Alọdlẹndonu Nuplọnwe Opli Gbẹzan po Lizọnyizọn po Tọn
© 2024 Watch Tower Bible and Tract Society of Pennsylvania
4-10 NOVEMBRE
NUHỌAKUẸ LẸ SỌN OHÓ JIWHEYẸWHE TỌN MẸ SALMU LẸ 105
“Ewọ Nọ Flin Alẹnu Etọn Kakadoi”
Nọ Hẹn Yise Towe to Opagbe Aihọn Yọyọ lọ Tọn mẹ Lodo
11 Lẹnnupọndo nudelẹ he Jehovah dopà nado wà na omẹ etọn lẹ to hohowhenu bọ yé taidi nuhe ma yọnbasi lẹ ji. E hẹn Ablaham po Sala po deji dọ yé na ji visunnu de to yọnhowhe yetọn mẹ. (Jen. 17:15-17) E sọ dọna Ablaham dọ kúnkan etọn lẹ wẹ na dugu aigba Kenani tọn. To owhe planplan he kúnkan Ablaham tọn lẹ, yèdọ Islaelivi lẹ nọ kanlinmọgbenu to Egipti na lẹ whenu, opagbe enẹ gán ko taidi nuhe ma na mọ hẹndi gbede. Amọ́ e jọ domọ pẹpẹ. To nukọn mẹ, Jehovah dọna nawe mẹhomẹ lọ Elizabẹti dọ e na ji visunnu de. E sọ dọna yọnnu alọji de he nọ yin Malia dọ ewọ wẹ na ji Visunnu emitọn titi, mẹhe Jehovah ko dopà wiwá etọn tọn owhe fọtọ́n susu lẹ jẹnukọn to jipa Edẹni tọn mẹ, yèdọ opagbe devo he mọ hẹndi!—Jen. 3:15.
12 Mí nọ hẹn yise mítọn lodo dọ Jehovah dohuhlọn nado hẹn aihọn yọyọ de wá eyin mí nọ lẹnnupọndo opà he e do lẹ gọna lehe e ko hẹn yé di do ji. (Hia Jọṣua 23:14; Isaia 55:10, 11.) Ehe nọ hẹn mí penugo dogọ nado gọalọna mẹdevo lẹ nado mọdọ opagbe aihọn yọyọ lọ tọn ma yin odlọ kavi hopàdọ de poun. Jehovah lọsu dọ gando olọn yọyọ po aigba yọyọ lọ po go dọ: “Ohó ehelẹ tindo jidide bo yin nugbo.”—Osọ. 21:1, 5.
it-2-F 493 huk. 9
Ohó Lọ
Nudida he tindo gbọfufu po dehe ma tindo gbọfufu lẹ po to anademẹ ohó Jiwheyẹwhe tọn glọ, bọ ewọ gán nọ yí yé zan nado hẹn lẹndai etọn lẹ di. (Slm 103:20; 148:8) Yè gán dejido ohó etọn go; eyin Jiwheyẹwhe dopà nude tọn, e sọ nọ flin nado wà nulọ. (De 9:5; Slm 105:42-45) Dile ewọ lọsu dọ do, ohó etọn “na gbọṣi aimẹ kakadoi”; e ma na lẹkọwa e dè gbede, adavo e hẹn lẹndai etọn di.—Isa 40:8; 55:10, 11; 1Pi 1:25.
Onú Sisosiso Gbigbọmẹ Tọn Lẹ
Be A Nọ Mọdọ Emi Dona Yinukọn to Gbigbọ-Liho Ya?
13 Dike Jehovah ni klọ́ we wé. Etẹwẹ a sọgan wà eyin mẹdevo lẹ ma nọ jọmẹ hẹ we? Vlavo a sọgan jlo nado yawu didẹ ninọmẹ lọ. Ṣigba to whedelẹnu, eyin a to kanván nado yiavùnlọna dewe, a na hẹn ninọmẹ lọ ylan deji. Nọvisunnu Josẹfu tọn lẹ sayana ẹn, ṣigba ewọ ma hẹn yé do homẹ. To nukọn mẹ, yè sawhẹdokọna Josẹfu bosọ ze e do gànmẹ to aliho mawadodo tọn mẹ. Etomọṣo, e dike Jehovah ni deanana ẹn to ninọmẹ sinsinyẹn enẹlẹ mẹ. Etẹwẹ yin kọdetọn lọ? “Ohó Jehovah tọn . . . klọ́ ẹ wé.” (Salm. 105:19) To whlepọn lọ lẹ godo, Josẹfu pegan na azọngban vonọtaun de. (Jen. 41:37-44; 45:4-8) Dile a to jujugbọn nuhahun sinsinyẹn lẹ mẹ, nọ biọ nuyọnẹn to odẹ̀ mẹ, nọ yinuwa bo nọ dọho dẹẹdẹ bosọ nọ lẹhlan Jiwheyẹwhe nado mọ huhlọn. Jehovah nasọ gọalọna we.—Hia 1 Pita 5:10.
11-17 NOVEMBRE
NUHỌAKUẸ LẸ SỌN OHÓ JIWHEYẸWHE TỌN MẸ SALMU LẸ 106
“Yé Wọn Jiwheyẹwhe Whlẹngántọ Yetọn”
“Mẹnu lẹ Wẹ to Adà Jehovah Tọn Mẹ?”
13 Islaelivi lẹ dibu to whenue yé mọ aslọ titli lọ, abì lọ gọna ohia jiawu Jiwheyẹwhe tọn devo lẹ. Mose kẹalọyi obiọ yetọn nado yin hoyidọtọ yetọn to hodọdopọ yetọn lẹpo hẹ Jehovah whenu to Osó Sinai kọ̀n. (Eks. 20:18-21) Mose wá yì aga pete osó lọ tọn bo nọ finẹ na ojlẹ dindẹn. Todin, be Islaelivi lẹ ma gán wà nudepope to danfafa lọ ji ba matin nukọntọ dejidego yetọn wẹ ya? E taidi dọ eyin mẹlọ lẹ to Mose mọ to ṣẹnṣẹn yetọn wẹ yé nọ tindo yise. Yé jẹ nuhà ji bo dọna Aalọn dọmọ: “Basi yẹwhe de na mí he na deanana mí, na mí ma yọ́n nuhe na ko jọ do Mose ehe go, yèdọ dawe lọ he plan mí tọ́n sọn aigba Egipti tọn ji.”—Eks. 32:1, 2.
Onú Sisosiso Gbigbọmẹ Tọn Lẹ
Nuagokun lẹ sọn Owe Atọ̀ntọ po Ẹnẹtọ Psalm lẹ Tọn po Mẹ
106:36, 37. Wefọ ehelẹ kọ̀n boṣiọ-sinsẹ̀n po avọ́sinsan hlan aovi lẹ po dopọ. Ehe dohia dọ mẹhe nọ yí boṣiọ zan sọgan wá mọ ede to nuyiwadomẹji aovi tọn glọ. Biblu na mí tuli dọmọ: “Mì joagọ sọn boṣiọ lẹ kọ̀n.”—1 Johanu 5:21.
18-24 NOVEMBRE
NUHỌAKUẸ LẸ SỌN OHÓ JIWHEYẸWHE TỌN MẸ SALMU LẸ 107-108
“Mì Nọ Dopẹna Jehovah, Na Ewọ Yọ́n”
Na Agun Ni Pà Jehovah
2 Agun ma yin pipli gbẹtọ lẹ tọn de poun gba. E ma yin pipli lẹdo de tọn kavi nọtẹn paa de fie gbẹtọ he wá sọn fidopolọ kavi he yiwanna aihundida lanmẹyiya tọn dopolọ kavi tindo nujlomẹ dopolọ lẹ nọ pli do gba. Kakatimọ, whẹwhinwhẹ́n tangan he wutu agun do tin wẹ yin nado pà Jehovah Jiwheyẹwhe. Ehe ko yinmọ sọn ojlẹ dindẹn, dile owe Psalm lẹ tọn zinnudeji do. To Psalm 35:18, mí hia dọmọ: “Yẹn na dopẹna we to agun daho mẹ: yẹn nasọ pà we to gbẹtọ susu mẹ.” Mọdopolọ, Psalm 107:31, 32 na mí tuli dọmọ: “Ṣo gbẹtọ do nọ pà OKLUNỌ na dagbewanyi etọn, podọ na azọ́n jiawu-jiawu etọn lẹ hlan ovi gbẹtọ lẹ tọn lẹ. Mì gbọ yé ni ze e daga to agun gbẹtọ lẹ tọn mẹ.”
Mì Nọ Dopẹna Jehovah bo Mọ Dona Yí
4 Eyin mí na wleawuna ahun pẹdido tọn bo hẹn ẹn domọ zọnmii, mí dona nọ yí pinpẹn-nutọn-yinyọnẹn do kẹalọyi dona he mí mọyi sọn Jehovah dè lẹ bo nọ lẹnayihamẹpọn do yé ji, bosọ nọ yí sọwhiwhe do lẹnnupọndo aliho he mẹ ewọ nọ do owanyi nugbo hia te ji. To whenue Psalm-kantọ lọ wàmọ, onú jiawu susu he Jehovah ko wà lẹ hẹn awuji i.—Hia Psalm 40:5; 107:43.
Onú Sisosiso Gbigbọmẹ Tọn Lẹ
“E Na Hẹn Mì Yin Huhlọnnọ”—Gbọnna?
20 Etlẹ yin to whenue mí yin madogánnọ, “Jiwheyẹwhe wẹ na na mí huhlọn.” (Salm. 108:13) Jehovah ko na we nuhe a do hudo etọn nado mọ huhlọn yí sọn ewọ dè lẹ. Enẹwutu, eyin a do hudo alọgọ tọn nado penukundo azọ́ndenamẹ de go, nado doakọnna whlepọn de kavi nado hẹn ayajẹ towe go, hodẹ̀ vivẹ́ hlan Jehovah bosọ dín anademẹ etọn gbọn oplọn mẹdetiti tọn gblamẹ. Nọ kẹalọyi tulinamẹ he mẹmẹsunnu po mẹmẹyọnnu towe lẹ po nọ na we. Nọ yí nukun homẹ tọn do pọ́n todido sọgodo tọn towe. To whenẹnu, ‘huhlọn gigonọ Jiwheyẹwhe tọn na hẹn we lodo bo nasọ na we huhlọn ganji nado sọgan yí homẹfa po ayajẹ po do doakọnnanu to gigọ́ mẹ.’—Kol. 1:11.
AWUWIWLENA LIZỌNYIZỌN KUNNUDEGBE TỌN
ijwyp 90
Nawẹ N’Gán Dapana Linlẹn Agọ̀ lẹ Gbọn?
Omẹ nankọ wẹ a nọ lẹndọ emi yin?
Mẹhe nọ lẹnnupọndo nudagbe ji “N’nọ tẹnpọn nado nọ jaya bo ma nọ yawu gblehomẹ whedepopenu he e yọnbasi. N’nọ jlo nado nọ to nuko bo nọ to ayajẹ to azán lẹpo ji.”—Valerie.
Mẹhe nọ lẹnnupọndo onú agọ̀ ji
“Whedepopenu he nudagbe de jọ, tlolo wẹ n’nọ lẹndọ e ma gán yin nugbo.”—Rebecca.
Mẹhe nọ kẹalọyi nulẹ do lee yé te
“Nado nọ lẹnnupọndo nudagbe ji nọ wá hẹnmẹ jẹflumẹ, podọ nado nọ lẹnnupọndo onú agọ̀ ji nọ wá hẹn awubla wá. Nado nọ kẹalọyi nulẹ do lee yé te nọ gọalọna mi nado mọ nulẹ dile yé te do nugbonugbo.”—Anna.
Nuhewutu e do yin nujọnu
Biblu dọ dọ “mẹhe ahun etọn gọ́ na ayajẹ nọ tin to hùnwhẹ mẹ to whepoponu.” (Howhinwhẹn lẹ 15:15) Na nugbo tọn, mẹhe ma nọ to nulẹnpọn do onú agọ̀ lẹ ji bo nọ tindo linlẹn dagbe gando ninọmẹ gbẹ̀mẹ tọn lẹ go nọ saba do ayajẹ taun. E sọ yọnbasi dọ yé ni jihọntọn susu lẹ. To popolẹpo mẹ, mẹnu wẹ na jlo nado jihọntọn hẹ mẹhe nọ to awubla to whelẹponu?
Etomọṣo, eyin a tlẹ nọ to nulẹnpọn do onú dagbe lẹ ji, a na nọ wá pehẹ ninọmẹ sinsinyẹn lẹ. Apajlẹ delẹ die:
Linlin awhàn, nuyiwa nukunbianamẹtọ lẹ tọn po sẹ́nhẹngba po tọn lẹ gán nọ gbàhundona we.
A sọgan pehẹ nuhahun lẹ to whẹndo mẹ.
Ayihaawe ma tin dọ a tindo awugbopo po mape towe lẹ po he a na diahi hẹ. Họntọn de gán doadihomẹna we. Kakati nado nọ yinuwa didọ nuhahun enẹlẹ ma tin wẹ nkọ—kavi ze ayiha do yé ji sọmọ bọ a na nọ to awubla mẹ—nọ dovivẹnu nado kẹalọyi nulẹ do lee yé te. Mọwiwà na gọalọna we ma nado nọ ze ayiha do onú agọ̀ lẹ ji gbau bo nọ kẹalọyi ninọmẹ gbẹ̀mẹ tọn lẹ do lee yé te, na yé nikaa hẹn we gbọjọ.
Nuhe a sọgan wà. Ma nọ yí nukunpẹvi do pọ́n nuṣiwa towe lẹ blo.
Biblu dọmọ: “Gbẹtọ nugbonọ de ma tin to aigba ji, he to dagbe wà bo ma waylan.” (Yẹwhehodọtọ 7:20, Biblu Wiwe lọ—Gun Alada) Nugbo lọ dọ a do awugbopo bo nọ ṣinuwa dohia dọ gbẹtọ wẹ a yin, podọ enẹ ma dohia dọ a ma gán wà dagbe.
Lehe a na nọ kẹalọyi nulẹ do lee yé te do: Nọ wazọ́n do nuṣiwa towe lẹ ji bo ma nọ donukun pipé sọn dewe si blo. “N’nọ tẹnpọn ma nado ze ayidonugo do nuṣiwa ṣie lẹ ji zẹjlẹgo. Kakatimọ, n’nọ dovivẹnu nado plọnnu sọn yé mẹ, na n’ma do yọ́n fie n’na basi vọjlado te,” wẹ dẹpẹ de he nọ yin Caleb dọ.
Ma nọ yí dewe jlẹdo mẹdevo go blo.
Biblu dọmọ: “Mì dike mí dín gigo ovọ́, to agbàwhinwhlẹn finfọndote to ode awetọ mítọn ṣẹnṣẹn, to nuvẹun tintindo na ode awetọ mẹ blo.” (Galatianu lẹ 5:26) Họntọn towe lẹ gán de fọto to nuwiwa he yé ma basi oylọna we de tẹnmẹ bo bẹ yé do nọtẹn gbẹdido Intẹnẹt ji tọn lẹ ji. Fọto enẹlẹ pinpọn sọgan hẹn homẹgble we. Ehe gán zọ́n bọ a na nọ mọ họntọn vivẹ́ towe lẹ di kẹntọ he ylan hugan lẹ. Lehe a na nọ kẹalọyi nulẹ do lee yé te do: Nugbo lọ wẹ yindọ yè ma gán ylọ we na nuwiwa pọmẹ tọn lẹpo. Gbọnvona enẹ, nue mẹde zedo nọtẹn gbẹdido tọn ji lẹ ma nọ dọ nulẹpo gando gbẹzan mẹlọ tọn go. “Nue mẹlẹ yiwanna hugan lẹ wẹ yé nọ yawu zedo nọtẹn gbẹdido Intẹnẹt ji tọn lẹ ji. Yé ma nọ saba ze nue ma dọnmẹ sọmọ lẹ do finẹ,” wẹ jọja aflanmẹ de he nọ yin Alexis dọ.
Nọ dín jijọho—titengbe to whẹndo mẹ.
Biblu dọmọ: “Eyin e yọnbasi, dile mì penugo do, mì nọ nọ̀ jijọho mẹ.” (Lomunu lẹ 12:18) A ma sọgan deanana nuyiwa mẹdevo lẹ tọn to gigọ́ mẹ, amọ́ hiẹ gán deanana nuyiwa towe. A sọgan de nado nọ dín jijọho.
Lehe a na nọ kẹalọyi nulẹ do lee yé te do:
Magbe ma nado yidogọna nuhahun to whẹndo towe mẹ, amọ́ nado nọ dín jijọho, dile a na jlo nado basi hẹ họntọn lẹ do. “Mapenọ wẹ mímẹpo, podọ mí na nọ wá tùnafọ ode awetọ ji sọn jlẹ de mẹ jẹ devo mẹ. Nuhe mí dona wà poun wẹ nado de lehe mí na nọ yinuwa do—vlavo nado dín jijọho kavi lala,” wẹ jọja aflanmẹ de he nọ yin Melinda dọ.
Nọ dopẹ́.
Biblu dọmọ: “Mì nisọ nọ dopẹ́.” (Kolosinu lẹ 3:15) Eyin a tindo aṣa lọ nado nọ dopẹ́, e na gọalọna we nado nọ ze ayiha do nudagbe he to jijọ to gbẹzan towe mẹ lẹ ji kakati do nuhe taidi nue ma sọgbe lẹpo ji.
Lehe a na nọ kẹalọyi nulẹ do lee yé te do:
Nọ kẹalọyi nuhahun towe lẹ, amọ́ ma dovọ́na nudagbe he nọ jọ to gbẹzan towe mẹ lẹ blo. “Egbesọegbesọ, n’nọ kàn nudagbe he jọ do go e de do owe de mẹ. N’jlo na nọ flinnu dee dọ n’gbẹ́ do nudagbe susu he ji n’gán lẹnnupọndo,” wẹ awhli de he nọ yin Rebecca dọ.
Nọ pọ́n ogbẹ́ do dó.
Biblu dọmọ: “Gbẹdido ylankan lẹ nọ hẹn walọ dagbe lẹ gble.” (1 Kọlintinu lẹ 15:33) Eyin mẹhe a nọ yí whenu zan hẹ lẹ nọ to homọdọdomẹgo, nọ to mẹṣanko kavi nọ to adidu, jijọ yetọn lẹ na bẹpla we.
Lehe a na nọ kẹalọyi nulẹ do lee yé te do:
Adán na nọ wá gbò họntọn towe lẹ, ehe gán zọ́n bọ yé na nọ lẹnnupọndo onú agọ̀ lẹ ji to whedelẹnu. Nọ gọalọna yé, amọ́ ma nọ dike nuhahun yetọn lẹ ni yinuwado ji we blo. “Mí ma dona nọ dogbẹ́ hẹ mẹhe nọ to nulẹnpọn do onú agọ̀ lẹ ji lẹ kẹdẹ,” wẹ awhli de he nọ yin Michelle dọ.
25 NOVEMBRE–1er DÉCEMBRE
NUHỌAKUẸ LẸ SỌN OHÓ JIWHEYẸWHE TỌN MẸ SALMU LẸ 109-112
Nọgodona Jesu, Ahọlu Lọ!
Nuagokun lẹ sọn Owe Atọ́ntọ Psalm lẹ Tọn Mẹ
110:1, 2—Etẹwẹ Jesu Klisti, “Oklunọ [Davidi tọn],” wà to whenuena e sinai to adusilọ Jiwheyẹwhe tọn mẹ? To fọnsọnku Jesu tọn godo, e hẹji yì olọn mẹ bo nọte to adusilọ Jiwheyẹwhe tọn mẹ kakajẹ 1914 nado jẹ gandu ji taidi Ahọlu. To ojlẹ enẹ mẹ, Jesu dugán do hodotọ yiamisisadode etọn lẹ ji, bo deanana yé to azọ́n yẹwhehodidọ po mẹhẹnzun-devi po tọn mẹ bosọ wleawuna yé nado dugán hẹ ẹ to Ahọluduta etọn mẹ.—Matiu 24:14; 28:18-20; Luku 22:28-30.
Mẹhe Nọ Hoavùn hẹ Jiwheyẹwhe lẹ Ma Na Gbawhàn!
3 Omẹ Jehovah tọn lẹ ko tin to mẹgbeyinyan glọ sọn bẹjẹeji owhe kanweko 20tọ lọ tọn gbọ́n. To aigba susu lẹ ji, mẹhe tindo linlẹn kanyinylan tọn lẹ ko tẹnpọn nado glọnalina—mọwẹ, bọnudona—lilá wẹndagbe Ahọluduta Jiwheyẹwhe tọn tọn. Yé ko yin whinwhàn gbọn Kẹntọ-gán mítọn, Lẹgba dali, mẹhe “di kinnikinni he to lili, . . . to zọnlinzin pé, bo to mẹhe e na tlẹndù dín.” (1 Pita 5:8) To whenuena “ojlẹ [dide] Kosi lẹ tọn” wá vivọnu to 1914 godo, Jiwheyẹwhe ze Visunnu etọn do ofìn ji taidi Ahọlu yọyọ aigba tọn, po gbedide lọ po dọmọ: “[Yì] to ahọludu to ṣẹnṣẹn kẹntọ towe lẹ tọn.” (Luku 21:24; Psalm 110:2) To huhlọn etọn yiyizan mẹ, Klisti yàn Satani sọn olọn mẹ bo glọn ẹn do lẹdo aigba tọn ji. To yinyọnẹn mẹ dọ ojlẹ emitọn whègli, Lẹgba súnsún adì etọn do Klistiani yiamisisadode lẹ po gbẹdohẹmẹtọ yetọn lẹ po go. (Osọhia 12:9, 17) Etẹwẹ ko yin kọdetọn mẹgbeyinyan debọdo-dego lọ lẹ tọn gbọn mẹhe nọ hoavùn hẹ Jiwheyẹwhe ehelẹ dali?
Dovivẹnu—Basi Nukọnyiyi
Tudohomẹnamẹ lọ nado yí nunina towe lẹ zan biọ dọ hiẹ ni ze afọdide tintan lọ. Be hiẹ nọ ze afọdide tintan nado wazọ́n hẹ mẹdevo lẹ to lizọnyizọn kunnudegbe tọn mẹ ya? Be hiẹ nọ dín dotẹnmẹ hundote lẹ nado gọalọna hagbẹ agun towe tọn lẹ he yin mẹyọyọ, jọja, kavi madogánnọ lẹ ya? Be hiẹ nọ ze dewe jo nado hẹn Plitẹnhọ Ahọluduta tọn do wiwe ji kavi nado gọalọ to aliho voovo mẹ to plidopọ lẹ tẹnmẹ ya? Be hiẹ sọgan basi gbehosọnalitọ alọgọtọ tọn sọn ojlẹ de mẹ jẹ devo mẹ ya? Be hiẹ penugo nado wadevizọn taidi gbehosọnalitọ whepoponu tọn kavi gọalọ to agun he mẹ nuhudo susu tin te ya? Eyin mẹmẹsunnu de wẹ hiẹ yin, be hiẹ to vivẹnudo nado jẹ nubiọtomẹsi Owe-wiwe tọn lẹ kọ̀n na devizọnwatọ lizọnyizọnwiwa tọn po mẹho lẹ po ya? Ojlo tintindo towe nado gọalọ bo kẹalọyi azọngban yin ohia nukọnyiyi tọn.—Ps. 110:3.
Onú Sisosiso Gbigbọmẹ Tọn Lẹ
Tindo Yise Dolido Dọ Ahọluduta lọ Na Wá
15 Dile etlẹ yindọ alẹnu he yin bibasi hẹ Ablaham po dehe yin bibasi hẹ Davidi po hẹn ẹn họnwun dọ okún yọnnu lọ tọn na lẹzun ahọlu, enẹ kẹdẹ ma ko pé nado hẹn dona wá na gbẹtọ lẹpo. Nado yin didona nugbonugbo, yé dona yin tuntundote sọn ylando si podọ yé dona yin hinhẹnwa whẹndo Jehovah tọn mẹ. Nado jẹ yanwle ehe kọ̀n, okún lọ sọ dona hẹn azọngban yẹwhenọ tọn di ga. Mẹdatọ nuyọnẹntọ mítọn wleawuna tito enẹ gbọn alẹnu sọgbe hẹ osẹ́n devo dali, yèdọ alẹnu nado yin yẹwhenọ taidi Mẹlkizedẹki.
16 Jehovah dohia gbọn Ahọlu Davidi gblamẹ dọ emi na basi alẹnu mẹdetiti tọn de hẹ Jesu, ehe na tindo lẹndai awe, enẹ wẹ: nado ze e “sinai to adusilọ [Jiwheyẹwhe tọn] mẹ,” kakajẹ whenue e na gbawhàn kẹntọ etọn lẹ tọn, podọ nado yin “yẹwhenọ de kakadoi kẹdẹdi hukan Mẹlkizedẹki tọn.” (Hia Psalm 110:1, 2, 4.) Naegbọn ewọ na yin yẹwhenọ de “kẹdẹdi hukan Mẹlkizedẹki tọn”? Whẹwhinwhẹ́n lọ wẹ yindọ, ojlẹ dindẹn whẹpo ovivi Ablaham tọn lẹ do dugu Aigba Pagbe tọn, Mẹlkizedẹki he yin ahọlu Salẹm tọn sẹ̀n taidi “yẹwhenọ Jiwheyẹwhe Gigogán lọ tọn.” (Heb. 7:1-3) Jehovah lọsu wẹ de e do otẹn enẹ mẹ. Ewọ kẹdẹ go wẹ Owe-wiwe Heblu tọn lẹ donù taidi mẹhe yin ahọlu bosọ yin yẹwhenọ. Humọ, e sọgan yin yiylọdọ “yẹwhenọ de kakadoi,” na mẹde ma wà onú mọnkọ jẹnukọnna ẹn podọ to godo etọn.
17 Jehovah de Jesu nado yin yẹwhenọ gbọn alẹnu mẹdetiti tọn he e basi hẹ ẹ ehe gblamẹ, bọ e na yin “yẹwhenọ de kakadoi taidi Mẹlkizedẹki.” (Heb. 5:4-6) Ehe dohia hezeheze dọ Jehovah ko whlé nado yí Ahọluduta Mẹsia tọn zan nado hẹn lẹndai he e tindo to dowhenu gando gbẹtọvi lẹ po aigba po go di.
AWUWIWLENA LIZỌNYIZỌN KUNNUDEGBE TỌN
ijwfq 23
Naegbọn Kunnudetọ Jehovah Tọn lẹ Ma Nọ Yì Awhàn?
Na whẹwhinwhẹ́n he bọdego ehelẹ wutu, Kunnudetọ Jehovah tọn lẹ ma nọ yì awhàn:
Tonusisena Jiwheyẹwhe.
Biblu dọ dọ Jehovah sẹ̀ntọ lẹ na “yí ohí yetọn do tùn agbogọdọẹ” podọ “yé ma to na plọn awhànfun ba.”—Isaia 2:4.
Tonusisena Jesu.
Jesu dọna Apọsteli Pita dọmọ: “Gọ̀ ohí towe do otẹn etọn mẹ, na mẹhe ze ohí lẹpo wẹ na dọ̀n gbọn ohí dali.” (Matiu 26:52) Gbọnmọ dali, Jesu dohia dọ hodotọ emitọn lẹ ma dona doalọ awhànfunnu depope go. Devi Jesu tọn lẹ setonuna gbedide etọn ma nado “yin apadewhe aihọn tọn” bo nọla na whẹho tonudidọ tọn lẹ. (Johanu 17:16) Yé ma nọ fọngu sọta tito awhànzọ́n wiwà tọn lẹ, kavi glọnalina mẹhe de nado biọ awhànzọ́n mẹ lẹ.
Owanyi na mẹdevo lẹ.
Jesu degbena devi etọn lẹ nado “yiwanna ode awetọ.” (Johanu 13:34, 35) Enẹwutu, yé dona yin pipli mẹmẹsunnu lẹ tọn de lẹdo aihọn pé, fie mẹmẹsunnu kavi mẹmẹyọnnu de ma na funawhàn sọta yede te.—1 Johanu 3:10-12.
Apajlẹ Klistiani tintan lẹ tọn.
Owe lọ Encyclopédie de la religion et de la guerre dọmọ: “Devi tintan Jesu tọn lẹ gbẹ́ nado doalọ to awhàn po awhànzọ́n wiwà po mẹ,” na yé yọnẹn dọ nuyiwa mọnkọtọn “ma sọgbe hẹ nuplọnmẹ owanyi tọn Jesu tọn podọ gbedide lọ dọ yè dona yiwanna kẹntọ mẹtọn.” Mọdopolọ, sinsẹ̀n-nuplọnmẹtọ Allemagne-nu Peter Meinhold dọ dọ linlẹn devi tintan Jesu tọn enẹlẹ tọn wẹ yindọ, “mẹde ma sọgan yin Klistiani bosọ yin awhànfuntọ to ojlẹ dopolọ mẹ.”
Nuhe mí nọ wà nado gọalọ to lẹdo mítọn mẹ
Kunnudetọ Jehovah tọn lẹ nọ wà nususu to lẹdo yetọn lẹ mẹ nado gọalọ bo ma nọ ze dagbemẹninọ otò he mẹ yé tin te lẹ tọn do owù mẹ. Mí nọ na sisi aṣẹpipa otò lẹ tọn to kọndopọ mẹ hẹ gbedide Biblu tọn ehelẹ: “Yin mẹmẹglọ na aṣẹpipa daho lẹ.”—Lomunu lẹ 13:1. “Yí onú he yin Sesali tọn lẹ na Sesali, ṣigba onú he yin Jiwheyẹwhe tọn lẹ na Jiwheyẹwhe.”—Matiu 22:21. Enẹwutu, mí nọ setonuna osẹ́n otò tọn lẹ, sú takuẹ lẹ bo nọ nọgodona vivẹnu he aṣẹpipa lẹ nọ do na dagbemẹninọ tòvi lẹ tọn.
2-8 DÉCEMBRE
NUHỌAKUẸ LẸ SỌN OHÓ JIWHEYẸWHE TỌN MẸ SALMU LẸ 113-118
Etẹ Mí Na Yí Do Suahọ Jehovah?
Yin Jijlọdote Gbọn Owanyi Dali
13 Sọn hodidọ Jesu tọn lẹ mẹ, e họnwun dọ mí dona yiwanna Jehovah whẹ́ jẹnukọn. Ṣigba, mí mayin jiji po owanyi he ko yin awuwlena mlẹnmlẹn de po hlan Jehovah gba. Nuhe mí dona wleawuna de wẹ enẹ yin. To whenuena mí sè dogbọn ewọ dali to tintan whenu, mí yin dindọ̀n hlan ẹn gbọn nuhe mí sè dali. Vudevude, mí plọn lehe ewọ wleawuna aigba na gbẹtọvi lẹ do. (Gẹnẹsisi 2:5-23) Mí plọn lehe e ko yinuwa hẹ gbẹtọvi do, bo ma gbẹ́ mí dai to whenuena ylando biọ whẹndo gbẹtọvi tọn mẹ to tintan whenu, ṣigba ze afọdide lẹ nado fli mí gọ̀. (Gẹnẹsisi 3:1-5, 15) E yinuwa po homẹdagbe po hẹ mẹhe yin nugbonọ lẹ, podọ to godo mẹ e wleawuna Visunnu dopo akàn etọn na jona ylando mítọn lẹ tọn. (Johanu 3:16, 36) Oyọnẹn he jideji ehe hẹn pinpẹn-nutọn-yinyọnẹn mítọn whẹ́n deji hlan Jehovah. (Isaia 25:1) Ahọlu Davidi dọ dọ emi yiwanna Jehovah na mẹtọnhopọn owanyinọ Etọn wutu. (Psalm 116:1-9) To egbehe, Jehovah nọ penukundo mí go, deanana mí, hẹn mí lodo, bo nọ na tuli mí. Dile mí plọnnu gando ewọ go sọ, mọwẹ owanyi mítọn hlan ẹn nọ siso sọ niyẹn.—Psalm 31:23; Zẹfania 3:17; Lomunu lẹ 8:28.
Nọ Kẹalọyi po Ayajẹ po—Nọ Namẹ po Ahundopo Po
Psalm-kàntọ lọ kanse dọmọ: “Etẹwẹ yẹn na na . . . OKLUNỌ na dagbewà etọn lẹ hlan dali ṣie?” (Ps. 116:12) Dagbewà kavi ale tẹlẹ wẹ e mọyi? Jehovah nọgodona ẹn to ojlẹ “tukla po awubla po” tọn lẹ mẹ. Humọ, Jehovah sọ “whlẹn ayiha [etọn] sọn okú mẹ.” Todin, ewọ jlo na “na” kavi suahọ Jehovah to aliho de mẹ. Etẹwẹ psalm-kàntọ lọ na wà? E dọmọ: “Yẹn na depà ṣie lẹ hlan OKLUNỌ.” (Ps. 116:3, 4, 8, 10-14) E magbe nado hẹn opà he e do na Jehovah lẹpo di bo setonuna nubiọtomẹsi etọn lẹpo.
Hiẹ lọsu sọgan wà nudopolọ. Gbọnna? Gbọn gbẹninọ sọgbe hẹ osẹ́n po nunọwhinnusẹ́n Jiwheyẹwhe tọn lẹ po to whepoponu dali. Enẹwutu, hẹn ẹn diun dọ sinsẹ̀n-bibasi towe hlan Jehovah gbẹ́ yin nujọnu hugan to gbẹzan towe mẹ bo dike gbigbọ Jiwheyẹwhe tọn ni deanana we to nuyiwa towe lẹpo mẹ. (Yẹwh. 12:13; Gal. 5:16-18) Nado dọ hójọhó, hiẹ ma sọgan suahọ nuhe Jehovah wà na we lẹpo tọn fó gbede. Etomọṣo, ‘homẹ Jehovah tọn nọ hùn’ nado mọdọ hiẹ to nuhe go a pé lẹpo wà to sinsẹ̀nzọn etọn mẹ po ahundopo po. (Howh. 27:11) Lẹblanulọkẹyi jiawu nankọ die nado hẹn homẹ Jehovah tọn hùn to aliho ehe mẹ!
Nuplọnmẹ Delẹ sọn Owe Levitiku Tọn Mẹ
9 Nuplọnmẹ awetọ: Mí nọ sẹ̀n Jehovah nado do pinpẹn-nutọn-yinyọnẹn hia ewọ. Nado zinnudo ehe ji, mì gbọ mí ni dọhodo avọ́nunina jijọho tọn lẹ ji, ehe yin adà titengbe sinsẹ̀n-bibasi nugbo tọn devo to Islaeli hohowhenu tọn. To owe Levitiku tọn mẹ, mí plọn dọ Islaelivi de sọgan basi avọ́sinsan jijọho tọn de “taidi dohia pẹdido tọn.” (Lev. 7:11-13, 16-18) Ewọ nọ basi avọ́nunina ehe, e ma yin na e to dandannu glọ nado wàmọ wutu gba, amọ́ na ewọ jlo wutu. Enẹwutu, avọ́nunina sọn ojlo mẹ de wẹ, ehe mẹde nọ basi na ewọ yiwanna Jiwheyẹwhe etọn, Jehovah wutu. Mẹhe to avọ́nunina lọ basi gọna whẹndo etọn po yẹwhenọ lẹ po nọ dù olàn kanlin he yin yíyí do sanvọ́ lọ tọn. Ṣigba, adà avọ́sinsan kanlin tọn lọ tọn delẹ nọ yin nina Jehovah kẹdẹ. Adà tẹlẹ wẹ?
10 Nuplọnmẹ atọ̀ntọ: Owanyi nọ whàn mí nado na dagbe hugan mítọn Jehovah. Jehovah nọ pọ́n ojó kanlin de tọn hlan taidi adà dagbe hugan kanlin lọ tọn. Ewọ sọ zinnudeji dọ awutugonu titengbe delẹ, taidi ayi lẹ, yin nuhọakuẹ tlala. (Hia Levitiku 3:6, 12, 14-16.) Enẹwutu, homẹ Jehovah tọn nọ hùn taun eyin Islaelivi de desọn ojlo mẹ bo yí awutugonu titengbe enẹlẹ po ojó lọ po do basi nunina. Islaelivi he basi nunina mọnkọ de nọ dohia dọ ojlo vẹkuvẹku emitọn wẹ nado na Jiwheyẹwhe dagbe hugan emitọn. To aliho dopolọ mẹ, Jesu desọn ojlo mẹ nado na Jehovah dagbe hugan etọn gbọn sinsẹ̀n-bibasi hlan Ewọ po alindọn lẹpo po dali, na owanyi he e tindo na Ewọ wutu. (Joh. 14:31) Jesu nọ mọ awuvivi to ojlo Jiwheyẹwhe tọn wiwà mẹ; ewọ yiwanna osẹ́n Jiwheyẹwhe tọn taun. (Salm. 40:8) Lehe homẹ Jehovah tọn dona ko hùn taun do sọ dọ Jesu desọn ojlo mẹ nado sẹ̀n ewọ!
11 Taidi avọ́sinsan jijọho tọn lẹ, sinsẹ̀n-bibasi mítọn hlan Jehovah yin aliho de nado do numọtolanmẹ he mí tindo na ewọ hia sọn ojlo mẹ wá. Mí nọ na dagbe hugan mítọn Jehovah, podọ mí nọ wàmọ, na mí yiwanna ewọ po ahun mítọn lẹpo po wutu. Lehe homẹ Jehovah tọn dona nọ hùn do sọ nado mọdọ sinsẹ̀n-basitọ livi susu lẹ wleawufo nado sẹ̀n ewọ, na yé tindo owanyi sisosiso na ewọ, podọ na aliho nuyiwa tọn etọn lẹ wutu! Mí sọgan yin homẹmiọnna, eyin mí nọ flindọ Jehovah nọ mọ nuhe mí nọ wà lẹ gọna mẹwhinwhàn mítọn lẹ bosọ nọ yọ́n pinpẹn yetọn ga. Di apajlẹ, eyin a ko tindo mẹhowhe, bo ma sọgan sọ nọ wà nususu dile a na ko jlo do, deji dọ Jehovah nọ mọnú zẹ̀ dogbó towe lẹ go. A sọgan nọ tindo numọtolanmẹ lọ dọ emi ma do onú kaka de nado na Jehovah, ṣigba ewọ nọ mọ owanyi sisosiso he mẹ a desọn nado wà nuhe go a pé. Homẹ etọn nọ hùn nado kẹalọyi dagbe hugan he hiẹ penugo nado na ẹn.
Onú Sisosiso Gbigbọmẹ Tọn Lẹ
Kanbiọ lẹ sọn Wehiatọ lẹ Dè
Psalm-kantọ de jihàn to gbọdo glọ dọmọ: “Nuhọakuẹ to nukun OKLUNỌ tọn mẹ wẹ okú mẹwiwe etọn lẹ tọn.” (Ps. 116:15) Ogbẹ̀ dopodopo sinsẹ̀n-basitọ nugbo Jehovah tọn lẹ tọn họakuẹ na ẹn taun. Ṣigba, hogbe enẹlẹ sọn Psalm 116tọ mẹ bẹ nususu hẹn hugan okú mẹdopodopo tọn poun.
Eyin mẹde to hodidọ ṣiọdidi tọn na, e ma sọgbe dọ ni yí Psalm 116:15 zan na matintọ lọ, eyin ewọ tlẹ sẹ̀n Jehovah po nugbonọ-yinyin po kakajẹ okú. Etẹwutu? Na zẹẹmẹ hogbe psalm-kantọ lọ tọn lẹ gbloada taun. Ehe dohia dọ okú nugbonọ lẹ tọn to pọmẹ họakuẹ na Jiwheyẹwhe sọmọ bọ e ma sọgan dike onú mọnkọtọn de ni jọ.—Pọ́n Psalm 72:14; 116:8.
9-15 DÉCEMBRE
NUHỌAKUẸ LẸ SỌN OHÓ JIWHEYẸWHE TỌN MẸ SALMU LẸ 119:1-56
“Nawẹ Jọja Sunnu de Sọgan Hẹn Ali Etọn Do Wiweji Gbọn?”
w87-F 1/11 18 huk. 10
Be A Nọ Gbọṣi Wiweji to Adà Lẹpo mẹ Ya?
10 To Efesunu lẹ 5:5 mẹ, Paulu na avase dọmọ: “Na mìwlẹ yọ́n ehe, bo mọnukunnujẹemẹ hezeheze, dọ mẹhe nọ doalọ to fẹnnuwiwa zanhẹmẹ tọn mẹ kavi omẹ mawé kavi nukunkẹnnọ, enẹ wẹ nado yin boṣiọ-sẹ̀ntọ de, ma tindo ogú depope to Ahọluduta Klisti tọn po Jiwheyẹwhe tọn po mẹ.” Etomọṣo, to whemẹwhemẹ, gbẹtọ fọtọ́n susu wẹ nọ yin wiwọhẹ kavi yin didesẹ sọn agun mẹ na fẹnnuwiwa zanhẹmẹ tọn wutu, ehe yin ‘ylando wiwà do agbasa go.’ (1 Kọlintinu lẹ 6:18) To paa mẹ, nuhe nọ zọ́n poun wẹ yindọ mẹlọ ma ‘họ́ ede sọgbe hẹ Ohó Jiwheyẹwhe tọn.’ (Salmu lẹ 119:9) Di apajlẹ, mẹmẹsunnu susu wẹ nọ dekanpona aṣejininọ yetọn to walọyizan-liho to whenue yé yí gbọjẹ bo tọ́nwhẹ̀n. Yé nọ dovọ́na mahẹ dido to nuwiwa yẹwhehọluduta tọn lẹ mẹ hẹ mẹmẹsunnu lẹ bo nọ jihọntọn hẹ aihọnmẹnu he yé gbọjẹ bo tọ́nwhẹ̀n lẹ. Klistiani delẹ nọ lẹndọ mẹlọ lẹ jọmẹ taun bo nọ kọnawudopọ hẹ yé to nuwiwa he nọ fọ́n ayihaawe dote lẹ mẹ. Mọdopolọ, mẹdevo lẹ nọ jihọntọn pẹkipẹki hẹ azọ́n-gbẹ́ yetọn lẹ. Mẹho agun tọn de jihọntọn hẹ azọ́n-gbẹ́ yọnnu de sọmọ bo wá jo whẹndo etọn do bo jẹ pọnọ hẹ yọnnu lọ ji. Taidi kọdetọn de, e yin didesẹ sọn agun mẹ. Owhẹ̀ Biblu tọn whẹ́n taun bọ e do dọ dọ, “Gbẹdido ylankan lẹ nọ hẹn walọ dagbe lẹ gble.”—1 Kọlintinu lẹ 15:33.
“Nuflinmẹ Towe lẹ Wẹ Homẹhunhun Ṣie”
JEHOVAH nọ wleawu nuflinmẹ lẹ tọn na omẹ etọn lẹ nado sọgan gọalọna yé nado pehẹ kọgbidinamẹ ojlẹ awusinyẹn tọn ehelẹ tọn lẹ. Delẹ to nuflinmẹ ehelẹ mẹ nọ họnwun na mí to Biblu hihia mẹdetiti tọn whenu, to whenuena devo lẹ nọ sọawuhia gbọn nudọnamẹ kavi gblọndo he yin nina to opli Klistiani tọn ji lẹ gblamẹ. Susu nuhe mí hia kavi sè to nuwiwa ehelẹ whenu lẹ tọn ma nọ yin nuyọyọ na mí gba. Vlavo, mí ko sè nudọnamẹ mọnkọtọn lẹ pọ́n. Ṣigba, to whenuena e yindọ mí nọ yawu wọnnú, nuhudo tin nado nọ vọ́ nuflin mídelẹ gbọzangbọzan gando lẹndai, osẹ́n po anademẹ Jehovah tọn lẹ po go. Mí dona yọ́n pinpẹn nuflinmẹ Jiwheyẹwhe tọn lẹ tọn. Yé nọ na mí tuli gbọn alọgigọna mí nado hẹn nuhe whàn mí nado kẹalọyi gbẹzan jijọ-di-Jiwheyẹwhe tọn lẹ do ayiha mẹ dali. Abajọ, psalm-kàntọ lọ do jihàn hlan Jehovah dọmọ: “Nuflinmẹ towe lẹ wẹ homẹhunhun ṣie.”—Psalm 119:24, NW.
De Nukun Towe sọn Ovọ́ Pinpọn Go!
2 Ṣigba, nuhe mí nọ pọ́n lẹ sọ sọgan hẹn awugble wá na mí. Kanṣiṣa he tin to nukun po ayiha po ṣẹnṣẹn sinyẹn sọmọ bọ nuhe mí nọ mọ po nukun mítọn po lẹ sọgan fọ́n ojlo zogbe po nujlomẹ lẹ po dote to ahun mítọn mẹ kavi hẹn yé sinyẹn deji. Podọ na mí to gbẹnọ to aihọn gblezọn he nọ hẹn pekọwana ojlo edetiti tọn he Satani Lẹgba to anadena de mẹ wutu, nujijla oklọ tọn gọna yẹdide susu he sọgan hẹn mí danbú po awubibọ po eyin mí tlẹ yìnnukunpọn yé poun lẹ wẹ nọ yin zizedonukọnna mí. (1 Joh. 5:19) Abajọ psalm-kàntọ lọ do vẹ̀ Jiwheyẹwhe dọmọ: “De nukun ṣie sọn ovọ́ pinpọn go: bo nagbẹ̀ mi to aliho towe lẹ ji.”—Ps. 119:37.
Onú Sisosiso Gbigbọmẹ Tọn Lẹ
Dotudo Ohó Jehovah Tọn Go
2 Nuagokun titengbe Psalm 119 tọn dopo wẹ nuhọakuẹ-yinyin ohó, kavi owẹ̀n Jiwheyẹwhe tọn. Vlavo na ohàn ehe nido sọgan nọ yin finflin po awubibọ po, wekantọ lọ wleawuna ẹn gbọn wekun lẹ tito to aliho debọdo-dego tọn mẹ dali. Wefọ 176 he e bẹhẹn lẹ sinai do wekun debọdo-dego Heblugbe tọn lẹ ji. To Heblugbe dowhenu tọn mẹ, dopodopo hukan 22 Psalm lọ tọn lẹ bẹ wefọ 8 hẹn he dopodopo yetọn nọ bẹjẹeji po wekun dopolọ po. Psalm ehe dlẹnalọdo ohó, osẹ́n, aṣẹdai kavi nuflinmẹ, aliho, ogbedai, osẹ́ndoai, gbedide, po whẹdida dodo Jiwheyẹwhe tọn lẹ po. To hosọ ehe po dehe bọdego po mẹ, mí na gbadopọnna Psalm 119 sinai do lẹdogbedevomẹ kandai Biblu Heblugbe tọn he sọgbe de ji. Ayihamẹlinlẹnpọn do numimọ he devizọnwatọ Jehovah tọn lẹ tindo to hohowhenu podọ to ojlẹ mítọn mẹ lẹ ji dona hẹn mí mọnukunnujẹ ohàn he Jiwheyẹwhe gbọdo ehe mẹ dogọ bo yidogọna pinpẹn-nutọn-yinyọnẹn mítọn na Biblu, he yin Ohó Jiwheyẹwhe tọn.
AWUWIWLENA LIZỌNYIZỌN KUNNUDEGBE TỌN
ijwyp 83
Nawẹ N’Gán Duto Whlepọn Ji Gbọn?
Apọsteli Paulu wlan dọmọ: “Whenue yẹn jlo nado wà nuhe sọgbe, nuhe ylan wẹ nọ tin to dè e.” (Lomunu lẹ 7:21) Be a ko tindo numọtolanmẹ mọnkọ pọ́n ya? Eyin mọ wẹ, hosọ ehe sọgan gọalọna we nado nọavùnte sọta whlepọn bọ a ma na joawuna ojlo ylankan lẹ.
Nuhe a dona yọnẹn
Nuhe a gán wà
Nuhe ogbẹ́ towe lẹ dọ
Nuhe a dona yọnẹn
Whlepọn po kọgbidinamẹ hagbẹ lẹ tọn po nọ saba zọnpọ wẹ. Na nugbo tọn, Biblu dọ dọ “gbẹdido ylankan lẹ nọ hẹn walọ dagbe lẹ gble.” (1 Kọlintinu lẹ 15:33) Kọgbidinamẹ he a nọ pehẹ sọn mẹdevo lẹ dè kavi sọn Intẹnẹt ji sọgan fọ́n ojlo dote na we to ahun towe mẹ, bo sisẹ́ we nado wà nuylankan de, podọ ehe tlẹ gán sọ zọ́n bọ a na “hodo gbẹtọgun nado waylan.”—Eksọdusi 23:2.
“Eyin a nọ jlo vẹkuvẹku dọ onú towe ni nọ jẹ mẹdevo lẹ tọn ji podọ yé ni kẹalọyi we, enẹ gán sisẹ́ we nado wà nudepope he mẹlọ lẹ to wiwà, na homẹ yetọn ni gbẹ́ do hùn do gowe poun wutu.”—Jeremy.
Lẹnnupọndo ehe ji: Naegbọn e sọgan vẹawuna we dogọ nado nọavùnte sọta whlepọn lẹ, eyin a nọ ze ayiha do nue mẹdevo lẹ nọ lẹn gando gowe ji zẹjlẹgo?—Howhinwhẹn lẹ 29:25.
Nuagokun lọ die:
Ma dike kọgbidinamẹ hagbẹ towe lẹ tọn ni whlé we pọ́n nado dovọ́na aliho nuyiwa tọn dagbe he a ko plọn lẹ blo.
Nuhe a gán wà
Yọ́n nuyise towe lẹ.
Eyin a ma yọ́n nuyise towe lẹ ganji, a sọgan taidi ṣiṣavi de he mẹdevo lẹ wẹ nọ dọ̀n okàn etọn lẹ nado deanana ẹn. Nuhe na yọ́n hugan wẹ nado hodo ayinamẹ Biblu tọn lọ he dọ: “Mì dindona nulẹpo; mì tẹdo nuhe yin dagbe go gligli.” (1 Tẹsalonikanu lẹ 5:21) Lehe nuyise towe lẹ họnwun na we ganji sọ, mọ wẹ e na bọawuna we dogọ nado tẹdo yé go gligli bo nọavùnte sọta whlepọn lọ nado wà nue jẹagọdo nuyise towe lẹ do niyẹn.
Lẹnnupọndo ehe ji: Naegbọn a do yise dọ nuhe Ohó Jiwheyẹwhe tọn dọ gando walọ dagbe go lẹ na hẹn ale wá na we?
“N’doayi a go dọ whedepopenu he n’yin nugbonọ bo tẹdo nuyise ṣie lẹ go bo masọ joawuna mẹtẹnpọn, mẹdevo lẹ nọ na mi sisi dogọ.”—Kimberly.
Apajlẹ de sọn Biblu mẹ: Daniẹli. E yọnbasi dọ Daniẹli gbẹ́ yin jọja aflanmẹ de to whenue e “magbe to ahun etọn mẹ” dọ emi na setonuna osẹ́n Jiwheyẹwhe tọn.—Daniẹli 1:8.
Yọ́n awugbopo towe lẹ.
Biblu dọho gando “ojlo jọja whenu tọn lẹ” go—ojlo zogbe ehelẹ nọ dohuhlọn taun titengbe eyin a gbẹ́ yin jọja de. (2 Timoti 2:22) E ma yin ojlo zanhẹmẹ tọn lẹ kẹdẹ wẹ ehe bẹhẹn, e sọ gando ojlo lọ nado nọ dín dọ hagbẹ lẹ ni kẹalọyi we po ojlo lọ nado jẹ dewe si to whenue a ma ko whẹ́n jẹ obá lọ mẹ po go.
Lẹnnupọndo ehe ji: Biblu dọ dọ “mẹdopodopo nọ yin whiwhlepọn dile e yin dindọn yì bo yin omọ̀ do na gbọn ojlo edetiti tọn dali.” (Jakọbu 1:14) Ojlo etẹ tọn wẹ nọ whlé we pọ́n hugan?
“Dọ nugbo na dewe gando walọyizan he mẹ a nọ yin whiwhlepọn nado doalọ te hugan lẹ go. Basi dodinnanu do lehe a gán duto whlepọn enẹlẹ ji do, bo kàn onú tangan he a mọdọ yé sọgan gọalọna we lẹ do fide. Ehe na zọ́n bọ whedevonu he a wá pehẹ whlepọn enẹ, a na yọ́n lee a na dudeji do.”—Sylvia.
Apajlẹ de sọn Biblu mẹ: Davidi. To ojlẹ delẹ mẹ, Davidi dike bọ kọgbidinamẹ mẹdevo lẹ tọn podọ etlẹ yin ojlo ede titi tọn lẹ lọsu nado yinuwado ewọ ji. Amọ́, e plọnnu sọn nuṣiwa etọn lẹ mẹ bo tẹnpọn nado wà nue sọgbe. E hodẹ̀ hlan Jehovah dọmọ: “Dá ahun wiwe-ṣeke de do ohò ṣie mẹ, bosọ yí gbigbọ yọyọ, yèdọ tenọgli tọn de do yẹn mẹ.”—Salmu lẹ 51:10.
Ze afọdide he jẹ.
Biblu dọmọ: “A dike oylan gbawhàn towe blo.” (Lomunu lẹ 12:21) Enẹ dohia dọ a ma dona dike whlepọn ni duto ji we. A sọgan basi nudide nado wà nue sọgbe.
Lẹnnupọndo ehe ji: Eyin a mọdọ emi gán yin whiwhlepọn nado wà nue ma sọgbe to ninọmẹ de mẹ, nawẹ a sọgan ze afọdide he jẹ bo yinuwa to aliho dagbe mẹ gbọn?
“N’nọ lẹnnupọndo numọtolanmẹ he n’na wá do ji, eyin n’jo dee na mẹtẹnpọn depope he n’pannukọn. Be n’na vò to dee mẹ ya? E yọnbayi, amọ́ na ojlẹ de poun wẹ. Be n’na gbẹ́ do ayajẹ dile ojlẹ yìyì ya? Paali, kakatimọ awubla ṣie na sinyẹn deji wẹ. Be e ka jẹ dọ n’ma doyana dee titi domọ ya? Eyeo!”—Sophia.
Apajlẹ de sọn Biblu mẹ: Paulu. Dile etlẹ yindọ Paulu yigbe dọ emi nọ tindo ayilinlẹn ylankan lẹ, e ze afọdide he jẹ. E wlan dọmọ: Yẹn nọ to mẹplọnlọ sinsinyẹn do agbasa ṣie [go] bo nọ hẹn ẹn di afanumẹ de.”—1 Kọlintinu lẹ 9:27, nudọnamẹ odò tọn.
Nuagokun lọ die:
Taidi mọto-kùntọ he nọ deanana fie ohún etọn na pantá, hiẹ lọsu wẹ na magbe nue a na wà tọn to whenue whlepọn de wá.
Flindọ mẹtẹnpọn lẹ ma nọ dẹn-to-aimẹ. Melissa he tindo owhe 20 dọmọ: “Nususu he n’nọ mọ di whlepọn he kàn dẹpẹ biọ dai he n’to wehọmẹ daho lẹ, ma tlẹ nọ di nude na mi todin ba. Nulinlẹnpọn do enẹ ji nọ vọ́ jide na mi dọ whlepọn dintọn lẹ lọsu na juwayi, bọ to gbèdopo n’na wá flin nue n’ko pehẹ lẹ bo na mọdọ gbẹzan ṣie pọnte taun na n’ma jogbe wutu.”
16-22 DÉCEMBRE
NUHỌAKUẸ LẸ SỌN OHÓ JIWHEYẸWHE TỌN MẸ SALMU LẸ 119:57-120
A Gán Doakọnna Awusinyẹnnamẹnu Lẹ
“Ṣo Na Yẹn Ka Yiwanna Osẹ́n Towe Dole!”
2 Mí sọgan kanse dọ, “Nawẹ osẹ́n Jiwheyẹwhe tọn sọgan yin asisa homẹmiọnnamẹ tọn na psalm-kàntọ lọ gbọn?” Jidide etọn dọ Jehovah tindo ojlo to ewọ mẹ wẹ hẹn ẹn dote. Mahopọnna awusinyẹnnamẹnu he agọjẹdomẹtọ etọn lẹ hẹnwa e ji lẹ, homẹ psalm-kàntọ lọ tọn hùn na e yọ́n awuwledainanu owanyinọ osẹ́n enẹ tọn lẹ wutu. E yọnẹn dọ Jehovah ko wà dagbe na emi. Humọ, anademẹ osẹ́n Jiwheyẹwhe tọn tọn hihodo hẹn psalm-kàntọ lọ yọnnuin hú kẹntọ etọn lẹ bo tlẹ ko sọ hẹn ẹn dogbẹ̀. Tonusisena osẹ́n lọ hẹn ẹn tindo jijọho po ayihadawhẹnamẹnu dagbe de po.—Psalm 119:1, 9, 65, 93, 98, 165.
Be Hiẹ Yiwanna Nuflinmẹ Jehovah Tọn lẹ Taun Ya?
3 Nuflinmẹ Jiwheyẹwhe tọn lẹ họakuẹ tlala na psalm-kàntọ lọ mẹhe jihàn dọmọ: “Yẹn yawu, bo masọ whleawu nado payi gbedide towe lẹ go gba. Okàn mẹylankan lẹ tọn lẹhla mi pé: ṣigba yẹn ma wọnji osẹ́n towe go gba.” (Psalm 119:60, 61) Nuflinmẹ Jehovah tọn lẹ nọ gọalọna mí nado doakọnna homẹkẹn na mí deji dọ Otọ́ olọn mẹ tọn mítọn sọgan sán okàn alọhẹndotenamẹ tọn he kẹntọ lẹ blá lẹdo mí pé lẹ wutu. To ojlẹ sisọ mẹ, ewọ nọ tún mí dote sọn aliglọnnamẹnu mọnkọtọn lẹ mẹ na mí nido sọgan hẹn azọ́n yẹwhehodidọ-Ahọluduta tọn dì.—Malku 13:10.
Nuagokun lẹ sọn Owe Atọ́ntọ Psalm lẹ Tọn Mẹ
119:71—Dagbe tẹwẹ sọgan dekọtọn sọn oyà nukunbibia tọn jiji mẹ? Awusinyẹnnamẹ sọgan plọn mí nado nọ ganjẹ Jehovah go dogọ, nado nọ hodẹ̀ vẹkuvẹku hlan ẹn dogọ, podọ nado nọ plọn Biblu bo yí nuhe e dọ lẹ do yizan mẹ po sọwhiwhe po dogọ. Humọ, lehe mí yinuwa hlan nukunbibia do sọgan do awugbopo delẹ hia to gbẹtọ-yinyin mítọn mẹ he sọgan yin vivọjlado. Yajiji ma na hẹn mí duadi eyin mí na ẹn dotẹnmẹ nado klọ́ mí wé.
“Mì Nọ Viavi hẹ Mẹhe to Avivi Lẹ”
3 Matin ayihaawe, asisa homẹmiọnnamẹ tọn tintan mítọn wẹ Otọ́ awuvẹmẹtọ olọn mẹ tọn mítọn Jehovah. (Hia 2 Kọlintinu lẹ 1:3, 4.) Jehovah, yèdọ mẹhe yin apajlẹ dagbe hugan to awuvẹmẹ didohia mẹ, hẹn omẹ etọn lẹ deji dọmọ: “Yẹnlọsu wẹ to homẹmiọnna mì.”—Isa. 51:12; Salm. 119:50, 52, 76.
5 Mí sọgan deji mlẹnmlẹn dọ Jehovah na yinuwa do ota mítọn mẹ. Enẹwutu, mí ma dona nọ whleawu nado túntún awubla he to ahun ji na mí jẹgbonu na ẹn to odẹ̀ mẹ. Lehe e yin homẹmiọnnamẹnu do sọ nado yọnẹn dọ Jehovah nọ mọnukunnujẹ awufiẹsa mítọn mẹ bosọ nọ na mí homẹmimiọn he mí tindo nuhudo etọn nugbonugbo! Ṣigba nawẹ e nọ wà ehe gbọn?
Onú Sisosiso Gbigbọmẹ Tọn Lẹ
Nuagokun lẹ sọn Owe Atọ́ntọ Psalm lẹ Tọn Mẹ
119:96—Etẹwẹ hodidọ lọ “opodo pipé lẹpo tọn” zẹẹmẹdo? Psalm-kàntọ lọ to hodọ gando pipé go sọn pọndohlan gbẹtọvi tọn mẹ. Vlavo nuhe e na ko tindo to ayiha mẹ wẹ yindọ linlẹn gbẹtọ tọn gando pipé go tindo dogbó. To vogbingbọn mẹ, gbedide Jiwheyẹwhe tọn ma tindo dogbó mọnkọtọn gba. Anademẹ etọn nọ yọn-na-yizan to adà gbẹzan tọn lẹpo mẹ.
AWUWIWLENA LIZỌNYIZỌN KUNNUDEGBE TỌN
ijwbq 157
Etẹwẹ Biblu Dọ Gando Nugbajẹmẹji Jọwamọ Tọn lẹ Go?
Gblọndo Biblu tọn
E ma yin Jiwheyẹwhe wẹ nọ hẹn nugbajẹmẹji jọwamọ tọn he nọ jọ to egbehe lẹ wá, ṣigba onú mẹhe go e gando lẹ tọn nọ duahunmẹna ẹn. Nugbajẹmẹji jọwamọ tọn lẹ yin dopo to nuhe nọ hẹn yajiji wá bọ Ahọluduta Jiwheyẹwhe tọn na desẹ lẹ mẹ. Todin whẹ́, Jiwheyẹwhe nọ miọnhomẹna mẹhe go nugbajẹmẹji jọwamọ tọn jọ do lẹ.—2 Kọlintinu lẹ 1:3.
Naegbọn mí gán kudeji dọ nugbajẹmẹji jọwamọ tọn lẹ ma yin yasanamẹ Jiwheyẹwhe tọn?
Be nugbajẹmẹji jọwamọ tọn lẹ yin ohia azán godo tọn lẹ tọn wẹ ya?
Nawẹ Jiwheyẹwhe nọ gọalọna mẹhe jiya nugbajẹmẹji jọwamọ tọn lẹ gbọn?
Be Biblu sọgan gọalọna mí nado wleawudai na nugbajẹmẹji jọwamọ tọn lẹ ya?
Wefọ Biblu tọn he na miọnhomẹna mẹhe jiya nugbajẹmẹji jọwamọ tọn lẹ
Naegbọn mí gán kudeji dọ nugbajẹmẹji jọwamọ tọn lẹ ma yin yasanamẹ Jiwheyẹwhe tọn?
Nugbajẹmẹji jọwamọ tọn lẹ gbọnvo pete na aliho he mẹ Jiwheyẹwhe yí huhlọn jọwamọ tọn lẹ zan wayi te, dile Biblu dohia do.
Nugbajẹmẹji jọwamọ tọn lẹ gán hù kavi gbleawuna mẹdepope.
To vogbingbọn mẹ, nuyiwa whẹdida hinhẹnṣẹ tọn Jiwheyẹwhe tọn he yin kinkando Biblu mẹ lẹ ma gando mẹlẹpo go. Di apajlẹ, to whenue Jiwheyẹwhe và tòdaho hohowhenu tọn Sodọmi po Gomọla po sudo, e whlẹn dawe nugbonọ lọ Lọti po viyọnnu etọn awe lẹ po. (Jenẹsisi 19:29, 30) Jiwheyẹwhe mọnú jẹ ahun mẹhe nọgbẹ̀ to ojlẹ lọ mẹ lẹ tọn mẹ bo và mẹhe e mọdọ yé yin mẹylankan lẹ kẹdẹ sudo.—Jenẹsisi 18:23-32; 1 Samuẹli 16:7.
Nugbajẹmẹji jọwamọ tọn lẹ nọ saba jọ to ajiji mẹ matin avase depope to whedelẹnu.
To alọ devo mẹ, Jiwheyẹwhe nọ na avase mẹylankan lẹ whẹpo do yí huhlọn jọwamọ tọn lẹ zan sọta yé. Dotẹnmẹ nọ hundote na mẹhe sèava lẹ nado họ̀ngán sọn nugbajẹmẹji lọ mẹ.—Jenẹsisi 7:1-5; Matiu 24:38, 39.
Gbẹtọvi lẹ lọsu ko yidogọna nugbajẹmẹji jọwamọ tọn lẹ jẹ obá de mẹ. Gbọnna?
Gbọn lẹdo lẹ hinhẹnflu dali podọ gbọn họ̀gbigbá do lẹdo he mẹ aigba sisọsisọ kavi singigọ gán hẹnnugble te po fie ninọmẹ aimẹ tọn ma yọ́n sọmọ te lẹ po dali. (Osọhia 11:18) E ma yin Jiwheyẹwhe wẹ mí na dowhẹ, na nudide gbẹtọvi tọn enẹlẹ.—Howhinwhẹn lẹ 19:3.
Be nugbajẹmẹji jọwamọ tọn lẹ yin ohia azán godo tọn lẹ tọn wẹ ya?
Mọwẹ, dọdai Biblu tọn lẹ dohia dọ nugbajẹmẹji jọwamọ tọn lẹ na jọ to “vivọnu titonu lọ tọn,” kavi to “azán godo tọn lẹ mẹ.” (Matiu 24:3; 2 Timoti 3:1) Di apajlẹ, Jesu dọ gando ojlẹ mítọn go dọmọ: “Núdùdù whèdomẹ po aigba sisọsisọ lẹ po na tin sọn fide jẹ fide.” (Matiu 24:7) To madẹnmẹ, Jiwheyẹwhe na de nuhe nọ hẹn yajiji po awufiẹsa po wá lẹpo sẹ̀, kakajẹ nugbajẹmẹji jọwamọ tọn lẹ ji.—Osọhia 21:3, 4.
Nawẹ Jiwheyẹwhe nọ gọalọna mẹhe jiya nugbajẹmẹji jọwamọ tọn lẹ gbọn?
Jiwheyẹwhe nọ miọnhomẹna yé gbọn Ohó etọn, Biblu gblamẹ.
Biblu hẹn mí deji dọ Jiwheyẹwhe nọ hò mítọn pọ́n podọ onú mítọn nọ biọlanmẹna ẹn whenue mí to yaji. (Isaia 63:9; 1 Pita 5:6, 7) E sọ do opagbe etọn lẹ hia mí gando ojlẹ de he mẹ nugbajẹmẹji jọwamọ tọn lẹ ma nasọ jọ te go.—Pọ́n “ Wefọ Biblu tọn he na miọnhomẹna mẹhe jiya nugbajẹmẹji jọwamọ tọn lẹ.”
Jiwheyẹwhe nọ yí sinsẹ̀n-basitọ etọn lẹ zan nado gọalọna yé.
Jiwheyẹwhe nọ yí sinsẹ̀n-basitọ etọn he to aigba ji bo to apajlẹ he Jesu zedai hodo lẹ zan. Dọdai de dohia gando Jesu go dọ ewọ na miọnhomẹna “mẹhe ahun yetọn jẹflumẹ lẹ” podọ “mẹhe to aluẹmẹ lẹpo.” (Isaia 61:1, 2) Sinsẹ̀n-basitọ Jiwheyẹwhe tọn lẹ nọ dovivẹnu nado wàmọ.—Johanu 13:15.
Jiwheyẹwhe sọ nọ yí sinsẹ̀n-basitọ etọn lẹ zan nado na alọgọ kọgbọ tọn nujọnu tọn de mẹhe jiya nugbajẹmẹji jọwamọ tọn lẹ.—Owalọ lẹ 11:28-30; Galatianu lẹ 6:10.
Be Biblu sọgan gọalọna mí nado wleawudai na nugbajẹmẹji jọwamọ tọn lẹ ya?
Mọwẹ. Dile etlẹ yindọ Biblu ma yin owe awuwiwledaina nugbajẹmẹji lẹ tọn de, e bẹ nunọwhinnusẹ́n he sọgan gọalọna mí lẹ hẹn. Di apajlẹ:
Basi tito jẹnukọn na nugbajẹmẹji he sọgan jọ lẹ.
“Zinzintọ nọ mọ owù hlan bo nọ whlá ede,” wẹ Biblu dọ. (Howhinwhẹn lẹ 22:3) Nuyọnẹnnu wẹ e na yin nado basi tito lẹ jẹnukọnna nugbajẹmẹji de. Tito mọnkọ sọgan biọ dọ mí ni wleawuna saki de he mẹ onú dandan tọn lẹ tin te, ehe mí gán ze to whenue nujijọ ajiji de jọ gọna zepọn bibasi gando fihe hagbẹ whẹndo tọn lẹpo na pli do eyin nugbajẹmẹji de jọ go.
Yọnẹn dọ ogbẹ̀ họakuẹ hú nutindo lẹ.
Biblu dohia dọ: “Mí ma hẹn nudepope wá aihọn mẹ, mọjanwẹ mí ma sọgan sọ ze nudepope tọ́nyi do niyẹn.” (1 Timoti 6:7, 8) Mí dona wleawufo nado jo owhé po nutindo mítọn lẹ po do nado họ̀ngán to nugbajẹmẹji de whenu. Mí na wà dagbe nado flindọ ogbẹ̀ mítọn họakuẹ hú agbasanu depope he mí tindo.—Matiu 6:25.
Wefọ Biblu tọn he na miọnhomẹna mẹhe jiya nugbajẹmẹji jọwamọ tọn lẹ
Jenẹsisi 18:25: “E ma sọgan wá linlẹn mẹ gbede dọ [Jiwheyẹwhe] na yinuwa to aliho ehe mẹ nado hù dodonọ po mẹylankan po . . . Be Whẹdatọ aigba lẹpo tọn ma na wà nuhe jlọ wẹ ya?”
Zẹẹmẹ: Jiwheyẹwhe nọ wà nuhe sọgbe to whelẹponu; e ma yin ewọ wẹ mí na dowhẹ eyin mẹdagbe lẹ kú to nugbajẹmẹji jọwamọ tọn lẹ whenu.
Salmu lẹ 46:1, 2: “Jiwheyẹwhe wẹ fibẹtado po huhlọn mítọn po, alọgọ niyaniya tọn to ojlẹ ayimajai tọn lẹ mẹ. Enẹwutu wẹ mí ma na dibu, eyin aigba tlẹ to didiọ.”
Zẹẹmẹ: Mahopọnna nudepope he sọgan to jijọ lẹdo mí, Jiwheyẹwhe yin Asisa huhlọn tọn de he go mí sọgan ganjẹ.
Isaia 63:9: “To ayimajai yetọn lẹpo whenu, e nọ hẹn ayimajai wá na ewọ lọsu.”
Zẹẹmẹ: Jiwheyẹwhe nọ vẹawumẹ—onú mítọn nọ biọlanmẹna ẹn to whenue mí to yaji.
Johanu 5:28, 29: “Ojlẹ lọ ja, to ehe mẹ mẹhe to yọdò oflin tọn lẹ mẹ lẹpo na sè ogbè [Jesu tọn] bo tọ́njẹgbonu.”
Zẹẹmẹ: Mí sọgan tindo todido dọ mí na mọ mẹyiwanna mítọn he ko kú lẹ to gbèdopo, na Jiwheyẹwhe na na huhlọn Jesu nado hẹn yé gọwá ogbẹ̀.
1 Pita 5:6, 7: “Enẹwutu, mì nọ whiwhẹ mìde to alọ huhlọnnọ Jiwheyẹwhe tọn glọ . . . dile mì to magbọjẹ mìtọn lẹpo bẹ dlan ewọ ji, na e to mìtọn hòpọn wutu.”
Zẹẹmẹ: Onú mítọn nọ duahunmẹna Jiwheyẹwhe taun bọ e sọ jlo dọ mí ni nọ hodẹ̀ hlan emi gando magbọjẹ mítọn lẹ go.
Osọhia 21:4: “[Jiwheyẹwhe] nasọ súnsún dasin lẹpo sẹ̀ sọn nukun yetọn mẹ, okú ma nasọ tin ba, mọjanwẹ aluẹmẹninọ kavi avi kavi awufiẹsa ma nasọ tin ba. Onú hoho lẹ ko juwayi.”
Zẹẹmẹ: Jiwheyẹwhe na de nuhe nọ hẹn yajiji wá lẹpo sẹ̀, kakajẹ nugbajẹmẹji jọwamọ tọn lẹ ji.
23-29 DÉCEMBRE
NUHỌAKUẸ LẸ SỌN OHÓ JIWHEYẸWHE TỌN MẸ SALMU LẸ 119:121-176
Dapana Awufiẹsa He Ma Yin Dandan Lẹ
Dike Ohó Jiwheyẹwhe Tọn Ni Nọ Deanana Ayihadawhẹnamẹnu Towe
5 Nado mọaleyi sọn osẹ́n Jiwheyẹwhe tọn lẹ mẹ, mí dona wà nususu hú osẹ́n lọ lẹ hihia kavi akọjijẹ hẹ yé poun. Mí dona plọn nado yiwanna yé bosọ tindo sisi na yé. Ohó Jiwheyẹwhe tọn dọmọ: “Mì gbẹwanna nuhe ylan, bo yiwanna nuhe yin dagbe.” (Amọ. 5:15) Ṣigba, nawẹ mí nọ wàmọ nugbonugbo gbọn? Aliho titengbe dopo wẹ nado nọ pọ́n nulẹ hlan dile Jehovah nọ wà do. Apajlẹ dopo die: Mí ni dọ dọ a ma nọ mọ amlọndọ ganji. Doto towe na we ayinamẹ gando núdùdù delẹ dùdù, aihundida lanmẹyiya tọn po diọdo devo lẹ bibasi to gbẹzan towe mẹ po go. To whenue a tẹ́n ayinamẹ lọ lẹ pọ́n godo, a mọdọ yé wazọ́n! E yọnbasi dọ a na yọ́n pinpẹn etọn taun dọ doto towe gọalọna we nado hẹn gbẹzan towe pọnte.
6 To aliho dopolọ mẹ, Mẹdatọ mítọn ko na mí osẹ́n lẹ he sọgan basi hihọ́na mí sọn kọdetọn vẹadi ylando tọn lẹ si bo gbọnmọ dali hẹn gbẹzan mítọn pọnte. Lẹnnupọndo lehe mí nọ mọaleyi sọn tonusisena osẹ́n Biblu tọn he gando lalodido, ayiha gigẹdẹ zinzan, ajojijẹ, fẹnnuwiwa zanhẹmẹ tọn, danuwiwa po afinyọnnuwiwa po go lẹ mẹ do ji. (Hia Howhinwhẹn lẹ 6:16-19; Osọ. 21:8) To jọwamọ-liho, owanyi he mí tindo na Jehovah po osẹ́n etọn lẹ po nọ jideji to ahun mítọn mẹ dogọ, to whenue mí tindo numimọ dona susugege he nọ wá sọn nulẹ wiwà to aliho Jehovah tọn mẹ tọn.
Jọja lẹ Emi—Etẹ Yanwle Wẹ Mì Te?
12 Hú onu lẹpo, hiẹ dona plọ́n nado gbẹwanna, họ̀n na, bosọ yí nuhe ylan do basi osùnú. (Psalm 97:10) Nawẹ hiẹ sọgan gbẹwanna nude he to tintan whenu yin gbẹ̀dudu kavi pekọhẹnwanamẹnu de gbọn? Gbọn nulẹnpọn dogbọn kọdetọn etọn lẹ dali wẹ! “Yè klọ mì blo; Jiwheyẹwhe ma yin mẹvivlẹ gba; na nudepope gbẹtọ do, enẹ wẹ e na gbẹ̀n ga. Na mẹhe do hlan agbasalan etọn, gbọn agbasalan mẹ é na gbẹ̀n gbigble.” (Galatianu lẹ 6:7, 8) To whenuena hiẹ yin whiwhlepọn nado joawuna wantuntun, lẹnnupọn do kọdetọn he klo hugan lọ ji—lehe ehe na vẹna Jehovah Jiwheyẹwhe do sọ ji. (Yijlẹdo Psalm 78:41 go.) Lẹnnupọn ga, dogbọn yọnbasi hòmimọ he yè ma donukun etọn kavi azọ̀n de bibẹ́, taidi SIDA dali. Lẹnnupọn do awugble numọtolanmẹ tọn po oya osi-mẹdetiti tọn hinhẹnbu he hiẹ na ji lọ po ji. Kọdetọn dẹn to aimẹ lẹ sọgan sọ tin ga. Yọnnu Klistiani dopo yigbe dọmọ: “Yẹn po asu ṣie po tindo zanhẹmẹ hẹ mẹdevo lẹ whẹpo mì do dukosọ na míde. Dile etlẹ yindọ mì omẹ awe lẹpo yin Klistiani lẹ to egbehe sọ, gbẹ̀zan zanhẹmẹ tọn mítọn he ko juwayì yin asisa wiwọ́ po awuwhàn tọn po to alọwle mítọn mẹ.” Podọ onu devo he yè ma dona yí nukun pẹvi do pọ́n ga, wẹ hẹnbu lẹblanulọkẹyi yẹwhehọluduta tọn towe kavi yọnbasi yinyin yinyan jẹgbonu sọn agun Klistiani tọn mẹ! (1 Kọlintinu lẹ 5:9-13) Be gbẹ̀dudu whenu gli tọn depope họakuẹ sọ kọdetọn yiaga mọnkọtọn de ya?
Onú Sisosiso Gbigbọmẹ Tọn Lẹ
Kudeji Dọ ‘Nugbo Wẹ Ohó Jiwheyẹwhe Tọn’
2 Taidi devizọnwatọ Jehovah tọn lẹ, mí kudeji dọ “Jiwheyẹwhe nugbo tọn” de wẹ ewọ yin, podọ nuhe na wà dagbe na mí hugan wẹ e nọ jlo to whelẹponu. (Salm. 31:5; Isa. 48:17) Mí yọnẹn dọ mí gán dejido nuhe mí nọ hia to Biblu mẹ lẹ go na “nugbo wẹ ohó [Jiwheyẹwhe tọn] lẹpo” wutu. (Hia Salmu lẹ 119:160.) Mí kọngbedopọ hẹ nuhe weyọnẹntọ Biblu tọn de dọ, dọmọ: “Nuhe Jiwheyẹwhe dọ depope ma yin lalo, mọ e ma yọnbasi dọ yé ni nọma mọ hẹndi pọ́n gbede. Omẹ Jiwheyẹwhe tọn lẹ gán kudo nuhe ewọ nọ dọ lẹ ji na yé nọ dejido Jiwheyẹwhe he ko dọ ẹ lọ go wutu.”
30 DÉCEMBRE–5 JANVIER
NUHỌAKUẸ LẸ SỌN OHÓ JIWHEYẸWHE TỌN MẸ SALMU LẸ 120-126
Yé Do po Dasin po, Ṣigba bo Gbẹ̀n po Ayajẹ Po
Donanọ Wẹ Mẹhe Nọ Pagigona Jiwheyẹwhe Lẹ
10 Zẹgẹ devi-yinyin tọn zizedo okọ̀ zẹẹmẹdo dọ mí to avùnho sọta Satani. “Mì diọnukunsọ Lẹgba; e nasọ họ̀n sọn mì dè,” wẹ Jakobu 4:7 dọ. Ehe ma zẹẹmẹdo dọ mọwiwà bọawu gba. Jiwheyẹwhe sinsẹ̀n biọ vivẹnudido susu. (Luku 13:24) Ṣigba Biblu dopagbe ehe to Psalm 126:5 mẹ dọmọ: “Yé he to nọkún húnhún to dasin mẹ lẹ na gbẹ̀n to hàngbe lélé ayajijẹ tọn mẹ.” Mọwẹ, mí ma to Jiwheyẹwhe mayọndagbenọ de sẹ̀n gba. Ewọ wẹ “ahọsutọ yé he whesọ do dín in lẹ tọn,” podọ e nọ dona mẹhe pagigona ẹn lẹ.—Heblu lẹ 11:6.
Nawẹ Yise Towe Na Lodo Sọ?
17 Be a to aluẹmẹ na okú mẹyiwanna de tọn wutu wẹ ya? Nọ yí whenu nado hẹn yise towe to todido fọnsọnku tọn mẹ lodo gbọn kandai mẹhe yin finfọnsọnku bọ Biblu dọho yetọn lẹ tọn hihia dali. Be a jẹflumẹ na hagbẹ whẹndo tọn de yin didesẹ sọn agun mẹ wutu wẹ ya? Nọ plọnnu nado hẹn dewe kudeji dọ aliho he mẹ Jiwheyẹwhe nọ domẹplọnlọmẹgo te wẹ yin dagbe hugan lọ. Mahopọnna nuhahun depope he a to pipehẹ, nọ mọ ẹn taidi dotẹnmẹ de nado hẹn yise towe lodo. Nọ dọ nuhe to ahun ji na we lẹ na Jehovah. Ma nọ klan dewe dovo blo, kakatimọ, dọnsẹpọ mẹmẹsunnu po mẹmẹyọnnu towe lẹ po dogọ. (Howh. 18:1) Nọ do mahẹ to nuwiwa he na gọalọna we nado doakọnnanu lẹ mẹ, eyin etlẹ biọ dọ a ni wàmọ po dasin po. (Salm. 126:5, 6) Nọ hẹn aṣa dagbe opli lẹ yìyì, lizọnyizọn lọ po Biblu hihia po tọn go. Podọ nọ ze ayiha do dona mayọnjlẹ he Jehovah do to sẹdotẹnmẹ na we lẹ ji. Dile a to alọ Jehovah tọn mọ, yise towe to ewọ mẹ na lodo dogọ hugan gbede pọ́n.
Mì Zindonukọn to Azọ́n Jibẹwawhé Tọn Mẹ!
13 Homẹmiọnnamẹnu taun wẹ hogbe Psalm 126:5, 6 tọn lẹ yin na jibẹwawhétọ Jiwheyẹwhe tọn lẹ, podọ na taun tọn na mẹhe jiya homẹkẹn tọn lẹ dọmọ: “Yé he to [okún] húnhún to dasin mẹ lẹ na gbẹ̀n to hàngbe lélé ayajijẹ tọn mẹ. Le etlẹ to yìyì to aliho ji po avi po do hẹn okún lọ tọ́n jẹgbonu; e nasọ gọ̀ po ayajijẹ po hinhẹn dọndai etọn wá po e po.” Hogbe psalm-kàntọ lọ tọn lẹ gando didó po gbingbẹ̀n po go basi dohia nukunpedomẹgo Jehovah tọn po dona etọn po do pipòtọ he lẹkọ sọn kanlinmọgbenu to Babilọni hohowhenu tọn lẹ ji. Homẹ yetọn hùn taun na túndote yetọn, ṣigba yé sọgan ko viavi to whenuena yé to okún dó to aigba gbọgbé he ma ko yin lilẹ̀ to owhe-70 kanlinmọgbenu tọn whenu ji. Ṣigba, mẹhe zindonukọn to nuyiwa okún didó po họgbigbá tọn yetọn po mẹ lẹ duvivi sinsẹ́n po pekọ po tọn sọn tuklajijẹ yetọn mẹ.
14 Mí sọgan viavi to whenuena mí tin to whlepọn glọ kavi to whenuena míwlẹ kavi yisenọ hatọ mítọn lẹ to yaji na dodowiwa wutu. (1 Pita 3:14) To azọ́n jibẹwawhé mítọn tọn mẹ, mí sọgan gbọn ojlẹ sinsinyẹn lẹ mẹ to tintan whenu na mí ma to kọdetọn dagbe tindo na vivẹnudido mítọn to lizọnyizọn lọ mẹ wutu. Ṣigba eyin mí zindonukọn nado to didó bo to sinhúna, Jiwheyẹwhe na hẹn onú lẹ jideji, yèdọ zẹ̀ nuhe mí donukun go. (1 Kọlintinu lẹ 3:6) Ehe yin didohia ganji gbọn kọdetọn Biblu po owe Biblu tọn lẹ mimá mítọn po dali.
Onú Sisosiso Gbigbọmẹ Tọn Lẹ
Huhlọn Hihọ́-Basinamẹ Tọn—‘Jiwheyẹwhe Wẹ Fibẹtado Mítọn’
15 Jẹnukọn whẹ́, lẹnnupọndo hihọ́ agbasa-liho tọn ji. Taidi sinsẹ̀n-basitọ Jehovah tọn lẹ, mí sọgan donukun hihọ́ mọnkọtọn taidi pipli de. Eyin e ma yinmọ, mí na yawu jai jẹ omọ Satani tọn mẹ. Lẹnnupọndo ehe ji: Satani, “ahọvi aihọn he tọn,” ma na jlo nudevo depope hugan nado sukúndona sinsẹ̀n-bibasi nugbo. (Johanu 12:31; Osọhia 12:17) Delẹ to gandudu huhlọnnọ hugan aigba ji tọn lẹ mẹ ko hẹnalọdotena azọ́n yẹwhehodidọ tọn mítọn bo ko tẹnpọn nado sukúndona mí mlẹnmlẹn. Ṣogan, omẹ Jehovah tọn lẹ gbẹ́ pò to tenọgli yetọn go hẹn, bo to nukọnzindo nado dọyẹwheho madoalọte! Naegbọn akọta huhlọnnọ lẹ ma do penugo nado doalọtena azọ́n pipli pẹvi Klistiani ehelẹ tọn? Na Jehovah ko yí awà huhlọnnọ etọn do basi awọ̀yinu na mí wutu!—Psalm 17:7, 8.