Alọdlẹndonu Nuplọnwe Opli Gbẹzan po Lizọnyizọn po Tọn
3-9 JANVIER
NUHỌAKUẸ LẸ SỌN OHÓ JIWHEYẸWHE TỌN MẸ | WHẸDATỌ LẸ 15-16
“Pàdudu Ylan Taun!”
w12 15/4 9 huk. 4
Nugbonọ-Mayin—Dopo to Ohia Azán Godo Tọn lẹ Tọn Mẹ!
4 Jẹnukọn whẹ́, mì gbọ mí ni lẹnnupọndo nuyiwa yọnnu ayiha gigẹdẹnọ lọ, Dẹlila, mẹhe Whẹdatọ Samsọni yiwanna tọn ji. Samsọni jlo nado deanana awhànfunfun sọta Filistinu lẹ do omẹ Jiwheyẹwhe tọn lẹ tamẹ. Vlavo na ogán Filistinu lẹ tọn atọ́n lọ lẹ yọnẹn dọ Dẹlila ma tindo owanyi nujọnu tọn na Samsọni wutu, yé dopà ahọsumẹ daho de tọn na ẹn nado yọ́n aṣli huhlọn daho Samsọni tọn, na yé nido sọgan hù i. Nukunkẹn Dẹlila tọn whàn ẹn nado kẹalọyi nuzedonukọnnamẹ lọ, ṣigba vivẹnudido etọn nado yọ́n aṣli Samsọni tọn gboawupo whla atọ̀n. E zindonukọn nado “yí ohó etọn lẹ do [to] magbọjẹ do na ẹn egbesọegbesọ, bosọ to vẹvẹna ẹn.” To godo mẹ, “homẹ [Samsọni tọn] gble jẹ okú.” Enẹwutu, e dọna ẹn dọ oda emitọn lẹ ma yin pipà pọ́n gbede, podọ emi na hẹn huhlọn emitọn bu eyin emi pada. To whenue Dẹlila yọ́n aṣli Samsọni tọn, e hẹn ẹn nado damlọn do kligonu etọn lẹ ji bo ylọ dawe de biọ whégbè nado wá pada na ẹn, podọ e jo e na kẹntọ etọn lẹ. (Whẹ. 16:4, 5, 15-21) Lehe nuyiwa etọn ylan do sọ! Nukunkẹn wẹ whàn Dẹlila nado de mẹhe yiwanna ẹn lọ hia.
w05 15/1 27 huk. 4
Nuagokun lẹ sọn Owe Whẹdatọ Tọn Mẹ
14:16, 17; 16:16. Kọgbidina mẹdevo gbọn avi po nutlọ po dali sọgan hẹn haṣinṣan de gble.—Howhinwhẹn lẹ 19:13; 21:19.
w12 15/4 11-12 huk. 15-16
Nugbonọ-Mayin—Dopo to Ohia Azán Godo Tọn lẹ Tọn Mẹ!
15 Nawẹ mẹhe ko wlealọ lẹ sọgan gbọṣi nugbonọ-yinyin mẹ na alọwlemẹ yetọn gbọn? Ohó Jiwheyẹwhe tọn dọmọ: “Jaya hẹ asi [kavi asu] ovu whenu towe tọn” podọ, “Nọ yí homẹhunhun do nọhẹ asi [kavi asu] towe he hiẹ yiwanna.” (Howh. 5:18; Yẹwh. 9:9) Dile yé omẹ awe lẹ to yọnhopo, yé dona nọ ‘yí ahundopo’ do nọgodona yenọzo to agbasa-liho podọ to numọtolanmẹ-liho. Ehe zẹẹmẹdo dọ yé dona nọ na ayidonugo ode awetọ, yí whenu zan hẹ ode awetọ bosọ nọ dọnsẹpọ ode awetọ. Yé dona wà nuhe go yé pé lẹpo nado basi hihọ́na alọwle yetọn gọna haṣinṣan yetọn hẹ Jehovah. Enẹwutu, asu po asi po lẹ dona nọ plọn Biblu dopọ, nọ tindo mahẹ gbesisọ tọn to lizọnyizọn lọ mẹ dopọ bosọ nọ hodẹ̀ dopọ nado mọ dona Jehovah tọn.
GBỌṢI NUGBONỌ-YINYIN MẸ NA JEHOVAH
16 Hagbẹ agun lọ tọn delẹ ko wà ylando sinsinyẹn bo ko yin wiwọhẹ “sinsinyẹn, na yé nido sọgan pegan to yise mẹ.” (Titu 1:13) Nuyiwa mẹdevo lẹ tọn ko biọ dọ yé ni yin didesẹ sọn agun mẹ. Mẹplọnlọ lọ gọalọna “mẹhe e ko yin yíyí do plọn lẹ” nado gọ̀ jẹgangan to gbigbọ-liho. (Heb. 12:11) Etẹwẹ dona yin nuyiwa mítọn eyin hẹnnumẹ kavi họntọn vivẹ́ de yin didesẹ sọn agun mẹ? To ninọmẹ mọnkọtọn mẹ, e ma yin nugbonọ-yinyin mítọn na mẹlọ wẹ nọ yin whiwhlepọn, ṣigba nugbonọ-yinyin mítọn na Jiwheyẹwhe. Jehovah nọ ze nukun dai nado pọ́n eyin mí na yinuwa sọgbe hẹ gbedide etọn ma nado tindo kanṣiṣa hẹ mẹdepope he yin didesẹ sọn agun mẹ.—Hia 1 Kọlintinu lẹ 5:11-13.
Onú Sisosiso Gbigbọmẹ Tọn Lẹ
w05 15/3 27 huk. 6
Samsọni Gbawhàn Gbọn Huhlọn Jehovah Tọn Gblamẹ!
Samsọni ze ayidonugo etọn lẹpo do yanwle etọn ji, yèdọ nado funawhàn sọta Filistininu lẹ. Owhé galọtọ de tọn gbè ninọ̀ to Gaza yin to lẹndai lọ mẹ nado hoavùn sọta kẹntọ Jiwheyẹwhe tọn lẹ. Samsọni tindo nuhudo adọtẹn de tọn to ozán lọ mẹ to tòdaho kẹntọ tọn mẹ, podọ enẹ sọgan yin mimọ to owhé galọtọ de tọn gbè. Samsọni ma to linlẹn nado doalọ walọ mawé de mẹ gba. E tlọ́n owhé yọnnu lọ tọn gbè to zánhomẹ, bo hẹn họngbo tòdaho lọ tọn lẹ po dòtin awe lẹ po go, bosọ hẹn yé yì osó de ji aga sẹpọ Heblọni, he dẹn do Gaza sọ kilomẹtlu 60 nkọtọn. Jiwheyẹwhe kẹalọyi nuyiwa ehe bo na ẹn huhlọn nado basi i.—Whẹdatọ 16:1-3.
10-16 JANVIER
NUHỌAKUẸ LẸ SỌN OHÓ JIWHEYẸWHE TỌN MẸ | WHẸDATỌ LẸ 17-19
“Tolivivẹ Nọ Hẹn Nuhahun Wá”
it-2-F 278 huk. 6
Mika
1. Sunnu de sọn hẹnnu Eflaimi tọn mẹ. Gbedide ṣinatọ̀ntọ to Gbedide Ao lẹ mẹ gbẹ́ ajojijẹ (Eks 20:15), ganṣo Mika fìn fataka-kuẹ 1 100 do onọ̀ etọn. E wá yigbe dọ emi wẹ fìn akuẹ lọ bo gọ̀jó bọ onọ̀ etọn dọmọ: “Yẹn dona klan fataka lọ do wiwe na Jehovah do visunnu ṣie tamẹ nado yí i do basi boṣiọ pipà de po boṣiọ kinkọ̀n de po. Todin, yẹn gọ̀ ẹ jo na we.” Enẹgodo, onọ̀ etọn de fataka-kuẹ 200 sọn e mẹ bo bẹ jo na ayátọ de bọ ewọ sọ basi “boṣiọ pipà de po boṣiọ kinkọ̀n de po.” Boṣiọ lọ lẹ yin zizedo owhé Mika tọn gbè. Na Mika tindo “ohọ̀ de na yẹwhe lẹ” wutu, e basi efọdi de po boṣiọ tẹlafimi tọn lẹ po bo na aṣẹ dopo to visunnu etọn lẹ mẹ nado nọ sẹ̀n taidi yẹwhenọ de na ẹn. Eyin Mika tlẹ lẹndọ gigo Jehovah tọn dín wẹ emi te, nuhe e wà lọ ylan taun, na Osẹ́n lọ gbẹ́ boṣiọ-sinsẹ̀n. (Eks 20:4-6) Gbọnvona enẹ, nuhe e wà dohia dọ e vlẹ gòhọtúntún Jehovah tọn po yẹwhenọduta etọn po. (Whẹ 17:1-6; De 12:1-14) Jonatani he yin Levinu jọja bo wá sọn kúnkan Gẹlṣọmi he yin visunnu Mose tọn mẹ wẹ Mika wá yí do whégbè bo haya ẹ nado sẹ̀n di yẹwhenọ etọn. (Whẹ 18:4, 30) Homẹ Mika tọn hùn taun bọ e dọmọ: “Todin, yẹn yọnẹn dọ Jehovah na wà dagbe na mi, na Levinu lọ ko lẹzun yẹwhenọ de na mi.” Amọ́, ede klọ wẹ e te. (Whẹ 17:7-13) Na nugbo tọn, Mika tlọ ede pete wẹ, na Jonatani ma wá sọn kúnkan Aalọn tọn mẹ bo ma pegan nado yin yẹwhenọ.—Sọh 3:10.
it-2-F 278 huk. 8
Mika
Ojlẹ kleun de godo, Mika po sunnu delẹ po dómọna Daninu lẹ. Whenue yé plá yé bọ Daninu lẹ kanse Mika nuhe to wiwà ẹ, e gblọn dọmọ: “Mìwlẹ ko bẹ yẹwhe ṣie he yẹn basi lẹ bosọ plan yẹwhenọ lọ lọsu jei. Etẹwẹ pò na mi?” Whenẹnu wẹ Daninu lẹ dọna ẹn dọ emi gán hù i eyin e ma tlọ́n godo emitọn bo gbọ awhádo do emi ji. Mika mọdọ Daninu lẹ tọn hú omẹ emitọn lẹ tọn bo gbọ bo lẹkọyi whé. (Whẹ 18:22-26) Enẹgodo, Daninu lẹ hù mẹhe nọ nọ̀ Laiṣi lẹ bo mẹ̀ tòdaho lọ, podọ finẹ wẹ yé wá do tòdaho Dani tọn ai do. Jonatani po visunnu etọn lẹ po lẹzun yẹwhenọ na Daninu lẹ. Daninu lẹ “ze boṣiọ pipà he Mika ko basi lọ tùnte, bọ e gbọṣi finẹ to ojlẹ he ohọ̀ Jiwheyẹwhe nugbo lọ tọn [enẹ wẹ gòhọtúntún lọ] tin to Ṣilo lẹpo gblamẹ.”—Whẹ 18:27-31.
Onú Sisosiso Gbigbọmẹ Tọn Lẹ
w15 15/12 10 huk. 6
Lẹdogbedevomẹ Ohó Jiwheyẹwhe Tọn He to Ogbẹ̀
6 Kunnudenu he dohia dọ yinkọ Jiwheyẹwhe tọn dona tin to Biblu mẹ lẹ gbẹ́ to jijẹ e ji. To Lẹdogbedevomẹ Aihọn Yọyọ Tọn he yin didetọn to 2013 mẹ, yinkọ lọ sọawuhia whla 7 216, na yinkọ lọ yin yiyidogọ to wefọ 6 delẹ mẹ he mẹ e ma te dai to zinjẹgbonu 1 984 tọn mẹ. Atọ́n to wefọ ehelẹ mẹ wẹ 1 Samuẹli 2:25; 6:3; 10:26; 23:14, 16. Wefọ ehelẹ yin vivọjlado titengbe na yinkọ lọ sọawuhia to wefọ dopolọ lẹ mẹ to Owe-Hihá Ohù Kúkú tọn lẹ mẹ, yèdọ kandai delẹ he ko tin na nuhe hugan owhe 1 000 jẹnukọnna kandai Heblugbe tọn Massorète lẹ tọn, he yin yiyizan dai nado wleawuna Lẹdogbedevomẹ Aihọn Yọyọ Tọn. Podọ, wefọ ṣidopotọ he mẹ yinkọ lọ yin vivọjlado te wẹ Whẹdatọ lẹ 19:18, na dodinnanu he yin bibasi dogọ to alọnuwe hohowhenu tọn lẹ mẹ wutu.
17-23 JANVIER
NUHỌAKUẸ LẸ SỌN OHÓ JIWHEYẸWHE TỌN MẸ | WHẸDATỌ LẸ 20-21
“Nọ Lẹhlan Jehovah Whepoponu”
w11 15/9 32 huk. 2
Be Hiẹ Sọgan Yinuwa Taidi Finehasi to Nuhahun lẹ Nukọn Ya?
To whenuena sunnu Gibea tọn lẹ, yèdọ mẹhe wá sọn whẹndo Bẹnjamini tọn mẹ, zanhẹ asimọwhlá Levinu de tọn gánnugánnu bosọ hù i, whẹndo he pò lẹ tọ́nawhàn Bẹnjamininu lẹ. (Whẹ. 20:1-11) Yé biọ alọgọ Jehovah tọn to odẹ̀ mẹ jẹnukọnna awhàn lọ, ṣogan whla awe wẹ yé ṣíawhàn, bọ awhànfuntọ yetọn susu wẹ sọ yin hùhù. (Whẹ. 20:14-25) Be yé na wá tadona lọ kọ̀n dọ odẹ̀ yetọn ma wazọ́n wẹ ya? Be nugbonugbo homẹ Jehovah tọn hùn do yé go, to whenue yé yinuwa sọta ylanwiwa lọ ya?
w05 15/1 27 huk. 8
Nuagokun lẹ sọn Owe Whẹdatọ Tọn Mẹ
20:17-48—Naegbọn Jehovah dike Benjamininu lẹ ni gbawhàn whẹndo he po lẹ tọn whla awe, dile etlẹ yindọ Benjamininu lẹ dona yin yasana? Jehovah dike Benjamininu lẹ ni hù mẹsusu to whẹndo nugbonọ lọ lẹ mẹ to tintan whenu, nado whlé gbemima yetọn nado de ylando sẹ sọn Islaeli mẹ pọ́n.
w11 15/9 32 huk. 4
Be Hiẹ Sọgan Yinuwa Taidi Finehasi to Nuhahun lẹ Nukọn Ya?
Etẹwẹ nujijọ enẹ plọn mí? To agun mẹ, nuhahun delẹ sọgan gbọṣi aimẹ na ojlẹ dindẹn mahopọnna vivẹnu vẹkuvẹku mẹho lẹ tọn po odẹ̀ yetọn na alọgọ Jehovah tọn po. Eyin ehe wá jọ, mẹho lẹ na wà dagbe nado nọ flin hogbe Jesu tọn lẹ dọmọ: “Mì to bibiọ zọnmii [kavi to dẹ̀ho zọnmii], e nasọ yin nina mì; mì to dindin zọnmii, mì nasọ mọ; mì to họ̀nhúhú zọnmii, e nasọ yin hùnhùn hlan mì.” (Luku 11:9) Eyin e tlẹ taidi dọ gblọndo odẹ̀ de tọn to gbàndọn, mẹho lẹ sọgan deji dọ Jehovah na na gblọndo to ojlẹ sisọ etọn mẹ.
Onú Sisosiso Gbigbọmẹ Tọn Lẹ
w14-F 1/5 11 huk. 4-6
Be Hiẹ Yọnẹn Ya?
To hohowhenu, nawẹ yè nọ zan akòtopẹ́ to awhàngbenu gbọn?
Akòtopẹ́ wẹ Davidi do hù Goliati gángánsu lọ. E di dọ whenue Davidi to aflanmẹ bo yin lẹngbọhọtọ wẹ e plọn awhànfunnu ehe zinzan.—1 Samuẹli 17:40-50.
To ojlẹ Biblu tọn lẹ mẹ, akòtopẹ́ nọ sọawuhia to anazọ́n Egiptinu po Asilianu lẹ po tọn mẹ. Nado bayi awhànfunnu ehe, yè nọ sin okàn awe do tónu na ayú kavi avọ̀ flala de. Mẹhe jlo na yìn akòtopẹ́ lọ nọ ze agán he dídí kavi agán loboto de do ayú kavi avọ̀ lọ mẹ. Agán lọ nọ gblo na santimẹtlu 5 yì 7 nkọ bo nọ pẹ̀n na glamu 250 nkọ. Enẹgodo, mẹlọ nọ lilẹ́ akòtopẹ́ lọ gbọn ota na ede po huhlọn po bo nọ wá jo dopo to okàn lọ lẹ mẹ do, bọ agán lọ nọ tọ́n sọn akòtopẹ́ lọ mẹ po awuyiya po bo nọ jẹ fie yè jlo na yìn do pẹpẹ.
Agán susu he yè yí akòtopẹ́ do yìn to awhàn whenu wẹ yè mọ to odò glọ to otò Moyẹn-Orient tọn lẹ mẹ. E taidi dọ awhànfuntọ he yọ́n-azọ́n-ẹn lẹ nọ yìn akòtopẹ́ bọ agán yetọn nọ bayi kilomẹtlu 160 yì 240 to gànhiho dopo mẹ. Dile etlẹ yindọ weyọnẹntọ lẹ ma kọngbedopọ dọ akòtopẹ́ nọ yá sọ ogá, e họnwun dọ awe lẹpo wẹ nọ hùmẹ.—Whẹdatọ lẹ 20:16.
24-30 JANVIER
NUHỌAKUẸ LẸ SỌN OHÓ JIWHEYẸWHE TỌN MẸ | LUTI 1-2
“Nọ Doafọna Owanyi Nugbo”
w16.02 14 huk. 5
Hodo Apajlẹ Họntọn Vivẹ́ Jehovah Tọn lẹ Tọn
5 E bọawu dọ Luti ni ko lẹndọ emi tindo whẹndo de to Moabi—yèdọ onọ̀ de po hẹnnumẹ devo lẹ po he na yí emi taidi asuṣiọsi jọja de bosọ penukundo emi go. Moabi-vi jiji wẹ. E ko jẹakọ hẹ aṣa otò lọ tọn, ogbè etọn po mẹhe nọ nọ̀ finẹ lẹ po. Naomi ma sọgan dopà onú enẹlẹ tọn na ẹn to Bẹtlẹhẹm. Abajọ e do na ayinamẹ Luti nado gbọṣi Moabi. Naomi mọdọ emi ma sọgan mọ asu kavi owhé he gbè ovisi emitọn lẹ na nọ na yé. Etẹwẹ Luti na wá? Doayi vogbingbọn he tin to ewọ po Olpa po ṣẹnṣẹn go, mẹhe ‘gọ̀ do godo do omẹ etọn lẹ dè, podọ do yẹwhe etọn lẹ dè.’ (Luti 1:9-15) Be Luti jlo na lẹkọyi yẹwhe lalo lẹ kọ̀n to omẹ etọn lẹ dè wẹ ya? Paali.
w16.02 14 huk. 6
Hodo Apajlẹ Họntọn Vivẹ́ Jehovah Tọn lẹ Tọn
6 E taidi dọ Luti wá plọnnu gando Jehovah Jiwheyẹwhe go, sọn asu matintọ etọn dè kavi sọn Naomi dè. Jehovah ma taidi yẹwhe Moabi tọn lẹ. Luti yọnẹn dọ Jehovah wẹ e jẹ dọ emi ni yiwanna bosọ basi sinsẹ̀n hlan. Ṣigba, oyọnẹn enẹ tintindo kẹdẹ ma ko pé. Luti dona basi nudide. Be e na de Jehovah taidi Jiwheyẹwhe etọn ya? Luti basi nudide nuyọnẹn tọn de. E dọna Naomi dọmọ: “Omẹ towe lẹ wẹ na yin omẹ ṣie lẹ, Jiwheyẹwhe towe Jiwheyẹwhe ṣie.” (Luti 1:16) Owanyi he Luti tindo na Naomi whànmẹ taun, ṣi-gba nuhe jẹna ayidego hugan wẹ owanyi he e tindo na Jehovah. To nukọn mẹ, Boazi pà Luti, na e dín fibẹtado to awà Jehovah tọn glọ wutu. (Hia Luti 2:12.) Enẹ sọgan flin mí ohẹ̀vi de he nọ wá dín hihọ́ to awà mẹjitọ huhlọnnọ podọ hihọ́-basinamẹtọ de tọn lẹ glọ. (Ps. 36:7; 91:1-4) Mẹjitọ mọnkọtọn de wẹ Jehovah lẹzun na Luti. Ewọ dona ẹn na yise etọn wutu, podọ whẹwhinwhẹ́n depope ma tin dọ nudide he e basi ni vẹna ẹn.
Onú Sisosiso Gbigbọmẹ Tọn Lẹ
w05 1/3 27 huk. 1
Nuagokun lẹ sọn Owe Luti Tọn Mẹ
1:13, 21—Be Jehovah hẹn awuvẹ wá gbẹzan Naomi tọn mẹ bosọ bianukunna ẹn wẹ ya? Lala, podọ Naomi ma sawhẹ oylan depope tọn dokọna Jiwheyẹwhe gba. Ṣigba to pọndohlanmẹ na nuhe jọ do e go lẹpo, e lẹndọ Jehovah ko gblewhẹdo emi. Apọṣi i bọ e jẹflumẹ. Humọ, to ojlẹ enẹlẹ mẹ, sinsẹ́n adọ̀mẹ tọn nọ yin pinpọnhlan taidi dona de sọn Jiwheyẹwhe dè bọ wẹnsinọ-yinyin nọ yin ohia dẹhodomẹ tọn. To whenuena e yindọ Naomi ma tindo ovivi depope, bọ visunnu awe etọn lẹ sọ kú, e sọgan ko mọdọ e jẹ nado lẹndọ Jehovah ko dowinyan emi.
AWUWIWLENA LIZỌNYIZỌN KUNNUDEGBE TỌN
ia 43-44 huk. 5-9
“Yọnnu Walọ Dagbenọ De”
5 To whenue Luti ko tùn bale lọ bo hò e pli godo, e mọdọ e yì ojlẹnu ẹfa bale tọn dopo. Agbàn etọn sọgan ko pẹ̀n sọ kilo 14 nkọ! Vlavo e sọgan ko blá ẹ do avọ̀ mẹ bo didá ẹ do ota, bosọ wleali dedo Bẹtlẹhẹm dile zinvlu to dido.—Luti 2:17.
6 Homẹ Naomi tọn hùn taun to whenue e mọ ovisi yiwanna etọn, podọ e sọgan ko paṣa ẹ dile e mọ agbàn pinpẹn bale tọn he Luti hẹn gọ̀. Luti sọ hẹn núdùdù he Boazi na azọ́nwatọ etọn lẹ, ehe yé na ẹn sọn e mẹ bọ e dupò, podọ yé omẹ awe lẹ dù núdùdù kleun enẹ. Todin, Naomi kanse e dọmọ: “Fie wẹ hiẹ wéwélu te to egbé? Podọ fie wẹ hiẹ wazọ́n te? Donanọ ewọ yin he [doayi gowe].” (Luti 2:19) Naomi nọ doayinugo taun; e mọdọ agbàn Luti tọn ma sọgan pẹ̀n sọmọ eyin mẹde ma ko doayi asuṣiọsi jọja ehe go bo yinuwa hẹ ẹ po homẹdagbe po.
7 Yé omẹ awe lẹ jẹ hodọdopọ ji, podọ Luti dọ lehe Boazi do homẹdagbe hia ewọ do na Naomi. Ehe yinuwado Naomi ji bọ e dọmọ: “Donanọ ewọ yin sọn OKLUNỌ dè, mẹhe ma jo [dagbewanyi] etọn do dó omẹ to ogbẹ̀ go podọ do oṣiọ go.” (Luti 2:19, 20) Ewọ mọdọ Jehovah dè wẹ homẹdagbe Boazi tọn wá sọn, yèdọ mẹhe nọ whàn devizọnwatọ etọn lẹ nado nọ tlúalọ bosọ dopagbe nado suahọ omẹ etọn lẹ, na gbigbọ homẹdagbe tọn he yé nọ dohia.—Hia Howhinwhẹn lẹ 19:17.
8 Naomi na tuli Luti nado kẹalọyi ayinamẹ he Boazi na ẹn nado zindonukọn nado nọ wéwélu to ogle etọn mẹ podọ nado nọ nọ̀ deviyọnnu he wá sọn owhé etọn gbè lẹ dè, na sunnu he to jinukun gbẹ̀n lẹ nikaa dotukla ẹ. Luti kẹalọyi ayinamẹ lọ. Podọ “ewọ sọ tin to asu-nọ̀ etọn dè.” (Luti 2:22, 23) Hogbe enẹlẹ do jẹhẹnu ayidego tọn Luti tọn hia whladopo dogọ, enẹ wẹ owanyi nugbo. Apajlẹ Luti tọn sọgan whàn mí nado kanse míde eyin mí nọ na sisi kanṣiṣa whẹndo tọn, bo nọ yí nugbonọ-yinyin do nọgodona mẹyiwanna mítọn lẹ bosọ nọ gọalọna yé dile e jẹ do. Jehovah nọ doayi owanyi nugbo mọnkọtọn go to whelẹponu.
9 Be Luti po Naomi po ma yin whẹndo de wẹ ya? Mẹdelẹ dọ dọ whẹpo whẹndo nujọnu tọn de nado wá aimẹ, e dona bẹ asu, asi, visunnu, viyọnnu, mẹjitọ daho lẹ po mọmọ po sọyi hẹn. Ṣigba, apajlẹ Naomi po Luti po tọn dohia dọ omẹ awe sọgan yin whẹndo de eyin yé nọ do mẹtọnhopọn, homẹdagbe po owanyi po hia ode awetọ. Be hiẹ yọ́n pinpẹn whẹndo towe tọn ya? Jesu flinnu hodotọ etọn lẹ dọ agun Klistiani tọn tlẹ sọgan yin whẹndo na mẹhe ma tindo whẹndo lẹ.—Malku 10:29, 30.
31 JANVIER–6 FÉVRIER
NUHỌAKUẸ LẸ SỌN OHÓ JIWHEYẸWHE TỌN MẸ | LUTI 3-4
“Wleawuna Yinkọ Dagbe Bosọ Hẹn E Go”
ia 47 huk. 18
“Yọnnu Walọ Dagbenọ De”
8 Todin, Boazi dọho, podọ matin ayihaawe, kọnugbè fifá etọn na ko miọnhomẹna Luti. Boazi domọ: “Donanọ hiẹ yin sọn OKLUNỌ dè, deviyọnnu ṣie: hiẹ ko do [dagbewanyi] godo mẹ tọn hia hú whẹwhẹwhenu tọn, sọle hiẹ ma hodo yọpọ sunnu lẹ wamọnọ kavi adọkunnọ.” (Luti 3:10) Tofi, hogbe lọ “whẹwhẹwhenu tọn” dlẹnalọdo owanyi nugbo he Luti dohia nado hodo Naomi wá Islaeli bo penukundego. Podọ hogbe lọ “godo mẹ tọn” dlẹnalọdo dehe e to didohia to alọnu. Boazi dohia to hodidọ etọn mẹ dọ yọnnu jọja de taidi Luti sọgan ko dín asu na ede to jọja sunnu lẹ mẹ, vlavo adọkunnọ kavi hẹntọnọ de. Kakatimọ, ewọ jlo nado wà dagbe na Naomi podọ na asu Naomi tọn he ko yin matintọ lọ, enẹ wẹ nado hẹn yinkọ dawe he ko kú lọ tọn dote to otò etọn mẹ. E ma vẹawu nado yọ́n nuhewutu walọ ṣejannabi matindo tọn he jọja yọnnu ehe dohia do yinuwado Boazi ji.
ia 48 huk. 21
“Yọnnu Walọ Dagbenọ De”
21 Ayajẹnu wẹ e na ko yin na Luti nado lẹnnupọndo nuhe Boazi dọna ẹn ji dọ gbẹtọ lẹpo wẹ yọnẹn dọ ewọ yin “yọnnu walọ dagbenọ de”! Matin ayihaawe, jejejininọ etọn nado yọ́n Jehovah bo sẹ̀n ẹn wẹ zọ́n bọ e do tindo yinkọ dagbe enẹ. E ko do homẹdagbe po mẹtọnhopọn po hia Naomi po omẹ etọn lẹ po, bo desọn ojlo mẹ nado diọada sọgbe hẹ aṣa po aliho nuyiwa tọn he ewọ ma jẹakọ hẹ lẹ po. Eyin mí hodo apajlẹ yise Luti tọn, mí na nọ tẹnpọn nado na sisi mẹdevo lẹ gọna aṣa po aliho nuyiwa tọn yetọn lẹ po. Eyin mí wàmọ, mílọsu sọgan wleawuna yinkọ dagbe de na míde.
“Yọnnu Walọ Dagbenọ De”
25 Boazi wlealọ hẹ Luti. Enẹgodo, mí hia dọmọ: “OKLUNỌ sọ na hòmimọ ẹn, e sọ ji visunnu de.” Yọnnu Bẹtlẹhẹm tọn lẹ dona Naomi bosọ pà Luti dọ ewọ pọnte hú visunnu ṣinawe na Naomi. Mí plọn dọ to nukọn mẹ, visunnu Luti tọn wá lẹzun tọgbo Ahọlu Davidi tọn. (Luti 4:11-22) To godo mẹ, Davidi wá lẹzun tọgbo Jesu Klisti tọn.—Mat. 1:1.
Onú Sisosiso Gbigbọmẹ Tọn Lẹ
w05 1/3 29 huk. 4
Nuagokun lẹ sọn Owe Luti Tọn Mẹ
4:6—Aliho tẹ mẹ wẹ mẹflitọ de sọgan hẹn ogú etọn “hòsọ́,” kavi vọ̀ ẹ gbọn mẹfifli dali te? Tintan whẹ́, eyin mẹhe lẹzun hẹntọnọ lọ ko sà aigba he e dugu etọn, mẹflitọ lọ dona yí akuẹ sọha he yin linlẹn to dodonu owhe he pò kakajẹ Jubile he na bọdego tọn ji do họ̀ aigba lọ. (Levitiku 25:25-27) Mọwiwà na de nutindo etọn titi lẹ pò. Humọ, eyin Luti ji visunnu de, visunnu enẹ wẹ na dugu aigba heyin fiflí lọ tọn, kakati nido yin hẹnnumẹ sẹpọmẹ mẹflitọ lọ tọn de.
7-13 FÉVRIER
NUHỌAKUẸ LẸ SỌN OHÓ JIWHEYẸWHE TỌN MẸ | 1 SAMUẸLI 1-2
“Nọ Dọ Homẹ Na Jehovah”
ia 55 huk. 12
E Dọ Nuhe to Ahun Ji Na Ẹn lẹ Na Jiwheyẹwhe
12 Gbọnmọ dali, Hanna ze apajlẹ dai na devizọnwatọ Jiwheyẹwhe tọn lẹpo gando dẹ̀hiho go. Jehovah gbọn homẹdagbe dali biọ to omẹ etọn lẹ si nado nọ hodẹ̀ hlan ẹn po awuvivo po, bo ma nọ whleawu nado dọ nuhe to ahunmẹduna yé lẹ na emi, dile ovi he dejido mẹjitọ owanyinọ etọn lẹ go de nọ wà do. (Hia Psalm 62:8; 1 Tẹsalonikanu lẹ 5:17.) Apọsteli Pita yin gbigbọdo nado kàn hogbe homẹmiọnnamẹ tọn ehelẹ gando dẹ̀hiho hlan Jehovah go dọmọ: “Mì to magbọjẹ mìtọn lẹpo bẹ dlan ewọ ji, na e to mìtọn hòpọn wutu.”—1 Pita 5:7.
w07 15/3 16 huk. 4
Lehe Hanna Mọ Jijọho Ahun mẹ Tọn Do
Etẹwẹ mí sọgan plọn sọn ehe lẹpo mẹ? To whenuena mí to nuhe duahunmẹna mí lẹ dọna Jehovah to odẹ̀ mẹ, mí sọgan dọ numọtolanmẹ mítọn lẹ na ẹn bo basi ovẹvivẹ ahundopo tọn. Eyin nudevo de ma tin he mí sọgan wà nado didẹ nuhahun lọ, mí dona jo whẹho lọ do alọ etọn mẹ. Nuhe yọ́n hugan nado wà lọ niyẹn.—Howhinwhẹn lẹ 3:5, 6.
Onú Sisosiso Gbigbọmẹ Tọn Lẹ
w05 15/3 21 huk. 5
Nuagokun lẹ sọn Owe Samuẹli Tintan Tọn Mẹ
2:10—Naegbọn Hanna hodẹ̀ dọ Jehovah ni “na huhlọn hlan ahọlu etọn” to whenuena gbẹtọvi de ma to gandu do Islaeli ji? E ko yin didọdai to Osẹ́n Mose tọn mẹ dọ gbẹtọvi na wá duahọlu do Islaelivi lẹ ji. (Deutelonomi 17:14-18) To whenuena Jakobu tin to kúdonu, e dọ dọdai dọmọ: “Ogànpò [he nọtena aṣẹpipa gandudu tọn] ma na tọ́nyi sọn Juda.” (Gẹnẹsisi 49:10) Humọ, Jehovah dọ gando Sala—onọ̀ daho Islaelivi lẹ tọn go dọmọ: “E dè wẹ ahọlu hẹnnu lẹ tọn lẹ na tọ́nsọn.” (Gẹnẹsisi 17:16) Enẹwutu, Hanna to dẹ̀ho gando ahọlu sọgodo tọn de go.
14-20 FÉVRIER
NUHỌAKUẸ LẸ SỌN OHÓ JIWHEYẸWHE TỌN MẸ | 1 SAMUẸLI 3-5
“Jehovah Nọ Homẹtọnpọn”
w18.09 24 huk. 3
Ewọ Yin Ganhunupotọ, Ṣogan E Nọ Homẹtọnpọn
3 Samuẹli jẹ “lizọnyina Jehovah” ji to gòhọtúntún mẹ to whenue e gbẹ́ yin jọja taun. (1 Sam. 3:1) To zánmẹ gbèdopo he Samuẹli ko yì mlọnai, nuhe paṣamẹ taun de jọ. (Hia 1 Samuẹli 3:2-10) E sè bọ mẹde ylọ yinkọ etọn. Na Samuẹli lẹndọ ogbè Yẹwhenọ Daho mẹhomẹ Eli tọn wẹ wutu, e họ̀nwezun yì e dè po sisi po bo dọmọ: “Yẹn die, na hiẹ ylọ mi.” Eli dọ dọ emi ma ylọ ẹ. Whenue nudopolọ vọ́ jọ whla awe dogọ, Eli doayi e go dọ Jiwheyẹwhe wẹ to Samuẹli ylọ. Enẹwutu, e dọna visunnu lọ nuhe e na gblọn, podọ Samuẹli wà domọ. Naegbọn Jehovah ma do ede hia Samuẹli to tintan whenu gbọn angẹli etọn gblamẹ? Biblu ma dọ, ṣigba aliho he mẹ nulẹ yì te dohia dọ whẹwhinwhẹ́n titengbe dopo sọgan ko yindọ ewọ hò jọja Samuẹli tọn pọ́n. Gbọnna?
w18.09 24 huk. 4
Ewọ Yin Ganhunupotọ, Ṣogan E Nọ Homẹtọnpọn
4 Hia 1 Samuẹli 3:11-18. Osẹ́n Jehovah tọn degbena ovi lẹ nado nọ do sisi hia mẹhomẹ lẹ, titengbe ahọvi de. (Eks. 22:28; Lev. 19:32) Be a sọgan lẹndọ Samuẹli na fọ́n to afọnnu bo yì Eli dè bosọ yí adọgbigbo do dowẹn whẹdanamẹ tọn sinsinyẹn Jiwheyẹwhe tọn na ẹn ya? Lala! Na nugbo tọn, kandai lọ dọna mí dọ Samuẹli “sọ to budi nado dọ numimọ he e mọ lọ na Eli.” Ṣigba, Jiwheyẹwhe hẹn ẹn họnwun na Eli dọ Emi wẹ to Samuẹli ylọ. Enẹwutu, Eli ze afọdide tintan lọ bo dọna Samuẹli nado dọho. Eli dọna ẹn dọmọ: “[Ma] whlá onú dopo tata do mi to nuhe e dọna we lẹpo mẹ” blo. Samuẹli setonu bo “dọ nulẹpo na ẹn.”
Onú Sisosiso Gbigbọmẹ Tọn Lẹ
w05 15/3 21 huk. 6
Nuagokun lẹ sọn Owe Samuẹli Tintan Tọn Mẹ
3:3—Be Samuẹli damlọn to Fiwiwe Gbaugbau lọ mẹ nugbonugbo wẹ ya? Lala. Samuẹli yin Levi Kohatinu he ma wá sọn whẹndo yẹwhenọ lẹ tọn mẹ de. (1 Otannugbo lẹ 6:33-38) Enẹwutu, ewọ ma yin dotẹnmẹna nado “biọ họmẹ yì nado mọ onú wiwe tlala lẹ lọ gba.” (Osọha lẹ 4:17-20) Lẹdo fiwiwe lọ tọn he Samuẹli tindo jlọjẹ nado biọ wẹ awánu gòhọtúntún lọ tọn. Finẹ wẹ e na ko mlọn. E taidi dọ Eli sọ damlọn do fide to awánu lọ mẹ. Kunnudenu dohia dọ hogbe lọ “fie aki Jiwheyẹwhe tọn tin te” dlẹnalọdo lẹdo gòhọtúntún lọ tọn.
21-27 FÉVRIER
NUHỌAKUẸ LẸ SỌN OHÓ JIWHEYẸWHE TỌN MẸ | 1 SAMUẸLI 6-8
“Mẹnu Wẹ Ahọlu Towe?”
it-2-F 827 huk. 1
Ahọluduta Jiwheyẹwhe Tọn
Yé Biọ Gbẹtọvi de di Ahọlu. Diblayi owhe 400 to whenue Islaelivi lẹ lẹkọ sọn kanlinmọgbenu to Egipti podọ owhe 800 linlán sọn whenue Jiwheyẹwhe basi alẹnu de hẹ Ablaham, Islaelivi lẹ biọ dọ gbẹtọvi de ni lẹzun ahọlu na yé, dile akọta he pò lẹ nọ do ahọlu do. Ṣigba, obiọ yetọn zẹẹmẹdo dọ yé masọ dín gandudu Jehovah tọn ba. (1Sa 8:4-8) Mí ko donù e go wayi dọ Jiwheyẹwhe dọho gando ahọluduta de go to whenue e dopà na Ablaham po Jakọbu po. To kọndopọ mẹ hẹ opà enẹ, akọta lọ ko to nukundo ahọluduta he Jiwheyẹwhe na doai lọ. Nuhe sọ yin dodonu na todido yetọn wẹ dọdai he Jakọbu dọ gando Juda go to okú-zàn ji (Jen 49:8-10), nuhe Jehovah dọna Islaelivi lẹ to whenue yé tọ́n sọn kanlinmọgbenu (Eks 19:3-6), gbèta he alẹnu Osẹ́n tọn lọ bẹhẹn lẹ (De 17:14, 15), gọna adà de sọn owẹ̀n he Jiwheyẹwhe zedo nùmẹ na yẹwhegán Balaami mẹ (Sọh 24:2-7, 17). Todido dopolọ sọawuhia to odẹ̀ Hanna tọn de mẹ, yèdọ onọ̀ Samuẹli tọn, he yin yọnnu nugbonọ de. (1Sa 2:7-10) Amọ́, to popolẹpo mẹ, Jehovah ma ko de “aṣli wiwe” etọn gando Ahọluduta lọ go hia to gigọ́ mẹ, e ma ko sọ dọ whenue ojlẹ na sọ̀ nado do ahọluduta lọ ai, podọ lehe e na yin awuwlena do po mẹhe e na de nado deanana lẹ po. Mọ e ma dọ eyin aigba ji kavi olọn mẹ wẹ Ahọluduta ehe na paṣẹ sọn. Enẹwutu, goyiyi wẹ akọta lọ dohia to whenue e biọ gbẹtọvi de di ahọlu.
ia 72 huk. 18
E Duto Ninọmẹ He Hẹn Ẹn Jẹflumẹ lẹ Ji
18 Doayi nuhe Jehovah dọna Samuẹli go to whenue e hodẹ̀ gando whẹho lọ go: “Tuntoai hlan ogbè omẹ ewlẹ tọn to enẹ he yé dọ hlan we lẹpo mẹ: na hiẹ ma wẹ yé ko gbẹ́ gba, ṣigba yẹn wẹ yé ko gbẹ́, na yẹn ma nado duahọlu to yé ji.” Enẹ miọnhomẹna Samuẹli taun dile etlẹ yindọ nuyiwa yetọn yin atẹṣiṣi sọta Jiwheyẹwhe Ganhunupotọ lọ. Jehovah dọna yẹwhegán etọn nado na avase Islaelivi lẹ gando kọdetọn vẹadi he ahọlu gbẹtọvi de tintindo na hẹnwa yé ji go. To whenue Samuẹli dowẹn na yé, yé tẹkudeji dọ: “Lala; ṣigba míwlẹ na tindo ahọlu de to mí ji.” Na Samuẹli nọ setonuna Jiwheyẹwhe etọn to whelẹponu wutu, e yì bo yiamisisadode ahọlu he Jehovah de lọ.—1 Sam. 8:7-19.
w10 15/1 30 huk. 9
Gandudu Jehovah Tọn Yin Whẹsuna!
9 Dile ojlẹ to yìyì, nuhe Jehovah dọ lẹpo wẹ wá jọ. To whenue gbẹtọvi de duahọlu do Islaelivi lẹ ji, nuhahun sinsinyẹn lẹ wá yé ji, titengbe to whenue ahọlu enẹ masọ wá wà dagbe ba. Po apajlẹ Islaelivi lẹ tọn enẹ po to ayiha mẹ, e ma paṣamẹ nado mọdọ to whenuho gblamẹ, gandudu gbẹtọvi he ma yọ́n Jehovah lẹ tọn ko gboawupo nado hẹn kọdetọn dagbe he dẹn-to-aimẹ lẹ wá. Nugbo wẹ dọ togán delẹ nọ biọ dọ Jiwheyẹwhe ni dona vivẹnudido yetọn nado hẹn jijọho po hihọ́ po wá, ṣigba nawẹ Jiwheyẹwhe sọgan dona mẹhe ma nọ litaina gandudu etọn gbọn?—Ps. 2:10-12.
Onú Sisosiso Gbigbọmẹ Tọn Lẹ
w02 1/4 12 huk. 13
Naegbọn Hiẹ Nado Yin Bibaptizi?
13 Didiọzun Klistiani dona wá aimẹ jẹnukọnna baptẹm mítọn taidi Kunnudetọ Jehovah tọn lẹ. Didiọzun Klistiani yin nuyiwa sọn ojlo mẹ wá de he nọ yin bibasi gbọn mẹhe de sọn ahun mẹ nado hodo Klisti Jesu lọ dali. Omẹ mọnkọtọn lẹ nọ jó aliho ylankan yetọn dai tọn do bo magbe nado wà nuhe sọgbe to nukun Jiwheyẹwhe tọn mẹ. To Owe-wiwe mẹ, hogbe nuwiwa Heblu po Glẹki tọn po he gando didiọzun Klistiani go tindo linlẹn kọlilẹ, kavi agọjijo tọn. Afọdide ehe nọ do aliho ylankan jijodo bo lẹhlan Jiwheyẹwhe dè hia. (1 Ahọlu lẹ 8:33, 34) Didiọzun Klistiani biọ “azọ́n he jẹ na lẹnvọjọ” lẹ didohia. (Owalọ lẹ 26:20) E nọ biọ dọ mí ni gbẹ́ sinsẹ̀n lalo dai, yinuwa sọgbe hẹ gbedide Jiwheyẹwhe tọn lẹ, bo ze míde jo hlan Jehovah kẹdẹ. (Deutelonomi 30:2, 8-10; 1 Samuẹli 7:3) Didiọzun Klistiani nọ dekọtọn do diọdo lẹ bibasi to nulẹnpọn, yanwle, po gbẹtọ-yinyin mítọn po mẹ. (Ezekiẹli 18:31) Mí “lẹnvọjọ” dile gbẹtọ-yọyọ lọ diọtẹn na walọyizan he ma yin Jiwheyẹwhe tọn lẹ—Owalọ lẹ 3:19; Efesunu lẹ 4:20-24; Kọlọsinu lẹ 3:5-14.
28 FÉVRIER–6 MARS
NUHỌAKUẸ LẸ SỌN OHÓ JIWHEYẸWHE TỌN MẸ | 1 SAMUẸLI 9-11
“Sauli Yọ́n Dogbó Ede Tọn to Bẹjẹeji”
w20.08 10 huk. 11
Nọ Do Whiwhẹ Hia Bosọ Nọ Yọ́n Dogbó Towe Lẹ
11 Lẹnnupọndo nuhe jọ do Ahọlu Sauli go ji. To bẹjẹeji, ewọ yin dẹpẹ whiwhẹnọ de. E nọ yọ́n dogbó etọn lẹ bo tlẹ whleawu nado kẹalọyi azọngban devo dogọ. (1 Sam. 9:21; 10:20-22) Etomọṣo to nukọn mẹ, Sauli wá lẹzun saklanọ. E do jijọ ylankan ehe hia ojlẹ kleun de to whenue e duahọlu godo. To gbèdopo, e gboawupo nado fahomẹ dile e to tenọpọn yẹwhegán Samuẹli. Kakati nado yọ́n dogbó etọn lẹ bo deji dọ Jehovah na yinuwado omẹ etọn lẹ tamẹ, Sauli basi avọ́sinsan mimẹ̀ de dile etlẹ yindọ ewọ ma tindo aṣẹ nado wà onú mọnkọ. Taidi kọdetọn de, e ba nukundagbe Jehovah tọn pò, podọ to godo mẹ Jehovah masọ kẹalọyi i taidi ahọlu ba. (1 Sam. 13:8-14) Nuyọnẹnnu wẹ e yin dọ mí ni plọnnu sọn apajlẹ avase tọn ehe mẹ bo dapana sakla.
w14 15/3 9 huk. 8
Mí Sọgan Hẹn Gbigbọ Mẹde-Yido-Sanvọ́ Tọn Mítọn Go
8 Avase de wẹ apajlẹ Ahọlu Sauli Islaeli tọn yin na mí gando lehe ṣejannabi sọgan hù gbigbọ mẹde-yido-sanvọ́ tọn mítọn sudo vudevude do go. To whenue Sauli bẹ gandudu etọn jẹeji e yin whiwhẹnọ bo tindo pọndohlan jlẹkaji tọn gando ede go. (1 Sam. 9:21) E gbẹ́ nado sayana Islaelivi he hlunnudọ gando aṣẹpipa etọn go lẹ, dile etlẹ yindọ e sọgan ko mọdọ emi tindo whẹjijọ nado yiavùnlọna otẹn he mẹ Jiwheyẹwhe ze e do. (1 Sam. 10:27) Ahọlu Sauli kẹalọyi anademẹ gbigbọ Jiwheyẹwhe tọn bo deanana Islaelivi lẹ nado hoavùn sọta Ammọninu lẹ po kọdetọn dagbe po. To enẹgodo, e gbọn whiwhẹ dali na gigo awhàngbigba lọ tọn Jehovah.—1 Sam. 11:6, 11-13.
w95-F 15/12 10 huk. 1
Amọninu lẹ Yí Kanyinylan Do Suahọ Dagbewà Tọn
Whladopo dogọ, Amọninu lẹ yí kanyinylan do suahọ dagbe he Jehovah wà na yé tọn. Jehovah ma yí nukunpẹvi do pọ́n kanyinylan yetọn. “Gbigbọ Jiwheyẹwhe tọn sọ na huhlọn Sauli to whenue e sè ohó [Nahaṣi tọn lẹ], bọ homẹgble e sinsinyẹn.” To anademẹ gbigbọ wiwe Jiwheyẹwhe tọn glọ, Sauli bẹ awhànfuntọ 330 000 pli bọ yé gbawhàn Amọninu lẹ tọn mlẹnmlẹn bọ “omẹ awe ma yin jijodo dopọ.”—1Sa 11:6, 11.
Onú Sisosiso Gbigbọmẹ Tọn Lẹ
w05 15/3 22 huk. 8
Nuagokun lẹ sọn Owe Samuẹli Tintan Tọn Mẹ
9:9—Etẹwẹ jẹna ayidego gando hogbe lọ go dọ “yẹwhegán de dinvie wẹ yè nọ ylọ dọ numọtọ de daidai”? Hogbe ehelẹ sọgan dohia dọ dile yẹwhegán lẹ lẹzun yinyọnẹn dogọ to azán Samuẹli tọn gbè podọ to ojlẹ ahọlu Islaeli tọn lẹ tọn mẹ, hogbe lọ “yẹwhegán” wá diọtẹnna “numọtọ.” Samuẹli yin pinpọnhlan taidi omẹ tintan to hukan yẹwhegán ehelẹ tọn mẹ.—Owalọ lẹ 3:24.
AWUWIWLENA LIZỌNYIZỌN KUNNUDEGBE TỌN
w15 15/4 6-7 huk. 16-20
Mẹho lẹ Emi, Nukun Tẹwẹ Mì Nọ Yí Do Pọ́n Azọ́npinplọn Mẹdevo Lẹ?
16 Nọ tindo ojlo dagbe, bo ma nọ whleawu blo. To tintan whenu he Samuẹli sè dọ Islaelivi lẹ to jijlo dọ gbẹtọvi de ni yin ahọlu do yé ji, e jẹflumẹ bo mọdọ omẹ emitọn lẹ gbẹ́ emi dai. (1 Sam. 8:4-8) Na nugbo tọn, ewọ to awuwhle nado wà nuhe gbẹtọ lọ lẹ jlo sọmọ bọ Jehovah dọna ẹn whla atọ̀n plipli nado dotoaina yé. (1 Sam. 8:7, 9, 22) Etomọṣo, Samuẹli ma dike homẹgble po adi po ni doadọ̀do to ahun etọn mẹ sọta dawe lọ he na jẹ otẹn etọn mẹ. To whenue Jehovah dọna ẹn nado samisisana Sauli, yẹwhegán lọ setonu, e ma yin to aliho mọmọ tọn de mẹ gba, ṣigba e yí ojlo po owanyi po do wàmọ.
17 To egbehe, mẹho numimọnọ lẹ nọ do ojlo dagbe hia mẹhe yé to azọ́nplọn lẹ dile Samuẹli wà do. (1 Pita 5:2) Mẹho mọnkọtọn lẹ ma nọ whleawu nado plọnazọ́n mẹdevo lẹ po obu lọ po dọ yé na wá jo lẹblanulọkẹyi delẹ he yé tindo to agun mẹ do na azọ́nplọntọ lẹ. Azọ́nplọnmẹtọ he tindo ahun dagbe lẹ ma nọ pọ́n azọ́nplọntọ ojlo dagbenọ lẹ hlan taidi mẹhe to agbàwhlẹn hẹ yé gba, ṣigba taidi “azọ́nwatọ hatọ” lẹ, yèdọ nunina họakuẹ lẹ to agun lọ mẹ. (2 Kọl. 1:24; Heb. 13:16) Azọ́nplọnmẹtọ ahundoponọ enẹlẹ nọ gọ́ na ayajẹ taun dile yé to mimọ bọ azọ́nplọntọ lẹ to nugopipe yetọn yizan nado hẹn ale wá na agun lọ!—Owalọ 20:35.
18 Nọ jihọntọn hẹ yé, bo ma yin azọ́nplọnmẹtọ poun blo. To gbeegbe Samuẹli mọ Sauli, yẹwhegán lọ sọgan ko de ogo amì tọn etọn tọ́n bo kọ̀n ẹn do ota na Sauli to afọdopolọji, bo do e hlan taidi ahọlu yọyọ de, he yè ko samisisana ganji ṣigba he ma ko mọ anademẹ depope yí. Kakatimọ, Samuẹli gbọn homẹdagbe dali yí whenu zan nado wleawuna ahun Sauli tọn vudevude. To whenue yé ko dù núdùdù dagbe de, zinzọnlin dopọ, dọhodopọ na ojlẹ dindẹn, bosọ gbọjẹ godo wẹ yẹwhegán lọ mọdọ ojlẹ dagbe lọ die nado samisisana Sauli.
19 Mọdopolọ to egbehe, azọ́nplọnmẹtọ de dona nọ bẹ azọ́nplọnmẹ etọn jẹeji gbọn whenu yiyizan nado hẹn azọ́nplọntọ lọ voawu bo jihọntọn hẹ ẹ dali. Afọdide titengbe he mẹho de nọ ze nado wleawuna haṣinṣan dagbe mọnkọtọn hẹ azọ́nplọntọ de sọgan gbọnvo sọn otò de mẹ jẹ devo mẹ, sọgbe hẹ ninọmẹ po aṣa otò dopodopo tọn po. Etomọṣo, mahopọnna fidepope he hiẹ nọ nọ̀ bo yin mẹho agun tọn he alọnu etọn nọ ján de, eyin a nọ de whenu de dovo ehe a nọ yizan dopọ hẹ azọ́nplọntọ de, a to didọna ẹn to linlẹn de mẹ dọ, “Mẹvivẹ wẹ a yin na mi.” (Hia Lomunu lẹ 12:10.) Azọ́nplọntọ ojlo dagbenọ lẹpo to filẹpo wẹ na mọnukunnujẹ numọtolanmẹ he a ma dọtọ́n tlọlọ ehe mẹ bo nasọ yọ́n pinpẹn etọn taun.
20 Mẹho lẹ emi, mì flindọ: Azọ́nplọnmẹtọ he nọ tindo kọdetọn dagbe ma yin mẹhe nọ yiwanna azọ́npinplọn mẹdevo lẹ poun, ṣigba e sọ nọ do owanyi hia mẹhe e to azọ́nplọn lọ. (Yijlẹdo Johanu 5:20 go.) Jẹhẹnu titengbe enẹ he azọ́nplọnmẹtọ de nọ dohia nọ yawu yin ayidego gbọn azọ́nplọntọ de dali podọ e nọ yinuwado lehe azọ́nplọntọ lọ nọ kẹalọyi azọ́nplọnmẹ lọ do ji. Enẹwutu, mẹho agun tọn vivẹ́ lẹ emi, dile mì to azọ́nplọn mẹdevo lẹ, mì ma nọ yinuwa taidi azọ́nplọnmẹtọ poun blo, ṣigba taidi họntọn de.—Howh. 17:17; Joh. 15:15.