Alọdlẹndonu Nuplọnwe Opli Gbẹzan po Lizọnyizọn po Tọn
2-8 NOVEMBRE
NUHỌAKUẸ LẸ SỌN OHÓ JIWHEYẸWHE TỌN MẸ | EKSỌDUSI 39-40
“Mose Hodo Anademẹ lẹ po Sọwhiwhe Po”
w11 15/9 27 huk. 13
Be Jehovah Yọ́n We Ya?
13 To vogbingbọn mẹ, Mose yin “homẹmimiọnnọ tlala hú mẹhe tin to nukunmẹ aigba lọ tọn ji lẹpo.” (Sọh. 12:3) Gbemima etọn nado hodo anademẹ Jehovah tọn do lehe e yin homẹmimiọnnọ po whiwhẹnọ do po hia. (Eks. 7:6; 40:16) Nudepope ma dohia dọ Mose nọ saba tindo ayihaawe gando aliho he mẹ Jehovah nọ yinuwa te go kavi gblehomẹ do anademẹ Etọn lẹ go. Di apajlẹ, Jehovah na anademẹ gigọ́ gando gòhọtúntún lọ gbigbá go kakajẹ okàn sinmẹ he Islaelivi lẹ na sìn do tónu avọ̀ he yé nado basi gòhọ lọ po sọha okàn he na nọ tónu avọ̀ dopodopo tọn po ji. (Eks. 26:1-6) To titobasinanu Jehovah tọn mẹ, eyin nugopọntọ kavi mẹho agun tọn de nọ na anademẹ gigọ́ kakajẹ onú flinflin lẹ ji, enẹ sọgan nọ hẹn apọṣi mí to whedelẹnu. Ṣigba, Jehovah yin nugopọntọ pipé de he nọ yí homẹhunhun do deazọ́nna devizọnwatọ etọn lẹ bosọ nọ dejido yé go. Eyin Jehovah na anademẹ gigọ́ gando nude go, e tindo whẹwhinwhẹ́n he wutu e do wàmọ. Ṣigba, e jẹna ayidego dọ Mose ma gblehomẹ do Jehovah go kavi lẹndọ ewọ to nukunpẹvi yí do pọ́n emi kavi to mẹdekannujẹ emitọn hòyí na anademẹ gigọ́ he e na gando gòhọtúntún lọ gbigbá go lẹ wutu gba. Kakatimọ, Mose hẹn ẹn diun dọ azọ́nwatọ lọ lẹ ‘basi domọ pẹpẹ’ sọgbe hẹ anademẹ Jiwheyẹwhe tọn lẹ. (Eks. 39:32) Nuyiwa whiwhẹ tọn nankọ die! Mose yọnẹn dọ azọ́n Jehovah tọn wẹ, podọ Ewọ to emi yizan nado wà azọ́n etọn dotana poun wẹ.
w05 15/7 27 huk. 3
Be Hiẹ Nọ Yin Nugbonọ to Onú Lẹpo mẹ Ya?
3 “Mose yin nugbonọ . . . di devi de,” wẹ Heblu lẹ 3:5 dọ. Etẹwẹ hẹn yẹwhegán Mose nado yin nugbonọ? To awuwiwlena gòhọtúntún lọ po dido e ai po mẹ, “Mose wà . . . kẹdẹdi ehe OKLUNỌ lọ degbena ẹn lẹpo, mọwẹ e wà do.” (Eksọdusi 40:16) Taidi sinsẹ̀n-basitọ Jehovah tọn lẹ, mí nọ do nugbonọ-yinyin hia gbọn devizọnwiwa hlan ẹn po tonusise po dali. E họnwun dọ, ehe bẹ tenọgligo-hinhẹn hlan Jehovah to whlepọn sinsinyẹn, kavi avùnnukundiọsọmẹ vẹadi lẹ nukọn hẹn. Etomọṣo, e ma yin duduto whlepọn daho lẹ ji kẹdẹ wẹ nọ do nugbonọ-yinyin mítọn hia gba. “Ewọ he yin nugbonọ to onú pẹvi tlala de mẹ, e yin nugbonọ to onú susu mẹ ga: podọ ewọ he yin mawadodonọ to onú pẹvi tlala de mẹ, sọ yin mawadodonọ to onú susu mẹ ga,” wẹ Jesu dọ. (Luku 16:10) Mí dona gbọṣi nugbonọ-yinyin mẹ etlẹ yin to whẹho he taidi numadinu lẹ mẹ.
Onú Sisosiso Gbigbọmẹ Tọn Lẹ
w96 1/1 6 huk. 9
‘Mọwẹ Yé Basi Do’
9 To whenuena Jehovah degbena Islaelivi lẹ nado basi nunina bo gbá gòhọtúntún de to zungbo mẹ, omẹ lọ lẹ yí homẹ dagbe do basi godonọnamẹ gigọ yetọn. Enẹgodo, na zẹẹmẹ he tlẹ whè hugan lẹ, Mose po azọ́nwatọgbẹ́ ojlonọ etọn lẹ po hodo tito yẹdide họgbigbá tọn lẹ heyin awuwlena gbọn Jehovah dali. “Le wẹ yè vọ̀ azọ́n gòhọtúntún ogohọ̀ opli tọn lọ tọn do; Ovi Islaeli tọn lẹ basi kẹdẹdi ehe Oklunọ lọ degbena Mose lẹpo, mọwẹ yé wà do.” Mọdopolọ, to hùnwhẹ didoai yẹwhenọduta tọn whenu, “le wẹ Mose wà do: kẹdẹdi ehe Oklunọ lọ degbena ẹn lẹpo, mọwẹ e wà do.” (Eksọdusi 39:32; 40:16) To ojlẹ egbezangbe tọn lẹ mẹ, mí tindo dotẹnmẹ hundote lọ nado ná godonọnamẹ sọn ahunmẹ wá hlan azọ́n yẹwhehodidọ lọ tọn podọ hlan tito-to-whinnu lẹ na hẹngblo Ahọluduta lọ tọn. Gbọnmọ dali lẹblanulọkẹyi mítọn wẹ e yin nado kọnawudopọ to ‘bibasi domọ’ mẹ.
w15 15/7 21 huk. 1
Be Dandan Wẹ Dọ Mẹde Ni Nọ Doayi Azọ́n He Wà A Te Go Ya?
To whenue gòhọtúntún lọ yin gbigbá fó, aslọ “ṣinyọ́n gòhọ opli tọn lọ ji, gigo OKLUNỌ lọ tọn sọ gọ́ gòhọtúntún lọ mẹ.” (Eks. 40:34) Lehe ohia enẹ yin kunnudenu he họnwun dọ Jehovah kẹalọyi gòhọtúntún lọ do sọ! Numọtolanmẹ tẹwẹ a lẹndọ Bezalẹli po Oholiabi po na ko tindo to ojlẹ enẹ mẹ? Dile etlẹ yindọ yinkọ yetọn ma yin kinkando azọ́n he yé wà lẹ go, yé na ko gọ́ na ayajẹ, na yé yọnẹn dọ Jiwheyẹwhe dona vivẹnudido yetọn lẹpo. (Howh. 10:22) To owhe he bọdego lẹ mẹ, homẹ yetọn na ko hùn taun nado mọdọ azọ́n he yé wà lẹ gbẹ́ to yinyin yiyizan na sinsẹ̀n-bibasi Jehovah tọn. Matin ayihaawe, to whenue Bezalẹli po Oholiabi po na gọwá ogbẹ̀ to aihọn yọyọ lọ mẹ, lehe e na yin homẹhunnu daho na yé do sọ nado sè dọ gòhọtúntún lọ yin yiyizan na sinsẹ̀n-bibasi Jehovah tọn na nudi owhe 500!
AWUWIWLENA LIZỌNYIZỌN KUNNUDEGBE TỌN
w16.04 29 huk. 8-10
Hẹn Kadaninọ Towe Go to Aihọn He Klan Ehe Mẹ
8 Onú awetọ he mí na wà nado gbọṣi kada wẹ nado yin “zinzintọ taidi odàn ṣogan bo yin homẹvọnọ taidi apoe” to whenue mí to pipehẹ avùnnukundiọsọmẹnu lẹ. (Hia Matiu 10:16, 17.) Mí nọ do zinzin hia gbọn owù lẹ mimọ hlan nukọn dali, podọ mí nọ yin homẹvọnọ to whenue mí ma na dotẹnmẹ owù lọ lẹ nado hẹn mí jogbe. Mì gbọ mí ni dọhodo avùnnukundiọsọmẹnu delẹ po lehe mí sọgan pehẹ yé do po ji.
9 Hodọdopọ lẹ. Mí dona yí zinzin zan to whenue gbẹtọ lẹ fọ́n whẹho tonudidọ tọn lẹ dote. Di apajlẹ, to whenue a to owẹ̀n Ahọluduta lọ tọn zedonukọnna gbẹtọ lẹ, ma nọ na pipà kavi mọhodọdo linlẹn tonudọgbẹ́ kavi togán de tọn go blo. Tẹnpọn nado ze hodidọ towe sinai do nuhe ji hiẹ po whétọ towe po kọngbedopọ do gbọn ayidonugo nina nuhahun lọ dali kakati nado dọhodo pọngbọ depope he gandudu gbẹtọvi tọn na hẹnwa ji. Enẹgodo, dohia ẹ sọn Biblu mẹ lehe gandudu Jiwheyẹwhe tọn na hẹn pọngbọ wá na nuhahun lọ mlẹnmlẹn podọ kakadoi do. Eyin gbẹtọ lẹ jlo na dọnnu gando whẹho de go taidi alọwle to mẹhe tindo vijinu dopolọ lẹ ṣẹnṣẹn kavi hòdide, yiavùnlọna nujinọtedo Jiwheyẹwhe tọn lẹ bo basi zẹẹmẹ lehe mí nọ hodo nujinọtedo enẹlẹ to gbẹzan mítọn mẹ do tọn. To hodọdopọ lọ whenu, ma dọhodo adà dagbe kavi ylankan he tonudọtọ lẹ nọ yiwà to whẹho ehelẹ mẹ ji blo. To whenue gbẹtọ lẹ to hodọ gando osẹ́n he dona yin didoai, yin hùzẹdeji, kavi yin didiọ lẹ go, mí ma nọ nọgodona linlẹn depope, podọ mí ma nọ gbidikọna mẹdevo lẹ nado kẹalọyi pọndohlan mítọn.
10 Linlinnamẹnu lẹ. Linlin-namẹtọ lẹ nọ saba ze nudọnamẹ lẹ donukọnnamẹ po nuvẹun po bosọ nọ nọgodona pọndohlan yetọn titi lẹ. Podọ to whedelẹnu, tonudọtọ lẹ nọ yí linlinnamẹnu lẹ zan. To otò he mẹ gandudu nọ paṣẹ do azọ́nwhé linlinnamẹnu lẹ tọn ji te lẹ mẹ, linlin lẹ sọgan yin kọslona gànna-gànna, podọ Klistiani he tlẹ tin to otò he to yedekannu lẹ mẹ lẹ dona tin to aṣeji ma nado kẹalọyi pọndohlan linlin-namẹtọ de tọn. Kanse dewe dọ, ‘Be n’yiwanna nado nọ dotoaina linlin-namẹtọ de na n’kọngbedopọ hẹ nuhe e nọ dọ gando tonudidọ go wutu ya?’ Eyin mọ wẹ, a sọgan dín asisa nudọnamẹ tọn devo lẹ he nọ tẹdo nudọnamẹ nugbo go. To popolẹpo mẹ, nuyọnẹnnu wẹ e yin nado nọ dapana asisa linlinnamẹ tọn he nọ nọgodona whẹho tonudidọ tọn lẹpo podọ nado nọ yí nuhe a sè lẹ jlẹdo “ohia ohó he sọgbe lẹ tọn” he tin to Biblu mẹ go.—2 Tim. 1:13.
9-15 NOVEMBRE
NUHỌAKUẸ LẸ SỌN OHÓ JIWHEYẸWHE TỌN MẸ | LEVITIKU 1-3
“Nuhewutu Islaelivi lẹ Nọ Bayi Avọ́nunina Lẹ”
it-2-F 847 huk. 1
Avọ́nunina Lẹ
Avọ́nunina mimẹ̀ lẹ. Avọ́nunina mimẹ́ lọ blebu wẹ nọ yin zizedonukọnna Jiwheyẹwhe; mẹhe to avọ́nunina lọ basi ma nọ yí adà kanlin lọ tọn depope. (Yijlẹdo Whẹ 11:30, 31, 39, 40 go.) Ehe nọ yin aliho de nado vẹvẹna Jehovah dọ ni kẹalọyi avọ́nunina ylando tọn he nọ zọnpọ to whedelẹnu hẹ avọ́nunina mimẹ́ lọ. Taidi “avọ́nunina mimẹ̀” de, Jesu Klisti ze ede jo petepete.
it-2-F 849 huk. 8
Avọ́nunina Lẹ
Avọ́nunina jinukun-lili tọn lẹ. Avọ́nunina jinukun-lili tọn nọ zọnpọ hẹ avọ́nunina jijọho tọn, avọ́nunina mimẹ̀ po avọ́nunina ylando tọn po, podọ e sọ nọ yin sinsẹ́n tintan. To whedelẹnu, avọ́nunina jinukun-lili tọn kẹdẹ wẹ nọ yin bibasi. (Eks 29:40-42; Le 23:10-13, 15-18; Sọh 15:8, 9, 22-24; 28:9, 10, 20, 26-28; weta 29) Islaelivi lẹ nọ basi avọ́nunina ehe nado dopẹna Jiwheyẹwhe, na dona po adọkun he e kọ̀n do yé ji lẹ po wutu. To paa mẹ, mẹhe basi avọ́nunina ehe nọ hẹn amì po nuyọnwan gblingblin po wá ga. Nudelẹ die he yè gán yí do basi avọ́nunina jinukun-lili tọn: linfin dagbedagbe, jinukun sisọ̀, akla loboto kavi akla wọ́dọ́wọ́dọ́ he yè hì, kavi he yè bayi to agbánvla mẹ kavi to nudàzẹ́n mẹ. Yè nọ ze adà avọ́nunina jinukun-lili tọn de do agbà avọ́nunina mimẹ̀ tọn lọ ji, podọ yẹwhenọ lẹ nọ dù adà de, bọ eyin avọ́nunina jijọho tọn wẹ yin bibasi, mẹhe hẹn avọ́nunina lọ wá nọ dù sọn e mẹ ga. (Le 6:14-23; 7:11-13; Sọh 18:8-11) Depope to avọ́nunina jinukun-lili tọn he nọ yin zizedo agbà lọ ji lẹ mẹ ma nọ tindo otọ́n kavi “owín” (vlavo ehe to alọdlẹndo osin ovò-sinsẹ́n tọn kavi osin atin-sinsẹ́n tọn) he sọgan zọ́n bọ e na whán.—Le 2:1-16.
w12 15/1 19 huk. 11
11 Avọ́sinsan he yin nùdego to Osẹ́n Mose tọn mẹ delẹ nọ yin yiylọdọ avọ́nunina jijọho tọn. Lẹndai etọn wẹ nado tin to jijọho mẹ hẹ Jehovah. Mẹhe basi avọ́nunina mọnkọtọn po whẹndo etọn po nọ dù olàn kanlin he yè yí do sanvọ́ lọ tọn, vlavo to abò he mẹ yè nọ dùnú te to tẹmpli lọ mẹ lẹ de mẹ. Yẹwhenọ he to sinsẹ̀nzọnwa lọ nọ yí adà olàn lọ tọn de, podọ yẹwhenọ devo he to sinsẹ̀n to tẹmpli lọ mẹ lẹ nọ yí adà yetọn ga. (Lev. 3:1; 7:31-33) Nado duvivi haṣinṣan dagbe de tọn hẹ Jiwheyẹwhe wẹ nọ zọ́n bọ sinsẹ̀n-basitọ lọ do nọ basi avọ́sinsan etọn sọn ojlo mẹ wá. Mọwiwà nọ taidi dọ sinsẹ̀n-basitọ lọ, whẹndo etọn, yẹwhenọ lẹ po Jehovah lọsu po yí ayajẹ do to núdùdù de dù dopọ to jijọho mẹ.
Onú Sisosiso Gbigbọmẹ Tọn Lẹ
w04 15/5 22 huk. 1
Nuagokun lẹ sọn Owe Levitiku Tọn Mẹ
2:13—Naegbọn bọ ‘avọ́nunina lẹpo’ dona yin bibasi po ojẹ po? Ehe ma nọ yin bibasi nado de otọ́n nunina lẹ tọn tọ́n gba. Ojẹ nọ yin yiyizan lẹdo aihọn pé nado glọnalina gbigble onú lẹ tọn. E sọgan ko yin na e nọ do nuhe ma sọgan gble kavi yọ̀n hia wutu wẹ e nọ yin yiyidogọ na avọ́nunina lẹ.
w04 15/5 22 huk. 2
Nuagokun lẹ sọn Owe Levitiku Tọn Mẹ
3:17. To whenuena e yindọ ojó nọ yin pinpọnhlan taidi adà he yọ́n kavi he yin nujọnu hugan lọ, e họnwun dọ gbigbẹna Islaelivi lẹ nado dù i na dó do ahun mẹ na yé dọ Jehovah tọn wẹ adà he yọ́n hugan yin. (Gẹnẹsisi 45:18) Ehe flin mí dọ mí dona nọ yí nuhe yọ́n hugan lẹ na Jehovah.—Howhinwhẹn lẹ 3:9, 10; Kọlọsinu lẹ 3:23, 24.
GBẸZAN KLISTIANI TỌN
w08 1/4 28 huk. 1-3
Be Hiẹ Yọnẹn Ya?
To owhe kanweko tintan W.M., takuẹ he Ju lẹ nọ sú to whemẹwhemẹ na tẹmpli wẹ “odaa ṣekẹli tọn,” kavi dlakma awe, nudi azọ́nkuẹ azán awe tọn. (Matiu 17:24) To vogbingbọn mẹ, Jesu dọ dọ oblẹnọ awe wẹ yè nọ sà yin “abọgankuẹ pẹvi de,” he sọzẹn hẹ azọ́nkuẹ nukunwhiwhe 45 tọn. Na nugbo tọn, abọgankuẹ ehe awe kavi nudi azọ́nkuẹ nukunwhiwhe 90 tọn wẹ sọgan họ̀ oblẹnọ atọ́n.—Matiu 10:29; Luku 12:6.
Nunina tẹmpli mẹ tọn asuṣiọsi wamọnọ lọ tọn he Jesu mọ whè tlala hú abọgankuẹ he họ̀ oblẹnọ atọ́n. Abọgankuẹ kavi lepta awe ehelẹ wẹ yin gànkuẹ gànvẹẹ tọn he whè hugan he yè nọ zan to Islaeli to ojlẹ enẹ mẹ. Abọgankuẹ awe lọ lẹ sọzẹn hẹ 1⁄64 (dopo to kandeko-nukunẹnẹ ji) azọ́nkuẹ gbèdopo tọn, kavi eyin mí na basi madozẹnzẹn azọ́nwiwa gbèdopo tọn he yin ganhiho 12, e ma pé nukunwhiwhe 12 to gbèdopo.
Jesu Klisti yọ́n pinpẹn nunina asuṣiọsi lọ tọn tlala hugan mẹhe to nina “sọn susu gbọ̀pọ̀ yetọn mẹ” lẹpo. Etẹwutu? Kandai lọ dọ dọ e tindo “abọgankuẹ flinflin awe,” enẹwutu e sọgan ko yí dopo do na nunina bo yí awetọ sẹdo. Ṣogan, e yí “nuhe e tindo lẹpo dlan e mẹ, yèdọ gbẹ̀mẹnu etọn lẹpo.”—Malku 12:41-44; Luku 21:2-4.
16-22 NOVEMBRE
NUHỌAKUẸ LẸ SỌN OHÓ JIWHEYẸWHE TỌN MẸ | LEVITIKU 4-5
“Nọ Na Nudagbe Hugan Towe Jehovah”
nwt 1880 huk. 2
Avọ́nunina whẹhuhu tọn. Avọ́sinsan de he nọ yin bibasi na ylando mẹdetiti tọn lẹ. E gbọnvo yẹẹ de na avọ́sinsan ylando tọn he pò lẹ to enẹ mẹ dọ lẹndai etọn wẹ nado gọalọna ylanwatọ he lẹnvọjọ lọ nado hẹn jlọjẹ alẹnu tọn he e ko hẹnbu na ylando wutu delẹ gọwá kavi gọ̀ yé mọyi bo vò sọn obá he dona ko hò e si.—Le 7:37; 19:22; Isa 53:10.
w09 1/7 11 huk. 3
Ewọ Yọ́n Dogbó Mítọn
Nado do mẹtọnhopọn owanyinọ Jehovah tọn hia, Osẹ́n lọ dọmọ: “Eyin huhlọn etọn whè na lẹngbọvu dopo, whenẹnu ewọ na hẹn avọ́nunina whẹgbledo tọn etọn wá na enẹ ehe mẹ e ko waylando te, owhlé awe, kavi awhànnẹvu awe, jẹ OKLUNỌ lọ dè.” (Wefọ 7) Eyin Islaelivi de yin wamọnọ sọmọ bo ma sọgan na lẹngbọvu de, homẹ Jiwheyẹwhe tọn nọ hùn nado kẹalọyi nuhe go huhlọn etọn pé—enẹ wẹ owhlé awe kavi awhànnẹvu awe.
w09 1/7 11 huk. 4
Ewọ Yọ́n Dogbó Mítọn
Eyin huhlọn mẹlọ tọn ma tlẹ pé ohẹ̀ awe lọsu go lo? “Whẹnẹnu ewọ na hẹn avọ́nunina etọn wá na enẹ ehe mẹ ewọ ko waylando te, madaotọ efa [nudi kilo dopo] linfin dagbedagbe tọn dopo na avọ́nunina ylando de tọn,” wẹ Osẹ́n lọ dọ. (Wefọ 11) Na mẹhe jẹhẹ́n klókló, Jehovah hẹn ẹn yọnbasi nado na avọ́nunina ylando tọn he ma biọ dọ ohùn kanlin tọn ni yin sinsọndai. To Islaeli, ohẹ́n ma nọ glọnalina mẹde nado mọ jona ylando tọn yí kavi nado gbọwhẹ hẹ Jiwheyẹwhe.
Onú Sisosiso Gbigbọmẹ Tọn Lẹ
w16.02 30 huk. 14
Plọnnu sọn Devizọnwatọ Nugbonọ Jehovah Tọn lẹ Dè
14 Homẹdagbe sọgan gọalọna we to whenue nugbonọ-yinyin na mẹsusu dopọ kàn dẹpẹ biọ. Di apajlẹ, e sọgan họnwun na we dọ yisenọ hatọ de hùwhẹ nuṣiwa sinsinyẹn tọn. A sọgan mọdọ emi dona yin nugbonọ na ẹn, titengbe eyin họntọn vivẹ́ kavi hẹnnumẹ de wẹ. Amọ́, eyin a ṣinyọnnudo nuṣiwa lọ, a ma na yin nugbonọ na Jiwheyẹwhe. Na nugbo tọn, Jehovah wẹ hiẹ dona yin nugbonọ na jẹnukọn. Enẹwutu taidi Natani, yin homẹdagbenọ, ṣogan bo yin nujikudonọ. Dotuhomẹna họntọn kavi hẹnnumẹ towe nado yì dín alọgọ mẹho lẹ tọn. Eyin ewọ ma wàmọ to ojlẹ he to jlẹkaji de gblamẹ, nugbonọ-yinyin na Jiwheyẹwhe dona whàn we nado dọ whẹho lọ na mẹho lẹ. Gbọnmọ dali, a to nugbonọ yin na Jehovah bo ka sọ jọmẹ hẹ họntọn kavi hẹnnumẹ towe, na mẹho agun tọn lẹ na tẹnpọn nado gọ̀ omẹ mọnkọtọn do otẹn etọn mẹ po walọmimiọn po.—Hia Levitiku 5:1; Galatianu lẹ 6:1.
it-2-F 861 huk. 8
Wiwe-Yinyin
Kanlin po Jinukun lẹ Po. Oyìnsú, lẹngbọvu asu kavi gbọgbọẹ asu he yin plọnji lẹ nọ yin pinpọnhlan di onú wiwe de hlan Jehovah bo ma nọ yin fifligọ. Yé nọ yin yiyido sánvọ, podọ adà de nọ tin na yẹwhenọ he yin kinklandowiwe lẹ. (Sọh 18:17-19) Onú wiwe wẹ sinsẹ́n tintan lẹ po mado-ao po nọ yin, kẹdẹdi avọ́sinsan po nunina he yin kinklandovo na sinsẹ̀nzọn fiwiwe lọ tọn lẹpo. (Eks 28:38) Nuhe yin onú wiwe hlan Jehovah lẹpo wẹ nọ yin kinklandovo na lẹndai enẹ, enẹwutu mẹde ma dona yí nukunpẹvi do pọ́n onú enẹlẹ, kavi yí yé zan taidi onú tata kavi to aliho he do mẹmasi hia mẹ. Apajlẹ etọn dopo wẹ osẹ́n he gando mado-ao go. Eyin sunnu de ko ze nude dovo nado yin yiyizan taidi mado-ao, vlavo sinsẹ́n likun etọn tọn, bọ to mayọnẹn mẹ, ewọ kavi mẹde sọn whédo etọn mẹ sọ wá de sọn nulọ mẹ bo yizan na hudo whégbè tọn de, vlavo núdida nkọ, be sunnu lọ gbàsẹ́n Jiwheyẹwhe tọn he biọ dọ sisi ni nọ yin nina onú wiwe lẹ. Sọgbe hẹ Osẹ́n lọ, e dona hẹn nunina dopolọ wá fiwiwe lọ gọna 20 to kanweko ji nunina lọ tọn, bosọ yí agbò de he to gángán sọn lẹngbọpa lọ mẹ do basi avọ́sinsan. Taidi kọdetọn de, sisi daho wẹ nọ yin nina onú wiwe he yin Jehovah tọn lẹ.—Le 5:14-16.
23-29 NOVEMBRE
NUHỌAKUẸ LẸ SỌN OHÓ JIWHEYẸWHE TỌN MẸ | LEVITIKU 6-7
“Nọ Dopẹ́”
w19.11 22 huk. 9
Nuplọnmẹ Delẹ sọn Owe Levitiku Tọn Mẹ
9 Nuplọnmẹ awetọ: Mí nọ sẹ̀n Jehovah nado do pinpẹn-nutọn-yinyọnẹn hia ewọ. Nado zinnudo ehe ji, mì gbọ mí ni dọhodo avọ́nunina jijọho tọn lẹ ji, ehe yin adà titengbe sinsẹ̀n-bibasi nugbo tọn devo to Islaeli hohowhenu tọn. To owe Levitiku tọn mẹ, mí plọn dọ Islaelivi de sọgan basi avọ́sinsan jijọho tọn de “taidi dohia pẹdido tọn.” (Lev. 7:11-13, 16-18) Ewọ nọ basi avọ́nunina ehe, e ma yin na e to dandannu glọ nado wàmọ wutu gba, amọ́ na ewọ jlo wutu. Enẹwutu, avọ́nunina sọn ojlo mẹ de wẹ, ehe mẹde nọ basi na ewọ yiwanna Jiwheyẹwhe etọn, Jehovah wutu. Mẹhe to avọ́nunina lọ basi gọna whẹndo etọn po yẹwhenọ lẹ po nọ dù olàn kanlin he yin yíyí do sanvọ́ lọ tọn. Ṣigba, adà avọ́sinsan kanlin tọn lọ tọn delẹ nọ yin nina Jehovah kẹdẹ. Adà tẹlẹ wẹ?
w00 15/8 15 huk. 15
Avọ́sinsan He Hẹn Homẹ Jiwheyẹwhe Tọn Hùn Lẹ
15 Avọ́nunina sọn ojlo mẹ wá devo wẹ avọ́sinsan kọndopọ tọn, heyin zẹẹmẹ basina to Levitiku weta 3 mẹ. Yinkọ lọ sọgan sọ yin lilẹdogbedevomẹ do “avọ́sinsan avọ́nunina jijọho tọn lẹ” ga. To Heblu-gbè mẹ, hogbe lọ “jijọho” nọ zẹẹmẹdo nususu hugan nado vò sọn awhàn kavi tukladomẹ lẹ si poun. “To Biblu mẹ, e nọ zẹẹmẹdo ehe, podọ ga do ninọmẹ kavi kanṣiṣa jijọho tọn hẹ Jiwheyẹwhe, kọdetọn dagbe tintindo, ayajẹ, po homẹhunhun po,” wẹ owe lọ Studies in the Mosaic Institutions dọ. Gbọnmọ dali, avọ́sinsan kọndopọ tọn lẹ nọ yin bibasi, e mayin nado mọ jijọho Jiwheyẹwhe tọn yí, taidi nado miọnhomẹna ẹn nkọtọn gba, ṣigba nado do pinpẹn-nutọn-yinyọnẹn hia, kavi nado basi hùnwhẹ, yèdọ ninọmẹ dona jijọho tọn he mẹhe yin alọkẹyi gbọn Jiwheyẹwhe dali lẹ to vivi etọn dù hẹ ẹ tọn. Yẹwhenọ lẹ po mẹhe na avọ́nunina lọ po nọ dù to avọ́sinsan lọ mẹ to whenuena ohùn po ojó lọ po ko yin nina Jehovah godo. (Levitiku 3:17; 7:16-21; 19:5-8) To aliho whanpẹnọ po yẹhiadonu tọn de po mẹ, mẹhe na avọ́nunina lọ, yẹwhenọ lẹ, po Jehovah Jiwheyẹwhe po to mahẹ tindo to núdùdù de mẹ, to yẹhiadonu liho, he nọtena haṣinṣan jijọho tọn he tin to ṣẹnṣẹn yetọn.
w00 15/8 19 huk. 8
Avọ́sinsan Pipà Tọn lẹ He Nọ Hẹn Homẹhun Jehovah
8 Etẹwẹ dogbọn mẹhe to avọ́nunina lọ basi dali? Osẹ́n lọ dọ dọ mẹdepope he ja Jehovah nukọn dona wé bo ma na dowángo. Mẹdepope he ko yin hinhẹnflu na whẹwhinwhẹ́n depope wutu dona na avọ́nunina ylando tọn kavi whẹhuhu tọn jẹnukọn whẹ́ nado hẹn teninọ wiwé etọn to Jehovah nukọn gọdotẹnmẹ na avọ́nunina mimẹ̀ tọn kavi kọndopọ tọn etọn nido sọgan yin alọkẹyi gbọn Ewọ dali. (Levitiku 5:1-6, 15, 17) Enẹwutu, be mí mọnukunnujẹ nujọnu-yinyin teninọ wiwé de go hinhẹn to Jehovah nukọn to whepoponu mẹ ya? Eyin mí jlo dọ Jiwheyẹwhe ni kẹalọyi sinsẹ̀n-bibasi mítọn, mí dona nọ yawu nado basi vọjlado na osẹ́n Jiwheyẹwhe tọn lẹ depope gbigbà. Mí dona nọ yawu nado nọ basi yizan alọgọnamẹnu he Jiwheyẹwhe wleawudaina lẹ tọn—yèdọ ‘mẹho he tin to agun mẹ lẹ’ po ‘avọ́sinsan oyẹsu tọn na ylando mítọn lẹ’ po, heyin Jesu Klisti.—Jakobu 5:14; 1 Johanu 2:1, 2.
Onú Sisosiso Gbigbọmẹ Tọn Lẹ
it-1-F 889 huk. 2
Miyọ́n
To gòhọtúntún po tẹmpli po mẹ. Sinsẹ̀n-bibasi Jiwheyẹwhe tọn to gòhọtúntún mẹ nọ biọ dọ miyọ́n ni yin zinzan, podọ e sọ wá yinmọ to tẹmpli mẹ ga. To afọnnu lẹ podọ to whèjai awe lẹ ṣẹnṣẹn, yẹwhenọ daho nọ mẹ̀ nuyọnwan to agbà nuyọnwan tọn lọ ji. (Eks 30:7, 8) Osẹ́n Jiwheyẹwhe tọn biọ dọ miyọ́n ni nọ to jiji to agbà lọ ji mapote. (Le 6:12, 13) Ju lẹ nọ lẹndọ miyọ́n he nọ to jiji to agbà lọ ji wá sọn Jiwheyẹwhe dè, amọ́ dile etlẹ yindọ mẹsusu wẹ yí enẹ sè, Owe-wiwe lẹ ma nọgodona linlẹn enẹ. Anademẹ tintan he Jehovah na Mose wẹ yindọ, visunnu Aalọn tọn lẹ wẹ dona “flọ miyọ́n do agbà lọ ji bo to nake lẹ do miyọ́n lọ mẹ” whẹpo do ze avọ́sinsan lọ do agbà lọ ji. (Le 1:7, 8) To whenue yẹwhenọduta Aalọn tọn ko yin didoai bọ avọ́sinsan aṣẹ-ninamẹ tọn ko yin bibayi godo wẹ miyọ́n wá sọn Jehovah dè, vlavo sọn aslọ he to aga gòhọtúntún lọ tọn mẹ, bo fiọ avọ́nunina he to agbà lọ ji. Ehe dohia dọ e ma yin nake he to agbà lọ ji wẹ miyọ́n he Jiwheyẹwhe dohlan lọ fiọ gba, ṣigba “avọ́nunina mimẹ̀ lọ po ojó he to agbà lọ ji lẹ po.” Podọ miyọ́n to jiji mapote to agbà lọ ji, vlavo na miyọ́n he Jiwheyẹwhe dohlan lọ to jiji dopọ hẹ miyọ́n he yè ko flọ dote to agbà lọ ji dai. (Le 8:14–9:24) Mọdopolọ to klandowiwe tẹmpli lọ tọn whenu, tlolo he Sọlomọni hodẹ̀ pò wẹ miyọ́n wá sọn Jehovah dè bo fiọ avọ́sinsan he yé basi lọ lẹ.—2Ot 7:1; sọ pọ́n Whẹ 6:21; 1Ah 18:21-39; 1Ot 21:26, fie Jehovah yí miyọ́n zan to azọ́njiawu-liho te lẹ nado dohia dọ emi kẹalọyi avọ́nunina devizọnwatọ emitọn lẹ tọn.
si-F 27 huk. 15
Owe Biblu Tọn Sọha 3—Levitiku
15 (3) Avọ́nunina ylando tọn nọ yin bibasi na ylando he yè wà to mayọnẹn mẹ kavi gbọn nuṣiwa dali. Kanlin he nọ yin nina nọ gbọnvo sinai do ylando mẹhe tọn yè jlo na basi ovẹsè na lọ ji, vlavo yẹwhenọ lọ, akọta lọ blebu, ahọvi de kavi omẹ paa de. Ojlo mẹ wẹ yè nọ desọn bo nọ basi avọ́nunina mimẹ̀ po avọ́nunina jijọho tọn po, amọ́ avọ́nunina ylando tọn uwọ yin dandannu.—4:1-35; 6:24-30.
30 NOVEMBRE–6 DÉCEMBRE
NUHỌAKUẸ LẸ SỌN OHÓ JIWHEYẸWHE TỌN MẸ | LEVITIKU 8-9
“Dona Jehovah Tọn”
it-1-F 1189 huk. 2
Aṣẹ-Ninamẹ
Mose degbena Aalọn gọna visunnu Aalọn tọn lẹ, yèdọ Nadabi, Abihu, Eleazali po Itamali po nado lawu to basia gànvẹẹ tọn he to awánu lọ kọ̀n, enẹgodo e do awù vonọtaun yẹwhenọ daho tọn lẹ na Aalọn. (Sọh 3:2, 3) Nusisọ́ whanpẹnọ Aalọn tọn dohia dọ otẹn he mẹ e yin zizedo tindo yẹyi taun bo bẹ azọngban susu hẹn. Enẹgodo, Mose kọ̀n amì do gòhọtúntún lọ po núzinzan voovo etọn lẹpo po ji bo hẹn yé zun wiwe, podọ nudopolọ wẹ e bayi na agbà avọ́nunina mimẹ̀ tọn lọ gọna basia lọ po nuyizan etọn lẹ po. Ehe dohia dọ yé ko yin hinhẹn zun wiwe bosọ yin didedovo na sinsẹ̀nzọn Jiwheyẹwhe tọn kẹdẹ. Bọdo enẹ go, Mose kọ̀n amì do ota na Aalọn bo yiamisisadode e.—Le 8:6-12; Eks 30:22-33; Slm 133:2.
it-1-F 1190 huk. 3
Aṣẹ-Ninamẹ
Na yẹwhenọduta lọ ko yin didoai bo mọ aṣẹ yí to gigọ́ mẹ wutu, to azán ṣinatọ̀ntọ gbè, yẹwhenọ lọ lẹ basi avọ́sinsan whla tintan (bọ e ma biọ dọ Mose ni gọalọna yé). Yé basi ovẹsè na akọta Islaeli tọn bo hẹn yé zun wiwe, e ma yin na yé yin ylandonọ kẹdẹ wutu gba, ṣigba na yé ṣẹṣẹ vẹtoli bo basi oyìnvu sika tọn, he zọ́n bọ Jehovah gblehomẹ do yé sinsinyẹn. (Le 9:1-7; Eks 32:1-10) To whenue yẹwhenọ yọyọ ehelẹ ko basi avọ́sinsan yetọn tintan godo, Jehovah do miyọ́n de hlan nado dohia dọ emi kẹalọyi yẹwhenọduta yetọn. Podọ, matin ayihaawe, dòtin aslọ tọn he to aga na gòhọtúntún lọ mẹ wẹ miyọ́n lọ wá sọn bo fiọ avọ́sinsan he pò to agbà lọ ji.—Le 9:23, 24.
w19.11 23 huk. 13
Nuplọnmẹ Delẹ sọn Owe Levitiku Tọn Mẹ
13 Nuplọnmẹ ẹnẹtọ: Jehovah to didona adà aigba ji tọn titobasinanu etọn tọn. Lẹnnupọndo nuhe jọ to 1512 J.W.M. ji, to whenue gòhọtúntún lọ yin pinpẹ́n to Osó Sinai kọ̀n. (Eks. 40:17) Mose deanana hùnwhẹ de he whenu Aalọn po visunnu etọn lẹ po yin dide taidi yẹwhenọ lẹ te. Akọta Islaeli tọn pli dopọ nado pọ́n lehe yẹwhenọ lẹ to avọ́sinsan kanlin tọn yetọn tintan lẹ basi do. (Lev. 9:1-5) Nawẹ Jehovah dohia dọ emi kẹalọyi yẹwhenọduta he ṣẹṣẹ yin didoai lọ gbọn? Dile Aalọn po Mose po to didona akọta lọ, Jehovah do miyọ́n de hlan sọn olọn mẹ nado fiọ avọ́sinsan he pò to agbà lọ ji.—Hia Levitiku 9:23, 24.
Onú Sisosiso Gbigbọmẹ Tọn Lẹ
w14 15/11 9 huk. 6
Nuhewutu Mí Dona Yin Wiwe
6 Nubiọtomẹsi lọ dọ yẹwhenọ Islaeli tọn lẹ ni yin wiwe to agbasa-liho tindo zẹẹmẹ nujọnu tọn na omẹ Jehovah tọn lẹ to egbehe. Mẹhe mí nọ plọn Biblu hẹ lẹ nọ saba doayi e go dọ nọtẹn sinsẹ̀n-bibasi tọn mítọn lẹ nọ tin to wiweji, podọ mí nọ lawu ganji bọ nusisọ́ mítọn nọ wleyẹyi. Mọdopolọ, wiwejininọ yẹwhenọ lẹ tọn gọalọna mí nado mọnukunnujẹemẹ dọ mẹdepope he hẹ osó yiaga sinsẹ̀n-bibasi tọn Jehovah tọn ji dona tindo “ayiha wiwe.” (Hia Psalm 24:3, 4; Isa. 2:2, 3.) Nado basi sinsẹ̀nzọn wiwe hlan Jiwheyẹwhe, mí dona hẹn ayiha, ahun, po agbasa mítọn po do wiweji. Ehe biọ dọ mí ni nọ gbeje míde pọ́n whẹwhẹ, podọ mọwiwà nọ gọalọna mí to whedelẹnu nado mọdọ mí dona basi diọdo nujọnu tọn lẹ nado yin wiwe. (2 Kọl. 13:5) Di apajlẹ, eyin mẹhe ko yí baptẹm de nọ desọn ojlo mẹ nado pọ́n yẹdide fẹnnuwiwa tọn lẹ, e dona kanse ede dọ, ‘Be n’to dee dohia taidi omẹ wiwe ya?’ Enẹgodo, e dona dín alọgọ nado doalọtena aṣa gblezọn enẹ.—Jak. 5:14.
it-2-F 310 huk. 5
Mose
Jiwheyẹwhe de Mose taidi whẹgbọtọ na alẹnu Osẹ́n tọn lọ he yin bibasi hẹ Islaelivi lẹ, yèdọ lẹblanulọkẹyi vonọtaun de he Jiwheyẹwhe ma ko na gbẹtọvi de, adavo Jesu Klisti, he yin Whẹgbọtọ alẹnu yọyọ lọ tọn. Mose húnhún ohùn kanlin he yin yíyí do sanvọ́ lọ tọn do owe alẹnu tọn lọ go bo do Jehovah hia taidi adà alẹnu lọ tọn dopo podọ akọta lọ (matin ayihaawe sunnu mẹho akọta lọ tọn lẹ he ze afọ yetọn dai) taidi adà awetọ alẹnu lọ tọn. Mose hia owe alẹnu tọn lọ na akọta lọ bọ yé gblọn dọ, “Nuhe Jehovah ko dọ lẹpo wẹ míwlẹ wleawufo nado wà bo nasọ nọ setonuna.” (Eks 24:3-8; Heb 9:19) Taidi whẹgbọtọ akọta lọ tọn, Mose deanana gòhọtúntún lọ gbigbá po awuwiwlena nuyizan etọn lẹ po sọgbe hẹ anademẹ he Jiwheyẹwhe na ẹn lẹ. Ewọ na aṣẹ yẹwhenọ lọ lẹ bo ze yé do otẹn azọngban tọn mẹ. Gbọnvona enẹ, e yí amì he yin awuwlena po onú vonọtaun lẹ po do hẹn gòhọtúntún lọ zun wiwe, bosọ klan Aalọn yẹwhenọ daho lọ do wiwe. Enẹgodo, Mose penukundo avọ́sinsan tintan yẹwhenọduta he ṣẹṣẹ yin didoai lọ tọn go.—Eks weta 25-29; Le weta 8, 9.