Oyín Wunmẹ Nankọ Wẹ Hiẹ Tindo?

TO BIBLU mẹ, hogbe lọ “oyín” to whedelẹnu nọ dlẹnalọdo jẹhẹnu dagbe mẹde tọn. Di apajlẹ, Ahọlu nuyọnẹntọ Sọlọmọni wlan dọmọ: “Oyín dagbe yọ́n hú nusisá he dewán akuẹgegenu tọn; okúzan hú gbeegbe yè ji omẹ.” (Yẹwhehodọtọ 7:1; yijlẹdo Howhinwhẹn lẹ 22:1 go.) Sọgbe hẹ hogbe Sọlọmọni tọn lẹ, mẹde ma nọ yin jiji po oyín dagbe de po gba. Kakatimọ, to ogbẹ̀ whenu etọn wẹ e nọ wá tindo oyín dagbe he tindo zẹẹmẹ nujọnu tọn de. Oyín etọn nọ dohiagona ẹn sọgbe hẹ jẹhẹnu mẹdetiti tọn etọn lẹ, vlavo ewọ yin alọtlútọ kavi ṣejannabinọ, awuvẹmẹtọ kavi ma nọ tindo numọtolanmẹ, whiwhẹnọ kavi goyitọ, yèdọ etlẹ yin dodonọ kavi mẹylankan.

Lẹnnupọndo Davidi ji. To ahọlu-yinyin etọn whenu, e do ede hia nado yin huhlọnnọ bosọ lodo. To ojlẹ dopolọ mẹ, Davidi gbọn whiwhẹ dali yigbe nuṣiwa etọn lẹ tọn bo lẹnvọjọ sọn ylando sinsinyẹn etọn lẹ mẹ. Po whẹwhinwhẹ́n dagbe po, yẹwhegan Jehovah tọn dohia dọ Davidi yin ‘mẹde he ahun etọn sọgbe hẹ [Jiwheyẹwhe tọn].’ (1 Samuẹli 13:14) Jọja Davidi ko tindo oyín dagbe de hẹ Jiwheyẹwhe jẹnukọn.

To vogbingbọn mẹ, Ahọlu Jeholami Juda tọn basi oyín ylankan de na ede. E gọkọna mẹjidugando etọn lẹ sọn sinsẹ̀n-bibasi hlan Jehovah mẹ bo tlẹ hẹn nọvisunnu etọn ṣidopo lẹ po ahọvi Juda tọn delẹ po nado yin hùhù. To agọgbọnẹnmẹ, Jehovah yí azọ̀n ylankan de do sayana Jeholami he dekọtọn do okú etọn mẹ. Biblu dọ dọ Jeholami “fọnyi matin yinyin ojlonọ,” kavi dile Today’s English Version dọ ẹ do, “mẹdepope ma blawu to whenuena e kú gba.”—2 Otannugbo lẹ 21:20.

Gbẹzan Davidi po Jeholami tọn lẹ po do nugbo-yinyin howhinwhẹn Biblu tọn lọ hia dọmọ: “Donanọ wẹ oflin nugbonọ tọn: ṣigba oyín mẹylankan tọn na yọ̀n.” (Howhinwhẹn lẹ 10:7) Enẹwutu dopodopo mítọn dona yí sọwhiwhe do lẹnnupọndo kanbiọ lọ ji dọ, ‘Oyín wunmẹ nankọ wẹ yẹn to bibasi hẹ Jiwheyẹwhe podọ hẹ gbẹtọ hatọ ṣie?’