Jesu ‘Ze Whẹdida Dodo Dai to Aihọn Mẹ’

1, 2. Nujijọ tẹ whenu wẹ Jesu gblehomẹ te, podọ etẹwutu wẹ?

JESU do homẹgble hia—ṣigba owhẹ̀ etọn whẹ́n. E sọgan paṣa we dọ e na wàmọ, na dawe homẹmimiọnnọ de wẹ e yin wutu. (Matiu 21:5) Jesu dava homẹgble etọn taun, yèdọ homẹgble dodo tọn.a Ṣigba etẹwẹ gblehomẹna dawe jijọhonọ ehe sọmọ? Whẹho whẹdida mawadodo tọn he sinyẹn taun de wẹ.

² Tẹmpli Jelusalẹm tọn yin nuhọakuẹ titengbe de na Jesu. To aihọn lọ pete mẹ, finẹ wẹ yin ofi wiwe dopo akàn lọ heyin kinklandowiwe na sinsẹ̀n-bibasi Otọ́ etọn olọn mẹ tọn. Ju lẹ nọ zin gbejizọnlin sọn otò dindẹn lẹ mẹ nado wá basi sinsẹ̀n to finẹ. Kosi he dibusi Jiwheyẹwhe lẹ lọsu, nọ wá awánu tẹmpli lọ tọn heyin kinklandovo na yé lọ mẹ. Ṣigba to bẹjẹeji lizọnyizọn Jesu tọn whenu, e biọ lẹdo tẹmpli lọ tọn mẹ bo mọ awuhiọnu de. Etẹ nkọ, filọ taidi ahi de mẹ, e ma taidi ohọ̀ sinsẹ̀n-bibasi tọn de gba! E gọ́ na ajọwatọ lẹ po akuẹdiọtọ lẹ po. Ṣigba, whẹdida mawadodo tẹwẹ tin to enẹ mẹ? Na sunnu ehelẹ, yé diọ tẹmpli Jiwheyẹwhe tọn zun fihe yé nọ sloalọna gbẹtọ lẹ—bo tlẹ nọ jẹajodo yé te. Gbọnna?—Johanu 2:14.

3, 4. Mẹtitafu zẹjlẹgo tẹwẹ to jijọ to ohọ̀ Jehovah tọn mẹ, podọ afọdide tẹwẹ Jesu ze nado vọ́ ninọmẹ lọ jlado?

³ Sinsẹ̀ngán lẹ ko hẹn ẹn zun osẹ́n dọ gànkuẹ wunmẹ dopo de wẹ sọgan yin yíyí do sú takuẹ tẹmpli mẹ tọn. Na osẹ́n enẹ wutu, jonọ lẹ dona diọ akuẹ yetọn nado yí gànkuẹ mọnkọtọn. Enẹwutu, akuẹdiọtọ lẹ tẹ́ tafo yetọn lẹ do tẹmpli lọ lọsu mẹ, bo nọ duale to akuẹ he yé diọnamẹ lẹ ji. Ajọ́ kanlin lẹ sisà tọn lọsu to ale hẹnwa na yé taun. Jonọ he ja nado wá sanvọ́ lẹ sọgan họ̀ onú ehelẹ sọn tòdaho lọ mẹ, ṣigba eyin yé wàmọ ogán tẹmpli mẹ tọn lẹ nọ saba gbẹ́ avọ́nunina lọ dai dọ e ma sọgbe. Ṣigba, jide tin dọ avọ́nunina he yin hihọ̀ to lẹdo tẹmpli lọ tọn mẹ to finẹ na yin alọkẹyi. Na e lẹzun dandan na gbẹtọ lẹ nado họ̀ onú lọ lẹ wutu, ajọwatọ lẹ nọ doahi vivẹ taun na onú lẹ to whedelẹnu.b Ehe ylanhu ajọwiwa ale dù zẹjlẹgo tọn. Ajojijẹ tlọlọ de wẹ e yin!

⁴ Jesu ma sọgan yí nukun pẹvi do pọ́n whẹdida mawadodo mọnkọtọn gba. Owhé Otọ́ etọn tọn wẹ! Enẹwutu, e yí okàn tlẹ́lẹ de bo yí do yàn oyìn po lẹngbọ lọ lẹ po jẹgbonu sọn tẹmpli lọ mẹ. Enẹgodo e dlí yì akuẹdiọtọ lẹ dè bo takiti na tafo yetọn lẹ. Yí nukun homẹ tọn do pọ́n lehe gànkuẹ enẹ lẹpo gbà hányán do aigba titlẹ́ lọ ji do! Jesu degbè dó sunnu he to apoe sà lẹ po hogbe sinsinyẹn po dọmọ: “Mì [bẹ] onú helẹ sọn ofi.” (Johanu 2:15, 16) Mẹdepope matin he sọgan jẹagọdo dawe adọgbotọ ehe.

“Otọ́ Etọn Wẹ E Di”

5-7. (a) Nawẹ gbẹzan Jesu tọn he jẹnukọnna lilẹzun gbẹtọvi de yinuwado nukunnumọjẹnumẹ etọn na nuhe dù whẹdida dodo ji gbọn, podọ etẹwẹ mí sọgan plọn sọn apajlẹ etọn pinplọn mẹ? (b) Nawẹ Klisti hoavùn sọta whẹdida mawadodo he gando nupojipetọ-yinyin po oyín Jehovah tọn po go gbọn?

⁵ Na nugbo tọn, ajọwatọ lọ lẹ sọ lẹkọwa. To nudi owhe atọ̀n godo, Jesu sọ vọ́ hodọ gando whẹdida mawadodo tọn dopolọ go. To ojlẹ ehe mẹ, e yihodọ sọn hogbe Jehovah lọsu tọn lẹ he e yí do gblewhẹdo mẹhe hẹn ohọ̀ Etọn zun “odò ajotọ lẹ tọn” lọ mẹ. (Matiu 21:13; Jẹlemia 7:11) Mọwẹ, to whenuena Jesu mọ mẹtitafu zẹjlẹgo gbẹtọ lọ lẹ tọn po lehe yé to tẹmpli Jiwheyẹwhe tọn hẹnflu po do, e tindo numọtolanmẹ dopolọ he Otọ́ etọn tindo. Ehe ma yin nupaṣamẹ de gba! Na Jesu ko yin pinplọn gbọn Otọ́ etọn olọn mẹ tọn dali na owhe livi-livi madosọha lẹ wutu. Taidi kọdetọn de, whẹdida dodo Jehovah tọn ko yin didó do ahun mẹ na ẹn. E lẹzun apajlẹ yinukundomọ de na oló lọ he dọ, “Otọ́ etọn wẹ e di.” Enẹwutu eyin mí jlo na mọnukunnujẹ jẹhẹnu Jehovah tọn heyin whẹdida dodo mẹ hezeheze, e na yọnhugan nado lẹnnupọndo apajlẹ Jesu Klisti tọn lẹ ji.—Johanu 14:9, 10.

⁶ Ovi dopo akàn Jehovah tọn tin to finẹ to whenuena Satani gbọn whẹsadokọnamẹ dali ylọ Jehovah Jiwheyẹwhe dọ lalonọ bo diọnukunsọ jlọjẹ gandudu Etọn tọn. Mẹhẹngble nankọ die! Ovi lọ sọ sè alọsọakọ́n Satani tọn to godo mẹ dọ mẹdepope ma sọgan sẹ̀n Jehovah sọn owanyi mẹ, matin ṣejannabi gba. Na jide tọn, whẹsadokọnamẹ ehelẹ vẹna Ovi lọ taun. Lehe e na ko hùnhomẹ na ẹn do sọ nado yọnẹn dọ emi wẹ yin azọ́ndena nado do whẹsadokọnamẹ lọ lẹ hia di lalo! (2 Kọlintinu lẹ 1:20) Nawẹ e na wà enẹ gbọn?

⁷ Dile mí mọ to Weta 14tọ mẹ do, Jesu Klisti na gblọndo tẹgbẹ̀ tọn, podọ godo tọn na lalo he Satani dó gando tenọgligo-hinhẹn nudida Jehovah tọn lẹ tọn go. Gbọnmọ dali, Jesu ze dodonu lọ dai na whẹsuna nupojipetọ-yinyin Jehovah tọn po klandowiwe oyín Etọn tọn po. Taidi Afọzedaitọ Daho Jehovah tọn, Jesu na ze whẹdida dodo Jiwheyẹwhe tọn dai lẹdo aihọn pé. (Owalọ lẹ 5:31) Mọdopolọ, gbẹzan etọn to aigba ji do whẹdida dodo Jiwheyẹwhe tọn hia. Jehovah dọ gando e go dọmọ: “Yẹn na yí gbigbọ ṣie do e ji, ewọ nasọ lá whẹdida [dodo] hlan Kosi lẹ.” (Matiu 12:18) Nawẹ Jesu hẹn ohó ehelẹ di gbọn?

Jesu Hẹn ‘Nuhe Whẹdida Dodo Yin’ Họnwun

8-10. (a) Nawẹ osẹ́n nùmẹ tọn he sinsẹ̀ngán Juvi lẹ wleawuna lẹ fọ́n nuvẹun dote na mẹhe ma yin Juvi lẹ po yọnnu lẹ po gbọn? (b) Aliho tẹmẹ wẹ osẹ́n nùmẹ tọn lẹ hẹn osẹ́n Gbọjẹzan tọn he Jehovah na zun agbanpẹnmẹnu de te?

⁸ Jesu yiwanna Osẹ́n Jehovah tọn bo nọgbẹ̀ sọgbe hẹ ẹ. Ṣigba sinsẹ̀ngán azán etọn gbè tọn lẹ slokọna Osẹ́n lọ bo yí ì zan to aliho agọ̀ mẹ. Jesu dọhlan yé dọmọ: “Dindọn hlan mì, wekantọ lẹ, po Falesi lẹ po, yẹnuwatọ! Na mì . . . gbẹ́ onú pẹnzin osẹ́n tọn dai, whẹdida [dodo], lẹblanu, po yise po.” (Matiu 23:23) Na nugbo tọn, Osẹ́n Jiwheyẹwhe tọn plọnmẹtọ enẹlẹ ma to ‘nuhe whẹdida dodo yin’ hẹn họnwun gba. Kakatimọ, yé to whẹdida dodo hẹn dózin. Gbọnna? Gbadopọnna apajlẹ kleun delẹ.

⁹ Jehovah degbè na omẹ etọn lẹ nado klan yedelẹ dovo na akọta mayisenọ he lẹdo yé pé lẹ. (1 Ahọlu lẹ 11:1, 2) Ṣigba, sinsẹ̀ngán zohunhun agọ̀ tindotọ delẹ na tuli gbẹtọ lẹ nado pọ́n mẹhe mayin Juvi lẹpo hlan di kẹntọ. Mishnah tlẹ yí osẹ́n de dogọ dọmọ: “Oyìn ma sọgan yin bibẹ do kanlinpó kosi lẹ tọn mẹ gba na yé nọ vẹnudo kosi lẹ dọ yé nọ zanhẹ kanlin wutu.” Nuvẹun paa sọta mẹhe mayin Ju lẹpo ehe yin mawadodo bo jẹagọ mlẹnmlẹn do nuhe Osẹ́n Mose tọn plọnmẹ. (Levitiku 19:34) Osẹ́n heyin zizedai gbọn gbẹtọ dali devo lẹ nọ dè yọnnu lẹ pò. Osẹ́n nùmẹ tọn de dọ dọ asi de dona nọ hodo asu etọn to godo, e ma dona nọ zinzọnlin zẹnzẹn to apá na asu etọn gba. Osẹ́n wẹ e yin na sunnu de nado dọhodopọ hẹ yọnnu de to gbangba, eyin e tlẹ yin asi etọn. Taidi afanumẹ lẹ, yọnnu lẹ ma yin dotẹnmẹ na nado yin kunnudetọ de to whẹdatẹn gba. Odẹ̀ aṣa tọn de tlẹ tin to ehe mẹ sunnu lẹ nọ dopẹna Jiwheyẹwhe te dọ emilẹ ma yin yọnnu!

¹⁰ Sinsẹ̀ngán lọ lẹ yí gbedide po nunọwhinnusẹ́n susugege gbẹtọ tọn lẹ po do ṣinyọnnudo Osẹ́n Jiwheyẹwhe tọn. Di dohia, osẹ́n Gbọjẹzan tọn gbẹ́ azọ́nwiwa to Gbọjẹzangbe poun, bo klan azán enẹ dovo na sinsẹ̀n-bibasi, homẹmiọnnamẹ gbigbọmẹ tọn, po gbọjẹ po. Ṣigba Falesi lẹ hẹn osẹ́n enẹ zun agbanpẹnmẹnu de. Yé basi dide na yedelẹ nado dọ nuhe “azọ́n” zẹẹmẹdo. Yé slẹ onú voovo 39 delẹ, taidi jibẹwawhé po gbeyinyan po di azọ́n. Onú ehelẹ sislẹ fọ́n kanbiọ susu lẹ dote. Eyin mẹde hù ojọ́ de to Gbọjẹzangbe, be gbéyàn wẹ e te ya? Eyin mẹde gbẹ̀n likun alọgògò dopo nado dù to whenuena e to yìyì to aliho ji, be jibẹwawhé wẹ e te ya? Eyin e hẹnazọ̀ngbọna mẹhe to azọ̀njẹ, be azọ́nwa wẹ e te ya? Gblọndo kanbiọ mọnkọtọn lẹ tọn yin nina po osẹ́n hẹngogo tọn susu devo lẹ po.

11, 12. Nawẹ Jesu jẹagọdo osẹ́n Falesi lẹ tọn he ma sọgbe hẹ owe-wiwe lẹ gbọn?

¹¹ To ninọmẹ mọnkọtọn mẹ, nawẹ Jesu na gọalọna gbẹtọ lẹ nado mọnukunnujẹ nuhe whẹdida dodo yin mẹ gbọn? To mẹpinplọn po aliho gbẹninọ etọn tọn po mẹ, e ze afọdide adọgbigbo tọn de sọta sinsẹ̀ngán enẹlẹ. Gbadopọnna delẹ to nuplọnmẹ etọn lẹ mẹ whẹ́. E jẹagọdo osẹ́n susugege he yé basi lẹ tlọlọ, dọmọ: “Mì sọ hẹn ohó Jiwheyẹwhe tọn zun nuvọ́ gbọn otanhoho mìtọn dali he mì ko doai.”—Malku 7:13.

¹² Jesu plọnmẹ po zohunhun po dọ linlẹn Falesi lẹ tọn gando osẹ́n Gbọjẹzan tọn go ma sọgbe podọ, na nugbo tọn, dọ yé ko mọnukunnujẹ lẹndai osẹ́n enẹ tọn mẹ do agọ̀. E basi zẹẹmẹ dọ, Mẹssia wẹ “Oklunọ gbọjẹzan tọn” podọ enẹwutu, e tindo jlọjẹ lẹpo nado hẹnazọ̀ngbọnamẹ to Gbọjẹzan gbè. (Matiu 12:8) Nado zinnudo ehe ji ganji, e wà azọ́njiawu azọ̀nhẹngbọnamẹ tọn lẹ to Gbọjẹzangbe. (Luku 6:7-10) Azọ̀nhẹngbọ enẹlẹ yin ohia de poun na dehe e na wá basi lẹdo aihọn pé to Gandudu Owhe Fọtọ́n tọn etọn whenu. Owhe Fọtọ́n enẹ lọsu na yin Gbọjẹzan mlẹnmlẹn de, yèdọ whenuena gbẹtọvi nugbonọ lẹpo na gbọjẹ sọn agbanpinpẹn oyà he ylando po okú po ko hẹnwa na owhe susu lẹ si.

13. Osẹ́n tẹwẹ wá aimẹ taidi kọdetọn lizọnyizọn aigba ji tọn Klisti tọn, podọ nawẹ e gbọnvona osẹ́n he jẹnukọnna ẹn lọ gbọn?

¹³ Jesu sọ hẹn nuhe whẹdida dodo yin họnwun gbọn osẹ́n yọyọ de, yèdọ “osẹ́n Klisti tọn” zizedai dali, to whenuena e ko dotana lizọnyizọn aigba ji tọn etọn godo. (Galatianu lẹ 6:2) To vogbingbọnmẹ na Osẹ́n Mose tọn he jẹnukọnna ẹn lọ, osẹ́n yọyọ ehe ma sinai do gbedide he yin kinkàndai lẹ ji gba, ṣigba e sinai do nunọwhinnusẹ́n lẹ ji. Etomọṣo, e bẹ gbedide tlọlọ delẹ hẹn. Dopo to ehelẹ mẹ wẹ Jesu ylọdọ “osẹ́n yọyọ de.” Jesu plọn hodotọ etọn lẹpo nado yiwanna ode awetọ yetọn kẹdẹdile ewọ yiwanna yé do. (Johanu 13:34, 35) Mọwẹ, owanyi mẹde-yido-sanvọ́ tọn wẹ dona yin ohia mẹhe nọ nọgbẹ̀ sọgbe hẹ “osẹ́n Klisti tọn” lẹpo tọn.

Apajlẹ Yinukundomọ Whẹdida Dodo Tọn

14, 15. Nawẹ Jesu dohia dọ emi yọ́n dogbó aṣẹpipa emitọn tọn gbọn, podọ naegbọn ehe do yin jidenamẹnu de?

¹⁴ Jesu wà nususu hugan mẹpinplọn dogbọn owanyi dali poun. E nọgbẹ̀ sọgbe hẹ “osẹ́n Klisti tọn.” E sọawuhia to gbẹzan etọn pete mẹ. Mí na gbadopọnna aliho atọ̀n he mẹ apajlẹ Jesu tọn hẹn nuhe whẹdida dodo yin họnwun te lẹ.

¹⁵ Tintan, Jesu dapana whẹdida mawadodo lẹpo mlẹnmlẹn. Vlavo a sọgan ko doayi e go dọ whẹdida mawadodo susu wẹ nọ wá aimẹ eyin gbẹtọvi mapenọ lẹ lẹzun goyitọ bo zẹ̀ dogbó aṣẹpipa yetọn tọn go. Jesu ma wàmọ gba. To gbèdopo, dawe de dọnsẹpọ Jesu bo dọmọ: “Mẹplọntọ, degbè dó nọvisunnu ṣie ni má ogú lọ hẹ mi.” Etẹwẹ yin gblọndo Jesu tọn? “Dawe, mẹnu wẹ yí mi do basi whẹdatọ de, kavi numátọ de do mì ji?” (Luku 12:13, 14) Be enẹ ma jẹna ayidego ya? Zinzin Jesu tọn, wuntuntun etọn, po aṣẹpipa he Jiwheyẹwhe na ẹn po hú mẹdevo depope tọn to aigba ji; ṣogan, e gbẹ́ nado dádo whẹho ehe mẹ, na aṣẹpipa nado wàmọ ma ko yin nina ẹn gba. Jesu nọ yin jlẹkajinọtọ to aliho ehe mẹ to whepoponu, etlẹ yin to owhe livi lẹ he e yido nọgbẹ̀ whẹpo do lẹzun gbẹtọvi de whenu. (Juda 9) Nugbo lọ dọ Jesu nọ yí whiwhẹ do dejido Jehovah go nado deanana ẹn to nuhe yin jijlọ lẹ bibasi mẹ do jẹhẹnu dagbe etọn hia.

16, 17. (a) Nawẹ Jesu do whẹdida dodo hia to yẹwheho wẹndagbe Ahọluduta Jiwheyẹwhe tọn didọ mẹ gbọn? (b) Nawẹ Jesu dohia dọ e nọ yí whẹdida dodo etọn zan po lẹblanu po gbọn?

¹⁶ Awetọ, Jesu do whẹdida dodo hia to aliho he mẹ e dọyẹwheho wẹndagbe Ahọluduta Jiwheyẹwhe tọn te. E ma do mẹnukuntahopọn hia gba. Kakatimọ, e dovivẹnu vẹkuvẹku nado jẹ gbẹtọ wunmẹ lẹpo dè, vlavo yé yin adọkunnọ kavi wamọnọ. To vogbingbọnmẹ, Falesi lẹ nọ gbẹkọ wamọnọ lẹ go, bo nọ yí yinkọ mẹdèpo tọn lẹ do ylọ yé taidi ʽam-ha·ʼaʹrets kavi “omẹ aigba ji tọn lẹ.” Jesu yí adọgbigbo do gblewhẹdo whẹdida mawadodo enẹ. To whenuena e plọn wẹndagbe lọ gbẹtọ lẹ—kavi, to whenuena e dùnú hẹ gbẹtọ lẹ, na núdùdù yé, hẹnazọ̀ngbọna yé, kavi tlẹ fọ́n gbẹtọ lẹ sọnku, na wẹndagbe lọ wutu—e ze whẹdida dodo Jiwheyẹwhe he jlo na ‘whlẹn gbẹtọ wunmẹ lẹpo’ gán tọn daga.c—1 Timoti 2:4.

¹⁷ Atọ̀ntọ, Jesu nọ yí whẹdida dodo etọn zan po lẹblanu sisosiso po. E dovivẹnu nado gọalọna ylandonọ lẹ. (Matiu 9:11-13) E gọalọna mẹhe ma penugo nado basi hihọ́na yedelẹ. Di dohia, Jesu ma kọnawudopọ hẹ sinsẹ̀ngán lẹ nado fọ́n jimadedomẹgo dote sọta Kosi lẹpo gba. E gbọn lẹblanu dali gọalọ bo plọnnu delẹ to yé mẹ, dile etlẹ yindọ azọ́ndenamẹ etọn yin hlan Juvi lẹ jẹnukọn. E yigbe nado wà azọ́njiawu azọ̀nhẹngbọnamẹ tọn na awhàngán daho Lomu tọn de, bo dọmọ: “Yẹn ma mọ yise nẹ hunkọ de to mẹde dè to Islaeli mẹ gba.”—Matiu 8:5-13.

18, 19. (a) Aliho tẹlẹ mẹ wẹ Jesu doyẹyigona yọnnu lẹ te? (b) Nawẹ apajlẹ Jesu tọn gọalọna mí nado mọ kanṣiṣa he tin to adọgbigbo po whẹdida dodo po mẹ gbọn?

¹⁸ Mọdopolọ, Jesu ma nọgodona pọndohlan he gbayipe gando yọnnu lẹ go gba. Kakatimọ, e yí adọgbigbo do wà nuhe sọgbe. Yọnnu Samalianu lẹ nọ yin pinpọnhlan taidi Kosi mawé lẹ. Ṣogan, Jesu ma whleawu nado dọyẹwheho na yọnnu Samalianu lọ to dòtọ Sikali tọn kọ̀n gba. Na taun tọn, yọnnu ehe whẹ́ wẹ Jesu do ede hia hlan tlọlọ taidi Mẹssia dopagbe lọ. (Johanu 4:6, 25, 26) Falesi lẹ dọ dọ Osẹ́n Jiwheyẹwhe tọn ma dona yin pinplọn yọnnu lẹ gba, ṣigba Jesu yí whenu po huhlọn susu po zan nado plọn yọnnu lẹ. (Luku 10:38-42) Podọ dile aṣa yetọn tlẹ gbẹ́ dọ yè ma sọgan dejido yọnnu lẹ go sọmọ nado kẹalọyi kunnudenu yetọn, Jesu doyẹyigona yọnnu voovo lẹ po lẹblanulọkẹyi lọ po nado yin omẹ tintan he mọ ẹn to fọnsọnku etọn godo. Etlẹ dọna yé nado yì dọna devi etọn sunnu lẹ dogbọn nujijọ titengbe ehe dali!—Matiu 28:1-10.

¹⁹ Mọwẹ, Jesu hẹn nuhe whẹdida dodo yin họnwun na akọta lẹ. E ze ogbẹ̀ ede tọn do owù mẹ whlasusu nado wàmọ. Apajlẹ Jesu tọn gọalọna mí nado mọdọ whẹdida dodo nugbo zizedaga nọ biọ adọgbigbo. Abajọ, bọ e yin yiylọdọ “Kinnikinni lọ he sọn whẹndo Juda tọn mẹ.” (Osọhia 5:5) Flindọ kinnikinni yin yẹhiadonu whẹdida dodo bibasi po adọgbigbo po tọn. Nalete, to madẹnmẹ, Jesu na hẹn whẹdida dodo he klohugan lọ wá. To linlẹn gigọ́ de mẹ, e na ze ‘whẹdida dodo dai to aihọn mẹ.’—Isaia 42:4.

Ahọlu Mẹssia ‘Ze Whẹdida Dodo Dai to Aihọn Mẹ’

20, 21. To ojlẹ mítọn mẹ, nawẹ Ahọlu Mẹssia ko ze whẹdida dodo daga lẹdo aihọn pé podọ to agun Klistiani tọn mẹ gbọn?

²⁰ Sọn whenue gbọ́n Jesu ko lẹzun Ahọlu Mẹssia to 1914, e ko ze whẹdida dodo daga to aigba ji. Gbọnna? E ko nọgodona hẹndi dọdai etọn tọn he tin to Matiu 24:14 mẹ. Hodotọ Jesu tọn he to aigba ji lẹ ko plọn gbẹtọ aigba ji tọn lẹpo dogbọn nugbo Ahọluduta Jehovah tọn dali. Taidi Jesu, yé ko dọyẹwheho to aliho mẹnukuntamahopọn po dodo tọn po mẹ, bo to tintẹnpọn nado na dotẹnmẹ hundote lọ hlan mẹlẹpo—jọja kavi mẹho, adọkunnọ kavi wamọnọ, sunnu kavi yọnnu—nado wá yọ́n Jehovah, Jiwheyẹwhe whẹdida dodo tọn.

²¹ Jesu sọ to whẹdida dodo zedaga to agun Klistiani tọn he e yin Ogán na lọ mẹ. Dile e yin dọdai etọn dọ do, e wleawuna ‘nunina to sunnu lẹ mẹ,’ heyin mẹho Klistiani nugbonọ lẹ he to nukọntọ yin to agun lọ mẹ. (Efesunu lẹ 4:8-12) To nukunpipedo lẹngbọpa họakuẹ Jiwheyẹwhe tọn go mẹ, sunnu ehelẹ nọ hodo apajlẹ Jesu Klisti tọn to whẹdida dodo zizedaga mẹ. Yé nọ hẹn do ayiha mẹ to whepoponu dọ Jesu jlo dọ lẹngbọ etọn lẹ ni nọ yin nuyiwahẹ to dodo-liho—mahopọnna otẹn, yindidi, kavi ninọmẹ nutindo agbasa tọn yetọn.

22. Etẹwẹ yin numọtolanmẹ Jehovah tọn dogbọn whẹdida mawadodo he gbayipe to aihọn egbehe tọn mẹ lẹ dali, podọ etẹwẹ e ko de Ovi etọn nado wà gandego?

²² Nalete, to madẹnmẹ, Jesu na ze whẹdida dodo dai to aihọn mẹ to aliho vonọtaun tọn de mẹ. Whẹdida mawadodo ko gbayipe to aihọn he gblezọn ehe mẹ. Ovi flinflin he to kúkú na huvẹ wutu lẹpo wẹ yin mẹhe jiya whẹdida mawadodo tlọlọ de tọn, titengbe eyin mí lẹnnupọndo akuẹ po whenu po he nọ yin hinhẹngú nado basi awhànfunnu lẹ ji gọna dehe nọ yin hinhẹngú na gbẹdudu ṣejannabi tọn lẹ. Gbẹtọ livi susu he nọ kú to owhe dopodopo mẹ matin whẹwhinwhẹ́n de yin dopo poun to adà whẹdida mawadodo tọn lẹ mẹ, yèdọ ehe lẹpo nọ fọ́n homẹgble dodo tọn Jehovah tọn dote. E ko de Ovi etọn nado funawhàn dodo tọn sọta titonu ylankan ehe pete bo doalọtena whẹdida mawadodo lẹpo kakadoi.—Osọhia 16:14, 16; 19:11-15.

23. To Amagẹdọni godo, nawẹ Klisti na ze whẹdida dodo daga kakadoi gbọn?

²³ Ṣigba, whẹdida dodo Jehovah tọn biọ nususu hú mẹylankan lẹ vivasudo poun. E ko sọ de Ovi etọn nado dugán taidi “Ahọvi Jijọho tọn.” To awhàn Amagẹdọni tọn godo, gandudu Jesu tọn na hẹn jijọho wá aigba pete ji, bọ ewọ na dugán “gbọn whẹdida [dodo] dali.” (Isaia 9:6, 7) To whenẹnu, homẹ Jesu tọn na hùn nado doalọtena whẹdida mawadodo lẹpo he ko hẹn awubla po yajiji susu po wá aihọn mẹ lẹ. E na yí nugbonọ-yinyin do ze whẹdida dodo pipé Jehovah tọn daga kakadoi. To whelọnu lo, onú titengbe de wẹ e yin dọ mí ni dovivẹnu nado hodo apajlẹ whẹdida dodo Jehovah tọn todin. Mì gbọ mí ni pọ́n lehe mí sọgan wà enẹ gbọn.