Kanbiọ lẹ sọn Wehiatọ lẹ Dè
Naegbọn dawe he yin yiylọdọ “Omẹ-le” do dọ dọ emi na hẹn ogú emitọn titi “bu” eyin emi wlealọ hẹ Luti? (Luti 4:1, 6)
To ojlẹ Biblu tọn lẹ mẹ, eyin sunnu he ko wlealọ de kú bo ma ka do ovi, kanbiọ delẹ dona mọ gblọndo: Etẹwẹ na jọ do aigba depope he e do go? Be yinkọ whẹndo etọn tọn na busẹ kakadoi wẹ ya? Osẹ́n Mose tọn na gblọndo kanbiọ mọnkọ lẹ tọn.
Etẹwẹ nọ jọ do aigba sunnu de he kú kavi he wá jẹhẹ́n bo sà aigba etọn tọn go? Nọvisunnu kavi hẹnnumẹ he sẹpọmẹ de gán fli aigba lọ gọ̀ kavi vọ́ ẹ họ̀. Ehe na zọ́n bọ aigba lọ na gbẹ́ yin whẹndo lọ tọn.—Lev. 25:23-28; Sọh. 27:8-11.
Nawẹ mọwiwà nọ zọ́n bọ yinkọ whẹndo tọn sunnu he kú lọ tọn ma nọ busẹ gbọn? Tito asi sínsọ́n tọn, yèdọ dehe wá aimẹ to whẹho Luti tọn mẹ wẹ nọ yin yiyizan. Sunnu de nọ wlealọ hẹ asi nọvisunnu etọn he kú lọ tọn nado jivi de he na yí yinkọ sunnu he kú lọ tọn bo dugu nutindo etọn lẹ tọn. Tito owanyi tọn ehe sọ nọ wà dagbe na asuṣiọsi lọ ga.—Deut. 25:5-7; Mat. 22:23-28.
Lẹnnupọndo apajlẹ Naomi tọn ji. E wlealọ hẹ dawe de he nọ yin Elimelẹki. Whenue Elimelẹki po visunnu yetọn awe lẹ po kú, mẹde masọ tin he na penukundo Naomi go ba. (Luti 1:1-5) Whenue Naomi lẹkọwa Juda, e na ayinamẹ ovisi etọn Luti nado biọ to Boazi si nado fli aigba yetọn gọ̀. Hẹnnumẹ sẹpọmẹ Elimelẹki tọn de wẹ Boazi yin. (Luti 2:1, 19, 20; 3:1-4) Amọ́ Boazi mọdọ hẹnnumẹ devo sọ tin he sẹpọ Elimelẹki hugan emi, mẹhe Biblu ylọdọ “Omẹ-le.” Enẹwutu, uwọ whẹ́whẹ́ wẹ na tindo dotẹnmẹ hundote lọ nado basi nudide vlavo e jlo na yin mẹflitọ lọ kavi lala.—Luti 3:9, 12, 13.
To tintan whenu, “Omẹ-le” jlo na gọalọ. (Luti 4:1-4) Mahopọnna dọ enẹ na biọ akuẹzinzan delẹ sọn e si, e mọdọ Naomi masọ sọgan ji ovi de he na dugu aigba Elimelẹki tọn lẹ tọn ba. Aigba lọ na wá yin yiyidogọna ogú-yigba “Omẹ-le” tọn wẹ, gbọnmọ dali e taidi dọ mẹfifli ehe na pé na ẹn.
Amọ́, “Omẹ-le” diọlinlẹn whenue e wá yọnẹn dọ e na biọ dọ emi nisọ dà Luti. E dọmọ: “Yẹn ma na penugo nado fli i gba, na ehe sọgan zọ́n bọ n’na hẹn ogú ṣie titi bu.” (Luti 4:5, 6) Naegbọn e do diọlinlẹn?
Eyin “Omẹ-le” kavi mẹdevo de wlealọ hẹ Luti bọ ewọ ji visunnu de, visunnu enẹ na dugu aigba Elimelẹki tọn. Nawẹ ehe na hẹn “ogú” Omẹ-le tọn “bu” gbọn? Biblu ma dọ, amọ́ yọnbasi delẹ die.
Tintan, akuẹ he e zán nado họ̀ aigba Elimelẹki tọn na taidi nuhẹngu, na aigba lọ ma na wá yin etọn. Visunnu he Luti ji tọn wẹ e na yin.
Awetọ, e na tindo azọngban lọ nado nọ na núdùdù Naomi po Luti po bosọ nọ penukundo yé go.
Atọ̀ntọ, eyin Luti ji ovi devo lẹ na Omẹ-le, ovi lọ lẹ na má ogú Omẹ-le tọn hẹ ovi etọn lẹ.
Ẹnẹtọ, eyin Omẹ-le ma tindo ovi devo lẹ na ede, visunnu he Luti ji wẹ na paṣẹ do aigba Elimelẹki po Omẹ-le po tọn lẹ ji. Gbọnmọ dali, whenue e na kú, aigba etọn na lẹzun ovi de he tindo yinkọ Elimelẹki tọn, e ma yin ovi he tindo yinkọ etọn tọn. Omẹ-le ma jlo na ze ogú etọn do owù mẹ nado gọalọna Naomi. E mọdọ e pọnte na emi hugan nado na dotẹnmẹ mẹflitọ he bọdego, enẹ wẹ Boazi nado didá azọngban enẹ. Boazi wàmọ na e jlo “nado hẹn oyín sunnu he ko kú lọ tọn gọwá ogú etọn ji” wutu.—Luti 4:10.
E taidi dọ Omẹ-le jlo vẹkuvẹku nado hẹn yinkọ edetiti tọn po ogú etọn po dote. Ṣejannabi yinuwado pọndohlan etọn ji. Amọ́, kakati yinkọ etọn ni gbọṣi aimẹ, mí ma tlẹ yọ́n yinkọ Omẹ-le tọn kakajẹ egbé. Lẹblanulọkẹyi vonọtaun he Boazi mọyi sọ gbọ̀ e go, enẹ wẹ nado yin sislẹ do hukan whẹndo tọn he mẹ Mẹsia lọ, Jesu Klisti wá sọn mẹ. Kọdetọn he blawu nankọ die na Omẹ-le, na e gbọn ṣejannabi dali gbẹ́ nado gọalọna mẹhe to hudo mẹ de wutu!—Mat. 1:5; Luku 3:23, 32.