Todido Jide Tọn de Na Oṣiọ Lẹ

YỌNNU jọja owhe-25-mẹvi de wlan dọmọ: “To 1981 azọ̀n agbasa wiwọ̀ tọn hù onọ̀ mẹgopọntọ ṣie. Okú etọn biọlanmẹna yẹn po visunnu etọn po tlala. Yẹn yin owhe 17 mẹvi, podọ nọvisunnu ṣie yin owhe 11 mẹvi. Yẹn jẹdo onọ̀ ṣie tọn tlala. Na yinyin pinplọn dọ ewọ tin to olọn mẹ, na poun tọn, yẹn jlo nado hù dee nado tin po e po. Họntọn ṣie vivẹ́ wẹ ewọ yin.”

E taidi nuhe ma sọgbe de dọ okú ni tindo huhlọn nado zé mẹhe hiẹ yiwanna sọyì. Podọ to whenuena e jọ, linlẹn lọ ma nado dọho hẹ, konu hẹ, kavi ma nado hẹn mẹyiwanna towe go pọn gbede bà sọgan vẹawu nado doakọnna. Awufiẹsa enẹ ma nọ yin didesẹ dandan gbọn yinyin didọna dọ mẹyiwanna towe tin to olọn mẹ dali gba.

Ṣigba, Biblu bẹ́ todido he gbọnvo tlala de hẹn. Dile mí ko doayi e go do dai, Owe wiwe lẹ dohia dọ e yọnbasi nado vọ́ awukọndopọ hẹ mẹyiwanna towe he ko kú to sọgodo he ma dẹn ba, e ma yin to olọn he yè ma yọnẹn mẹ wẹ gba ṣigba to aigba ji fí to ninọmẹ jijọho, dodo tọn lẹ glọ. Podọ to ojlẹ enẹ mẹ gbẹtọvi lẹ na tindo todido vivi agbasalilo pipe tọn dudu, podọ yé ma nasọ kú gbede ba. ‘Ṣigba na jide tọn nuhe ma sọgan yọnbasi de wẹ enẹ yin mọ!’ wẹ mẹdelẹ sọgan dọ.

Etẹwẹ e na yí nado hẹnwe tindo jide dọ todido jide tọn de wẹ ehe yin? Nado tindo yise to opagbe de mẹ, hiẹ dona tindo jide dọ mẹhe to opagbe lọ do tindo ojlo bosọ penugo nado hẹn ẹn di. Mẹnu, to whelọnu lo, wẹ omẹ lọ he dopagbe dọ oṣiọ lẹ na fọ́n whladopo dogọ?

To ojlẹ amakikọ 31 W.M mẹ tọn, Jesu Klisti dopagbe po tugbigbo po dọmọ: “Na dile Otọ́ to oṣiọ fọ́n, bo sọ to yé hẹn do ogbẹ̀; mọkẹdẹ wẹ Ovi sọ nọ hẹn mẹhe é jlo lẹ do ogbẹ̀ ga. Avò vò mì na ehe wutu blo: na ojlẹ lọ ja, to ehe mẹ omẹ he tin to yọdo mẹ lẹpo na sè ogbè [Jesu tọn], bo na tọnjẹgbonu.” (Johanu 5:21, 28, 29) Mọwẹ, Jesu Klisti dopagbe dọ livi susu he ko kú todin lẹ na sọ gọwa nọgbẹ̀ whladopo dogọ to aigba ehe ji bo na tindo todido nado gbọṣi e ji kakadoi to ninọmẹ jijọho, paladisi tọn lẹ glọ. (Luku 23:43; Johanu 3:16; 17:3; yijlẹdo Psalm 37:29 po Matiu 5:5 po go.) Na Jesu wẹ do opagbe lọ wutu, ayihaawe matin nado yise dọ ewọ tindo ojlo nado hẹn ẹn di gba. Ṣigba be ewọ penugo nado wà mọ ya?

Na nuhe ma pe owhe awe to opagbe enẹ bibasi godo, Jesu dohia to aliho huhlọnnọ de mẹ dọ emi tindo ojlo bosọ penugo nado hẹn fọ́nsọnku yọnbasi.

“Lazalọsi, Jẹgbonu Wá!”

Nupinpọn mẹwhinwhan tọn de wẹ e yin. Lazalọsi to azọ̀n sinsinyẹn de jẹ. Nọviyọnnu etọn awe lẹ, Malia po Malta po, dowẹn hlan Jesu, he tin to Otọ̀ Jọdani tọn godo dọmọ: “Oklunọ, pọ́n, mẹhe hiẹ yiwanna yin awutuzọ̀nnọ.” (Johanu 11:3) Yé yọnẹn dọ Jesu yiwanna Lazalọsi. Be Jesu na jlo nado sọnukunmọ họntọn etọn he to azọ̀n jẹ ya? Po nupaṣamẹ po, kakati nado yì Bẹtani to afọdopolọji, Jesu gbọṣi fie ewọ tin te na azán awe dogọ.—Johanu 11:5, 6.

Lazalọsi kú to ojlẹ vude godo whenuena owẹ̀n lọ dogbọn awutu etọn tọn dali yin didohlan. Jesu yọn whenue Lazalọsi kú te, podọ e jlo nado wà nude dogbọn dali etọn. Whẹpo Jesu do jẹ Bẹtani to godomẹ, họntọn vivẹ́ etọn ko kú na azán ẹnẹ. (Johanu 11:17, 39) Be Jesu sọgan hẹn mẹhe ko kú na ojlẹ he dẹn sọmọ gọwa ogbẹ̀ ya?

To sisè dọ Jesu ja, Malta, yọnnusi asuka, lọ́n tọ́njẹgbonu nado yì pé e. (Yijlẹdo Luku 10:38-42 go.) Yin whinwhan gbọn awubla etọn dali, Jesu na ẹn jide dọmọ: “Nọvisunnu towe nasọ fọ́n.” To whenuena e do yise etọn hia to fọ́nsọnku sọgodo tọn mẹ, Jesu dọna ẹn hezeheze dọmọ: “Yẹn wẹ fọ́nsọnku po ogbẹ̀ po; mẹhe yí mi se, eyin e kú, é nasọ tin to ogbẹ̀.”—Johanu 11:20-25.

To whenuena e jẹ yọdo lọ kọ̀n, Jesu degbe dọ ozannu heyin ṣinṣinyọn do yọdo lọ ni yin bibli sẹ. Enẹgodo, to odẹ̀hiho po gbezeyiaga po godo, e degbe dọmọ: “Lazalọsi, jẹgbonu wá!”—Johanu 11:38-43.

Mẹhe tin to finẹ lẹpo to yọdo lọ mẹ pọ́n tlintlin. Enẹgodo, sọn zinvlu mẹ, yẹdide de zéta. Afọ etọn po alọ etọn lẹ po yin bibla, podọ yè yí avọ̀ de do bla nukunmẹ etọn. “Mì tún ìn bo gbọ é ni yì,” wẹ yin gbedide Jesu tọn. Pipotọ avọ̀ lọ tọn lẹ tlu jẹ aigba. Mọwẹ, Lazalọsi wẹ, dawe lọ he ko kú na azán ẹnẹ!—Johanu 11:44.

Be E Ka Jọ Nugbo Nugbo Ya?

Kandai fọ́nsọnku Lazalọsi tọn yin didohia to Wẹndagbe Johanu tọn mẹ taidi otàn nugbo de. Zẹẹmẹ lẹ họnwun hezeheze hugan nado yin onu apajlẹ tọn de poun. Nado fọ́n kanbiọ dote gando nugbo-yinyin otàn lọ tọn go yin nado fọ́n kanbiọ dote gando azọ́n jiawu Biblu tọn lẹpo go, gọna fọ́nsọnku Jesu Klisti lọsu tọn ga. Podọ nado gbẹ́ fọ́nsọnku Jesu tọn dai yin nado gbẹ́ yise Klistiani tọn dai pete.—1 Kọlintinu lẹ 15:13-15.

Na nugbo tọn, eyin hiẹ kẹalọyi tintin Jiwheyẹwhe tọn, hiẹ ma dona tindo nuhahun depope to tintindo yise to fọ́nsọnku mẹ gba. Nado basi dohia: Mẹde sọgan yí hodidọ lehe nutindo etọn lẹ na yin mimá do to okú etọn godo po nuwiwa godo tọn etọn po do okàn video tọn ji, podọ to whenuena ewọ kú godo, hẹnnumẹ po họntọn etọn lẹ po sọgan mọ ẹn bo sè ogbè etọn, po awubibọ po, dile ewọ basi zẹẹmẹ lehe adọkunnu etọn na yin nukunpedego do dali. Owhe kanweko lẹ die wayì, hoyidokanji video tọn mọnkọtọn de yin nuhe go yè ma lẹnnu jẹ. Podọ na delẹ to gbẹtọ he nọ nọ awa dindẹn aihọn lọ tọn mẹ todin lẹ, nukunhunhun to lẹnunnuyọnẹn liho nado basi hoyidokanji zomọ video tọn yin nuhe go yè ma sọgan mọnukunnujẹ depope taidi dọ azọ́n jiawu wẹ nkọtọn. Eyin nunọwhinnusẹ́n lẹnunnuyọnẹn tọn lẹ he yin zizedai gbọn Mẹdatọ lọ dali sọgan yin yiyizan gbọn gbẹtọvi lẹ dali nado yí do basi wadohia yinukundomọ he sọgan yọn sè mọnkọtọn lẹ, be Mẹdatọ lọ ma sọgan penugo nado basi dehe hugan mọ pete ya? Gbọnmọ dali, be e ma yin nuhe sọgbe hẹ lẹnpọn dagbe, dọ Omẹ lọ he dá ogbẹ̀ penugo nado vọ́ẹ-dá ya?

Azọ́n jiawu hinhẹn gọwa ogbẹ̀ Lazalọsi tọn yinuwa nado hẹn yise to Jesu po fọ́nsọnku po mẹ sudeji. (Johanu 11:41, 42; 12:9-11, 17-19) To aliho mẹwhinwhan tọn de mẹ, e sọ do tintin to awuwlemẹ po ojlo Jehovah po Visunnu etọn tọn po hia nado basi fọ́nsọnku lọ.

‘Jiwheyẹwhe Na Tindo Ojlo De’

Gbeyiyi Jesu tọn hlan okú Lazalọsi tọn do numọtolanmẹ owanyinọ Visunnu Jiwheyẹwhe tọn hia. Numọtolanmẹ sisosiso etọn to nujijọ ehe whenu do ojlo zogbe etọn hia hezeheze nado fọ́n oṣiọ lẹ. Mí hia dọmọ: “Whenuena Malia wá ofi he Jesu te, bo mọ ẹn, họ́ jai to afọ etọn go, bo dọ hlan ẹn dọ, Oklunọ, eyin hiẹ ko tin to ofi, nọvisunnu ṣie ma do kú gba. Enẹwutu whenuena Jesu mọ ẹn to avihando, podọ Ju he wá po e po lẹ ga to avihando, yè yí homẹgble do whàn ẹn to gbigbọ mẹ, yè sọ hẹn ewlọsu jẹtukla. Bo sọ dọmọ, Fie wẹ mì ko tẹ́ ẹ do? Yé dọ hlan ẹn, dọ, Oklunọ, wá pọ́n. Jesu viavi. Enẹwutu Ju lẹ dọmọ, Mì pọ́n le é yiwan na ẹn do!”—Johanu 11:32-36.

Awuvẹmẹ sọn ahunmẹ wá Jesu tọn tofi yin didohia gbọn hogbe atọ̀n dali: “whàn ẹn,” “yè sọ hẹn ewlọsu jẹtukla,” po “viavi” po. Hogbe dowhenu tọn he yin yiyizan to kandai nujijọ mẹwhinwhan tọn ehe bibasi mẹ do oba he mẹ Jesu yin whinwhan sisosiso jẹ te hia gbọn okú họntọn vivẹ́ etọn Lazalọsi po mimọ nọviyọnnu Lazalọsi tọn to avivi po zọ́n bọ nukunmẹ Jesu tọn ja dasìn.a

Nuhe yin ayidego taun wẹ yindọ jẹnukọnna ojlẹ enẹ Jesu ko hẹn omẹ awe devo lẹ gọwa ogbẹ̀. Podọ ewọ tindo ojlo gigọ́ nado basi onu dopolọ na Lazalọsi. (Johanu 11:11, 23, 25) Ṣogan, é “viavi.” To whelọnu lo gbẹtọvi lẹ hinhẹn gọwa ogbẹ̀, ma yin aliho nuwiwa paa de na Jesu gba. Owanyi po numọtolanmẹ sisosiso etọn lẹ po he yin didohia to nujijọ ehe lẹ whenu do ojlo zogbe etọn hia nado hẹnalọdotena nuhẹngble okú tọn.

To whenuena e yindọ Jesu yin ‘ojlẹmọ pipe tintin Jehovah Jiwheyẹwhe tọn,’ míwlẹ dile e jẹ do ma to nukundo nuhe depò hugan ehe sọn Otọ́ olọn mẹ tọn mítọn si gba. (Heblu lẹ 1:3) Dogbọn ojlo Jehovah titi tọn dali nado basi fọ́nsọnku, dawe nugbonọ Job dọmọ: “Eyin omẹ de kú, be ewọ na sọ nọgbẹ̀ ba? . . . Hiẹ na ylọ yẹn na sọ siọ we: Hiẹ do ko tindo ojlo de hlan azọ́n alọ towe lẹ tọn.” (wekun flinflin lẹ yin mítọn.) (Job 14:14, 15) Tofi hogbe dowhenu tọn lọ he yin lilẹdogbedevomẹ dọ “hiẹ do ko tindo ojlo de” do jejejininọ sinsinyẹn po ojlo po hia. (Gẹnẹsisi 31:30; Psalm 84:2) E họnwun dọ, Jehovah dona donukun fọ́nsọnku lọ po ojlo vẹkuvẹku po.

Be mí sọgan tindo yise to opagbe fọ́nsọnku lọ tọn mẹ nugbo nugbo ya? Mọwẹ, ayihaawe depope matin gba dọ Jehovah po Visunnu etọn po jlo bosọ penugo nado hẹn ẹn di. Etẹwẹ ehe zẹẹmẹdo na we? Hiẹ tindo todido nado yin kinkọndopọ po mẹyiwanna he ko kú lẹ po tofi to aigba ji to ninọmẹ he gbọnvo na dehe tin todin lẹ mẹ!

Jehovah Jiwheyẹwhe he na gbẹtọvi bẹjẹeji to jipa whanpẹnọ de mẹ, ko dopagbe nado vọ́ Paladisi gọ̀ do otẹn etọn mẹ to aigba ehe ji to Ahọluduta olọn mẹ tọn Etọn glọ to alọ Jesu Klisti pagigona lọ tọn mẹ. (Gẹnẹsisi 2:7-9; Matiu 6:10; Luku 23:42, 43) To Paladisi he yin gigọ̀ do otẹn etọn mẹ enẹ mẹ, whẹndo gbẹtọvi tọn na tindo todido vivi ogbẹ̀ madopodo tọn dudu, he na tin to mẹdekannu sọn awutu po azọ̀n lẹpo si. (Osọhia 21:1-4; yijlẹdo Job 33:25; Isaia 35:5-7 go.) Dehe na sọ busẹ sọn aimẹ ga lẹ wẹ, wangbẹnamẹ, wangbẹna sinmẹ agbasa tọn, hunyanhunyan akọ dopolọ tọn lẹ, po awusinyẹnnamẹnu akuẹzinzan tọn lẹ po. E na yin do aigba klọwé de ji wẹ Jehovah Jiwheyẹwhe gbọn Jesu Klisti dali na fọ́n oṣiọ lẹ do.

Enẹ wẹ yin todido yọnnu Klistiani he yin hodọdeji to bẹjẹeji ada ehe tọn tọn. Owhe susu lẹ to okú onọ̀ etọn tọn godo, Kunnudetọ Jehovah Tọn lẹ gọalọna ẹn nado plọn Biblu po sọwhiwhe po. E flin dọmọ: “To pinplọn dogbọn todido fọ́nsọnku tọn dali godo, yẹn viavi. Onu jiawu wẹ e yin nado yọnẹn dọ yẹn na mọ onọ̀ ṣie whladopo dogọ.”

Eyin ayiha towe jlo mọdopolọ nado mọ mẹyiwanna towe whladopo dogọ, homẹ Kunnudetọ Jehovah Tọn lẹ tọn na hùn nado gọalọna we nado plọnnu dogbọn lehe hiẹ sọgan hẹn todido dejido ehe zun towe lọsu titi tọn do.