Nawẹ Klistiani lẹ Dona Nọ Yinuwa Gando Ahàn Sinsinyẹn Go Gbọn?

Lẹdo aihọn pé, pọndohlan voovo wẹ gbẹtọ lẹ nọ tindo gando ahàn sinsinyẹn go. Mẹdelẹ nọ yiwanna nado nù ahàn sinsinyẹn dopo vlavo hẹ họntọn lẹ. Mẹdevo lẹ nọ de ma nado nù in paali. Ṣigba, mẹdevo lẹ nọ nù kaka bo nọ mú. Etẹwẹ Biblu dọ gando ahàn sinsinyẹn go?

1. Be e ylan nado nọ nù ahàn sinsinyẹn wẹ ya?

Biblu ma jẹagọdo ahàn sinsinyẹn nùnù. E tlẹ donù “ovẹn he nọ hẹn gbẹtọ jaya” go to whenue e to onú dagbedagbe he Jiwheyẹwhe na mí lẹ slẹ. (Salmu lẹ 104:14, 15) Delẹ to sunnu po yọnnu po nugbonọ he yin nùdego to Biblu mẹ lẹ mẹ nù ahàn sinsinyẹn.—1 Timoti 5:23.

2. Ayinamẹ tẹlẹ wẹ Biblu na mẹhe de nado nọ nù ahàn sinsinyẹn lẹ?

Jehovah gblewhẹdo mẹhe nọ nùahàn zẹjlẹgo po mẹhe nọ nùahànmú lẹ po. (Galatianu lẹ 5:21) Ohó etọn dọmọ: “A tin to mẹhe nọ nù ovẹn susu lẹ ṣẹnṣẹn blo.” (Howhinwhẹn lẹ 23:20) Enẹwutu, eyin mí de nado nù ahàn sinsinyẹn—etlẹ yin to whenue mí to míde ṣo—mí ma dona nọ nù zẹjlẹgo sọmọ bọ mí ma na penugo nado nọ lẹnnupọn ganji ba, kavi ma nado yọ́n nuhe dọ mí te kavi wà mí te lẹ ba, kavi nado hẹn awugblena míde to agbasa-liho. Eyin e nọ vẹawuna mí nado nù ahàn sinsinyẹn do jlẹkaji, be mí dona wleawufo nado dapana ahàn sinsinyẹn nùnù mlẹnmlẹn.

3. Nawẹ mí gán nọ na sisi nudide he mẹdevo lẹ basi gando ahàn sinsinyẹn go lẹ gbọn?

Mẹdopodopo wẹ dona de eyin e na nù ahàn sinsinyẹn kavi lala. Mí ma dona dawhẹna mẹhe de nado nù ahàn sinsinyẹn do jlẹkaji lẹ, mọjanwẹ mí masọ dona hẹn mẹhe gbẹ́ ma nado nù in de gánnugánnu nado nù do niyẹn. (Lomunu lẹ 14:10) Mí gán de ma nado nù ahàn sinsinyẹn eyin mọwiwà sọgan dotukla mẹdevo lẹ. (Hia Lomunu lẹ 14:21.) Na mí nọ dín “e ma yin ale [míde titi] tọn gba, ṣigba dehe yin mẹdevo tọn.”—Hia 1 Kọlintinu lẹ 10:23, 24.

DINDONANU DOGỌ

4. Basi dide eyin a na nù kavi gbọ

Nukun tẹwẹ Jesu nọ yí do pọ́n ahàn sinsinyẹn nùnù? Nado mọ gblọndo lọ, gbadopọnna azọ́njiawu tintan he e wà. Hia Johanu 2:1-11, enẹgodo dọhodo kanbiọ ehelẹ ji:

• Etẹwẹ azọ́njiawu ehe plọn mí gando nukun he Jesu nọ yí do pọ́n ahàn sinsinyẹn po mẹhe nọ nù in lẹ po go?

• To whenuena e yindọ Jesu ma jẹagọdo ahàn sinsinyẹn nùnù, nukun tẹwẹ Klistiani de dona nọ yí do pọ́n mẹhe de nado nọ nù?

Amọ́, nugbo lọ dọ Klistiani de vò nado nù ahàn sinsinyẹn, ma dohia dọ nuyọnẹnnu wẹ e yin nado nọ wàmọ whẹwhẹ. Hia Howhinwhẹn lẹ 22:3, enẹgodo lẹnnupọndo nudide he a gán basi gando ahànnunu go to ninọmẹ he bọdego lẹ mẹ ji:

• A jlo na kùnhún kavi penukundo zomọ de go.

• A yin hohonọ de.

• Doto de na we ayinamẹ ma nado nù ahàn sinsinyẹn.

• E nọ vẹawuna we nado nùahàn do jlẹkaji.

• Osẹ́n ma na we gbè nado nù ahàn sinsinyẹn.

• A topọ hẹ mẹde he de ma nado nù, na e ma fá whẹpo e do yí ede sọn ahànnunu zẹjlẹgo si wutu.

Be a dona hẹn ahàn sinsinyẹn tin-to-aimẹ to jonọyiyi hùnwhẹ alọwle tọn de whenu kavi to nuwiwa devo lẹ tẹnmẹ wẹ ya? Nado mọ nuhe na gọalọna we nado yọ́n nudide he a na basi, hò VIDEO lọ.

VIDEO: Be N’Dona Nọ Whlé Ahàn Sinsinyẹn Mẹdevo lẹ Wẹ Ya? (2:41)

Hia Lomunu lẹ 13:13 gọna 1 Kọlintinu lẹ 10:31, 32. To wefọ dopodopo hihia godo, dọhodo kanbiọ ehe ji:

• Nawẹ nunọwhinnusẹ́n ehe yíyí-do-yizan mẹ sọgan gọalọna we nado basi nudide he na hẹn homẹ Jehovah tọn hùn gbọn?

5. Basi nudide obá he mẹ a na nọ nù jẹ tọn

Eyin a de nado nù ahàn sinsinyẹn, flin ehe: Dile etlẹ yindọ Jehovah ma jẹagọdo ahàn sinsinyẹn nùnù, e dosẹ́n gando ahànnunu zẹjlẹgo go. Etẹwutu? Hia Hosea 4:11, 18, enẹgodo dọhodo kanbiọ ehe ji:

• Etẹwẹ gán jọ eyin mẹde nùahàn zẹjlẹgo?

Nawẹ mí gán dapana ahàn susu nùnù gbọn? Mí dona nọ yin jlẹkajinọtọ kavi nọ yọ́n dogbó mítọn lẹ. Hia Howhinwhẹn lẹ 11:2, enẹgodo dọhodo kanbiọ ehe ji:

• Naegbọn e do yọ́n nado nọ ze dogbó de dai gando obá he mẹ mí na nùahàn jẹ go?

6. A gán duto ahàn sinsinyẹn ṣiṣizan ji

VIDEO: ‘Gbẹzan Ṣie Wá Ṣì Mi Pete’ (6:32)

• Nawẹ Dmitry nọ yinuwa gbọn eyin e nù ahàn sinsinyẹn?

• Be e pà ẹ nado yawu duto ahàn sinsinyẹn nùnù ji ya?

• Nawẹ e wá penugo nado yí ede sọn afanumẹ-yinyin na ahàn sinsinyẹn si gbọn?

Hia 1 Kọlintinu lẹ 6:10, 11, enẹgodo dọhodo kanbiọ ehelẹ ji:

• Obá tẹ mẹ wẹ ahànnumu ylan jẹ?

• Etẹwẹ dohia dọ mẹhe nọ ṣì ahàn sinsinyẹn zan de gán diọ?

Hia Matiu 5:30, enẹgodo dọhodo kanbiọ ehe ji:

• Whenue Jesu dọ to apajlẹ lọ mẹ dọ yè ni sán alọ mẹtọn sẹ̀, didọ wẹ e te dọ e sọgan biọ dọ mí ni yí nudelẹ do sanvọ́ nado hẹn homẹ Jehovah tọn hùn. Etẹwẹ a gán wà eyin a to vivẹnudo nado duto ahàn sinsinyẹn ṣiṣizan ji bọ e ma to pipà we?a

Hia 1 Kọlintinu lẹ 15:33, enẹgodo dọhodo kanbiọ ehe ji:

• Nawẹ hagbẹ lẹ gán yinuwado obá he mẹ a nọ nùahàn jẹ ji gbọn?

BLADOPỌ

Jehovah na mí ahàn sinsinyẹn na e nido nọ hẹn awuvivi wá na mí, amọ́ e jẹagọdo ahànnunu zẹjlẹgo po ahànnumu po.

Dogbapọn

• Etẹwẹ Biblu dọ gando ahàn sinsinyẹn go?

• Owù tẹlẹ wẹ to e mẹ eyin mẹde nọ nùahàn susu?

• Nawẹ mí gán na sisi nudide he mẹdevo lẹ basi gando ahànnunu go gbọn?

PỌ́N NUDỌNAMẸ DEVO LẸ

Nawẹ jọja aflanmẹ lẹ gán basi nudide dagbe lẹ gando ahàn sinsinyẹn go gbọn?

Nọ Lẹnnupọn Whẹpo Do Nùahàn (2:31)

Gbadopọnna afọdide delẹ he a gán ze nado duto ahàn sinsinyẹn ṣiṣizan ji.

“Jlẹkajininọ Gando Ahàn Sinsinyẹn Nùnù Go” (Alọnuwe Atọ̀họ̀-Nuhihọ́ lọ Tọn, 1^er janvier 2010 tọn)

Be Klistiani de dona nọ hò kọfo ahàn tọn etọn do mẹdevo tọn go wẹ ya?

“Kanbiọ lẹ sọn Wehiatọ lẹ Dè” (Atọ̀họ̀-Nuhihọ́ lọ Tọn, 15 février 2007 tọn)

To otàn lọ “Ahànnugungun-In de Poun Wẹ N’Yin Dai” mẹ, pọ́n lehe dawe de duto ahàn sinsinyẹn ṣiṣizan ji do.

“Biblu Nọ Diọ Gbẹzan Mẹtọn” (Alọnuwe Atọ̀họ̀-Nuhihọ́ lọ Tọn, 1^er mai 2012 tọn)