Nọ Plọnmẹ Nugbo Lọ

Bẹsọn septembre, Nuplọnwe Opli Gbẹzan po Lizọnyizọn po Tọn na nọ bẹ nuzedonukọnnamẹ yọyọ de hẹn he hosọ etọn yin “Nọ Plọnmẹ Nugbo Lọ.” Yanwle mítọn na yin nado zinnudo nugbo dodonu tọn de ji to Biblu mẹ gbọn kanbiọ po wefọ de po yiyizan dali.

Eyin mí mọ jlodotọ de, mí sọgan fọnjlodotena ẹn na dlapọn he na bọdego gbọn owe de jijodo na ẹn kavi video de didohia ẹ sọn jw.org ji dali. Mí dona tẹnpọn nado yawu lẹkọyi to azán kleun de godo nado zindonukọn to hodọdopọ mítọn mẹ. Nuzedonukọnnamẹ yọyọ lọ lẹ po azọ́ndenamẹ wehọmẹvi tọn lẹ po na nọ sinai do hosọ he to owe lọ Etẹwẹ Biblu Plọn Mí Taun? mẹ lẹ ji. To apotin he to vivọnu weta dopodopo tọn mẹ, mí sọgan mọ wefọ devo lẹ he na gọalọna mí nado basi gọyìpọn kavi deanana plọnmẹ Biblu gbọn Biblu kẹdẹ yiyizan dali.

Aliho dopo gee wẹ yì ogbẹ̀ mẹ. (Mt 7:13, 14) To whenuena e yindọ mẹhe wá sọn sinsẹ̀n po aṣa voovo lẹ po mẹ wẹ mí nọ dukosọ hẹ, mí dona nọ ze nugbo Biblu tọn he sọgbe hẹ ninọmẹ yetọn lẹ donukọnna yé. (1Ti 2:4) Dile mí to akọ̀ jẹ hẹ hosọ Biblu tọn voovo lẹ bo “nọ yí ohó nugbo tọn lọ zan to aliho he sọgbe mẹ” dogọ, ayajẹ mítọn na jideji bọ mí na tindo kọdetọn dagbe to nugbo lọ pinplọn mẹdevo lẹ mẹ.—2Ti 2:15.