NUPINPLỌN 16
Etẹlẹ Wẹ Jesu Wà Whenue E to Aigba Ji?
Mẹsusu wẹ nọ pọ́n Jesu hlan taidi viyẹyẹ pẹnyẹn-pẹnyẹn de, yẹwhegán nuyọnẹntọ de, kavi dawe de he tin to kúdonu. Amọ́ be mí sọgan plọn nususu gando Jesu go eyin mí gbadopọnna gbẹzan aigba ji tọn etọn ya? To nupinplọn ehe mẹ, mí na gbadopọnna onú titengbe delẹ he Jesu wà gọna lehe nuhe e wà lẹ sọgan gọalọna mí do.
1. Azọ́n tẹwẹ Jesu na ayidonugo hugan?
Azọ́n titengbe he Jesu wà wẹ nado “lá wẹndagbe Ahọluduta Jiwheyẹwhe tọn.” (Hia Luku 4:43.) Ewọ lá wẹndagbe lọ dọ Jiwheyẹwhe na ze ahọluduta kavi gandudu de dai, he na de nuhahun gbẹtọvi lẹ tọn sẹ̀ mlẹnmlẹn.a Jesu wazọ́n klinkán-klinkán nado lá owẹ̀n ojlofọndotenamẹ tọn ehe na owhe atọ̀n daa.—Matiu 9:35.
2. Naegbọn Jesu do wà azọ́njiawu lẹ?
Biblu basi zẹẹmẹ dọ ‘azọ́n huhlọnnọ lẹ po nujiawu lẹ po gọna ohia he Jiwheyẹwhe basi gbọn Jesu dali lẹ’ sù taun. (Owalọ lẹ 2:22) Po alọgọ huhlọn Jiwheyẹwhe tọn po, Jesu penugo nado deanana ninọmẹ aimẹ tọn lẹ, na núdùdù gbẹtọ fọtọ́n susu lẹ, hẹnazọ̀ngbọna mẹlẹ, bo tlẹ fọ́n oṣiọ lẹ sọnku. (Matiu 8:23-27; 14:15-21; Malku 6:56; Luku 7:11-17) Azọ́njiawu he Jesu wà lẹ dohia dọ Jiwheyẹwhe wẹ do e hlan nugbonugbo. Yé sọ dohia dọ Jehovah tindo huhlọn nado didẹ nuhahun mítọn lẹ mlẹnmlẹn.
3. Etẹwẹ mí sọgan plọn sọn aliho he mẹ Jesu zan gbẹzan etọn te mẹ?
Jesu setonuna Jehovah to ninọmẹ lẹpo mẹ. (Hia Johanu 8:29.) Mahopọnna nukundiọsọmẹ he Jesu pehẹ lẹ, e yin nugbonọ bo wà nuhe Otọ́ etọn biọ to e si lẹpo kakajẹ okú. Ewọ dohia dọ e yọnbasi dọ gbẹtọvi lẹ ni sẹ̀n Jiwheyẹwhe, eyin yé tlẹ pehẹ ninọmẹ sinsinyẹn lẹ. Gbọnmọ dali, Jesu ze “apajlẹ de dai na [mí, na mí] nido hodo afọdòmẹ etọn lẹ pẹkipẹki.”—1 Pita 2:21.
DINDONANU DOGỌ
Pọ́n lehe Jesu lá wẹndagbe lọ bosọ wà azọ́njiawu lẹ do.
4. Jesu lá wẹndagbe lọ
Jesu zọ̀n afọ na kilomẹtlu kanweko susu gbọn ali he gọ́ na afínfín lẹ ji, nado yì lá wẹndagbe lọ na mẹsusu dile e sọgan yọnbasi do. Hia Luku 8:1, enẹgodo dọhodo kanbiọ ehelẹ ji:
Be mẹhe pli yede dopọ nado dotoaina Jesu lẹ kẹdẹ wẹ e lá wẹndagbe lọ na ya?
Vivẹnu tẹlẹ wẹ e do nado dín gbẹtọ lẹ mọ?
Jiwheyẹwhe ko dọ jẹnukọn dọ Mẹsia lọ na lá wẹndagbe lọ. Hia Isaia 61:1, 2, enẹgodo dọhodo kanbiọ ehelẹ ji:
Nawẹ dọdai ehe mọ hẹndi gbọn Jesu gblamẹ gbọn?
Be a lẹndọ gbẹtọ lẹ gbẹ́ tindo nuhudo wẹndagbe lọ tọn to egbehe ya?
5. Jesu plọnmẹ nugbo họakuẹ lẹ
Gbọnvona dọ Jesu dọyẹwheho wẹndagbe Ahọluduta Jiwheyẹwhe tọn, e sọ plọnmẹ onú titengbe devo lẹ. Gbadopọnna apajlẹ delẹ sọn Yẹwhehodidọ Osó ji tọn etọn he mẹsusu yọnẹn lọ mẹ. Hia Matiu 6:14, 34 gọna 7:12, enẹgodo dọhodo kanbiọ ehelẹ ji:
Ayinamẹ dagbe tẹlẹ wẹ Jesu na to wefọ ehelẹ mẹ?
Be a lẹndọ ayinamẹ ehelẹ gbẹ́ yọ́n-na-yizan ya?
6. Jesu wà azọ́njiawu lẹ
Jehovah na huhlọn Jesu nado wà azọ́njiawu susu lẹ. Nado mọ dopo to yé mẹ, hia Malku 5:25-34 kavi hò VIDEO lọ. Enẹgodo, dọhodo kanbiọ ehelẹ ji.
Nujikudo tẹwẹ yọnnu he to azọ̀njẹ lọ tindo?
Etẹwẹ a yiwanna hugan gando azọ́njiawu lọ go?
Hia Johanu 5:36, enẹgodo dọhodo kanbiọ ehe ji:
‘Kunnudenu’ kavi ohia etẹ tọn wẹ azọ́njiawu Jesu tọn lẹ yin?
Be a yọnẹn ya?
Suhugan nudọnamẹ he mí yọnẹn gando Jesu go lẹ tọn wẹ wá sọn owe Wẹndagbe tọn ẹnẹ lẹ mẹ, yèdọ Matiu, Malku, Luku, po Johanu po. Dopodopo Wẹndagbe-kantọ lọ lẹ tọn wẹ na nudọnamẹ voovo lẹ gando Jesu go. Nudọnamẹ he yemẹpo na to pọmẹ lẹ basi bladopọ gbẹzan aigba ji tọn Jesu tọn.
MATIU
wẹ kàn owe Wẹndagbe tọn tintan. E zinnudo nuplọnmẹ Jesu tọn lẹ ji, titengbe nuhe e plọnmẹ gando Ahọluduta Jiwheyẹwhe tọn go lẹ.
MALKU
wẹ kàn owe Wẹndagbe tọn he whè hugan lọ. E bẹ kandai nujijọ ojlofọndotenamẹ tọn susu hẹn.
LUKU
zinnudo nujọnu-yinyin odẹ̀ tọn po lehe Jesu yinuwa hẹ yọnnu lẹ do po ji.
JOHANU
donù hodọdopọ he Jesu tindo hẹ họntọn vivẹ́ etọn lẹ po mẹdevo lẹ po go, nado do jẹhẹnu he ewọ tindo lẹ hia.
MẸDELẸ NỌ DỌ DỌ: “Dawe dagbe de poun wẹ Jesu yin, e ma humọ.”
Etẹwẹ a lẹn?
BLADOPỌ
Jesu dọyẹwheho gando Ahọluduta Jiwheyẹwhe tọn go, wà azọ́njiawu lẹ, bosọ setonuna Jehovah to ninọmẹ lẹpo mẹ.
Dogbapọn
Azọ́n tẹwẹ Jesu na ayidonugo hugan to aigba ji?
Etẹwẹ azọ́njiawu he Jesu wà lẹ dohia?
Onú titengbe tẹlẹ wẹ Jesu plọnmẹ?
PỌ́N NUDỌNAMẸ DEVO LẸ
Etẹ ji wẹ Jesu zinnudo hugan to nuplọnmẹ etọn lẹ mẹ?
Pọ́n nuhewutu mí do kudeji dọ azọ́njiawu he Jesu wà lẹ wá aimẹ nugbo.
“Azọ́njiawu He Jesu Wà lẹ—Etẹwẹ Yé Plọn We?” (Atọ̀họ̀-Nuhihọ́ lọ Tọn, 15 juillet 2004 tọn)
Pọ́n lehe gbigbọ mẹde-yido-sanvọ́ tọn he Jesu dohia yinuwado dawe de ji do.
“Onú Dee Tọn Janwẹ Nọ Duahunmẹna Mi” (Alọnuwe Atọ̀họ̀-Nuhihọ́ lọ Tọn, 1er octobre 2014 tọn)
Pọ́n onú titengbe delẹ he Jesu wà, gọna ojlẹ he mẹ e wà yé te debọdo-dego.
“Gbẹzan Aigba ji Tọn Jesu Tọn” (Owe-Wiwe lẹ—Lẹdogbedevomẹ Aihọn Yọyọ Tọn, Nudọnamẹ Dogọ A7)
a Nupinplọn 31-33 na dọho susu do Ahọluduta Jiwheyẹwhe tọn ji.