé nọ plọn yisenọ yetọn lẹ dọ nado setonuna Jesu bo ze afọdide he jẹ lẹ nado yin vivọji pò to yelọsu si. Nuhe dọ yé te wẹ yindọ mẹdopodopo wẹ nọ basi nudide nado yin vivọji. Ṣigba be pọndohlan ehe tin to kọndopọ mẹ hẹ nuhe Jesu dọna Nikodemi ya?

Eyin mí yí sọwhiwhe do hia hogbe Jesu tọn enẹlẹ, mí na mọdọ Jesu ma to mẹplọn dọ mẹdopodopo wẹ na basi nudide vlavo nado yin vivọji kavi lala gba. Naegbọn mí do dọmọ? Hogbe Glẹki tọn he yin lilẹdo nado “vọ́ gbẹtọ jì” sọgan sọ yin lilẹdo gbẹtọ “dona yin jiji sọn aga.”a Enẹwutu, sọgbe hẹ lẹdogbedevomẹ ehe, vọji nọ wá “sọn aga”—enẹ wẹ ‘sọn Otọ́ dè.’ (Johanu 19:11; Jakobu 1:17) Mọwẹ, Jiwheyẹwhe wẹ nọ hẹn vọji yọnbasi.—1 Johanu 3:9.

Eyin mí lẹnnupọndo hodidọ lọ “sọn aga” ji, e ma na vẹawuna mí nado mọnukunnujẹ nuhewutu mẹde ma sọgan hẹn vọji ede tọn yọnbasi mẹ. Lẹnnupọndo aliho he mẹ a yin jiji te ji. Be hiẹ lọsu wẹ de nado yin jiji ya? Matin ayihaawe, lala wẹ! Na otọ́ towe wẹ jì we wutu wẹ. To aliho dopolọ mẹ, mí sọgan yin vivọji kiki eyin Jiwheyẹwhe, yèdọ Otọ́ mítọn olọn mẹ tọn, hẹn enẹ yọnbasi. (Johanu 1:13) Abajọ apọsteli Paulu do wlan dọmọ: ‘Donanọ wẹ Jiwheyẹwhe Otọ́ Jesu Klisti Oklunọ mítọn tọn, mẹhe vọ́ mí jì kẹdẹdi lẹblanu etọn gege do todido ogbẹ̀nọ de mẹ.’—1 Pita 1:3.

Be Gbedide de Wẹ Ya?

Ṣigba, mẹdelẹ sọgan kanse dọ, ‘Eyin mẹde ma sọgan basi nudide na ede nado yin vivọji, naegbọn Jesu do degbè dọmọ: “Yè ma sọgan nọma vọ́ mì jì”?’ Kanbiọ enẹ sọgbe. Hú popolẹpo, eyin gbedide de wẹ hodidọ Jesu tọn ehe, be bibiọ to mí si wẹ e te nado wà nuhe zẹ̀ nugopipe mítọn go niyẹn. Enẹ ma na ko sọgbe hẹ lẹnpọn dagbe. To whelọnu lo, nawẹ mí sọgan mọnukunnujẹ hodidọ lọ “yè ma sọgan nọma vọ́ mì jì” mẹ gbọn?

Sọwhiwhe yíyí do lẹnnupọndo hodidọ lọ ji to ogbè dowhenu tọn mẹ sọgan gọalọna mí nado mọnukunnujẹemẹ dọ hodidọ ehe ma yin gbedide de gba. Kakatimọ, whenue Jesu dọ “yè ma sọgan nọma vọ́ mì jì,” nugbo de hẹn họnwun wẹ e te poun. E dọmọ: “E jẹ dọ mì ni yin jiji sọn aga.”—Johanu 3:7, TOB.

Nado basi zẹẹmẹ lehe gbedide gbọnvona hodidọ paa do tọn, lẹnnupọndo apajlẹ ehe ji. Mí ni dọ dọ wehọmẹ lẹ sù to tòdaho de mẹ. Ṣigba dopo to wehọ ehelẹ mẹ tin na wehọmẹvi he yin tòvi lẹ kẹdẹ, na fie yé nọ nọ̀ dẹn do tòdaho lọ wutu. To gbèdopo, dẹpẹ he ma yin tòvi otò lọ tọn de dọna ogán wehọ lọ mẹ tọn dọ, “N’jlo na ze yinkọ dai to wehọ mìtọn mẹ.” Wehọmẹ-gán lọ dọna ẹn dọ, “Whẹpo hiẹ nado ze yinkọ dai, a dona yin tòvi whẹ́.” Na nugbo tọn, hogbe wehọmẹ-gán lọ tọn enẹlẹ ma yin gbedide gba. E ma to gbedena wehọmẹvi lọ dọ, “Hiẹ dona yin tòvi!” Nugbo de hẹn họnwun wẹ wehọmẹ-gán lọ te poun—yèdọ nubiọtomẹsi wehọmẹ lọ tọn. To aliho dopolọ mẹ, whenue Jesu dọ: “Yè ma sọgan nọma vọ́ mì jì,” nugbo de hẹn họnwun wẹ e te poun—yèdọ nuhe yin bibiọ to mẹde si nado “biọ ahọluduta Jiwheyẹwhe tọn mẹ.”

Hogbe godo tọn enẹlẹ—Ahọluduta Jiwheyẹwhe tọn—sọ gando adà vọji tọn devo go. Enẹ fọ́n kanbiọ lọ dote dọ, Etẹwẹ yin lẹndai vọji tọn? Gblọndo kanbiọ enẹ tọn yinyọnẹn wẹ na gọalọna mí nado mọnukunnujẹ nuhe e zẹẹmẹdo nado yin vivọji mẹ hezeheze.

[Nudọnamẹ odò tọn]

[Yẹdide to weda 6]

Dopolọ-yinyin tẹwẹ tin to aliho he mẹ gbẹtọ nọ yin jiji te po vọji po ṣẹnṣẹn?

Yinyin Vivọji—Etẹwẹ Yin Lẹndai Etọn?

MẸSUSU wẹ yise dọ mẹde dona yin vivọji whẹpo do mọ whlẹngán madopodo. Ṣigba, flin nuhe Jesu dọ gando lẹndai vọji tọn go. E dọmọ: “Adavo yè vọ́ gbẹtọ jì, ewọ ma sọgan mọ ahọluduta Jiwheyẹwhe tọn.” (Johanu 3:3) Enẹwutu, mẹde dona yin vivọji nado sọgan biọ Ahọluduta Jiwheyẹwhe tọn mẹ, e ma yin nado mọ whlẹngán gba. Mẹdelẹ sọgan kanse dọ, ‘Be e ma yin nudopolọ wẹ nado biọ Ahọluduta lọ mẹ po nado mọ whlẹngán po ya?’ Lala, yé ma yin nudopolọ. Nado mọ vogbingbọn lọ, mì gbọ mí ni gbadopọnna nuhe “ahọluduta Jiwheyẹwhe tọn” zẹẹmẹdo whẹ́.

Ahọluduta yin wunmẹ gandudu tọn de. Enẹwutu, hodidọ lọ “ahọluduta Jiwheyẹwhe tọn” zẹẹmẹdo “gandudu Jiwheyẹwhe tọn.” Biblu plọnmẹ dọ Jesu Klisti, “visunnu gbẹtọ tọn,” wẹ Ahọlu Ahọluduta Jiwheyẹwhe tọn podọ Klisti tindo gandutọgbẹ́ lẹ. (Daniẹli 7:1, 13, 14; Matiu 26:63, 64) Humọ, numimọ he yin nina apọsteli Johanu dohia dọ gandutọgbẹ́ Klisti tọn lẹ yin dide “sọn akọta lẹpo mẹ, sọn ogbè lẹpo mẹ, sọn gbẹtọ lẹpo mẹ, podọ sọn aigba lẹpo ji” podọ yé nasọ ‘duahọlu do aigba ji.’ (Osọhia 5:9, 10; 20:6) Ohó Jiwheyẹwhe tọn sọ dohia dọ mẹhe na duahọlu lẹ wleawuna “lẹngbọpa pẹvi” de, he bẹ gbẹtọ 144 000 “he yè fligọ sọn aigba ji” hẹn.—Luku 12:32; Osọhia 14:1, 3.

Fie wẹ Ahọluduta Jiwheyẹwhe tọn na dugán sọn? “Ahọluduta Jiwheyẹwhe tọn” sọ yin yiylọdọ “ahọludu olọn tọn,” ehe dohia dọ olọn mẹ wẹ Jesu po gandutọgbẹ́ etọn lẹ po na dugán sọn. (Luku 8:10; Matiu 13:11) Enẹwutu, Ahọluduta Jiwheyẹwhe tọn yin gandudu olọn mẹ tọn de he bẹ Jesu Klisti po gandutọgbẹ́ etọn he yin dide sọn gbẹtọvi lẹ mẹ po hẹn.

To whelọnu lo, etẹ dọ wẹ Jesu te to whenuena e dọ dọ mẹde dona yin vivọji whẹpo do “biọ ahọluduta Jiwheyẹwhe tọn” mẹ? Nuhe dọ e te wẹ yindọ mẹde dona yin vivọji whẹpo do dugán hẹ Klisti to olọn mẹ. Do glido, lẹndai vọji tọn wẹ nado wleawuna gbẹtọ sọha kleun delẹ na gandudu olọn mẹ tọn.

Po nuhe mí ko dọ kakajẹ din po, mí mọnukunnujẹemẹ dọ vọji yin nujọnu taun, dọ Jiwheyẹwhe wẹ nọ hẹn ẹn yọnbasi, podọ vọji wẹ zọ́n bọ gbẹtọ sọha delẹ do to yinyin awuwlena nado dugán to olọn mẹ. Ṣigba nawẹ vọji nọ wá aimẹ gbọn taun?

[Nudọnamẹ tangan lẹ to weda 7]

Lẹndai vọji tọn wẹ nado wleawuna gbẹtọ sọha kleun delẹ na gandudu olọn mẹ tọn

[Yẹdide to weda 7]

Jesu Klisti po gandutọgbẹ́ he yin dide sọn gbẹtọvi lẹ mẹ delẹ po wẹ wleawuna Ahọluduta Jiwheyẹwhe tọn

Yinyin Vivọji—Nawẹ E Nọ Wá Aimẹ Gbọn?

JESU ma dọho hẹ Nikodemi do nujọnu-yinyin vọji tọn, mẹhe nọ hẹn ẹn yọnbasi, po lẹndai etọn po kẹdẹ ji gba, ṣigba e sọ dọhodo aliho he mẹ vọji nọ wá aimẹ te ji. Jesu dọmọ: “Adavo yè yí osin po [gbigbọ] po do jì gbẹtọ ewọ ma sọgan biọ ahọluduta Jiwheyẹwhe tọn mẹ.” (Johanu 3:5) Enẹwutu, gbọn osin po gbigbọ po dali wẹ mẹde nọ yin vivọji. Ṣigba etẹwẹ “osin po gbigbọ po” zẹẹmẹdo?

“Osin po Gbigbọ po”—Etẹwẹ Yé Yin?

Na Nikodemi yin weyọnẹntọ sinsẹ̀n Ju lẹ tọn de wutu, ayihaawe matin dọ e na ko jẹakọ hẹ aliho he mẹ Owe Wiwe Heblu tọn lẹ yí hogbe lọ “gbigbọ Jiwheyẹwhe tọn” zan te—yèdọ huhlọn-yido-wazọ́n Jiwheyẹwhe tọn he sọgan yinuwado gbẹtọ lẹ ji nado wà azọ́n huhlọnnọ lẹ dotana. (Gẹnẹsisi 41:38; Eksọdusi 31:3; 1 Samuẹli 10:6) Enẹwutu, whenue Jesu yí hogbe lọ “gbigbọ” zan, Nikodemi na ko mọnukunnujẹemẹ dọ gbigbọ wiwe he yin huhlọn-yido-wazọ́n Jiwheyẹwhe tọn hodọ wẹ e te.

Etẹwẹ dogbọn osin he Jesu dlẹnalọdo dali? Lẹnnupọndo nuhe Biblu dọ jẹnukọnna hodọdopọ Jesu tọn hẹ Nikodemi podọ to enẹgodo ji. Nujijọ enẹlẹ dohia dọ Johanu Baptizitọ po devi Jesu tọn lẹ po yí osin do baptizi gbẹtọ lẹ. (Johanu 1:19, 31; 3:22; 4:1-3) Nuyiwa ehe yin yinyọnẹn gbayipe to Jelusalẹm. Enẹwutu, to whenuena Jesu to hodọ gando osin go, Nikodemi na ko mọnukunnujẹemẹ dọ osin baptẹm tọn hodọ wẹ Jesu te, e ma yin osin paa gba.

Yinyin Bibaptizi po “Gbigbọ Wiwe” Po

Eyin nado ‘yí osin do jì’ mẹde nọtena baptẹm osin tọn, etẹwẹ nado ‘yí gbigbọ do jì’ mẹde zẹẹmẹdo? Jẹnukọnna hodọdopọ Jesu tọn hẹ Nikodemi, Johanu Baptizitọ ko dohia dọ gbọnvona osin, gbigbọ lọsu na wá yí adà tangan de wà to whẹho baptẹm tọn mẹ. E dọmọ: “Yẹn yí osin do to bibaptizi mì; ṣigba ewọ wẹ na yí [gbigbọ wiwe] do baptizi mì.” (Malku 1:7, 8) Wẹndagbe-kàntọ Malku dọhodo baptẹm mọnkọtọn tintan he wá aimẹ ji. E dọmọ: “E sọ wá jọ, to azán nẹlẹ mẹ, wẹ Jesu tọ́n sọn Nazalẹti Galili tọn wá, yè sọ baptizi i sọn Johanu dè to Jọdani mẹ. Afọdoponẹji to tintọ́n sọn osin mẹ ja, e mọ olọn zẹ̀ do awe, podọ, [gbigbọ] di apoe jẹte do e ji.” (Malku 1:9, 10) To whenuena Jesu yin yinylọndo Jọdani mẹ, e yin bibaptizi po osin po. Whenue e mọ gbigbọ yí sọn olọn mẹ, whenẹnu wẹ e yin bibaptizi po gbigbọ wiwe po.

Nudi owhe atọ̀n to baptẹm Jesu tọn godo, e hẹn devi etọn lẹ deji dọmọ: “Yè na yí [gbigbọ wiwe] do baptizi mì, e ma yin azán susu sọn dinvie gba.” (Owalọ lẹ 1:5) Whetẹnu wẹ enẹ jọ?

To azán Pẹntikọsti owhe 33 W.M. tọn gbè, nudi devi Jesu tọn 120 plido owhé de gbè to Jelusalẹm. “Ogbè de sọn olọn mẹ wá ajiji di ogbè jẹhọn sinsinyẹn tọn, bosọ gọ́ ohọ̀ he mẹ yé sinai te. Owhẹ̀ odẹ́ tọn taidi miyọ́n tọn tọ́n do yé ji. . . . Yé omẹ pó sọ gọ́ na [gbigbọ wiwe].” (Owalọ lẹ 2:1-4) To azán enẹ dopolọ gbè, mẹdevo lẹ yin tulina to Jelusalẹm nado yin bibaptizi to osin mẹ. Apọsteli Pita dọna gbẹtọgun de dọmọ: “Mì lẹnvọjọ, na yè nisọ baptizi dopodopo mìtọn to oyín Jesu Klisti tọn mẹ na desẹ ylando tọn, mìwlẹ nasọ mọ nina [gbigbọ wiwe] tọn yí.” Nawẹ gbẹtọ lọ lẹ yinuwa gbọn? “Yè baptizi mẹhe yí homẹhunhun do yí ohó etọn lẹ: yè sọ hia dogọ yé ayiha foofọtọ́n nkọ to gbèdopo nẹ.”—Owalọ lẹ 2:38, 41.

Nuyiwa Voovo Awe

Etẹwẹ baptẹm awe ehelẹ dohia gando vọji go? Yé dohia dọ vọji nọ wá aimẹ gbọn nuyiwa voovo awe delẹ dali. Flindọ Jesu yin bibaptizi po osin po whẹ́. Enẹgodo e mọ gbigbọ wiwe yí. To aliho dopolọ mẹ, devi dowhenu tọn Jesu tọn lẹ yin bibaptizi po osin po whẹ́ (mẹdelẹ gbọn Johanu Baptizitọ lọ dali), podọ to enẹgodo, yé mọ gbigbọ wiwe yí. (Johanu 1:26-36) Mọdopolọ, devi yọyọ 3 000 lẹ yin bibaptizi po osin po whẹ́, podọ to enẹgodo yé mọ gbigbọ wiwe yí.

Eyin mí lẹnnupọndo baptẹm he wá aimẹ to Pẹntikọsti 33 W.M. ji, nawẹ mí dona donukun dọ vọji ni wá aimẹ to egbehe gbọn? To aliho dopolọ he mẹ e wá aimẹ na apọsteli po devi dowhenu tọn Jesu tọn lẹ po te wẹ. Jẹnukọn whẹ́, mẹde dona lẹnvọjọ sọn ylando etọn lẹ mẹ, jo jijọ ylankan etọn lẹ do, bo klan gbẹzan etọn do wiwe na Jehovah nado sẹ̀n ẹn, bosọ do klandowiwe etọn hia to gbangba gbọn baptẹm osin tọn dali. Enẹgodo, eyin Jiwheyẹwhe de e nado dugán to Ahọluduta Etọn mẹ, e nọ yin dide gbọn gbigbọ wiwe dali. Adà tintan to nuyiwa awe ehelẹ mẹ (nado yin bibaptizi po osin po) yin nudide mẹlọ lọsu tọn; ṣigba Jiwheyẹwhe wẹ nọ hẹn adà awetọ lọ (nado yin bibaptizi po gbigbọ po) yọnbasi. Eyin mẹde yí baptẹm awe ehelẹ, whenẹnu wẹ e yin vivọji.

Ṣigba, naegbọn Jesu do yí hogbe lọ ‘yí osin po gbigbọ po do jì gbẹtọ’ zan to hodọdopọ etọn hẹ Nikodemi mẹ? E wàmọ nado zinnudeji dọ mẹhe yin bibaptizi gbọn osin po gbigbọ po dali lẹ na tindo numimọ diọdo ayidego tọn de tọn. Hosọ he bọdego na gbadopọnna adà vọji tọn enẹ.

[Yẹdide to weda 9]

Johanu baptizi Islaelivi he lẹnvọjọ lẹ po osin po

Yinyin Vivọji—Etẹwẹ E Nọ Wadotana?

NAEGBỌN Jesu do yí hogbe lọ ‘yí gbigbọ do jì gbẹtọ’ zan to whenue e to hodọ gando yinyin bibaptizi po gbigbọ wiwe po go? (Johanu 3:5) To whenuena hogbe lọ “jiji” yin yiyizan to yẹhiadonu-liho, e nọ zẹẹmẹdo “bẹjẹeji,” taidi whenue yè to hodọ gando “jiji akọta de tọn” go. Gbọnmọ dali, hogbe lọ “vọji” zẹẹmẹdo “bẹjẹeji yọyọ” de. Enẹwutu, hogbe yẹhiadonu tọn lọ lẹ, “jiji” po “vọji” po dohia dọ bẹjẹeji yọyọ de na wá aimẹ to haṣinṣan he tin to mẹhe yin dide gbọn gbigbọ wiwe dali lẹ po Jiwheyẹwhe po ṣẹnṣẹn mẹ. Nawẹ diọdo ayidego tọn enẹ nọ wá aimẹ gbọn?

To whenue apọsteli Paulu to zẹẹmẹ basi do lehe Jiwheyẹwhe nọ wleawuna gbẹtọ lẹ na gandudu olọn mẹ tọn do ji, e yí apajlẹ he yin didesọn gbẹzan whẹndo tọn mẹ de zan. E wlanwe hlan Klistiani azán etọn gbè tọn lẹ dọ yé na lẹzun “sọdodovi,” podọ gbọnmọ dali, Jiwheyẹwhe na yinuwa hẹ yé taidi “ovi lẹ.” (Galatianu lẹ 4:5; Heblu lẹ 12:7) Nado mọ lehe apajlẹ sọdodovi tọn na gọalọna mí do nado mọnukunnujẹ diọdo wunmẹ he nọ wá aimẹ to whenue mẹde yin bibaptizi po gbigbọ wiwe po mẹ, vọ́ nulẹnpọndo apajlẹ dẹpẹ he jlo na ze yinkọ dai to wehọ he tin na tòvi lẹ kẹdẹ mẹ lọ ji.

Diọdo He Sọdodovi Nọ Hẹnwa

To apajlẹ enẹ mẹ, dẹpẹ lọ ma penugo nado ze yinkọ dai to wehọ lọ mẹ na e ma yin tòvi wutu. Todin, mí ni dọ dọ diọdo titengbe de wá aimẹ to gbèdopo. Dawe he yin tòvi de yí i do whẹndo etọn mẹ taidi sọdodovi sọgbe hẹ osẹ́n. Nawẹ enẹ yinuwado ninọmẹ dẹpẹ lọ tọn ji gbọn? Na dẹpẹ lọ lẹzun sọdodovi todin wutu, vlavo e sọgan tindo jlọjẹ dopolọ hẹ jọja tòvi devo lẹ, bo tlẹ sọgan ze yinkọ dai to wehọ lọ mẹ. Sọdodovi he e lẹzun zọ́n bọ ninọmẹ etọn diọ pete.

Ehe gọalọna mí nado mọnukunnujẹ nuhe nọ wá aimẹ to whenuena mẹde yin vivọji mẹ to gigọ́ mẹ. Lẹnnupọndo dopolọ-yinyin he tin to apajlẹ ehe po vọji po ṣẹnṣẹn delẹ ji. Dẹpẹ lọ na yin alọkẹyi to wehọ lọ mẹ kiki eyin e jẹ nubiọtomẹsi wehọ lọ mẹ tọn kọ̀n—enẹ wẹ nado yin tòvi. Etomọṣo, jọja lọ na ede ma sọgan jẹ nubiọtomẹsi enẹ kọ̀n. To aliho dopolọ mẹ, gbẹtọvi delẹ na dugán to Ahọluduta Jiwheyẹwhe tọn, kavi gandudu olọn mẹ tọn mẹ, kiki eyin yé jẹ nubiọtomẹsi lọ kọ̀n—enẹ wẹ nado yin “vivọji.” Etomọṣo, yé ma sọgan jẹ nubiọtomẹsi enẹ kọ̀n na yede gba, na Jiwheyẹwhe wẹ nọ hẹn vọji yọnbasi.

Etẹwẹ diọ ninọmẹ dẹpẹ lọ tọn? Na e lẹzun sọdodovi sọgbe hẹ osẹ́n wutu wẹ. E họnwun dọ nuyiwa enẹ ma diọ gbẹtọ-yinyin dẹpẹ lọ tọn gba. Mẹhe e yin whẹpo do lẹzun sọdodovi lọ janwẹ e pò to yinyin. To whenue dẹpẹ lọ ko jẹ nubiọtomẹsi he sọgbe hẹ osẹ́n lọ lẹ kọ̀n, e mọ jlọjẹ tòvi-yinyin tọn yọyọ de yí. Na nugbo tọn, e tindo numimọ bẹjẹeji yọyọ de tọn—taidi dọ e yin vivọji wẹ nkọ. E lẹzun ovi dawe lọ tọn, ehe na ẹn jlọjẹ lọ nado yin alọkẹyi to wehọ lọ mẹ podọ nado yin apadewhe whẹndo otọ́ mẹgopọntọ etọn tọn.

To aliho dopolọ mẹ, Jehovah diọ ninọmẹ gbẹtọvi mapenọ delẹ tọn gbọn afọdide he sọgbe hẹ osẹ́n de zize dali nado yí yé do basi sọdodovi etọn. Apọsteli Paulu he yin dopo to pipli enẹ mẹ wlan hlan yisenọ hatọ etọn lẹ dọmọ: ‘Gbigbọ sọdodovi tọn wẹ mì yí, ehe tọn dali mí to awhádo ylọ, Abba, Otọ́. Gbigbọ lọsu sọ to kunnude hẹ gbigbọ mítọn, dọ ovi Jiwheyẹwhe tọn wẹ mí.’ (Lomunu lẹ 8:15, 16) Mọwẹ, gbọn nuyiwa sọdodovi tọn lọ gblamẹ, Klistiani enẹlẹ ko lẹzun apadewhe whẹndo Jiwheyẹwhe tọn, kavi “ovi Jiwheyẹwhe tọn lẹ.”—1 Johanu 3:1; 2 Kọlintinu lẹ 6:18.

Na taun tọn, nugbo lọ dọ yé lẹzun sọdodovi Jiwheyẹwhe tọn ma diọ gbẹtọ-yinyin yetọn gba, na yé gbẹsọ yin mapenọ. (1 Johanu 1:8) Ṣigba, dile Paulu zinnudeji yinukọn dogọ do, to whenuena yé ko jẹ nubiọtomẹsi sọdodovi tọn lọ kọ̀n, yé mọ jlọjẹ tòvi-yinyin tọn yọyọ de yí. To ojlẹ dopolọ mẹ, gbigbọ Jiwheyẹwhe tọn nọ na nujikudo sọdodovi enẹlẹ dọ yé na nọgbẹ̀ hẹ Klisti to olọn mẹ. (1 Johanu 3:2) Nujikudo dolido enẹ he gbigbọ wiwe na yé nọ hẹn yé tindo pọndohlan devo pete gando ogbẹ̀ go. (2 Kọlintinu lẹ 1:21, 22) Mọwẹ, yé nọ tindo numimọ bẹjẹeji yọyọ de tọn—taidi dọ yé yin vivọji wẹ nkọ.

Biblu dọho gando sọdodovi Jiwheyẹwhe tọn lẹ go dọmọ: “Yé na yin yẹwhenọ Jiwheyẹwhe tọn lẹ po Klisti tọn po, bo nasọ duahọlu hẹ ẹ họ̀ owhe fọtọ́n.” (Osọhia 20:6) Sọdodovi Jiwheyẹwhe tọn lẹ na mọ otẹn de yí taidi ahọlu hẹ Klisti to Ahọluduta Jiwheyẹwhe tọn, kavi gandudu olọn mẹ tọn mẹ. Apọsteli Pita dọna yisenọ hatọ lẹ dọ yé na mọ “ogudu magble, maflu, he ma nọ kupẹ́, he yè whlá na [yé] to olọn mẹ” de yí. (1 Pita 1:3, 4) Ogú họakuẹ nankọ die!

Ṣigba, whẹho gandudu tọn ehe sọ fọ́n kanbiọ de dote. E yindọ mẹhe yin vivọji lẹ na duahọlu to olọn mẹ, mẹnu lẹ ji wẹ yé na dugán do? Kanbiọ enẹ na yin dogbapọnna to hosọ he bọdego mẹ.

[Yẹdide to weda 10]

Etẹwẹ Paulu dọ gando sọdodovi go?