Ozán atọ̀n wẹ Jesu po devi etọn lẹ po ko yizan to Bẹtani to whenue yé lẹkọ sọn Jẹliko godo. Todin, to lundi Nisan 10tọ to afọnnu fuu, yé dedo Jelusalẹm. Huvẹ to Jesu hù. Enẹwutu, to whenue e mọ ovòtin de, ewọ yì e kọ̀n. Be ovò sinsẹ́n lẹ to e ji ya?

Osun mars tọn ko dibla wá vivọnu, ṣigba juin mẹ gbọ́n wẹ yin ojlẹ ovò sinsẹ́n lẹ tọn. Amọ́, atin lọ yawu tọ́n amà. Enẹwutu, Jesu lẹndọ ovò sinsẹ́n tintan lẹ na ko to e ji. Ṣigba, e ma mọ sinsẹ́n depope. Amà lẹ zọ́n bọ atin lọ tindo awusọhia oklọ tọn. Enẹwutu, Jesu dọmọ: “Mẹdepope sọ dù sinsẹ́n to hiẹ ji gbede ba blo.” (Malku 11:14) To afọdopolọji, atin lọ jẹ fifiọ ji, podọ wunkẹngbe afọnnu wẹ zẹẹmẹ enẹ tọn na wá họnwun.

To ojlẹ vude godo, Jesu po devi etọn lẹ po jẹ Jelusalẹm. E yì tẹmpli mẹ, yèdọ fie e ko yì dlapọn to azán he jẹnukọn gbè to whèmẹ. Ṣigba to egbé, e wà nususu hugan nado dla tẹmpli lọ pọ́n poun; e ze afọdide he nkọ e ko ze to owhe atọ̀n die to Juwayi owhe 30 W.M. whenu. (Johanu 2:14-16) To ojlẹ ehe mẹ, Jesu yàn “mẹhe to nusà po mẹhe to nuhọ̀ to tẹmpli lọ mẹ lẹ po” jẹgbonu. E sọ takitina “tafo akuẹdiọtọ lẹ po aisinnu mẹhe to apoe sà lẹ po tọn lẹ.” (Malku 11:15) E ma tlẹ dike mẹdepope he hẹn nude jei awà tòdaho lọ tọn devo ji ni gbọn awánu tẹmpli lọ tọn mẹ wayi.

Naegbọn Jesu ze afọdide sinsinyẹn enẹ sọta mẹhe to akuẹ diọ po mẹhe to kanlin sà to tẹmpli mẹ lẹ po? E dọmọ: “Be e ma ko yin kinkan dọ: ‘Ohọ̀ ṣie na yin yiylọdọ ohọ̀ odẹ̀ tọn na akọta lẹpo ya’? Ṣigba, mìwlẹ ko hẹn ẹn zun odò jaguda lẹ tọn.” (Malku 11:17) Nuhewutu e do ylọ omẹ ehelẹ dọ jaguda lẹ wẹ yindọ yé nọ doahi vivẹ́ na mẹhe dona họ̀ kanlin he dona yin yíyí do sanvọ́ lẹ. Jesu mọdọ alọslonamẹ kavi ajojẹ wẹ yé te.

Na nugbo tọn, yẹwhenọgán lẹ, wekantọ lẹ po mẹhe yin omẹ nukundeji to gbẹtọ lọ lẹ mẹ lẹ po sè nuhe Jesu ko wà bo jẹ ayiha devo lẹ kàn ji nado hù i. Ṣigba, nuhahun he yé pannukọn wẹ yindọ, yé ma yọ́n lehe yé na wagbọn do hù Jesu, na gbẹtọ lẹ to wiwọ̀ wá e dè nado sè ohó etọn wutu.

Gbọnvona Ju jọnun lẹ, mẹdiọzun Ju lẹ lọsu wá hùnwhẹ Juwayi tọn lọ tẹnmẹ ga. Delẹ to mẹdiọzun Ju ehelẹ mẹ yin Glẹkinu bo wá hùnwhẹ lọ tẹnmẹ nado basi sinsẹ̀n. Omẹ ehelẹ dọnsẹpọ Filippi, vlavo na yé doayi yinkọ Glẹki tọn etọn go wutu, bo jlo na mọ Jesu. Filippi sọgan ko tindo ayihaawe gando gblọndo he e na na yé go, enẹwutu e dọho hẹ Andle. Yé omẹ awe lẹ ze whẹho lọ yì Jesu dè, mẹhe e yọnbasi dọ ni gbẹ́ pò to tẹmpli lọ mẹ.

Jesu yọnẹn dọ emi na kú to azán vude godo, enẹwutu e ma yin ojlẹ lọ niyẹn nado hẹn pekọ wá na tlintlindo-dindin gbẹtọ lẹ tọn kavi nado dín yindidi. E yí apajlẹ de do na gblọndo apọsteli awe lọ lẹ dọmọ: “Ojlẹ lọ ko wá na Visunnu gbẹtọ tọn nado yin gigopana. Nugbonugbo wẹ yẹn dọna mì dọ, Eyin okún likun tọn de ma flẹ do kọmẹ bo kú, okún dopo poun wẹ e nọ yin; ṣigba eyin e kú, to whenẹnu e nọ de sinsẹ́n susu tọ́n.”—Johanu 12:23, 24.

Okún likun tọn dopo sọgan taidi nuhe ma họakuẹ. Ṣogan, eyin yè do e bọ e “kú,” e sọgan tọ́nkun bo whẹ́n to nukọn mẹ bosọ de sinsẹ́n susu tọ́n. Mọdopolọ, Jesu yin gbẹtọ pipé de. Ṣigba, gbọn nugbonọ-yinyin na Jiwheyẹwhe kakajẹ okú dali, e na lẹzun aliho he gblamẹ mẹsusu he tindo gbigbọ avọ́sinsan tọn dopolọ lẹ na mọ ogbẹ̀ madopodo yí te. Enẹwutu, Jesu dọmọ: “Ewọ he yiwanna alindọn etọn na hù i sudo, ṣigba ewọ he gbẹwanna alindọn etọn to aihọn ehe mẹ na basi hihọ́na ẹn na ogbẹ̀ madopodo.”—Johanu 12:25.

Jesu ma to hodọ gando ede kẹdẹ go, na e dọmọ: “Eyin mẹdepope na yilizọn na mi, gbọ e ni hodo mi, podọ fihe yẹn tin te finẹ wẹ lizọnyitọ ṣie na te ga. Eyin mẹdepope na yilizọn na mi, Otọ́ lọ na gbògbéna ẹn.” (Johanu 12:26) Ahọsumẹ nankọ die! Mẹhe Otọ́ lọ gbògbéna lẹ na lẹzun gbẹdohẹmẹtọ Klisti tọn lẹ to Ahọluduta lọ mẹ.

Po yajiji sinsinyẹn gọna okú awufiẹsa tọn he to tepọn ẹn po to ayiha mẹ, Jesu dọmọ: “Todin, alindọn ṣie yin tuklado, podọ etẹwẹ yẹn na dọ? Otọ́, whlẹn mi sọn gànhiho ehe si.” Ṣigba, e ma yindọ Jesu to hinhọ̀nna ojlo Jiwheyẹwhe tọn wiwà wẹ gba. E yidogọ dọmọ: “Ṣogan, nuhewutu yẹn biọ gànhiho ehe mẹ lọ niyẹn.” (Johanu 12:27) Jesu kọngbedopọ hẹ nuhe lẹndai Jiwheyẹwhe tọn bẹhẹn lẹpo, gọna okú avọ́sinsan tọn edetiti tọn.

To tẹmpli mẹ to lundi Nisan 10tọ gbè, Jesu to hodọ gando okú etọn he to dindọnsẹpọ lọ go. Lehe enẹ na yinuwado oyín Jiwheyẹwhe tọn ji do to ahunmẹduna Jesu bọ e dọmọ: “Otọ́, pagigona oyín towe.” Ogbè huhlọnnọ de gblọn sọn olọn mẹ dọmọ: “Yẹn ko pagigona ẹn bo nasọ vọ́ pagigona ẹn.”—Johanu 12:27, 28.

Mẹhe tin to finẹ lẹ jẹflumẹ. Mẹdelẹ lẹndọ hẹviosò wẹ yẹnwan. Mẹdevo lẹ dọmọ: “Angẹli de wẹ ko dọhona ẹn.” (Johanu 12:29) Ṣigba, ogbè Jehovah tọn wẹ yé ṣẹṣẹ sè! Podọ e ma yin whla tintan niyẹn he gbẹtọvi lẹ sè ogbè Jiwheyẹwhe tọn gando Jesu go.

Owhe atọ̀n daa die to baptẹm Jesu tọn whenu, Johanu Baptizi sè bọ Jiwheyẹwhe dọ gando Jesu go dọmọ: “Ehe wẹ Visunnu ṣie, mẹyiwanna lọ, mẹhe yẹn ko kẹalọyi.” To nukọn mẹ, to Juwayi owhe 32 W.M. godo, Jesu diọwunmẹ to Jakọbu, Johanu po Pita po nukọn. Sunnu atọ̀n ehelẹ sè bọ Jiwheyẹwhe dọmọ: “Ehe wẹ Visunnu ṣie, mẹyiwanna lọ, mẹhe yẹn ko kẹalọyi. Mì nọ dotoaina ẹn.” (Matiu 3:17; 17:5) Ṣigba to nujijọ atọ̀ntọ ehe whenu, Jehovah dọho to aliho de mẹ bọ mẹsusu sọgan sè!

Jesu dọmọ: “Ogbè ehe yin sisè, e ma yin na yẹn tọn wutu gba, ṣigba na mìwlẹ tọn wutu wẹ.” (Johanu 12:30) Kunnudenu de wẹ ehe dọ Visunnu Jiwheyẹwhe tọn wẹ ewọ yin nugbo, yèdọ Mẹsia dopagbe lọ.

Humọ, gbẹzan nugbonọ-yinyin tọn Jesu tọn do lehe gbẹtọvi lẹ dona nọgbẹ̀ do hia bosọ dohia dọ Satani Lẹgba, he yin ogán aihọn tọn, jẹna okú. Jesu dọmọ: “Todin, aihọn ehe to yinyin whẹdana; todin, ogán aihọn ehe tọn na yin yinyan jẹgbonu.” Awhàngbigba de wẹ okú Jesu tọn he to dindọnsẹpọ lọ na yin. Gbọnna? E basi zẹẹmẹ dọmọ: “Ṣogan, whenue yẹn na yin zize yiaga sọn aigba ji, yẹn na dọ̀n gbẹtọ wunmẹ lẹpo do dè e.” (Johanu 12:31, 32) Gbọn okú Jesu tọn to potin ji gblamẹ, ewọ na dọ̀n mẹdevo lẹ do ede dè bo gbọnmọ dali hùnali ogbẹ̀ madopodo tọn.

Na Jesu dọ dọ emi na yin “zize yiaga” wutu, gbẹtọgun lọ dọmọ: “Mí sè sọn Osẹ́n lọ mẹ dọ Klisti lọ na gbọṣi aimẹ kakadoi; naegbọn hiẹ do dọ dọ Visunnu gbẹtọ tọn dona yin zize yiaga? Mẹnu wẹ yin Visunnu gbẹtọ tọn ehe hodọ a te?” (Johanu 12:34) Mahopọnna kunnudenu lọ lẹpo, kakajẹ ogbè Jiwheyẹwhe titi tọn he yé sè ji, suhugan yetọn ma kẹalọyi Jesu taidi Visunnu gbẹtọ tọn nujọnu tọn lọ, yèdọ Mẹsia dopagbe lọ.

Dile Jesu ko basi do wayi, e dlẹnalọdo ede taidi ‘hinhọ́n lọ.’ (Johanu 8:12; 9:5) E dotuhomẹna gbẹtọgun lọ dọmọ: “Hinhọ́n lọ na gbẹ́ nọ mì ṣẹnṣẹn na ojlẹ vude dogọ. Mì zinzọnlin to whenue mì tindo hinhọ́n, na zinvlu ni ma duto mì ji blo . . . Mì do yise hia to whenue mì tindo hinhọ́n lọ, na mì nido lẹzun ovi hinhọ́n tọn lẹ.” (Johanu 12:35, 36) Enẹgodo Jesu yì sọn finẹ, na e ma yin Nisan 10tọ gbè wẹ ewọ na kú. Ṣigba, Juwayi Nisan 14tọ whenu wẹ e na yin “zize yiaga”—enẹ wẹ yindọ e na yin whiwhè do potin go.—Galatianu lẹ 3:13.

Eyin mí lẹnnupọndo lizọnyizọn Jesu tọn ji, e họnwun dọ dọdai de wẹ to hẹndi mọ to whenue Ju lẹ ma tindo yise to ewọ mẹ. Isaia dọ dọdai dọ nukun omẹ lọ lẹ tọn na tọ́n bọ ahun yetọn na sinyẹn bọ yé ma na lẹkọ nado yin azọ̀nhẹngbọna. (Isaia 6:10; Johanu 12:40) Mọwẹ, suhugan Ju lẹ tọn yí tasinsinyẹn do gbẹ́ kunnudenu lọ lẹ he do Jesu hia taidi Whlẹngántọ dopagbe yetọn dai, yèdọ aliho ogbẹ̀ tọn lọ.

Nikodẹmi, Josẹfu Alimate tọn po ogán susu devo lẹ po “tindo yise” to Jesu mẹ. Amọ́, be yise na whàn yé nado yinuwa ya, kavi yé na dọ̀n yonu do godo, vlavo na yé nikaa yin yinyan sọn sinagọgu mẹ kavi na yé “yiwanna gigo gbẹtọ lẹ tọn” wutu?—Johanu 12:42, 43.

Jesu lọsu basi zẹẹmẹ nuhe yise tintindo to ewọ mẹ bẹhẹn tọn dọmọ: “Ewọ he tindo yise to yẹn mẹ, e ma yin yẹn kẹdẹ mẹ wẹ e tindo yise te gba, ṣigba to ewọ he do mi hlan lọ mẹ ga; podọ ewọ he mọ mi, mọ ewọ he do mi hlan ga.” Nugbo he Jiwheyẹwhe na anademẹ Jesu nado plọnmẹ lẹ, ehe Jesu zindonukọn bo to lilá lẹ yin nujọnu sọmọ bọ ewọ sọgan dọmọ: “Ewọ he gbẹ́ mi dai bo ma yí ohó ṣie lẹ tindo omẹ de he na dawhẹna ẹn. Ohó he yẹn ko dọ lẹ wẹ na dawhẹna ẹn to azán godo tọn gbè.”—Johanu 12:44, 45, 48.

Enẹgodo, Jesu dotana dọmọ: “Yẹn ma dọho sọn ojlo ṣie titi mẹ gba, ṣigba Otọ́ lọ lọsu he do mi hlan wẹ ko degbena mi gando nuhe yẹn dona dọ taun lọ go. Humọ, yẹn yọnẹn dọ gbedide etọn zẹẹmẹdo ogbẹ̀ madopodo.” (Johanu 12:49, 50) Jesu yọnẹn dọ to madẹnmẹ, emi na kọ̀n ohùn emitọn dai taidi avọ́sinsan de na gbẹtọvi he tindo yise to emi mẹ lẹ.—Lomunu lẹ 5:8, 9.