Aṣejininọ Nọ Hẹn Kọdetọn Dagbe lẹ Wá — WESẸDOTẸN INTẸNẸT JI TỌN Watchtower Tọn

Aṣejininọ Nọ Hẹn Kọdetọn Dagbe lẹ Wá

BE MÌ nọ tin to aṣeji nado yí dotẹnmẹ yẹwhehodidọ tọn he sọgan hundote to ajiji mẹ to aigba-denamẹ agun mìtọn tọn ji lẹ zan ya? Mẹmẹsunnu mítọn he tin to tòdaho bato-glintẹn hoho Turku tọn mẹ, to Finlande lẹ wàmọ, podọ aṣejininọ yetọn hẹn kọdetọn dagbe lẹ wá.

To ojlẹ de mẹ wayi, mẹmẹsunnu he tin to Turku lẹ doayi e go dọ sunnu Asie-nu delẹ wá tòhò lọ mẹ nado fó azọ́n bato daho he nọ họ̀nwezun taun de tọn, he yè ko to gbigbá to fie yè nọ whè-hún te to lẹdo lọ mẹ de. To godo mẹ, mẹmẹsunnu de dín hotẹli he mẹ azọ́nwatọ enẹlẹ nọ nọ̀ lẹ mọ. E sọ sè dọ azọ́nwatọ lọ lẹ nọ do ahihun to afọnnu fuu sọn hotẹli yetọn lẹ yì bato-glintẹn lọ. To afọdopolọji, e dọ ẹ na mẹmẹsunnu he nọ nọ̀ agun he nọ do Glẹnsigbe to Turku mẹ lẹ.

Mẹho agun lọ tọn lẹ mọdọ wiwá jonọ susu ehelẹ tọn hùn dotẹnmẹ madonukun de dote nado lá owẹ̀n Ahọluduta lọ tọn, podọ yé yawu basi tito nujijla vonọtaun de tọn. To dimanche osẹ enẹ tọn, wẹnlatọ ao pli sẹpọ fihe jonọ lọ lẹ nọ dohún te to ogàn ṣinawe mẹ afọnnu. To whenue yé jẹ finẹ, yé ma mọ azọ́nwatọ lọ lẹ depope. ‘Kavi whenu wẹ mí gbọ ya?’ wẹ mẹmẹsunnu lọ lẹ kanse yede. ‘Be yé ko tọ́n sọn Turku wẹ ya?’ Ṣigba to enẹgodo, azọ́nwatọ dopo tọ́n to azọ́n-vọ̀ mẹ. Azọ́nwatọ devo bọdego podọ susu devo lẹ wọ̀ wá. E ma dẹn bọ azọ́nwatọ susu pli sẹpọ húndotẹn lọ. Wẹnlatọ lọ lẹ jẹ yẹwhehodọ na azọ́nwatọ lọ lẹ ji po owe he tin to Glẹnsigbe mẹ lẹ po. Homẹhun mẹmẹsunnu lọ lẹ dọ e yí nudi gànhiho dopo nkọ whẹpo azọ́nwatọ lọ lẹpo do biọ húnmẹ, ehe zọ́n bọ mẹmẹsunnu lọ lẹ mọ whenu susu nado dọhona suhugan yetọn. Whẹpo ahihun lẹ do sún, azọ́nwatọ lọ lẹ yí alọnuwe apòmẹ tọn 126 po linlinnamẹwe 329 po!

Kọdetọn dagbe he mẹmẹsunnu lọ lẹ tindo whàn yé nado vọ́ nujijla vonọtaun ehe basi to osẹ he bọdego mẹ, to osẹ dlapọn nugopọntọ lẹdo tọn whenu. Dile jikun to jijà to ogàn ṣidopo daa mẹ afọnnu, nugopọntọ lẹdo tọn lọ deanana opli sinsẹ̀nzọn kunnudegbe tọn bọ wẹnlatọ 24 dedo húndotẹn lọ. To ojlẹ ehe mẹ, yé sọ hẹn owe lẹ to Tagalog-gbè mẹ na yé mọdọ susu jonọ lọ lẹ tọn wẹ wá sọn Philippines. To afọnnu enẹ, whẹpo ahihun lẹ do sún dedo bato-glintẹn lọ, azọ́nwatọ lọ lẹ yí owe 7, alọnuwe apòmẹ tọn 69, po linlinnamẹwe 479 po. Yí nukun homẹ tọn do pọ́n lehe homẹ na ko hùn mẹmẹsunnu po mẹmẹyọnnu he tindo mahẹ to nujijla lọ mẹ lẹ po do sọ!

Whẹpo azọ́nwatọ lọ lẹ do lẹkọyi otò yetọn lẹ mẹ, mẹmẹsunnu lọ lẹ penugo nado dla susu yetọn pọ́n to hotẹli he mẹ yé nọ lẹ bo basi zẹẹmẹ owẹ̀n Ahọluduta lọ tọn na yé to gigọ́ mẹ. Delẹ to azọ́nwatọ lọ lẹ mẹ dọ dọ emi ko dukosọ hẹ Kunnudetọ lẹ pọ́n to otò devo lẹ mẹ. Azọ́nwatọ lọ lẹ do pinpẹn-nutọn-yinyọnẹn yetọn hia mẹmẹsunnu lọ lẹ na vivẹnu he yé do nado wá dla yé pọ́n to ojlẹ he yé yizan to Finlande whenu wutu.

Be mì nọ tin to aṣeji nado yí dotẹnmẹ he sọgan hundote to ajiji mẹ to aigba-denamẹ agun mìtọn tọn ji lẹ zan ya? Be mì nọ ze afọdide tintan nado jẹ mẹhe wá sọn akọ̀ voovo mẹ lẹ dè ya? Eyin mọ wẹ, mìlọsu sọgan ko tindo numimọ he nkọtọn mẹmẹsunnu Turku tọn lẹ duvivi etọn.

[Yẹdide Otò tọn to weda 32]

(Na nudọnamẹ gigọ́, pọ́n linlinnamewe lọ)

FINLANDE

HELSINKI

Turku

[Asisa Yẹdide tọn]

STX Europe