Plọn Ovi Towe Nado Nọ Dín Jijọho

Homẹ Nicole owhe ṣinatọ̀n mẹvi de tọn to hùnhùn na whẹndo etọn jlo na sẹtẹn yì fidindẹn de. Enẹwutu, e nọ to hodọna Gabrielle he yin họntọn vivẹ etọn gando tẹnsisẹ enẹ go to whepoponu. To gbèdopo, Gabrielle dọna ẹn po adi po dọ emi ma do ojlo to tẹnsisẹ etọn mẹ. E vẹna Nicole tlala bọ e gblehomẹ bo dọna onọ̀ etọn dọ, “N’masọ jlo na sọnukunmọ Gabrielle gbede ba!”

WIWỌ́ ovu-whenu tọn lẹ taidi dehe wá aimẹ to Nicole po Gabrielle po ṣẹnṣẹn nọ saba biọ dọ mẹjitọ lẹ ni yí nude wà—e ma yin nado fahomẹna ovi lẹ kẹdẹ gba, ṣigba nado do lehe yé na didẹ whẹho lọ gbọn hia yé ga. To jọwamọ-liho, yọpọ lẹ ma nọ gọ̀n ma wà “yọpọnu,” podọ yé ma nọ saba yọ́n awugble he hodidọ po nuyiwa yetọn lẹ po sọgan hẹnwa lẹ. (1 Kọlintinu lẹ 13:11) Yé tindo nuhudo alọgọ tọn nado wleawuna jẹhẹnu he sọgan zọ́n bọ yé na nọ̀ jijọho mẹ hẹ mẹdevo lẹ to whẹndo mẹ podọ to fidevo.

Mẹjitọ Klistiani lẹ nọ jlo vẹkuvẹku nado plọn ovi yetọn lẹ na yé nido “nọ dín jijọho, bosọ nọ doafọna ẹn.” (1 Pita 3:11) Nugbo wẹ dọ e nọ biọ vivẹnu susu nado duto nuvẹdomẹ, flumẹjijẹ po wangbẹnamẹ po ji, ṣigba ayajẹ he nọ wá sọn jijọho dindin mẹ mayọnjlẹ. Eyin mẹjitọ de wẹ hiẹ yin, nawẹ hiẹ sọgan plọn ovi towe lẹ nado nọ dín jijọho gbọn?

Dó Ojlo lọ Nado Hẹn Homẹhun “Jiwheyẹwhe Jijọho Tọn” do Ovi Towe lẹ Mẹ

Jehovah yin yiylọdọ “Jiwheyẹwhe jijọho tọn” bosọ yin alọdlẹndo taidi mẹlọ he “nọ namẹ jijọho.” (Filippinu lẹ 4:9; Lomunu lẹ 15:33, NW) Enẹwutu, mẹjitọ nuyọnẹntọ lẹ nọ yí Ohó Jiwheyẹwhe tọn, Biblu zan ganji bo nọ dó ojlo lọ nado hẹn homẹhun Jiwheyẹwhe podọ nado wleawuna jẹhẹnu etọn lẹ do ahun mẹ na ovi yetọn lẹ. Di apajlẹ, hiẹ sọgan gọalọna ovi towe lẹ nado yí nukun homẹ tọn do pọ́n nuhe apọsteli Johanu mọ to numimọ ayidego tọn de mẹ—yèdọ aidowhẹdo whanpẹnọ he tindo sinmẹ amamú emẹlaldi tọn de he lẹdo ofìn Jehovah tọn.a (Osọhia 4:2, 3) Basi zẹẹmẹ dọ aidowhẹdo ehe nọtena jijọho po blẹomẹninọ po he tin lẹdo Jehovah, podọ dona mọnkọtọn lẹ na dlẹnkan jẹ mẹhe setonuna ẹn lẹpo dè.

Jehovah sọ nọ na anademẹ lẹ gbọn Ovi etọn Jesu gblamẹ, mẹhe yin yiylọdọ “Ahọvi Jijọho tọn.” (Isaia 9:6, 7) Enẹwutu, nọ hia otàn Biblu tọn lẹ he mẹ mí mọ nuplọnmẹ họakuẹ Jesu tọn lẹ te gando lehe yè sọgan dapana avùn po wiwọ́ po do go bosọ nọ dọhodeji hẹ ovi towe lẹ. (Matiu 26:51-56; Malku 9:33-35) Gọalọna yé nado yọ́n nuhewutu Paulu, he yin “danuwatọ” de dai, wá diọ walọ etọn bo wlan dọ, “afanumẹ Oklunọ tọn ma hà na hoavùn; adavo dọ ni nọ wà dẹẹdẹ hẹ gbẹtọ lẹpo, . . . bosọ fahomẹ [to oylan glọ].” (1 Timoti 1:13; 2 Timoti 2:24) E sọgan paṣa we nado mọ lehe nuplọnmẹ ehe na yinuwado ovi towe lẹ ji gbọn.

Evan flin lehe hagbẹ etọn de ṣàn ẹn kò gbọn to wehọmẹ-hún mẹ whenue e yin owhe ṣinawe mẹvi. “Adi do mi do visunnu lọ go sọmọ bọ n’jlo na yiahọsu!” wẹ e dọ. “N’wá flin nuhe n’ko plọn to whégbè gando mẹhe nọ tẹnpọn nado dá avùn dai lẹ go. N’yọnẹn dọ Jehovah ma jlo dọ yẹn ni ‘yí oylan do yiahọsu oylan tọn to mẹde go’ podọ n’dona ‘nọ̀ jijọho hẹ omẹ popo.’ ” (Lomunu lẹ 12:17, 18) Enẹ gọalọna Evan nado mọ huhlọn po adọgbigbo po nado duto homẹgble sinsinyẹn enẹ ji bo yinuwa po homẹfa po. E jlo nado hẹn homẹhun Jiwheyẹwhe jijọho tọn lọ.

Yin Mẹjitọ He Nọ Dín Jijọho De

Be jijọho tin to owhé towe gbè ya? Eyin mọ wẹ, ovi towe lẹ sọgan plọn nususu gando jijọho go eyin hiẹ ma tlẹ kẹnù. Eyin hiẹ na tindo kọdetọn dagbe to jijọho pinplọn ovi towe lẹ mẹ, ehe na biọ to asi we dọ hiẹ lọsu ni nọ hodo apajlẹ Jiwheyẹwhe po Klisti po tọn to jijọho dindin mẹ taun.—Lomunu lẹ 2:21.

Russ po Cindy po nọ dovivẹnu taun nado plọn visunnu yetọn awe lẹ, bo nọ na tuli yé nado nọ yinuwa po owanyi po to whenuena mẹdevo lẹ doadihomẹna yé. Cindy dọmọ, “Lehe yẹn po Russ po nọ yinuwa hẹ visunnu mítọn lẹ gbọn podọ hẹ mẹdevo lẹ to whenuena nuhahun lẹ fọ́n nọ yí adà titengbe de wà do nuyiwa visunnu mítọn lẹ tọn ji eyin yelọsu wá pehẹ ninọmẹ mọnkọtọn lẹ.”

Eyin hiẹ tlẹ ṣinuwa—podọ mẹjitọ tẹwẹ ma nọ ṣinuwa?—hiẹ gbẹ́ sọgan yí dotẹnmẹ hundote enẹ zan nado plọn ovi towe lẹ nuplọnmẹ họakuẹ lẹ. Stephen yigbe dọmọ: “Yẹn po asi ṣie Terry po nọ nọ̀ plaplaji to whedelẹnu bo nọ domẹplọnlọ ovi mítọn atọ̀n lẹ go whẹpo do nọ wá mọnukunnujẹ whẹho lọ lẹ mẹ ganji. Ṣigba, eyin e jọ domọ, mí nọ vẹvẹna yé.” Terry yidogọ dọmọ: “Mí nọ hẹn ovi mítọn lẹ mọnukunnujẹemẹ dọ mapenọ wẹ mílọsu, podọ mí nọ ṣinuwa ga. Mí mọdọ ehe hẹn jijọho tin-to-aimẹ to whẹndo mítọn mẹ bosọ gọalọna ovi lẹ nado plọn lehe yè nọ doafọna jijọho gbọn.”

Be aliho he mẹ hiẹ nọ yinuwa hẹ ovi towe lẹ te to pinplọn yé lehe yè nọ dín jijọho gbọn ya? Jesu dotuhomẹna mí dọmọ: “Enẹwutu onú depope mìwlẹ jlo gbẹtọ ni wà hlan mì, mọkẹdẹ wẹ mì ni wà hlan yé.” (Matiu 7:12) Mahopọnna dọ hiẹ lọsu nọ ṣinuwa, deji dọ owanyi sisosiso he a nọ dohia ovi towe lẹ na tindo kọdetọn dagbe. Eyin hiẹ nọ na anademẹ ovi towe lẹ po owanyi po, e na bọawuna yé hugan nado kẹalọyi i.

Nọ Whleawu Nado Gblehomẹ

Howhinwhẹn lẹ 19:11 dọmọ: “Zinzin gbẹtọ tọn hẹn ẹn whleawu nado gblehomẹ.” Nawẹ hiẹ sọgan gọalọna ovi towe lẹ nado wleawuna zinzin mọnkọtọn gbọn? David basi zẹẹmẹ aliho dagbe he ewọ po asi etọn Mariann po mọdọ e yọ́n-na-yizan nado plọn visunnu po viyọnnu yetọn po tọn. E dọmọ: “Eyin yé gblehomẹ do mẹde go na mẹlọ wà kavi dọ nuhe nọ gbleawunamẹ de, mí nọ gọalọna yé nado vẹawu mẹlọ. Mí nọ kàn kanbiọ kleunkleun delẹ sè yé taidi: ‘Be nujijọ de to apọ̀ na mẹlọ to azán enẹ gbè wẹ ya? Kavi awuwhàn wẹ e te? Vlavo mẹde doadihomẹna ẹn wẹ ya?’ ” Mariann yidogọ dọ, “Ehe nọ saba fahomẹna ovi lẹ kakati nado sisẹ́ yé nado lẹnnupọndo onú agọ̀ lẹ ji kavi dọnnu do owhẹ̀ mẹhe tọn whẹ́n kavi gble ji.”

Nuplọnmẹ mọnkọtọn sọgan tindo kọdetọn jiawu lẹ. Mì gbọ mí ni lẹkọwa Nicole he go mí donù to bẹjẹeji hosọ ehe tọn ji. Mì pọ́n lehe onọ̀ etọn Michelle gọalọna ẹn to aliho dagbe de mẹ do, hugan nado gbọwhẹ hẹ họntọn etọn Gabrielle poun. Michelle dọmọ: “Yẹn po Nicole po hia weta 14tọ owe Plọnnu sọn Mẹplọntọ Daho lọ Dè tọn.b “To enẹgodo, n’basi zẹẹmẹ na ẹn gando nuhe Jesu to didọ go to whenue e dọ dọ mí dona jonamẹ ‘kakajẹ whla kandegbàn-atọ́n-nukunawe.’ To whenue n’ko yí sọwhiwhe do dotoaina Nicole dile e to numọtolanmẹ etọn lẹ dọtọ́n godo, n’gọalọna ẹn nado lẹnnupọndo lehe Gabrielle na blawu bo jẹflumẹ do ji na họntọn vivẹ etọn jlo na sẹtẹn yì fidindẹn.”—Matiu 18:21, 22.

Nukunnumọjẹnumẹ he Nicole wá tindo todin gando nuhe sọgan ko sisẹ́ Gabrielle nado dọho domọ go, gọalọna ẹn nado jẹ awuvẹ họntọn etọn ji bo whàn ẹn nado tẹkan hlan Gabrielle bo vẹvẹ. Michelle yidogọ dọmọ: “Sọn whenẹnu gbọ́n, Nicole nọ mọ ayajẹ to numọtolanmẹ mẹdevo lẹ tọn hihopọn mẹ bo nọ wà onú dagbe lẹ na yé nado hẹn ninọmẹ yetọn pọnte.”—Filippinu lẹ 2:3, 4.

Gọalọna ovi towe lẹ ma nado nọ dike na nuṣiwa po nukunnumamọjẹnumẹ lẹ po ni nọ hẹn yé gblehomẹ. Mọwiwà sọgan zọ́n bọ hiẹ na tindo ayajẹ dogọ dile hiẹ to mimọ bọ ovi towe lẹ to ojlo dagbe po owanyi sisosiso po dohia mẹdevo lẹ.—Lomunu lẹ 12:10; 1 Kọlintinu lẹ 12:25.

Whàn Ovi Towe lẹ Nado Yọ́n Gigo Jonamẹ Tọn

“Gigo . . . wẹ nado dèkọ̀ sọn ylanwa go,” wẹ Howhinwhẹn lẹ 19:11 dọ. To whenuena Jesu tin to ojlẹ awufiẹsa he sinyẹn hugan tọn de mẹ, e hodo apajlẹ Otọ́ etọn tọn bo do gbigbọ jonamẹ tọn hia. (Luku 23:34) Ovi towe lẹ sọgan plọn gigo jonamẹ tọn eyin yelọsu nọ mọdọ hiẹ nọ jonamẹ.

Di apajlẹ, Willy owhe atọ́n mẹvi de yiwanna nado nọ de yẹdide lẹ hẹ onọ̀-daho etọn. To gbèdopo, onọ̀-daho lọ doalọte to ajiji mẹ bo gbẹnuna Willy sinsinyẹn bosọ dedo. Willy jẹflumẹ. Otọ́ etọn Sam dọmọ: “Onọ̀-daho Willy tọn nọ jẹ apọ̀nmẹzọ̀n Alzheimer tọn. Enẹwutu, mí basi zẹẹmẹ ehe tọn na Willy po hogbe he ewọ sọgan mọnukunnujẹemẹ lẹ po.” To whenuena mẹjitọ Willy tọn lẹ ko flinnu in dọ yè ko jona ewọ lọsu whlasusu podọ ewọ dona jona mẹdevo lẹ godo, e paṣa Sam taun nado mọ nuhe Willy wà. Sam dọmọ: “Yí nukun homẹ tọn do pọ́n numọtolanmẹ yẹn po asi ṣie po tọn, dile mí mọ visunnu pẹvi mítọn yì onọ̀-daho owhe 80 mẹvi etọn dè, bo yí ogbè fifá do vẹvẹna ẹn, bosọ hẹn alọ go na ẹn kaka wá tafo lọ kọ̀n!”

Na nugbo tọn gigo de wẹ e yin dọ ovi lẹ ni plọn nado “nọ sinyẹnlin hẹ” mẹdevo lẹ bo nọ jona yé to whenuena yé wanuyindo kavi ṣinuwa. (Kọlọsinu lẹ 3:13) Hẹn ovi towe lẹ deji dọ, eyin gbẹtọ lẹ tlẹ desọn ojlo mẹ bo doadihomẹna yé, jijọho dindin sọgan didẹ whẹho lẹ to aliho dagbe mẹ, na “whenuena aliho gbẹtọ tọn jlo OKLUNỌ, ewọ tlẹ nọ hẹn kẹntọ etọn lẹ nọhẹ ẹ to jijọho mẹ.”—Howhinwhẹn lẹ 16:7.

Nọ Gọalọna Ovi Towe lẹ Nado Nọ Dín Jijọho

Eyin mẹjitọ lẹ nọ yí Ohó Jiwheyẹwhe tọn zan nado plọn ovi yetọn lẹ “to jijọho mẹ” podọ taidi mẹhe “to jijọho basi lẹ,” yé na hẹn ale wá na ovi yetọn lẹ nugbonugbo. (Jakobu 3:18) Gbọnmọ dali, mẹjitọ mọnkọtọn lẹ nọ wleawu nuhe ovi yetọn lẹ tindo nuhudo etọn nado didẹ gbemanọpọ lẹ bo yin jijọho-dintọ lẹ tọn na yé. Ehe nọ hẹn ayajẹ po pekọ po wá na yé tlala to gbẹzan yetọn pete mẹ.

Dan po Kathy po tindo ovi atọ̀n he tin to aflanmẹ bosọ to dagbe wà to gbigbọ-liho. Dan dọmọ: “Dile etlẹ yindọ e ma bọawu nado plọn yé to owhe yọpọ-whenu tọn yetọn lẹ mẹ, homẹ mítọn hùn taun dọ ovi mítọn lẹ to dagbe wà todin. Yé tindo haṣinṣan dagbe hẹ mẹdevo lẹ todin, bosọ nọ jona mẹdevo lẹ po awubibọ po to whenuena nuhahun lẹ fọ́n.” Kathy yidogọ dọ: “Ehe nọ hẹn homẹhun mí taun, na jijọho yin apadewhe sinsẹ́n gbigbọ Jiwheyẹwhe tọn tọn.”—Galatianu lẹ 5:22, 23.

Enẹwutu, taidi mẹjitọ Klistiani lẹ, onú ma dona nọ ‘ṣikọna’ mì, podọ mì ma dona “wàdidọ” dile mì to ovi mìtọn lẹ plọn nado nọ dín jijọho—eyin etlẹ taidi dọ mì ma to kọdetọn dagbe tindo to bẹjẹeji. Dile mì to mọwà, mì deji dọ “Jiwheyẹwhe owanyi po jijọho po tọn na tin po mì po.”—Galatianu lẹ 6:9; 2 Kọlintinu lẹ 13:11.

[Nudọnamẹ Odò Tọn]

[Apotin/Yẹdide to weda 20]

BE NUYIWADOMẸJI DAGBE DE WẸ YA?

Linlin de he yin kinkàn gbọn pipli he nọ na avase do linlinnamẹnu lẹ ji de dali (Media Awareness Network) he hosọ etọn yin “Danuwiwa He Nọ Sọawuhia to Aihundida Linlinnamẹnu lẹ Tọn Mẹ” dọmọ: “Linlẹn lọ dọ danuwiwa yin aliho de nado didẹ nuhahun lẹ nọ yin nùzindeji gbọn aihundida lẹ dali, ehe mẹ mẹylankan lẹ po mẹhe yin yiylọdọ mẹdagbe lẹ po nọ yí danuwiwa zan gbọzangbọzan te.” To aihundida televiziọn ji tọn, sinimọto po nuhiho video ji tọn he yin gbigbejepọn lẹ mẹ, nudi 10 to kanweko ji poun wẹ nọ do kọdetọn ylankan danuwiwa tọn lẹ hia. Kakati nado do kọdetọn ylankan lọ lẹ hia, linlin lọ yidogọ dọ, “danuwiwa nọ yin didohia poun taidi nuhe sọgbe, podọ jọwamọnu de he ma sọgan yin didapana—yèdọ aliho he yè mọdọ e yọnhugan nado didẹ nuhahun lọ.”

Be hiẹ mọdọ e jẹ nado basi diọdo delẹ gando nuhe na nọ yin pinpọn to televiziọn ji to owhé towe gbè go ya? A dike aihundida linlinnamẹnu lẹ tọn duto vivẹnu he hiẹ to dido nado plọn ovi towe lẹ nado nọ dín jijọho ji blo.

[Yẹdide to weda 17]

Nọ dó ojlo lọ nado hẹn homẹhun “Jiwheyẹwhe jijọho tọn” do ovi towe lẹ mẹ

[Yẹdide to weda 18]

Dovivẹnu nado duto hodidọ po nuyiwa he nọ gbleawunamẹ lẹ po ji

[Yẹdide to weda 19]

Ovi towe lẹ dona plọn lehe yè nọ vẹvẹ bo nọ jonamẹ do