Alọdlẹndonu Nuplọnwe Opli Gbẹzan po Lizọnyizọn po Tọn
© 2022 Christian Congregation of Jehovah’s Witnesses
16-22 JANVIER
NUHỌAKUẸ LẸ SỌN OHÓ JIWHEYẸWHE TỌN MẸ | 1 OTÀNNUGBO LẸ 1-3
“Biblu Ma Yin Owe Otàngblo Tọn De”
w09-F 1/9 14 huk. 2
Be Adam po Evi po Nọgbẹ̀ Pọ́n Nugbonugbo Ya?
Di apajlẹ, lẹnnupọndo todohukanji tọgbo Ju lẹ tọn he yin sislẹ to Biblu mẹ to Otànnugbo lẹ Tintan weta 1 jẹ 9 po Wẹndagbe Luku tọn weta 3 po mẹ lẹ ji. Todohukanji awe lọ lẹ na nudọnamẹ gigọ́ gando whẹndo lẹ go, dopo donù whẹndo 48 go bọ awetọ donù whẹndo 75 go. Luku dọhodo hukan whẹndo tọn Jesu Klisti tọn ji, bọ Otànnugbo lẹ basi todohukanji tọgbo ahọlu po yẹwhenọ akọta Islaeli tọn lẹ po tọn. Todohukanji awe lọ lẹpo wẹ bẹ yinkọ mẹhe mí jẹakọ hẹ taun delẹ tọn hẹn, taidi Sọlomọni, Davidi, Jakọbu, Isaki, Ablaham, Noa podọ Adam. Mẹhe yinkọ yetọn yin sislẹ do todohukanji awe lọ lẹ mẹ lẹpo wẹ nọgbẹ̀ pọ́n, podọ to kandai lọ lẹ dopodopo mẹ Adam wẹ yin omẹ tintan he nọgbẹ̀ pọ́n.
w08-F 1/6 3 huk. 4
Singigọ Noa Whenu Tọn Ma Yin Otàngblo
To Biblu mẹ, kandai todohukanji kúnkan lẹ tọn awe wẹ dohia dọ Noa nọgbẹ̀ pọ́n. (1 Otànnugbo lẹ 1:4; Luku 3:36) Mẹhe basi kandai awe lọ lẹpo, enẹ wẹ Ẹzla po Luku po wẹ nọ yí sọwhiwhe do basi dodinnanu. Kandai Luku tọn dohia dọ whẹndo Noa tọn mẹ wẹ Jesu Klisti wá sọn.
w09-F 1/9 14 huk. 7
Be Adam po Evi po Nọgbẹ̀ Pọ́n Nugbonugbo Ya?
Di apajlẹ, lẹnnupọndo sinsẹ̀n-nuplọnmẹ ofligọ tọn ji, ehe yin nuplọnmẹ nujọnu tọn de na suhugan ṣọṣi-yitọ lẹ tọn. Sọgbe hẹ nuplọnmẹ ehe, Jesu Klisti ze ogbẹ̀ pipé etọn jo taidi ofligọ de nado whlẹn mẹsusu sọn ylando yetọn lẹ mẹ. (Matiu 20:28; Johanu 3:16) Ofligọ de ka yin akuẹ he sọzẹn pẹpẹ de súsú nado fli nuhe ko yin hinhẹnbu de gọ̀. Enẹ wẹ zọ́n bọ Biblu do dlẹnalọdo Jesu taidi “ofligọ he sọzẹn de.” (1 Timoti 2:6) Mí gán kanse dọ, etẹwẹ ofligọ lọ sọzẹn hẹ? Biblu na gblọndo lọ bo dọ dọ: “Kẹdẹdile mẹlẹpo to kúkú to Adam mẹ, mọdopolọ wẹ mẹlẹpo na yin hinhẹnwa ogbẹ̀ to Klisti mẹ do ga.” (1 Kọlintinu lẹ 15:22) Ogbẹ̀ pipé he Jesu yí do sanvọ́ nado fli gbẹtọvi tonusetọ lẹ gọ̀ sọzẹn hẹ ogbẹ̀ pipé he Adam hẹnbu na ylando he e wà to jipa Edẹni tọn mẹ wutu. (Lomunu lẹ 5:12) E họnwun dọ eyin Adam ma nọgbẹ̀ pọ́n, be osin bado pápá nẹgbé wẹ avọ́sinsan ofligọ tọn Klisti tọn na ko yin.
Onú Sisosiso Gbigbọmẹ Tọn Lẹ
it-1-F 977 huk. 2-3
Hukan Whẹndo Tọn
Yinkọ Yọnnu lẹ Tọn. To whedelẹnu, yinkọ yọnnu lẹ tọn nọ yin sislẹ do kandai hukan whẹndo tọn lẹ tọn mẹ, eyin whẹwhinwhẹ́n whenuho tọn de tin nado wàmọ. Jenẹsisi 11:29, 30 donù Salai (Sala) go, na e họnwun dọ ewọ gblamẹ wẹ kúnkan dopagbe lọ na wá gbọn, e ma yin gbọn asi Ablaham tọn devo gblamẹ. Milka lọsu na ko yin nùdego to kandai ehe mẹ na ewọ wẹ onọ̀-daho Lebeka, yèdọ asi Isaki tọn. To whenuena e yindọ Isaki ma dona mọ asi sọn akọta devo lẹ mẹ, enẹ to didohia dọ hẹnnumẹ Ablaham tọn lẹ mẹ wẹ whẹndo Lebeka tọn wá sọn. (Jen 22:20-23; 24:2-4) Jenẹsisi 25:1 sọ donù asi he Ablaham wá dà to nukọn mẹ de go, enẹ wẹ Ketula. Ehe dohia dọ Ablaham vọ́ asi dà to okú Sala tọn godo, podọ dọ nugopipe vijiji tọn Ablaham tọn lẹ ma ko kú etlẹ yin owhe 40 linlán to whenue Jehovah ko hẹn yé gọwá ogbẹ̀ to azọ́njiawu-liho godo. (Lo 4:19; Jen 24:67; 25:20) Ehe sọ do kanṣiṣa he Midianinu lẹ po hẹnnu Alabianu lẹ tọn devo lẹ po tindo hẹ Islaeli hia.
Lea, Laheli po asimọwhlá Jakọbu tọn lẹ po, gọna ovi he yemẹpo ji na ẹn lẹ sọ yin nùdego. (Jen 35:21-26) Ehe gọalọna mí nado mọnukunnujẹ lehe Jiwheyẹwhe wá yinuwa hẹ ovi enẹlẹ do mẹ. Whẹwhinwhẹ́n mọnkọ lẹ wutu wẹ yinkọ yọnnu devo lẹ tọn yin sislẹ do todohukanji hukan whẹndo tọn lẹ tọn mẹ. Yinkọ yetọn sọgan yin nùdego eyin yé mọ ogú de yí. (Sọh 26:33) Nugbo wẹ dọ whẹho Tamali, Lahabi po Luti po tọn gbọnvo. To whẹho yọnnu ehelẹ dopodopo tọn mẹ, aliho vonọtaun mẹ wẹ yé wá lẹzun onọ̀-daho Mẹsia lọ, yèdọ Jesu Klisti tọn te. (Jen 38; Lut 1:3-5; 4:13-15; Mt 1:1-5) Fidevo he yinkọ yọnnu lẹ tọn yin nùdego te to todohukanji hukan whẹndo tọn lẹ tọn mẹ wẹ 1 Otànnugbo lẹ 2:35, 48, 49; 3:1-3, 5.
6-12 FÉVRIER
Onú Sisosiso Gbigbọmẹ Tọn Lẹ
it-1-F 492 huk. 2-3
Ahun
Sinsẹ̀n-Bibasi po “Ahun Pipé de” Po. Eyin ahun jọnun dona to blebu whẹpo do wazọ́n dile e jẹ do, ahun yẹhiadonu tọn uwọ gán má. Davidi hodẹ̀ dọmọ: “Na mi ahun he ma má de nado nọ dibusi oyín towe,” ehe dohia dọ nuhe mẹde nọ yiwanna po nuhe nọ duahunmẹna ẹn lẹ po sọgan zọ́n bọ ahun etọn na má. (Slm 86:11, Odò.) Omẹ mọnkọ sọgan nọma “yin ahundoponọ,” enẹ wẹ yindọ sinsẹ̀n-bibasi etọn hlan Jiwheyẹwhe na gblọ to linlẹn de mẹ. (Slm 119:113; Osọ 3:16) Mọdopolọ, mẹde sọgan nọma wà nude po “ahun lẹpo” po. To linlẹn de mẹ, e na yin ayihaawenọ kavi tindo ahun awe (to paa mẹ, ahun de po ahun devo po). Omẹ mọnkọ na to tintẹnpọn nado sẹ̀n ogán awe kavi gbọn oklọ dali to nude dọ to whenuena e yindọ nudevo lẹn wẹ e te. (1Ot 12:33, Odò; Slm 12:2) Jesu gblewhẹdo yẹnuwiwa mọnkọ sinsinyẹn.—Mt 15:7, 8.
Mẹhe ma yin ahundoponọ kavi mẹhe yin ayihaawenọ ma sọgan hẹn homẹhun Jiwheyẹwhe. Eyin e jlo na wàmọ, e dona sẹ̀n ẹn po ahun pipé de po. (1Ot 28:9) Ehe nọ biọ dọ yè ni dovivẹnu taun, na ahun yin owùnu bo nọ jlo na wà oylan. (Jel 17:9, 10; Jen 8:21) Onú ehelẹ sọgan gọalọnamẹ nado hẹn ahun pipé de go: odẹ̀ ahundopo tọn hihò, (Slm 119:145; Avi 3:41), Ohó Jiwheyẹwhe tọn pinplọn whẹwhẹ (Ẹzl 7:10; Hwh 15:28), mahẹ zohunhun tọn tintindo to wẹndagbe lọ lilá mẹ (yijlẹdo Jel 20:9 go), gọna gbẹdido hẹ mẹdevo he yí ahun pipé do to Jehovah sẹ̀n lẹ.—Yijlẹdo 2Ah 10:15, 16 go.