AIHỌN DE HE TO BẸWLU MẸ

4 | Ma Nọ Lẹndọ Emitọn Ko Fó Blo

NUHEWUTU E YIN NUJỌNU

Ayimajai gán bẹpla dagbemẹninọ mẹtọn. Susu mẹhe adán gbò lẹ tọn wẹ nọ mọdọ emitọn ko fó ján niyẹn. Nawẹ yé nọ yinuwa gbọn?

Mẹdelẹ ma tlẹ sọ nọ jlo na lẹnnupọndo sọgodo ji ba.
Lẹnpọn nọ zọ́n bọ mẹdelẹ nọ nù ahàn sinsinyẹn kavi amà.
Mẹdelẹ nọ dọ dọ e pọnte dọ emi ni hù emide.

Nuhe A Dona Yọnẹn

Nulẹ gán pọnte whedepopenu bọ nuhahun towe delẹ na gbọ.
Eyin nulẹ ma tlẹ diọ, a gán ze afọdide delẹ nado doakọnna.
Biblu dopà dọ nuhahun gbẹtọ tọn lẹ na busẹ petepete.

Nuhe A Sọgan Wà Todin

Biblu dọmọ: “Mì yin magbọjẹnọ na osọ he ja gbede blo, na osọ he ja na tindo magbọjẹ etọn titi lẹ. Tukla azán dopodopo tọn ko pé na ẹn.”—Matiu 6:34.

Nọ dọ azán dopodopo tọn. Ma dike nuhiha gando osọ he ja go ni hù awàkan mẹ na we bọ a ma na penugo bo dọ egbé tọn blo.

Eyin a nọ hanú gando osọ go to whepoponu, apọ̀ na wá ṣì we bọ a ma na do todido kaka de ba.

LEHE E GÁN PÀ WE DO—Ayinamẹ Delẹ

NỌ ZE AYIHA DO NUDAGBE JI

Biblu dọmọ: “Azán lẹpo wẹ nọ yin ylankan na mẹhe yè to yasana, ṣigba, mẹhe ahun etọn gọ́ na ayajẹ nọ tin to hùnwhẹ mẹ to whepoponu.” (Howhinwhẹn lẹ 15:15) Ayiha zizedo onú agọ̀ lẹ ji gán glọnalina we ma nado doayi nuhe a gán wà nado didẹ nuhahun lẹ go. Eyin a ka nọ ze ayiha do nudagbe lẹ ji, a na penugo bo mọ nuhe a gán wà nado didẹ nuhahun lọ lẹ.

De whenu he a do nọ pọ́n linlin lẹ pò bo ma nọ ze ayiha do yé ji glanglan blo.
To whèjai lẹpo, nọ ze ayiha do nudagbe awe kavi atọ̀n he jọ do gowe to azán lọ ji lẹ ji.
Nọ kàn nuhe a na wà to azán dopodopo ji lẹ dai. Eyin azọ́n de na yí azán susu, nọ kàn nuhe a gán basi sọn e go to azán dopodopo ji. Enẹ na zọ́n bọ to whèjai, a na nọ mọ fie a ko jẹ.

NỌ BIỌ ALỌGỌ

Biblu dọmọ: “Mẹdepope he nọ klan ede dovo . . . nọ gbẹ́ nuyọnẹn yọ́n-na-yizan lẹpo dai.” (Howhinwhẹn lẹ 18:1) Mẹhe jẹ odò daho de mẹ ma gán tọ́n sọn e mẹ na ede, mẹde janwẹ na gọalọna ẹn.

Nọ biọ alọgọ mẹhe to whẹndo towe mẹ kavi họntọn lẹ tọn.
A gán sọ nọ pọ́n nuhe hiẹ lọsu gán wà nado gọalọna yé. Enẹ lọsu na gọalọna we ma nado ze ayiha do nuhahun towe lẹ ji glanglan.
Eyin a jẹflumẹ pete bo mọdọ gbẹ̀mẹ ṣì emi, e na yọ́n dọ a ni yì dotowhé. Whedelẹnu, apọṣimẹ sinsinyẹn nọ yin ohia azọ̀n tọn. Mẹsusu wẹ ko yì dotowhé bo jẹgangan.a

a Linlinwe Fọ́n! ma nọ jlẹ aliho nukunpedomẹgo tọn tangan de namẹ gba.

Biblu Namẹ Todido-Jọ-Todido

To hohowhenu, dopo to mẹhe kàn owe Salmu lẹ tọn mẹ hodẹ̀ dọmọ: “Ohó towe wẹ miyọ́ngbán de na afọ ṣie, podọ hinhọ́n de na ali ṣie.” (Salmu lẹ 119:105) Nawẹ Biblu, he yin Ohó Jiwheyẹwhe tọn, yin miyọ́ngbán po hinhọ́n po gbọn?

To zinvlu gọ́ngọ́n mẹ, miyọ́ngbán nọ gọalọna mí nado yọ́n fie mí na zinzọnlin gbọn. Mọdopolọ, ayinamẹ he gọ́ na nuyọnẹn bo to Biblu mẹ lẹ nọ gọalọna mí to whenue mí jlo na basi nudide he gẹdẹ lẹ.

Hinhọ́n nọ dì hlan olá bo nọ gọalọna mí nado mọnú hlan nukọn. To aliho dopolọ mẹ, Biblu nọ gọalọna mí nado mọdọ sọgodo dagbedagbe de tin.

Owe wiwe de wẹ Biblu yin he dọ whenuho gbẹtọvi lẹ tọn. E sọ dohia dọ sọgodo-jọ-sọgodo de to tepọn mí. Biblu dọ:

1

Lehe oyà bẹ do: Biblu dọ dọ “ylando gbọn mẹdopo gblamẹ biọ aihọn mẹ podọ okú gbọn ylando gblamẹ wá, gbọnmọ dali okú dlẹnkan jẹ mẹlẹpo dè, na yemẹpo wẹ ko waylando wutu.”—Lomunu lẹ 5:12.

2

Nuhewutu e ma ko pà gbẹtọvi lẹ bọ yé didẹ nuhahun mítọn lẹ: Biblu dọ dọ “e ma tin to huhlọn mẹhe to zọnlinzin tọn mẹ nado deanana afọdide etọn lẹ.” (Jelemia 10:23) Nuhe to jijọ to ogbẹ̀ lọ mẹ lẹ dohia dọ nugbo wẹ wefọ enẹ dọ.

3

Nuhe Jiwheyẹwhe na wà nado jla nulẹ do: Biblu dọ dọ ewọ na “súnsún dasin lẹpo sẹ̀ sọn nukun yetọn mẹ, okú ma nasọ tin ba, mọjanwẹ aluẹmẹninọ kavi avi kavi awufiẹsa ma nasọ tin ba.”—Osọhia 21:4.