Alọdlẹndonu Nuplọnwe Opli Gbẹzan po Lizọnyizọn po Tọn
© 2024 Watch Tower Bible and Tract Society of Pennsylvania
2-8 SEPTEMBRE
NUHỌAKUẸ LẸ SỌN OHÓ JIWHEYẸWHE TỌN MẸ SALMU LẸ 79-81
Nọ Dohia Dọ A Yiwanna Oyín Gigonọ Jehovah Tọn
Ofligọ lọ—“Nunina Pipé” de sọn Otọ́ lọ Dè
5 Nawẹ mí sọgan dohia dọ mí yiwanna oyín Jehovah tọn gbọn? Gbọn walọyizan mítọn dali. Jehovah biọ dọ mí ni yin wiwe. (Hia 1 Pita 1:15, 16.) Ehe zẹẹmẹdo dọ mí ni nọ basi sinsẹ̀n hlan Jehovah kẹdẹ podọ dọ mí ni nọ setonuna ẹn po ahun mítọn lẹpo po. Eyin yè tlẹ to homẹkẹndo mí, mí nọ wà nuhe go mí pé lẹpo nado nọgbẹ̀ sọgbe hẹ nunọwhinnusẹ́n po osẹ́n dodo tọn etọn lẹ po. Gbọn nuhe sọgbe wiwà dali, mí nọ dike hinhọ́n mítọn ni họnwun bo nọ gbọnmọ dali hẹn gigo wá na oyín Jehovah tọn. (Mat. 5:14-16) Taidi omẹ wiwe lẹ, mí nọ dohia gbọn aliho gbẹninọ tọn mítọn dali dọ osẹ́n Jehovah tọn lẹ yọ́n podọ dọ lalo wẹ whẹsadokọnamẹ Satani tọn lẹ. To whenue mí ṣinuwa, dile e nọ jọ do mímẹpo go do, mí nọ lẹnvọjọ sọn ahun mẹ wá bo nọ dealọ sọn walọ he nọ kọnmasin do Jehovah go lẹ mẹ.—Salm. 79:9.
ijwbv 3 huk. 4-5
Lomunu lẹ 10:13—“Ylọ Oyín Oklunọ Tọn”
To Biblu mẹ, hodidọ lọ “ylọ oyín Jehovah tọn” bẹ nususu hẹn hugan oyín Jiwheyẹwhe tọn yinyọnẹn gọna yíyí i zan to sinsẹ̀n-bibasi mẹ poun. (Salmu lẹ 116:12-14) Ehe nọ biọ dọ mí ni dejido Jiwheyẹwhe go bo nọ lẹhlan e dè nado mọ alọgọ.—Salmu lẹ 20:7; 99:6.
Oyín Jiwheyẹwhe tọn yin nujọnu na Jesu Klisti. Hodidọ tintan to odẹ̀ apajlẹ tọn etọn mẹ lẹ wẹ: “Otọ́ mítọn he tin to olọn mẹ, na oyín towe ni yin kinklandowiwe,” kavi yin hinhẹn zun wiwe. (Matiu 6:9) Jesu sọ dohia dọ mí dona yọ́n Mẹhe tindo oyín enẹ bo nọ setonuna ẹn bosọ yiwanna ẹn, eyin mí na mọ ogbẹ̀ madopodo.—Johanu 17:3, 6, 26.
Onú Sisosiso Gbigbọmẹ Tọn Lẹ
it-2-F 53 huk. 3-4
Josẹfu
Oyín Josẹfu Tọn Wá Yiaga. Po otẹn vonọtaun he mẹ Josẹfu te to visunnu Jakọbu tọn lẹ mẹ po, e sọgbe taun dọ yinkọ etọn nọ yin yiyizan to whedelẹnu nado dlẹnalọdo hẹnnu Islaeli tọn lẹpo (Slm 80:1) kavi mẹhe wá lẹzun apadewhe ahọluduta agewaji tọn lẹ. (Slm 78:67; Am 5:6, 15; 6:6) Yinkọ etọn sọ nọ sọawuhia to dọdai Biblu tọn lẹ mẹ. To numimọ dọdai tọn yẹwhegán Ezekiẹli tọn mẹ, mimá awe wẹ yin ogú Josẹfu tọn, (Eze 47:13) yinkọ Josẹfu tọn yin nina dopo to họngbo tòdaho he nọ yin “Jehovah Tin to Finẹ” tọn lẹ mẹ (Eze 48:32, 35), podọ na nuhe dù omẹ Jehovah tọn lẹ kinkọndopọ whladopo dogọ, Josẹfu yin nùdego taidi ogán mimá akọta lọ tọn dopo bọ Juda yin ogán na mimá awetọ. (Eze 37:15-26) Dọdai Obadia tọn dohia dọ “owhé Josẹfu tọn” na do mahẹ to vasudo “owhé Esau tọn” mẹ (Ob 18), bọ dọdai Zekalia tọn dohia dọ Jehovah na whlẹn “owhé Josẹfu tọn.” (Zek 10:6) Podọ whẹndo Josẹfu tọn wẹ yin nùdego to whẹndo Islaeli gbigbọmẹ tọn lẹ tọn mẹ, kakati nido yin whẹndo Eflaimi tọn.—Osọ 7:8.
Nugbo lọ dọ yinkọ Josẹfu tọn yin sislẹ to Osọhia 7:8 mẹ dohia dọ dọdai he Jakọbu dọ to okú-zàn ji na wá mọ hẹndi do Islaeli gbigbọmẹ tọn go. Enẹwutu, e jẹna ayidego dọ Jehovah Jiwheyẹwhe, yèdọ Omẹ Huhlọnnọ Jakọbu tọn, wleawuna Klisti Jesu taidi Lẹngbọhọtọ Dagbe lọ he ze ogbẹ̀ etọn jo na “lẹngbọ lẹ.” (Joh 10:11-16) Klisti Jesu sọ yin zannu dodonu họ̀gosu tọn he ji tẹmpli Jiwheyẹwhe tọn he bẹ Islaelivi gbigbọmẹ tọn lẹ hẹn sinai do. (Efe 2:20-22; 1Pi 2:4-6) Lẹngbọhọtọ podọ Zannu ehe tin po Jiwheyẹwhe Ganhunupotọ lọ po.—Joh 1:1-3; Ow 7:56; Heb 10:12; yijlẹdo Jen 49:24, 25 go.
9-15 SEPTEMBRE
NUHỌAKUẸ LẸ SỌN OHÓ JIWHEYẸWHE TỌN MẸ SALMU LẸ 82-84
Yọ́n Pinpẹn Lẹblanulọkẹyi Towe lẹ Tọn
Nuhe Mí Plọn sọn Ohẹ̀ Agahomẹ Tọn lẹ Dè
Tòmẹnu Jelusalẹm tọn lẹ jẹakọ hẹ agadawhlé lẹ, ehe to paa mẹ nọ saba do adọ́ do adó ohọ̀ lẹ tọn go. Delẹ nọ do adọ́ do tẹmpli Sọlomọni tọn mẹ. Agadawhlé he nọ do adọ́ do lẹdo tẹmpli lọ tọn mẹ to whemẹwhemẹ lẹ nọ mọdọ hihọ́tẹn de wẹ finẹ yin, na mẹde ma na dotukla ovi yetọn lẹ wutu.
Mẹhe pà Salmu 84tọ, enẹ wẹ dopo to visunnu Kola tọn he nọ sẹ̀n to tẹmpli mẹ na osẹ dopo to osun ṣidopo gblamẹ lẹ mẹ, doayi adọ́ he to tẹmpli lọ mẹ lẹ go. Ojlo etọn wẹ nado taidi agadawhlé he nọ nọ̀ tẹmpli Jehovah tọn mẹ tẹgbẹ lẹ. E yí ogbè lélé do dọmọ: “Lehe yẹn yiwanna gòhọtúntún gigonọ towe do sọ, Jehovah awhànpa lẹ tọn E! N’tin to jejeji, mọwẹ, ojlo vẹkuvẹku he n’tindo na awánu Jehovah tọn lẹ to hinhẹn mi dakú . . . Ohẹ̀ lẹ tlẹ nọ mọ adọ́ do finẹ bọ agadawhlé nọ do adọ́ na ede do finẹ, fie ewọ nọ penukundo ovi etọn lẹ go te, yèdọ sẹpọ agbà gigonọ towe, Jehovah awhànpa lẹ tọn E, Ahọlu ṣie podọ Jiwheyẹwhe ṣie!” (Salmu lẹ 84:1-3) Be míwlẹ po ovi mítọn lẹ po nọ do ojlo po pinpẹn-nutọn-yinyọnẹn mọnkọtọn po hia gbọn pipli dopọ hẹ agun omẹ Jiwheyẹwhe tọn lẹ tọn to gbesisọ mẹ dali ya?—Salmu lẹ 26:8, 12.
Ze Yanwle Jlẹkaji Tọn lẹ Donukọnna Dewe, bo Mọ Ayajẹ
Yọnhowhe kavi azọ̀n sọgan de nuhe mí nọ penugo nado wà to sinsẹ̀nzọn Jehovah tọn mẹ pò. Eyin mẹjitọ de wẹ hiẹ yin, hiẹ sọgan tindo numọtolanmẹ lọ dọ a ma nọ mọaleyi sọmọ sọn oplọn mẹdetiti tọn po opli Klistiani tọn lẹ po mẹ na ovi towe lẹ nọ dù whenu na we bo ma nọ na we agbọ́ wutu. Ṣigba, be e sọgan yindọ ayidonugo zizedo dogbó towe lẹ ji zẹjlẹgo nọ glọnalina we to whedelẹnu nado mọ yanwle he kọ̀n a gbẹ́ sọgan jẹ lẹ wẹ ya?
To owhe fọtọ́n susu die wayi, Levinu de do ojlo hia to yanwle he kọ̀n e ma sọgan jẹ de mẹ. E tindo lẹblanulọkẹyi lọ nado nọ wadevizọn na osẹ awe to tẹmpli mẹ to whemẹwhemẹ. Ṣigba, e do ojlo dagbe lọ hia nado nọ nọ̀ agbà tẹmpli lọ tọn kọ̀n whepoponu. (Ps. 84:1-3) Etẹwẹ gọalọna Levinu nugbonọ ehe nado mọ pekọ? E mọnukunnujẹemẹ dọ azán dopo tata yiyizan to awánu tẹmpli lọ tọn lẹ mẹ ko yin lẹblanulọkẹyi vonọtaun de. (Ps. 84:4, 5, 10) Mọdopolọ, kakati nado nọ ze ayidonugo do dogbó mítọn lẹ ji, mí dona tẹnpọn nado nọ doayi yanwle he kọ̀n mí sọgan jẹ lẹ go bo nọ dopẹ́.
A Họakuẹ to Nukun Jehovah Jiwheyẹwhe Towe Tọn Mẹ!
12 Eyin a to azọ̀n de jẹ, kudeji dọ Jehovah yọ́n nuhe pehẹ a te. Biọ to e si nado gọalọna we, na a nido wleawuna pọndohlan dagbe gando ninọmẹ towe go. Enẹgodo, yí Biblu zan nado mọ hogbe dagbe he Jehovah ko wleawu etọn dai na we lẹ. Ze ayiha do wefọ he do obá he mẹ devizọnwatọ Jehovah tọn lẹ họakuẹ na ẹn jẹ hia lẹ ji. Dile a to mọwà, a na mọdọ Jehovah yọ́n na mẹhe to sinsẹ̀n ẹn po nugbonọ-yinyin po lẹpo.—Salm. 84:11.
Onú Sisosiso Gbigbọmẹ Tọn Lẹ
it-2-F 459 huk. 5-6
Tọṣiọvi
To whenuena e yindọ e bọawu dọ yè ni wọnji mẹhe ṣiọ-kú bọ yé ma do mẹde ehelẹ go, Jehovah yí hogbe lọ “tọṣiọvi” zan nado dlẹnalọdo obá he mẹ dodowiwa Islaeli tọn yiaga jẹ kavi obá he mẹ yé ko zẹ̀ sọn e kọ̀n jẹ. Eyin akọta lọ tin to ninọmẹ dagbe mẹ to gbigbọ-liho, yè nọ penukundo tọṣiọvi lẹ go. Eyin yè jẹ tasọdona whẹdida dodo ji to otò lọ mẹ, e họnwun dọ yè nọ dovọ́na tọṣiọvi lẹ, bọ ehe nọ yin ohia de dọ akọta lọ ma to ninọmẹ dagbe mẹ. (Slm 82:3; 94:6; Isa 1:17, 23; Jel 7:5-7; 22:3; Eze 22:7; Zek 7:9-11; Mal 3:5) Jehovah nọ hodẹ̀do mẹhe nọ gbidikọna tọṣiọvi lẹ. (De 27:19; Isa 10:1, 2) Jehovah ylọ ede dọ Mẹfligọtọ (Hwh 23:10, 11), Alọgọtọ (Slm 10:14), podọ Otọ́ (Slm 68:5) omẹ mọnkọ lẹ tọn. Ewọ wẹ nọ hẹn whẹdida ṣẹ do ota yetọn mẹ (De 10:17, 18), nọ do lẹblanu hia yé (Hos 14:3), nọ hẹn kọgbọ wá na yé (Slm 146:9), bo nọ hẹn yé dogbẹ̀.—Jel 49:11.
Dopo to nuhe nọ dohiagona Klistiani nugbo lẹ mẹ wẹ yindọ yé nọ hò mẹhe asu kavi mẹjitọ kú do lẹ tọn pọ́n. Devi Jakọbu kanwehlan Klistiani lẹ dọmọ: “Wunmẹ sinsẹ̀n-bibasi tọn he wé bo ma yin hinhẹnflu sọn pọndohlan Jiwheyẹwhe podọ Otọ́ mítọn tọn mẹ wẹ ehe: nado nọ penukundo tọṣiọvi lẹ po asuṣiọsi lẹ po go to nukunbibia yetọn mẹ, podọ nado nọ whlá míde matin dihó sọn aihọn dè.”—Jak 1:27.
16-22 SEPTEMBRE
NUHỌAKUẸ LẸ SỌN OHÓ JIWHEYẸWHE TỌN MẸ SALMU LẸ 85-87
Odẹ̀ Nọ Gọalọna Mí Nado Doakọnnanu
Be Hiẹ Nọ Do Gigo Jehovah Tọn Hia Ya?
10 Nado do gigo Jiwheyẹwhe tọn hia, mí sọ dona “sinyẹnlin to odẹ̀ mẹ.” (Lom. 12:12) Mí dona nọ hodẹ̀ dọ Jehovah ni gọalọna mí nado sẹ̀n ẹn to aliho he e kẹalọyi mẹ. Enẹwutu, mí sọgan biọ dọ ewọ ni na mí gbigbọ wiwe, ni na mí yise dogọ, ni na mí huhlọn nado nọ pehẹ whlepọn, podọ ni na mí nugopipe nado “nọ yí ohó nugbo tọn lọ zan to aliho he sọgbe mẹ.” (2 Tim. 2:15; Mat. 6:13; Luku 11:13; 17:5) Kẹdẹdile ovi de nọ ganjẹ otọ́ etọn go do, mọkẹdẹ wẹ mí dona nọ ganjẹ Otọ́ olọn mẹ tọn mítọn, Jehovah go do niyẹn. Eyin mí biọ ẹ dọ ni gọalọna mí nado sẹ̀n ẹn to gigọ́ mẹ, mí sọgan deji dọ ewọ na wàmọ. Mí ma dona lẹn gbede dọ mí to tuklado e! Kakatimọ, mì gbọ mí ni nọ hodẹ̀ nado pà ẹ, dopẹna ẹn, dín anademẹ etọn titengbe to whlepọn glọ, bo biọ dọ ni gọalọna mí nado sẹ̀n ẹn to aliho he na pagigona oyín wiwe etọn mẹ.—Ps. 86:12; Jak. 1:5-7.
Nawẹ Jehovah Nọ Na Gblọndo Odẹ̀ Mítọn lẹ Tọn Gbọn?
17 Hia Salmu lẹ 86:6, 7. Salmu-kantọ Davidi kudeji dọ Jehovah nọ dotoaina odẹ̀ emitọn lẹ bosọ nọ na gblọndo yetọn. Hiẹ lọsu gán tindo nujikudo dopolọ. Apajlẹ he go mí donù to hosọ ehe mẹ lẹ hẹn mí deji dọ Jehovah gán na mí nuyọnẹn po huhlọn he mí do hudo etọn po nado doakọnnanu. E gán yí whẹndo gbigbọmẹ tọn mítọn kavi etlẹ yin mẹhe ma ko to sinsẹ̀n ẹn todin lẹ zan nado gọalọna mí to aliho de mẹ.
18 Dile etlẹ yindọ Jehovah gán nọma na gblọndo na odẹ̀ mítọn lẹ to whelẹponu dile mí donukun do, mí yọnẹn dọ e na na gblọndo yetọn janwẹ. E na na mí nuhe mí do hudo etọn, podọ to whenue mí do hudo etọn te pẹẹ. Enẹwutu, zindonukọn nado nọ yí yise do hodẹ̀, bo deji dọ Jehovah nọ hò towe pọ́n todin podọ e na “hẹn pekọ wá na ojlo nutogbẹ̀ lẹpo tọn” to aihọn yọyọ he ja lọ mẹ.—Salm. 145:16.
Onú Sisosiso Gbigbọmẹ Tọn Lẹ
it-1-F 492 huk. 2
Ahun
Sinsẹ̀n-Bibasi po “Ahun Pipé de” Po. Eyin ahun jọnun dona to blebu whẹpo do wazọ́n dile e jẹ do, ahun yẹhiadonu tọn uwọ gán má. Davidi hodẹ̀ dọmọ: “Na mi ahun he ma má de nado nọ dibusi oyín towe,” ehe dohia dọ nuhe mẹde nọ yiwanna po nuhe nọ duahunmẹna ẹn lẹ po sọgan zọ́n bọ ahun etọn na má. (Slm 86:11, Odò.) Omẹ mọnkọ sọgan nọma “yin ahundoponọ,” enẹ wẹ yindọ sinsẹ̀n-bibasi etọn hlan Jiwheyẹwhe na gblọ to linlẹn de mẹ. (Slm 119:113; Osọ 3:16) Mọdopolọ, mẹde sọgan nọma wà nude po “ahun lẹpo” po. To linlẹn de mẹ, e na yin ayihaawenọ kavi tindo ahun awe (to paa mẹ, ahun de po ahun devo po). Omẹ mọnkọ na to tintẹnpọn nado sẹ̀n ogán awe kavi gbọn oklọ dali to nude dọ to whenuena e yindọ nudevo lẹn wẹ e te. (1Ot 12:33, Odò; Slm 12:2) Jesu gblewhẹdo yẹnuwiwa mọnkọ sinsinyẹn.—Mt 15:7, 8.
23-29 SEPTEMBRE
NUHỌAKUẸ LẸ SỌN OHÓ JIWHEYẸWHE TỌN MẸ SALMU LẸ 88-89
Gandudu Jehovah Tọn Wẹ Yọ́n Hugan
Nọ Nọgodona Nupojipetọ-Yinyin Jehovah Tọn!
5 Jehovah wẹ tindo jlọjẹ nado yin Nupojipetọ lọ na whẹwhinwhẹ́n devo wutu. Ewọ nọ yí aṣẹpipa etọn zan po whẹdida dodo pipé po. E dọmọ: “Yẹn wẹ Jehovah, Mẹhe nọ do owanyi nugbo, whẹdida dodo po dodowiwa po hia to aigba ji, na to onú ehelẹ mẹ wẹ yẹn nọ mọ homẹhunhun te.” (Jel. 9:24) E ma nọ ganjẹ kandai osẹ́n tọn gbẹtọvi mapenọ lẹ tọn go nado basi nudide nuhe yin dodo po nuhe sọgbe po tọn. Ewọ lọsu wẹ asisa whẹdida dodo pipé tọn, podọ dodonu enẹ ji wẹ e wleawuna kandai osẹ́n tọn lẹ na gbẹtọvi lẹ te. “Dodowiwa po whẹdida dodo po wẹ yin dodonu ofìn [etọn] tọn,” enẹwutu, mí sọgan deji dọ osẹ́n etọn, nunọwhinnusẹ́n etọn, po nudide etọn lẹpo po nọ yin dodo tọn. (Salm. 89:14; 119:128) To vogbingbọn mẹ, mahopọnna whẹsadokọnamẹ etọn dọ nupojipetọ-yinyin Jehovah tọn ma yin dagbe lọ, Satani ma ko penugo nado wleawuna aihọn de he mẹ dodowiwa na gbayipe te.
Nọ Nọgodona Nupojipetọ-Yinyin Jehovah Tọn!
10 Aliho he mẹ Jehovah nọ dugán te ma yin kọgbidinamẹ tọn kavi hẹngogo tọn gba. Aliho gandudu tọn etọn nọ namẹ mẹdekannujẹ bosọ nọ hẹn ayajẹ wá aimẹ. (2 Kọl. 3:17) Davidi basi zẹẹmẹ etọn dole: “Gigo po whanpẹ daho po tin to nukọn [Jiwheyẹwhe tọn]; huhlọn po ayajẹ po tin to fininọ etọn.” (1 Otàn. 16:7, 27) To aliho dopolọ mẹ, salmu-kantọ lọ Etani wlan dọmọ: “Ayajẹnọ wẹ mẹhe nọ yí homẹhunhun do dawhá lẹ. Jehovah E, yé nọ zinzọnlin to hinhọ́n nukunmẹ towe tọn nù. Yé nọ to ayajẹ to oyín towe mẹ to azán lọ pete ji, bo nọ yin zizedaga to dodowiwa towe mẹ.”—Salm. 89:15, 16.
11 Ayihamẹlinlẹnpọn whẹwhẹ do dagbewà Jehovah tọn ji na hẹn nujikudo mítọn lodo dọ gandudu etọn wẹ yin dagbe hugan lọ. Mí nọ wá tindo numọtolanmẹ dopolọ di salmu-kantọ lọ he dọmọ: “Na azán dopo to awánu towe lẹ mẹ pọnte hugan fọtọ́n to fidevo!” (Salm. 84:10) Nawẹ e sọgan nọma yinmọ gbọn? Taidi Yẹdenanutọ podọ Mẹdatọ owanyinọ mítọn, Jehovah wẹ yọ́n nuhe sin hudo mí tindo nado yin ayajẹnọ nugbonugbo, podọ ewọ nọ hẹn pekọ wá na nuhudo enẹ to gigọ́ mẹ. Nudepope he ewọ nọ biọ to mí si nọ yin na ale mítọn bosọ nọ hẹn ayajẹ daho hugan wá na mí to godo mẹ, eyin ehe tlẹ biọ dọ mí ni basi avọ́sinsan delẹ.—Hia Isaia 48:17.
Tindo Yise Dolido Dọ Ahọluduta lọ Na Wá
14 Lẹnnupọndo opagbe he Jiwheyẹwhe do na Ahọlu Davidi Islaeli hohowhenu tọn ji, opagbe enẹ nọ yin yiylọdọ alẹnu he yin bibasi hẹ Davidi. (Hia 2 Samuẹli 7:12, 16.) Jehovah basi alẹnu ehe hẹ Davidi to whenue e to gandu to Jelusalẹm, bo dopagbe na ẹn dọ Mẹsia lọ na wá sọn kúnkan etọn mẹ. (Luku 1:30-33) Gbọnmọ dali, Jehovah na nudọnamẹ gigọ́ gando whẹndo he mẹ okún lọ na wá sọn go, bo dohia dọ gudutọ Davidi tọn de na tindo “jlọjẹ” nado nọ ofìn Ahọluduta Mẹsia tọn ji. (Ezek. 21:25-27) Gbọn Jesu gblamẹ, gandudu Davidi tọn ‘na yin hinhẹn li kakadoi.’ Na nugbo tọn, okún Davidi tọn “na tin kakadoi, podọ ofìn etọn [na gbọṣi aimẹ] taidi owhè.” (Ps. 89:34-37) Gandudu Mẹsia tọn ma na lẹzun gandudu ylankan pọ́n gbede, podọ nuhe e na wadotana lẹ na nọ aimẹ kakadoi!
Onú Sisosiso Gbigbọmẹ Tọn Lẹ
‘Hiẹ Dopo Kẹdẹ Wẹ Yin Nugbonọ’
4 “Nugbonọ-yinyin” yin yiyizan to Owe-wiwe Heblu tọn mẹ taidi homẹdagbe he nọ gbọn owanyi dali tẹdo nude go majó-majó kakajẹ whenue e hẹn lẹndai etọn di pó godo. Gbẹtọ nugbonọ nọ yiwannamẹ. E jẹna ayidonugo dọ psalm-kàntọ lọ ylọ osun dọ “kunnudetọ nugbonọ to aga nukunmẹ” na awusọhia gbesisọmẹ tọn etọn to zánmẹ wutu. (Psalm 89:37) To whẹho ehe mẹ, yè sọgan dejido osun go, kavi ganjẹ e go. Ṣigba osun ma sọgan yin nugbonọ to aliho dopolọ mẹ dile gbẹtọ nọ yin nugbonọ do gba. Etẹwutu? Na nugbonọ-yinyin gbẹtọ tọn nọ bẹ owanyi didohia hẹn—yèdọ nude he nuhe ma tindo gbọfufu ma sọgan tindo.
5 Dile e yin yiyizan to Owe-wiwe mẹ do, nugbonọ-yinyin yin owanyi didohia. Dido e hia nọ dehia dọ kanṣiṣa de tin to mẹhe do jẹhẹnu lọ hia po mẹhe e yin didohia lọ po ṣẹnṣẹn. Nugbonọ-yinyin ehe nkọ ma nọ diọ. E ma nọ taidi agbówhẹn ohù tọn he jẹhọn nọ to anadena gba. Kakatimọ, nugbonọ-yinyin, kavi owanyi nugbo tọn, tindo adọgbigbo lọ po nugopipe lọ po nado dùto aliglọnnamẹnu he sinyẹn hugan lẹ ji.
AWUWIWLENA LIZỌNYIZỌN KUNNUDEGBE TỌN
ijwbq 181
Owe Nankọ Wẹ Biblu Yin?
Bẹjẹeji Biblu tọn dọhodo lehe Jiwheyẹwhe Ganhunupotọ lọ dá olọn po aigba po do ji. Biblu wẹ Jiwheyẹwhe zan nado do yinkọ etọn Jehovah hia mí, podọ e jlo dọ gbẹtọ lẹ ni wá yọ́n emi.—Salmu lẹ 83:18.
Biblu dohia dọ mẹlẹ ko hẹn yinkọ Jiwheyẹwhe tọn gble, bosọ do lehe e na vọ́ yinkọ etọn jlado do hia.
Biblu dọ nue Jiwheyẹwhe jlo na gbẹtọvi lẹ po aigba lọ po na mí. E dọhodo lehe Jiwheyẹwhe na de nue nọ zọ́n bọ gbẹtọ lẹ nọ jiya sẹ̀ to sọgodo do ji.
Ayinamẹ dagbe he na zọ́n bọ mí na zan ogbẹ̀ mítọn ganji lẹ to Biblu mẹ. Delẹ to e mẹ die:
Jijọhomẹninọ hẹ mẹdevo lẹ. “Enẹwutu, nudepope he mìwlẹ jlo dọ gbẹtọ lẹ ni nọ wà na mì, mọ wẹ mìlọsu dona nọ wà na yé do”—Matiu 7:12.
Zẹẹmẹ: Nue mí jlo dọ mẹlẹ ni wà na mí wẹ mílọsu dona wà na yé.
Lehe yè nọ duto lẹnpọn ji do. “Mì yin magbọjẹnọ na osọ he ja gbede blo, na osọ he ja na tindo magbọjẹ etọn titi lẹ.”—Matiu 6:34.
Zẹẹmẹ: E nọ yọ́n nado nọ dọ azán dopodopo tọn, kakati nado do lẹnpọn na míde gando nue gán jọ to sọgodo lẹ go.
Ayajẹ to alọwle mẹ. “Dopodopo mìtọn dona nọ yiwanna asi etọn dile e nọ wà na edetiti do; mọdopolọ, asi dona tindo sisi sisosiso na asu etọn.”—Efesunu lẹ 5:33.
Zẹẹmẹ: Owanyi po sisi po dona tin to alọwle mẹ, whẹpo nulẹ nido yì ganji.
30 SEPTEMBRE–6 OCTOBRE
NUHỌAKUẸ LẸ SỌN OHÓ JIWHEYẸWHE TỌN MẸ SALMU LẸ 90-91
Eyin A Nọ Dejido Jehovah Go, A Na Nọgbẹ̀ Dẹn
Vivẹnudido Nado Dọ́jì
Dodinnanutọ lẹpo ma kẹalọyi dọ nude gán yin wiwà nado hẹnmẹ dọ́jì hú lehe yè dona nọgbẹ̀ do to egbé. Nugbo wẹ dọ to fidelẹ, gbẹtọ nọ dọ́jì vude todin hú ojlẹ delẹ die wayi, na afọdide dagbe lẹ nọ yin zize nado nọ wiweji, bọ mẹlẹ nọ dovivẹnu nado glọnalina azọ̀n bẹplamẹ lẹ bọ amasin po oyẹ́n voovo lẹ po ko sọ tin. Dodinnanutọ delẹ dohia dọ gbẹtọ ma gán sọ dọ́jì hú lehe yè nọ nọgbẹ̀ do todin.
Mose he kàn apadewhe Biblu tọn wlan to nudi owhe 3500 lẹ die dọmọ: “Tedidi gbẹzan mítọn tọn yin owhe 70, kavi 80, eyin mẹlọ tindo huhlọn vonọtaun niyẹn. Ṣigba, yé nọ gọ́ na tukla po awubla po; yé nọ juwayi bleun, bọ mí nọ busẹ plaun.” (Salmu lẹ 90:10) Mahopọnna vivẹnudido gbẹtọ tọn nado hẹnmẹ dọ́jì dogọ, gbẹtọ ma nọ yawu dọ́jì hú lehe Mose dọ do.
Amọ́, aṣápán he nọ nọ̀ hùmẹ delẹ nọ dọ́jì hú owhe 200, bọ atin delẹ nọ nọgbẹ̀ na owhe fọtọ́n susu. Eyin mí yí gbẹzan gbẹtọ tọn jlẹdo lehe onú ehelẹ po nudevo lẹ po nọ nọgbẹ̀ dẹnsọ go, be mí ma nọ yawu kanbiọ míde dọ, Be owhe 70 kavi 80 janwẹ gbẹninọ na fó do a?
wp19.1 5, apotin
Nawẹ Jiwheyẹwhe Nọ Yin?
Nuhe mẹsusu nọ kanse niyẹn. Hiẹ lọsu gán ko kanse pọ́n. Nuhe dọ mí te wẹ yindọ: Eyin mẹde wẹ dá aihọn lọ po nuhe tin lẹpo po, bọ mẹnu wẹ dá Jiwheyẹwhe?
To paa mẹ, weyọnẹntọ lẹ kẹalọyi dọ aihọn lọ tindo bẹjẹeji. Sọgbe hẹ linlẹn ehe, wefọ tintan Biblu tọn dọmọ: “To bẹjẹeji Jiwheyẹwhe dá olọn lẹ po aigba po.”—Jenẹsisi 1:1.
Aihọn lọ pete po nuhe to e mẹ lẹpo po ma sọgan ko wá aimẹ na yede poun. Whẹpo nude nado wá aimẹ, mẹde wẹ dona basi nulọ kavi dá ẹ. Eyin mẹde ma ko tin jẹnukọnna didá aihọn tọn, be nuhe to aihọn mẹ lẹpo kakajẹ mílọsu ji ma na ko tin niyẹn. E họnwun dọ eyin nude ma do bẹjẹeji, e ma nọ do vivọnu. Enẹwutu, mẹdatọ de dona tin! Mẹdatọ enẹ yin gbigbọ huhlọnnọ de podọ yinkọ etọn wẹ Jehovah.—Johanu 4:24.
Biblu dọ gando Jiwheyẹwhe go dọmọ: “Whẹpo osó lẹ do yin jiji kavi whẹpo hiẹ do de aigba po aihọn po tọ́njẹgbonu, yèdọ sọn madopodo jẹ madopodo, hiẹ wẹ Jiwheyẹwhe.” (Salmu lẹ 90:2) Enẹ dohia dọ mẹde ma dá Jiwheyẹwhe, podọ e ma tindo bibẹ. Amọ́, Biblu dohia dọ aihọn tindo “bẹjẹeji.”—Osọhia 4:11.
Owanyi Nọ Gọalọna Mí Nado Duto Obu Ji
16 Satani yọnẹn dọ ogbẹ̀ mítọn nọ vẹna mí. Podọ, e sọalọakọ́n dọ nuhe mí tindo lẹpo etlẹ yin haṣinṣan mítọn hẹ Jehovah wẹ mí na yí do sanvọ́ nado basi hihọ́na ogbẹ̀ mítọn dintọn. (Jobu 2:4, 5) Lehe Satani klọ ede do sọ! Amọ́, na Satani wẹ “mẹhe tindo huhlọn nado hẹn okú wá lọ” wutu, e nọ yí obu jọwamọ tọn mítọn na okú zan nado sisẹ́ mí nado gbẹ́ Jehovah dai. (Heb. 2:14, 15) To ninọmẹ delẹ mẹ, devizọnwatọ Satani tọn lẹ nọ sìn-adán nado hù sinsẹ̀n-basitọ Jehovah tọn lẹ eyin yé ma mọ́n yise yetọn. To ninọmẹ devo lẹ mẹ, Satani sọgan yí ninọmẹ nukunpedomẹgo dotowhé tọn niyaniya tọn de zan nado hẹn mí nado jogbe. Doto kavi hagbẹ whẹndo tọn mayisenọ lẹ gán gbidikọna mí nado dohùn, yèdọ nude he ka na gbà osẹ́n Jiwheyẹwhe tọn. Kavi mẹde gán tẹnpọn nado diọlinlẹnna mí nado lẹnnupọndo nukunpedomẹgo devo he jẹagọdo nunọwhinnusẹ́n Owe-wiwe tọn lẹ ji.
17 Dile etlẹ yindọ mí ma nọ jlo na kú, mí yọnẹn dọ owanyi he Jehovah do na mí ma na doalọte, eyin mí tlẹ kú. (Hia Lomunu lẹ 8:37-39.) Eyin họntọn Jehovah tọn lẹ kú, yé nọ gbọṣi oflin etọn mẹ, taidi dọ yé gbẹ́ to ogbẹ̀ wẹ nkọ. (Luku 20:37, 38) E do ojlo vẹkuvẹku nado hẹn yé gọwá ogbẹ̀. (Jobu 14:15) Jehovah ko suahọ daho de, na mí nido “tindo ogbẹ̀ madopodo.” (Joh. 3:16) Mí yọnẹn dọ Jehovah yiwanna mí sisosiso bosọ nọ penukundo mí go. Enẹwutu, kakati nado jo Jehovah do whenue mí to azọ̀njẹ kavi whenue yè sìn okú dán na mí, mí nọ lẹhlan ewọ nado mọ homẹmimiọn, nuyọnẹn po huhlọn po yí. Nuhe Valérie po asu etọn po wà pẹẹ niyẹn.—Salm. 41:3.
Onú Sisosiso Gbigbọmẹ Tọn Lẹ
Be A Tindo Angẹli Hihọ́-Basinamẹtọ de Wẹ Ya?
Biblu ma plọnmẹ dọ dopodopo mítọn tindo angẹli hihọ́-basinamẹtọ de gba. Nugbo wẹ dọ Jesu dọ pọ́n dọ: “Mì hẹn ẹn diun ma nado gbẹkọ dopo to omẹ pẹvi ehelẹ [devi Klisti tọn lẹ] mẹ go, na yẹn dọna mì dọ whepoponu wẹ angẹli yetọn lẹ to olọn mẹ nọ tin to Otọ́ ṣie he tin to olọn mẹ nukọn.” (Matiu 18:10) Ṣigba, kakati nado mọnukunnujẹ enẹ mẹ dọ mẹdopodopo wẹ tindo angẹli hihọ́-basinamẹtọ de, nuhe dọ Jesu te poun wẹ yindọ angẹli lẹ sọgan yinuwa do ota devi etọn dopodopo tọn mẹ. Enẹwutu, sinsẹ̀n-basitọ nugbo lẹ ma nọ yinuwa po yamakinanu po kavi ze yede do owù mẹ bo nọ lẹndọ angẹli Jiwheyẹwhe tọn lẹ na basi hihọ́na yé gba.
Be enẹ dohia dọ angẹli lẹ ma nọ gọalọna gbẹtọ lẹ wẹ ya? Lala. (Salmu lẹ 91:11) Mẹdelẹ nọ kudeji dọ Jiwheyẹwhe ko gọalọna yé gbọn hihọ́-basinamẹ po anademẹ angẹli lẹ tọn po dali. Kenneth he yin nùdego to hosọ bẹjẹeji tọn mẹ, yin dopo to omẹ mọnkọ lẹ mẹ. Dile etlẹ yindọ mí ma na yin hẹngogonọ gando enẹ go, nuhe e dọ sọgan sọgbe. Kunnudetọ Jehovah tọn lẹ nọ saba mọ kunnudenu lọ dọ angẹli lẹ nọ gọalọna yé to whenue yé to yẹwhehodọ. Ṣigba, na mí ma nọ mọ angẹli lẹ wutu, mí ma sọgan dọ obá he mẹ Jiwheyẹwhe nọ yí yé zan jẹ nado gọalọna mẹdopodopo to whẹho voovo lẹ mẹ. Etomọṣo, e ma yin nuṣiwa eyin mí nọ dopẹna Ganhunupotọ lọ na nudepope he e ko wà nado nọgodona mí.—Kolosinu lẹ 3:15; Jakọbu 1:17, 18.
7-13 OCTOBRE
NUHỌAKUẸ LẸ SỌN OHÓ JIWHEYẸWHE TỌN MẸ SALMU LẸ 92-95
Jehovah Sinsẹ̀n Wẹ Doale Hugan to Gbẹ̀mẹ
Jọja lẹ Emi, Be Yanwle Gbigbọmẹ Tọn lẹ Nọ Duahunmẹna Mì Ya?
5 Whẹwhinwhẹ́n tintan he wutu mí nọ ze yanwle gbigbọmẹ tọn lẹ dai wẹ nado dohia Jehovah dọ mí yọ́n pinpẹn owanyi etọn po nuhe e ko wà na mí lẹ po tọn taun. Salmu-kantọ lọ doayi e go dọmọ: “E yọ́n nado nọ dopẹna Jehovah . . . Na hiẹ ko yí azọ́n towe lẹ do hẹn homẹ ṣie hùn, Jehovah E; yẹn nọ yí ayajẹ do dawhá, na azọ́n alọ towe tọn lẹ wutu.” (Salm. 92:1, 4) Taidi jọja de, lẹnnupọndo nuhe sin ahọ́ a dù do Jehovah lẹpo ji. Ogbẹ̀ towe, yise towe, Biblu, agun lọ po todido sọgodo tọn jiawu he a tindo po. Gbigbọnu lẹ zizedo otẹn tintan mẹ yin aliho de nado do pinpẹn-nutọn hia Jiwheyẹwhe na dona enẹlẹ, podọ ehe nọ hẹn we dọnsẹpọ ewọ dogọ.
Mẹnu Wẹ to Anadena Pọndohlan Towe?
8 Taidi mẹjitọ dagbe de, Jehovah nọ jlo dọ ovi emitọn lẹ ni tindo gbẹzan kọdetọn dagbenọ hugan lọ dile e yọnbasi do. (Isa. 48:17, 18) Enẹwutu, e wleawuna nunọwhinnusẹ́n dodonu tọn lẹ gando walọyizan dagbe po nuyiwa mítọn hẹ mẹdevo lẹ po go. Gando whẹho mọnkọ lẹ go, ewọ biọ to mí si nado wleawuna aliho nulẹnpọn tọn etọn nkọ podọ nado nọ kẹalọyi nujinọtedo etọn lẹ. Ehe ma yin aliglọnnamẹnu de paali, kakatimọ e nọ hẹn nugopipe nulẹnpọn tọn mítọn pọnte, jideji, podọ gbloada. (Salm. 92:5; Howh. 2:1-5; Isa. 55:9) E nọ gọalọna mí nado basi nudide he nọ dekọtọn do ayajẹ mẹ lẹ, ṣogan bọ mí gbẹ́ nọ tindo mẹdekannujẹ mítọn. (Salm. 1:2, 3) Na nugbo tọn, pọndohlan Jehovah tọn tintindo yin alenu podọ awuvivinu taun!
A Họakuẹ to Nukun Jehovah Jiwheyẹwhe Towe Tọn Mẹ!
18 Dile agbasa mítọn to godo yì, mí sọgan kudeji dọ Jehovah gán gbẹ́ yí mí zan. (Salm. 92:12-15) Jesu plọn mí dọ eyin nugopipe mítọn lẹ tlẹ do dogbó kavi vivẹnudido mítọn lẹ nọ taidi nuhe whè to nukun mítọn mẹ, Jehovah uwọ nọ yọ́n pinpẹn nudepope he mí penugo nado wà to sinsẹ̀nzọn etọn mẹ tọn. (Luku 21:2-4) Enẹwutu, nọ ze ayiha do nuhe a sọgan wà lẹ ji. Di apajlẹ, a sọgan nọ dọho gando Jehovah go, nọ hodẹ̀ na mẹmẹsunnu towe lẹ bosọ nọ na tuli mẹdevo lẹ nado hẹn nugbonọ-yinyin yetọn go. Jehovah nọ pọ́n we hlan di azọ́nwatọ hatọ etọn, e ma yin na nuhe a wadotana lẹ wutu gba, ṣigba na a nọ desọn ojlo mẹ nado setonuna ẹn wutu.—1 Kọl. 3:5-9.
Onú Sisosiso Gbigbọmẹ Tọn Lẹ
‘Ṣo Na Nuyọnẹn Jiwheyẹwhe Tọn Siso Sọ!’
18 Doayi lehe apọsteli Paulu basi zẹẹmẹ lehe nuyọnẹn Jehovah tọn jiawu sọ do go: “Ṣo! Na adọkun, nuyọnẹn po zinzin Jiwheyẹwhe tọn po siso sọ! Nawẹ whẹdida etọn lẹ yin dinmamọdona sọ, podọ aliho etọn lẹ sọ hugan dindinmọ!” (Lomunu lẹ 11:33) Gbọn wefọ lọ bibẹjẹeji po hogbe nupaṣamẹ tọn lọ “Ṣo” po dali, Paulu do numọtolanmẹ sinsinyẹn de—yèdọ sisi sisosiso hia to whẹho ehe mẹ. Hogbe Glẹki tọn he e yizan na “siso” tindo kanṣiṣa pẹkipẹki hẹ hogbe heyin yiyizan na “odò mapote.” Enẹwutu, hogbe lọ wleawuna pọndohlan he họnwun de. Eyin mí lẹnnupọndo nuyọnẹn Jehovah tọn ji, e nọ taidi dọ mí to odò sisosiso, mapote, he ma tindo vivọnu de mẹ pọ́n nkọtọn, yèdọ odò de he siso bo gbloada sọmọ bọ mí ma sọgan mọnukunnujẹ lehe e siso sọ mẹ, bo basi zẹẹmẹ etọn kavi jlẹ́ gbigblo etọn. (Psalm 92:5) Be enẹ mayin linlẹn he sẹhundaga de ya?
14-20 OCTOBRE
NUHỌAKUẸ LẸ SỌN OHÓ JIWHEYẸWHE TỌN MẸ SALMU LẸ 96-99
‘Nọ Lá Wẹndagbe Lọ’!
Etẹwẹ Wẹndagbe lọ Yin?
KLISTIANI lẹ dona dọyẹwheho “wẹndagbe ahọluduta lọ tọn” gbọn hodidọ na mẹdevo lẹ gandego dali, bo basi zẹẹmẹ na yé dọ Ahọluduta lọ wẹ gandudu sọgodo tọn he na dugán do aigba ji to dodowiwa mẹ. Etomọṣo, Biblu sọ yí hogbe lọ “wẹndagbe” zan to aliho devo lẹ mẹ. Di apajlẹ, mí mọ alọdlẹndonu delẹ taidi, “wẹndagbe whlẹngán tọn” (Psalm 96:2, NW); “wẹndagbe Jiwheyẹwhe tọn lọ” (Lomunu lẹ 15:16); po “wẹndagbe he gando Jesu Klisti go lọ” po.—Malku 1:1.
Do glido, wẹndagbe lọ bẹ nugbo he go Jesu dọho gando bọ devi etọn lẹ wlan dai lẹpo hẹn. Whẹpo Jesu do hẹji yì olọn mẹ, e dọna hodotọ etọn lẹ dọmọ: “Enẹwutu, mì yì bo hẹn gbẹtọ lẹ sọn akọta lẹpo mẹ zun devi lẹ, bosọ nọ baptizi yé to oyín Otọ́ tọn, Visunnu tọn, po gbigbọ wiwe tọn po mẹ, bo nọ plọn yé nado payi nuhe yẹn ko degbe etọn na mì lẹpo go.” (Matiu 28:19, 20) Enẹwutu, azọ́n Klistiani nugbo lẹ tọn ma yin nado dọhona mẹdevo lẹ gando Ahọluduta lọ go kẹdẹ gba; yé sọ dona dovivẹnu nado hẹn gbẹtọ lẹ zun devi.
Etẹwẹ Na Jọ to Whẹdazangbe?
Dile e yin didohia do to yẹdide he tin to adusiwhé, mẹsusu nọ lẹndọ to Whẹdazangbe, gbẹtọ liva susu lẹ na yin hinhẹnwa ofìn Jiwheyẹwhe tọn nukọn nado yin whẹdana sọgbe hẹ nuhe yé ko wà wayi lẹ: mẹdelẹ na duvivi ogbẹ̀ tọn to olọn mẹ bọ mẹdevo lẹ na yin yasana to zòmẹ. Ṣigba, Biblu dohia dọ lẹndai Whẹdazan tọn wẹ nado whlẹn gbẹtọ lẹ sọn mawadodo mẹ. (Psalm 96:13) Jiwheyẹwhe ko de Jesu taidi Whẹdatọ he na hẹn dodowiwa gọwá na gbẹtọvi lẹ.—Hia Isaia 11:1-5; Owalọ lẹ 17:31.
Jijọho Na Tin Na Owhe Fọtọ́n—Podọ Kakadoi!
18 Haṣinṣan dagbe enẹ doalọte to whenue Satani sisẹ́ gbẹtọvi lẹ nado ṣiatẹ sọta nupojipetọ-yinyin Jehovah tọn. Ṣigba sọn 1914 gbọ́n, Ahọluduta Mẹsia tọn ko to afọdide lẹ ze vudevude nado hẹn jijọho po kọndopọ enẹ po gọwá. (Efe. 1:9, 10) To Gandudu Owhe Fọtọ́n tọn lọ whenu, onú jiawu he “ma nọ yin mimọ” todin lẹ na jọ. Enẹgodo wẹ “opodo” lọ na wá, yèdọ opodo Gandudu Owhe Fọtọ́n tọn Klisti tọn. Etẹwẹ na jọ to whenẹnu? Dile etlẹ yindọ “aṣẹ lẹpo ko yin nina [Jesu] to olọn mẹ podọ to aigba ji,” ewọ ma yin nukunkẹnnọ. E ma tindo ojlo nado hò otẹn Jehovah tọn yí. Po whiwhẹ po e na “ze ahọluduta [lọ] do alọmẹ na Jiwheyẹwhe podọ Otọ́ etọn.” Whelẹponu wẹ e nọ yí otẹn po aṣẹpipa vonọtaun he e tindo po zan ‘na gigo Jiwheyẹwhe tọn.’—Mat. 28:18; Flp. 2:9-11.
19 To ojlẹ enẹ mẹ, mẹjidugando Ahọluduta lọ tọn he tin to aigba ji lẹ na ko yin hinhẹn jẹ pipé kọ̀n. Yé na hodo apajlẹ Jesu tọn bo na yí whiwhẹ po ojlo po do kẹalọyi nupojipetọ-yinyin Jehovah tọn. Yé na do ojlo yetọn nado wàmọ hia to whenue yé na jugbọn mẹtẹnpọn godo tọn lọ mẹ po kọdetọn dagbe po. (Osọ. 20:7-10) To enẹgodo, atẹṣitọ lẹpo—vlavo e yin gbẹtọvi kavi nudida gbigbọnọ—na yin vivasudo kakadoi. Lehe enẹ na yin ojlẹ ayajẹ po aglinjijẹ po tọn de do sọ! Mẹlẹpo to whẹndo Jehovah tọn mẹ, yèdọ to olọn mẹ podọ to aigba ji, na yí ayajẹ do pà ewọ. Podọ Jehovah na yin “onú lẹpo na mẹlẹpo.”—Hia Psalm 99:1-3.
Onú Sisosiso Gbigbọmẹ Tọn Lẹ
it-1-F 425 huk. 5
Ohàn
E ma yin owe Salmu lẹ tọn kẹdẹ mẹ wẹ hodidọ lọ “ohàn yọyọ de” yin nùdego te, amọ́ e sọawuhia to kandai Isaia po apọsteli Johanu po tọn lẹ mẹ ga. (Slm 33:3; 40:3; 96:1; 98:1; 144:9; 149:1; Isa 42:10; Osọ 5:9; 14:3) Dogbigbapọnna suhugan lẹdo hodidọ tọn he mẹ “ohàn yọyọ” sọawuhia te lẹ tọn dohia dọ ohàn ehe yin jiji, na Jehovah yinuwa taidi nupojipetọ wẹkẹ lọ tọn to aliho yọyọ de mẹ wutu. Dile e yin lilá po ayajẹ po to Salmu lẹ 96:10 mẹ do: “Jehovah ko lẹzun Ahọlu!” Aliho yọyọ he mẹ Jehovah to kandlẹnna ahọlu-yinyin etọn te lẹ, gọna nuhe yé zẹẹmẹdo na olọn po aigba po, ji wẹ “ohàn yọyọ” ehe sinai do.—Slm 96:11-13; 98:9; Isa 42:10, 13.
21-27 OCTOBRE
NUHỌAKUẸ LẸ SỌN OHÓ JIWHEYẸWHE TỌN MẸ SALMU LẸ 100-102
Yọ́n Pinpẹn Owanyi Nugbo Jehovah Tọn
Lehe A Gán Wleawufo Nado Yí Baptẹm Do
18 Owanyi towe na Jehovah yin jẹhẹnu dagbedagbe de, yèdọ jẹhẹnu dagbe hugan he a tindo. (Hia Howhinwhẹn lẹ 3:3-6.) Owanyi sisosiso tintindo na Jiwheyẹwhe gán gọalọna we nado pehẹ nuhahun gbẹ̀mẹ tọn lẹ po kọdetọn dagbe po. Biblu nọ saba donù owanyi nugbo Jehovah tọn na devizọnwatọ etọn lẹ go. Kanṣiṣa he sinyẹn taun de wẹ he ma nọ busẹ gbede, e nọ gbọṣi aimẹ. (Salm. 100:5) A yin didá to apajlẹ Jiwheyẹwhe tọn mẹ. (Jen. 1:26) Nawẹ a gán nọ do owanyi mọnkọ hia gbọn?
19 Jẹnukọn whẹ́, wleawuna pinpẹn-nutọn-yinyọnẹn. (1 Tẹs. 5:18) To azán dopodopo ji, nọ kanse dewe dọ, ‘Nawẹ Jehovah ko do owanyi etọn hia mi gbọn?’ Enẹgodo, nọ hẹn ẹn diun dọ a nọ dopẹna Jehovah to odẹ̀ towe lẹ mẹ bo nọ donù onú tangan he e wà na we lẹ go. Nọ mọ nuyiwa owanyi tọn etọn lẹ hlan taidi dehe yin didohia we tlọlọ dile apọsteli Paulu wá mọnukunnujẹemẹ do gando Jehovah go. (Hia Galatianu lẹ 2:20.) Nọ kanse dewe dọ, ‘Be yẹnlọsu jlo na do owanyi ṣie hia ẹ ga ya?’ Owanyi na Jehovah na gọalọna we nado nọ nọavùnte sọta mẹtẹnpọn lẹ zọnmii bosọ pehẹ nuhahun lẹ po kọdetọn dagbe po. E na whàn we nado tẹdo aṣa gbigbọmẹ tọn towe lẹ go, podọ nado nọ to owanyi towe na Otọ́ towe dohia egbesọegbesọ.
“Mì Gbọṣi Lẹnpọn Dagbenọ-Yinyin Mẹ, Mì Nọ Aṣeji!”
10 Owù he mí dona dapana lẹ bẹ nudelẹ hẹn taidi, wantuntun, nùnù zẹjlẹgo, dùdù zẹjlẹgo, ohó mẹhẹngble tọn didọ pé, ayidedai he bẹ danuwiwa hẹn lẹ pinpọn, yẹdide fẹnnuwiwa tọn pinpọn po onú mọnkọ lẹ po. (Salm. 101:3) Kẹntọ mítọn Lẹgba nọ to dotẹnmẹ lẹ dín mapote nado hẹn họntọnjiji mítọn hẹ Jehovah gble. (1 Pita 5:8) Eyin mí ma to aṣeji, Satani gán do okún nuvẹun, nugbomadọ, nukunkẹn, wangbẹna, sakla po mẹhẹndohomẹ po tọn do ayiha po ahun mítọn po mẹ. (Gal. 5:19-21) To bẹjẹeji, ayilinlẹn ehelẹ gán nọma doadọ̀do sọmọ. Amọ́, eyin mí ma ze afọdide lẹ to afọdopolọji nado họnadọ̀na yé, yé na zindonukọn bo to whinwhẹ́n taidi atin adínọ de bo na hẹn nuhahun wá.—Jak. 1:14, 15.
Be Hiẹ Na Setonuna Avase Họnwun Jehovah Tọn lẹ Ya?
7 Etẹwẹ mí dona wà nado dapana mẹplọntọ lalo lẹ? Mí ma dona nọ kẹalọyi yé do owhé mítọn gbè kavi dọnudo yé gba. Mọdopolọ, mí ma dona nọ hia owe yetọn lẹ, pọ́n yé to televiziọn kavi nọtẹn Internet tọn yetọn lẹ ji, kavi dọho nado nọgodona nuhe yé kàn do Internet ji lẹ gba. Naegbọn mí dona magbe nado dapana yé? Tintan, na mí yiwanna “Jiwheyẹwhe nugbo tọn” lọ wutu. Enẹwutu, mí ma dona nọ dotoaina nuplọnmẹ lalo he jẹagọdo nugbo he tin to Ohó Jiwheyẹwhe tọn mẹ lẹ. (Ps. 31:5; Joh. 17:17) Humọ, mí yiwanna titobasinanu he Jehovah nọ yizan nado plọn mí nugbo jiawu etọn lẹ. Titobasinanu lọ wẹ plọn oyín Jehovah tọn mí po nuhe e zẹẹmẹdo po, lẹndai Etọn na aigba, nuhe nọ jọ do mí go to whenue mí kú, gọna todido fọnsọnku tọn. Be hiẹ flin lehe homẹhun we do whla tintan he a sè onú ehelẹ po nugbo họakuẹ devo lẹ po ya? Enẹwutu, ma dike nuplọnmẹ agọ̀ mẹplọntọ lalo lẹ tọn ni hẹn we nado jo titobasinanu he plọn we nugbo ehelẹ do blo.—Joh. 6:66-69.
8 Mahopọnna nudepope he mẹplọntọ lalo lẹ sọgan dọ, mí ma dona hodo yé! Ale depope ma to e mẹ nado dotoaina mẹhe taidi dotọ̀ húhú enẹlẹ. Eyin mẹde dotoaina yé, e na jẹflumẹ. Enẹwutu, mì gbọ mí ni magbe nado gbọṣi nugbonọ-yinyin mẹ na Jehovah po titobasinanu etọn po. Titobasinanu ehe ma ko hẹn mí jẹflumẹ pọ́n gbede podọ e nọ to osin wiwe ṣeke he nọ wá sọn Biblu mẹ na mí tẹgbẹ.—Isa. 55:1-3; Mat. 24:45-47.
Onú Sisosiso Gbigbọmẹ Tọn Lẹ
it-2-F 522 huk. 11-12
Tọ̀pápá-Bẹ́gaa
Eyin tọ̀pápá-bẹ́gaa dùnú gọhò, e nọ saba zlọn yì fie to olá de bo nọ wànu didọ e jẹflumẹ nkọ. E nọ kì ota do awà mẹ bo ma nọ whàngo paali bọ eyin yè mọ ẹn sọn olá, yè gán vẹ̀do dọ osé wewe de wẹ. Ohẹ̀ lọ nọ nọ̀ mọ na gànhiho susu, podọ ehe sọgbe hẹ ninọmẹ flumẹjijẹ tọn he go salmu-kàntọ de dọho gando to whenue e basi zẹẹmẹ lehe aluẹmẹninọ etọn sinyẹn do tọn bo wlan dọmọ: “N’wá taidi tọ̀pápá-bẹ́gaa danfafa ji tọn.” (Slm 102:6) Tofi, hogbe lọ “danfafa” ma to alọdlẹndo danfafa jọnun dandan, amọ́ lẹdo de he dẹn do fie gbẹtọ nọ nọ̀ poun, vlavo ogbà de. To ojlẹ owhe lọ tọn delẹ mẹ, tọ̀pápá-bẹgaa lẹ gbẹ́ nọ wá nọ ogbà he to agewaji Agbàdo Jọdani tọn lẹ mẹ. Tọ̀pápá-bẹ́gaa wunmẹ atọ̀n wẹ nọ yin mimọ to Islaeli. Dehe gbayipe hugan wẹ dehe nọ do sinmẹ wewe (Pelecanus onocrotalus). Wunmẹ devo tin bo nọ do sinmẹ yuu to tonù awà etọn lẹ tọn bọ obẹ́ odò tọn etọn nọ do sinmẹ vẹẹ ṣẹṣẹ (Pelecanus crispus). Wunmẹ atọ̀ntọ lọ nọ bia to nẹgbé (Pelecanus rufescens). Yè ma nọ saba mọ wunmẹ awe he gbọngodo lọ lẹ.
Tọ̀pápá-bẹ́gaa nọ yiwanna fie yè ma nọ pọ̀ bọ gbẹtọ ma na dotukla ẹ te lẹ taun. Finẹ wẹ e nọ do adọ́ do, nọ flé azìn do bosọ nọ nọ̀ to whenue e wle whèvi godo. Na ohẹ̀ ehe nọ yiwanna fie gbọgbé bọ e gán nọ ṣokẹdẹ te lẹ wutu, Biblu nọ yí i zan taidi ohia gbakija mlẹnmlẹn tọn. Isaia dọ dọdai dọ tọ̀pápá-bẹ́gaa na yí aigba Edomi tọn do basi nutindo etọn nado do gbakija he ja aigba lọ ji hia. (Isa 34:11) Zefania dọ dọdai dọ tọ̀pápá-bẹ́gaa lẹ na nọ nọ̀ dòtin dahodaho Nineve tọn lẹ ṣẹnṣẹn, ehe dohia dọ e na yin vivasudo mlẹnmlẹn bọ gbẹtọ ma nasọ nọ nọ̀ e mẹ.—Zef 2:13, 14.
AWUWIWLENA LIZỌNYIZỌN KUNNUDEGBE TỌN
ijwbq 129
Owe Nankọ Wẹ Biblu Yin?
Lala. Weyọnẹntọ lẹ ko yiagbọji do yí owe Biblu tọn hohowhenu tọn lẹ jlẹdo Biblu he tin to egbé go bo mọdọ owẹ̀n dowhenu tọn he to Biblu mẹ ma ko diọ. E sọgbe dọ e ni yinmọ, na eyin Jiwheyẹwhe jlo dọ mẹlẹ ni hia ohó emitọn bosọ mọnukunnujẹemẹ, be a ma lẹndọ e na wà nulẹpo bọ owẹ̀n etọn ma na diọ ya?—Isaia 40:8.
28 OCTOBRE–3 NOVEMBRE
NUHỌAKUẸ LẸ SỌN OHÓ JIWHEYẸWHE TỌN MẸ SALMU LẸ 103-104
Ewọ Nọ Flindọ “Kọ́gudu Wẹ Mí”
Nọ Hodo Apajlẹ Jehovah Tọn—Nọ Yin Lẹnpọn Dagbenọ
5 Whiwhẹ po awuvẹmẹ Jehovah tọn po nọ whàn ẹn nado yin lẹnpọn dagbenọ. Di apajlẹ, whiwhẹ Jehovah tọn họnwun whenue e wleawufo nado và mẹylankan he to Sodọmi lẹ sudo. Jehovah yí angẹli de zan nado dọna Lọti dodonọ lọ nado họnyi lẹdo osó tọn lẹ mẹ. Lọti dibu nado yì finẹ. Enẹwutu, e vẹvẹ dọ ewọ po whẹndo etọn po ni yin dotẹnmẹ na nado yì bẹta do Zoali, yèdọ tòpẹvi de he Jehovah ko basi tito nado vasudo. Jehovah gán ko tẹkudeji dọ Lọti ni hodo anademẹ emitọn lẹ tẹnwin-lẹnwin. Kakatimọ, e kẹalọyi obiọ Lọti tọn, dile etlẹ yindọ ehe zẹẹmẹdo dọ Zoali ma nasọ yin vivasudo ba. (Jen. 19:18-22) To owhe kanweko susu lẹ godo, Jehovah do awuvẹmẹ hia tòmẹnu Nineve tọn lẹ. E do yẹwhegán Jona hlan nado lá dọ vasudo tòdaho lọ po mẹylankan he nọ nọ̀ e mẹ lẹ po tọn to unklẹn. Amọ́ whenue Ninevenu lẹ lẹnvọjọ, Jehovah diọlinlẹn gando yé go bo whlẹn tòdaho lọ.—Jona 3:1, 10; 4:10, 11.
Nọ Ganjẹ Jehovah Go Dile Samsọni Wà Do
16 Dile etlẹ yindọ Samsọni jiya kọdetọn vẹadi nuṣiwa etọn lẹ tọn, e ma doalọtena vivẹnudido nado wà ojlo Jehovah tọn. Eyin mí tlẹ ṣinuwa bo do hudo wọhẹmẹ tọn kavi hẹn azọngban de bu, mí ma dona jogbe. Nọ flindọ agbọ́ mítọn ma nọ pé Jehovah. (Salm. 103:8-10) Mahopọnna nuṣiwa mítọn lẹ, mí gán gbẹ́ yọ́n-na-yizan na Jehovah dile e yin do na Samsọni.
17 Lẹnnupọndo apajlẹ mẹmẹsunnu jọja de he nọ yin Michael tọn ji. E hẹn alọnu etọn ján to nuwiwa yẹwhehọluduta tọn lẹ mẹ bo sẹ̀n taidi devizọnwatọ lizọnyizọnwiwa tọn podọ gbehosọnalitọ whepoponu tọn. Amọ́, e blawu dọ e jai jẹ nuṣiwa de mẹ, ehe zọ́n bọ e hẹn lẹblanulọkẹyi etọn lẹ bu to agun mẹ. E dọmọ: “Kakajẹ ojlẹ enẹ mẹ, nulẹpo to yìyì na mi ganji to sinsẹ̀nzọn ṣie na Jehovah mẹ. Amọ́ to ajiji mẹ, e taidi na mi dọ n’gbà ota do adó go wẹ nkọ. E ma wá ayiha mẹ na mi pọ́n dọ Jehovah na gbẹ́ mi dai, amọ́ na nugbo tọn, n’nọ kanse dee eyin n’na gbẹ́ tindo haṣinṣan dopolọ po e po kavi eyin n’nasọ wá penugo nado sẹ̀n ẹn to agun mẹ to gigọ́ mẹ dile n’ko wà do wayi.”
18 E jẹna ayidego dọ Michael ma jogbe. E yidogọ dọmọ: “N’na ayidonugo haṣinṣan ṣie hẹ Jehovah vivọjlado bo nọ dọ nuhe to ahun ji na mi lẹ na ẹn to odẹ̀ mẹ, bo nọ plọn Biblu bosọ nọ lẹnayihamẹpọn.” To nukọn mẹ, Michael gọ̀ lẹblanulọkẹyi etọn lẹ mọyi to agun mẹ. E to sinsẹ̀n todin taidi mẹho agun tọn podọ taidi gbehosọnalitọ whepoponu tọn. E dọmọ: “Godonọnamẹ po tuli he n’mọyi lẹ po, titengbe sọn mẹho agun tọn lẹ dè, gọalọna mi nado mọdọ Jehovah gbẹ́ yiwanna mi. N’gán vọ́ sẹ̀n to agun mẹ whladopo dogọ po ayihadawhẹnamẹnu wiwe de po. Nujijọ ehe plọn mi dọ Jehovah na jona mẹdepope he lẹnvọjọ nugbonugbo.” Mí gán kudeji dọ Jehovah na yí mí zan bosọ dona mílọsu eyin mí tlẹ ṣinuwa, dile e na dẹnsọ bọ mí nọ wà nuhe go mí pé lẹpo nado basi vọjlado lẹ bo zindonukọn nado nọ ganjẹ ewọ go.—Salm. 86:5; Howh. 28:13.
A Gán Jẹ Yanwle Gbigbọmẹ Tọn Towe lẹ Kọ̀n
2 Eyin a tindo yanwle de to alọnu he kọ̀n a ma ko jẹ, jaale bo ma gbọjọ blo. Etlẹ yin yanwle kleunkleun lẹ kọ̀n jijẹ nọ saba biọ whenu po vivẹnudido sinsinyẹn po. Nugbo lọ dọ a gbẹ́ tindo ojlo nado jẹ yanwle towe kọ̀n nọ dohia dọ a yọ́n pinpẹn haṣinṣan towe hẹ Jehovah tọn bosọ jlo na na ẹn dagbe hugan towe. Vivẹnudido towe lẹ nọ sù to nukun Jehovah tọn mẹ. Na nugbo tọn, e ma nọ donukun dọ a ni wà nuhe zẹ̀ nugopipe towe go. (Salm. 103:14; Mika 6:8) Enẹwutu, yanwle towe dona sọgbe hẹ lẹnpọn dagbe, enẹ wẹ sọgbe hẹ ninọmẹ towe. Eyin mọ wẹ, etẹwẹ a gán wà nado jẹ e kọ̀n? Mì gbọ mí ni dọhodo ayinamẹ delẹ ji.
Onú Sisosiso Gbigbọmẹ Tọn Lẹ
Huhlọn Nudida Tọn—“Mẹhe Dá Olọn po Aigba Po”
18 Etẹwẹ mí plọn sọn aliho he mẹ Jehovah yí huhlọn nudida tọn etọn zan te mẹ? Nudida voovo etọn lẹ hẹn mí nado tindo sisi sisosiso na ẹn. Psalm-kantọ dopo dọmọ: “Na azọ́n towe sù dole, OKLUNỌ E! . . . Aigba gọ́ na nutindo towe.” (Psalm 104:24) Lehe enẹ yin nugbo do sọ! Lẹnunnuyọnẹntọ nutogbẹ̀ lẹ tọn ko mọ nutogbẹ̀ voovo hugan livi dopo to aigba ji; ṣogan, sọha-yí-nanu yetọn gbọnvo, delẹ to yé mẹ yise dọ nudi nutogbẹ̀ livi donu 10 wẹ tin, mẹdevo lẹ dọ livi donu 30, kavi humọ. Alọnu-zọ́nwatọ de he nọ dè yẹdide sọgan mọ to whedelẹnu dọ emi ma sọ yọ́n nuhe emi na dè ba. Ṣigba, e ma yinmọ na Jehovah gba—huhlọn etọn nado dá onú yọyọ he gbọnvona yedelẹ ma nọ vọ̀ pọ́n gbede.