Mí Gán Jihọntọn hẹ Jiwheyẹwhe Eyin Mí Yọnẹn
Nugbo wẹ dọ Mẹdatọ lọ do huhlọn taun. Amọ́, omẹ alọpa he e yin sọ nọ dọnmẹ taun. E tlẹ jlo dọ mí ni plọnnu gando emi go bo yin họntọn etọn lẹ. (Johanu 17:3; Jakọbu 4:8) Enẹ wẹ zọ́n bọ e do bayi zẹẹmẹ susu lẹ gando ede go.
Mẹdatọ lọ Do Yinkọ De
“Gbọ gbẹtọ lẹ ni yọnẹn dọ hiẹ, mẹhe oyín towe nọ yin Jehovah, hiẹ dopo kẹdẹ wẹ yin Gigogán to aigba lẹpo ji.”—SALMU LẸ 83:18.
Biblu plọn mí dọ Jehovah wẹ Jiwheyẹwhe nugbo lọ. Ewọ wẹ dá wẹkẹ lọ po nuhe to ogbẹ̀ lọ mẹ lẹpo po. Uwọ kẹdẹ wẹ mí dona nọ sẹ̀n.—Osọhia 4:11.
Jehovah Yin Jiwheyẹwhe Owanyinọ De
“Jiwheyẹwhe wẹ owanyi.”—1 JOHANU 4:8.
Jehovah do omẹ alọpa he ewọ yin hia gbọn Biblu po nuhe e dá bọ mí nọ mọ lẹ po gblamẹ. Owanyi wẹ nọ tọ́nta hugan to nue Jiwheyẹwhe nọ wà lẹpo mẹ. Eyin mí nọ fọ́n bo nọ to nuplọn gando Jehovah go, owanyi he mí tindo na ẹn na fọ́n bo to sinsinyẹn deji.
Jehovah Yin Jiwheyẹwhe de He Nọ Jonamẹ
“Hiẹ yin Jiwheyẹwhe de he wleawufo nado jonamẹ.”—NẸHEMIA 9:17.
Jehovah yọnẹn dọ mapenọ wẹ mí yin. Enẹ wẹ zọ́n bọ e “wleawufo nado jona” mí. Eyin mí dọna ẹn dọ nue mí wà lọ vẹna mí bo dogán ma nado vọ́ nudopolọ wà, e na jona mí. E ma nasọ pọ́n do nuṣiwa lọ go do yinuwa hẹ mí.—Salmu lẹ 103:12, 13.
Jehovah Jlo Dọ Mí Ni Nọ Hodẹ̀ Hlan Emi
“Jehovah ma dẹn do mẹhe nọ dawhá ylọ ẹ lẹpo . . . E nọ sè awhágbe yetọn na alọgọ.”—SALMU LẸ 145:18, 19.
Jehovah ma biọ dọ mí ni hodo aṣa vonọtaun de do sẹ̀n emi kavi dọ mí ni yí yẹdide sinsẹ̀n tọn lẹ zan. Dile mẹjitọ he yiwanna ovi yetọn lẹ nọ dotoaina yé do, mọ wẹ Jiwheyẹwhe lọsu nọ dotoaina odẹ̀ mítọn lẹ do.