APOTIN NUPINPLỌN TỌN 19B
Osin He to Víví de Wá Lẹzun Tọ̀sisa!
Ezekiẹli hodo osin he to víví sọn fiwiwe Jehovah tọn mẹ de podọ gbọn azọ́njiawu dali osin lọ wá lẹzun tọ̀sisa he siso to nudi kilomẹtlu dopo daa poun godo! To adà tọ̀sisa lọ tọn lẹ tó, e mọ atin daho delẹ he tin na núdùdù po azọ̀nhẹngbọ po. Etẹwẹ ehe lẹpo zẹẹmẹdo?
Tọ̀sisa lọ Nọ Hẹn Dona lẹ Wá
TO HOHOWHENU: Tlolo he kanlinmọ lọ lẹ lẹkọwa otò yetọn mẹ, dona lẹ sà jẹ yé dè dile yé to mahẹ tindo to sinsẹ̀n-bibasi wiwe-ṣeke he yin hinhẹngọwa lọ mẹ to tẹmpli mẹ
TO EGBEZANGBE: To 1919 sinsẹ̀n-bibasi wiwe-ṣeke yin hinhẹngọwa, podọ gbọnmọ dali dona gbigbọmẹ tọn he mayọnjlẹ lẹ sà jẹ devizọnwatọ nugbonọ Jiwheyẹwhe tọn lẹ dè.
TO SỌGODO: To awhàn Amagẹdọni tọn godo, dona he sà sọn Jehovah dè lẹ na hẹn ale wá to agbasa-liho podọ to gbigbọ-liho
Osin Ogbẹ̀-Namẹ Tọn
TO HOHOWHENU: Jehovah kọ̀n dona susu do omẹ etọn he setonu lẹ ji, dile etlẹ yindọ sọha yetọn fọ́n bo to jijideji, podọ ehe hẹn yé nado jẹ adọkun to gbigbọ-liho
TO EGBEZANGBE: To paladisi gbigbọmẹ tọn he fọ́n bo to gbigblodeji lọ mẹ, mẹsusu wẹ to alemọyi sọn asisa dona gbigbọmẹ tọn Jehovah tọn he fọ́n bo to jijideji lọ mẹ podọ yé ko yin hinhẹngọwa ogbẹ̀ to gbigbọ-liho
TO SỌGODO: Livi susu mẹhe yin finfọnsọnku lẹ tọn na kọnawudopọ hẹ mẹhe lùn Amagẹdọni tọ́n lẹ, podọ Jehovah na dona mẹlẹpo susugege
Atin lẹ Na Núdùdù po Azọ̀nhẹngbọ Po
TO HOHOWHENU: To gbigbọ-liho, Jehovah na núdùdù nugbonọ etọn lẹ to aigba yetọn he yin hinhẹngọwa lọ ji; e sọ hẹn azọ̀n gbigbọmẹ tọn he yé ko jẹ na ojlẹ dindẹn lẹ gbọ na yé
TO EGBEZANGBE: Núdùdù gbigbọmẹ tọn susu to alọgọna gbẹtọ lẹ nado nọla na azọ̀n gbigbọmẹ tọn he gbayipe to egbehe lẹ bo vò sọn huvẹ gbigbọmẹ tọn si
TO SỌGODO: Klisti po gandutọgbẹ́ 144 000 etọn lẹ po na gọalọna gbẹtọvi tonusetọ lẹpo nado jẹ pipé kọ̀n bo duvivi agbasalilo tọn bo nọ jogún-jogún kakadoi!