Kanbiọ lẹ sọn Wehiatọ lẹ Dè

Naegbọn bọ jẹnukọnna okú Jesu tọn tlolo, e yihodọ sọn hogbe Davidi tọn he to Salmu lẹ 22:1 mẹ lẹ mẹ?

Delẹ to hogbe godo tọn he Jesu dọ jẹnukọnna okú etọn lẹ mẹ wẹ dehe yin kinkandai to Matiu 27:46 mẹ he dọmọ: “Jiwheyẹwhe ṣie, Jiwheyẹwhe ṣie, naegbọn hiẹ do gbẹ́ mi dai?” Gbọnmọ dali, Jesu hẹn nuhe salmu-kantọ Davidi dọ to Salmu lẹ 22:1 mẹ lẹ di. (Malku 15:34) E ma na sọgbe nado wá tadona kọ̀n dọ Jesu yihodọ sọn hogbe ehelẹ mẹ, na e jẹflumẹ kavi na yise etọn miọn na ojlẹ de wutu. Jesu mọnukunnujẹ nuhewutu e dona kú mẹ to gigọ́ mẹ, podọ e sọ wleawufo nado wàmọ. (Mat. 16:21; 20:28) E sọ yọnẹn ga dọ to okú emitọn whenu, e na biọ dọ Jehovah ni de “opá hihọ́-basinamẹ tọn” depope he lẹdo emi sẹ̀. (Jobu 1:10) Gbọnmọ dali, Jehovah na dotẹnmẹ Jesu nado dohia hezeheze dọ ewọ na hẹn nugbonọ-yinyin etọn go, mahopọnna ninọmẹ depope he mẹ e na kú te.—Malku 14:35, 36.

Eyin mọ wẹ, naegbọn Jesu do yí hogbe salmu ehe tọn lẹ zan? Dile etlẹ yindọ mí ma gán dọ nuewutu wẹ taun, mì gbọ mí ni gbadopọnna nudelẹ he gán ko zọ́n.a

To whenue Jesu yí hogbe ehelẹ zan, e gán ko to didọ dọ Jehovah ma na yí nude wà to okú emitọn whenu. Jesu dona sú ofligọ lọ matin alọgọ Jehovah tọn. Gbẹtọvi de wẹ ewọ yin bosọ dona kú nado “dọ́ okú pọ́n do gbẹtọ lẹpo tamẹ.”—Heb. 2:9.

Whenue Jesu yihodọ sọn salmu enẹ mẹ, e gán ko to ayidonugo dọ̀n wá salmu lọ blebu ji. To ojlẹ enẹlẹ mẹ, aṣa Ju lẹ tọn wẹ e yin nado plọn salmu susu lẹ do tamẹ. Eyin yé sè wefọ salmu de tọn, to jọwamọ-liho, yé nọ yin whinwhàn nado lẹnnupọndo salmu lọ blebu ji. Eyin nue Jesu jlo na wà niyẹn, be e na ko gọalọna hodotọ etọn Ju lẹ nado flin dọdai susu he tin to salmu ehe mẹ lẹ, he gando nujijọ he na lẹdo okú etọn go lẹ. (Salm. 22:7, 8, 15, 16, 18, 24) Podọ, wefọ godo tọn salmu ehe tọn lẹ pà Jehovah bosọ do e hia taidi mẹhe duahọlu do aigba lọ blebu ji.—Salm. 22:27-31.

Whenue Jesu yihodọ sọn hogbe Davidi tọn ehelẹ mẹ, e gán ko to nùzindo homẹvọnọ-yinyin etọn titi ji. Jẹnukọnna okú Jesu tọn, e dona doakọnna whẹdida agọ̀ he dohia dọ ewọ hùwhẹ nùzinzan tọn. (Mat. 26:65, 66) Owhẹ̀ ehe yawu yin didá to zánhomẹ, bo masọ sọgbe hẹ nujinọtedo osẹ́n tọn he yin alọkẹyi lẹ to aliho depope mẹ. (Mat. 26:59; Malku 14:56-59) Whenue Jesu yihodọ sọn Salmu lẹ 22:1 mẹ, e sọgan ko to ayidonugo mẹlẹ tọn dọ̀n wá nugbo lọ ji dọ ewọ ma wà nudepope he jẹna yasanamẹ mọnkọ.

Jesu gán ko sọ to nuflin mẹdevo lẹ dọ dile etlẹ yindọ Davidi he kàn salmu ehe yin dotẹnmẹna nado jiya, ehe ma zẹẹmẹdo dọ ewọ hẹn nukundagbe Jehovah tọn bu. Kanbiọ Davidi tọn ma dohia dọ yise etọn miọn gba. To whenue e fọ́n kanbiọ lọ dote godo, e zindonukọn bo do jidide hia to huhlọn mẹwhlẹngán tọn Jehovah tọn mẹ, podọ Jehovah zindonukọn nado to didona ẹn. (Salm. 22:23, 24, 27) Mọdopolọ, dile etlẹ yindọ Jesu he yin “Visunnu Davidi tọn” to yaji to yatin de ji, ehe ma zẹẹmẹdo dọ Jehovah masọ kẹalọyi ewọ gba.—Mat. 21:9.

Nugbo lọ dọ Jehovah dona de hihọ́-basinamẹ Etọn sẹ̀ sọn Jesu ji, na e nido sọgan do tenọgligo-hinhẹn etọn hia mlẹnmlẹn gán ko zọ́n bọ e na to awufiẹsa sinsinyẹn etọn dohia. Lẹndai dowhenu tọn Jehovah tọn ma yin dọ Visunnu etọn ni jiya bosọ kú. Atẹṣiṣi Adam po Evi po tọn godo wẹ enẹ lẹzun dandan. Jesu ma hùwhẹ depope, amọ́ e dona jiya bosọ kú nado sọgan na gblọndo na kanbiọ he Satani fọndote lẹ bosọ sú ofligọ he yin dandan nado fli nue sunnu tintan lọ hẹnbu lẹ gọ̀. (Malku 8:31; 1 Pita 2:21-24) Ehe sọgan yin wiwadotana kiki eyin Jehovah de hihọ́-basinamẹ etọn sẹ̀ sọn Jesu ji na ojlẹ kleun de whla tintan to gbẹzan etọn mẹ.

Jesu gán ko to tintẹnpọn nado gọalọna hodotọ etọn lẹ nado ze ayiha do nuhewutu Jehovah do dike bọ e kú to aliho ehe mẹ ji.b Jesu yọnẹn dọ nado kú taidi sẹ́nhẹngbatọ de to yatin ji yin okú wunmẹ de he na hẹn mẹsusu dahli. (1 Kọl. 1:23) Eyin hodotọ etọn lẹ ze ayiha do whẹwhinwhẹ́n tangan he wutu ewọ do kú ji, yé na yọ́n nue enẹ zẹẹmẹdo nugbonugbo. (Gal. 3:13, 14) Gbọnmọ dali, yé na nọ mọ ẹn taidi Whlẹngántọ bọ e ma yin taidi sẹ́nhẹngbatọ.

Mahopọnna whẹwhinwhẹ́n depope he wutu Jesu do yí hogbe ehelẹ zan, e mọnukunnujẹemẹ dọ nue mẹ jugbọn emi te lẹ yin apadewhe ojlo Jehovah tọn na emi. Ojlẹ kleun de to whenue e yihodọ sọn salmu ehe mẹ godo, e dọmọ: “E ko yin wiwadotana!” (Joh. 19:30; Luku 22:37) Na nugbo tọn, hihọ́-basinamẹ Jehovah tọn he e desẹ sọn Jesu ji na ojlẹ de na ẹn dotẹnmẹ nado wà nuewutu e do yin didohlan aigba ji lẹpo dotana mlẹnmlẹn. E sọ na ẹn dotẹnmẹ nado hẹn nue yin kinkando “Osẹ́n Mose tọn mẹ podọ do Yẹwhegán lẹ po Salmu lẹ po mẹ” lẹpo di.—Luku 24:44.