Nuhe Azán Jehovah Tọn Na Dehia
“Azán Jehovah tọn na wá taidi ajotọ, . . . bọ aigba po azọ́n he tin to e mẹ lẹ po na yin didehia.”—2 PITA 3:10.
1, 2. (a) Nawẹ aihọn ylankan ehe na wá vivọnu gbọn? (b) Kanbiọ tẹlẹ wẹ mí na gbadopọnna?
AIHỌN ylankan ehe yin didoai do lalo tangan de ji dọ gbẹtọ sọgan dugán do aigba ji po kọdetọn dagbe po matin anademẹ Jehovah tọn. (Ps. 2:2, 3) Be nuhe yin didoai do lalo ji de sọgan nọte kakadoi ya? Paali! Etomọṣo, mí ma na donukun dọ aihọn Satani tọn ni và ede sudo. Kakatimọ, e na yin vivasudo gbọn Jiwheyẹwhe dali to ojlẹ dide etọn mẹ podọ sọgbe hẹ tito etọn. Nuyiwa Jiwheyẹwhe tọn sọta aihọn ylankan ehe na do whẹdida dodo po owanyi etọn po hia to aliho pipé mẹ.—Ps. 92:7; Howh. 2:21, 22.
2 Apọsteli Pita wlan dọmọ: “Azán Jehovah tọn na wá taidi ajotọ, to ehe mẹ olọn lẹ na juwayi plaun to nudidọ sinsinyẹn de mẹ, ṣigba nugonu he hùnmiyọ́n sinsinyẹn lẹ na yọ́, bọ aigba po azọ́n he tin to e mẹ lẹ po na yin didehia.” (2 Pita 3:10) Etẹwẹ “olọn lẹ” po “aigba” he yin nùdego tofi po nọtena? Etẹwẹ “nugonu” he na yọ́ lọ lẹ? Podọ etẹ dọ wẹ Pita te to whenue e dọ dọ “aigba po azọ́n he tin to e mẹ lẹ po na yin didehia”? Gblọndo kanbiọ ehelẹ tọn yinyọnẹn na gọalọna mí nado wleawudaina nujijọ mẹhẹnjọsi tọn he na wá aimẹ to madẹnmẹ lẹ.
Olọn lẹ po Aigba He Na Juwayi Plaun Po
3. Etẹwẹ “olọn lẹ” he sọawuhia to 2 Pita 3:10 mẹ dlẹnalọdo, podọ nawẹ yé na juwayi plaun gbọn?
3 To whenuena hogbe lọ “olọn lẹ” yin yiyizan to yẹhiadonu-liho to Biblu mẹ, e nọ saba dlẹnalọdo huhlọn he to gandu lẹ, he yin zizedaga do mẹjidugando yetọn lẹ ji. (Isa. 14:13, 14; Osọ. 21:1, 2) “Olọn [he] na juwayi plaun” lẹ nọtena gandudu gbẹtọvi tọn he to aṣẹpa do mẹylankan lẹ ji. Nugbo lọ dọ yé na juwayi to “nudidọ sinsinyẹn” de mẹ—kavi “po gbigbó sinsinyẹn de po,” sọgbe hẹ lẹdogbedevomẹ devo—sọgan to alọdlẹndo vasudo ajiji olọn ehelẹ tọn.
4. Etẹwẹ “aigba” lọ nọtena, podọ nawẹ e na yin vivasudo gbọn?
4 “Aigba” lọ nọtena aihọn gbẹtọvi he jẹla sọn Jiwheyẹwhe dè lẹ tọn . Aihọn mọnkọtọn ko nọ aimẹ pọ́n to azán Noa tọn gbè podọ, gbọn gbedide Jiwheyẹwhe tọn dali, e yin vivasudo po Singigọ lọ po. “Gbọn ohó dopolọ dali, olọn lẹ po aigba lọ po he tin todin yin whiwhla na miyọ́n bo to yinyin hihla dai na azán whẹdida tọn po vasudo omẹ jijọ-madi-Jiwheyẹwhe tọn lẹ tọn po.” (2 Pita 3:7) Dile etlẹ yindọ Singigọ lọ và mẹylankan lẹpo sudo to ojlẹ dopolọ mẹ, vasudo he ja lọ na bẹ nujijọ debọdo-dego lẹ hẹn to “nukunbibia daho lọ” whenu. (Osọ. 7:14) To adà tintan nukunbibia daho lọ tọn whenu, Jiwheyẹwhe na whàn gandutọ tonudọtọ aihọn ehe tọn lẹ nado và “Babilọni Daho lọ” sudo, bo gbọnmọ dali do wangbẹnamẹ etọn hia galọtọ sinsẹ̀n tọn enẹ. (Osọ. 17:5, 16; 18:8) Enẹgodo, to awhàn Amagẹdọni tọn whenu, yèdọ adà godo tọn nukunbibia daho lọ tọn, Jehovah lọsu na de pipotọ aihọn Satani tọn sẹ̀.—Osọ. 16:14, 16; 19:19-21.
‘Nugonu lẹ Na Yọ́’
5. Etẹwẹ nugonu yẹhiadonu tọn lẹ bẹhẹn?
5 Etẹwẹ ‘nugonu he na yọ́ lẹ’ nọtena? “Nugonu” he go Pita donù lẹ dlẹnalọdo onú tangan he nọ dohiagona aihọn ehe, enẹ wẹ pọndohlan, aliho, yanwle po jijọ ylankan etọn lẹ po. ‘Nugonu lẹ’ sọ bẹ “gbigbọ aihọn tọn,” he “to nuyiwa todin to tolivẹtọ lẹ mẹ” hẹn. (1 Kọl. 2:12; hia Efesunu lẹ 2:1-3.) Gbigbọ kavi “jẹhọn” enẹ gbayipe to aihọn Satani tọn mẹ. E nọ whàn gbẹtọ lẹ nado lẹnnupọn, basi tito, dọho bo yinuwa to aliho he nọ do gbigbọ Satani tọn hia lẹ mẹ, yèdọ goyitọ ogán atẹṣitọ “he paṣẹ do jẹhọn ji.”
6. Nawẹ gbigbọ aihọn tọn nọ sọawuhia gbọn?
6 Enẹwutu, to yinyọnẹn mẹ kavi to mayọnẹn mẹ, mẹhe gbigbọ aihọn tọn ko bẹpla lẹ nọ na dotẹnmẹ Satani nado yinuwado ahun po ayiha yetọn po ji sọmọ bọ yé nọ do nulẹnpọn po jijọ etọn po hia. Taidi kọdetọn de, yé nọ wà nuhe jlo yé lẹ, bo ma tlẹ nọ hò ojlo Jiwheyẹwhe tọn pọ́n. To whenuena yé pannukọn ninọmẹ de, yé nọ yinuwa po goyiyi po kavi po ṣejannabi po, bo nọ ṣiatẹ sọta aṣẹpipa, bosọ nọ joawuna ‘ojlo agbasalan tọn po ojlo nukun tọn po.’—Hia 1 Johanu 2:14-17.a
7. Naegbọn mí dona ‘whlá ahun mítọn lẹ’?
7 Enẹwutu, lehe e yin nujọnu dọ mí ni ‘whlá otù kavi ahun mítọn lẹ’ gbọn nudide nuyọnẹn tọn lẹ bibasi gando gbẹdido, nuhe mí nọ hia, ayidedai, po nọtẹn Internet tọn he ji mí sọgan yì lẹ po go dali do sọ! (Howh. 4:23) Apọsteli Paulu wlan dọmọ: “Mì nọ payi: vlavo mẹde sọgan tin he na domọwle mì taidi nuyànwẹnna etọn gbọn tamẹnuplọnmẹ po oklọ ovọ́ po dali sọgbe hẹ aṣa gbẹtọ lẹ tọn, sọgbe hẹ onú dodonu aihọn ehe tọn lẹ bọ e ma yin dehe sọgbe hẹ Klisti.” (Kọl. 2:8) Dile azán Jehovah tọn to sisẹpọ, mí dona setonuna gbedide enẹ to niyaniya mẹ hugan gbede pọ́n, na ‘hihla’ etọn he ma ko yin mimọ pọ́n gbede na yọ́ “nugonu” aihọn Satani tọn lẹ, bo do yé hia taidi nuhe ma sọgan lùn hihla homẹgble Jiwheyẹwhe tọn tọ́n. Ehe hẹn mí flin hogbe Malaki 4:1 tọn lẹ dọmọ: “Azán lọ wá, e to jiji di zòhọ de; bọ saklanọ lẹpo, po yé he nọ wazọ́n kanyinylan tọn lẹpo po, na yin sàmùtọ: podọ azán he wá lọ na fiọ yé.”
“Aigba po Azọ́n He Tin to E mẹ lẹ po Na Yin Didehia”
8. Nawẹ aigba po azọ́n he tin to e mẹ lẹ po na yin “didehia” gbọn?
8 Etẹ dọ wẹ Pita te to whenuena e wlan dọ “aigba po azọ́n he tin to e mẹ lẹ po na yin didehia”? Hogbe lọ “didehia” sọgan sọ yin lilẹdo “didegbà” kavi “gòhùnna.” Pita to didohia dọ to nukunbibia daho lọ whenu, Jehovah na hùngona aihọn Satani tọn, bosọ de e hia taidi mẹhe jẹagọdo Ewọ po Ahọluduta Etọn po bo gbọnmọ dali jẹna vasudo. Isaia 26:21 dọ dọdai gando ojlẹ enẹ go dọmọ: “OKLUNỌ tọ́n sọn otẹn etọn mẹ nado sayahẹ omẹ aihọn mẹ tọn lẹ na ylando yetọn wutu: aihọn ga nasọ yí ohùn etọn hia, e ma to na sukún oṣiọ etọn lẹ tọn do ba.”
9. (a) Etẹlẹ wẹ mí dona gbẹdai, podọ etẹwutu? (b) Jẹhẹnu tẹlẹ wẹ mí dona wleawuna, podọ etẹwutu?
9 To azán Jehovah tọn gbè, mẹhe aihọn po gbigbọ ylankan etọn po nọ deanana lẹ na do nuhe yé yin taun hia, bo na tlẹ hù yenọzo. Na nugbo tọn, e sọgan yindọ ayidedai he gọ́ na danuwiwa bo gbayipe to egbehe lẹ wẹ to awuwlena ahun mẹsusu tọn na ojlẹ lọ to whenue alọ mẹdopodopo tọn “nasọ fọ́n daga do alọ kọmẹnu etọn tọn ji.” (Zek. 14:13) Enẹwutu, lehe e yin nujọnu do sọ nado gbẹ́ nudepope—yèdọ sinima, owe, aihundida video ji tọn lẹ, po mọmọ po—he sọgan sisẹ́ mí nado wleawuna walọ he Jiwheyẹwhe gbẹwanna lẹ, taidi goyiyi po owanyi na danuwiwa po! (2 Sam. 22:28; Ps. 11:5) Kakatimọ, mì gbọ mí ni wleawuna sinsẹ́n gbigbọ wiwe Jiwheyẹwhe tọn, na jẹhẹnu etọn lẹ na gọalọna mi nado lùn hihla homẹgble Jehovah tọn tọ́n.—Gal. 5:22, 23.
“Olọn Yọyọ lẹ po Aigba Yọyọ de Po”
10, 11. Etẹwẹ “olọn yọyọ lẹ” po “aigba yọyọ” lọ po nọtena?
10 Hia 2 Pita 3:13. “Olọn yọyọ lẹ” yin Ahọluduta olọn mẹ tọn Jiwheyẹwhe tọn, he ko yin didoai to 1914 whenue “ojlẹ dide akọta lẹ tọn” wá vivọnu. (Luku 21:24) Klisti Jesu po gandutọgbẹ́ etọn 144000 he suhugan yetọn lẹ ko mọ ale olọn mẹ tọn yetọn yí po wẹ wleawuna gandudu ehe. To owe Osọhia tọn mẹ, mẹdide ehelẹ yin alọdlẹndo taidi “tòdaho wiwe lọ . . ., yèdọ Jelusalẹm Yọyọ, [he] to tejẹ sọn olọn sọn Jiwheyẹwhe dè bo yin awuwlena taidi asiyọyọ he yè doaṣọ́na na asu etọn.” (Osọ. 21:1, 2, 22-24) Kẹdẹdile Jelusalẹm aigba ji tọn yin ahọnkan gandudu Islaeli hohowhenu tọn do, Jelusalẹm Yọyọ lọ po Asisunọ-yọyọ etọn po wẹ wleawuna gandudu aihọn yọyọ lọ tọn. Tòdaho olọn mẹ tọn ehe na ‘jẹte sọn olọn’ gbọn ayidonugo etọn lilẹ́ hlan aigba dali.
11 “Aigba yọyọ” lọ dlẹnalọdo ogbẹ́ gbẹtọvi aigba ji tọn yọyọ lọ, he bẹ mẹhe na ko do ojlo yetọn nado litaina Ahọluduta Jiwheyẹwhe tọn hia lẹ hẹn. Paladisi gbigbọmẹ tọn he omẹ Jiwheyẹwhe tọn lẹ to vivi etọn dù etlẹ yin todin na sọgbe mlẹnmlẹn hẹ “aigba fininọ [whanpẹnọ] he ja” lọ. (Heb. 2:5) Nawẹ mí sọgan yin apadewhe aihọn yọyọ enẹ tọn gbọn?
Wleawudaina Azán Daho Jehovah Tọn
12. Naegbọn wiwá azán Jehovah tọn na hẹn aihọn jọsi?
12 Paulu po Pita po dọ dọdai dọ azán Jehovah tọn na wá “kẹdẹdi ajotọ de”—yèdọ to ajiji mẹ, to aliho madonukun de mẹ. (Hia 1 Tẹsalonikanu lẹ 5:1, 2.) Lehe azán enẹ na wá to ajiji mẹ do na tlẹ paṣa Klistiani nugbo he to tenọpọn ẹn lẹ lọsu. (Mat. 24:44) Ṣigba, numimọ he aihọn na tindo na zẹ̀ nupaṣamẹ go. Paulu wlan dọmọ: “To whenue yé [mẹhe jẹla sọn Jehovah dè lẹ] na to didọmọ: ‘Jijọho po hihọ́ po!’ whenẹnu wẹ vasudo ajiji na wá yé ji to afọdopolọji kẹdẹdile awufiẹsa ajipanu tọn nọ wá yọnnu he to ohò de ji do; yé ma nasọ họ̀ngán to aliho depope mẹ.”—1 Tẹs. 5:3.
13. Nawẹ mí na wagbọn bọ awhágbe lọ “Jijọho po hihọ́ po!” ma nado klọ mí?
13 Awhágbe lọ “Jijọho po hihọ́ po!” na yin lalo devo de poun he na wá sọn aovi lẹ dè; ṣigba, ehe ma na klọ devizọnwatọ Jehovah tọn lẹ gba. “Mì ma tin to zinvlu mẹ,” wẹ Paulu wlan, “bọ azán enẹ nado wá mì ji dile e nọ yin do na ajotọ lẹ, na mìmẹpo wẹ ovi hinhọ́n tọn lẹ podọ ovi okle tọn lẹ.” (1 Tẹs. 5:4, 5) Enẹwutu, mì gbọ mí ni nọte to hinhọ́n lọ mẹ bo nọla pete na zinvlu aihọn Satani tọn. Pita wlan dọmọ: “Mì mẹyiwanna lẹ emi, na mì ko yọ́n ehe jẹnukọn, mì nọ họ́ mìde na mì nikaa yin dindọn yì gbọn nuṣiwa [mẹplọntọ lalo he to agun Klistiani tọn mẹ he] nọ diọnukunsọ osẹ́n lẹ tọn dali bo jai sọn tenọgligli mìtọn mẹ.”—2 Pita 3:17.
14, 15. (a) Nawẹ Jehovah nọ doyẹyigona mí gbọn? (b) Hogbe gbọdo tẹlẹ wẹ mí dona hẹn do ayiha mẹ?
14 Doayi e go dọ Jehovah ma dọna mí dọ mí ni ‘họ́ míde’ poun bo jo whẹho lọ do domọ gba. Kakatimọ, e nọ yí homẹdagbe do basi bladopọ onú voovo he na jọ to sọgodo lẹ tọn na mí “jẹnukọn” bo gbọnmọ dali doyẹyigona mí.
15 Ṣigba, e blawu dọ mẹdelẹ ma nọ kiyana nuflinmẹ he gando nuhudo lọ nado gbọṣi nukle go lẹ bo tlẹ sọ nọ tindo ayihaawe gando yé go. ‘Mí ko sè nuflinmẹ ehe na owhé susu,’ wẹ yé sọgan dọ. Na taun tọn, omẹ enẹlẹ dona hẹn do ayiha mẹ dọ gbọn ohó mọnkọtọn lẹ didọ dali, Jehovah po Visunnu etọn po go wẹ yé tindo ayihaawe do, e ma yin do pipli afanumẹ nugbonọ lọ tọn kẹdẹ go gba. “Nọtepọn ẹn,” wẹ Jehovah dọ. (Hab. 2:3) Mọdopolọ, Jesu dọ dọ, “Mì nọ họ́ali, na mì ma yọ́n azán he gbè Oklunọ mìtọn ja.” (Mat. 24:42) Humọ, Pita wlan dọmọ: “Omẹ nankọ wẹ e jẹ dọ mìwlẹ ni yin to walọ wiwe lẹ po nuyiwa mẹdezejo na Jiwheyẹwhe tọn lẹ po mẹ, dile mì to tenọpọn bo to hinhẹn tintin tofi azán Jehovah tọn do ayiha mẹ gligli!” (2 Pita 3:11, 12) Pipli afanumẹ nugbonọ lọ tọn po Hagbẹ Anademẹtọ etọn po ma na yí nukunpẹvi do pọ́n hogbe titengbe enẹlẹ gbede!
16. Jijọ tẹwẹ mí dona dapana, podọ etẹwutu?
16 Na nugbo tọn, “afanumẹ ylankan” lọ wẹ nọ wá tadona kọ̀n dọ Oklunọ lọ to dindẹn. (Mat. 24:48) Afanumẹ ylankan enẹ tin to pipli he yin zẹẹmẹ-basina to 2 Pita 3:3, 4 mẹ lọ mẹ. “To azán godo tọn lẹ mẹ,” wẹ Pita wlan, “mẹṣankotọ lẹ na wá” bo na to tonusetọ he hẹn azán Jehovah tọn do ayiha mẹ gligli lẹ ṣanko “sọgbe hẹ ojlo yetọn titi lẹ.” Mọwẹ, kakati nado ze ayidonugo do Ahọluduta lọ ji, mẹṣankotọ enẹlẹ nọ na ayidonugo yedetiti po ojlo ṣejannabi tọn yetọn lẹ po. Mì ma dike mí ni wleawuna jijọ ylankan kavi tolivivẹ tọn mọnkọ pọ́n gbede blo! Kakatimọ, mí sọgan “nọ pọ́n homẹfa Oklunọ mítọn tọn hlan taidi whlẹngán” gbọn alọnu hinhẹn ján to azọ́n yẹwhehodidọ Ahọluduta lọ tọn po mẹhẹnzun devi tọn po mẹ dali, bo ma nọ dike ojlẹ tangan nujijọ he to alọ Jehovah Jiwheyẹwhe tọn mẹ lẹ tọn ni nọ duahunmẹna mí zẹjlẹgo blo.—2 Pita 3:15; hia Owalọ lẹ 1:6, 7.
Dejido Jiwheyẹwhe Whlẹngán Tọn lọ Go
17. Na nuhe dù tudohomẹnamẹ Jesu tọn nado họ̀n sọn Jelusalẹm, nawẹ Klistiani nugbonọ lẹ yinuwa gbọn, podọ etẹwutu?
17 To whenuena awhànpa Lomu tọn tọ́nawhàn Jude to owhe 66 W.M. godo, Klistiani nugbonọ lẹ setonuna tudohomẹnamẹ Jesu tọn nado họ̀n sọn tòdaho Jelusalẹm tọn mẹ to whenue dotẹnmẹ tintan hundote. (Luku 21:20-23) Naegbọn yé do yawu yinuwa po nujikudo po domọ? Ayihaawe ma tin dọ, yé hẹn avase Jesu tọn do ayiha mẹ gligli. E họnwun dọ, yé yọnẹn dọ nudide yetọn na bẹ nuhahun lẹ hẹn, dile Klisti ko na avase etọn jẹnukọn do. Ṣigba to ojlẹ dopolọ mẹ, yé yọnẹn dọ Jehovah ma na wọnji nugbonọ etọn lẹ go gbede.—Ps. 55:22.
18. Nawẹ hogbe Jesu tọn he tin to Luku 21:25-28 mẹ lẹ nọ yinuwado pọndohlan towe ji gando wiwá nukunbibia daho lọ tọn go gbọn?
18 Mílọsu dona deji mlẹnmlẹn do Jehovah go, na ewọ dopo akàn wẹ sọgan whlẹn mí to whenue aihọn ehe na jugbọn nukunbibia daho hugan he ma ko jọ pọ́n to whenuho gbẹtọvi tọn mẹ lọ mẹ. Ojlẹ kleun de to bẹjẹeji nukunbibia daho lọ tọn godo, podọ jẹnukọnna whenue Jehovah na hẹn whẹdida etọn ṣẹ do pipotọ aihọn lọ tọn ji, gbẹtọ lẹ na “nọ dakú na obu podọ na nukundido nuhe ja aigba ji lẹ tọn wutu.” Ṣigba, whenuena kẹntọ Jiwheyẹwhe tọn lẹ na to sisọsisọ na obu, devizọnwatọ nugbonọ Jehovah tọn lẹ ma na dibu depope. To vogbingbọn mẹ, yé na jaya na yé yọnẹn dọ whlẹngán yetọn ko sẹpọ.—Hia Luku 21:25-28.
19. Etẹwẹ mí na gbadopọnna to hosọ he bọdego mẹ?
19 Mọwẹ, sọgodo jiawu nankọ die to tepọn mẹhe gbọṣi kada na aihọn po “nugonu” etọn lẹ po! Ṣigba, dile hosọ he bọdego na basi zẹẹmẹ etọn do, eyin mí jlo na mọ ogbẹ̀, mí dona wà nususu hugan nado dapana ylanwiwa poun. Mí dona wleawuna jẹhẹnu he nọ hẹn homẹ Jehovah tọn hùn bo nọ wazọ́n he ewọ kẹalọyi lẹ.—2 Pita 3:11.
[Nudọnamẹ odò tọn]
a Nado mọ zẹẹmẹ gigọ́ do jijọ he gbigbọ aihọn tọn nọ nọgodona lẹ ji, pọ́n Comment raisonner à partir des Écritures, weda 140-143.
Be Hiẹ Sọgan Na Gblọndo Ya?
• Etẹwẹ nuhe bọdego ehelẹ nọtena?
‘olọn lẹ po aigba’ dinvie tọn po
‘nugonu lẹ’
‘olọn yọyọ lẹ po aigba yọyọ lọ po’
• Naegbọn mí nọ deji mlẹnmlẹn do Jiwheyẹwhe go?
[Yẹdide to weda 5]
Nawẹ hiẹ sọgan ‘whlá ahun towe’ bo gbọṣi kada na aihọn lọ gbọn?
[Yẹdide to weda 6]
Nawẹ mí nọ dohia dọ mí “nọ pọ́n homẹfa Oklunọ mítọn tọn hlan taidi whlẹngán” gbọn?