Tenu-Núdùdù Oklunọ Tọn—Hùnwhẹ de He Nọ Gbògbéna Jiwheyẹwhe

KLISTIANI lẹ yin gbedena nado nọ basi hùnwhẹ Oflin okú Klisti tọn. Hùnwhẹ ehe sọ nọ yin yiylọdọ “tenu-núdùdù Oklunọ tọn.” (1 Kọlintinu lẹ 11:20) Etẹwẹ hẹn hùnwhẹ ehe nado yin ayidego tọn taun? Whetẹnu podọ nawẹ e dona nọ yin bibasi gbọn?

Jesu Klisti ze hùnwhẹ ehe dai to owhe 33 W.M. to ozán he mẹ Juvi lẹ nọ basi hùnwhẹ Juwayi tọn te. Hùnwhẹ Juwayi tọn nọ yin bibasi whladopo to owhe dopo mẹ, to azán 14tọ osun Nisan heyin osun Juvi lẹ tọn. Nado lẹn azán enẹ, e họnwun dọ Ju lẹ nọ nọtepọn azán de to amakikọ-whenu whenuena tedidi okle tọn nọ yin ganhiho 12 bọ ozán lọsu tọn nọ yin ganhiho 12. Osun yọyọ tintan he na waji bọdo azán ehe go tlolo nọ dohiagona bẹjẹeji Nisan tọn. To azán 14 godo, hùnwhẹ Juwayi tọn nọ yin bibasi to họyiyi owhe tọn godo.

Jesu basi hùnwhẹ Juwayi tọn hẹ apọsteli etọn lẹ, podọ to whenuena e ko yàn Juda Iskaliọti tọ́n godo, whenẹnu wẹ e ze hùnwhẹ Tenu-Núdùdù Oklunọ tọn dai. Núdùdù ehe diọtẹnna Juwayi Juvi lẹ tọn podọ na enẹwutu dona nọ yin bibasi whladopo to owhe mẹ.

Owe Wẹndagbe Matiu tọn na linlin dọmọ: “Jesu yí akla bo dona, bosọ kán ẹn, bo yí na nuplọntọ etọn lẹ, bo dọmọ, Yí, dù; ehe wẹ agbasa ṣie. E sọ yí kọfo de, bo dopẹ́, bosọ yí na yé, bo dọmọ, Mìmẹpo ni nù to e mẹ. Na ehe wẹ ohùn ṣie alẹnu yọyọ lọ tọn, he yè kọndai na mẹsusu hlan desẹ ylando tọn.”—Matiu 26:26-28.

Mẹdelẹ yise dọ Jesu diọ akla lọ zun agbasa jọnun ede tọn bosọ diọ ovẹn zun ohùn ede tọn. Ṣigba, agbasalan Jesu tọn gbẹ́ to blebu to whenuena e ze akla ehe donukọnnamẹ. Be agbasa jọnun Jesu tọn wẹ apọsteli etọn lẹ dù bosọ nù ohùn etọn nugbonugbo ya? Lala, na enẹ na ko yin olàn gbẹtọ tọn dùdù podọ yin osẹ́n Jiwheyẹwhe tọn gbigbà. (Gẹnẹsisi 9:3, 4; Levitiku 17:10) Sọgbe hẹ Luku 22:20, Jesu dọmọ: “Kọfo he wẹ alẹnu yọyọ to ohùn ṣie mẹ, yèdọ enẹ he yè kọ̀n na mì.” Be kọfo enẹ to paa mẹ lẹzun “alẹnu yọyọ” lọ wẹ ya? Enẹ ma sọgan yọnbasi gba, to whenuena e yindọ alẹnu de zẹẹmẹdo gbekọndopọ, e ma yin onú he yè sọgan yí alọ do hẹn de gba.

Enẹwutu, yẹhiadonu lẹ poun wẹ akla lọ po ovẹn lọ po yin. Akla lọ nọtena agbasa pipé Klisti tọn. Akla he pò sọn núdùdù Juwayi tọn lọ mẹ wẹ Jesu yizan. Otọ́n depope ma yin dido akla lọ mẹ gba. (Eksọdusi 12:8) Biblu nọ saba yí otọ́n zan taidi yẹhiadonu ylando kavi nuhe gblezọn tọn. Enẹwutu akla lọ nọtena agbasa pipé he Jesu yí do sanvọ́. E ma tindo ylando depope.—Matiu 16:11, 12; 1 Kọlintinu lẹ 5:6, 7; 1 Pita 2:22; 1 Johanu 2:1, 2.

Ovẹn vẹẹ lọ nọtena ohùn Jesu tọn. Ohùn enẹ hẹn alẹnu yọyọ lọ sọgbe. Jesu dọ dọ ohùn emitọn yin sinsọndai ‘na jona ylando lẹ tọn.’ Gbọnmọ dali gbẹtọvi lẹ sọgan yin wiwe to nukun Jiwheyẹwhe tọn mẹ bo sọgan biọ alẹnu yọyọ lọ mẹ hẹ Jehovah. (Heblu lẹ 9:14; 10:16, 17) Alẹnu, kavi gbekọndopọ ehe, hẹn ẹn yọnbasi na Klistiani nugbonọ 144 000 lẹ nado yì olọn mẹ. Yé na wadevizọn taidi ahọlu lẹ po yẹwhenọ lẹ po nado hẹn dona lẹ wá na gbẹtọvi lẹpo.—Gẹnẹsisi 22:18; Jẹlemia 31:31-33; 1 Pita 2:9; Osọhia 5:9, 10; 14:1-3.

Mẹnu lẹ wẹ dona dù bosọ nù to yẹhiadonu Oflin tọn ehelẹ mẹ? E họnwun dọ, mẹhe tin to alẹnu yọyọ lọ mẹ lẹ—yèdọ mẹhe tindo todido nado yì olọn mẹ lẹ—kẹdẹ wẹ dona dù akla lọ bosọ nù ovẹn lọ. Gbigbọ wiwe Jiwheyẹwhe tọn wẹ nọ na nujikudo yé dọ yé ko yin dide nado yin ahọlu olọn mẹ tọn lẹ. (Lomunu lẹ 8:16) Omẹ ehelẹ sọ tin to alẹnu Ahọluduta tọn mẹ hẹ Jesu ga.—Luku 22:29.

Etẹwẹ dogbọn mẹhe tindo todido nado nọgbẹ̀ kakadoi to Paladisi mẹ to aigba ji lẹ dali? Yé nọ setonuna gbedide Jesu tọn bo nọ wá Tenu-Núdùdù Oklunọ tọn, ṣigba yé nọ wá taidi nupọntọ he nọ do sisi hia lẹ, e ma yin nado dù bo nù to yẹhiadonu lọ lẹ mẹ gba. Whladopo to owhe mẹ to họyiyi owhe tọn godo to azán 14 osun Nisan tọn, Kunnudetọ Jehovah tọn lẹ nọ basi hùnwhẹ Tenu-Núdùdù Oklunọ tọn. Dile etlẹ yindọ omẹ fọtọ́n vude poun wẹ sọalọakọ́n nado tindo todido olọn mẹ tọn lẹdo aihọn pé, hùnwhẹ ehe yin nuhọakuẹ na Klistiani lẹpo. Ojlẹ de wẹ e yin he mẹ mẹlẹpo sọgan lẹnnupọndo owanyi daho hugan he Jehovah Jiwheyẹwhe po Jesu Klisti po dohia mí ji.—Johanu 3:16.