KANBIỌ HE JỌJA LẸ NỌ KANSE
Nawẹ N’Gán Dapana Linlẹn Agọ̀ lẹ Gbọn?
Omẹ nankọ wẹ a nọ lẹndọ emi yin?
Mẹhe nọ lẹnnupọndo nudagbe ji
“N’nọ tẹnpọn nado nọ jaya bo ma nọ yawu gblehomẹ whedepopenu he e yọnbasi. N’nọ jlo nado nọ to nuko bo nọ to ayajẹ to azán lẹpo ji.”—Valerie.
Mẹhe nọ lẹnnupọndo onú agọ̀ ji
“Whedepopenu he nudagbe de jọ, tlolo wẹ n’nọ lẹndọ e ma gán yin nugbo.”—Rebecca.
Mẹhe nọ kẹalọyi nulẹ do lee yé te
“Nado nọ lẹnnupọndo nudagbe ji nọ wá hẹnmẹ jẹflumẹ, podọ nado nọ lẹnnupọndo onú agọ̀ ji nọ wá hẹn awubla wá. Nado nọ kẹalọyi nulẹ do lee yé te nọ gọalọna mi nado mọ nulẹ dile yé te do nugbonugbo.”—Anna.
Nuhewutu e do yin nujọnu
Biblu dọ dọ “mẹhe ahun etọn gọ́ na ayajẹ nọ tin to hùnwhẹ mẹ to whepoponu.” (Howhinwhẹn lẹ 15:15) Na nugbo tọn, mẹhe ma nọ to nulẹnpọn do onú agọ̀ lẹ ji bo nọ tindo linlẹn dagbe gando ninọmẹ gbẹ̀mẹ tọn lẹ go nọ saba do ayajẹ taun. E sọ yọnbasi dọ yé ni jihọntọn susu lẹ. To popolẹpo mẹ, mẹnu wẹ na jlo nado jihọntọn hẹ mẹhe nọ to awubla to whelẹponu?
Etomọṣo, eyin a tlẹ nọ to nulẹnpọn do onú dagbe lẹ ji, a na nọ wá pehẹ ninọmẹ sinsinyẹn lẹ. Apajlẹ delẹ die:
Linlin awhàn, nuyiwa nukunbianamẹtọ lẹ tọn po sẹ́nhẹngba po tọn lẹ gán nọ gbàhundona we.
A sọgan pehẹ nuhahun lẹ to whẹndo mẹ.
Ayihaawe ma tin dọ a tindo awugbopo po mape towe lẹ po he a na diahi hẹ.
Họntọn de gán doadihomẹna we.
Kakati nado nọ yinuwa didọ nuhahun enẹlẹ ma tin wẹ nkọ—kavi ze ayiha do yé ji sọmọ bọ a na nọ to awubla mẹ—nọ dovivẹnu nado kẹalọyi nulẹ do lee yé te. Mọwiwà na gọalọna we ma nado nọ ze ayiha do onú agọ̀ lẹ ji gbau bo nọ kẹalọyi ninọmẹ gbẹ̀mẹ tọn lẹ do lee yé te, na yé nikaa hẹn we gbọjọ.
A gán duto nuhahun gbẹ̀mẹ tọn lẹ ji bo deji dọ zande yì zande nọ wá
Nuhe a sọgan wà
Ma nọ yí nukunpẹvi do pọ́n nuṣiwa towe lẹ blo.
Biblu dọmọ: “Gbẹtọ nugbonọ de ma tin to aigba ji, he to dagbe wà bo ma waylan.” (Yẹwhehodọtọ 7:20, Biblu Wiwe lọ—Gun Alada) Nugbo lọ dọ a do awugbopo bo nọ ṣinuwa dohia dọ gbẹtọ wẹ a yin, podọ enẹ ma dohia dọ a ma gán wà dagbe.
Lehe a na nọ kẹalọyi nulẹ do lee yé te do: Nọ wazọ́n do nuṣiwa towe lẹ ji bo ma nọ donukun pipé sọn dewe si blo. “N’nọ tẹnpọn ma nado ze ayidonugo do nuṣiwa ṣie lẹ ji zẹjlẹgo. Kakatimọ, n’nọ dovivẹnu nado plọnnu sọn yé mẹ, na n’ma do yọ́n fie n’na basi vọjlado te,” wẹ dẹpẹ de he nọ yin Caleb dọ.
Ma nọ yí dewe jlẹdo mẹdevo go blo.
Biblu dọmọ: “Mì dike mí dín gigo ovọ́, to agbàwhinwhlẹn finfọndote to ode awetọ mítọn ṣẹnṣẹn, to nuvẹun tintindo na ode awetọ mẹ blo.” (Galatianu lẹ 5:26) Họntọn towe lẹ gán de fọto to nuwiwa he yé ma basi oylọna we de tẹnmẹ bo bẹ yé do nọtẹn gbẹdido Intẹnẹt ji tọn lẹ ji. Fọto enẹlẹ pinpọn sọgan hẹn homẹgble we. Ehe gán zọ́n bọ a na nọ mọ họntọn vivẹ́ towe lẹ di kẹntọ he ylan hugan lẹ.
Lehe a na nọ kẹalọyi nulẹ do lee yé te do: Nugbo lọ wẹ yindọ yè ma gán ylọ we na nuwiwa pọmẹ tọn lẹpo. Gbọnvona enẹ, nue mẹde zedo nọtẹn gbẹdido tọn ji lẹ ma nọ dọ nulẹpo gando gbẹzan mẹlọ tọn go. “Nue mẹlẹ yiwanna hugan lẹ wẹ yé nọ yawu zedo nọtẹn gbẹdido Intẹnẹt ji tọn lẹ ji. Yé ma nọ saba ze nue ma dọnmẹ sọmọ lẹ do finẹ,” wẹ jọja aflanmẹ de he nọ yin Alexis dọ.
Nọ dín jijọho—titengbe to whẹndo mẹ.
Biblu dọmọ: “Eyin e yọnbasi, dile mì penugo do, mì nọ nọ̀ jijọho mẹ.” (Lomunu lẹ 12:18) A ma sọgan deanana nuyiwa mẹdevo lẹ tọn to gigọ́ mẹ, amọ́ hiẹ gán deanana nuyiwa towe. A sọgan de nado nọ dín jijọho.
Lehe a na nọ kẹalọyi nulẹ do lee yé te do: Magbe ma nado yidogọna nuhahun to whẹndo towe mẹ, amọ́ nado nọ dín jijọho, dile a na jlo nado basi hẹ họntọn lẹ do. “Mapenọ wẹ mímẹpo, podọ mí na nọ wá tùnafọ ode awetọ ji sọn jlẹ de mẹ jẹ devo mẹ. Nuhe mí dona wà poun wẹ nado de lehe mí na nọ yinuwa do—vlavo nado dín jijọho kavi lala,” wẹ jọja aflanmẹ de he nọ yin Melinda dọ.
Nọ dopẹ́.
Biblu dọmọ: “Mì nisọ nọ dopẹ́.” (Kolosinu lẹ 3:15) Eyin a tindo aṣa lọ nado nọ dopẹ́, e na gọalọna we nado nọ ze ayiha do nudagbe he to jijọ to gbẹzan towe mẹ lẹ ji kakati do nuhe taidi nue ma sọgbe lẹpo ji.
Lehe a na nọ kẹalọyi nulẹ do lee yé te do: Nọ kẹalọyi nuhahun towe lẹ, amọ́ ma dovọ́na nudagbe he nọ jọ to gbẹzan towe mẹ lẹ blo. “Egbesọegbesọ, n’nọ kàn nudagbe he jọ do go e de do owe de mẹ. N’jlo na nọ flinnu dee dọ n’gbẹ́ do nudagbe susu he ji n’gán lẹnnupọndo,” wẹ awhli de he nọ yin Rebecca dọ.
Nọ pọ́n ogbẹ́ do dó.
Biblu dọmọ: “Gbẹdido ylankan lẹ nọ hẹn walọ dagbe lẹ gble.” (1 Kọlintinu lẹ 15:33) Eyin mẹhe a nọ yí whenu zan hẹ lẹ nọ to homọdọdomẹgo, nọ to mẹṣanko kavi nọ to adidu, jijọ yetọn lẹ na bẹpla we.
Lehe a na nọ kẹalọyi nulẹ do lee yé te do: Adán na nọ wá gbò họntọn towe lẹ, ehe gán zọ́n bọ yé na nọ lẹnnupọndo onú agọ̀ lẹ ji to whedelẹnu. Nọ gọalọna yé, amọ́ ma nọ dike nuhahun yetọn lẹ ni yinuwado ji we blo. “Mí ma dona nọ dogbẹ́ hẹ mẹhe nọ to nulẹnpọn do onú agọ̀ lẹ ji lẹ kẹdẹ,” wẹ awhli de he nọ yin Michelle dọ.
Hianu dogọ gandego
Mí to gbẹnọ to jlẹ de mẹ he Biblu ylọdọ “ojlẹ awusinyẹn tọn he vẹawu nado pehẹ lẹ.” (2 Timoti 3:1) Be e to awuvẹ na we nado nọ lẹnnupọndo onú dagbe lẹ ji to aihọn he gọ́ na nulẹnpọn agọ̀ ehe mẹ wẹ ya? Hia hosọ lọ “Naegbọn Yajiji Do Sù Sọmọ?”