Alọdlẹndonu Nuplọnwe Opli Gbẹzan po Lizọnyizọn po Tọn
2-8 AVRIL
NUHỌAKUẸ LẸ SỌN OHÓ JIWHEYẸWHE TỌN MẸ | MATIU 26
“Juwayi po Oflin Po—Kanṣiṣa po Vogbingbọn Po”
nwtsty yẹdide
Núdùdù Juwayi Tọn
Núdùdù tangan he nọ yin dùdù to Juwayi whenu lẹ wẹ: lẹngbọvu-làn hìhì (ohú kanlin lọ tọn depope ma nọ yin winwẹ́n) (1); akla madotọ́n (2); podọ amà vivẹ́ (3). (Eks 12:5, 8; Sọh 9:11) Sọgbe hẹ Mishna, amà vivẹ́ sọgan ko yin salada-mà, yàntotoe kavi amà mọnkọtọn devo lẹ, podọ e họnwun dọ ehe na ko nọ flin Islaelivi lẹ kanlinmọgbenu sinsinyẹn he yé nọ to Egipti. Jesu yí akla madotọ́n zan taidi yẹhiadonu agbasa pipé gbẹtọvi tọn etọn. (Mt 26:26) Podọ apọsteli Paulu ylọ Jesu dọ “lẹngbọvu Juwayi tọn mítọn.” (1Kọ 5:7) To owhe kanweko tintan whenu, ovẹn (4) sọ nọ yin yiyizan to núdùdù Juwayi tọn whenu. Jesu yí ovẹn zan taidi yẹhiadonu ohùn etọn tọn, he na yin kinkọndai taidi ofligọ de.—Mt 26:27, 28.
nwtsty adà nupinplọn tọn do Mt 26:26 ji
nọtena: Hogbe Glẹki tọn lọ e·stinʹ (he to paa mẹ zẹẹmẹdo “yin”) tofi bẹ linlẹn ehelẹ hẹn: “zẹẹmẹdo; yẹhiadonu; ohia.” Zẹẹmẹ ehe họnwun na apọsteli lẹ, na to nujijọ ehe whenu, Jesu to finẹ hẹ yé po agbasa pipé etọn po, podọ akla madotọ́n he yé na dù lọ lọsu to finẹ. Enẹwutu, akla lọ ma sọgan ko yin agbasa Jesu tọn tlọlọ. E jẹna ayidego dọ hogbe Glẹki tọn dopolọ wẹ yin yiyizan to Mt 12:7 mẹ bọ lẹdogbedevomẹ Biblu tọn susu lilẹ́ ẹ do “zẹẹmẹdo.”
nwtsty adà nupinplọn tọn do Mt 26:28 ji
ohùn . . . he yin alẹnu lọ tọn: Avọ́sinsan Jesu tọn wẹ zọ́n bọ alẹnu yọyọ lọ he tin to Jehovah po Klistiani yiamisisadode lẹ po ṣẹnṣẹn do bẹ azọ́n. (Heb 8:10) Tofi, hogbe dopolọ he Mose yizan to whenue e to nuyiwa taidi whẹgbọtọ bo to alẹnu Osẹ́n tọn lọ doai na Islaelivi lẹ to Osó Sinai ji wẹ Jesu yizan. (Eks 24:8; Heb 9:19-21) Kẹdẹdile ohùn oyìn po gbọgbọẹ lẹ po tọn hẹn alẹnu Osẹ́n tọn lodo to Jiwheyẹwhe po akọta Islaeli tọn po ṣẹnṣẹn do, ohùn Jesu tọn hẹn alẹnu yọyọ he Jehovah na basi hẹ Islaeli gbigbọmẹ tọn lọ lodo. Alẹnu enẹ bẹjẹeji to Pẹntikọsti owhe 33 W.M.—Heb 9:14, 15.
Onú Sisosiso Gbigbọmẹ Tọn Lẹ
nwtsty adà nupinplọn tọn do Mt 26:17 ji
To azán tintan hùnwhẹ Akla Madotọ́n tọn gbè: Hùnwhẹ Akla Madotọ́n tọn nọ bẹjẹeji to Nisan 15, yèdọ azán he bọdo Juwayi go (Nisan 14), bo nọ zindonukọn na azán ṣinawe. (Pọ́n Nudọnamẹ Dogọ B15.) Ṣigba to azán Jesu tọn gbè, Juwayi wá tindo kanṣiṣa hẹ hùnwhẹ ehe sọmọ bọ azán ṣinatọ̀n lọ lẹpo, ehe bẹ Nisan 14 hẹn nọ yin alọdlẹndo to whedelẹnu taidi “Hùnwhẹ Akla Madotọ́n tọn.” (Luk 22:1) To ninọmẹ ehe mẹ, hodidọ lọ “To azán tintan . . . gbè” sọgan yin lilẹdo “To azán he jẹnukọnna.” (Yijlẹdo Joh 1:15, 30 go, fie hogbe Glẹki tọn na “tintan” [proʹtos] yin lilẹdo “jẹnukọnna” te to hodidọ mọnkọtọn de mẹ, enẹ wẹ “ewọ ko tin jẹnukọnna [proʹtos] mi.”) Enẹwutu, Glẹki dowhenu tọn gọna kandai Ju lẹ tọn dohia dọ Nisan 13 wẹ devi lẹ kàn kanbiọ sè Jesu. To okle Nisan 13 tọn, devi lẹ wleawuna Juwayi lọ, ehe wá yin dùdù “to whenue owhè ko jai” to bẹjẹeji Nisan 14 tọn.—Mk 14:16, 17.
nwtsty adà nupinplọn tọn do Mt 26:39 ji
dike kọfo ehe ni juwayi: To Biblu mẹ, “kọfo” nọ saba yin yiyizan to yẹhiadonu-liho nado nọtena ojlo Jiwheyẹwhe tọn kavi “adà he yin dide” na mẹde. (Pọ́n adà nupinplọn tọn do Mt 20:22 ji.) Matin ayihaawe, vlẹko he okú Jesu tọn taidi mẹhe yè sawhẹ nùzinzan po gufinfọn tọn po dokọna sọgan hẹnwa Jiwheyẹwhe ji wẹ na ko duahunmẹna ẹn bo sisẹ́ ẹ nado hodẹ̀ dọ “kọfo” ehe ni juwayi sọn e dè.
9-15 AVRIL
NUHỌAKUẸ LẸ SỌN OHÓ JIWHEYẸWHE TỌN MẸ | MATIU 27-28
“Mì Yì bo Hẹn Gbẹtọ lẹ Zun Devi—Etẹwutu, to Fie, Podọ Gbọnna?”
‘Mì Yì bo Hẹn Gbẹtọ lẹ Zun Nuplọntọ’
4 Jesu tindo aṣẹ do agun etọn ji, podọ e ko sọ tindo aṣẹ do Ahọluduta zedai Jiwheyẹwhe tọn ji sọn 1914 gbọ́n. (Kọlọsinu lẹ 1:13; Osọhia 11:15) Taidi angẹligán lọ, e tindo aṣẹ do awhànpa angẹli olọn tọn livi kanweko lẹ ji. (1 Tẹsalonikanu lẹ 4:16; 1 Pita 3:22; Osọhia 19:14-16) Otọ́ etọn ko na ẹn aṣẹ nado zín “ogán lẹpo, po [aṣẹpipa] lẹpo po, po huhlọn po” he jẹagọdo nunọwhinnusẹ́n dodo tọn lẹ do odò. (1 Kọlintinu lẹ 15:24-26; Efesunu lẹ 1:20-23) E mayin mẹhe togbẹ̀ lẹ kẹdẹ ji wẹ Jesu tindo aṣẹ do gba. Ewọ wẹ sọ yin “whẹdatọ omẹgbẹ̀ po oṣiọ po tọn” bosọ yin huhlọnna gbọn Jiwheyẹwhe dali nado fọ́n mẹhe ko kú lẹ. (Owalọ lẹ 10:42; Johanu 5:26-28) Matin ayihaawe, gbedide he yin nina gbọn Omẹ lọ he aṣẹ daho mọnkọtọn yin nina dali, dona yin pinpọn di nujọnu taun. Enẹwutu, mí nọ yí sisi do setonuna gbedide Klisti tọn sọn ojlo mẹ nado ‘yì bo hẹn gbẹtọ lẹ zun devi.’
nwtsty adà nupinplọn tọn lẹ do Mt 28:19 ji
hẹn gbẹtọ lẹ . . . zun devi: Hogbe Glẹki tọn lọ ma·the·teuʹo sọgan yin lilẹdo “plọnmẹ” po yanwle lọ po nado hẹn mẹlọ zun nuplọntọ kavi devi. (Yijlẹdo Mt 13:52 go, fie hogbe lọ “yin nuplọn” yin zinzan te.) Hogbe lọ lẹ “baptizi” po “plọn” po do nuhe gbedide lọ nado “hẹn gbẹtọ lẹ . . . zun devi” bẹhẹn hia.
gbẹtọ lẹ sọn akọta lẹpo mẹ: Lẹdogbedevomẹ tlọlọ etọn wẹ “akọta lẹpo,” ṣigba lẹdo hodidọ lọ tọn dohia dọ hogbe lọ to alọdlẹndo mẹdopodopo sọn akọta lẹpo mẹ, na hogbe Glẹki tọn he yin lilẹdo “yé” to hodidọ lọ nọ baptizi yé mẹ yin hogbe he nọ yin yiyizan na sunnu bo gbọnmọ dali dohia dọ gbẹtọ lẹ wẹ e to alọdlẹndo e ma yin “akọta lẹ.” Gbedide lọ nado jẹ “gbẹtọ lẹ sọn akọta lẹpo mẹ” dè yin gbedide yọyọ de. Jẹnukọnna lizọnyizọn Jesu tọn, Owe-wiwe lẹ dohia dọ to whenue Kosi lẹ wá nado basi sinsẹ̀n hlan Jehovah kẹdẹ wẹ Islaelivi lẹ nọ kẹalọyi yé. (1Ah 8:41-43) Ṣigba, gbedide Jesu tọn ehe to didohia devi etọn lẹ dọ yé dona gbloada na yẹwhehodidọ yetọn jẹ mẹhe ma yin Ju lẹ dè, bo gbọnmọ dali zinnudeji dọ azọ́n lẹdo aihọn pé tọn de wẹ azọ́n mẹhẹnzun devi tọn Klistiani lẹ tọn yin.—Mt 10:1, 5-7; Osọ 7:9; pọ́n adà nupinplọn tọn do Mt 24:14 ji.
nwtsty adà nupinplọn tọn do Mt 28:20 ji
nọ plọn yé: Hogbe Glẹki tọn he yin lilẹdo “nado plọnmẹ” zẹẹmẹdo anademẹ nina, zẹẹmẹ-bibasi, apajlẹ lẹ yiyizan nado plọnnumẹ, gọna kunnudenu lẹ nina. (Pọ́n adà nupinplọn tọn lẹ do Mt 3:1; 4:23 ji.) Pinplọn yé nado payi nuhe Jesu ko degbe etọn lẹpo go dona to nukọnzindo, enẹ wẹ nado nọ plọn yé nuhe Jesu plọnmẹ lẹ, yí nuplọnmẹ etọn lẹ do yizan mẹ bo nọ hodo apajlẹ etọn.—Joh 13:17; Efe 4:21; 1Pi 2:21.
Onú Sisosiso Gbigbọmẹ Tọn Lẹ
nwtsty adà nupinplọn tọn lẹ do Mt 27:51 ji
họmẹgbòvọ̀: Avọ̀ dagbedagbe whanpẹnọ ehe wẹ gbò Fiwiwe Gbaugbau lọ po Fiwiwe tẹmpli lọ tọn po do awe. Kandai Ju lẹ tọn dohia dọ họmẹgbòvọ̀ pinpẹn enẹ dite na mẹtlu 18, bo gblo sọ mẹtlu 9 bosọ tli sọ nudi centimètre 7 daa. Gbọn avọ̀ lọ tintlẹ́n do awe dali, Jehovah do homẹgble etọn hia sọta mẹhe hù Visunnu etọn lẹ bosọ dohia dọ ali olọn mẹ yìyì tọn ko hùndonuvo todin.—Heb 10:19, 20; pọ́n Zẹẹmẹ Hogbe Biblu Tọn lẹ Tọn.
fiwiwe: Tofi, hogbe Glẹki tọn lọ na·osʹ to alọdlẹndo lẹdo Fiwiwe lọ po Fiwiwe Gbaugbau lọ po tọn.
nwtsty adà nupinplọn tọn do Mt 28:7 ji
dọna devi etọn lẹ dọ ewọ ko yin finfọn: Gbọnvona dọ yọnnu ehelẹ wẹ yin devi tintan he fọnsọnku Jesu tọn yin didọna lẹ, yewlẹ wẹ sọ yin gbedena nado yì dọna devi he pò lẹ. (Mt 28:2, 5, 7) Sọgbe hẹ aṣa Ju lẹ tọn he ma sinai do Owe-wiwe ji, kunnudide yọnnu de tọn ma nọ yin alọkẹyi to owhẹ̀ nukọn. To vogbingbọn mẹ, angẹli Jiwheyẹwhe tọn doyẹyigona yọnnu ehelẹ gbọn azọ́ndenamẹ ayajẹ tọn enẹ nina yé dali.
16-22 AVRIL
NUHỌAKUẸ LẸ SỌN OHÓ JIWHEYẸWHE TỌN MẸ | MALKU 1-2
“Ylando Towe lẹ Ko Yin Jijona We”
“Ylando Towe lẹ Ko Yin Jijona We”
Dile Jesu to mẹplọn to ohọ̀ he mẹ gbẹtọ gọ́ lọ mẹ, sunnu ẹnẹ hẹn dawe awukuzọ̀njẹtọ de do adọzan de ji wá. Yé jlo dọ Jesu ni hẹnazọ̀ngbọna họntọn yetọn. Ṣigba, na gbẹtọgun lọ tọn wutu, yé ma gán “hẹn ẹn wá Jesu dè tlọlọ.” (Malku 2:4) Pọ́n lehe yé na ko jẹflumẹ do. Yé hẹji yì họta he to flala lọ bo de nùvo de gbọn ozà lọ mẹ. Enẹgodo, yé hẹn adọzan he ji dawe awukuzọ̀njẹtọ lọ te jẹte biọ ohọ̀ lọ mẹ.
Be Jesu gblehomẹ dọ yé gbòhódonù na emi wẹ ya? Paali! Yise yetọn hẹn awuji i taun bọ e dọna awukuzọ̀njẹtọ lọ dọ: “Ylando towe lẹ ko yin jijona we.” (Matiu 9:2) Amọ́, be Jesu sọgan jo ylando lẹ namẹ nugbonugbo ya? Wekantọ lẹ po Falesi lẹ po jẹ nudọn ji do ehe ji bo to linlẹn to yede mẹ dọ: “Naegbọn dawe ehe do to hodọ dole? E to nùzan. Mẹnu wẹ sọgan jo ylando lẹ namẹ adavo mẹdopo, yèdọ Jiwheyẹwhe?”—Malku 2:7.
Na Jesu yọ́n linlẹn yetọn lẹ wutu, e dọna yé dọmọ: “Naegbọn mì do to onú ehelẹ lẹn to ahun mìtọn mẹ? Detẹ wẹ bọawu hugan, nado dọna awukuzọ̀njẹtọ lọ dọ, ‘Ylando towe lẹ yin jijona we,’ kavi nado dọ dọ, ‘Fọ́n, ze adọzan towe bo zinzọnlin’?” (Malku 2:8, 9) Mọwẹ, Jesu sọgan jo ylando dawe lọ tọn lẹ na ẹn to dodonu avọ́sinsan he e na wá basi to nukọn mẹ tọn ji.
nwtsty adà nupinplọn tọn do Mk 2:9 ji
Detẹ wẹ bọawu hugan: E bọawuna mẹdepope nado dọ dọ emi sọgan jo ylando namẹ, to whenuena e yindọ e ma biọ kunnudenu de nado do nugbo-yinyin enẹ tọn hia. Amọ́ nado dọ, Fọ́n . . . bo zinzọnlin biọ dọ Jesu ni wà azọ́njiawu de nado dohia mẹlẹpo dọ e tindo aṣẹ nado jo ylando namẹ nugbo. Kandai ehe po Isa 33:24 po dohia dọ azọ̀n tindo kanṣiṣa hẹ ogú ylando tọn he mí dù.
Onú Sisosiso Gbigbọmẹ Tọn Lẹ
nwtsty adà nupinplọn tọn lẹ do Mk 1:11 ji
Ogbè de sọ wá sọn olọn: Ehe wẹ yin tintan to whla atọ̀n he Jehovah dọhona gbẹtọvi lẹ tlọlọ to kandai Wẹndagbe tọn lẹ mẹ.—Pọ́n adà nupinplọn tọn lẹ do Mk 9:7; Joh 12:28 ji.
Hiẹ wẹ Visunnu ṣie: Taidi nudida gbigbọnọ de, Jesu yin Visunnu Jiwheyẹwhe tọn. (Joh 3:16) Sọn whenue Jesu yin jiji taidi gbẹtọvi, ewọ yin “visunnu Jiwheyẹwhe tọn” dile Adam mẹpipe lọ yin do. (Luk 1:35; 3:38) Ṣigba, e họnwun dọ hodidọ Jiwheyẹwhe tọn tofi ma to Jesu dohia taidi gbẹtọvi de poun. Gbọn hodidọ ehe dali, podọ gbọn gbigbọ wiwe kinkọnjẹgbonu dali, e họnwun dọ Jiwheyẹwhe to didohia dọ Jesu lẹzun Visunnu gbigbọmẹ tọn Etọn, bo ko yin “vivọji” po todido lọ po nado lẹkọyi ogbẹ̀ olọn mẹ tọn mẹ bo ko sọ yin amisisayidode gbọn gbigbọ dali nado yin Ahọlu dide Jiwheyẹwhe tọn po Yẹwhenọ Daho po.—Yijlẹdo Joh 3:3-6; 6:51; Luk 1:31-33; Heb 2:17; 5:1, 4-10; 7:1-3 go.
yẹn ko kẹalọyi we: Kavi “homẹ ṣie hùn do gowe; yẹn nọ mọ ayajẹ daho to hiẹ mẹ.” Hodidọ dopolọ wẹ yin yiyizan to Mt 12:18 mẹ, ehe yin hoyidọ de sọn Isa 42:1 mẹ gando Mẹsia dopagbe lọ kavi Klisti go. Gbigbọ wiwe he Jiwheyẹwhe kọ̀n jẹgbonu po nuhe e dọ gando Visunnu etọn go po do Jesu hia hezeheze taidi Mẹsia dopagbe lọ.—Pọ́n adà nupinplọn tọn lẹ do Mt 3:17; 12:18 ji.
nwtsty adà nupinplọn tọn do Mk 2:28 ji
Oklunọ Gbọjẹzan tọn: Jesu yí hodidọ ehe zan na edetiti (Mt 12:8; Luk 6:5); bo dohia dọ emi sọgan wà azọ́n he Otọ́ olọn mẹ tọn emitọn dena emi to Gbọjẹzangbe. (Yijlẹdo Joh 5:19; 10:37, 38 go.) Jesu wà delẹ to azọ́njiawu tangan etọn lẹ mẹ to Gbọjẹzangbe, ehe bẹ azọ̀n hinhẹngbọ namẹ hẹn. (Luk 13:10-13; Joh 5:5-9; 9:1-14) Matin ayihaawe, ehe do kọgbọ he na tin to gandudu etọn whenu to Ahọluduta lọ glọ hia, ehe na taidi gbọjẹzan de.—Heb 10:1.
23-29 AVRIL
NUHỌAKUẸ LẸ SỌN OHÓ JIWHEYẸWHE TỌN MẸ | MALKU 3-4
“Azọ̀n Hinhẹngbọ to Gbọjẹzangbe”
Etẹwẹ Sọgbe hẹ Osẹ́n to Gbọjẹzangbe?
To Gbọjẹzangbe devo, Jesu yì sinagọgu de mẹ, vlavo to Galili. E mọ dawe de to finẹ he adusilọ etọn kúsẹ́. (Luku 6:6) Wekantọ lẹ po Falesi lẹ po to Jesu ṣọ́ sinsinyẹn. Etẹwutu? Yé do nuhe to ahun yetọn mẹ hia to whenue yé kanse dọ: “Be e sọgbe hẹ osẹ́n nado hẹnazọ̀ngbọ to Gbọjẹzangbe ya?”—Matiu 12:10.
Sinsẹ̀ngán Ju lẹ yise dọ e sọgbe hẹ osẹ́n nado hẹnazọ̀ngbọnamẹ to Gbọjẹzangbe kiki eyin ogbẹ̀ to owù mẹ. Enẹwutu, di apajlẹ, e ma sọgbe hẹ osẹ́n nado dọ̀n ohú kavi blá hupetẹn he sẹ̀ de to Gbọjẹzangbe, na onú enẹlẹ ma ze ogbẹ̀ do owù mẹ wutu. E họnwun dọ onú dawe he to awufiẹsa mẹ lọ tọn ma to ahunmẹduna wekantọ lẹ po Falesi lẹ po nugbonugbo to whenue yé kanhose Jesu. Aklọ̀n dín wẹ yé te do Jesu go nado sawhẹdokọna ẹn.
Etẹwẹ Sọgbe hẹ Osẹ́n to Gbọjẹzangbe?
Ṣigba, Jesu yọ́n linlẹn agọ̀ yetọn. E mọdọ yé ko wleawuna pọndohlan hẹngogo tọn, he ma sọgbe hẹ Owe-wiwe na nuhe dù osẹ́n he gando azọ́nwiwa to Gbọjẹzangbe go. (Eksọdusi 20:8-10) E ma yin tintan die bọ azọ́n dagbe etọn lẹ yin homọdọdego to aliho agọ̀ mẹ. Todin, Jesu ze dodonu nudindọn ayidego tọn de tọn dai to whenue e dọna dawe he alọ etọn kúsẹ́ lọ dọmọ: “Fọnṣite bo wá ṣẹnṣẹn.”—Malku 3:3.
nwtsty adà nupinplọn tọn do Mk 3:5 ji
po homẹgble po, . . . e blawu tlala: Malku kẹdẹ wẹ basi kandai nuyiwa Jesu tọn to whenue Jesu mọ sinsinyẹn ahun sinsẹ̀ngán lẹ tọn to nujijọ ehe whenu. (Mt 12:13; Luk 6:10) Pita, yèdọ dawe he ewọ lọsu nọ tindo numọtolanmẹ sinsinyẹn wẹ na ko basi zẹẹmẹ numọtolanmẹ he Jesu tindo lọ tọn.—Pọ́n “Homẹbibiọ Malku Tọn.”
Onú Sisosiso Gbigbọmẹ Tọn Lẹ
nwtsty adà nupinplọn tọn lẹ do Mk 3:29 ji
zánnu do gbigbọ wiwe go: Nùzinzan zẹẹmẹdo mẹhẹngble, ohó ylankan kavi ohó gbigble didọ sọta Jiwheyẹwhe kavi onú wiwe lẹ. To whenuena e yindọ Jiwheyẹwhe lọsu dè wẹ gbigbọ wiwe wá sọn, didesọn ojlo mẹ nado jẹagọdo e kavi gbẹ́ nado kẹalọyi nuyiwa etọn zẹẹmẹdo nùzinzan do Jiwheyẹwhe go. Dile e yin didohia to Mt 12:24, 28 po Mk 3:22 po mẹ do, sinsẹ̀ngán Ju lẹ mọdọ gbigbọ Jiwheyẹwhe tọn wẹ Jesu yí do to azọ́njiawu lẹ wà; ṣogan, yé dọ dọ huhlọn Satani Lẹgba tọn wẹ.
hùwhẹ ylando madopodo tọn: E taidi dọ e to alọdlẹndo ylando he yin wiwà sọn ojlo mẹ, he kọdetọn etọn na nọ aimẹ kakadoi; avọ́sinsan depope ma tin he na ṣinyọnnudo ylando mọnkọtọn.—Pọ́n adà nupinplọn tọn do zánnu do gbigbọ wiwe go to wefọ ehe mẹ gọna adà nupinplọn tọn do Mt 12:31 ji, he yin kandai he dọhodo nujijọ dopolọ ji.
Be A ‘Mọnukunnujẹ Zẹẹmẹ lọ mẹ’ Ya?
6 Etẹwẹ mí sọgan plọn sọn apajlẹ ehe mẹ? Tintan, mí dona yọnẹn dọ mí ma tindo huhlọn depope do whinwhẹ́n gbigbọmẹ tọn plọnmẹ Biblu de tọn ji. Whiwhẹ na gọalọna mí ma nado gbidikọna plọnmẹ Biblu de kavi hẹn ẹn po huhlọn po nado yí baptẹm. Mí nọ wà nuhe go mí pé lẹpo nado gọalọna nuplọntọ lọ, ṣigba mí nọ gbọn whiwhẹ dali kẹalọyi dọ to popolẹpo mẹ, mẹlọ lọsu wẹ na basi nudide nado klan gbẹzan etọn do wiwe. Owanyi na Jiwheyẹwhe wẹ nọ whàn mẹde nado basi klandowiwe sọn ahun mẹ wá. Eyin e ma wá sọn ahun mẹ, Jehovah ma na kẹalọyi klandowiwe lọ.—Ps. 51:12; 54:6; 110:3.
7 Awetọ, nukunnumimọjẹ nuhe apajlẹ ehe plọn mí mẹ na gọalọna mí ma nado gbọjọ eyin azọ́n mẹpinplọn tọn mítọn ma yawu tindo kọdetọn dagbe. Mí dona nọ fahomẹ. (Jak. 5:7, 8) Eyin mí ko wà nuhe go mí pé lẹpo nado gọalọna nuplọntọ de bọ okún lọ ma de sinsẹ́n depope tọ́n, enẹ ma dohia dọ mí ma yin mẹplọntọ dagbe. Ahun whiwhẹnọ he jlo na basi vọjlado lẹ tọn kẹdẹ mẹ wẹ Jehovah nọ hẹn okún nugbo lọ tọn nado whẹ́n te. (Mat. 13:23) Enẹwutu, mí ma dona lẹndọ kọdetọn dagbe lizọnyizọn mítọn tọn sinai do omẹ nẹmu he mí plọnnu hẹ bọ yé yí baptẹm lẹ kẹdẹ ji. To nukun Jehovah tọn mẹ, e ma yin lehe gbẹtọ lẹ kẹalọyi nuplọnmẹ mítọn lẹ do wẹ nọ dohia dọ lizọnyizọn mítọn tindo kọdetọn dagbe gba. Kakatimọ, vivẹnudido ahundopo tọn mítọn nọ họakuẹ na ẹn hugan kọdetọn depope he mí tindo.—Hia Luku 10:17-20; 1 Kọlintinu lẹ 3:8.
8 Atọ̀ntọ, mí ma nọ saba doayi diọdo he nuplọntọ de to bibasi go. Di apajlẹ, asu po asi po de dọnsẹpọ mẹdehlan he nọ plọnnu yé bo dọna ẹn dọ, emi jlo na lẹzun wẹnlatọ he ma ko yí baptẹm. E flinnu asu po asi po lọ lẹ dọ, whẹpo yé sọgan pegan, yé dona doalọtena siga nùnù. Ṣigba, e paṣa ẹ to whenue yé dọna ẹn dọ yé ko doalọtena siga nùnù sọn osun susu die. Naegbọn yé do wàmọ? Na yé mọnukunnujẹemẹ dọ Jehovah nọ mọ yé to whenue yé to siga nù, podọ ewọ gbẹwanna yẹnuwiwa. Enẹwutu, yé yin whinwhàn nado basi nudide de—enẹ wẹ nado nù siga to nukun mẹdehlan lọ tọn mẹ kavi nado jodo mlẹnmlẹn. Owanyi he yé tindo na Jehovah todin gọalọna yé nado basi nudide dagbe lọ. Yé ko whẹ́n to gbigbọ-liho dile etlẹ yindọ mẹdehlan lọ ma tlẹ doayi diọdo he yé basi lọ go.
GBẸZAN KLISTIANI TỌN
nwtsty adà nupinplọn tọn do Mk 4:9 ji
Mì gbọ mẹhe tindo otó nado dotoai, ni dotoai: Whẹpo Jesu do na apajlẹ nudotọ tọn, e dọmọ: “Mì dotoai.” (Mk 4:3) Nado dotana apajlẹ lọ, e yí hogbe tulinamẹ tọn enẹlẹ zan bo dohia dọ nujọnu wẹ e yin na hodotọ emitọn lẹ nado setonuna ayinamẹ emitọn lẹ mlẹnmlẹn. Tudohomẹnamẹ mọnkọtọn devo lẹ yin mimọ to Mt 11:15; 13:9, 43; Mk 4:23; Luk 8:8; 14:35; Osọ 2:7, 11, 17, 29; 3:6, 13, 22; 13:9 mẹ.
30 AVRIL–6 MAI
NUHỌAKUẸ LẸ SỌN OHÓ JIWHEYẸWHE TỌN MẸ | MALKU 5-6
“Jesu Tindo Huhlọn Nado Fọ́n Mẹyiwanna Mítọn He Ko Kú Lẹ”
nwtsty adà nupinplọn tọn do Mk 5:39 ji
ma kú gba, ṣigba amlọndọ wẹ e te: To Biblu mẹ, okú nọ saba yin yiyijlẹdo amlọn go. (Slm 13:3; Joh 11:11-14; Ow 7:60; 1Kọ 7:39; 15:51; 1Tẹ 4:13) Jesu jlo na fọ́n viyọnnu lọ, enẹwutu e sọgan ko dọ ehe nado dohia dọ kẹdẹdile mẹhe to amlọn yìkànmẹ dọ́ de sọgan yin finfọn do, mọ wẹ mẹde sọgan yin finfọnsọnku do ga. Huhlọn Jesu tọn nado fọ́n viyọnnu lọ wá sọn Otọ́ etọn dè, yèdọ “mẹhe nọ hẹn oṣiọ lẹ gọwá ogbẹ̀ bo nọ ylọ nuhe ma tin lẹ taidi dọ yé tin wẹ nkọ.”—Lo 4:17.
Viyọnnu Pẹvi de Gọwá Ogbẹ̀!
Jesu degbena mẹhe e ko hẹnazọ̀ngbọna wayi delẹ ma nado lá nuhe ewọ ko wà na yé lẹ pé, podọ nudopolọ wẹ e dọna mẹjitọ ehelẹ lọsu. Etomọṣo, mẹjitọ he homẹhun lọ lẹ po mẹdevo lẹ po hẹn linlin lọ gbayipe gbọn “agbegbe lọ pete ji.” (Matiu 9:26) Eyin hiẹ lọsu mọ bọ mẹyiwanna towe de yin finfọnsọnku, be apàpà ma na sọ́ we nado dọ ẹ na mẹdevo lẹ ya? Omẹ awetọ he Jesu fọnsọnku bọ Biblu dọho etọn niyẹn.
Onú Sisosiso Gbigbọmẹ Tọn Lẹ
nwtsty adà nupinplọn tọn do Mk 5:19 ji
dọ . . . na yé: To vogbingbọn mẹ na anademẹ he Jesu nọ saba na gbẹtọ lẹ ma nado lá azọ́njiawu etọn lẹ (Mk 1:44; 3:12; 7:36), e degbena dawe ehe nado yì dọ nuhe jọ na hẹnnumẹ etọn lẹ. E sọgan ko yindọ na e ko yin bibiọ to Jesu si nado tọ́n sọn lẹdo lọ mẹ bọ ewọ lọsu ma na penugo nado dekunnu wutu wẹ; ehe sọgan sọ yin wẹndagbe de he na gbọnvona linlin ylankan he na gbayipe gando ohàn he yin hinhẹnbu lẹ go.
nwtsty adà nupinplọn tọn do Mk 6:11 ji
mì húnhún afínfín sẹ̀ sọn afọ mìtọn lẹ go: Nuyiwa ehe dohia dọ kọdetọn he na wá sọn Jiwheyẹwhe dè lẹ ma yin owhẹ̀ devi lẹ tọn. Hodidọ dopolọ sọawuhia to Mt 10:14; Luk 9:5 mẹ. Malku po Luku po yí hodidọ lọ na okunnu de hlan [kavi, “sọta”] yé dogọ. Paulu po Balnaba po yí anademẹ ehe zan to Antioku Pisidia tọn (Ow 13:51), podọ to whenue Paulu wà onú mọnkọ de to Kọlinti bo húnhún awù etọn lẹ, e yí hogbe delẹ dogọ nado basi zẹẹmẹ nuhe dọ e te tọn: “Ohùn mìtọn ni nọ okọ̀ na mì. Okọ̀ ṣie wé.” (Ow 18:6) Devi lẹ na ko jẹakọ hẹ nuyiwa mọnkọtọn; Ju he nọ jla dodonọ he zingbejizọnlin gbọn otò Kosi tọn mẹ lẹ nọ húnhún kọ́gudu he yé lẹndọ e yin mawé lẹ sọn afọpa yetọn lẹ go whẹpo do nọ vọ́ lẹdo Ju lẹ tọn mẹ biọ. Ṣigba, e họnwun dọ linlẹn he Jesu tindo to whenue e to anademẹ ehelẹ na devi etọn lẹ gbọnvo.