Lilatọ Ahọluduta Tọn lẹ Na Linlin

Yè De Masin sọn Yinkọ Jiwheyẹwhe Tọn Go

OHÓ Jiwheyẹwhe tọn, Biblu, dọmọ: “Na walọ mìtọn ni yin dagbe to Kosi lẹ ṣẹnṣẹn; dọ, le yé to hodọdo mì go di ylanwatọ, gbọn azọ́n dagbe mìtọn dali he yé na to pinpọ́n, na yé nido pagigona Jiwheyẹwhe to azán dlapọn tọn gbè.” (1 Pita 2:12) Enẹwutu, Klistiani nugbo lẹ dovivẹnu nado hẹn walọ dagbe go nado sọgan dapana vlẹko hinhẹnwa oyín Jehovah tọn ji.

To lẹdo he tin to olá Zambie tọn de he nọ yin yiylọdọ Senanga mẹ, ladio mẹplọntọ wehọmẹ tọn de tọn yin finfin to ohọ̀ etọn mẹ. To whenuena e yindọ Kunnudetọ Jehovah tọn lẹ ko to yẹwhehodọ to lẹdo etọn mẹ, dawe lọ sawhẹ ajojijẹ lọ tọn dokọna yé. E jẹwhẹ whẹho lọ tọn na ponọ lẹ, bo dọ dọ Kunnudetọ lẹ ko fìn ladio etọn. Taidi kunnudenu de dọ Kunnudetọ lẹ ko wá owhé etọn gbè, e dè alọnuwe pẹvi he e ko mọ to kọ́mẹ tọ́n. Etomọṣo, ponọ lẹ gbẹ́ nado kẹalọyi nuhe e dọ. Yé na ẹn ayinamẹ nado lẹkọ bo basi dodinnanu mlẹnmlẹn dogọ.

Kunnudetọ he dọyẹwheho to lẹdo owhé mẹplọntọ lọ tọn gbè to azán enẹ gbè lẹ yin tudohomẹna gbọn pipli mẹho lẹ tọn dali nado yì bo dọho hẹ mẹplọntọ lọ gando whẹho lọ go. Delẹ to mẹmẹsunnu lọ lẹ mẹ yì bo dọho hẹ ẹ, bo basi zẹẹmẹ dọ yé jlo nado de masin sọn oyín Jehovah tọn go. To hodọdopọ yetọn whenu, yé dọna ẹn dọ yé dukosọhẹ sunnu jọja de to ohọ̀ etọn mẹ bo yí alọnuwe pẹvi de na ẹn. Sọn zẹẹmẹ bibasi yetọn mẹ, mẹplọntọ lọ yọ́n visunnu lọ. Na nugbo tọn, hagbẹ ṣọṣi dopolọ tọn wẹ yé yin. Mẹplọntọ lọ dọho hẹ visunnu jọja lọ, ṣigba e gbẹ́ whẹ̀sadokọnamẹ lọ dai. Enẹgodo mẹplọntọ lọ dọ whẹho lọ na mẹjitọ visunnu jọja lọ tọn lẹ bosọ lẹkọwa whégbè. To ganhiho dopo gblamẹ, onọ̀ visunnu lọ tọn hẹn ladio heyin finfin lọ lẹkọ wá.

Yin whinwhàn gbọn winyan dali, mẹplọntọ lọ dọnsẹpọ pipli mẹho lẹ tọn bosọ biọ jona na whẹsadokọnamẹ lalo tọn he e basi wutu. Mẹho lẹ kẹalọyi ovẹvivẹ etọn bosọ biọ dọ kọdetọn dodinnanu etọn tọn ni yin hinhẹnzun yinyọnẹn na mẹlẹpo bọ mẹlẹpo nado yọnẹn dọ Kunnudetọ lẹ yin homẹvọnọ. Enẹwutu, nulila de yin bibasi to wehọmẹ he de masinkọndomẹgo lẹpo sẹ̀ sọn oyín Jehovah tọn go. Kunnudetọ Jehovah tọn lẹ sọgan zindonukọn nado to yẹwhehodọ po awubibọ po to lẹdo lọ mẹ.

[Yẹdide Otò Tọn/Yẹdide to weda 19]

AFLIKA

Zambie

[Asisa Yẹdide Tọn]

Mountain High Maps® Copyright © 1997 Digital Wisdom, Inc.