Todido to Aihọn He Gọ́ Na Ayimajai de Mẹ

“GBẸTỌ paa lẹ tindo nugopipe nado wà nuhe na hẹn ale wá na mẹdevo lẹ bo gbọ nuhahun flinflin lẹ todin hugan gbede pọ́n to whenuho gbẹtọvi tọn mẹ.” Togán dai tọn États-Unis tọn Bill Clinton wẹ dọho enẹlẹ to opli de ji to Ottawa, Canada, to mars 2006. E dọ dọ sọn singigọ tsunami 2004 tọn whenu, ojlo lọ nado nanú mẹdevo lẹ ko jideji lẹdo aihọn pé, bo yidogọ dọ aihọn lọ todin tin to “ojlẹ he mẹ gbẹtọvi lẹ ganjẹ ode awetọ go hugan gbede pọ́n.”

Be mí sọgan donukun dọ nugbajẹmẹji jọwamọ tọn lẹ ni whàn gbẹtọ lẹ to filẹpo nado dín sọgodo dagbe de ya? Be nugbo lọ dọ gbẹtọvi lẹ ganjẹ ode awetọ go lẹdo aihọn pé dohia dọ jijọho nujọnu tọn po hihọ́ tẹgbẹ tọn po na tin to sọgodo ya?

Asisa Todido Nujọnu Tọn

Kandai whenuho vivẹnudido gbẹtọvi lẹ tọn na nuhe hugan owhe 6 000 lẹ dohia dọ gbẹtọ lẹ ko hẹn yedelẹ jẹflumẹ whlasusu. Abajọ, Owe-wiwe na mí ayinamẹ dọmọ: “Mì dotudo ahọvi lẹ go blo, kavi do ovi gbẹtọ tọn go, mẹhe mẹ whlẹngán depope ma tin te.” (Psalm 146:3) Todido mítọn zizedo titobasinanu aihọn ehe tọn lẹ, agbasanu lẹ, po nuzedonukọnnamẹ etọn lẹ po mẹ ma nọ dekọtọn do nudevo mẹ hugan flumẹjijẹ. Etẹwutu? Na “aihọn . . . to jujujei po wantuntun etọn po.”—1 Johanu 2:17.

Ṣigba, to owhe kanweko lẹ gblamẹ, Jiwheyẹwhe ma ko hẹn gbẹtọvi dodonọ he ze todido yetọn do ewọ mẹ lẹ jẹflumẹ pọ́n gbede. Biblu ylọ ẹ dọ “otodo Islaeli [hohowhenu] tọn” podọ “otodo otọ́ yetọn lẹ tọn,” podọ whlasusu wẹ hodidọ he do todido, jidide, po tudido to ewọ mẹ po hia yin yiyizan. (Jẹlemia 14:8; 17:13; 50:7) Na nugbo tọn, Owe-wiwe na tuli mí nado “nọtepọn OKLUNỌ.”—Psalm 27:14.

Howhinwhẹn lẹ 3:5, 6 na mí tuli dọmọ: “Yí ayiha towe do dotudo OKLUNỌ go; a dẹ́ hlan dewe tọn dali blo. Yọnẹn to aliho towe lẹpo ji, ewọ nasọ jlọ omọ́ towe.” Hiẹ tindo whẹwhinwhẹ́n lẹpo nado dejido opagbe mọnkọtọn go mlẹnmlẹn na Jehovah Jiwheyẹwhe ma nọ diọ, ewọ sọgan yin jide-dego, podọ ohó etọn ma nọ gboawupo gbede. (Malaki 3:6; Jakobu 1:17) E jlo dagbe na we, podọ eyin hiẹ nọ hodo nuhe yin didọ to Ohó etọn, Biblu mẹ whepoponu, e na deanana we gbọ̀n ojlẹ he dobu ehelẹ mẹ po kọdetọn dagbe po.—Isaia 48:17, 18.

Mẹhe yí ahun etọn lẹpo do hodo anademẹ Jiwheyẹwhe tọn sọgan ganjẹ opagbe ehe go dọmọ: “A dibu blo; na yẹn tin po hiẹ po: adòyanú we blo: na yẹn wẹ Jiwheyẹwhe towe: yẹn na na huhlọn we; yẹn na gọalọna we; nugbo, yẹn na yí adusilọ ṣie dodo tọn do ze we daga.” (Isaia 41:10) Odẹ̀ vẹkuvẹku hihò po ayihamẹlinlẹnpọn do jidenamẹ ehe ji po nọ miọnhomẹna mẹhe yiwanna Jehovah Jiwheyẹwhe lẹpo, na e nọ gọalọna yé nado duto ninọmẹ sinsinyẹn lẹ po magbọjẹ po ji.

Lẹnnupọndo Andrea, he yin onọ̀ ovi awe tọn bo yin dopo to Kunnudetọ Jehovah tọn lẹ mẹ ji. E dọmọ: “Odẹ̀ po ayihamẹlinlẹnpọn do opagbe Jehovah tọn lẹ ji po wẹ nọ dozolanmẹna mi nado gọ̀ huhlọn mọyi to whenuena yẹn to jujugbọn nuhahun lẹ mẹ. Eyin n’flin dọ Jehovah ma nọ diọ, e nọ bọawu na mi hugan nado hẹn dolilo ṣie go.”

Hẹn Todido Towe to Jehovah mẹ Lodo

Psalm-kàntọ de zinnudo lehe e yin nujọnu nado tindo todido to Jehovah mẹ do ji dọmọ: “Daho wẹ jijọho he yé he yiwanna osẹ́n towe lẹ tindo: yé ma tindo nuhẹnmẹ klẹnafọ ahlìda tọn depope.” (Psalm 119:165) Ohó Jiwheyẹwhe tọn pinplọn po ahundopo po sọgan gọalọna we taun nado hẹn ayiha po ahun towe po gọ́ na ‘nuhe yin nugbo, yẹyi, jijlọ, wiwe, owanyi, wẹndagbe, jijọdagbe, po pipà po.’ Ehe na tindo nuyiwadomẹji gbigbọmẹ tọn dagbe po mẹjlọdote tọn po do jiwe. Eyin hiẹ dovivẹnu vẹkuvẹku nado sè, plọn, kẹalọyi, bo yí onú mọnkọtọn lẹ do yizan mẹ, “Jiwheyẹwhe jijọho tọn na nọ̀ hẹ [we].”—Filippinu lẹ 4:8, 9.

John dọho sọn numimọ he e tindo to owhe susu lẹ gblamẹ mẹ dọmọ: “Nado sọgan diọ numọtolanmẹ he n’tindo gando sọgodo go, nujọnu wẹ e yin nado yọnẹn dọ n’dona basi diọdo ayidego tọn to gbẹzan po nulẹnpọn ṣie po mẹ nado sọgan wleawuna haṣinṣan de hẹ Jiwheyẹwhe pipé he yè ma nọ mọ de. Aliho dopo akàn he mẹ n’sọgan wleawuna haṣinṣan enẹ te wẹ gbọn lilẹzun gbẹtọ gbigbọnọ de dali. Enẹ biọ dọ n’dona hodo anademẹ Jiwheyẹwhe tọn bo tindo pọndohlan dopolọ hẹ ẹ do whẹho lẹ ji gbọn Ohó gbọdo etọn hihia po ayihamẹlinlẹnpọn do e ji po dali.”

Eyin hiẹ nọ nù osin nugbo kọfanamẹ, ogbẹ̀-namẹ tọn he tin to Owe-wiwe gbọdo lọ mẹ, enẹ na zẹẹmẹdo dọ hiẹ to azọ́nwanu nugbo dejidego de yizan nado glọnalina agbówhẹn onú ylankan lẹ tọn he nọ yin zizedonukọnnamẹ egbesọegbesọ to linlinnamẹnu lẹ ji. Nuhe yin didọ to Biblu mẹ lẹ yíyí-do-yizan mẹ sọgan sọ hẹn kanṣiṣa whẹndo towe tọn lodo bo gọalọna we nado de magbọjẹ lẹ pò. Humọ, Jiwheyẹwhe dopagbe dọ ewọ wleawufo nado “do ede hia [di] huhlọnnọ na ayiha yé mẹhe tọn yin pipé hlan e dè lẹ tọn wutu.” (2 Otannugbo lẹ 16:9) E na didẹ̀ whẹho lẹ to aliho de mẹ bọ hiẹ ma na tindo whẹwhinwhẹ́n depope nado dibu.

Phinehas, he tindo numimọ awhàn po mẹsusu hùhù dopọ ji po tọn dọmọ: “Yẹn ko plọn nado ze dee do alọ hihọ́-basinamẹ Jehovah tọn mẹ. Nunọwhinnusẹ́n Biblu tọn lẹ hihodo ko de mi sọn nuhahun susu mẹ.” Eyin hiẹ dejido Jehovah Jiwheyẹwhe go nugbonugbo, ewọ sọgan gọalọna we nado duto nuhahun he taidi adó depope ji. (Psalm 18:29) Ovivu he tindo haṣinṣan pẹkipẹki hẹ mẹjitọ etọn lẹ nọ dejido yé go mlẹnmlẹn bo nọ tindo numọtolanmẹ hihọ́ tọn to yé dè etlẹ yin to whenuena e to azọ̀njẹ kavi tindo nuhahun delẹ. Hiẹ lọsu sọgan tindo numọtolanmẹ dopolọ eyin a dovivẹnu bo kẹalọyi oylọ-basinamẹ lọ nado nọtepọn Jehovah kavi tindo todido to ewọ mẹ.—Psalm 37:34.

Dodonu Dejidego de Na Todido

Jesu Klisti dọna hodotọ etọn lẹ dọmọ: “Le wẹ mì ni nọ hodẹ̀ do: Otọ́ mítọn he tin to olọn mẹ, hihiọ wẹ oyín towe. Ahọludu towe ni wá. Ojlo towe ni yin wiwà to aigba go, dile e te to olọn mẹ.” (Matiu 6:9, 10) Ahọluduta olọn tọn enẹ—yèdọ gandudu de to alọ Jesu Klisti tọn mẹ—wẹ Jiwheyẹwhe na yizan nado dohia dọ ewọ tindo jlọjẹ nado yin nupojipetọ aigba lọ tọn.—Psalm 2:7-12; Daniẹli 7:13, 14.

Onú voovo he nọ hẹn obu wá bo nọ yinuwado adà gbẹzan tọn lẹpo ji to egbehe yin kunnudenu he họnwun de dọ Jiwheyẹwhe dona dádo whẹho gbẹtọvi tọn mẹ. Ayajẹnu wẹ e yin dọ ojlẹ he mẹ e na wàmọ te ko sẹpọ! Jesu Klisti he Jiwheyẹwhe ko zedo ofìn ji todin taidi Ahọlu Mẹssia lọ ko mọ aṣẹpipa yí nado suwhẹna nupojipetọ-yinyin Jehovah tọn bo klan yinkọ Etọn do wiwe. (Matiu 28:18) To madẹnmẹ, gandudu Ahọluduta lọ tọn na lilẹ́ ayidonugo etọn hlan aigba ji bo de nuhe nọ hẹn obu po magbọjẹ po wá lẹpo sẹ̀. Isaia 9:6 slẹ jẹhẹnu lẹ he do Jesu hia taidi Gandutọ jlọjẹnọ he sọgan de mí sọn obu mítọn lẹ mẹ. Di dohia, ewọ yin yiylọdọ “Otọ́ Madopodo,” ‘Hónamẹtọ Jiawu,’ podọ “Ahọvi Jijọho tọn.”

Lẹnnupọndo hogbe he dọnmẹdogo lọ “Otọ́ Madopodo” ji. Tẹnmẹ-yinkọ enẹ dohia dọ Jesu tindo huhlọn po aṣẹpipa po—gọna ojlo lọ—nado hẹn ẹn yọnbasi na gbẹtọvi tonusetọ lẹ nado nọgbẹ̀ kakadoi to aigba ji to dodonu avọ́sinsan ofligọ etọn tọn ji. Ehe zẹẹmẹdo dọ yé na yin didesọn nuyiwadomẹji ylando po mape he yé dugu etọn sọn sunnu ylandonọ tintan lọ, Adam dè po glọ. (Matiu 20:28; Lomunu lẹ 5:12; 6:23) Klisti nasọ yí aṣẹpipa he Jiwheyẹwhe na ẹn zan nado hẹn mẹsusu he ko kú lẹ gọwá ogbẹ̀.—Johanu 11:25, 26.

To whenuena Jesu tin to aigba ji, e do ede hia nado yin ‘Hónamẹtọ Jiawu.’ Na oyọnẹn Ohó Jiwheyẹwhe tọn tọn tintindo po nukunnumimọjẹ jijọ gbẹtọ lẹ tọn mẹ po wutu, Jesu yọ́n lehe e na didẹ̀ nuhahun gbẹzan egbesọ tọn lẹ do. Sọn whenue e yin zizedo ofìn ji to olọn mẹ, Klisti zindonukọn nado yin ‘Hónamẹtọ Jiawu’ lọ, bo to nuyiwa taidi omẹ tintan he gblamẹ Jehovah nọ dọho na gbẹtọvi lẹ gbọn. Ayinamẹ Jesu tọn he yin kinkàndai to Biblu mẹ lẹ nọ do nuyọnẹn hia to whepoponu bo masọ tindo oblọ depope. Ehe yinyọnẹn po yise tintindo to e mẹ po sọgan gọalọna we nado zan gbẹzan he vò sọn ayimajai po obu ahungbadonamẹ tọn po si.

Isaia 9:6 sọ do Jesu hia taidi “Ahọvi Jijọho tọn.” To otẹn aṣẹpipa tọn enẹ mẹ, Klisti na yí huhlọn etọn zan to madẹnmẹ nado de zẹ́nmasọ lẹpo sẹ̀—yèdọ tonudidọ tọn, gbẹtọ lẹ tọn, po akuẹzinzan tọn po. Gbọnna? Gbọn gbẹtọvi lẹ hinhẹnwa gandudu jijọho tọn Ahọluduta Mẹssia tọn glọ dali.—Daniẹli 2:44.

To gandudu Ahọluduta lọ tọn glọ, jijọho tẹgbẹ tọn na gbayipe to aigba ji. Naegbọn hiẹ sọgan yí ehe sè? Whẹwhinwhẹ́n lọ yin didohia to Isaia 11:9 mẹ, fie mí hia te dọmọ: “Yé [mẹjidugando Ahọluduta lọ tọn lẹ] ma na gbleawunamẹ, mọ yé ma to na gbà sudo to osó wiwe ṣie lẹpo ji: na aihọn na gọ́ na nuyọnẹn OKLUNỌ tọn, dile osin ṣinyọ́n ohù ji do.” To godo mẹ, mẹhe tin to aigba ji lẹpo na tindo oyọnẹn he pegan Jiwheyẹwhe tọn bo na nọ setonuna ẹn. Be nukundido enẹ hẹn homẹ towe hùn ya? Eyin mọwẹ, ma dọ̀n yonu do godo nado plọn ‘oyọnẹn họakuẹ Jehovah tọn’ blo.

Hiẹ sọgan tindo oyọnẹn Jiwheyẹwhe tọn he nọ hẹn yise lodo bo nọ namẹ ogbẹ̀ lọ gbọn dogbigbapọnna nuhe Biblu plọn mí taun gando nujijọ azán mítọn gbè lẹ tọn po opagbe sọgodo jiawu he yin dido to Biblu mẹ tọn po go dali. Enẹwutu mí dotuhomẹna we nado kẹalọyi tito-to-whinnu Biblu pinplọn vọnu tọn he Kunnudetọ Jehovah tọn lẹ nọ zedonukọnnamẹ to lẹdo towe mẹ. Aliho dopo wẹ ehe yin nado de obu pò bo tindo todido nujọnu tọn to aihọn he gọ́ na ayimajai ehe mẹ.

[Apotin/Yẹdide to weda 7]

Nuhewutu Gandudu Ahọluduta lọ Tọn Nọ Na Mí Todido

Nugopipe po jlọjẹ po ko yin nina Jesu Klisti, Ahọlu Ahọluduta Jiwheyẹwhe tọn tọn, nado yí aṣẹpipa zan do wẹkẹ lọ ji. (Matiu 28:18) E na hẹn nuhe tin to aigba ji lẹpo gọ̀ do otẹn pipé yetọn mẹ. E sọ tindo huhlọn do azọ̀n lẹpo ji. Azọ́n huhlọnnọ he Jesu wà to aigba ji lẹ yin numọhlannukọn dona daho hugan he na yin mimọ to gandudu etọn glọ lẹ tọn taidi Ahọlu pipé he go yè sọgan dejido de. Jẹhẹnu Ahọlu Mẹssia lọ tọn he yin sislẹ tofi lẹ tẹwẹ hiẹ yiwanna hugan?

▪ Yọ́n dọnsẹpọ.—Malku 10:13-16.

▪ Yin lẹnpọn dagbenọ bo ma nọ hò mẹnukuntapọn.—Malku 10:35-45.

▪ Sọgan yin jide-dego bo ma yin ṣejannabinọ.—Matiu 4:5-7; Luku 6:19.

▪ Yin dodonọ.—Isaia 11:3-5; Johanu 5:30; 8:16.

▪ Yin mẹtọnhopọntọ, podọ whiwhẹnọ.—Johanu 13:3-15.

[Yẹdide to weda 4]

Biblu hihia po ayihamẹlinlẹnpọn po sọgan hẹn mí tindo todido to Jehovah mẹ