Alọdlẹndonu Nuplọnwe Opli Gbẹzan po Lizọnyizọn po Tọn

4-10 NOVEMBRE

NUHỌAKUẸ LẸ SỌN OHÓ JIWHEYẸWHE TỌN MẸ | 1 JOHANU 1-5

“A Yiwanna Aihọn Kavi Nuhe to E mẹ lẹ Blo”

w05 1/1 10 huk. 13

Hodo Apajlẹ He Jesu Zedai

¹³ Mẹdelẹ sọgan dọ dọ e ma yin nuhe tin to aihọn mẹ lẹpo wẹ ylan gba. Nugbo wẹ, ṣigba aihọn po nuhe to sisẹ́ to e mẹ lẹ po sọgan fẹayihasẹna mí sọn Jehovah sinsẹ̀n kọ̀n po awubibọ po. Podọ depope to nuhe aihọn nọ zedonukọnnamẹ lẹ mẹ ma yin awuwlena nado dọ̀n mí sẹpọ Jiwheyẹwhe pẹkipẹki gba. Enẹwutu, eyin mí jẹ wanyina nuhe tin to aihọn mẹ lẹ ji, etlẹ yin nuhe sọgan nọma ylan to yede mẹ lẹ, mí ko tin to owù sinsinyẹn mẹ. (1 Timoti 6:9, 10) Gbọnvona enẹ, nuhe tin to aihọn mẹ susu wẹ ylan bo sọgan hẹn mí gblezọn. Eyin mí nọ pọ́n sinimọto kavi tito-to-whinnu televiziọn tọn he nọ zinnudo danuwiwa, ojlo agbasanu lẹ tọn, kavi fẹnnuwiwa zanhẹmẹ tọn ji lẹ, onú enẹlẹ sọgan lẹzun nuhe sọgbe to nukun mítọn mẹ bo nasọ lẹzun whlepọn de na mí. Eyin mí nọ dogbẹ́ hẹ mẹhe jlo vẹkuvẹku nado hẹn gbẹzan yetọn pọnte kavi nọ to dotẹnmẹ hundote ajọwiwa tọn dín zọnmii lẹ, onú enẹlẹ sọgan lẹzun nuyanwle mílọsu tọn lẹ.—Matiu 6:24; 1 Kọlintinu lẹ 15:33.

w13 15/8 27 huk. 18

Lẹnnupọndo Omẹ He Nkọ E Jẹ Dọ Hiẹ Ni Yin Ji

¹⁸ Onú devo he nọ gọalọna mí nado nọavùnte sọta “onú he tin to aihọn mẹ lẹ” wẹ ohó gbọdo Johanu tọn he mí hẹn do ayiha mẹ ehelẹ: “Aihọn to jujuyi po ojlo etọn po ga, ṣigba ewọ he wà ojlo Jiwheyẹwhe tọn na gbọṣi aimẹ kakadoi.” (1 Joh. 2:17) Titonu Satani tọn sọgan taidi nuhe na gbọṣi aimẹ kakadoi. Ṣigba, e na wá opodo to gbèdopo. Nudepope he aihọn Satani tọn sọgan zedonukọnna mí ma na gbọṣi aimẹ kakadoi. Nugbo enẹ flinflin na gọalọna mí ma nado yin kiklọ gbọn yẹdoklọmẹnu Lẹgba tọn lẹ dali.

Onú Sisosiso Gbigbọmẹ Tọn Lẹ

w13 15/9 10 huk. 14

Mí Sọgan Dejido Nuflinmẹ Jehovah Tọn lẹ Go

¹⁴ Owe-wiwe Glẹki tọn lẹ flinnu mí whlasusu nado nọ do owanyi hia ode awetọ. Jesu dọ dọ gbedide awetọ he klohugan wẹ nado “yiwanna kọmẹnu towe di dewe.” (Mat. 22:39) Mọdopolọ, Jakọbu he yin nọvisunnu daa Jesu tọn ylọ owanyi dọ “osẹ́n ahọlu tọn.” (Jak. 2:8) Apọsteli Johanu wlan dọmọ: “Mẹyiwanna lẹ emi, e ma yin gbedide yọyọ de wẹ yẹn to kinkan hlan mì, ṣigba gbedide hoho de, he mì ko tindo sọn whẹwhẹwhenu.” (1 Joh. 2:7, 8) Etẹwẹ Johanu to alọdlẹndo to whenue e dọho gando “gbedide hoho” lọ go? E to alọdlẹndo gbedide lọ nado nọ do owanyi hia. E yin “hoho” to linlẹn lọ mẹ dọ Jesu ko donù e go “sọn whẹwhẹwhenu,” enẹ wẹ owhe susu jẹnukọn. Ṣigba, e sọ yin “yọyọ,” na e nọ biọ owanyi mẹde-yido-sanvọ́ tọn, ehe devi lẹ sọgan tindo nuhudo etọn eyin yé pehẹ ninọmẹ yọyọ lẹ. Taidi devi Klisti tọn lẹ, be mí nọ yọ́n pinpẹn avase he nọ gọalọna mí nado dapana gbigbọ ṣejannabi tọn he gbayipe to aihọn mẹ tọn, ehe sọgan dekanpona owanyi he mí tindo na kọmẹnu mítọn lẹ ya?

it-2-F 491 huk. 1

Jonamẹ

E sọgbe nado nọ hodẹ̀ bo biọ jona Jiwheyẹwhe tọn do mẹdevo lẹ tamẹ, etlẹ yin na agun blebu. Mose hodẹ̀ do akọta Islaeli tọn tamẹ, yigbe ylando akọta lọ tọn bo biọ jona do ota yetọn mẹ bọ Jehovah sè odẹ̀ etọn. (Sọh 14:19, 20) To klandowiwe tẹmpli lọ tọn whenu, Sọlomọni lọsu hodẹ̀ bo biọ dọ Jehovah ni jona omẹ etọn lẹ eyin yé wá waylando ṣigba bo ka lẹnvọjọ. (1Ah 8:30, 33-40, 46-52) Ẹzla yinuwa di afọzedaitọ bo yigbe ylando he Ju he lẹkọ sọn kanlinmọgbenu lẹ wà lẹ tọn to gbangba. Odẹ̀ ahundopo tọn po tudohomẹnamẹ etọn po yinuwado akọta lọ ji bọ yé ze afọdide he jẹ lẹ nado mọ jonamẹ Jehovah tọn. (Ẹzl 9:13–10:4, 10-19, 44) Jakọbu dọ dọ mẹhe to azọ̀njẹ to gbigbọ-liho ni ylọ sunnu mẹho agun tọn lẹ nado hodẹ̀ do ewọ ji, bọ “eyin e ko wà ylando lẹ, ewọ na mọ jona yí.” (Jak 5:14-16) Amọ́, “ylando de tin he nọ hẹn okú wá,” yèdọ ylanwiwa sọta gbigbọ wiwe. Ehe zẹẹmẹdo dọ mẹlọ desọn ojlo mẹ bo hẹn ylando zun aṣa, podọ jonamẹ ma tin na ylando mọnkọ. Klistiani de ma dona hodẹ̀ do omẹ mọnkọ tamẹ.—1Jo 5:16; Mt 12:31; Heb 10:26, 27; pọ́n GBIGBỌ; YLANDO.

AWUWIWLENA LIZỌNYIZỌN KUNNUDEGBE TỌN

w04 1/10 29

Kanbiọ lẹ sọn Wehiatọ lẹ Dè

To whenuena apọsteli Johanu wlan dọ “owanyi pipé nọ yàn obu jẹgbonu,” etẹwẹ e to alọdlẹndo taidi “owanyi pipé,” podọ obu nankọtọn wẹ nọ yin yinyan jẹgbonu?

“Obu ma tin to owanyi mẹ gba,” wẹ apọsteli Johanu wlan, “ṣigba owanyi pipé nọ yàn obu jẹgbonu, na obu nọ hẹnalọdotenamẹ. Na nugbo tọn, ewọ he to budi ma ko yin hinhẹn zun pipé to owanyi mẹ gba.”—1 Johanu 4:18, NW.

Lẹdo hodidọ lọ tọn dohia dọ Johanu to hodọ gando awuvivo hodidọ tọn go—yèdọ kanṣiṣa he tin to owanyi tintindo na Jiwheyẹwhe po awuvivo hodidọ tọn tintindo to nukọn Etọn po ṣẹnṣẹn. Nuhe mí hia to wefọ 17 mẹ do ehe hia dọmọ: ‘Ehe mẹ wẹ yè hẹn owanyi mítọn zun pipé te, na mí nido tindo awuvivo hodidọ tọn to azán whẹdida tọn gbè.’ Obá he mẹ Klistiani de yiwanna Jiwheyẹwhe bo nọ mọ owanyi he Jiwheyẹwhe tindo na ẹn jẹ nọ yinuwa do awuvivo hodidọ tọn etọn ji tlọlọ—kavi do awugbopo nado tindo awuvivo mọnkọtọn ji—to whenuena e to dindọnsẹpọ Jiwheyẹwhe to odẹ̀ mẹ.

Hodidọ lọ “owanyi pipé” tindo zẹẹmẹ susu. Dile hogbe lọ “pipé” yin yiyizan to Biblu mẹ do, e ma nọ zẹẹmẹdo pipé-yinyin mlẹnmlẹn, kavi jẹ obá godo tọn mẹ to whepoponu gba, ṣigba e nọ saba yin to linlẹn he tindo dogbó de mẹ. Di apajlẹ, Jesu dọ to Yẹwhehodidọ Osó ji tọn etọn mẹ dọmọ: “Enẹwutu mìwlẹ ni yin mẹpipe, dile Otọ́ mìtọn he tin to olọn mẹ yin mẹpipe do.” Jesu to didọna hodotọ etọn lẹ dọ eyin yé nọ yiwanna mẹhe yiwanna yé lẹ kẹdẹ, owanyi yetọn na yin agbòte, na tindo oblọ bo ma na sọgbe. Yé dona hẹn owanyi yetọn zun pipé, kavi hẹn ẹn gbloada gbọn dido e hia mẹhe tlẹ yin kẹntọ yetọn lẹ dali. Mọdopolọ, to whenuena Johanu wlanwe dogbọn “owanyi pipé” dali, e to alọdlẹndo owanyi tintindo na Jiwheyẹwhe po ahun lẹpo po he yin awuwlena to gigọ́mẹ, bosọ bẹ adà gbẹzan tọn lẹpo hẹn.—Matiu 5:46-48; 19:20, 21.

To whenuena Klistiani de to dindọnsẹpọ Jehovah to odẹ̀ mẹ, e nọ yọnẹn ganji dọ emi yin ylandonọ podọ mapenọ. Etomọṣo, eyin e ko wleawuna owanyi na Jiwheyẹwhe bo nọ mọ owanyi Jiwheyẹwhe tọn to gigọ́mẹ, obu whẹgbledomẹ kavi mẹgbẹdai tọn ma na glọnalina ẹn gba. Kakatimọ, e nọ duvivi awuvivo hodidọ tọn nado dọ nuhe tin to ahun etọn mẹ tọ́n bo biọ jona to dodonu avọ́sinsan ofligọ tọn he Jiwheyẹwhe ko yí owanyi do wleawuna gbọn Jesu Klisti gblamẹ ji. E nọ deji dọ Jiwheyẹwhe na sè obiọ vivẹvivẹ emitọn lẹ bo na gblọndo.

Nawẹ mẹde sọgan yin “hinhẹn zun pipé to owanyi mẹ” bo gbọnmọ dali “yàn” obu whẹgbledomẹ kavi mẹgbẹdai tọn jẹgbonu gbọn? “Mẹdepope he yìn ohó etọn [Jiwheyẹwhe tọn], e go wẹ owanyi Jiwheyẹwhe tọn sọgbe [kavi yin hinhẹn zun pipé] te nugbonugbo,” wẹ apọsteli Johanu dọ. (1 Johanu 2:5) Saa lẹnnupọndo ehe ji: Eyin Jiwheyẹwhe yiwanna mí to whenuena mí gbẹ́ to ylandonọ yin, be e ma nasọ yiwanna mí humọ eyin mí lẹnvọjọ nugbonugbo bo yí sọwhiwhe do “yìn ohó etọn” ya? (Lomunu lẹ 5:8; 1 Johanu 4:10) Na nugbo tọn, dile e na dẹnsọ bọ mí na gbẹ́ pò to nugbonọ yin, mí sọgan tindo jidide dopolọ he apọsteli Paulu tindo to whenuena e dọ gando Jiwheyẹwhe go dọmọ: “Ewọ he ma hla Ovi etọn titi do ogbẹ̀, ṣigba bo jo e na mímẹpo wutu, na e ma na na onú popo mí vọnu hẹ ẹ ga do?”—Lomunu lẹ 8:32.

11-17 NOVEMBRE

NUHỌAKUẸ LẸ SỌN OHÓ JIWHEYẸWHE TỌN MẸ | 2 JOHANU 1–JUDA

“Mí Dona Dovivẹnu Nado Gbọṣi Nugbo lọ Mẹ”

w04 15/9 11-12 huk. 8-9

“Mì Yin Huhlọnnọ to Oklunọ Mẹ”

⁸ Mí ma yin madọnanọ gando oklọ Satani tọn lẹ go na Owe-wiwe do ayiha wintinwintin tangan etọn lẹ hia. (2 Kọlintinu lẹ 2:11) Lẹgba yí nuhahun sinsinyẹn akuẹzinzan tọn lẹ, okú mẹyiwanna lẹ tọn, nukundiọsọmẹ whẹndo tọn, yajiji agbasamẹ tọn, po homọdọdomẹgo agọ̀ họntọn lalo lẹ tọn po zan sọta dawe dodonọ lọ, Job. Job mọ apọ̀ sinsinyẹn bo lẹndọ Jiwheyẹwhe ko gbẹkọ emi go. (Job 10:1, 2) Dile etlẹ yindọ Satani sọgan nọma hẹn nuhahun enẹlẹ wá tlọlọ to egbehe, Klistiani susu nọ jiya awusinyẹnnamẹnu mọnkọtọn lẹ tọn, podọ Lẹgba sọgan yí yé zan to avùnhiho etọn mẹ.

⁹ Owù gbigbọmẹ tọn lẹ ko sudeji taun to ojlẹ opodo tọn ehe mẹ. Mí to gbẹnọ to aihọn de mẹ, fie afọdidona agbasanu lẹ nọ yíta to yanwle gbigbọmẹ tọn lẹ si te. Linlinnamẹnu lẹ nọ do zanhẹmẹ he ma sọgbe lẹ hia gbọzangbọzan taidi asisa ayajẹ tọn kakati nido yin nuhe nọ dekọtọn do awubla mẹ. Podọ suhugan gbẹtọ lẹ tọn ko lẹzun “wanyina aṣọ́ [kavi gbẹdudu] hú Jiwheyẹwhe tọ́.” (2 Timoti 3:1-5) Aliho nulẹnpọn tọn ehe sọgan dekanpona jlẹkajininọ gbigbọmẹ tọn mítọn eyin mí ma “hoavùn zogbe na yise.”—Juda 3.

Onú Sisosiso Gbigbọmẹ Tọn Lẹ

it-1-F 879

Hùnwhẹ Owanyi Didohia Tọn Lẹ

Biblu ma dọ nuhe hùnwhẹ owanyi didohia tọn ehelẹ yin taun kavi whla nẹmu he yé nọ yin bibasi. (Juda 12) E ma yin Oklunọ Jesu Klisti kavi apọsteli etọn lẹ wẹ biọ dọ hùnwhẹ ehelẹ ni nọ yin bibasi, podọ e taidi dọ hùnwhẹ ehelẹ ma dona yin dandan kavi zindonukọn tẹgbẹ. Mẹdelẹ dọ dọ Klistiani adọkunnọ lẹ wẹ nọ wleawuna hùnwhẹ ehelẹ bo nọ ylọ yisenọ hatọ yetọn he yin wamọnọ lẹ. To pọmẹ, tọṣiọvi, asuṣiọsi, adọkunnọ po wamọnọ lẹ po nọ yí ojlẹ ayajẹ tọn ehe zan nado dùnú dopọ taidi nọvi-nọvi.

it-2-F 805 huk. 3

Osé

Hogbe Glẹkigbe tọn devo, yèdọ spi·lasʹ, sọ nọ saba yin yiyizan nado dlẹnalọdo osé kavi zannu he whlá to otọ̀ glọ. Juda yí hogbe enẹ zan nado dlẹnalọdo sunnu delẹ he lìn biọ agun Klistiani tọn mẹ po yanwle lọ po nado klọmẹ. Dile osé he whlá to otọ̀ glọ lẹ nọ yin owù na bato lẹ do, mọ wẹ sunnu ehelẹ yin owù daho na hagbẹ agun lọ tọn lẹ do. E dọ gando yé go dọmọ: “Omẹ ehelẹ wẹ osé whiwhla lẹ to osin glọ to hùnwhẹ owanyi didohia tọn mìtọn lẹ whenu dile yé to núdù hẹ mì.”—Juda 12.

wp17.1 12 huk. 1

‘E Hẹn Homẹ Jiwheyẹwhe Tọn Hùn Ganji’

Dọdai tẹwẹ Enọku dọ? E dọmọ: “Mì pọ́n! Jehovah wá po fọtọ́n donu ao angẹli wiwe etọn lẹ tọn po nado hẹn whẹdida ṣẹ do mẹlẹpo ji, podọ nado gblewhẹdo omẹ jijọ-madi-Jiwheyẹwhe tọn lẹpo na walọ jijọ-madi-Jiwheyẹwhe tọn yetọn lẹpo he yé ko zan to aliho jijọ-madi-Jiwheyẹwhe tọn mẹ, podọ na ohó mẹhẹnjọsi tọn he ylanwatọ jijọ-madi-Jiwheyẹwhe tọn lẹ ko dọ sọta ẹ lẹpo wutu.” (Juda 14, 15) Onú tintan he go a sọgan doayi wẹ yindọ Enọku dọ dọdai lọ to aliho de mẹ taidi dọ Jiwheyẹwhe ko wà nuhe dọdai lọ dọ wẹ nkọ. Dọdai susu wẹ wá yin didọ to aliho dopolọ mẹ. Linlẹn lọ wẹ yindọ: Yẹwhegán lọ kudo nuhe dọ e te ji sọmọ bọ e dọ ẹ to aliho de mẹ taidi e ko jọ wẹ nkọ!—Isaia 46:10.

wp17.1 12 huk. 3

‘E Hẹn Homẹ Jiwheyẹwhe Tọn Hùn Ganji’

Yise Enọku tọn sọgan whàn mí nado kanse míde eyin vlavo mí nọ pọ́n aihọn ehe hlan dile Jiwheyẹwhe nọ wà do. Whẹdida he Enọku yí adọgbigbo do lá lọ ma ko wá aimẹ fó; e na gbẹ́ wá aihọn ehe ji dile e yin do to azán Enọku tọn gbè. Sọgbe hẹ avase Enọku tọn, Jehovah hẹn Singigọ daho de wá aihọn jijọ-madi-Jiwheyẹwhe tọn enẹ ji to azán Noa tọn gbè. Ṣigba, vasudo enẹ yin apajlẹ vasudo daho he na wá to madẹnmẹ de tọn. (Matiu 24:38, 39; 2 Pita 2:4-6) To egbehe, Jiwheyẹwhe po fọtọ́n donu ao angẹli wiwe etọn lẹ tọn po na hẹn whẹdida dodo wá aihọn jijọ-madi-Jiwheyẹwhe tọn ehe ji. Mímẹpo dona hẹn avase Enọku tọn ehe do ayiha mẹ bo nọ lá ẹ na mẹdevo lẹ. Whẹndo po họntọn mítọn lẹ po sọgan gbẹ́ mí dai. Mí sọgan wá mọ míde to ṣokẹdẹ. Amọ́, Jehovah ma gbẹ́ Enọku dai; mọdopolọ e ma na gbẹ́ devizọnwatọ nugbonọ etọn lẹ dai to egbehe!

18-24 NOVEMBRE

NUHỌAKUẸ LẸ SỌN OHÓ JIWHEYẸWHE TỌN MẸ | OSỌHIA 1-3

“N’Yọ́n Walọ Towe Lẹ”

w12 15/10 14 huk. 8

Gbigbọ Tẹwẹ Hiẹ Nọ Dohia?

⁸ Nado dapana gbigbọ mọnkọtọn, e na yọ́n nado flindọ Biblu basi zẹẹmẹ Jesu tọn taidi mẹhe tindo “sunwhlẹvu ṣinawe to adusilọ etọn mẹ.” “Sunwhlẹvu” lọ lẹ nọtena mẹho yiamisisadode lẹ podọ to aliho he gbloada mẹ, mẹho agun tọn lẹpo. To whenuena e yindọ “sunwhlẹvu” enẹlẹ tin to alọ Jesu tọn mẹ, e sọgan deanana yé to aliho depope mẹ. (Osọ. 1:16, 20) Taidi Ota agun Klistiani tọn, Jesu yọ́n nuhe to jijọ to pipli mẹho agun tọn lẹ tọn mẹ to gigọ́ mẹ. Eyin mẹho agun tọn de tindo nuhudo wọhẹmẹ tọn, Jesu, mẹhe “nukun etọn lẹ taidi miyọ́n he to jiji” na hẹn ẹn diun dọ mẹho lọ mọ wọhẹmẹ lọ yí to ojlẹ sisọ mẹ podọ to aliho he sọgbe mẹ. (Osọ. 1:14) Enẹwutu, dile e na dẹnsọ bọ mẹhe yin dide gbọn gbigbọ wiwe dali de na tin to otẹn azọngban tọn mẹ, mí dona na ẹn sisi he e jẹna, na Paulu wlan dọmọ: “Mì nọ setonuna mẹhe to anadenanu to ṣẹnṣẹn mìtọn lẹ bo nọ litai, na yewlẹ to alindọn mìtọn họ́ bo yọnẹn dọ yé na dogbè; na yé nido sọgan yí ayajẹ do wà ehe bọ e ma yin po azọ̀nwinwẹn po, na ehe na yin awugblenu na mì.”—Heb. 13:17.

w12 15/4 29 huk. 11

Jehovah Nọ Basi Hihọ́na Mí Na Whlẹngán

¹¹ To numimọ he yin kinkandai to weta 2tọ po 3tọ owe Osọhia tọn po mẹ, Jesu Klisti he yin gigopana lọ dla agun ṣinawe he tin to Asia Pẹvi lẹ pọ́n. Numimọ lọ dohia dọ e ma yin ninọmẹ paa lẹ kẹdẹ go wẹ Klisti nọ doayi gba, ṣigba e sọ nọ doayi ninọmẹ tangan lẹ go ga. To whedelẹnu, e tlẹ donù yinkọ mẹdelẹ tọn go tlọlọ, podọ e sọ na pipà kavi ayinamẹ he jẹ to ninọmẹ dopodopo mẹ. Etẹwẹ enẹ dohia? To hẹndi numimọ lọ tọn mẹ, agun ṣinawe lọ lẹ nọtena Klistiani yiamisisadode lẹ to 1914 godo, podọ to paa mẹ, ayinamẹ he e na agun ṣinawe lọ lẹ sọ gando agun omẹ Jiwheyẹwhe tọn lẹpo tọn go lẹdo aihọn pé to egbehe. Enẹwutu, e sọgbe hẹ lẹnpọn dagbe nado wá tadona lọ kọ̀n dọ Jehovah yí zohunhun do to anadena omẹ etọn lẹ gbọn Visunnu etọn gblamẹ. Nawẹ mí sọgan mọaleyi sọn anademẹ enẹ mẹ gbọn?

w01 15/1 20-21 huk. 20

Zọnlinzinzin Afọsu-Afọsi hẹ Titobasinanu Jehovah Tọn

²⁰ Nado to zọnlinzin afọsu-afọsi hẹ titobasinanu he to nukọnzindo Jehovah tọn biọ dọ mí ni yọ́n azọngban he Jiwheyẹwhe dè na Jesu Klisti taidi “ota agun tọn.” (Efesunu lẹ 5:22, 23) Isaia 55:4, lọsu sọ jẹ na ayidego ga, to fie mí yin didọna te dọmọ: “Doayi e go, yẹn [Jehovah] ko yí ewọ na gbẹtọ lẹ na kunnudetọ nukọntọ, togán na gbẹtọ lẹ.” Na jide tọn Jesu yọ́n lehe yè nọ deanananu do. E sọ yọ́n lẹngbọ etọn lẹ po nuyiwa yetọn lẹ po. Na nugbo tọn, to whenuena e dla agun ṣinawe he tin to Asia Pẹvi lẹ pọ́n, whla atọ́n wẹ e dọ dọ: “Yẹn yọ́n azọ́n towe [lẹ].” (Osọhia 2:2, 19; 3:1, 8, 15) Jesu sọ yọ́n nuhudo mítọn lẹ ga, kẹdẹdile Otọ́ etọn, Jehovah wà do. Whẹpo e do na Odẹ̀ Apajlẹ tọn lọ, Jesu dọmọ: “Otọ́ mìtọn yọ́n nuhe mì tindo nuwhèdo na, whẹpo mì do biọ ẹ.”—Matiu 6:8-13.

Onú Sisosiso Gbigbọmẹ Tọn Lẹ

kr 226 huk. 10

Ahọluduta Jiwheyẹwhe Tọn Na De Kẹntọ Etọn lẹ Sẹ̀

¹⁰ Whẹdida lilá. To whenẹnu, kẹntọ Ahọluduta Jiwheyẹwhe tọn lẹpo na to dandannu glọ nado mọ nujijọ de he na yidogọna awufiẹsa yetọn. Jesu dọmọ: “Yé nasọ mọ Visunnu gbẹtọ tọn ja to aslọ lẹ mẹ to huhlọn daho po gigo po mẹ.” (Malku 13:26) Nujijọ dobu huhlọnnọ ehe na yin ohia de dọ Jesu ko wá nado lá whẹdida. To adà dọdai he gando azán godo tọn lẹ go ehe tọn devo mẹ, Jesu basi zẹẹmẹ gigọ́ gando whẹdida he na yin lilá to ojlẹ ehe mẹ go. Nudọnamẹ enẹ tin to oló lẹngbọ po gbọgbọẹ lẹ po tọn lọ mẹ. (Hia Matiu 25:31-33, 46.) Godonọnamẹtọ nugbonọ Ahọluduta Jiwheyẹwhe tọn lẹ na yin whẹdana taidi “lẹngbọ lẹ” bo na “ze ota [yetọn] daga,” na yé yọnẹn dọ “whlẹngán [yetọn] to sisẹpọ.” (Luku 21:28) Ṣigba, kẹntọ Ahọluduta lọ tọn lẹ na yin whẹdana taidi “gbọgbọẹ lẹ” bo na “do awubla hia,” na yé yọnẹn dọ yé na “yin sinsánsẹ kakadoi.”—Mat. 24:30; Osọ. 1:7.

w09 15/1 31 huk. 1

Nuagokun lẹ sọn Owe Osọhia Tọn Mẹ—I

2:7—Etẹwẹ “paladisi Jiwheyẹwhe tọn” yin? To whenuena e yindọ Klistiani yiamisisadode lẹ wẹ hogbe ehelẹ yin yiyizan na, paladisi ehe dona to alọdlẹndo paladisi olọn mẹ tọn—yèdọ nukọn Jiwheyẹwhe lọsu titi tọn. Mẹyiamisisadode nugbonọ lẹ na mọaleyi nado dù “atin-sinsẹ́n ogbẹ̀ tọn.” Yé na mọ jọmaku yí.—1 Kọl. 15:53.

25 NOVEMBRE–1^er DÉCEMBRE

NUHỌAKUẸ LẸ SỌN OHÓ JIWHEYẸWHE TỌN MẸ | OSỌHIA 4-6

“Osọ́-Kùntọ Ẹnẹ Lẹ”

wp17.3 4 huk. 3

Osọ́-Kùntọ Ẹnẹ lọ lẹ—Mẹnu Wẹ Yé Yin?

Mẹnu wẹ to osọ́ wewe lọ kùn? Owe Biblu tọn dopolọ, yèdọ owe Osọhia tọn, wẹ do mẹhe osọ́-kùntọ olọn mẹ tọn ehe yin hia bo wá dlẹnalọdo e taidi “Ohó Jiwheyẹwhe tọn.” (Osọhia 19:11-13) Tẹnmẹ-yinkọ lọ, Ohó lọ, nọ yin yiyizan na Jesu Klisti, na ewọ wẹ hoyidọtọ Jiwheyẹwhe tọn. (Johanu 1:1, 14) Humọ, e yin yiylọdọ “Ahọlu ahọlu lẹ tọn podọ Oklunọ oklunọ lẹ tọn” bosọ yin zẹẹmẹ basina taidi “Nugbonọ podọ Nugbo.” (Osọhia 19:16) E họnwun dọ e tindo aṣẹpipa nado yinuwa taidi ahọlu-awhàngbatọ de, podọ e ma nọ yí huhlọn etọn zan nado tafumẹ kavi gbidikọnamẹ. Amọ́, ehe fọ́n kanbiọ delẹ dote.

wp17.3 4 huk. 5

Osọ́-Kùntọ Ẹnẹ lọ lẹ—Mẹnu Wẹ Yé Yin?

Whetẹnu wẹ osọ́-kùntọ lọ lẹ bẹ osọ́-kùnkùn yetọn? Doayi e go dọ osọ́-kùntọ tintan lọ, Jesu, bẹ osọ́-kùnkùn jẹeji to whenue e mọ jẹgbakun de yí. (Osọhia 6:2) Whetẹnu wẹ Jesu mọ jẹgbakun yí taidi Ahọlu to olọn mẹ? E ma yin to whenue e lẹkọyi olọn mẹ to okú etọn godo. Biblu dohia dọ e nọte na ojlẹ de. (Heblu lẹ 10:12, 13) Jesu na hodotọ etọn lẹ ohia de nado yọ́n whenue ojlẹ teninọ tọn lọ na wá vivọnu bọ gandudu etọn na bẹjẹeji to olọn mẹ. E dọ dọ to bẹjẹeji gandudu emitọn tọn, ninọmẹ aihọn lọ tọn na diọ bo na ylan deji. Awhàn, núdùdù whèdomẹ po azọ̀nylankan lẹ po na tin. (Matiu 24:3, 7; Luku 21:10, 11) To whenue Wẹkẹ-Whàn I bẹ to 1914, e họnwun dọ ojlẹ enẹ bẹjẹeji, yèdọ ojlẹ hunyanhunyan tọn de to aigba ji he Biblu ylọdọ “azán godo tọn lẹ.”—2 Timoti 3:1-5.

wp17.3 5 huk. 2

Osọ́-Kùntọ Ẹnẹ lọ lẹ—Mẹnu Wẹ Yé Yin?

Osọ́-kùntọ ehe nọtena awhàn. Doayi e go dọ e to jijọho desẹ, e ma yin sọn akọta vude poun mẹ, ṣigba, sọn aigba blebu ji. To whenuho mẹ, 1914 wẹ whla tintan he awhàn de yin fùnfùn lẹdo aihọn pé. Wẹkẹ-whàn awetọ de bọdego bo tlẹ sọ hẹnnugble taun. Sọhayinanú delẹ dohia dọ hugan gbẹtọ livi 100 wẹ ko yin hùhù sọn 1914, na awhàn po nudindọn lẹ po wutu! Humọ, mẹsusu hugan mọ wẹ gbleawu sinsinyẹn.

wp17.3 5 huk. 4-5

Osọ́-Kùntọ Ẹnẹ lọ lẹ—Mẹnu Wẹ Yé Yin?

“Yẹn sọ mọ, podọ pọ́n! osọ́ yuu de, bọ mẹhe sinai to e ji tindo nujlẹgàn ovi awenọ de to alọ etọn mẹ. Yẹn sọ sè nuhe taidi ogbè de sọn ṣẹnṣẹn mẹdida ẹnẹ lọ lẹ tọn dọmọ: ‘Nujlẹnu likun tọn dopo na denali dopo, podọ nujlẹnu balekun tọn atọ̀n na denali dopo; hiẹ sọ ṣì amì olivie tọn po ovẹn po zan blo.’”—Osọhia 6:5, 6.

Osọ́-kùntọ ehe nọtena huvẹ. To zẹẹmẹ he yin bibasi gando osọ́-kùntọ ehe go mẹ, núdùdù whèdomẹ lọ sinyẹn sọmọ bọ nujlẹnu likun tọn dopo (nudi kg 1) na họ̀ denali dopo, yèdọ azọ́nkuẹ azán dopo blebu tọn to owhe kanweko tintan whenu! (Matiu 20:2) Akuẹ dopolọ sọgan họ̀ nujlẹnu balekun tọn atọ̀n (nudi kg 3), yèdọ jinukun he yè nọ pọnhlan di nuhe ma họakuẹ sọ likun. Nawẹ ehe gán na núdùdù whẹndo daho de dẹnsọ? Yè tlẹ na avase gbẹtọ lẹ to whenẹnu nado dowéna núdùdù egbesọ tọn lẹ, ehe nọtena amì olivie tọn po ovẹn po he yin onú dandan tọn lẹ to ojlẹ enẹ mẹ.

wp17.3 5 huk. 8-10

Osọ́-Kùntọ Ẹnẹ lọ lẹ—Mẹnu Wẹ Yé Yin?

Osọ́-kùntọ ẹnẹtọ lọ nọtena okú he azọ̀nylankan po nudevo lẹ po nọ hẹnwa. Ojlẹ vude to 1914 godo, azọ̀n de he nọ yin grippe espagnole hù gbẹtọ livi susu. Diblayin gbẹtọ livi 500 wẹ yin bibẹpla, yèdọ 1 to 3 ji mẹhe to aihọn lọ mẹ to whenẹnu lẹ tọn!

Amọ́, bẹjẹeji poun wẹ enẹ yin. Weyọnẹntọ lẹ dohia dọ gbẹtọ livi kanweko lẹ wẹ aigbanú-asu (variole) hù to owhe kanweko 20tọ gblamẹ. Kakajẹ din, gbẹtọ livi susu lẹ wẹ SIDA, pẹ́nwe po ovà po nọ hù, mahopọnna nukọnyiyi dodinnanu dotowhé tọn lẹ.

Okú wẹ yin kọdetọn onú lọ lẹpo tọn, vlavo eyin awhàn, huvẹ kavi azọ̀nylankan. Yọdò to gbẹtọ lẹ yí badabada bo ma nọ namẹ todido depope.

Onú Sisosiso Gbigbọmẹ Tọn Lẹ

re 77 huk. 8

Gigo Dahonọ-Yinyin Ofin Olọn mẹ Tọn Jehovah Tọn Tọn

⁸ Johanu yọnẹn dọ yẹwhenọ lẹ yin didè nado wàdevizọn to gohọtuntun hohowhenu tọn lọ mẹ. Enẹwutu e sọgan ko paṣa ẹ nado mọ nuhe e basi zẹẹmẹ etọn to enẹgodo: “Ofin konukunẹnẹ lẹdo ofin lọ pe: podọ to ofin lẹ lọ ji yẹn mọ mẹho konukunẹnẹ to aisinsin, he yè do avọ wewe na; ye sọ tindo ojẹgbakun sika tọn lẹ to ota yetọn.” (Osọhia 4:4) Mọwẹ, kakati ni yin yẹwhenọ lẹ, mẹho 24 lẹ he yin zizedo ofin ji bo yin ojẹgbakun zedo ota na taidi ahọlu lẹ wẹ tin to finẹ. Mẹnu wẹ mẹho ehelẹ yin? Ye ma sọ yin mẹdevo hugan omẹ yiamisisadode he yin agun Klistiani tọn lẹ gba, he yin finfọnsọnku bo tin to teninọ olọn tọn lọ mẹ he Jehovah dopagbe etọn na ye. Nawẹ mí yọn enẹ gbọn?

re 80 huk. 19

Gigo Dahonọ-Yinyin Ofin Olọn mẹ Tọn Jehovah Tọn Tọn

¹⁹ Etẹwẹ mẹdida ehelẹ nọtena? Numimọ devo he yin linlin etọn basi dogbọn yẹwhegan devo dali, yedọ Ezekiẹli, gọalọna mí nado mọ gblọndo lọ. Ezekiẹli mọ Jehovah sinai do kẹkẹ olọn tọn de ji, he yin hihodo dogbọn nudida gbẹte he tindo agbasa ninọmẹ dopolọ po dehe Johanu basi zẹẹmẹ etọn po lẹ dali. (Ezekiẹli 1:5-11, 22-28) To nukọnmẹ, Ezekiẹli sọ mọ kẹkẹ ofin enẹ he yin hihodo dogbọn nudida gbẹte lẹ dali. Ṣigba to ojlẹ ehe mẹ, e ylọ nudida gbẹte lẹ dọ kelubin. (Ezekiẹli 10:9-15) Mẹdida ẹnẹ lẹ he Johanu mọ dona ko nọtena kelubin susu Jiwheyẹwhe tọn lẹ—yedọ nudida teninọ yiaga tọn lẹ he yin agun gbigbọmẹ tọn Etọn tọn. Johanu ma sọgan ko lẹndọ e yin nupaṣamẹ de nado mọ kelubin lẹ to ote sẹpọ Jehovah lọsu sọmọ gba, dile e ko yindọ to tito gohọtuntun hohowhenu tọn lọ mẹ, kelubin awe sika tọn lẹ yin didohia to nùsu alki alẹnu tọn lọ tọn ji, he nọtena ofin Jehovah tọn. To kelubin ehelẹ ṣẹnṣẹn wẹ ogbè Jehovah tọn nọ dè gbedide lẹ tọ́njẹgbonu sọn hlan akọta lọ.—Eksọdusi 25:22; Psalm 80:1.

cf-F 36 huk. 5-6

“Pọ́n! Kinnikinni He Wá sọn Whẹndo Juda Tọn Mẹ”

⁵ To paa mẹ, kinnikinni nọ nọtena adọgbigbo. Be a ko pannukọn kinnikinni asu daho de pọ́n ya? E yọnbasi dọ kanlin-pọntẹn de wẹ a mọ ẹn te bọ e yin ginglọndo apó de mẹ, ehe zọ́n bọ e ma gán gbleawuna we. Etomọṣo, mimọ ẹn poun nọ dobunamẹ. Dile a to kanlin daho he dobu ehe pọ́n bọ e ze nukun do ji we, e na ko họnwun na we dọ nudepope ma nọ dobuna ẹn. Biblu dohia dọ kinnikinni wẹ yin “huhlọnnọ hugan to gbekanlin lẹ mẹ he ma nọ joagọyigodo to mẹdepope nukọn.” (Howhinwhẹn lẹ 30:30) Mọ wẹ Klisti nọ gboadọ do.

⁶ Mì gbọ mí ni dọhodo aliho voovo atọ̀n he mẹ Jesu do adọgbigbo kinnikinni tọn nkọ hia te delẹ ji: e yiavùnlọna nugbo, tẹdo whẹdida dodo go, bosọ doakọnna homẹkẹn. Mí nasọ mọdọ mímẹpo wẹ gán hodo apajlẹ adọgbigbo Jesu tọn, vlavo mí nọ gboadọ to jọwamọ-liho kavi lala.