Dasin to Ayúgò Mẹ
DẸPẸ lọ họ̀njẹgbé. E tin to ayimajai sinsinyẹn mẹ, nukun etọn lẹ sọ hlá dasin bọ e vẹ̀ Jiwheyẹwhe etọn, Jehovah nado do homẹdagbe po awuvẹmẹ po hia ẹ bo dọmọ: “Kọ̀n dasin ṣie do ogò [kavi ayúgò] towe mẹ.” (Psalm 56:8) Davidi wẹ dẹpẹ lọ, he wá lẹzun ahọlu Islaeli tọn to godo mẹ. Ṣigba ayúgò tẹ hodọ wẹ e te, podọ nawẹ Jiwheyẹwhe sọgan kọ̀n dasin mítọn lẹ do ayúgò de mẹ gbọn?
Davidi yọ́n nuhe ayúgò yin ganji. E nọ yin yiyizan nado hẹn osin, amì, vẹnhàn kavi yìnnọhihò. Kanlinyìntọ he nọ yì sọn fide-jẹ-fide to danfafa Sahara tọn ji lẹ, taidi Touareg lẹ, gbẹ́ nọ yí ayúgò he yè yí ayú gbọgbọẹ kavi lẹngbọ blebu de tọn do basi lẹ zan. Ogo mọnkọtọn lẹ sọgan hẹn osin susu, eyin kanlin he yè yí ayú etọn zan lọ klo. Ayúgò lẹ nọ zọ́n bọ osin nọ pò to fifá ji, etlẹ yin to yozò sinsinyẹn owhè he nọ hùn to danfafa ji tọn glọ. To hohowhenu, ayúgò lẹ nọ saba yin piplado kanklosọ po kẹtẹkẹtẹ lẹ po go. To egbehe, hiẹ tlẹ sọgan mọ ayúgò lẹ to mọto he nọ gbọn kọ́gudu mẹ po aliho dagbe ji po lẹ nukọn!
Hogbe he whànmẹ Davidi tọn gando ayúgò Jiwheyẹwhe tọn go lẹ sọgan sọ tindo zẹẹmẹ na mílọsu ga. Gbọnna? Biblu basi zẹẹmẹ dọ Satani wẹ to anadena aihọn ehe bosọ to “homẹgble daho” mẹ to egbehe. Taidi kọdetọn de, aigba tin to dindọn daho mẹ. (Osọhia 12:12) Enẹwutu, taidi Davidi, mẹsusu nọ jiya to numọtolanmẹ-liho, to apọ̀nmẹ, kavi to agbasa-liho—titengbe mẹhe to vivẹnudo nado hẹn homẹ Jiwheyẹwhe tọn hùn lẹ. Be hiẹ tin to ninọmẹ mọnkọtọn mẹ wẹ ya? Etlẹ yin “po avi po,” omẹ nugbonọ ehelẹ nọ zindonukọn po adọgbigbo po bo ma nọ jogbe gbede to tenọgligo-hinhẹn yetọn mẹ. (Psalm 126:6) Yé sọgan deji dọ e ma yin whlepọn he yé to pipehẹ lẹ kẹdẹ wẹ Otọ́ olọn mẹ tọn yetọn nọ mọ gba, ṣigba e sọ nọ doayi numọtolanmẹ yetọn lẹ go to whlepọn mọnkọtọn lẹ glọ. E nọ mọnukunnujẹ awufiẹsa he mẹ devizọnwatọ etọn lẹ to juju gbọn mẹ nugbonugbo, podọ e nọ gbọn awuvẹmẹ dali flin dasin po yajiji yetọn lẹ po, bo nọ kọ̀n yé do ayúgò etọn mẹ to yẹhiadonu-liho.