Mí ma tindo nukọntọ sinsẹ̀n tọn he yè nọ suahọ lẹ to titobasinanu mítọn mẹ. Kakatimọ, dile e yin do to whenue agun Klistiani tọn yin didoai, nugopọntọ he pegan lẹ wẹ nọ yin dide “nado nọ yìn agun Jiwheyẹwhe tọn.” (Owalọ lẹ 20:28) Mẹho agun tọn ehelẹ yin sunnu he whèwhín to gbigbọ-liho lẹ he nọ deanana bosọ nọ yìn agun lọ, “e ma yin po mananọmawà po, ṣigba sọn ojlo mẹ wá to Jiwheyẹwhe nukọn; e ma yin po owanyi na ale mawadodo tọn po, ṣigba po jejejininọ po.” (1 Pita 5:1-3) Azọ́n tẹwẹ yé nọ wà do ota mítọn mẹ?

Yé nọ penukundo mí go bo nọ basi hihọ́na mí. Mẹho agun tọn lẹ nọ deanana agun lọ bosọ nọ gọalọ nado basi hihọ́na ẹn to gbigbọ-liho. Na mẹho lẹ yọnẹn dọ Jiwheyẹwhe wẹ ze azọngban titengbe ehe do alọmẹ na yé wutu, yé ma nọ duklunọ do omẹ etọn lẹ ji, kakatimọ yé nọ wazọ́n na dagbemẹninọ po ayajẹ mítọn po. (2 Kọlintinu lẹ 1:24) Kẹdẹdile lẹngbọhọtọ de nọ yí sọwhiwhe do penukundo lẹngbọ etọn lẹ dopodopo go do, mẹho lẹ nọ dovivẹnu nado yọ́n hagbẹ agun lọ tọn lẹ dopodopo.—Howhinwhẹn lẹ 27:23.

Yé nọ plọn mí nado wà ojlo Jiwheyẹwhe tọn. To osẹ lẹpo mẹ, mẹho lẹ nọ deanana opli agun tọn lẹ nado hẹn yise mítọn lodo. (Owalọ lẹ 15:32) Sunnu mẹdezejotọ ehelẹ sọ nọ yin tọ́ntlọ́ngbọ́n to azọ́n wẹndagbe-jijlá tọn mẹ bo nọ wazọ́n hẹ mí bosọ nọ plọnazọ́n mí to adà lizọnyizọn lọ tọn lẹpo mẹ.

Yé nọ na tuli dopodopo mítọn. Nado sọgan gọalọna dopodopo mítọn nado lodo to gbigbọ-liho, mẹho agun mítọn tọn lẹ sọgan dla mí pọ́n to owhé mítọn lẹ gbè kavi dọho hẹ mí to Plitẹnhọ Ahọluduta tọn mẹ nado gọalọna mí bo yí Owe-wiwe lẹ do miọnhomẹna mí.—Jakọbu 5:14, 15.

Gbọnvona azọ́n he mẹho lẹ nọ wà to agun mẹ lẹ, suhugan yetọn tindo agbasazọ́n po azọngban whẹndo tọn lẹ po he nọ biọ whenu po ayidonugo yetọn po. E jẹ dọ mí ni nọ na sisi mẹmẹsunnu azọ́n sinsinyẹnwatọ ehelẹ.—1 Tẹsalonikanu lẹ 5:12, 13.

• Etẹwẹ yin azọngban mẹho agun tọn lẹ tọn?

• Aliho tẹlẹ mẹ wẹ mẹho agun tọn lẹ nọ do ojlo hia to dopodopo mítọn mẹ te?

Biblu dọho gando pipli sunnu Klistiani lẹ tọn awe go he nọ penukundo azọngban agun tọn lẹ go—yèdọ “nugopọntọ lẹ po devizọnwatọ lizọnyizọnwiwa tọn lẹ po.” (Filipinu lẹ 1:1) To paa mẹ, sunnu ehelẹ nọ sù to agun dopodopo mẹ. Azọ́n tẹwẹ devizọnwatọ lizọnyizọnwiwa tọn lẹ nọ wà he nọ hẹn ale wá na mí?

Yé nọ gọalọna pipli mẹho lẹ tọn. Devizọnwatọ lizọnyizọnwiwa tọn lẹ yin sunnu gbigbọnọ lẹ, he go yè sọgan dejido bo nọ ylọ azọngban yetọn dọ nujọnu, vlavo yé yin jọja kavi mẹhomẹ. Yé nọ penukundo azọ́n paa he yin dandan na titojininọ agun lọ tọn lẹ go. Ehe nọ gọalọna mẹho agun tọn lẹ nado na ayidonugo azọngban mẹpinplọn po lẹngbọhọtọ tọn lẹ po.

Yé nọ wà devizọn dagbe voovo lẹ. Delẹ to devizọnwatọ lizọnyizọnwiwa tọn lẹ mẹ nọ yin azọ́ndena taidi aisinnunamẹtọ nado dokuavọna pliwatọ lẹpo. Mẹdevo lẹ nọ penukundo zomọ gbèzeyiaga tọn, owe lẹ mimá po kandai akuẹzinzan agun tọn lẹ po go, gọna aigba-denamẹ he ji hagbẹ agun lọ tọn lẹ na dekunnu te lẹ nina yé. Yé sọ nọ gọalọ nado penukundo Plitẹnhọ Ahọluduta tọn lọ go. Mẹho lẹ sọgan biọ to yé si nado gọalọna yọnhonọ lẹ. Mahopọnna azọngban depope he yin didena yé, ojlo ahundopo tọn he yé nọ yí do hẹn ẹn di nọ whàn mẹdevo lẹ nado na yé sisi.—1 Timoti 3:13.

Yé nọ ze apajlẹ dagbe dai taidi sunnu Klistiani lẹ. Devizọnwatọ lizọnyizọnwiwa tọn lẹ nọ yin dide na jẹhẹnu Klistiani tọn he yé tindo lẹ wutu. Yé nọ hẹn yise mítọn lodo to whenue yé to adà he yin didena yé lẹ zedonukọnnamẹ to opli lẹ ji. Yé nọ ze apajlẹ dagbe dai to azọ́n yẹwhehodidọ tọn mẹ bo nọ gbọnmọ dali yidogọna zohunhun mítọn. Na gbigbọ gbekọndopọ tọn yetọn wutu, yé nọ hẹn ayajẹ po pọninọ po yọnbasi. (Efesunu lẹ 4:16) To nukọn mẹ, yelọsu sọgan pegan nado sẹ̀n di mẹho agun tọn.

• Sunnu nankọ lẹ wẹ nọ sẹ̀n di devizọnwatọ lizọnyizọnwiwa tọn lẹ?

• Nawẹ devizọnwatọ lẹ nọ gọalọ na nulẹ nido yì linsinlinsin to agun lọ mẹ gbọn?

Whlasusu wẹ Owe-wiwe Glẹki tọn lẹ dọho gando Balnaba po apọsteli Paulu po go. Sunnu ehelẹ sẹ̀n taidi nugopọntọ lẹdo tọn lẹ bo nọ dla agun whenẹnu tọn lẹ pọ́n. Etẹwutu? Na dagbemẹninọ mẹmẹsunnu yetọn lẹ tọn nọ duahunmẹna yé taun wutu. Paulu dọ dọ emi jlo na “lẹkọyi bo dla mẹmẹsunnu lẹ pọ́n” nado pọ́n lehe yé te do. Ojlo etọn wẹ nado zingbejizọnlin na kilomẹtlu susu nado yì hẹn yé lodo. (Owalọ lẹ 15:36) Ojlo dopolọ wẹ nugopọntọ lẹdo tọn mítọn lẹ tindo to egbehe.

Yé nọ wá nado na mí tuli. Nugopọntọ lẹdo tọn dopodopo nọ dla nudi agun 20 pọ́n bo nọ yí osẹ dopo zan hẹ dopodopo yetọn, whla awe to owhe dopo mẹ. Mí sọgan mọ ale susu yí sọn numimọ mẹmẹsunnu ehelẹ tọn mẹ, podọ sọn asi yetọn lẹ tọn mẹ, eyin yé ko wlealọ. Yé nọ dovivẹnu nado jẹakọ hẹ yọpọ po mẹho po, bo nọ to jejeji nado tọ́n hẹ mí yì kunnudegbe podọ yì plọnmẹ Biblu mítọn lẹ. Nugopọntọ ehelẹ nọ basi dlapọn lẹngbọhọtọ tọn to pọmẹ hẹ mẹho agun tọn lẹ, bosọ nọ na hodidọ tulinamẹ tọn lẹ to opli lẹ po plidopọ lẹ po ji nado hẹn mí lodo.—Owalọ lẹ 15:35.

Yé nọ do ojlo hia to mẹlẹpo mẹ. Nugopọntọ lẹdo tọn lẹ nọ tindo ojlo nujọnu tọn to ninọmẹ gbigbọmẹ tọn agun lọ tọn mẹ. Yé nọ basi opli hẹ mẹho lẹ po devizọnwatọ lizọnyizọnwiwa tọn lẹ po nado gbadopọnna nukọnyiyi agun lọ tọn, bo nọ na yé ayinamẹ yọ́n-na-yizan lẹ gando lehe yé sọgan hẹn azọngban yetọn lẹ di do go. Yé nọ gọalọna gbehosọnalitọ lẹ nado tindo kọdetọn dagbe to lizọnyizọn yetọn mẹ, bọ homẹ yetọn nọ hùn nado jẹakọ hẹ mẹyọyọ lẹ bo sè lehe yé to nukọnyi to gbigbọmẹ do. Dopodopo mẹmẹsunnu ehelẹ tọn nọ ze yede jo sọn ojlo mẹ wá taidi “azọ́nwatọ hatọ de na ale” mítọn. (2 Kọlintinu lẹ 8:23) Mí dona nọ hodo apajlẹ yise po mẹdezejo na Jiwheyẹwhe tọn yetọn po.—Heblu lẹ 13:7.

• Lẹndai tẹ wutu wẹ nugopọntọ lẹdo tọn lẹ do nọ dla agun lẹ pọ́n?

• Nawẹ hiẹ sọgan mọaleyi sọn dlapọn yetọn lẹ mẹ gbọn?

Eyin nugbajẹmẹji de jọ, Kunnudetọ Jehovah tọn lẹ nọ wleawuna alọgọ nado hẹn kọgbọ wá na mẹmẹsunnu yetọn he go nugbajẹmẹji lọ gando lẹ to afọdopolọji. Vivẹnudido mọnkọtọn lẹ nọ dohia dọ mí tindo owanyi nujọnu tọn na ode awetọ. (Johanu 13:34, 35; 1 Johanu 3:17, 18) Aliho tẹlẹ mẹ wẹ mí nọ gọalọ te?

Mí nọ basi nunina akuẹ tọn. To whenue huvẹ daho de tọ́n to Jude, Klistiani dowhenu tọn he tin to Antioku lẹ do akuẹ hlan nado gọalọna mẹmẹsunnu yetọn lẹ. (Owalọ lẹ 11:27-30) Mọdopolọ, eyin mí sè dọ mẹmẹsunnu mítọn he to awà aihọn lọ tọn devo ji lẹ to pipehẹ nugbajẹmẹji de, mí nọ do nunina lẹ hlan gbọn agun mítọn gblamẹ nado gọalọna mẹhe to nuhudo sinsinyẹn mẹ lọ lẹ to agbasa-liho.—2 Kọlintinu lẹ 8:13-15.

Mí nọ gọalọ to aliho he yọ́n-na-yizan lẹ mẹ. Mẹho agun tọn he tin to fihe nugbajẹmẹji lọ jọ te lẹ nọ dín hagbẹ agun lọ tọn lẹ dopodopo mọ nado hẹn ẹn diun dọ yé tin to hihọ́ mẹ. Wedegbẹ́ kọgbọ tọn de sọgan hẹn ẹn diun dọ núdùdù, osin nùnù dagbe, avọ̀, adọtẹn po nukunpedomẹgo dotowhé tọn po yin nina mẹhe tin to nuhudo mẹ lẹ. Susu Kunnudetọ he yọ́n azọ́n he nuhudo etọn tin lẹ tọn wẹ nọ ze yede jo bo nọ dohún na yede nado yì gọalọ to azọ́n kọgbọ tọn lọ mẹ kavi nado jla owhé po Plitẹnhọ Ahọluduta tọn he ko yin hinhẹngble lẹ po do. Pọninọ he mí nọ duvivi etọn taidi titobasinanu de po numimọ he mí ko tindo to azọ́nwadopọ mẹ po nọ hẹn mí penugo nado yawu gọalọ to ojlẹ nuhudo tọn lẹ mẹ. Dile etlẹ yindọ mí nọ gọalọna “mẹhe gando mí go to yise mẹ lẹ,” mí sọ nọ gọalọna mẹdevo lẹ ga eyin e yọnbasi, mahopọnna sinsẹ̀n yetọn.—Galatianu lẹ 6:10.

Mí nọ gọalọ to gbigbọ-liho podọ to numọtolanmẹ-liho. Mẹhe go nugbajẹmẹji jọ do lẹ nọ tindo nuhudo homẹmiọnnamẹ tọn taun. To ojlẹ mọnkọtọn lẹ mẹ, mí nọ mọ huhlọn yí sọn Jehovah, “Jiwheyẹwhe homẹmimiọn lẹpo tọn” dè. (2 Kọlintinu lẹ 1:3, 4) Homẹ mítọn nọ hùn nado lá opagbe Biblu tọn lẹ na mẹhe jẹflumẹ lẹ, bo nọ hẹn yé deji dọ Ahọluduta Jiwheyẹwhe tọn na doalọtena nugbajẹmẹji he nọ hẹn awufiẹsa po awubla po wá lẹpo to madẹnmẹ.—Osọhia 21:4.

• Naegbọn Kunnudetọ lẹ do nọ penugo nado yawu yinuwa to nugbajẹmẹji lẹ whenu?

• Nawẹ mí sọgan miọnhomẹna mẹhe go nugbajẹmẹji jọ do lẹ to gbigbọ-liho gbọn?

Ojlẹ vude jẹnukọnna okú Jesu tọn, e dọhodopọ hẹ ẹnẹ to devi etọn lẹ mẹ—yèdọ Pita, Jakọbu, Johanu po Andle po. Dile Jesu to dọdai dọ gando ohia tintin tofi etọn tọn to azán godo tọn lẹ mẹ go, e fọ́n kanbiọ titengbe de dote dọmọ: “Na nugbo tọn, mẹnu wẹ afanumẹ nugbonọ podọ nuyọnẹntọ lọ he klunọ etọn de do devizọnwatọ whégbè tọn etọn lẹ ji, nado na núdùdù yetọn yé to ojlẹ sisọ mẹ?” (Matiu 24:3, 45; Malku 13:3, 4) Jesu to jide na devi etọn lẹ dọ, taidi “klunọ” yetọn, ewọ na deazọ́nna mẹdelẹ he na nọ wleawuna núdùdù gbigbọmẹ tọn na hodotọ etọn lẹ to gbesisọ mẹ to ojlẹ opodo tọn mẹ. Mẹnu lẹ wẹ afanumẹ ehe na bẹhẹn?

Pipli pẹvi hodotọ yiamisiadode Jesu tọn lẹ wẹ. Hagbẹ anademẹtọ Kunnudetọ Jehovah tọn lẹ tọn wẹ yin “afanumẹ” lọ. E nọ wleawuna núdùdù gbigbọmẹ tọn na sinsẹ̀n-basitọ Jehovah tọn hatọ etọn lẹ to osaa sisọ mẹ. Mí nọ ganjẹ afanumẹ nugbonọ ehe go nado mọ “núdùdù he pé . . . to ojlẹ sisọ mẹ.”—Luku 12:42.

E nọ penukundo whédo Jiwheyẹwhe tọn go. (1 Timoti 3:15) Jesu ze azọngban pinpẹn lọ do alọmẹ na afanumẹ lọ nado nọ penukundo azọ́n adà aigba ji tọn titobasinanu Jehovah tọn go—enẹ wẹ nado nọ penukundo nutindo etọn lẹ go bo nọ deanana azọ́n yẹwhehodidọ tọn lọ bosọ nọ plọnnu mí gbọn agun mítọn lẹ gblamẹ. Enẹwutu, nado sọgan wleawuna nuhe mí tindo nuhudo etọn lẹ to ojlẹ etọn mẹ, “afanumẹ nugbonọ podọ nuyọnẹntọ lọ” nọ wleawuna núdùdù gbigbọmẹ tọn gbọn owe he mí nọ yizan to lizọnyizọn mítọn mẹ lẹ gọna tito-to-whinnu opli lẹ po plidopọ lẹ po tọn gblamẹ.

Afanumẹ lọ yin nugbonọ na nugbo Biblu tọn lẹ podọ na azọ́ndenamẹ he e mọyi nado nọ dọyẹwheho wẹndagbe lọ tọn, podọ e yin nuyọnẹntọ na nuhe dù aliho he mẹ e nọ yí zinzin do penukundo nutindo Klisti tọn lẹ go te to aigba ji. (Owalọ lẹ 10:42) Jehovah yí jideji po núdùdù gbigbọmẹ tọn susugege po do to didona azọ́n afanumẹ lọ tọn.—Isaia 60:22; 65:13.

• Mẹnu wẹ Jesu deazọ́nna nado nọ na núdùdù devi etọn lẹ to gbigbọ-liho?

• Aliho tẹlẹ mẹ wẹ afanumẹ lọ yin nugbonọ podọ nuyọnẹntọ te?

To owhe kanweko tintan whenu, pipli pẹvi de, yèdọ “apọsteli lẹ po mẹho lẹ po . . . to Jelusalẹm” wẹ yinuwa taidi hagbẹ anademẹtọ de bo nọ basi nudide titengbe lẹ do agun Klistiani yiamisisadode lẹ tọn pete tamẹ. (Owalọ lẹ 15:2) Yé nọ wá gbèta dopo kọ̀n, na hodọdopọ yetọn nọ sinai do Owe-wiwe lẹ ji bọ yé nọ joawuna anademẹ gbigbọ Jiwheyẹwhe tọn wutu. (Owalọ lẹ 15:25) Aliho nuyiwa tọn dopolọ wẹ nọ yin hihodo to egbehe.

Jiwheyẹwhe to yíyí i zan nado wà ojlo etọn. Mẹmẹsunnu yiamisisadode he wleawuna Hagbẹ Anademẹtọ lọ lẹ tindo ojlo vẹkuvẹku to Ohó Jiwheyẹwhe tọn mẹ bosọ tindo numimọ susu na nuhe dù tito bibasina azọ́n mítọn po nukunpipedo whẹho gbigbọmẹ tọn lẹ go po. Yé nọ pli to sẹmẹsẹmẹ nado lẹnnupọndo nuhudo pipli mẹmẹsunnu lẹ tọn lẹdo aihọn pé tọn ji. Dile e yin do to owhe kanweko tintan whenu, anademẹ sinai do Biblu ji lẹ nọ yin nina, vlavo gbọn wekanhlanmẹ lẹ kavi nugopọntọ tomẹyitọ lẹ po mẹdevo lẹ po gblamẹ. Ehe nọ hẹn pọninọ yọnbasi to omẹ Jiwheyẹwhe tọn lẹ ṣẹnṣẹn na nuhe dù linlẹn po nuyiwa po. (Owalọ lẹ 16:4, 5) Hagbẹ Anademẹtọ lọ nọ deanana awuwiwlena núdùdù gbigbọmẹ tọn, bo nọ na tuli mí nado ze azọ́n yẹwhehodidọ Ahọluduta lọ tọn do otẹn tintan mẹ, bosọ nọ deanana mẹmẹsunnu lẹ dide do otẹn azọngban tọn mẹ.

E nọ kẹalọyi anademẹ gbigbọ Jiwheyẹwhe tọn. Hagbẹ Anademẹtọ lọ nọ ganjẹ Jehovah he yin Nupojipetọ Wẹkẹ lọ tọn po Jesu he yin Ota agun lọ tọn po go nado mọ anademẹ yí. (1 Kọlintinu lẹ 11:3; Efesunu lẹ 5:23) Dopodopo mẹhe to Hagbẹ Anademẹtọ lọ mẹ lẹ tọn ma nọ pọ́n yede di nukọntọ omẹ Jiwheyẹwhe tọn lẹ tọn. Yewlẹ po Klistiani yiamisisadode lẹpo po “nọ to hihodo Lẹngbọvu lọ [Jesu] yì fidepope he e yì.” (Osọhia 14:4) Hagbẹ Anademẹtọ lọ nọ yọ́n pinpẹn odẹ̀ he mí nọ hò do ota etọn mẹ lẹ tọn.

• Mẹnu lẹ wẹ hagbẹ anademẹtọ lọ bẹhẹn to owhe kanweko tintan whenu?

• Nawẹ Hagbẹ Anademẹtọ egbehe tọn nọ dín anademẹ Jiwheyẹwhe tọn gbọn?

Hogbe Heblu tọn lọ Bẹtẹli zẹẹmẹdo “Owhé Jiwheyẹwhe tọn.” (Jenẹsisi 28:17, 19, nudọnamẹ odò tọn) Yinkọ ehe sọgbe na azọ́nwatẹn he Kunnudetọ Jehovah tọn lẹ ko doai lẹdo aihọn pé lẹ, fihe yé nọ deanana bo nọ nọgodona azọ́n yẹwhehodidọ tọn lọ te. Hagbẹ Anademẹtọ lọ tin to tatọ́-tẹnnọ aihọn tọn lọ to New York, États-Unis d’Amérique bo nọ deanana nuyiwa alahọ he to otò voovo mẹ lẹ tọn sọn finẹ. Taidi pipli de, mẹhe nọ wazọ́n to azọ́nwatẹn ehelẹ nọ yin yiylọdọ whẹndo Bẹtẹli tọn. Taidi whẹndo de, yé nọ nọpọ́, wazọ́n dopọ, dùnú dopọ bosọ nọ plọn Biblu dopọ.—Salmu lẹ 133:1.

E yin nọtẹn vonọtaun de fie hagbẹ whẹndo lọ tọn lẹ nọ ze yede jo te. Sunnu po yọnnu Klistiani lẹ po he ze yede jo nado wà ojlo Jiwheyẹwhe tọn bo yí whenu gigọ́ do nọgodona azọ́n Ahọluduta lọ tọn wẹ nọ nọ̀ owhé Bẹtẹli tọn lọ lẹpo gbè. (Matiu 6:33) Depope to yé mẹ ma nọ yí sunmẹ-kuẹ, ṣigba adọtẹn po núdùdù po nọ yin nina yemẹpo gọna apòmẹ-kuẹ kleun de nado gọalọna yé na akuẹzinzan mẹdetiti tọn lẹ. Mẹhe to Bẹtẹli lẹpo wẹ nọ mọ azọ́ndenamẹ de yí vlavo to wekantẹn, to nudatẹn kavi to núdùtẹn. Mẹdelẹ nọ wazọ́n to wezintẹn, to fie owe lẹ nọ yin bibladopọ te, to avọ̀yantẹn, kavi nọ wazọ́n taidi họmẹjladotọ, nujladotọ po mọmọ po.

E yin nọtẹn de fie azọ́n sinsinyẹn nọ yin wiwà te nado nọgodona azọ́n yẹwhehodidọ Ahọluduta lọ tọn. Yanwle tangan Bẹtẹli lẹpo tọn wẹ nado hẹn nugbo Biblu tọn tin-to-aimẹ na mẹsusu dile e sọgan yọnbasi do. Apajlẹ ehe tọn dopo wẹ yin alọnuwe ehe. E yin kinkan to anademẹ Hagbẹ Anademẹtọ lọ tọn glọ, yin didohlan pipli lẹdogbedevomẹ-basitọ lẹ tọn susu lẹdo aihọn pé gbọn ọdinatẹẹ gblamẹ, yin zinzinjẹgbonu to maṣinu he nọ zín owe tọ́n po awuyiya po lẹ ji to Bẹtẹli voovo lẹ, bosọ yin didohlan agun he hugan 110 000 lẹ mẹ. To ehe lẹpo wiwà mẹ, hagbẹ whẹndo Bẹtẹli tọn lẹ nọ nọgodona azọ́n he dona yin wiwà to niyaniya mẹ hugan lọ—enẹ wẹ yẹwheho wẹndagbe lọ tọn didọ.—Malku 13:10.

• Mẹnu lẹ wẹ nọ sẹ̀n to Bẹtẹli, podọ nawẹ yé nọ yin nukunpedego gbọn?

• Azọ́n niyaniya tọn tẹwẹ Bẹtẹli dopodopo nọ nọgodona?

Hagbẹ whẹndo Bẹtẹli tọn lẹ nọ wazọ́n to azọ́nwatẹn voovo lẹ nado penukundo azọ́n yẹwhehodidọ tọn go to otò dopo kavi susu mẹ. Yé sọgan wazọ́n to pipli lẹdogbedevomẹ tọn de mẹ, zín linlinnamẹwe lẹ jẹgbonu, blá owe lẹ dopọ, bẹ owe lẹ do agbànhọ mẹ, wleawuna hoyidokanji kavi video lẹ kavi penukundo whẹho devo lẹ go na aigba-denamẹ he to alahọ lọ glọ lẹ.

Wedegbẹ́ Alahọ tọn de nọ deanana azọ́n lọ. Hagbẹ Anademẹtọ lọ nọ ze nuwiwa alahọ dopodopo tọn do alọmẹ na Wedegbẹ́ Alahọ tọn de he nọ bẹ mẹho agun tọn he pegan taun atọ̀n kavi humọ hẹn. Wedegbẹ́ lọ nọ na nudọnamẹ Hagbẹ Anademẹtọ lọ gando nukọnyiyi azọ́n lọ tọn go gọna nuhahun depope he sọgan fọndote to otò he tin to anademẹ yetọn glọ lẹ mẹ. Linlin mọnkọtọn lẹ nọ gọalọna Hagbẹ Anademẹtọ lọ nado de hosọ he dona yin hodọdeji to nukọn mẹ to owe lẹ mẹ, podọ to opli lẹ po plidopọ lẹ po ji. Afọzedaitọ Hagbẹ Anademẹtọ lọ tọn lẹ nọ yin didohlan sọn ojlẹ de mẹ jẹ devo mẹ nado dla alahọ lẹ pọ́n bo na anademẹ Wedegbẹ́ Alahọ tọn lẹ gando azọ́ndenamẹ yetọn lẹ go. (Howhinwhẹn lẹ 11:14) Tito-to-whinnu vonọtaun de he bẹ hodidọ afọzedaitọ tatọ́-tẹnnọ tọn de tọn hẹn nọ yin awuwlena nado na tuli mẹhe tin to aigba-denamẹ alahọ lọ tọn ji lẹ.

Alahọ lẹ nọ gọalọna agun lẹ. Mẹmẹsunnu azọngbannọ he to alahọ mẹ lẹ wẹ nọ kẹalọyi obiọ agun yọyọ lẹ didoai tọn. Yé sọ nọ deanana azọ́n gbehosọnalitọ lẹ, mẹdehlan lẹ po nugopọntọ lẹdo tọn he to sinsẹ̀n to alahọ lọ glọ lẹ po tọn. Yé nọ basi tito plidopọ lẹ tọn, bo nọ deanana Plitẹnhọ Ahọluduta tọn yọyọ lẹ gbigbá, bosọ nọ hẹn ẹn diun dọ owe lẹ yin didohlan agun lẹ mẹ sọgbe hẹ nuhudo yetọn. Azọ́n he nọ yin wiwà to alahọ mẹ lẹpo wẹ nọ gọalọ bọ azọ́n yẹwhehodidọ tọn lọ do nọ nọ̀ titoji.—1 Kọlintinu lẹ 14:33, 40.

• Nawẹ Wedegbẹ́ Alahọ tọn lẹ nọ gọalọna Hagbẹ Anademẹtọ lọ gbọn?

• Azọngban tẹlẹ wẹ nọ yin nukunpedego to alahọ mẹ?

Nado sọgan wà nuhe go mí pé lẹpo nado lá “wẹndagbe” lọ na “akọta lẹpo, hẹnnu lẹpo, ogbè lẹpo podọ gbẹtọ lẹpo,” mí nọ wleawuna owe lẹ to ogbè he hugan 750 lẹ mẹ. (Osọhia 14:6) Nawẹ mí nọ hẹn azọngban sinsinyẹn ehe di gbọn? Omẹ voovo lẹ lẹdo aihọn pé wẹ nọ gọalọ nado kàn hosọ voovo lẹ bọ pipli lẹdogbedevomẹtọ he ze yede jo lẹ tọn de nọ lilẹ́ yé do gbedevomẹ. Omẹ ehe lẹpo wẹ yin Kunnudetọ Jehovah tọn lẹ.

Hosọ lẹ nọ yin kinkan do Glẹnsigbe mẹ. Hagbẹ Anademẹtọ nọ deanana azọ́n Azọ́nwatẹn Wekinkan tọn to tatọ́-tẹnnọ aihọn tọn mítọn. Azọ́nwatẹn ehe nọ deanana azọ́n mẹhe nọ kàn hosọ lẹ to tatọ́-tẹnnọ po alahọ delẹ po mẹ tọn. Na mí tindo mẹhe nọ kàn hosọ lẹ sọn ofi voovo lẹ wutu, owe mítọn lẹ nọ dọhodo hosọ he gando aṣa voovo lẹ go ji bọ ehe nọ fọnjlodotena omẹ voovo lẹ.

Nuhe yin kinkan lọ lẹ nọ yin didohlan lẹdogbedevomẹtọ lẹ. To whenue nuhe yin kinkan lọ lẹ ko yin azọ́nwadeji fó, yé nọ yin didohlan pipli lẹdogbedevomẹ-basitọ lẹ tọn lẹdo aihọn pé gbọn ọdinatẹẹ gblamẹ, bọ yé nọ lilẹ́ ẹ do gbedevomẹ, gbeje e pọ́n bo nọ vọ́ ẹ hia na e nido dídí. Yé nọ dovivẹnu nado ṣinyan “hogbe nugbo he sọgbe lẹ” nado sọgan de linlẹn nuhe yin kinkan do Glẹnsigbe mẹ lọ tọn tọ́n to gigọ́ mẹ to ogbè yetọn titi mẹ.—Yẹwhehodọtọ 12:10.

Ọdinatẹẹ nọ hẹn azọ́n lọ yá. Ọdinatẹẹ ma sọgan wazọ́n do otẹn mẹhe nọ kàn hosọ lẹ kavi lẹdogbedevomẹtọ lẹ tọn mẹ. Ṣigba, yizan wezẹhomẹ gọna azọ́nwanu dodinnanu tọn voovo he to ọdinatẹẹ ji lẹ tọn nọ hẹn azọ́n yetọn yá. Kunnudetọ Jehovah tọn lẹ ko wleawuna tito ọdinatẹẹ ji tọn de he nọ yin yiylọdọ système électronique de photocomposition multilingue (MEPS), ehe nọ hẹn wekinkan do ogbè kanweko lẹ mẹ yọnbasi, bọ yẹdide lẹ nọ yin yiyidogọ nado wleawuna owe he na yin zinzinjẹgbonu lẹ.

Naegbọn mí do nọ dovivẹnu ehe lẹpo, etlẹ yin na ogbè he gbẹtọ fọtọ́n vude poun wẹ nọ do lẹ? Na ojlo Jehovah tọn wẹ yindọ “gbẹtọ wunmẹ lẹpo ni yin whinwhlẹngán bo wá oyọnẹn he pegan nugbo tọn kọ̀n.”—1 Timoti 2:3, 4.

• Nawẹ owe mítọn lẹ nọ yin kinkan gbọn?

• Naegbọn mí do nọ lilẹ́ owe mítọn lẹ do ogbè susu sọmọ mẹ?

Titobasinanu mítọn nọ zín livi donu kanweko Biblu po owe devo lẹ po tọn jẹgbonu to whemẹwhemẹ bo nọ má yé vọnu. Mí nọ gbá Plitẹnhọ Ahọluduta tọn po alahọ lẹ po bo nọ penukundo yé go. Mí nọ penukundo hagbẹ alahọ tọn po mẹdehlan fọtọ́n susu lẹ po go bo nọ wleawuna alọgọ kọgbọ tọn to nugbajẹmẹji lẹ whenu. Enẹwutu, e sọgan paṣa we dọ, ‘Fie wẹ mí nọ mọ akuẹ te nado penukundo ehe lẹpo go?’

Mí ma nọ biọ mado-ao, gbò akuẹ namẹ kavi biọ akuẹjọ. Dile etlẹ yindọ nukunpipedo azọ́n wẹndagbe-jijlá tọn go nọ biọ akuẹ susu, mí ma nọ biọ akuẹ mẹde. To nuhe hugan owhe kanweko die, zinjẹgbonu awetọ Atọ̀họ̀-Nuhihọ́ lọ Tọn dọ dọ mí yise dọ Jehovah to alọgọna mí bọ mí “ma na biọ akuẹ kavi vẹ̀ mẹde na alọgọ gbede”—mí ma ka ko sọ wàmọ gbede!—Matiu 10:8.

Azọ́n mítọn lẹ nọ yin godonọna gbọn nunina sọn ojlo mẹ wá lẹ dali. Mẹsusu nọ yọ́n pinpẹn azọ́n Biblu pinplọnmẹ tọn mítọn bo nọ na nunina nado nọgodona ẹn. Kunnudetọ lẹ lọsu nọ yí ayajẹ do yí whenu, huhlọn, akuẹ po nutindo yetọn devo lẹ po do nọgodona ojlo Jiwheyẹwhe tọn wiwà to aigba lẹpo ji. (1 Otànnugbo lẹ 29:9) Apotin nunina tọn lẹ tin to Plitẹnhọ Ahọluduta tọn mítọn mẹ podọ to nọtẹn plidopọ tọn mítọn lẹ, ehe mẹ mẹhe jlo na basi nunina lẹ sọgan basi do. Suhugan akuẹ he nọ yin mimọyi lọ lẹ tọn nọ wá sọn mẹhe ma yin adọkunnọ lẹ dè, taidi asuṣiọsi wamọnọ he Jesu pà taun lọ, mẹhe ze abọgan-kuẹ flinflin awe do adọkun potin tẹmpli mẹ tọn lọ mẹ. (Luku 21:1-4) Enẹwutu, mẹdepope wẹ sọgan “nọ de nude dovo” to gbesisọ mẹ nado nọ yí do basi nunina “kẹdẹdile e ko magbe etọn to ahun etọn mẹ do.”—1 Kọlintinu lẹ 16:2; 2 Kọlintinu lẹ 9:7.

Mí kudeji dọ Jehovah na zindonukọn nado nọ whàn ahun mẹhe jlo na ‘yí nuhọakuẹ yetọn do gbògbéna ẹn’ lẹ tọn nado nọ nọgodona azọ́n Ahọluduta lọ tọn, na ojlo etọn nido yin hinhẹndi.—Howhinwhẹn lẹ 3:9.

• Etẹwẹ hẹn titobasinanu mítọn gbọnvona sinsẹ̀n devo lẹ?

• Nawẹ nunina sọn ojlo mẹ wá lẹ nọ yin yiyizan gbọn?

Dile yinkọ lọ Plitẹnhọ Ahọluduta tọn dohia do, nuplọnmẹ Biblu tọn tangan he nọ yin sisè to finẹ lẹ nọ zinnudo Ahọluduta Jiwheyẹwhe tọn ji—yèdọ hosọ lizọnyizọn Jesu tọn.—Luku 8:1.

Yé yin ahọnkan sinsẹ̀n-bibasi nugbo tọn to lẹdo lọ mẹ. Finẹ wẹ yẹwheho wẹndagbe Ahọluduta lọ tọn didọ nọ yin tito-basina te to lẹdo lọ mẹ. (Matiu 24:14) Plitẹnhọ Ahọluduta tọn lẹ nọ gbọnvo to kiklo po awusọhia po mẹ, ṣigba yemẹpo wẹ nọ yin ohọ̀ jlẹkaji tọn lẹ bọ susu to yé mẹ nọ yin yiyizan gbọn agun hugan dopo dali. To owhe agọe tọn lẹ mẹ, mí ko gbá Plitẹnhọ Ahọluduta tọn yọyọ fọtọ́n donu ao lẹ (yèdọ nudi atọ́n to gbèdopo) nado sọgan hẹn pliwatọ he fọ́n bo to jijideji to agun mítọn mẹ lẹ. Nawẹ ehe nọ yin hinhẹn yọnbasi gbọn?—Matiu 19:26.

Yé nọ yin gbigbá po nunina he yin bibasi na Plitẹnhọ Ahọluduta tọn gbigbá lẹ po. Nunina ehelẹ nọ yin didohlan alahọ mẹ, na akuẹ nido sọgan yin hinhẹn tin-to-aimẹ na agun he tindo nuhudo nado gbá Plitẹnhọ kavi vọ́ ẹ jlado lẹ.

Yé nọ yin gbigbá gbọn mẹdezejotọ he wá sọn ofi voovo bo ma nọ yí azọ́nkuẹ lẹ dali. To otò susu mẹ, Pipli Plitẹnhọ Ahọluduta Tọn Gbigbá Tọn lẹ ko yin awuwlena. Pipli họ̀gbátọ po mẹdezejotọ lẹ po tọn lẹ nọ sẹtẹn sọn agun de mẹ jẹ devo mẹ to otò dopolọ mẹ, etlẹ yin yì gbétatò lẹ mẹ nado gọalọna agun lẹdo lọ tọn lẹ nado gbá Plitẹnhọ Ahọluduta tọn yetọn lẹ. To otò devo lẹ mẹ, Kunnudetọ nugopetọ lẹ ko yin dide nado nọ penukundo Plitẹnhọ lẹ gbigbá po vivọjlado po go to agbegbe he yin didena yé mẹ. Dile etlẹ yindọ azọ́nyọnẹntọ lẹdo lọ tọn voovo lẹ nọ ze yede jo to họ̀gbigbá dopodopo tẹnmẹ, hagbẹ agun lọ tọn lẹ wẹ nọ sù hugan to mẹdezejotọ lọ lẹ mẹ. Gbigbọ Jehovah tọn gọna vivẹnudido ahun lẹpo tọn omẹ etọn lẹ tọn wẹ to ehe lẹpo hẹn yọnbasi.—Salmu lẹ 127:1; Kolosinu lẹ 3:23.

• Naegbọn nọtẹn sinsẹ̀n-bibasi tọn mítọn lẹ nọ yin yiylọdọ Plitẹnhọ Ahọluduta tọn lẹ?

• Nawẹ e nọ yọnbasi gbọn nado gbá Plitẹnhọ Ahọluduta tọn lẹ lẹdo aihọn pé?

Plitẹnhọ Ahọluduta tọn Kunnudetọ Jehovah tọn lẹ tọn lẹpo wẹ nọ pagigona oyín wiwe Jiwheyẹwhe tọn. Enẹwutu, mí nọ mọdọ mahẹ tintindo to ohọ̀ lọ hinhẹn do wiweji mẹ na e nido tin to ninọmẹ dagbe mẹ bo yọ́npọ́n yin lẹblanulọkẹyi de bosọ yin adà titengbe de to sinsẹ̀n-bibasi wiwe mítọn mẹ. Mẹlẹpo wẹ sọgan tindo mahẹ to e mẹ.

Nọ ze dewe jo to opli godo nado hẹn Plitẹnhọ lọ do wiweji. To opli dopodopo godo, mẹmẹsunnu po mẹmẹyọnnu lẹ po nọ yí ayajẹ do wazọ́n kleunkleun delẹ nado hẹn Plitẹnhọ Ahọluduta tọn lọ do wiweji. Sọn ojlẹ de mẹ jẹ devo mẹ, azọ́n nuhẹn do wiweji tọn tangan lẹ nọ yin wiwà. Mẹho agun tọn kavi devizọnwatọ lizọnyizọnwiwa tọn de nọ deanana azọ́n lọ gbọn todohukanji azọ́n he na yin wiwà lẹ tọn de hihodo dali. Sọgbe hẹ nuhudo lọ, mẹdelẹ sọgan zàyí, súnsún nulẹ kavi kọmẹ, vọ́ oján lẹ to, klọ́ afọdaitẹn lẹ, súnsún fleṣe po mẹpọ́nnu lẹ po, kọ̀n ogbó lẹ kavi hẹn gbonu lọ do wiweji, na e nido yọ́npọ́n. E whè gbau whladopo to owhe mẹ, azán de nọ yin dide nado wazọ́n nuhẹn do wiweji tọn to gigọ́ mẹ. Mí nọ biọ to ovi mítọn lẹ si nado tindo mahẹ to azọ́n lọ lẹ mẹ bo nọ gbọnmọ dali plọn yé nado tindo sisi na nọtẹn sinsẹ̀n-bibasi tọn mítọn.—Yẹwhehodọtọ 5:1.

Nọ ze dewe jo nado gọalọ to nulẹ vivọjlado mẹ. To whemẹwhemẹ, homẹ po gbonu Plitẹnhọ Ahọluduta lọ tọn po nọ yin gbigbejepọn. To gbigbeje e pọ́n godo, azọ́n nulẹ vivọjlado tọn de nọ yin wiwà nado hẹn ohọ̀ lọ do wiweji bo gbọnmọ dali dapana akuẹzinzan he ma yin dandan tọn lẹ to nukọn mẹ. (2 Otànnugbo lẹ 24:13; 34:10) Plitẹnhọ Ahọluduta tọn he jẹna fie yè na sẹ̀n Jiwheyẹwhe mítọn te dona wé bo tin to ninọmẹ dagbe mẹ. Mí nọ dohia dọ mí yiwanna Jehovah bo yọ́n pinpẹn fie mí nọ basi sinsẹ̀n hlan ẹn te tọn, eyin mí nọ tindo mahẹ to azọ́n ehe mẹ. (Salmu lẹ 122:1) Ehe sọ nọ tindo nuyiwadomẹji dagbe do mẹhe tin to lẹdo lọ mẹ lẹ ji.—2 Kọlintinu lẹ 6:3.

• Naegbọn mí ma dona dovọ́na nọtẹn sinsẹ̀n-bibasi tọn mítọn?

• Tito tẹlẹ wẹ yin bibasi nado nọ hẹn Plitẹnhọ Ahọluduta tọn lẹ do wiweji?

Be hiẹ na jlo nado basi dodinnanu delẹ nado hẹn oyọnẹn towe gando Biblu go sudeji ya? Be hiẹ jlo na yọ́n nususu gando wefọ, nọtẹn, nuhe kavi mẹhe go Biblu donù de go ya? Kavi be hiẹ nọ kanse dewe eyin Ohó Jiwheyẹwhe tọn sọgan gọalọna we nado didẹ nuhahun mẹdetiti tọn de ya? Eyin mọ wẹ, hiẹ sọgan dindonanu to wesẹdotẹn Plitẹnhọ Ahọluduta tọn.

Azọ́nwanu dodinnanu tọn he yọ́n-na-yizan lẹ nọ tin to finẹ. E yọnbasi dọ hiẹ ma ko tindo owe sinai do Biblu ji Kunnudetọ Jehovah tọn lẹ tọn he tin-to-aimẹ to ogbè towe mẹ lẹpo. Ṣigba, suhugan owe mítọn agọe tọn lẹ tọn tin to wesẹdotẹn Plitẹnhọ Ahọluduta tọn. Hiẹ sọgan sọ mọ lẹdogbedevomẹ Biblu tọn voovo lẹ to finẹ gọna wezẹhomẹ dagbe de po owe alọdlẹndonu tọn devo he yọ́n-na-yizan lẹ po. Hiẹ vò nado yí wesẹdotẹn lọ zan jẹnukọnna opli lẹ podọ to opli lẹ godo. Eyin ọdinatẹẹ de tin to finẹ, Watchtower Library sọgan tin to e ji. Azọ́nwanu dodinnanu to ọdinatẹẹ ji tọn de wẹ he bẹ owe mítọn susu hẹn bo bọawu zinzan, ehe hiẹ sọgan yizan nado dín hosọ, hogbe kavi wefọ de.

E nọ yọ́n-na-yizan na mẹhe ze yinkọ dai to Opli Gbẹzan po Lizọnyizọn Mítọn po tọn mẹ lẹ. A sọgan nọ yí wesẹdotẹn Plitẹnhọ Ahọluduta tọn zan nado wleawuna azọ́ndenamẹ towe lẹ. Nugopọntọ Opli Gbẹzan po Lizọnyizọn Mítọn po tọn wẹ nọ penukundo wesẹdotẹn lọ go. Ewọ wẹ nọ hẹn ẹn diun dọ owe agọe tọn lẹ tin to finẹ bo to titoji. Ewọ kavi Biblu plọnmẹtọ towe sọgan do lehe hiẹ sọgan mọ nudọnamẹ he dín a te lẹ gbọn hia we. Ṣigba, owe depope ma dona yin zize yì sọn Plitẹnhọ Ahọluduta tọn lọ mẹ. Podọ e họnwun dọ, mí dona nọ penukundo owe lọ lẹ go ganji bo ma na nọ zẹhù kavi kannu do yé mẹ.

Biblu basi zẹẹmẹ dọ eyin mí jlo na mọ “oyọnẹn Jiwheyẹwhe tọn,” mí dona wleawufo nado dín in di “adọkunnu whiwhla lẹ.” (Howhinwhẹn lẹ 2:1-5) Wesẹdotẹn Plitẹnhọ Ahọluduta tọn sọgan gọalọna we nado jẹ dindin in ji.

• Azọ́nwanu dodinnanu tọn tẹlẹ wẹ tin-to-aimẹ to wesẹdotẹn Plitẹnhọ Ahọluduta tọn?

• Mẹnu wẹ sọgan gọalọna we nado yí wesẹdotẹn lọ zan ganji?

Jesu Klisti dọna hodotọ etọn lẹ dọ: “Mì dike hinhọ́n mìtọn ni họnwun to gbẹtọ lẹ nukọn, na yé nido sọgan mọ azọ́n dagbe mìtọn lẹ bo na gigo Otọ́ mìtọn he tin to olọn mẹ.” (Matiu 5:16) Enẹwutu, mí to azọ́n nuyọnẹn wintinwintin tọn egbezangbe tọn lẹ yizan, ehe bẹ Intẹnẹt hẹn. Nọtẹn Intẹnẹt tọn mítọn jw.org wẹ yin asisa dejidego Intẹnẹt ji tọn he nọ na nudọnamẹ gando nuyise po nuwiwa Kunnudetọ Jehovah tọn lẹ tọn po go. Adà tẹlẹ wẹ e bẹhẹn?

Gblọndo Biblu tọn na kanbiọ he nọ saba yin kinkanse lẹ. Hiẹ sọgan mọ gblọndo na delẹ to kanbiọ titengbe hugan he gbẹtọ ko kanse pọ́n lẹ mẹ. Di apajlẹ, alọnuwe pẹvi lọ lẹ Be Yajiji Na Wá Doalọte Gbèdopo Ya? po Be Oṣiọ lẹ Sọgan Gọwá Nọgbẹ̀ Nugbonugbo Ya? po ko tin-to-aimẹ to Intẹnẹt ji to ogbè he hugan 600 lẹ mẹ.Hiẹ sọgan sọ mọ Lẹdogbedemẹ Aihọn Yọyọ Tọn hia to ogbè he hugan 130 mẹ, po nuplọnmẹwe Biblu tọn susu po taidi Etẹwẹ Biblu Plọn Mí Taun? gọna zinjẹgbonu agọe tọn Atọ̀họ̀-Nuhihọ́ lọ Tọn po Réveillez-vous! po tọn lẹ. Susu owe ehelẹ tọn sọgan yin hihia kavi yin sisè to Intẹnẹt ji tlọlọ, kavi yé sọgan yin yíyí to wunmẹ he mẹsusu nọ saba yizan lẹ ji, taidi MP3 he yè sọgan dotó, wunmẹ PDF kavi EPUB he sọgan yin hihia lẹ. Hiẹ tlẹ sọgan zín weda delẹ jẹgbonu nado má yé hẹ jlodotọ de to ogbè etọn titi mẹ! Video lẹ tin-to-aimẹ to tókunọ-gbè susu mẹ. Hiẹ sọgan mọ hoyidokanji sinai do Biblu ji lẹ, nupinpọn-do-plọnnu lẹ po ohàn dagbedagbe lẹ po yí sọn finẹ, ehe a sọgan duvivi etọn to whedepopenu he a jlo.

Nudọnamẹ he sọgbe lẹ gando Kunnudetọ Jehovah tọn lẹ go. Linlin po video agọe tọn lẹ po gando azọ́n lẹdo aihọn pé tọn mítọn go sọ nọ yin bibẹdo nọtẹn Intẹnẹt tọn lọ ji, gọna nudọnamẹ lẹ gando Kunnudetọ Jehovah tọn lẹ po azọ́n kọgbọ hẹnwanamẹ tọn mítọn lẹ po go. Hiẹ sọgan mọ nudọnamẹ gando plidopọ he ja lẹ po adlẹsi alahọ mítọn lẹ tọn po go.

Gbọn ehelẹ gblamẹ, mí to hinhọ́n nugbo tọn hẹn họnwun kaka yì awà he dẹn hugan aigba tọn lẹ ji. Gbẹtọ lẹ sọn adà voovo aigba tọn lẹpo ji wẹ to alemọyi sọn e mẹ, yèdọ kakajẹ fie dẹn hugan to aigba ji, enẹ wẹ Antarctique. Odẹ̀ mítọn wẹ yindọ “ohó Jehovah tọn ni . . . to gbigbayipe po awuyiya po” jẹ aigba lẹpo ji, na gigo Jiwheyẹwhe tọn.—2 Tẹsalonikanu lẹ 3:1.

• Nawẹ jw.org to alọgọna gbẹtọ susu dogọ nado plọn nugbo Biblu tọn gbọn?

• Etẹwẹ hiẹ na jlo nado yì dín pọ́n to nọtẹn Intẹnẹt tọn mítọn ji?