Kanbiọ Wehiatọ Mítọn lẹ Tọn

Naegbọn Jiwheyẹwhe Do Jotẹnna Yajiji?

E ma yin Jiwheyẹwhe wẹ nọ hẹn yajiji wá gbẹtọvi lẹ ji gba. Biblu dọmọ: “E ni tin dẹn do Jiwheyẹwhe, na ewọ na do wà ylankan.” (Job 34:10) Eyin mọ wẹ, mẹnu wẹ yin dowatọ yajiji tọn?

Jesu ylọ Satani dọ “ahọvi aihọn tọn.” (Johanu 14:30) Nugbo wẹ dọ Jehovah wẹ Nupojipetọ Wẹkẹ tọn. E ma na jo otẹn enẹ do gbede. Ṣigba, Jiwheyẹwhe ko jotẹnna Satani nado dugán do suhugan gbẹtọ lẹ tọn ji na ojlẹ de.—1 Johanu 5:19.

Ogán nankọ wẹ Satani ko do ede hia nado yin? Sọn gbeegbe Satani ko dọho hẹ gbẹtọvi lẹ to tintan whenu gbọ́n wẹ e ko do ede hia nado yin hlọnhutọ po mẹklọtọ de po. Aliho susu mẹ wẹ Satani nọ hẹnnugble to gbẹtọ lẹ go te. Jesu dọho gandego dọmọ: “Hlọnhutọ de wẹ ewọ sọn whẹwhẹwhenu, e ma nọ nọte to nugbo mẹ gbede, na nugbo ma tin to ewọ mẹ wutu. Whenuena e dọ lalo de, e dọho etọn titi tọn: na lalonọ de wẹ ewọ, podọ otọ́ etọn.” (Johanu 8:44) Jesu sọ dọ dọ ovi hlọnhutọ tintan lọ tọn wẹ mẹhe to tintẹnpọn nado hù i lẹ. Yé hẹn yede zun ovi etọn lẹ gbọn nuyiwa taidi ewọ dali. Dile gbẹtọ lẹ nọ dọ do to paa mẹ, nuhe ovi mọ to otọ́ si wẹ e nọ wà.

Satani gbẹ́ nọ dó gbigbọ hlọnhuhu tọn do ahun gbẹtọvi lẹ tọn mẹ. Di apajlẹ, R. J. Rummel he yin mẹplọntọ Wehọmẹ Alavọ Hawaï, États-Unis tọn dai dọ dọ sọn 1900 jẹ 1987, gandudu voovo lẹ hù gbẹtọ 169 198 000 to hunyanhunyan tonudidọ tọn, nuyiwa akọ̀ vivasudo po mẹhuhu matin whẹwhinwhẹ́n po tọn lẹ mẹ. Sọha enẹ ma bẹ gbẹtọ livi susu he yin hùhù to awhàngbenu to ojlẹ dopolọ gblamẹ lẹ hẹn gba.

Eyin Jiwheyẹwhe ma nọ hẹn yajiji wá, naegbọn e do jotẹnna ẹn? Na whẹho nudide dagbe po oylan po tọn he gando nudida lẹpo go he yin finfọndote to ojlẹ dindẹn die lẹ dona yin dididẹ wutu wẹ. Mì gbọ mí ni gbadopọnna dopo poun to whẹho ehelẹ mẹ.

To bẹjẹeji whenuho gbẹtọvi tọn, Adam po Evi po kọnawudopọ hẹ Satani. Yé gbẹ́ gandudu Jiwheyẹwhe tọn dai bo de nado dugán do yede ji, ehe na taun tọn zẹẹmẹdo nado yin gandudeji gbọn Lẹgba dali.—Gẹnẹsisi 3:1-6; Osọhia 12:9.

Whẹdida dodo Jehovah tọn biọ dọ ewọ ni na whenu he pé na kunnudenu lẹ nido họnwun. Tadona he ma sọgan yin agọjẹdo tẹ kọ̀n wẹ mí wá? Gandudu gbẹtọvi tọn to nuyiwadomẹji Satani tọn glọ ma nọ hẹn nudevo wá hugan yajiji. Nado dọ hójọhó, dile ojlẹ to yìyì, whenu he Jiwheyẹwhe jodo lọ ko sọawuhia nado yin na ale gbẹtọvi lẹ tọn. Gbọnna? Mẹhe plọnnu dogbọn kunnudenu lọ lẹ dali bo yí yé sè lẹ nọ tindo dotẹnmẹ hundote lọ nado do ojlo yetọn hia nado yin anadena gbọn Jiwheyẹwhe dali. Mẹhe plọn nujinọtedo Jiwheyẹwhe tọn bo nọgbẹ̀ sọgbe hẹ yé lẹ tindo todido lọ nado nọgbẹ̀ kakadoi.—Johanu 17:3; 1 Johanu 2:17.

Nugbo wẹ dọ todin whẹ́, aihọn lọ tin to anademẹ ylankan Satani tọn glọ. Ṣigba azán kaka de ma pò to gbàn ji na ẹn gba. To madẹnmẹ Jehovah na yí Ovi etọn zan nado “gbà azọ́n [Lẹgba] tọn sudo.” (1 Johanu 3:8) To anademẹ Jiwheyẹwhe tọn glọ, Jesu na hẹnazọ̀ngbọna mẹhe to yaji to numọtolanmẹ-liho lẹ bo jla ninọmẹ lẹ do to gbẹzan gbẹtọ lẹ tọn mẹ. Ewọ na fọ́n liva susu gbẹtọvi he ko jiya bo kú to owhe kanweko lẹ gblamẹ sọnku.—Johanu 11:25.

Fọnsọnku Jesu tọn yin apajlẹ de he do lehe Jiwheyẹwhe nọ gbawhàn azọ́n Lẹgba tọn lẹ tọn do hia—yèdọ ohia kleun de gando nuhe to nukọn ja na gbẹtọvi he kẹalọyi gandudu Jiwheyẹwhe tọn lẹ go. (Owalọ lẹ 17:31) Biblu gọalọna mí nado pọnnukọnhlan ojlẹ enẹ po hogbe homẹmiọnnamẹ tọn ehelẹ po dọmọ: “Jiwheyẹwhe lọsu nasọ nọhẹ [gbẹtọvi lẹ], bo nasọ yin Jiwheyẹwhe yetọn. Jiwheyẹwhe nasọ súnsún dasin lẹpo sẹ̀ sọn nukun yetọn mẹ; okú ma nasọ tin ba, kavi awubla, kavi avi, mọ awufiẹsa ma na tin ba: na onú tintan lẹ ko juwayi.”—Osọhia 21:3, 4.