WESẸDOTẸN INTẸNẸT JI TỌN Watchtower Tọn

WESẸDOTẸN INTẸNẸT JI TỌN

Watchtower Tọn

g22 sọha 1 w. 10-12
3 | Ma Wọn Mẹvivẹ Towe lẹ Blo

Fọ́n!—2022

g22 sọha 1 w. 10-12

AIHỌN DE HE TO BẸWLU MẸ

3 | Ma Wọn Mẹvivẹ Towe lẹ Blo

NUHEWUTU E YIN NUJỌNU

Ayimajai he to jijideji to ogbẹ̀ lọ mẹ lẹ zọ́n bọ mẹsusu to vọdona mẹvivẹ yetọn lẹ to mayọnẹn mẹ.

Mẹdelẹ masọ nọ vẹ́ po họntọn yetọn lẹ po ba.
Asu po asi po delẹ nọ to nudọn.
Mẹjitọ delẹ masọ to adán he to ovi yetọn lẹ gbò tọn dọ sọmọ ba kavi ma tlẹ sọ nọ dọ paali.

Nuhe A Dona Yọnẹn

A do hudo họntọn lẹ tọn nado nọ ganji, titengbe to adángbòmẹ whenu.
Ayimajai he nuhahun gbẹ̀mẹ tọn lẹ nọ hẹnwa gán dán hiẹ po whẹndo towe po dile mì ma tlẹ lẹn do.
Linlin agọ̀ lẹ gán dotukla ovi towe lẹ hú nuhe a lẹn.

Nuhe A Sọgan Wà Todin

Biblu dọmọ: “Họntọn nugbo nọ yiwannamẹ to whelẹponu, podọ nọvisunnu he go yè sọgan dejido to ojlẹ ayimajai tọn lẹ mẹ wẹ ewọ.”—Howhinwhẹn lẹ 17:17.

Dín alọgọ mẹhe nọ hò towe pọ́n bo gán na we ayinamẹ dagbe de tọn. Yinyọnẹn tata dọ mẹde to towe dọ gán na we huhlọn nado pehẹ nuhahun azán dopodopo tọn lẹ.

LEHE E GÁN PÀ WE DO—Ayinamẹ Delẹ

To adángbòmẹ whenu, a gán wà nuhe bọdego lẹ ma nado wọn mẹvivẹ towe lẹ

MÌ WANU DOPỌ DI ASU PO ASI PO

Mì wanu dopọ di asu po asi po

Biblu dọmọ: “Omẹ awe pọnte hú mẹdopo . . . Na eyin dopo to yé mẹ jai, omẹ awetọ sọgan ze hatọ etọn ṣite.” (Yẹwhehodọtọ 4:9, 10) Asu po asi po dona nọ wanu dopọ di họntọn vivẹ́, e ma yin taidi kẹntọ.

Mì magbe ma nado nọ sún adi do ode awetọ go. Eyin mì nọ fahomẹ bo nọ johodo, mì na wà nususu dopọ.
E whè gbau, whladopo to osẹ dopo mẹ, nọ dọho hẹ alọwlemẹ towe do nuhahun mìtọn lẹ ji. Flindọ nuhahun lọ lẹ sin pọngbọ wẹ mì jlo na dín, e ma yin nado dowhẹ ode awetọ.
Mì nọ dín whenu nado wà nuhe mì omẹ awe lẹ yiwanna lẹ dopọ.
Mì nọ flin ojlẹ dagbe he mì ko yizan dopọ lẹ. Vlavo mì gán nọ pọ́n fọto he mì de to gbeegbe mì wlealọ lẹ kavi nujijọ dagbe devo lẹ tọn.

“Asu po asi po gán nọma dogbepọ to nulẹpo mẹ, amọ́ ehe ma dohia dọ yé ma gán wanu dopọ. Yé gán basi dide nude tọn to pọmẹ bo wazọ́n alọ to alọmẹ na e nido pà yé.”—David.

MA GBẸKỌ HỌNTỌN LẸ GO BLO

Ma gbẹkọ họntọn lẹ go blo

E nọ yọ́n dọ mí ni mọ họntọn lẹ to godo, amọ́ mílọsu gán nọ pọ́n lehe mí gán nọ nọgodona yé do. Eyin mí nọ wà dagbe na mẹlẹ bo nọ nọgodona yé, mílọsu wẹ mí to dagbe wà na.
To azán dopodopo ji, nọ de họntọn delẹ bo nọ ylọ yé nado pọ́n lehe yé te do.
Nọ kanse họntọn towe lẹ lehe yé basi do bọ e do pà yé to whenue yé jugbọn nuhe to gbigbò we nkọ lẹ mẹ.

“Họntọn lẹ wẹ nọ ze hẹ mẹ to whenue gbẹ̀mẹ dózin do mẹ. Yé gán de we do aliji to nuhe a ko yọnẹn lẹ mẹ lọsu. Họntọn lẹ nọ yọnẹn dọ mí tin na yé, bọ yelọsu tin na mí.”—Nicole.

NỌ GỌALỌNA OVI TOWE LẸ

Nọ gọalọna ovi towe lẹ

Biblu dọmọ: “Mẹdopodopo dona nọ yawu nado dotoai, whleawu nado dọho.” (Jakọbu 1:19) Ovi towe lẹ gán nọ whleawu nado dọ nuhe to ahungbadona yé lẹ, amọ́ eyin a nọ yí sọwhiwhe do dotó yé, yé na nọ vò bo dọ homẹ na we.

Nọ hẹn ovi towe lẹ voawu. E na zọ́n bọ yé ma na nọ whleawu nado dọhona we. Ovi delẹ nọ voawu bo nọ dọho to whenue yé to ayidedai hẹ mẹjitọ yetọn lẹ hú whenue yé sinai to mẹjitọ lọ nukọn.
Ma nọ dike ovi towe lẹ ni pọ́n linlin he nọ gbàhundonamẹ lẹ gbau blo.
Dike ovi towe lẹ ni yọ́n tito he a ko basi na hihọ́ whẹndo lọ tọn.
Basi tito lehe mì na yawu họ̀n do tọn eyin nugbajẹmẹji de jọ. Podọ, nọ tẹ́n tito lọ pọ́n hẹ ovi towe lẹ na e nido má yé dote.

“Nọ dọho hẹ ovi towe lẹ bo nọ dike yé ni dọ nuhe to homẹ na yé lẹ. E gán yindọ yé to budi, to nuhà kavi to homẹgble. Dike yé ni yọnẹn dọ hiẹ lọsu nọ jugbọn ninọmẹ mọnkọ lẹ mẹ, bo nọ dọ nuhe a nọ wà bọ e do nọ pà we lẹ na yé.”—Bethany.