To Akọndonanu Dile Hiẹ to Tenọpọn Azán Jehovah Tọn
‘Mì yí akọndonanu dogọ yise mìtọn.’—2 PITA 1:5, 6.
1, 2. Etẹwẹ akọndonanu yin, podọ naegbọn Klistiani lẹ tindo nuhudo etọn?
AZÁN daho Jehovah tọn ko sẹpọ taun. (Joẹli 1:15; Zẹfania 1:14) Taidi Klistiani he magbe nado hẹn tenọgligo hlan Jiwheyẹwhe lẹ, mí yí jejejininọ do to tenọpọn ojlẹ lọ whenuena nupojipetọ-yinyin Jehovah tọn na yin whẹsuna. Todin whẹ́, mí nọ pehẹ wangbẹnamẹ, vlẹko, homẹkẹn po okú po na yise mítọn wutu. (Matiu 5:10-12; 10:22; Osọhia 2:10) Ehe nọ biọ akọndonanu—yèdọ nugopipe lọ nado nọtegli to whlepọn nukọn. Apọsteli Pita dotuhomẹna mí dọmọ: ‘Mì yí akọndonanu dogọ yise mìtọn.’ (2 Pita 1:5, 6) Mí dona doakọnnanu na Jesu dọmọ: “Mẹhe doakọnna kakajẹ opodo, mẹdopolọ wẹ yè na whlẹn gán.”—Matiu 24:13.
2 Mí sọ nọ tindo numimọ azọ̀n, okú mẹyiwanna de tọn, po whlepọn devo lẹ po tọn. Lehe Satani na jaya do sọ eyin mí hẹn yise mítọn bu! (Luku 22:31, 32) Po alọgọ Jehovah tọn po, mí sọgan doakọnna whlepọn voovo lẹ. (1 Pita 5:6-11) Lẹnnupọndo numimọ egbezangbe tọn delẹ ji he dohia dọ mí sọgan doakọnnanu bo hẹn yise mítọn go gligli dile mí to tenọpọn azán Jehovah tọn.
Azọ̀n Ma Hẹnalọdotena Yé
3, 4. Na apajlẹ he dohia dọ mí sọgan sẹ̀n Jehovah po nugbonọ-yinyin po mahopọnna azọ̀n.
3 Jiwheyẹwhe ma nọ gbọazọ̀nna mí todin to azọ́njiawu-liho gba, ṣigba e nọ na mí huhlọn nado doakọnna ẹn. (Psalm 41:1-3) Sharon dọmọ: “Eyin n’flin ganji, kẹkẹ sẹkunọ tọn mẹ wẹ n’nọ nọ̀ sọn ovu whenu gbọ́n. N’yin jiji po awukuzọ̀n de po he hò ayajẹ ovu whenu tọn yí sọn asi e.” Nupinplọn gando Jehovah po opagbe etọn lẹ nado na mí agbasalilo pipé po go na Sharon todido. Dile etlẹ yindọ e nọ sinyẹnawuna ẹn nado dọho kavi zinzọnlin, e nọ mọ ayajẹ to lizọnyizọn Klistiani tọn mẹ. E dọ to nudi owhe 15 die wayi dọmọ: “Azọ̀n lọ sọgan to tuklado mi zọnmii, ṣigba jidide ṣie to Jiwheyẹwhe mẹ po haṣinṣan he n’tindo hẹ ẹ po yin hihọ́ de na mi. Lehe homẹ ṣie hùn nado yin dopo to omẹ Jehovah tọn lẹ mẹ podọ nado to vivi alọgọ etọn tọn dù to whepoponu do sọ!”
4 Apọsteli Paulu dotuhomẹna Klistiani lẹ to Tẹsalonika nado nọ “miọnhomẹna ayi mawhiwhẹnọ lẹ” kavi mẹhe tin to apọṣimẹ glọ lẹ. (1 Tẹsalonikanu lẹ 5:14) Onú delẹ taidi flumẹjijẹ sọgan dekọtọn do apọṣimẹ sinsinyẹn mẹ. To 1993, Sharon wlan dọmọ: “Po numọtolanmẹ lọ po dọ n’gboawupo mlẹnmlẹn to gbẹ̀mẹ, yẹn . . . biọ ojlẹ apọṣimẹ sinsinyẹn tọn de mẹ he dẹn-to-aimẹ na owhe atọ̀n. . . . Mẹho lẹ miọnhomẹna mi bo na mi ayinamẹ lẹ. . . . Jehovah gbọn awuvẹmẹ dali na nukunnumọjẹnumẹ gando apọṣimẹ sinsinyẹn go to zinjẹgbonu Atọ̀họ̀-Nuhihọ́ Lọ Tọn lẹ mẹ. Mọwẹ, e nọ hò omẹ etọn lẹ tọn pọ́n bo nọ mọnukunnujẹ numọtolanmẹ mítọn lẹ mẹ.” (1 Pita 5:6, 7) Sharon pò to Jiwheyẹwhe sẹ̀n po nugbonọ-yinyin po dile e to tenọpọn azán daho Jehovah tọn.
5. Kunnudenu tẹwẹ dohia dọ Klistiani lẹ sọgan doakọnna ayimajai sinsinyẹn lẹ?
5 Klistiani delẹ to pipehẹ ayimajai taun na numimọ he yé tindo wayi lẹ wutu. Harley mọ danuwiwa sinsinyẹn to Wẹkẹ-Whàn II whenu bo nọ kúdlọ ylankan lẹ to zánmẹ gando awhàn go. E nọ dawhá to amlọn mẹ dọmọ: “Mì họnbẹ! Mì họ̀n!” To whenuena e fọ́n, agbasa etọn lẹpo nọ gọ́ na odẹ́n. Etomọṣo, e penugo nado doafọna gbẹzan jijọ-di-Jiwheyẹwhe tọn, podọ to nukọn mẹ, odlọ ylankan mọnkọtọn lẹ depò.
6. Nawẹ Klistiani de pehẹ nuhahun numọtolanmẹ tọn lẹ gbọn?
6 Klistiani de he dodinnanu dotowhé tọn lẹ dohia dọ e tindo azọ̀n apọṣimẹ sinsinyẹn wunmẹ de nọ mọ ẹn taidi nuhe vẹawu nado dọyẹwheho sọn họndekọn jẹ họndekọn. Etomọṣo, e sinyẹnlin, na e yọnẹn dọ lizọnyizọn lọ zẹẹmẹdo ogbẹ̀ na ewọ po mẹhe dotoai lẹ po. (1 Timoti 4:16) To whedelẹnu, e ma nọ tindo adọgbigbo sọmọ nado húhú ohọ̀n tata gba, ṣigba e dọmọ: “Ojlẹ vude godo, yẹn nọ penugo nado duto numọtolanmẹ ṣie ji, yì ohọ̀n devo kọ̀n bo húhú i. Gbọn mahẹ tintindo zọnmii to lizọnyizọn lọ mẹ dali, yẹn gbọṣi agbasalilo gbigbọmẹ tọn mẹ jẹ obá de mẹ.” Opli agun tọn lẹ yìyì lọsu yin avùnnukundiọsọmẹnu, ṣigba mẹmẹsunnu ehe kudeji dọ gbẹdido hẹ mẹmẹsunnu lẹ yin nuhọakuẹ tlala. Enẹwutu, e nọ dovivẹnu lẹpo nado tin to opli lẹ ji.—Heblu lẹ 10:24, 25.
7. Dile etlẹ yindọ mẹdelẹ nọ dibu nado dọho to gbẹtọgun mẹ kavi nado yì opli, nawẹ yé nọ do akọndonanu hia gbọn?
7 Ninọmẹ kavi onú delẹ nọ dobuna Klistiani delẹ zẹjlẹgo. Di dohia, yé sọgan dibu nado dọho to gbẹtọgun mẹ kavi nado tlẹ yì opli lẹ. Yí nukun homẹ tọn do pọ́n lehe e nọ vẹawuna yé nado na gblọndo to opli Klistiani tọn lẹ ji kavi nado wazọ́n to Wehọmẹ Lizọnyizọn Yẹwhehọluduta tọn do sọ! Ṣogan, yé to akọndonanu, podọ mí yọ́n pinpẹn etọn dọ yé nọ tin to opli lẹ ji bo nọ tindo mahẹ.
8. Etẹwẹ na gọalọna mí hugan to whenuena mí to pipehẹ nuhahun numọtolanmẹ tọn lẹ?
8 Gbọjẹ po amlọn vude dogọ po sọgan gọalọna mẹde nado doakọnna nuhahun numọtolanmẹ tọn lẹ. To whedelẹnu, e sọgan yin nuyọnẹnnu nado dín alọgọ doto de tọn. Ṣigba, nuhe na gọalọ hugan wẹ nado ganjẹ Jiwheyẹwhe go to odẹ̀ mẹ. “Ze agbàn towe dlan OKLUNỌ ji, ewọ nasọ hẹn we dote,” wẹ Psalm 55:22 dọ. “Ewọ ma na dike dodonọ ni yin sisẹtẹnna.” Enẹwutu, dovivẹnu nado “yí ayiha towe [lẹpo] do dotudo OKLUNỌ go.”—Howhinwhẹn lẹ 3:5, 6.
Akọndidona Okú Mẹyiwanna de Tọn
9-11. (a) Etẹwẹ sọgan gọalọna mí nado doakọnna okú mẹyiwanna de tọn? (b) Nawẹ apajlẹ Anna tọn sọgan sọ gọalọna mí gbọn?
9 To whenuena okú klan hagbẹ whẹndo tọn lẹ, nujijọ lọ sọgan hẹn awubla sinsinyẹn wá. Ablaham viavi to whenuena asi yiwanna etọn Sala kú. (Gẹnẹsisi 23:2) Jesu he tlẹ yin gbẹtọ pipé “viavi” to whenuena họntọn etọn Lazalọsi kú. (Johanu 11:35) Mọwẹ, jọwamọnu wẹ e yin nado blawu to whenuena mẹyiwanna towe de kú. Ṣigba, Klistiani lẹ yọnẹn dọ fọnsọnku tin. (Owalọ lẹ 24:15) Enẹwutu, yé ma nọ “blawu . . . di mẹdelẹ he ma tindo todido.”—1 Tẹsalonikanu lẹ 4:13.
10 Nawẹ mí sọgan doakọnna okú mẹyiwanna de tọn gbọn? Vlavo apajlẹ de sọgan gọalọ. Mí ma nọ saba tindo numimọ awubla he dẹn-to-aimẹ tọn eyin họntọn de yì tòmẹ na mí yọnẹn dọ mí na mọ ẹn to whenuena e lẹkọ. Pọndohlan mọnkọtọn tintindo gando okú Klistiani nugbonọ de tọn go sọgan de awubla mítọn pò na mí yọnẹn dọ e na lẹkọwa to fọnsọnku whenu wutu.—Yẹwhehodọtọ 7:1.
11 Jidide mlẹnmlẹn tintindo to “Jiwheyẹwhe homẹmimiọn lẹpo tọn” mẹ na gọalọna mí nado doakọnna okú mẹyiwanna de tọn. (2 Kọlintinu lẹ 1:3, 4) Nulinlẹnpọndo nuhe Anna, asuṣiọsi owhe kanweko tintan tọn de wà ji nasọ gọalọna mí. Owhe ṣinawe poun to alọwle etọn godo, e lẹzun asuṣiọsi. Ṣigba to owhe 84 mẹvi yinyin mẹ, e gbẹ́ to sinsẹ̀nzọn wiwe wà hlan Jehovah to tẹmpli mẹ. (Luku 2:36-38) Ayihaawe ma tin dọ gbẹzan mẹdezejo tọn mọnkọtọn gọalọna ẹn nado doakọnna awubla po ṣokẹdẹninọ po. Mahẹ gbesisọ tọn tintindo to nuwiwa Klistiani tọn lẹ mẹ, he bẹ azọ́n yẹwhehodidọ Ahọluduta lọ tọn hẹn, sọgan gọalọna mí nado doakọnna okú mẹyiwanna de tọn.
Pipehẹ Whlepọn Voovo Lẹ
12. Whlepọn he gando gbẹzan whẹndo tọn go tẹwẹ Klistiani delẹ ko doakọnna?
12 Klistiani delẹ dona doakọnna whlepọn he gando gbẹzan whẹndo tọn go lẹ. Di dohia, eyin alọwlemẹ de deayọ, lehe nugbajẹmẹji he enẹ na hẹnwa whẹndo lọ mẹ na sù do sọ! Ahun alọwlemẹ homẹvọnọ lọ tọn sọgan gbado bọ e na ba amlọn pò kavi viavi vẹjẹvẹjẹ na awubla wutu. Onú kleunkleun lẹ wiwà sọgan vẹawu sọmọ bọ e na nọ ṣinuwa kavi hẹn awugble na ede. E sọgan nọma penugo nado dùnú bo dekanpo, bosọ sọgan jiya to numọtolanmẹ-liho. E sọgan vẹawuna ẹn nado tindo mahẹ to nuwiwa Klistiani tọn lẹ mẹ. Podọ lehe nujijọ lọ sọgan yinuwa sinsinyẹn do ovi lẹ ji do sọ!
13, 14. (a) Tulinamẹ tẹwẹ hiẹ mọyi sọn odẹ̀ he Sọlọmọni hò to klandowiwe tẹmpli lọ tọn whenu mẹ? (b) Naegbọn mí nọ biọ gbigbọ wiwe to odẹ̀ mẹ?
13 To whenuena mí pehẹ whlepọn mọnkọtọn lẹ, Jehovah nọ na mí alọgọ he mí tindo nuhudo etọn. (Psalm 94:19) Odẹ̀ he Ahọlu Sọlọmọni hò to klandowiwe tẹmpli Jehovah tọn whenu dohia dọ Jiwheyẹwhe nọ sè odẹ̀ omẹ etọn lẹ tọn. Sọlọmọni hodẹ̀ hlan Jiwheyẹwhe dọmọ: “Odẹ̀ po ovẹ̀ po depope yè basi gbọn mẹdepope dali, kavi gbọn Islaeli omẹ towe lẹpo dali, ehe na yọnẹn omẹ dopodopo azọ̀nylankan ayiha etọn titi tọn, bo dlẹn alọ etọn lẹ jẹgbonu hlan ohọ̀ he kọ̀n; whenẹnu hiẹ ni sè to olọn otẹn fininọ towe mẹ, bo jona, bo wà, bo gọ̀ do omẹ dopodopo dè kẹdẹdi aliho etọn lẹ, ayiha mẹhe tọn hiẹ yọnẹn; (na hiẹ, yèdọ hiẹ ṣokẹdẹ, wẹ yọ́n ayiha ovi gbẹtọ lẹ tọn lẹpo tọn;) na yé nido nọ dibusi we to azán lẹpo mẹ he yé do tin to ogbẹ̀ to aigba lọ ji, he hiẹ na hlan otọ́ mítọn lẹ.”—1 Ahọlu lẹ 8:38-40.
14 Gbigbọ wiwe bibiọ to odẹ̀ mẹ to whepoponu sọgan gọalọna mí taun. (Matiu 7:7-11) Sinsẹ́n gbigbọ tọn bẹ jẹhẹnu lẹ taidi ayajẹ po jijọho po hẹn. (Galatianu lẹ 5:22, 23) Kọgbọ nankọtọn die mí nọ mọ to whenuena Otọ́ olọnmẹ tọn mítọn na gblọndo odẹ̀ mítọn lẹ tọn—ayajẹ nọ diọ awubla bọ jijọho nọ diọ awufiẹsa!
15. Wefọ tẹlẹ wẹ na gọalọna mí nado de magbọjẹ mítọn pò?
15 Mí na tindo magbọjẹ jẹ obá de mẹ to whenuena mí to akọndona ayimajai sinsinyẹn lẹ. Ṣigba e whè gbau, delẹ to ahunmẹdunamẹnu lọ lẹ mẹ sọgan yin didepo eyin mí hẹn ohó Jesu tọn lẹ do ayiha mẹ dọmọ: “Mì yin vivẹnunọ na ogbẹ̀ mìtọn blo, dọ, etẹ mì na dù podọ etẹ mì na nù, kavi na agbasa mìtọn dọ etẹ mì na ṣinyọ́n. . . . Ṣigba mì dín ahọludu Jiwheyẹwhe tọn, po dodo etọn po whẹ́; onú helẹ pó wẹ yè na dogọ hlan mì.” (Matiu 6:25, 33, 34) Apọsteli Pita dotuhomẹna mí nado ‘bẹ magbọjẹ mítọn lẹpo do alọ Jiwheyẹwhe tọn mẹ; na ewọ to tukla mítọn jẹ wutu.’ (1 Pita 5:6, 7) Nuhe sọgbe wẹ e yin nado dovivẹnu nado didẹ nuhahun de. Ṣigba, to whenuena mí ko wà nuhe go mí pé lẹpo godo, odẹ̀ wẹ na gọalọna mí, e ma yin nuhiha gba. “Jo ali towe do alọ OKLUNỌ tọn mẹ, dotudo e go ga; ewọ nasọ basi i,” wẹ psalm-kàntọ lọ jihàn dọ.—Psalm 37:5.
16, 17. (a) Naegbọn mí ma sọgan vò mlẹnmlẹn sọn magbọjẹ si? (b) Etẹwẹ mí na tindo eyin mí yí Filippinu lẹ 4:6, 7 do yizan mẹ?
16 Paulu wlan dọmọ: “Mì jẹtukla nudepope tọn blo; ṣigba to odẹ̀ mẹ to ovẹ̀ mẹ po pẹdido po mẹ, mì nọ yí kanbiọ mìtọn hia Jiwheyẹwhe to onú popo mẹ. Jijọho Jiwheyẹwhe tọn he hú nuyọnẹn lẹpo na whla ayiha mìtọn po linlẹn mìtọn lẹ po [to] Klisti Jesu mẹ.” (Filippinu lẹ 4:6, 7) Na nugbo tọn, ovivi mapenọ Adam tọn lẹ ma sọgan vò mlẹnmlẹn sọn magbọjẹ si gba. (Lomunu lẹ 5:12) Asi Esau tọn he yin Hitinu lẹ “yin adìnọ ayiha tọn” hlan mẹjitọ budisi Jiwheyẹwhe tọ Esau tọn lẹ, Isaki po Lebeka po. (Gẹnẹsisi 26:34, 35) Azọ̀n dona ko hẹn magbọjẹ wá na Klistiani lẹ taidi Timoti po Tlofimu po. (1 Timoti 5:23; 2 Timoti 4:20) Ninọmẹ yisenọ hatọ lẹ tọn hẹn magbọjẹ wá na Paulu. (2 Kọlintinu lẹ 11:28) Ṣigba ewọ “he nọ sè odẹ̀” tin to finẹ to whepoponu nado gọalọna mẹhe yiwanna ẹn lẹ.—Psalm 65:2.
17 Dile mí to tenọpọn azán Jehovah tọn, mí nọ mọ alọgọ po homẹmimiọn po yí sọn “Jiwheyẹwhe jijọho tọn” dè. (Filippinu lẹ 4:9) Jehovah yin ‘lẹblanunọ podọ dagbewanyinọ,’ e yin “dagbe, bosọ nọ wleawu nado jona,” podọ ‘e nọ flindọ kọ́gudu wẹ mí.’ (Eksọdusi 34:6; Psalm 86:5; 103:13, 14) Enẹwutu, mì gbọ mí ni nọ ‘yí kanbiọ mítọn lẹ hia ẹ,’ na ehe na gọalọna mí nado tindo “jijọho Jiwheyẹwhe tọn”—yèdọ vivomẹninọ ahun mẹ tọn he gbẹtọvi lẹ ma sọgan mọnukunnujẹemẹ.
18. Dile e yin didọ to Job 42:5 mẹ do, nawẹ mí sọgan “mọ” Jiwheyẹwhe gbọn?
18 To whenuena mí mọ gblọndona odẹ̀ mítọn lẹ, mí nọ yọnẹn dọ Jiwheyẹwhe tin hẹ mí. To whenuena Job doakọnna whlepọn etọn lẹ godo, e dọmọ: “Yẹn ko sè linlin towe [Jehovah] gbọn sisè otó tọn dali; ṣigba dinvie nukun ṣie ko mọ we.” (Job 42:5) Po nukun homẹ tọn po, gọna yise po pinpẹn-nutọn-yinyọnẹn po, mí sọgan lẹnnupọndo nuhe Jiwheyẹwhe wà na mí lẹ ji bo “mọ” ẹn hugan lehe mí nọ wà do dai. Lehe haṣinṣan pẹkipẹki mọnkọtọn nọ hẹn jijọho ahun mẹ tọn wá na mí do sọ!
19. Etẹwẹ na jọ eyin mí ‘bẹ magbọjẹ mítọn lẹpo do alọ Jehovah tọn mẹ’?
19 Eyin mí ‘bẹ magbọjẹ mítọn lẹpo do alọ Jehovah tọn mẹ,’ mí sọgan doakọnna whlepọn lẹ po jijọho ahun mẹ tọn de po he nọ whla ayiha po linlẹn mítọn lẹ po. To ahun yẹhiadonu tọn mítọn mẹ dọ́n, mí na mọ vivò sọn magbọjẹ, obu, po ayimajai po si. Flumẹjijẹ kavi magbọjẹ ma na dotukla ayiha mítọn.
20, 21. (a) Kunnudenu vivomẹninọ ahun mẹ tọn tẹwẹ whẹho Stefani tọn dohia dọ mí sọgan tindo to homẹkẹn glọ? (b) Dọ numimọ egbezangbe tọn delẹ gando jijọho he nọ yin tintindo to whenuena yè to akọndona whlepọn lẹ go.
20 Devi Stefani tindo vivomẹninọ ahun mẹ tọn to whenuena e to akọndona whlepọn sinsinyẹn yise etọn tọn de. Whẹpo e do na kunnudide godo tọn, mẹhe tin to whẹdatẹn Ju lẹ tọn mẹ lẹpo “mọ nukunmẹ etọn, e taidi nukunmẹ angẹli de tọn.” (Owalọ lẹ 6:15) Awusọhia nukunmẹ etọn tọn sẹ́—taidi angẹli, wẹnsagun Jiwheyẹwhe tọn de tọn. To whenuena Stefani dọ adà he yé yiwà to okú Jesu tọn mẹ, “ayiha [whẹdatọ lọ lẹ tọn] doalán jẹ homẹ, yé sọ dù adúkúnkún do e ji.” ‘Ṣigba Stefani gọ́ na gbigbọ wiwe bo zín nukundo olọn mẹ, bosọ mọ gigo Jiwheyẹwhe tọn, po Jesu po to ote to adusilọ Jiwheyẹwhe tọn mẹ.’ Numimọ enẹ na huhlọn Stefani sọmọ bọ e gbọṣi nugbonọ-yinyin mẹ kakajẹ okú. (Owalọ lẹ 7:52-60) Dile etlẹ yindọ mí ma nọ mọ numimọ lẹ to egbehe, mí sọgan duvivi jijọho Jiwheyẹwhe tọn to whenuena mí tin to homẹkẹn glọ.
21 Lẹnnupọndo numọtolanmẹ Klistiani he yin hùhù gbọn Nazi lẹ dali to Wẹkẹ-Whàn II whenu delẹ tọn ji. Dopo to yé mẹ dọ numimọ he e tindo to whẹdatẹn mẹ dọmọ: “Owhẹ̀ okú tọn yin didá na mi. Yẹn dotoai, podọ to enẹgodo whenuena yẹn ko dọ hogbe ehelẹ, ‘Yin nugbonọ kakajẹ okú,’ po ohó Oklunọ mítọn tọn delẹ po godo, e vọ̀. Ṣigba mì hanú blo. Yẹn tindo jijọho mọnkọtọn, yèdọ vivomẹninọ ahun mẹ tọn de he mì ma sọgan mọnukunnujẹemẹ!” Jọja Klistiani he yè to na gbòtana de wlan hlan mẹjitọ etọn lẹ dọmọ: “Ogàn wiawe zánmẹ tọn ko hò wayi. Yẹn gbẹsọ tindo whenu nado diọ linlẹn ṣie. Etẹ! be yẹn sọgan sọ yin ayajẹnọ to aihọn ehe mẹ eyin yẹn gbẹ́ Oklunọ mítọn dai ya? Lala! Ṣigba todin mì deji dọ yẹn jo aihọn ehe do to ayajẹ po jijọho po mẹ.” Ayihaawe ma tin dọ Jehovah nọ gọalọna devizọnwatọ nugbonọ etọn lẹ.
Hiẹ Sọgan Doakọnnanu!
22, 23. Jidide tẹwẹ hiẹ sọgan tindo dile hiẹ to akọndonanu bosọ to tenọpọn azán Jehovah tọn?
22 Hiẹ sọgan nọma pehẹ whlepọn he ji mí ko dọhodo delẹ. Ṣogan, owhẹ̀ Job budisi Jiwheyẹwhe tọ tọn whẹ́n to whenuena e dọmọ: “Gbẹtọ he yè ji sọn yọnnu de mẹ yin azán lẹ vude tọn, bosọ gọ́ na tukla.” (Job 14:1) Vlavo hiẹ yin mẹjitọ de he to vivẹnudo nado deanana ovi towe lẹ to gbigbọ-liho. Yé dona doakọnna whlepọn lẹ to wehọmẹ, ṣigba lehe homẹ towe nọ hùn do sọ to whenuena yé tẹdo Jehovah po nunọwhinnusẹ́n dodo tọn etọn lẹ po go gligli! Vlavo hiẹ to akọndona nuhahun po whlepọn lẹ po to azọ́nmẹ. Ṣigba hiẹ sọgan doakọnna ninọmẹ ehelẹ po devo lẹ po na ‘Jehovah to agbàn lọ hẹn na we egbesọegbesọ’ wutu.—Psalm 68:19.
23 Hiẹ sọgan lẹndọ gbẹtọ tata de poun wẹ hiẹ yin, ṣigba flindọ Jehovah ma na wọn azọ́n towe po owanyi he hiẹ ko dohia na oyín wiwe etọn po gbede. (Heblu lẹ 6:10) Po alọgọ etọn po, hiẹ sọgan doakọnna whlepọn yise tọn lẹ. Enẹwutu nọ donù ojlo Jiwheyẹwhe tọn wiwà go to odẹ̀ towe lẹ mẹ bosọ nọ ze e do tito towe lẹ mẹ. To whenẹnu, hiẹ sọgan deji dọ Jiwheyẹwhe na dona we bo gọalọna we dile hiẹ to akọndonanu bosọ to tenọpọn azán Jehovah tọn.
Nawẹ Hiẹ Na Na Gblọndo Gbọn?
• Naegbọn Klistiani lẹ tindo nuhudo akọndonanu tọn?
• Etẹwẹ sọgan gọalọna mí nado doakọnna azọ̀n po okú mẹyiwanna de tọn po?
• Nawẹ odẹ̀ nọ gọalọna mí nado doakọnna whlepọn lẹ gbọn?
• Naegbọn e yọnbasi nado to akọndonanu dile mí to tenọpọn azán Jehovah tọn?
[Yẹdide to weda 29]
Jidide do Jehovah go nọ gọalọna mí nado doakọnna okú mẹyiwanna de tọn
[Yẹdide to weda 31]
Odẹ̀ ahundopo tọn nọ gọalọna mí nado doakọnna whlepọn yise tọn lẹ