Naegbọn A Sọgan Kudeji Dọ Todido Tin Na Oṣiọ Lẹ?

Be nulunu wẹ e yin nado lẹndọ oṣiọ lẹ na gọwá nọgbẹ̀ ya? Apọsteli Paulu ma lẹnmọ. E wlan to gbọdo glọ dọmọ: “Eyin to ogbẹ̀ ehe mẹ kẹdẹ wẹ mí tindo todido to Klisti mẹ te, be onú mítọn wẹ blawu hugan to gbẹtọ lẹpo mẹ. Ṣigba, todin, Klisti ko yin finfọn sọn oṣiọ lẹ mẹ, yèdọ sinsẹ́n tintan mẹhe ko damlọn to okú mẹ lẹ tọn lẹ.” (1 Kọlintinu lẹ 15:19, 20) Paulu tindo nujikudo dọ fọnsọnku na tin. Podọ fọnsọnku Jesu tọn lọsu yin kunnudenu dọ fọnsọnku na tin.a (Owalọ lẹ 17:31) Nuhe zọ́n niyẹn bọ Paulu do ylọ Jesu dọ “sinsẹ́n tintan,” enẹ wẹ omẹ tintan he yin finfọnsọnku nado nọgbẹ̀ kakadoi. Eyin Jesu yin omẹ tintan, be e dohia dọ mẹdevo lẹ gbẹ́ pò.

Whẹwhinwhẹ́n devo die he sọgan hẹn we kudeji dọ todido fọnsọnku tọn tin. Jehovah wẹ Jiwheyẹwhe nugbo tọn. “Jiwheyẹwhe . . . ma sọgan dolalo.” (Titu 1:2) Jehovah ma ko dolalo pọ́n, podọ ewọ ma na wàmọ gbede. Be ewọ na dopagbe fọnsọnku tọn, bo dohia dọ emi sọgan fọ́n gbẹtọ lẹ, bo ma na wá hẹn opagbe etọn di wẹ ya? Enẹ ma sọgan jọ!

Naegbọn Jehovah do basi tito nado fọ́n gbẹtọ lẹ sọnku to sọgodo? Na e yiwanna mí wutu. Job kanse dọmọ: ‘Eyin mẹde kú, be ewọ nasọ nọgbẹ̀ ba? Hiẹ na ylọ, yẹn nasọ siọ we: hiẹ do ko tindo ojlo de hlan azọ́n alọ towe lẹ tọn.’ (Job 14:14, 15) Job tindo nujikudo dọ Otọ́ owanyinọ olọn mẹ tọn emitọn tindo ojlo vẹkuvẹku nado fọ́n emi sọnku. Be Jiwheyẹwhe ko diọ wẹ ya? “Yẹn OKLUNỌ lọ ma diọ.” (Malaki 3:6) Jiwheyẹwhe gbẹ́ tindo ojlo vẹkuvẹku nado hẹn mẹhe kú lẹ gọwá ogbẹ̀ to ayajẹ po agbasalilo po mẹ. Nudopolọ wẹ mẹjitọ owanyinọ de na jlo na ovi etọn he kú de. Ṣigba, vogbingbọn lọ wẹ yindọ, Jiwheyẹwhe tindo huhlọn nado wà nuhe e jlo.—Psalm 135:6.

Jehovah na na huhlọn Visunnu etọn nado hẹn ayajẹ mayọnjlẹ wá na mẹhe to aluẹmẹ na mẹvivẹ yetọn he kú lẹ wutu. Ṣigba etẹwẹ yin numọtolanmẹ Jesu tọn gando fọnsọnku go? Whẹpo Jesu do fọ́n Lazalọsi sọnku, e mọ lehe nọviyọnnu po họntọn Lazalọsi tọn lẹ po to aluẹmẹ do, podọ ewọ lọsu “kùn dasin.” (Johanu 11:35) To nujijọ devo whenu, Jesu dukosọna asuṣiọsi Naini tọn he hẹn visunnu etọn dopo akàn lọ bu to okú mẹ. “Lẹblanu whàn [Jesu] bọ e dọna yọnnu lọ dọmọ: ‘A viavi ba blo.’” To afọdopolọji, e fọ́n visunnu lọ sọnku. (Luku 7:13) Na nugbo tọn, Jesu nọ tindo numọtolanmẹ sisosiso na mẹhe to aluẹmẹ lẹ po oṣiọ lẹ po. Lehe homẹ etọn na hùn do sọ, to whenue e na de awubla lẹpo sẹ̀ bo hẹn ayajẹ wá na gbẹtọ lẹ lẹdo aihọn pé!

Be a ko nọ aluẹmẹ pọ́n ya? A sọgan nọ mọdọ okú yin nuhahun de he ma tindo pọngbọ. Ṣigba pọngbọ de tin, enẹ wẹ fọnsọnku he Jiwheyẹwhe na hẹn yọnbasi gbọn Visunnu etọn gblamẹ. Flindọ Jiwheyẹwhe jlo dọ a ni mọ pọngbọ enẹ. E jlo dọ a ni tin to finẹ nado sọgan gbò mẹvivẹ towe lẹ fán whladopo dogọ. Yí nukun homẹ tọn do pọ́n lehe mí na to gbẹnọ to pọmẹ kakadoi do, bọ mẹde ma nasọ kú gbede ba!

Lionel he go mí donù wayi, dọ dọ: “To nukọn mẹ, n’plọnnu gando fọnsọnku go. To bẹjẹeji, e vẹawuna mi nado yise, podọ n’ma dejido mẹhe dọhona mi gandego lọ go. Ṣigba, n’basi dodinnanu to Biblu mẹ, bo mọdọ nugbo wẹ! Todin, n’to jejeji nado mọ baba daho ṣie whladopo dogọ.”

Be hiẹ na jlo nado yọ́n nususu dogọ ya? Homẹ Kunnudetọ Jehovah tọn lẹ tọn na hùn nado do nuhewutu yé do kudeji dọ fọnsọnku na tin hia we to Biblu towe mẹ.b