Mẹsusu ko doalọtena nuwiwa sinsẹ̀n tọn lẹ yìyì, na yé ma nọ mọ anademẹ gbigbọmẹ tọn kavi homẹmiọnnamẹ depope yí to finẹ wutu. Eyin mọ wẹ, naegbọn hiẹ dona nọ yì opli Klistiani tọn he Kunnudetọ Jehovah tọn lẹ nọ basi lẹ? Etẹwẹ hiẹ na mọ to finẹ?

Tintin to gbẹtọ mẹtọnhopọntọ he yiwannamẹ lẹ ṣẹnṣẹn na hẹn ayajẹ wá na we. To owhe kanweko tintan whenu, Klistiani lẹ yin tito-basina do agun voovo lẹ mẹ, bọ yé nọ pli nado sẹ̀n Jiwheyẹwhe, bo plọn Owe-wiwe lẹ bosọ na tuli ode awetọ. (Heblu lẹ 10:24, 25) Na yé nọ pli dopọ to ninọmẹ owanyi tọn de mẹ wutu, yé nọ mọdọ yé tin to họntọn nugbo lẹ, yèdọ mẹmẹsunnu gbigbọmẹ tọn yetọn lẹ ṣẹnṣẹn. (2 Tẹsalonikanu lẹ 1:3; 3 Johanu 14) Mí nọ hodo aliho nuyiwa tọn dopolọ to egbehe bo nọ duvivi ayajẹ dopolọ tọn.

Pinplọn lehe yè nọ yí nunọwhinnusẹ́n Biblu tọn lẹ do yizan mẹ do na hẹn ale wá na we. Dile e yin do to ojlẹ Biblu tọn mẹ, sunnu, yọnnu po yọpọvu lẹ po wẹ nọ pli dopọ to egbehe. Mẹplọntọ he pegan lẹ nọ yí Biblu do gọalọna mí nado mọ lehe mí sọgan yí nunọwhinnusẹ́n Biblu tọn lẹ zan to gbẹzan mítọn mẹ do. (Deutelonomi 31:12; Nẹhemia 8:8) Mẹlẹpo wẹ sọgan tindo mahẹ to hodọdopọ lẹ po hànjiji lẹ po mẹ nado do todido Klistiani tọn mítọn hia.—Heblu lẹ 10:23.

Yise towe to Jiwheyẹwhe mẹ hinhẹn lodo na hẹn dona wá na we. Apọsteli Paulu dọna dopo to agun azán etọn gbè tọn lẹ mẹ dọmọ: “Yẹn to jijlo vẹkuvẹku nado mọ mì, . . . na tulinina ode awetọ nido tin to ṣẹnṣẹn mìtọn, gbọn yise mẹdopodopo tọn dali, yèdọ mìtọn po ṣie po.” (Lomunu lẹ 1:11, 12) To opli lẹ ji, gbẹdido whẹwhẹ hẹ yisenọ hatọ lẹ nọ hẹn yise mítọn po gbemima mítọn nado zan gbẹzan Klistiani tọn po lodo.

Naegbọn hiẹ ma na kẹalọyi oylọ-basinamẹ ehe nado wá opli agun tọn mítọn he na bọdego bo yí nukun towe titi do mọ onú ehelẹ? Mí na dokuavọna we po zohunhun po. Vọnu wẹ opli mítọn lẹpo—akuẹjọ depope ma nọ yin bibiọ.

• Aliho nuyiwa tọn tẹ ji wẹ opli agun tọn mítọn lẹ nọ sinai do?

• Nawẹ mí sọgan mọaleyi sọn opli Klistiani tọn lẹ yìyì mẹ gbọn?

Eyin etlẹ biọ dọ mí ni zinzọnlin gbọn zungbo he dobu de mẹ kavi gbọn ninọmẹ aimẹ tọn he ma yọ́n sọmọ de mẹ, mí nọ yì opli Klistiani tọn mítọn lẹ to gbesisọ mẹ janwẹ. Mahopọnna avùnnukundiọsọmẹnu gbẹ̀mẹ tọn lẹ po nuṣikọnamẹ po to vivọnu azọ́nzán de tọn, naegbọn Kunnudetọ Jehovah tọn lẹ do nọ dovivẹnu sọmọ nado pli hẹ yisenọ hatọ lẹ?

E nọ gọalọna mí nado zan gbẹzan dagbe. To whenue apọsteli Paulu to hodọ gando mẹhe mí nọ pli hẹ to agun mẹ lẹ go, e wlan dọ “mí ni nọ na ayidonugo ode awetọ.” (Heblu lẹ 10:24) Hogbe ehe zẹẹmẹdo “nado nọ yí sọwhiwhe do lẹnnupọn” gando ode awetọ go, enẹ wẹ nado yọ́n ode awetọ ganji. Enẹwutu, hogbe apọsteli lọ tọn lẹ na tuli mí nado nọ hò mẹdevo lẹ tọn pọ́n. Gbọn tintẹnpọn nado yọ́n whẹndo Klistiani tọn devo lẹ dali, mí nọ wá mọdọ delẹ to yé mẹ ko doakọnna avùnnukundiọsọmẹnu he taidi mítọn nkọ lẹ po kọdetọn dagbe po bọ yé sọgan gọalọna mí nado wà nudopolọ ga.

E nọ gọalọna mí nado jihọntọn dagbe lẹ. Mẹhe mí nọ pli dopọ hẹ to opli mítọn lẹ ji ma yin mẹyinyọnẹn lẹ poun gba, ṣigba họntọn vivẹ́ mítọn lẹ wẹ yé yin. To ojlẹ devo lẹ mẹ, mí sọ nọ yí whenu zan dopọ na ayidedai he sọgbe lẹ. Ale tẹlẹ wẹ gbẹdido mọnkọtọn lẹ nọ hẹnwa na mí? Mí nọ plọn nado yọ́n pinpẹn ode awetọ tọn dogọ, bọ enẹ nọ hẹn kanṣiṣa owanyi tọn mítọn lodo dogọ. To whenẹnu, eyin mẹmẹsunnu mítọn lẹ to pipehẹ nuhahun lẹ, mí nọ yawu gọalọna yé, na mí ko wleawuna kanṣiṣa họntọnjihẹmẹ tọn hẹ yé wutu. (Howhinwhẹn lẹ 17:17) Gbọn gbẹdido hẹ hagbẹ agun lọ tọn lẹpo dali, mí nọ dohia dọ mí tindo “mẹtọnhopọn dopolọ na ode awetọ.”—1 Kọlintinu lẹ 12:25, 26.

Mí na tuli hiẹ lọsu nado de mẹhe to ojlo Jiwheyẹwhe tọn wà lẹ taidi họntọn towe. Hiẹ na mọ họntọn mọnkọtọn lẹ to Kunnudetọ Jehovah tọn lẹ ṣẹnṣẹn. Jaale, a dike nudepope glọnalina we nado kọnawudopọ hẹ mí blo.

• Naegbọn e do yin alenu de na mí nado nọ yì opli Klistiani tọn lẹ?

• Whetẹnu wẹ hiẹ na jlo nado kọnawudopọ hẹ mí to opli lẹ ji?

Opli Klistiani dowhenu tọn lẹ tọn nọ saba bẹ ohàn, odẹ̀ gọna Owe-wiwe hihia po hodọdeji po hẹn. (1 Kọlintinu lẹ 14:26) Onú mọnkọtọn pẹpẹ wẹ hiẹ sọgan donukun nado mọ to opli mítọn lẹ ji.

Nudọnamẹ lọ lẹ nọ sinai do Biblu ji bo nọ yọ́n-na-yizan. To sẹfifo lẹ, agun dopodopo nọ pli nado sè hodidọ sinai do Biblu ji nukunwhiwhe 30 tọn gando lehe Owe-wiwe lẹ yọ́n-na-yizan to gbẹzan mítọn mẹ podọ to ojlẹ mítọn mẹ do go. Mímẹpo wẹ nọ yin tulina nado hodo wefọ lẹ hihia to Biblu mítọn titi mẹ. To hodidọ lọ godo, Oplọn “Atọ̀họ̀-Nuhihọ́ lọ Tọn” nọ yin bibasi na gànhiho dopo. Oplọn ehe nọ sinai do hosọ de ji sọn zinjẹgbonu oplọn tọn Atọ̀họ̀-Nuhihọ́ lọ Tọn mẹ bọ mẹplidopọ lẹ nọ yin tulina nado tindo mahẹ to hodọdopọ lọ mẹ. Ehe nọ gọalọna mí nado yí anademẹ Biblu tọn lẹ do yizan mẹ to gbẹzan mítọn mẹ. Hosọ dopolọ wẹ nọ yin dogbapọnna to nuhe hugan agun 110 000 lẹ mẹ lẹdo aihọn pé.

E nọ gọalọna mí nado hẹn nugopipe mẹpinplọn tọn mítọn pọnte dogọ. Mí sọ nọ pli dopọ to whèjai de to osẹ lọ gblamẹ na tito-to-whinnu adà atọ̀n tọn de he nọ yin yiylọdọ Gbẹzan po Lizọnyizọn Mítọn Po, ehe sinai do hosọ he nọ yin awuwlena to sunmẹsunmẹ delẹ ji to Nuplọnwe Opli Gbẹzan po Lizọnyizọn Mítọn po Tọn mẹ. Adà tintan opli ehe tọn, he nọ yin Nuhọakuẹ lẹ sọn Ohó Jiwheyẹwhe Tọn Mẹ, nọ gọalọna mí nado jẹakọ hẹ adà Biblu tọn de, ehe hagbẹ agun lọ tọn lẹ ko nọ hia na yede jẹnukọn. Adà lọ, Awuwiwlena Lizọnyizọn Kunnudegbe Tọn wẹ nọ bọdego bo nọ bẹ wadohia lẹ hẹn gando lehe mí na dọhodo Biblu ji hẹ mẹdevo lẹ do go. Ayinamẹtọ de nọ na ayinamẹ nado gọalọna mí, na mí nido hẹn nugopipe wehihia po hodidọ tọn mítọn po pọnte dogọ. (1 Timoti 4:13) Adà godo tọn lọ, enẹ wẹ Gbẹzan Klistiani Tọn, nọ dọhodo aliho dagbe hugan he mẹ mí sọgan yí nunọwhinnusẹ́n Biblu tọn lẹ do yizan mẹ to nuwiwa egbesọegbesọ tọn mítọn lẹ mẹ te ji. Ehe nọ bẹ hodọdopọ kanbiọ po gblọndo po tọn de hẹn, he nọ hẹn nukunnumọjẹnumẹ mítọn gando Biblu go pọnte dogọ.

Eyin hiẹ wá opli mítọn lẹ, matin ayihaawe, hiẹ na yiwanna nuplọnmẹ sinai do Biblu ji he a na mọyi lẹ.—Isaia 54:13.

• Etẹwẹ hiẹ sọgan donukun nado sè to opli Kunnudetọ Jehovah tọn lẹ tọn ji?

• Detẹ to opli sẹmẹsẹmẹ tọn mítọn lẹ mẹ wẹ hiẹ na jlo nado yì to madẹnmẹ?

Dile hiẹ to yẹdide he tin to alọnuwe ehe mẹ lẹ pọ́n, be a doayi e go dọ Kunnudetọ Jehovah tọn lẹ nọ sọnú ganji to whenue yé jei opli agun tọn yetọn lẹ ya? Naegbọn mí do nọ na ayidonugo aṣọ́dido po nusisọ́ mítọn po sọmọ?

Nado do sisi hia Jiwheyẹwhe mítọn. Nugbo wẹ dọ Jiwheyẹwhe nọ mọnú zẹ̀ awusọhia gbonu tọn go. (1 Samuẹli 16:7) Etomọṣo, to whenue mí pli dopọ nado sẹ̀n ẹn, ojlo ahundopo tọn mítọn wẹ nado do sisi hia ewọ po sinsẹ̀n-basitọ hatọ mítọn lẹ po. Eyin mí jlo na yì whẹdatọ de nukọn to whẹdọhọsa, matin ayihaawe mí na na ayidonugo awusọhia mítọn nado do sisi hia. Mọdopolọ, awusọhia mítọn to opli lẹ ji nọ do sisi he mí tindo na “Whẹdatọ aigba lẹpo tọn,” yèdọ Jehovah Jiwheyẹwhe podọ na fihe mí nọ basi sinsẹ̀n hlan ẹn te hia.—Jenẹsisi 18:25.

Nado do nunọwhinnusẹ́n he mí nọ nọgbẹ̀ sọgbe hẹ lẹ hia. Biblu na tuli Klistiani lẹ nado nọ yí “mẹdehihọ́ po wunza po” do sọnú. (1 Timoti 2:9, 10) Nado sọnú po “mẹdehihọ́” po zẹẹmẹdo nado dapana nusisọ́ he sọgan dọ̀n ayidonugo wá mí ji lẹ, yèdọ nusisọ́ he ma to jlẹkaji, he nọ fọ́n ojlo zanhẹmẹ tọn dote kavi do omẹ́ hia. Humọ, “wunza” nọ gọalọna mí nado de nusisọ́ he dọnmẹdogo ṣogan bo ma to kluyọ kavi zẹ̀pá. Ṣigba, nunọwhinnusẹ́n ehelẹ ma glọnalina mí nado basi nudide mẹdetiti tọn voovo lẹ gba. Awusọhia mítọn he dọnmẹdogo bo yọ́npọ́n sọgan “doaṣọ́na oplọn Mẹwhlẹngántọ mítọn” tọn bo “pagigona Jiwheyẹwhe,” eyin mí ma tlẹ kẹnù bo dọho. (Titu 2:10; 1 Pita 2:12) Gbọn nusisọ́ ganji na opli lẹ dali, mí sọgan hẹn mẹdevo lẹ nado yí nukun nujọnu tọn do pọ́n sinsẹ̀n-bibasi Jehovah tọn.

A dibu nado wá opli to Plitẹnhọ Ahọluduta tọn mítọn mẹ na nusisọ́ towe wutu blo. E ma yin dandan dọ avọ̀ mítọn lẹ ni yin akuẹgegenu tọn kavi dehe to zoji whẹpo do yin nusisọ́ he sọgbe bo wé bosọ yọ́npọ́n.

• Nawẹ nusisọ́ mítọn yin nujọnu sọ to whenue mí jei Jiwheyẹwhe sẹ̀n gbé?

• Nunọwhinnusẹ́n tẹlẹ wẹ nọ deanana nudide mítọn lẹ gando aṣọ́dido po nusisọ́ po go?

Eyin hiẹ ko to Biblu plọn hẹ dopo to Kunnudetọ Jehovah tọn lẹ mẹ, vlavo hiẹ na ko nọ dovivẹnu nado gbadopọnna nudọnamẹ lọ jẹnukọnna nupinplọn dopodopo. Nado duale opli agun tọn lẹ tọn ganji, e na yọ́n nado nọ wà nudopolọ whẹpo do yì. Hiẹ sọgan tindo kọdetọn dagbe eyin a hẹn ẹn zun aṣa nado nọ wleawudai.

De whenu podọ fihe a na nọ plọnnu te. Whetẹnu wẹ e na bọawuna we nado ze ayiha do fidopo? Be afọnnu fuu whẹpo a nado jẹ azọ́nwa ji wẹ ya, kavi whèjai to whenue ovi lẹ ko yihọ godo? Eyin hiẹ ma tlẹ sọgan nọ plọnnu na ojlẹ dindẹn, magbe ojlẹ he hiẹ sọgan de dovo tọn bo nọ dovivẹnu ma nado dike nude ni glọnalina we. Dín fie to abọẹ de, bo ṣí ladio, televiziọn po alokan apòmẹ tọn po nado de ayihafẹsẹnamẹnu lẹpo sẹ̀. Dẹ̀hiho jẹnukọnna nupinplọn lọ na gọalọna we nado de ayiha sọn magbọjẹ azán lọ gbè tọn lẹ ji, na hiẹ nido sọgan ze ayidonugo towe lẹpo do Ohó Jiwheyẹwhe tọn ji.—Filipinu lẹ 4:6, 7.

Dohiagona nuagokun lẹ bo wleawu nado tindo mahẹ. Jẹnukọn whẹ́, tẹnpọn bo yìnnukun gbọn nudọnamẹ lọ blebu ji. Lẹnnupọndo hosọ lọ ji, gbadopọnna lehe hóvila lọ lẹ dopodopo gando hosọ lọ go do, bo pọ́n lehe yẹdide lẹ po kanbiọ dogbapọn tọn lẹ po zinnudo nuagokun tangan lọ lẹ ji do. Enẹgodo, hia hukan dopodopo bo dín gblọndo na kanbiọ hukan lọ lẹ tọn. Hùn wefọ he yin dide lẹ bo hia yé bosọ lẹnnupọndo lehe yé nọgodona nudọnamẹ lọ do ji. (Owalọ lẹ 17:11) Eyin a mọ gblọndo kanbiọ de tọn, dohiagona kavi zẹhudo oglọ na hogbe kleun delẹ to hukan lọ mẹ he na gọalọna we nado flin gblọndo lọ. Enẹgodo to opli ji, a sọgan ze alọ eyin e jlo we, bo na gblọndo kleun de to hogbe towe titi mẹ.

Eyin hiẹ nọ gbadopọnna hosọ voovo he nọ yin hodọdeji to sẹmẹsẹmẹ to opli lẹ ji, a na yí linlẹn yọyọ he gando oyọnẹn Biblu tọn go lẹ dogọ “adọkunnu sẹdotẹn” gbigbọmẹ tọn towe.—Matiu 13:51, 52.

• Aṣa tẹwẹ hiẹ sọgan wleawuna gando opli lẹ go?

• Nawẹ hiẹ sọgan nọ wleawu nado na gblọndo to opli lẹ ji gbọn?

Sọn hohowhenu gbọ́n wẹ Jehovah ko nọ jlo dọ whẹndo dopodopo ni nọ yí whenu zan dopọ nado hẹn gbigbọnọ-yinyin yetọn po kanṣiṣa whẹndo yetọn tọn po lodo. (Deutelonomi 6:6, 7) Enẹwutu wẹ Kunnudetọ Jehovah tọn lẹ nọ de whenu dovo to sẹmẹsẹmẹ nado basi sinsẹ̀n dopọ to whẹndo mẹ—yèdọ nado dọhodopọ do whẹho gbigbọmẹ tọn he sọgbe hẹ nuhudo yetọn lẹ ji to ninọmẹ awuvivo tọn de mẹ. Eyin hiẹ ma tlẹ ko tindo whẹndo, hiẹ sọgan nọ yí whenu mọnkọtọn zan nado dọnsẹpọ Jiwheyẹwhe gbọn hosọ Biblu tọn he jlo we de pinplọn dali.

E nọ yin ojlẹ de nado dọnsẹpọ Jehovah dogọ. “Mì dọnsẹpọ Jiwheyẹwhe, ewọ nasọ dọnsẹpọ mì.” (Jakọbu 4:8) Mí nọ yọ́n Jehovah dogọ to whenue mí plọn zẹẹmẹ gigọ́ lẹ gando jẹhẹnu etọn lẹ po nuyiwa etọn lẹ po go to Biblu mẹ. Dopo to aliho he bọawu nado bẹ sinsẹ̀n-bibasi whẹndo tọn towe jẹeji lẹ mẹ wẹ nado nọ yí apadewhe whenu he yin dide lọ tọn zan nado hia Biblu daga to pọmẹ, vlavo gbọn tito-to-whinnu sẹmẹsẹmẹ tọn na Wehọmẹ Lizọnyizọn Yẹwhehọluduta tọn hihodo dali. Adà wehihia lọ tọn de sọgan yin didena hagbẹ whẹndo lọ tọn dopodopo bọ to enẹgodo, mì sọgan dọhodo nuhe mì plọn sọn Owe-wiwe lẹ mẹ ji to pọmẹ.

E nọ yin ojlẹ de nado dọnsẹpọ hagbẹ whẹndo tọn lẹ dogọ. Asu po asi po, kavi mẹjitọ lẹ po ovi lẹ po nọ hẹn haṣinṣan yetọn hẹ ode awetọ lodo to whenue yé plọn Biblu dopọ taidi whẹndo de. E dona nọ yin ojlẹ ayajẹ po jijọho po tọn he mẹlẹpo nọ donukun po jeje po to sẹmẹsẹmẹ. Mẹjitọ lẹ sọgan nọ de nado dọhodo hosọ he sọgbe hẹ owhe ovi lẹ tọn lẹ ji, vlavo sọn Atọ̀họ̀-Nuhihọ́ lọ Tọn po owe mítọn devo lẹ po mẹ kavi sọn nọtẹn Intẹnẹt tọn mítọn jw.org ji. Mì sọgan nọ dọhodo nuhahun he ovi mìtọn lẹ to pipehẹ to wehọmẹ de ji bo gbadopọnna lehe yé sọgan dudeji do. Be e ma nasọ yọ́n dọ mì ni nọ pọ́n tito-to-whinnu video tọn he yin awuwlena to Televiziọn JW (tv.jw.org) ji de bo dọhodopọ deji to godo mẹ ya? Mì sọgan nọ plọn ohàn he na yin jiji to opli osẹ lọ mẹ tọn ji lẹ bo dù jlonu kleun de dopọ to sinsẹ̀n-bibasi whẹndo tọn lọ godo.

Ojlẹ vonọtaun ehe yiyizan nado sẹ̀n Jehovah to pọmẹ to sẹmẹsẹmẹ na gọalọna hagbẹ whẹndo lọ tọn lẹpo nado nọ mọ awuvivi to Ohó Jiwheyẹwhe tọn pinplọn mẹ, podọ ewọ na dona vivẹnudido mìtọn lẹ tlala.—Salmu lẹ 1:1-3.

• Naegbọn mí do nọ de whenu dovo na sinsẹ̀n-bibasi whẹndo tọn?

• Nawẹ mẹjitọ lẹ sọgan nọ hẹn ojlẹ ehe yin awuvivinu de na hagbẹ whẹndo lọ tọn lẹpo gbọn?

Naegbọn nukunmẹ omẹ ehelẹ tọn do gọ́ na ayajẹ sọmọ? Plidopọ mítọn de ji wẹ yé te. Taidi devizọnwatọ Jiwheyẹwhe tọn hohowhenu tọn lẹ he yin gbedena nado nọ pli dopọ whla atọ̀n to whemẹwhemẹ, mí nọ tin to jejeji nado yì plidopọ daho mítọn lẹ. (Deutelonomi 16:16) Mí nọ basi plidopọ atọ̀n to whemẹwhemẹ: plidopọ lẹdo tọn azán dopo tọn awe, po plidopọ daho azán atọ̀n tọn de po. Nawẹ mí nọ mọaleyi sọn plidopọ ehelẹ mẹ gbọn?

Yé nọ hẹn kanṣiṣa mẹmẹsunnu tọn mítọn lodo. Kẹdẹdile Islaelivi lẹ nọ jaya nado pà Jehovah “to mẹplidopọ lẹ” ṣẹnṣẹn do, homẹ mílọsu tọn nọ hùn nado sẹ̀n ẹn to pọmẹ to nujijọ vonọtaun lẹ whenu. (Salmu lẹ 26:12, nudọnamẹ odò tọn; 111:1) Plidopọ ehelẹ nọ hùn dotẹnmẹ dote na mí nado mọ Kunnudetọ he wá sọn agun, kavi etlẹ yin otò devo mẹ lẹ bo dogbẹ́ hẹ yé. Mẹdopodopo nọ yin tulina nado hẹn núdùdù etọn wá bọ mí nọ dùnú to nọtẹn plidopọ lọ tọn to gbọjẹ whenu, podọ ehe nọ hẹn họntọnjiji yọnbasi to nuwiwa gbigbọmẹ tọn ehelẹ whenu. (Owalọ lẹ 2:42) To plidopọ ehelẹ ji, mí nọ yí nukun mítọn do mọ owanyi he kọ̀n “pipli mẹmẹsunnu lẹ tọn pete” dopọ lẹdo aihọn pé.—1 Pita 2:17.

Yé nọ gọalọna mí nado yinukọn to gbigbọmẹ. Islaelivi lẹ sọ nọ mọaleyi na yé nọ “mọnukunnujẹ ohó” Owe-wiwe tọn he zẹẹmẹ etọn yin bibasi to nujijọ mọnkọtọn lẹ whenu mẹ wutu. (Nẹhemia 8:8, 12) Mílọsu nọ yọ́n pinpẹn nuplọnmẹ Biblu tọn he mí nọ mọyi to plidopọ mítọn lẹ ji tọn. Hosọ tito-to-whinnu dopodopo tọn nọ sinai do Owe-wiwe ji. Gbọn hodidọ, hómadọ po wadohia he fọnjlodotenamẹ lẹ po gblamẹ, mí nọ plọn lehe mí sọgan wà ojlo Jiwheyẹwhe tọn to gbẹzan mítọn mẹ do. Numimọ mẹhe to vivẹnudo nado hẹn tenọgli yetọn go taidi Klistiani mahopọnna avùnnukundiọsọmẹnu ojlẹ awusinyẹn tọn ehelẹ tọn sisè nọ na tuli mí. To plidopọ daho lẹ ji, nupinpọn-do-plọnnu lẹ nọ gọalọna mí nado yí nukun homẹ tọn do pọ́n nujijọ he yin kinkandai to Biblu mẹ lẹ bo plọnnu sọn yé mẹ. To plidopọ dopodopo ji, mẹhe jlo na basi dohia klandowiwe yetọn na Jiwheyẹwhe tọn lẹ nọ yin bibaptizi.

• Naegbọn plidopọ lẹ do nọ yin ojlẹ ayajẹ tọn?

• Nawẹ hiẹ sọgan mọaleyi sọn plidopọ de yìyì mẹ gbọn?

Ojlẹ vude jẹnukọnna okú Jesu tọn, e lá dọmọ: “Yẹwheho wẹndagbe Ahọluduta lọ tọn ehe na yin didọ to aigba fininọ lẹpo ji taidi okunnu de na akọta lẹpo, podọ whenẹnu wẹ opodo lọ na wá.” (Matiu 24:14) Ṣigba, nawẹ azọ́n yẹwhehodidọ lẹdo aihọn pé tọn ehe na yin wiwadotana gbọn? Gbọn apajlẹ he Jesu zedai to whenue e to aigba ji lọ hihodo dali.—Luku 8:1.

Mí nọ tẹnpọn nado jẹ gbẹtọ lẹ dè to owhé yetọn gbè. Jesu plọnazọ́n devi etọn lẹ nado nọ dọyẹwheho wẹndagbe lọ tọn sọn whédegbè jẹ whédegbè. (Matiu 10:11-13; Owalọ lẹ 5:42; 20:20) Aigba-denamẹ tangan he ji wẹndagbe-jlatọ owhe kanweko tintan whenu tọn enẹlẹ na dọyẹwheho te yin nina yé. (Matiu 10:5, 6; 2 Kọlintinu lẹ 10:13) Mọdopolọ to egbehe, azọ́n yẹwhehodidọ tọn mítọn yin tito-basina ganji, bọ agun dopodopo tindo aigba-denamẹ he ji e na wazọ́n gbọn. Ehe nọ gọalọna mí nado hẹn gbedide Jesu tọn lọ di, enẹ wẹ “nado dọyẹwheho na gbẹtọ lẹ podọ nado dekunnu mlẹnmlẹn.”—Owalọ lẹ 10:42.

Mí nọ dovivẹnu nado jẹ gbẹtọ lẹ dè to fidepope he yé sọgan yin mimọ te. Jesu sọ dọyẹwheho na gbẹtọ lẹ to nọtẹn gbangba tọn lẹ taidi to huto kavi to dotọ̀ he kọ̀n mẹsusu nọ wá de tó, bo gbọnmọ dali ze apajlẹ dai na mí. (Malku 4:1; Johanu 4:5-15) Mílọsu nọ dọhona gbẹtọ lẹ gando Biblu go to fidepope he mí sọgan mọ yé te—yèdọ to tòhomẹ-liho lẹ ji, to ajọwatẹn lẹ, gbọjẹtẹn lẹ, húnglintẹn lẹ, kavi to alokan ji. Mí sọ nọ dekunnuna kọmẹnu, azọ́nwatọgbẹ́, klasigbẹ́, po hẹnnumẹ mítọn lẹ po to whedepopenu he dotẹnmẹ lọ hundote na mí. Vivẹnudido ehe lẹpo to pọmẹ ko hẹn ẹn yọnbasi na gbẹtọ livi susu lẹdo aihọn pé nado sè ‘wẹndagbe whlẹngán tọn’ lọ.—Salmu lẹ 96:2.

Be a yọ́n mẹdelẹ he a na jlo nado má wẹndagbe Ahọluduta Jiwheyẹwhe tọn hẹ, gọna lehe owẹ̀n enẹ na yinuwado sọgodo yetọn ji do ya? Kakati nado ṣí owẹ̀n ehe ji poun, má ẹn hẹ yé dile e sọgan yawu yọnbasi do!

• “Wẹndagbe” tẹwẹ dona yin lilá?

• Nawẹ Kunnudetọ Jehovah tọn lẹ to aliho he Jesu yizan nado dọyẹwheho lẹ hodo gbọn?

Hogbe lọ “gbehosọnalitọ” nọ saba dlẹnalọdo omẹ tintan he yì lẹdo yọyọ de mẹ bo hùnali na mẹdevo lẹ nado hodo. Jesu taidi gbehosọnalitọ de, na e yin didohlan aigba ji nado wà lizọnyizọn gbẹnamẹ tọn de podọ nado hùnali whlẹngán tọn dote. (Matiu 20:28) To egbehe, hodotọ etọn lẹ nọ hodo apajlẹ etọn gbọn whenu susu yiyizan dile e sọgan yọnbasi do nado ‘hẹn gbẹtọ lẹ zun devi lẹ’ dali. (Matiu 28:19, 20) Mẹdelẹ ko penugo nado tindo mahẹ to nuhe mí nọ ylọdọ sinsẹ̀nzọn gbehosọnalitọ tọn mẹ.

Gbehosọnalitọ de yin wẹndagbe-jlatọ whenu-gigọ́ tọn. Kunnudetọ Jehovah tọn lẹpo wẹ nọ lá wẹndagbe lọ. Ṣigba, mẹdelẹ ko basi tito nado sẹ̀n di gbehosọnalitọ whepoponu tọn, bo nọ yí gànhiho 70 zan to azọ́n yẹwhehodidọ tọn mẹ to sunmẹsunmẹ. Nado wà ehe, mẹsusu ko de gànmẹ he yé nọ yizan to agbasazọ́n yetọn mẹ pò. Mẹdevo lẹ ko yin dide nado sẹ̀n di gbehosọnalitọ titengbe to fie nuhudo wẹnlatọ Ahọluduta lọ tọn sù te lẹ, bo nọ yí gànhiho 130 kavi humọ zan to lizọnyizọn lọ mẹ to sunmẹsunmẹ. Gbehosọnalitọ lẹ nọ zan gbẹzan jlẹkaji tọn, bo nọ deji dọ Jehovah na wleawu dandannu gbẹ̀mẹ tọn lẹ tọn na yé. (Matiu 6:31-33; 1 Timoti 6:6-8) Mẹhe ma sọgan sẹ̀n di gbehosọnalitọ whenu-gigọ́ tọn lẹ sọgan basi gbehosọnalitọ alọgọtọ tọn to whenue yé penugo, bo hẹn gànmẹ he yé nọ yizan to azọ́n yẹwhehodidọ tọn mẹ jideji gbọn gànhiho 30 kavi 50 yiyizan to sunmẹ dali.

Owanyi na Jiwheyẹwhe po gbẹtọ lẹ po wẹ nọ whàn gbehosọnalitọ de. Taidi Jesu, mí nọ mọdọ ninọmẹ gbigbọmẹ tọn mẹsusu tọn blawu to egbehe. (Malku 6:34) Ṣigba, mí tindo oyọnẹn he sọgan gọalọna yé todin bo na yé todido he lodo na sọgodo. Owanyi na kọmẹnu wẹ nọ whàn gbehosọnalitọ de nado yí whenu po huhlọn etọn po zan sọmọ nado gọalọna mẹdevo lẹ to gbigbọ-liho. (Matiu 22:39; 1 Tẹsalonikanu lẹ 2:8) Taidi kọdetọn de, yise etọn nọ yin hinhẹn lodo, bọ e nọ dọnsẹpọ Jiwheyẹwhe dogọ bo nọ tindo ayajẹ susu.—Owalọ lẹ 20:35.

• Nawẹ hiẹ sọgan basi zẹẹmẹ sinsẹ̀nzọn gbehosọnalitọ tọn gbọn?

• Etẹwẹ nọ whàn mẹdelẹ nado basi gbehosọnalitọ whenu-gigọ́ tọn?

Nupinplọn yẹwhehọluduta tọn ko yin ohia ayidego tọn de na Kunnudetọ Jehovah tọn lẹ sọn ojlẹ dindẹn die gbọ́n. Wehọmẹ vonọtaun lẹ ko yin awuwlena na mẹhe ze yede jo to gigọ́ mẹ na azọ́n yẹwhehodidọ Ahọluduta lọ tọn lẹ, na yé nido sọgan ‘hẹn lizọnyizọn yetọn di to gigọ́ mẹ.’—2 Timoti 4:5.

Wehọmẹ Sinsẹ̀nzọn Gbehosọnalitọ tọn. Eyin gbehosọnalitọ whepoponu tọn de basi owhe dopo to sinsẹ̀nzọn whenu gigọ́ tọn mẹ, e nọ yì wehọmẹ azán ṣidopo tọn de he sọgan yin bibasi to Plitẹnhọ Ahọluduta tọn he to yakẹ de mẹ. Lẹndai wehọmẹ lọ tọn wẹ nado gọalọna gbehosọnalitọ lọ nado dọnsẹpọ Jehovah bo lẹzun azọ́nyọnẹntọ dogọ to adà lizọnyizọn lọ tọn lẹpo mẹ bosọ zindonukọn to sinsẹ̀nzọn lọ mẹ po nugbonọ-yinyin po.

Wehọmẹ Wẹndagbe-Jlatọ Ahọluduta lọ tọn lẹ tọn. Wehọmẹ he nọ yin bibasi na osun awe ehe yin awuwlena nado plọnazọ́n gbehosọnalitọ numimọnọ lẹ he tindo ojlo nado sẹtẹn sọn fihe yé nọ nọ̀ bo yì sẹ̀n to fidepope he nuhudo tin te. To aliho de mẹ, yé nọ dọ dọ, “Yẹn die! Do mi hlan” to apajlẹ Wẹndagbe-Jlatọ daho hugan he nọ aigba ji pọ́n lọ, yèdọ Jesu Klisti tọn hihodo mẹ. (Isaia 6:8; Johanu 7:29) Tẹnsisẹ yì fie dẹn do owhé sọgan biọ dọ mẹlọ ni plọn nado zan gbẹzan he bọawu. Aṣa, ninọmẹ aimẹ tọn po núdùdù lẹdo yọyọ lọ tọn po sọgan gbọnvo pete na nuhe e ko jẹakọ hẹ dai. E tlẹ sọgan biọ dọ e ni plọn ogbè yọyọ de. Wehọmẹ ehe nọ gọalọna mẹmẹsunnu po mẹmẹyọnnu tlẹnnọ lẹ po gọna asu po asi po lẹ, he tin to owhe 23 po 65 po gblamẹ, nado wleawuna jẹhẹnu gbigbọmẹ tọn lẹ he yé na tindo nuhudo etọn to azọ́ndenamẹ yetọn mẹ gọna azọ́nyinyọnẹn he na zọ́n bọ yé na yọ́n-na-yizan dogọ na Jehovah po titobasinanu etọn po.

Wehọmẹ Biblu Pinplọn Watchtower Giliadi tọn. To Heblugbe mẹ, “Giliadi” zẹẹmẹdo “Okiti Kunnudide tọn.” Sọn 1943 he Giliadi ko yin didoai, hugan gbẹtọ 8 000 wẹ ko mọ gbedewema wehọmẹ ehe tọn yí bo ko yin didohlan taidi mẹdehlan lẹ nado dekunnu “kakajẹ opodo aigba tọn lẹ” po kọdetọn dagbe po. (Owalọ lẹ 13:47) To whenue mẹdehlan mítọn tintan lẹ jẹ Pérou, agun depope ma tin to finẹ. Ṣigba todin, hugan agun 1 000 wẹ tin to finẹ. To whenue mẹdehlan mítọn lẹ jẹ azọ́nwa ji to Japon, Kunnudetọ lẹ ma pé ao to finẹ. Ṣigba todin, yé ko lán to 200 000 ji to finẹ. To azọ́nplọnmẹ osun atọ́n tọn he nọ yin mimọyi to Giliadi lọ whenu, Ohó Jiwheyẹwhe tọn nọ yin pinplọn po sọwhiwhe po. Gbehosọnalitọ titengbe lẹ, mẹdehlan he to aigba-denamẹ ji lẹ, mẹhe to sinsẹ̀n to alahọ mẹ lẹ, kavi nugopọntọ lẹdo tọn lẹ nọ yin oylọ-basina yì wehọmẹ ehe nado mọ azọ́nplọnmẹ dagbe de yí he na gọalọna yé nado yidogọna nukọnyiyi azọ́n lẹdo aihọn pé tọn lọ tọn bo hẹn ẹn gbloada.

• Etẹwẹ yin lẹndai Wehọmẹ Sinsẹ̀nzọn Gbehosọnalitọ tọn?

• Mẹnu lẹ wẹ Wehọmẹ Wẹndagbe-Jlatọ Ahọluduta lọ tọn lẹ tọn yin awuwlena?