Ojlo Jiwheyẹwhe tọn wẹ yindọ mí ni nọgbẹ̀ to jijọho po ayajẹ po mẹ to paladisi aigba ji tọn de mẹ kakadoi!

Ṣigba, hiẹ sọgan kanse dọ, ‘Nawẹ enẹ sọgan jọ gbọn?’ Biblu dọ dọ Ahọluduta Jiwheyẹwhe tọn wẹ na hẹn ehe yọnbasi, podọ ojlo Jiwheyẹwhe tọn wẹ yindọ gbẹtọ lẹpo ni plọnnu gando Ahọluduta enẹ po lẹndai Etọn na gbẹtọ lẹ po go.—Salmu lẹ 37:11, 29; Isaia 9:7.

Ojlo Jiwheyẹwhe tọn wẹ yindọ mí ni duvivi ogbẹ̀ tọn.

Kẹdẹdile otọ́ dagbe de nọ jlo onú dagbe na ovi etọn lẹ do, Otọ́ mítọn olọn mẹ tọn nọ jlo dọ mí ni duvivi ayajẹ tọn kakadoi. (Isaia 48:17, 18) Ewọ ko dopagbe dọ mẹhe “wà ojlo Jiwheyẹwhe tọn na gbọṣi aimẹ kakadoi.”—1 Johanu 2:17.

Ojlo Jiwheyẹwhe tọn wẹ yindọ mí ni nọ zinzọnlin gbọn ali etọn lẹ ji.

Biblu dọ dọ ojlo Mẹdatọ mítọn tọn wẹ nado “plọn aliho etọn lẹ mí,” na mí nido nọ “zinzọnlin gbọn ali etọn lẹ ji.” (Isaia 2:2, 3) E ko wleawuna ‘gbẹtọ lẹ na oyín etọn’ nado hẹn ojlo etọn zun yinyọnẹn to aigba lẹpo ji.—Owalọ lẹ 15:14.

Ojlo Jiwheyẹwhe tọn wẹ yindọ mí ni nọ sẹ̀n ẹn to pọmẹ.

Sinsẹ̀n-bibasi wiwe-ṣeke Jehovah tọn nọ kọ̀n gbẹtọ lẹ dopọ to owanyi nugbo mẹ kakati nado klan yé. (Johanu 13:35) Mẹnu lẹ wẹ nọ plọnnumẹ to filẹpo to egbehe gando lehe yè nọ sẹ̀n Jiwheyẹwhe to pọmẹ do go? Mí basi oylọna we nado dín gblọndo na kanbiọ ehe to alọnuwe ehe mẹ.

Kunnudetọ Jehovah tọn nẹmu wẹ a yọnẹn? Delẹ to mí mẹ sọgan yin kọmẹnu, azọ́nwatọgbẹ́ kavi klasigbẹ́ towe lẹ. Kavi mí sọgan ko dọhodopọ hẹ we do Biblu ji pọ́n. Omẹ nankọ wẹ mí yin na taun tọn, podọ naegbọn mí do nọ má nuyise mítọn lẹ hẹ mẹdevo lẹ?

Mí yin gbẹtọ paa di mẹdevo lẹ. Mí wá sọn ninọmẹ po lẹdo voovo lẹ po mẹ. Delẹ to mí mẹ ko yin hagbẹ sinsẹ̀n devo tọn dai, bọ mẹdelẹ ma tlẹ yise to Jiwheyẹwhe mẹ dai. Ṣigba, whẹpo mí do lẹzun Kunnudetọ, mímẹpo wẹ ko yí whenu do gbadopọnna nuplọnmẹ Biblu tọn lẹ po sọwhiwhe po. (Owalọ lẹ 17:11) Mí kọngbedopọ hẹ nuhe mí plọn lẹ, bọ to enẹgodo, mí basi nudide na míde nado sẹ̀n Jehovah Jiwheyẹwhe.

Mí nọ mọaleyi sọn Biblu pinplọn mẹ. Taidi mẹdevo lẹ, mí nọ pehẹ nuhahun lẹ bo nọ doakọnna madogán mítọn titi lẹ. Ṣigba, gbọn vivẹnudido nado nọ yí nunọwhinnusẹ́n Biblu tọn lẹ zan egbesọegbesọ dali, mí ko mọ diọdo ayidego tọn to gbẹzan mítọn mẹ. (Salmu lẹ 128:1, 2) Dopo to whẹwhinwhẹ́n lọ lẹ mẹ niyẹn, ehe wutu mí do nọ má onú dagbe he mí ko plọn to Biblu mẹ lẹ hẹ mẹdevo lẹ.

Mí nọ nọgbẹ̀ sọgbe hẹ nunọwhinnusẹ́n Jiwheyẹwhe tọn lẹ. Nunọwhinnusẹ́n he Biblu plọnmẹ ehelẹ nọ gọalọ nado zan gbẹzan dagbe bo tindo sisi na mẹdevo lẹ, gọna jẹhẹnu delẹ taidi nugbodidọ po homẹdagbe po. Yé nọ yidogọna agbasalilo bo nọ hẹnmẹ zun tòvi dagbe, bosọ nọ na tuli pọninọ to whẹndo mẹ po walọ dagbe po. Na mí kudeji dọ “Jiwheyẹwhe ma yin mẹnukuntahopọntọ” wutu, mí nọ pọ́n míde hlan taidi whẹndo lẹdo aihọn pé tọn de he tin to kọndopọ mẹ nugbonugbo to gbigbọ-liho bọ kinklan akọ̀ po tonudidọ po tọn ma nọ tin to ṣẹnṣẹn na mí. Dile etlẹ yindọ mí yin gbẹtọ paa di mẹdevo lẹ, mí gbọnvo taidi pipli de.—Owalọ lẹ 4:13; 10:34, 35.

• Etẹwẹ Kunnudetọ Jehovah tọn lẹ tindo to kọndopọ mẹ hẹ mẹdevo lẹ?

• Nunọwhinnusẹ́n tẹlẹ wẹ Kunnudetọ lẹ ko plọn sọn Biblu mẹ?

Mẹsusu wẹ nọ lẹndọ yinkọ lọ Kunnudetọ Jehovah tọn lẹ yin oyín sinsẹ̀n yọyọ de tọn. Ṣigba, sọn nuhe hugan owhe 2700 die gbọ́n wẹ devizọnwatọ Jiwheyẹwhe nugbo dopo kẹdẹ lọ tọn lẹ ko nọ yin alọdlẹndo taidi “kunnudetọ” etọn lẹ. (Isaia 43:10-12) Kakajẹ 1931, Biblu Plọntọ lẹ wẹ mí nọ yin yiylọdọ. Naegbọn mí do yí yinkọ lọ Kunnudetọ Jehovah tọn lẹ?

Yinkọ lọ do Jiwheyẹwhe mítọn hia. Sọgbe hẹ alọnuwe hohowhenu tọn lẹ, yinkọ Jiwheyẹwhe tọn, Jehovah sọawuhia whla fọtọ́n susu to Biblu mẹ. To lẹdogbedevomẹ susu mẹ, yinkọ ehe ko yin tẹndiọna gbọn tẹnmẹ-yinkọ lẹ dali taidi Oklunọ kavi Jiwheyẹwhe. Ṣogan, Jiwheyẹwhe nugbo lọ ko de ede hia Mose gbọn yinkọ etọn titi Jehovah yiyizan dali dọmọ: “Enẹ wẹ oyín ṣie kakadoi.” (Eksọdusi 3:15) Gbọnmọ dali, e klan ede dovo na yẹwhe lalo lẹpo. Mí nọ doawagun dọ mí tindo oyín wiwe Jiwheyẹwhe tọn to ota.

Yinkọ lọ do azọ́ndenamẹ mítọn hia. Bẹsọn dawe dodonọ lọ Abẹli ji, omẹ hohowhenu tọn susu wẹ ko dekunnu gando yise yetọn to Jehovah mẹ go. To owhe kanweko lẹ gblamẹ, Noa, Ablaham, Sala, Mose, Davidi, po mẹdevo lẹ po ko lẹzun apadewhe “aslọ daho kunnudetọ lẹ tọn” ehe tọn. (Heblu lẹ 11:4–12:1) Kẹdẹdile mẹde sọgan dekunnu do homẹvọnọ de tamẹ to whẹdọhọsa do, gbemima mítọn wẹ nado hẹn nugbo lọ zun yinyọnẹn gando Jiwheyẹwhe mítọn go.

Mí to apajlẹ Jesu tọn hodo. Biblu ylọ Jesu dọ “kunnudetọ nugbonọ po nugbo po.” (Osọhia 3:14) Jesu lọsu dọ dọ emi ‘hẹn oyín Jiwheyẹwhe tọn zun yinyọnẹn’ bo to ‘kunnude gando nugbo lọ go’ do Jiwheyẹwhe tamẹ. (Johanu 17:26; 18:37) Enẹwutu, hodotọ nugbo Klisti tọn lẹ dona tindo oyín Jehovah tọn to ota bo nọ hẹn ẹn zun yinyọnẹn na mẹdevo lẹ. Nuhe Kunnudetọ Jehovah tọn lẹ to vivẹnudo nado wà niyẹn.

• Naegbọn Biblu Plọntọ lẹ do yí yinkọ lọ Kunnudetọ Jehovah tọn lẹ?

• Sọn whetẹnu gbọ́n wẹ Jehovah ko tindo kunnudetọ lẹ to aigba ji?

• Mẹnu wẹ yin Kunnudetọ Jehovah tọn daho hugan lọ?