Etẹwẹ Yin Lẹndai Jiwheyẹwhe Tọn Na Gbẹtọvi Lẹ?

Biblu dọ dọ gbẹtọvi “ma nọ nọgbẹ̀ dẹn bọ gbẹzan etọn sọ gọ́ na tukla.” (Jobu 14:1) Be nuhe Jiwheyẹwhe jlo na mí niyẹn ya? Eyin e ma yinmọ, etẹwẹ yin lẹndai Jiwheyẹwhe tọn na mí? Be lẹndai enẹ na mọ hẹndi gbede ya? Pọ́n gblọndo homẹmiọnnamẹ tọn he Biblu na lẹ.

1. Gbẹzan alọpa tẹwẹ Jehovah jlo na mí?

Jehovah jlo dọ mí ni duvivi gbẹzan dagbe hugan lọ tọn. To whenue e dá gbẹtọvi tintan lẹ, yèdọ Adam po Evi po, e ze yé do paladisi whanpẹnọ de mẹ he nọ yin jipa Edẹni tọn. Enẹgodo, “Jiwheyẹwhe dona yé bosọ dọna yé dọmọ: ‘Mì yin sinsẹ́nnọ bo sudeji bosọ gọ́ aigba ji bo dugán do e ji.’” (Jenẹsisi 1:28) Jehovah jlo dọ yé ni jivi lẹ, bo hẹn aigba lọ blebu zun paladisi de, bosọ penukundo kanlin lẹ go. Lẹndai etọn wẹ yindọ gbẹtọvi lẹpo ni tindo agbasalilo pipé bo nọgbẹ̀ kakadoi.

Nugbo wẹ dọ nulẹ ma wá yì domọ,a etomọṣo lẹndai Jiwheyẹwhe tọn ma ko diọ. (Isaia 46:10, 11) Ewọ gbẹ́ jlo dọ gbẹtọvi tonusetọ lẹ ni nọgbẹ̀ kakadoi to ninọmẹ pipé lẹ mẹ.—Hia Osọhia 21:3, 4.

2. Nawẹ mí sọgan duvivi gbẹzan dagbe de tọn gbọn todin?

Jehovah dá mí to aliho de mẹ bọ mí nọ tindo “nuhudo gbigbọmẹ tọn lẹ,” enẹ wẹ ojlo lọ nado yọ́n ewọ bosọ sẹ̀n ẹn. (Hia Matiu 5:3-6.) E jlo dọ mí ni tindo haṣinṣan pẹkipẹki de hẹ emi, ‘nọ zinzọnlin gbọn aliho etọn lẹpo ji, yiwanna ẹn,’ bosọ nọ sẹ̀n ẹn po ‘ahun mítọn lẹpo’ po. (Deutelonomi 10:12; Salmu lẹ 25:14) Eyin mí wàmọ, mí sọgan tindo ayajẹ nujọnu tọn mahopọnna nuhahun mítọn lẹ. Jehovah sinsẹ̀n nọ zọ́n bọ gbẹzan mítọn nọ yọ́n bo nọ do lẹndai tangan de.

3. Jehovah do lẹndai jiawu de na gbẹtọvi lẹ

Hò VIDEO lọ, enẹgodo dọhodo kanbiọ he bọdego ji.

VIDEO: Naegbọn Jiwheyẹwhe Do Dá Aigba?—Adà Kleun De (1:41)

• Naegbọn Jiwheyẹwhe do wleawuna planẹti whanpẹnọ mítọn?

Hia Yẹwhehodọtọ 3:11, enẹgodo dọhodo kanbiọ ehe ji:

• Etẹwẹ ehe plọn we gando Jehovah go?

4. Lẹndai Jehovah tọn ma ko diọ

Hia Salmu lẹ 37:11, 29 gọna Isaia 55:11, enẹgodo dọhodo kanbiọ ehe ji:

• Nawẹ mí wagbọn do yọnẹn dọ lẹndai Jehovah tọn na mí ma ko diọ?

5. Jehovah sinsẹ̀n nọ zọ́n bọ gbẹzan mítọn nọ tindo zẹẹmẹ nujọnu tọn

VIDEO: N’Wá Yọ́n Lẹndai Ogbẹ̀ Tọn (5:03)

• Nawẹ lẹndai ogbẹ̀ tọn yinyọnẹn hẹn ale wá na Terumi gbọn?

Hia Yẹwhehodọtọ 12:13, enẹgodo dọhodo kanbiọ ehe ji:

• Na Jehovah ko wà nususu na mí wutu, etẹwẹ mílọsu to dandannu glọ nado wà na ẹn?

BLADOPỌ

Jehovah jlo dọ mí ni duvivi ogbẹ̀ tọn kakadoi to ninọmẹ pipé lẹ mẹ to aigba ji. Eyin mí nọ sẹ̀n ewọ po ahun mítọn lẹpo po, gbẹzan mítọn na tindo zẹẹmẹ nujọnu tọn, etlẹ yin todin.

Dogbapọn

• Etẹwẹ yin lẹndai dowhenu tọn Jehovah tọn na Adam po Evi po?

• Nawẹ mí wagbọn do yọnẹn dọ lẹndai Jiwheyẹwhe tọn na gbẹtọvi lẹ ma ko diọ?

• Nawẹ gbẹzan towe sọgan do zẹẹmẹ nujọnu tọn gbọn?

PỌ́N NUDỌNAMẸ DEVO LẸ

Pọ́n kunnudenu delẹ he dohia dọ jipa Edẹni tọn nọ aimẹ pọ́n nugbonugbo.

“Jipa Edẹni Tọn—Be E Nọ Aimẹ Pọ́n Ya Kavi Otàngblo de Wẹ?” (Alọnuwe Atọ̀họ̀-Nuhihọ́ lọ Tọn, 1^er janvier 2011 tọn)

Pọ́n nuhewutu mí sọgan kudeji dọ aigba na gbọṣi aimẹ kakadoi.

“Be Aigba Na Wá Yin Vivasudo Wẹ Ya?” (Hosọ Intẹnẹt ji tọn)

Gbadopọnna nuhe Biblu dọ gando gbẹzan he do zẹẹmẹ de tintindo go.

“Etẹwẹ Yin Zẹẹmẹ Ogbẹ̀ Tọn?” (Hosọ Intẹnẹt ji tọn)

Pọ́n lehe dawe de he nọ lẹn dai dọ emi ko tindo nulẹpo, wá mọdọ nude gbẹ́ whèdo emi to gbẹzan emitọn mẹ do.

Gbẹzan Ṣie Tindo Zẹẹmẹ Todin Lo! (3:55)