Jehovah Jlo Dọ Hiẹ Ni Yin Hihọ́-Basina — WESẸDOTẸN INTẸNẸT JI TỌN Watchtower Tọn

Jehovah Jlo Dọ Hiẹ Ni Yin Hihọ́-Basina

WHENUENA nujijọ he ylan hugan to whenuho mẹ na gbajẹgbonu, Jiwheyẹwhe Ganhunupotọ na hẹn ẹn diun dọ mẹhe tindo nukundagbe etọn lẹpo “wẹ yè na whlẹngán” kavi yin hihọ́-basina. (Joẹ. 2:32) Na nugbo tọn, Jehovah nọ jlo nado basi hihọ́na gbẹtọ lẹ sọn owù mẹ to whepoponu. To whenuena e yindọ ewọ wẹ “asisa ogbẹ̀ tọn,” e nọ pọ́n gbẹtọvi lẹpo taidi nuhọakuẹ, ehe jẹ nado yin hihọ́-basina.—Ps. 36:9.

Devizọnwatọ nugbonọ Jiwheyẹwhe tọn hohowhenu tọn lẹ lọsu tindo pọndohlan etọn gando ogbẹ̀ go. Sọgbe hẹ Gẹnẹsisi 33:18, Jakọbu po whẹndo etọn po zingbejizọnlin owùnọ de, bo dotana ẹn to “jijọho” mẹ. Jakọbu deji dọ Jehovah na basi hihọ́ na emi, ṣigba e sọ ze afọdide dagbe delẹ nado basi hihọ́na mẹhe zingbejizọnlin hẹ ẹ lẹpo. (Gẹn. 32:7, 8; 33:14, 15) Gbọn nunọwhinnusẹ́n Biblu tọn lẹ hihodo dali, hiẹ sọgan hẹn aliho he mẹ a nọ basi hihọ́na dewe gọna mẹdevo lẹ te pọnte dogọ. Mì gbọ mí ni pọ́n lehe nugbo ehe gando mẹhe nọ wazọ́n to Plitẹnhọ Ahọluduta tọn gbigbá tẹnmẹ lẹ po mẹhe nọ wà azọ́n mọnkọtọn devo lẹ po gọna mẹhe nọ gọalọ to nugbajẹmẹji whenu lẹ go do.

Hihọ́—to Osẹ́n Mose Tọn Glọ

Osẹ́n Mose tọn bẹ nunọwhinnusẹ́n hihọ́-basinamẹ tọn lẹ hẹn, he omẹ Jiwheyẹwhe tọn lẹ dona hodo. Di apajlẹ, Islaelivi he gbá ohọ̀ de dona basi oglọn kavi adó he yìdo de lẹdo tónu họta etọn tọn. Na gbẹtọ lẹ nọ saba nọ họta ohọ̀ yetọn tọn wutu, oglọn lọ nọ basi hihọ́na yé ma nado flẹ jai. (1 Sam. 9:26; Mat. 24:17) Eyin osẹ́n hihọ́-basinamẹ tọn ehe ma yin hihodo bọ mẹde gbleawu, whétọ lọ na dogbè na Jehovah.—Deut. 22:8.

Osẹ́n lọ sọ bẹ yasanamẹ lẹ hẹn gando whékanlin he gbleawunamẹ lẹ go ga. Eyin oyìn de sọ́ azò mẹde bọ mẹlọ kú, klunọ etọn dona hù i nado sọgan basi hihọ́na mẹdevo lẹ. Na e ma sọgan dù olàn etọn kavi sà ẹ wutu, nuhẹngu daho wẹ e na yin na ẹn nado hù i. Ṣigba etẹwẹ na jọ eyin oyìn de gbleawuna mẹde bọ klunọ etọn ma glọn ẹn do apó mẹ? Eyin oyìn dopolọ sọ wá hù mẹde, oyìn lọ po klunọ etọn po na yin hùhù. Osẹ́n enẹ gọalọna mẹdepope he tindo ayilinlẹn lọ nado dovọ́na kanlin-yìnyìn etọn nado lẹnnupọndo nuyiwa etọn ji.—Eks. 21:28, 29.

Osẹ́n lọ sọ namẹ tuli nado nọ zan azọ́nwanu lẹ to aliho dagbe mẹ. Islaelivi susu wẹ nọ yí asiọvi do sán nake. Eyin asiọvi lọ sún sọn akún etọn nù to ajiji mẹ bo hù mẹhe sẹpọ finẹ de, mẹhe to nake sán lọ dona họnyi tòdaho fibẹtado tọn de mẹ. Osẹ́n lọ biọ dọ e dona gbọṣi finẹ kakajẹ okú yẹwhenọ daho tọn whenu, ehe sọgan zẹẹmẹdo dọ mẹhe hùmẹ to mayọnẹn mẹ de ni nọla na whẹndo po owhé etọn po na owhe susu. Tito enẹ plọn akọta lọ dọ ogbẹ̀ yin onú wiwe to nukun Jehovah tọn mẹ. Mẹhe tindo pọndohlan Jiwheyẹwhe tọn gando ogbẹ̀ go lẹ nọ hẹn ẹn diun dọ azọ́nwanu yetọn lẹ tin to ganji bo ma nọ dike yé ni gbleawunamẹ.—Sọh. 35:25; Deut. 19:4-6.

Gbọn osẹ́n mọnkọtọn lẹ nina dali, Jehovah hẹn họnwun hezeheze dọ omẹ emitọn lẹ dona nọ yinuwa po aṣejininọ po to owhé yetọn gbè podọ to fidevo lẹ. Mẹhe hẹn okú po awugble po wá mẹdevo lẹ ji, etlẹ yin gbọn kosọ dali lẹ, na dogbè na ẹn dandan. Pọndohlan Jehovah tọn gando hihọ́ go ma ko diọ gba. (Mal. 3:6) Ewọ gbẹ́ jlo dọ gbẹtọ lẹ ni nọ dapana awugble hinhẹnwa yede po mẹdevo lẹ po ji. Ehe dona nọ duahunmẹna mí titengbe to whenue mí to nọtẹn he yin kinklandowiwe na sinsẹ̀n-bibasi nugbo etọn lẹ gbá kavi to nukunpedo yé go.

Hihọ́—to Azọ́n Họgbigbá Tọn lẹ Whenu

Mí nọ mọ ẹn taidi lẹblanulọkẹyi daho de nado gbá Plitẹnhọ Ahọluduta tọn lẹ, Plitẹnhọ Plidopọ tọn lẹ, po alahọ lẹ po bosọ penukundo yé go. Pọndohlan dopolọ wẹ mí nọ tindo gando azọ́n he mí nọ wà to whenuena nugbajẹmẹji de jọ lẹ go. Ojlo mítọn wẹ e nọ yin to whepoponu nado wazọ́n taidi azọ́nyọnẹntọ he bikan, na eyin mí ma wazọ́n ganji, etlẹ yin to azọ́n flinflin lẹ mẹ, enẹ sọgan hẹn awugble wá míwlẹ kavi mẹdevo lẹ ji. (Yẹwh. 10:9) Na nugbo tọn, eyin mí hẹn ẹn zun aṣa nado nọ wazọ́n po aṣejininọ po, mí na dapana awugble susu.

Biblu dọmọ: “Gigo dẹpẹ lẹ tọn wẹ huhlọn yetọn: aṣọ́ yọnhonọ lẹ tọn wẹ owhà.” (Howh. 20:29) Mí nọ tindo nuhudo huhlọn jọja-whenu tọn nado sọgan wà azọ́n sinsinyẹn lẹ. Ṣigba azọ́nwatọ numimọnọ lẹ—yèdọ mẹhe ko dẹn to azọ́n họgbigbá tọn mẹ lẹ—nọ yí alọ po azọ́nwanu yetọn lẹ po do wà azọ́n tadona tọn susu lẹ po sọwhiwhe po. To ojlẹ de mẹ wayi, mẹhe tindo owhe susu todin lẹ ko yí huhlọn jọja-whenu tọn yetọn zan nado wà azọ́n sinsinyẹn lẹ. Eyin azọ́nwatọ mẹdezejotọ yọyọ de wẹ hiẹ yin, nọ doayi lehe azọ́nwatọ numimọnọ lẹ nọ wazọ́n do go, bo nọ hodo anademẹ yetọn lẹ. Eyin hiẹ tindo ojlo nado plọnnu, mẹmẹsunnu he tindo numimọ to azọ́n họgbigbá tọn mẹ lẹ na plọn we nususu. Yé nasọ gọalọna we nado yọ́n lehe hiẹ na zan nuhe sọgan gbleawunamẹ lẹ, po lehe hiẹ na ze agbàn pinpẹn lẹ bo ma na gbleawu do po. Gbọnmọ dali hiẹ na wà azọ́n dagbe lẹ, bo ma na gbleawu, bo nasọ gọ́ na ayajẹ.

Mẹhe to azọ́nwa to họgbigbá tẹnmẹ lẹ dona nọ tin to aṣeji to whepoponu. Ninọmẹ nulẹ tọn nọ yawu diọ. Odò de sọgan ko yin kùnkùn do fie odò depope ma te dai. Azọ́nwatọgbẹ́ devo sọgan ko sẹtẹnna aliyá de, owhlẹ de, kavi sẹ̀n-panu de. Eyin hiẹ ma tin to aṣeji, a sọgan yawu gbleawu. Nunọwhinnusẹ́n hihọ́-basinamẹ tọn lẹ nọ saba biọ dọ mẹhe to azọ́nwa to họgbigbá tẹnmẹ lẹ ni zan nuhe nọ basi hihọ́namẹ lẹ. Gànnukun hihọ́-basinamẹ tọn, okágbakun, po afọpa he jẹ lẹ po sọgan basi hihọ́na we sọn owù susu si dile hiẹ to azọ́nwa to họgbigbá de tẹnmẹ. Ṣigba kiki eyin yé tin to ninọmẹ dagbe mẹ bọ hiẹ nọ yí yé zan wẹ yé nado basi hihọ́na we.

Dile etlẹ yindọ azọ́nwanu susu nọ taidi nuhe bọawu nado yizan, e nọ biọ dọ mẹde ni plọn lehe yè nọ zan yé po azọ́nyinyọnẹn po do bọ yé ma nado gbleawunamẹ. Eyin hiẹ ma yọ́n alọ azọ́nwanu de tọn, dọna mẹmẹsunnu he to nukunpedo azọ́n lọ go. Ewọ na basi tito na mẹde nido plọn we. Eyin hiẹ yọ́n fie nugopipe towe jẹ, ehe na gọalọna we taun. Na nugbo tọn, nugopipe towe yinyọnẹn na gọalọna we nado dapana awugble hinhẹnwa dewe po mẹdevo lẹ po ji to azọ́n họgbigbá tọn lẹ tẹnmẹ.—Howh. 11:2.

Aijijẹ wẹ nọ hẹn awugble wá hugan to azọ́n họgbigbá tọn lẹ tẹnmẹ. Whẹpo hiẹ nido hẹ́ aliyá de ji, hẹn ẹn diun dọ e sinai ganji bo tin to ninọmẹ dagbe mẹ. Eyin hiẹ dona nọ owhlẹ he yin gigla ji to aga nado wazọ́n kavi wazọ́n to họta, e sọgan biọ dọ a ni dó okàn he ko yin sìnsìn do nude go lẹ dewe ma nado jai kavi dọ oglọn de ni yin bibasi lẹdo we nado basi hihọ́na we. Eyin hiẹ tindo kanbiọ de gando azọ́nwiwa to fie yiaga lẹ go, kanhose mẹhe to nukunpedo azọ́n lọ go.a

Dile sọha mẹhe to Jehovah sẹ̀n lẹ tọn to susudeji lẹdo aihọn pé, mọ wẹ nuhudo to tintin na Plitẹnhọ Ahọluduta tọn gbigbá po nọtẹn he nọ yin yiyizan nado nọgodona sinsẹ̀n-bibasi nugbo po do niyẹn. Mẹhe nọ penukundo azọ́n Plitẹnhọ Ahọluduta tọn gbigbá po azọ́n mọnkọtọn lẹ po go lẹ tindo azọngban lọ nado basi hihọ́na lẹngbọ họakuẹ Jehovah tọn he to azọ́nwa to anademẹ yetọn glọ lẹ. (Isa. 32:1, 2) Eyin hiẹ tindo lẹblanulọkẹyi lọ nado deanana mẹmẹsunnu po mẹmẹyọnnu towe lẹ po to azọ́n họgbigbá tọn de tẹnmẹ, ma wọnji gbede dọ nujọnu wẹ e yin nado basi hihọ́na yé blo. Hẹn ẹn diun dọ nọtẹn lọ tin to wiwe ji, bọ nuhe ma yin dandan tọn lẹpo yin didesẹ. Nọ dọhodo nunọwhinnusẹ́n hihọ́-basinamẹ tọn lẹ ji na mẹhe tindo nuhudo nuflinmẹ tọn lẹ to aliho he jọmẹ de mẹ, ṣigba po nujikudo po. Ma dike jọja kavi azọ́nwatọ he ma tindo numimọ lẹ ni biọ fie tindo owù hugan lẹ blo. Lẹnnupọndo owù he azọ́nwatọ lọ lẹ sọgan pehẹ lẹ ji jẹnukọn, bo plọn yé lehe yé na nọ wazọ́n po mẹdehihọ́ po do. Flindọ yanwle mítọn wẹ nado dotana azọ́n lọ matin awugble.

Adà He Owanyi Nọ Yiwà

Plitẹnhọ Ahọluduta tọn po ohọ̀ devo he nọ yin yiyizan na sinsẹ̀n-bibasi nugbo po lẹ gbigbá bẹ azọ́n he tindo owù delẹ hẹn. Enẹwutu, mẹhe nọ tindo mahẹ to azọ́n mọnkọtọn lẹ mẹ dona nọ nọ̀ aṣeji. Eyin hiẹ nọ hodo nunọwhinnusẹ́n Biblu tọn lẹ, nọ setonuna anademẹ he yin nina gando azọ́n lọ go lẹ, bosọ nọ yí wuntuntun zan, hiẹ na dapana owù bo nasọ basi hihọ́na azọ́nwatọ hatọ towe lẹ sọn awugble si.

Etẹwẹ yin whẹwhinwhẹ́n tangan he wutu mí nọ yí nukun nujọnu tọn do pọ́n whẹho hihọ́-basinamẹ tọn? Owanyi wẹ. Mọwẹ, owanyi na Jehovah wẹ nọ whàn mí nado yí nukun nuhọakuẹ tọn do pọ́n ogbẹ̀ dile ewọ nọ wà do. Podọ owanyi he mí tindo na mẹdevo lẹ nọ whàn mí ma nado gbọn vọdonanu dali wà nudepope he na hẹn awugble wá yé ji. (Mat. 22:37-39) Enẹwutu, mì gbọ mí ni nọ wà nuhe go mí pé lẹpo nado basi hihọ́na mẹhe to azọ́nwa hẹ mí to azọ́n họgbigbá tọn mítọn tẹnmẹ lẹ.

[Nudọnamẹ odò tọn]

a Pọ́n apotin lọ “Lehe Hiẹ Sọgan Wazọ́n po Aṣejininọ po to Aliyá ji Do,” to weda 30 ji.

[Apotin/Yẹdide to weda 30]

Lehe Hiẹ Sọgan Wazọ́n po Aṣejininọ po to Aliyá ji Do

To owhe agọe tọn de mẹ to Etats-Unis, gbẹtọ he hugan 160000 wẹ flẹ jai sọn aliyá ji bo gbleawu to whenue yé to azọ́nwa. Humọ, nudi gbẹtọ 150 wẹ kú to mẹhe flẹ jai enẹlẹ mẹ. Mahopọnna fie hiẹ nọ nọ̀ kavi nọ wazọ́n te, anademẹ delẹ die he sọgan gọalọna we ma nado flẹ jai sọn aliyá ji.

◇ Ma yí aliyá he to whinwhàn, kavi dehe ko gble zan blo, podọ ma dọ emi na vọ́ aliyá mọnkọtọn jlado blo. Hẹn ẹn gble poun.

◇ Aliyá dopodopo wẹ tindo nugopipe etọn. Hẹn ẹn diun dọ zínpinpẹn towe, azọ́nwanu towe lẹ tọn, po nuhe a nado wazọ́n lẹ po tọn ma zẹ̀ nugopipe aliyá he a jlo na zan lọ tọn go.

◇ Dike aliyá towe ni sinai ganji to kọmẹ. Ma ze e do fie yin póde-dòde, kavi nuhe ji e sọgan whàn te, taidi owhlẹ, apotin, kavi panu de ji blo.

◇ Nọ pannukọn aliyá to whedepopenu he a to aga hẹ́ kavi to tejẹ.

◇ Ma nọ nọte kavi sinai do afọdotẹn awe he tin to aga pete aliyá depope tọn ji blo.

◇ Eyin hiẹ na gbọn aliyá ji yì họta kavi jẹte, e whè gbau, aliyá lọ dona yí mẹtlu dopo do yiaga hugan họta lọ kavi adó he go e ganjẹ. Ma nado dike aliyá lọ ni dídí, nọ sìn afọ etọn lẹ kavi whè owhlẹ donukọnna yé. Eyin hiẹ ma sọgan wàmọ, dike mẹde ni hẹn aliyá lọ go na we to whenue a to azọ́nwa to e ji. Sìn aliyá lọ to aga ma nado dike ni dídí yì adusi kavi amiyọn.

◇ Ma gla owhlẹ do afọdotẹn aliyá tọn ji bo hẹ́ owhlẹ lọ ji nado wazọ́n blo.

◇ Eyin hiẹ dlẹn alọ kavi afọ towe nado yí nude dile a to azọ́nwa to aliyá ji aga, aliyá lọ sọgan sẹ̀. Dapana nuwiwa owù tọn mọnkọtọn lẹ. Nọ sẹ̀ aliyá towe to whedepopenu he e biọ do mọ nado sọgan dọnsẹpọ azọ́n he wà a te.

◇ Eyin a jlo na wazọ́n to ohọ̀n de godo, ze ohia avase tọn de do ohọ̀n lọ ji bo dogàn e ji. Eyin a ma sọgan dogàn ohọ̀n lọ ji, ze mẹde do finẹ na e nido na avase mẹhe jlo na gbọn finẹ lẹ.

◇ Ma dike omẹ awe ni wazọ́n to aliyá dopo ji blo adavo e yin aliyá he ji omẹ awe sọgan wazọ́n te.b

[Nudọnamẹ odò tọn]

b Hiẹ sọgan mọ nuflinmẹ devo lẹ gando lehe mẹde sọgan wazọ́n to aliyá ji do go to Réveillez-vous 8 août 1999, weda 22-24 mẹ.

[Yẹdide to weda 29]

Osẹ́n Mose tọn biọ dọ oglọn ni nọ yin bibasi lẹdo họta he to flala lẹ