Plọnazọ́n Ovi Towe lẹ Nado Lẹzun Lizọnyizọnwatọ
1. Etẹwẹ Psalm 148:12, 13 whàn mẹjitọ Klistiani lẹ nado nọ wà?
1 Jehovah basi oylọna jọja lẹ nado nọ pà ẹ. (Ps. 148:12, 13) Enẹwutu, mẹjitọ Klistiani lẹ nọ wà nususu hugan nugbo Biblu tọn po osẹ́n walọ dagbe tọn Jiwheyẹwhe tọn lẹ po pinplọn ovi yetọn lẹ. Yé sọ nọ plọnazọ́n yé nado lẹzun lizọnyizọnwatọ wẹndagbe lọ tọn. Nawẹ yé sọgan nọ wà ehe vudevude gbọn?
2. Nawẹ apajlẹ dagbe mẹjitọ de tọn sọgan yinuwado ovi etọn lẹ ji gbọn?
2 Apajlẹ Dagbe Zizedai: Whẹdatọ Gideoni dọna sunnu 300 etọn lẹ dọmọ: “Mì nọ pọ́n mi, bo nọ wà mọkẹdẹ.” (Whẹ. 7:17) To jọwamọ-liho, ovi lẹ nọ doayi nuhe mẹjitọ yetọn lẹ to wiwà go bo nọ hodo apajlẹ yetọn. Otọ́ de nọ wà ozán-zọ́n, ṣigba kakati nado nọ mlọnai eyin e lẹkọwa whégbè to Sibigbe afọnnu lẹ, e nọ plan ovi etọn lẹ yì lizọnyizọn lọ mẹ mahopọnna nuṣikọ sinsinyẹn. Gbọn nuyiwa enẹ tata dali, ewọ ko to ovi etọn lẹ plọn dọ lizọnyizọn lọ wẹ dona tin to otẹn tintan mẹ. (Mat. 6:33) Be ovi towe lẹ nọ doayi e go dọ hiẹ nọ yí ayajẹ do tindo mahẹ to adà voovo sinsẹ̀n-bibasi tọn lẹ taidi dẹ̀hiho, Biblu hihia, gblọndo nina, po yẹwhehodidọ po mẹ ya? Nugbo wẹ dọ hiẹ ma sọgan ze apajlẹ pipé dai gba. Ṣigba, ovi towe lẹ na yin whinwhàn nado yinuwa to kọndopọ mẹ hẹ vivẹnudido towe nado plọn yé na yé nido sẹ̀n Jehovah, eyin yé mọ vivẹnu he a nọ do nado sẹ̀n ẹn.—Deut. 6:6, 7; Lom. 2:21, 22.
3. Yanwle gbigbọmẹ tọn debọdo-dego tẹlẹ wẹ mẹjitọ lẹ dona gọalọna ovi yetọn lẹ nado ze donukọnna yede bo jẹ yé kọ̀n?
3 Yanwle Debọdo-Dego Lẹ: Mẹjitọ lẹ nọ do magbọjẹ na yede nado plọn zọnlinzinzin, hodidọ, nusisọ́, po nudevo lẹ po ovi yetọn lẹ. Yé nọ ze yanwle yọyọ lẹ donukọnna ovi lẹ to whenue diọdo titengbe lẹ wá aimẹ to gbẹzan yetọn mẹ. Eyin mẹjitọ lẹ yin Klistiani, yé sọ nọ gọalọna ovi yetọn lẹ nado nọ ze yanwle gbigbọmẹ tọn he sọgbe hẹ owhe po nugopipe yetọn po lẹ donukọnna yede bo jẹ yé kọ̀n. (1 Kọl. 9:26) Be hiẹ nọ plọn ovi towe lẹ nado nọ na gblọndo to hogbe yetọn titi mẹ podọ nado nọ wleawuna azọ́n he yé tindo to Wehọmẹ Lizọnyizọn Yẹwhehọluduta tọn mẹ lẹ na yede ya? (Ps. 35:18) Be hiẹ nọ plọn yé nado tindo mahẹ to adà voovo lizọnyizọn lọ tọn lẹ mẹ ya? Be hiẹ nọ ze yanwle baptẹm po sinsẹ̀nzọn whenu-gigọ́ tọn po donukọnna yé ya? Be hiẹ nọ gọalọna yé nado dogbẹ́ hẹ wẹndagbe-jlatọ zohunhunnọ podọ ayajẹnọ he sọgan na tuli yé lẹ ya?—Howh. 13:20.
4. Nawẹ ovi lẹ nọ mọaleyi gbọn eyin yé tindo mẹjitọ he nọ plọnazọ́n yé to lizọnyizọn lọ mẹ sọn ovu whenu?
4 Psalm-kantọ lọ dọmọ: “Jiwheyẹwhe E, hiẹ wẹ plọn mi sọn ovu whenu ṣie: podọ jẹ dinvie yẹn ko to ohó azọ́n towe he jiawu tọn dọ.” (Ps. 71:17) Bẹ azọ́npinplọn ovi towe lẹ jẹeji sọn ovu whenu nado lẹzun lizọnyizọnwatọ. Matin ayihaawe, dodonu gbigbọmẹ tọn he hiẹ gọalọna yé nado doai na hẹn ale wá na yé kaka biọ mẹhowhe mẹ!—Howh. 22:6.