Kanbiọ lẹ sọn Wehiatọ lẹ Dè

To Atọ̀họ̀-Nuhihọ́ lọ Tọn juin 2020 tọn mẹ, nawẹ hosọ lọ “Na Oyín Towe Ni Yin Kinklandowiwe” hẹn nuyise mítọn gando yinkọ Jehovah tọn po whẹho nupojipetọ-yinyin tọn etọn po go họnwun dogọ gbọn?

To hosọ enẹ mẹ, mí plọn dọ na taun tọn whẹho dopo gee wẹ nudida nuyọnẹntọ lẹpo pannukọn: enẹ wẹ klandowiwe yinkọ daho Jehovah tọn. Adà whẹho daho enẹ tọn de wẹ whẹho nupojipetọ-yinyin tọn Jehovah tọn, enẹ wẹ eyin vlavo aliho gandudu tọn Jehovah tọn wẹ yin dagbe hugan lọ kavi lala. Mọdopolọ, adà whẹho daho lọ tọn devo wẹ whẹho tenọgligo-hinhẹn gbẹtọvi lẹ tọn.

Naegbọn mí do to nuzindeji todin dọ whẹho daho hugan lọ sinai do oyín Jehovah tọn po oyín enẹ kinklandowiwe po ji? Mì gbọ mí ni gbadopọnna whẹwhinwhẹ́n atọ̀n delẹ.

Tintan, Satani kọnmasin do yinkọ Jehovah tọn kavi oyín dagbe etọn go to jipa Edẹni tọn mẹ. Kanbiọ yẹdoklọmẹ tọn he Satani kanse Evi dohia dọ Jehovah yin Jiwheyẹwhe de he ma nọ tlúalọ, podọ dọ anademẹ he e na Adam po Evi po lẹ ma sọgbe hẹ lẹnpọn dagbe. Enẹgodo, Satani jẹagọdo hogbe Jehovah tọn lẹ tlọlọ bo dohia to linlẹn de mẹ dọ Jiwheyẹwhe yin lalonọ. Enẹwutu, e kọnmasin do yinkọ Jehovah tọn go. E lẹzun “Lẹgba,” ehe zẹẹmẹdo “mẹhẹngbletọ.” (Joh. 8:44) Na Evi yí lalo satani tọn lẹ sè wutu, e vẹtolina Jiwheyẹwhe bo ṣiatẹ sọta nupojipetọ-yinyin etọn. (Jen. 3:1-6) Kakajẹ egbehe, Satani gbẹ́ to yinkọ Jiwheyẹwhe tọn hẹngble bo nọ hẹn lalo lẹ gbayipe gando Omẹ alọpa he Jehovah yin go. E yọnbasi taun dọ mẹhe nọ yí lalo enẹlẹ sè lẹ ni vẹtolina Jehovah. Enẹwutu, to nukun omẹ Jiwheyẹwhe tọn lẹ tọn mẹ, masin he yin kinkọ̀n do yinkọ wiwe Jehovah tọn go wẹ yin mawadodo daho hugan lọ. Enẹ wẹ yin adọ̀ yajiji po kanyinylan he to ogbẹ̀ lọ mẹ lẹpo po tọn.

Awetọ, na dagbemẹninọ nudida lẹpo tọn, Jehovah ko magbe nado suwhẹna oyín etọn, bosọ klọ ẹ wé sọn masin he yin kinkọ̀n dego lẹpo mẹ. Enẹ wẹ yin whẹho titengbe hugan lọ to nukun Jehovah tọn mẹ. Enẹwutu e dọmọ: ‘Na nugbo tọn, yẹn na klan oyín daho ṣie do wiwe.’ (Ezek. 36:23) Podọ, Jesu sọ zinnudo onú titengbe hugan he go devizọnwatọ nugbonọ Jehovah tọn lẹpo dona nọ hodẹ̀ gando ji, whenue e dọmọ: “Na oyín towe ni yin kinklandowiwe.” (Mat. 6:9) Whlasusu wẹ Biblu zinnudeji dọ nujọnu wẹ e yin nado nọ pagigona yinkọ Jehovah tọn. Lẹnnupọndo apajlẹ delẹ poun ji: “Mì na Jehovah gigo he oyín etọn jẹna.” (1 Otàn. 16:29; Salm. 96:8) “Mì jihàn pipà tọn lẹ do pà oyín gigonọ etọn.” (Salm. 66:2) ‘Yẹn na nọ pagigona oyín towe kakadoi.’ (Salm. 86:12) Dopo to whenue Jehovah lọsu dọho sọn olọn mẹ lẹ mẹ wá aimẹ to tẹmpli Jelusalẹm tọn mẹ fie Jesu dọ te dọmọ: “Otọ́, pagigona oyín towe.” Jehovah gblọn bo dọmọ: “Yẹn ko pagigona ẹn bo nasọ vọ́ pagigona ẹn.”—Joh. 12:28.a

Atọ̀ntọ, lẹndai ojlẹ dindẹn tọn Jehovah tọn tindo kanṣiṣa hẹ oyín kavi yinkọ dagbe etọn. Di dohia: Etẹwẹ na jọ to mẹtẹnpọn godo tọn he na wá aimẹ to vivọnu Gandudu Owhe Fọtọ́n tọn Klisti tọn lọ tọn godo? Be whẹho titengbe he gando klandowiwe yinkọ Jehovah tọn go lọ na gbẹ́ nọ hẹn kinklan wá to nudida nuyọnẹntọ lẹ ṣẹnṣẹn wẹ ya? Nado mọ gblọndo kanbiọ enẹ tọn, mì gbọ mí ni flin adà awe he e bẹhẹn lẹ, enẹ wẹ tenọgligo-hinhẹn gbẹtọvi lẹ tọn po nupojipetọ-yinyin Jehovah tọn po. Be e na gbẹ́ nọ vẹawuna gbẹtọvi he do yede hia di nugbonọ lẹ nado hẹn tenọgli yetọn go wẹ a? Lala. Yé na ko yin mẹpipe bo na ko sọ yin whiwhlepọn mlẹnmlẹn. Yé na ko mọ ogbẹ̀ madopodo yí. Be whẹho nupojipetọ-yinyin tọn na gbẹ́ nọ hẹn nudindọn, etlẹ yin kinklan wá nudida nuyọnẹntọ lẹ ṣẹnṣẹn wẹ ya? Paali. E na ko yin didohia kakadoi dọ aliho gandudu tọn Jehovah tọn wẹ sọgbe bosọ yin dagbe hugan lọ. Etẹwẹ lo na nuhe dù oyín Jehovah tọn?

To ojlẹ enẹ mẹ, yinkọ Jehovah tọn na ko yin kinklandowiwe mlẹnmlẹn bọ masin lẹpo na ko yin didesẹ sọn e go. Amọ́, oyín Jehovah tọn na gbẹ́ nọ yin nujọnu hugan na devizọnwatọ nugbonọ etọn lẹpo to olọn mẹ podọ to aigba ji. Etẹwutu? Na yé na mọdọ Jehovah gbẹ́ to onú jiawu lẹ wà wutu. Lẹnnupọndo ehe ji: Na Jesu na gbọn whiwhẹ dali gọ̀ gandudu lẹpo jo na Jehovah wutu, Jiwheyẹwhe na “yin nulẹpo na mẹlẹpo.” (1 Kọl. 15:28) Enẹgodo, gbẹtọvi he to aigba ji lẹ na nọ jẹaglin to “mẹdekannujẹ gigonọ he yin ovi Jiwheyẹwhe tọn lẹ tọn” mẹ. (Lom. 8:21) Podọ, Jehovah na hẹn lẹndai ojlẹ dindẹn tọn etọn lọ di mlẹnmlẹn, enẹ wẹ nado kọ̀n nudida nuyọnẹntọ etọn he to olọn mẹ po dehe to aigba ji lẹpo po dopọ taidi whẹndo daho de he mẹ pọninọ tin te.—Efe. 1:10.

Nawẹ nujijọ enẹlẹ na yinuwado whẹndo Jehovah tọn ji to olọn mẹ podọ to aigba ji gbọn? E sọgbe hẹ lẹnpọn dagbe dọ mí na mọ nuhudo lọ, yèdọ ojlo vẹkuvẹku lọ nado to gigopana yinkọ dagbedagbe Jehovah tọn zọnmii. Salmu-kantọ Davidi yin gbigbọdo nado wlan dọmọ: “Na Jehovah Jiwheyẹwhe ni yin pipà . . . Na oyín gigonọ etọn ni yin pipà kakadoi.” (Salm. 72:18, 19) Mí na zindonukọn nado nọ mọ whẹwhinwhẹ́n yọyọ po dehe fọnjlodotenamẹ lẹ po nado to mọwà kakadoi.

To popolẹpo mẹ, yinkọ Jehovah tọn nọ do nulẹpo hia gandego. Eyin mí to nulẹnpọn do oyín Jehovah tọn ji, onú titengbe he mí nọ flin wẹ owanyi etọn. (1 Joh. 4:8) Mí na nọ flin to whelẹponu dọ owanyi mẹ wẹ Jehovah desọn bo do dá mí, dọ owanyi wẹ whàn ẹn nado wleawuna avọ́sinsan ofligọ tọn lọ, podọ owanyi mẹ wẹ e desọn bo dohia dọ aliho gandudu tọn emitọn wẹ sọgbe hugan. Amọ́ mí na gbẹ́ nọ mọ lehe Jehovah na nọ do owanyi etọn hia nudida etọn lẹ do. Mí na yin whinwhàn nado dọnsẹpọ ẹ dogọ taidi Otọ́ mítọn bo nasọ nọ jihàn nado pà oyín gigonọ etọn kakadoi.—Salm. 73:28.