Dọnsẹpọ Jiwheyẹwhe
“Wiwe, Wiwe, Wiwe Wẹ OKLUNỌ”
EYIN hiẹ na dọ mẹhe nkọ Jehovah Jiwheyẹwhe yin to hogbe dopo mẹ, etẹwẹ a na dọ? To owhe kanweko ṣinatọ̀ntọ J.W.M., yẹwhegán Isaia mọ numimọ de he mẹ e sè ogbè nudida gbigbọnọ lẹ tọn te, bọ yé to gigopana Jehovah gbọn hogbe he do jẹhẹnu titengbe Etọn de hia yiyizan dali—enẹ wẹ wiwe-yinyin. Nuhe Isaia mọ bo sè lẹ dona hẹn awuji mí bosọ whàn mí nado dọnsẹpọ Jehovah dogọ. Dile mí na to dogbapọnna Isaia 6:1-3, pọ́n dewe hlan taidi mẹhe tin to nujijọ lọ tẹnmẹ.
Etẹwẹ Isaia mọ? “Yẹn mọ OKLUNỌ sinai to ofìn he yiaga ji, ehe fọnyi oji,” wẹ Isaia dọ. (Wefọ 1) Na taun tọn, Isaia ma to Jehovah, Oklunọ Nupojipetọ lọ mọ nukun-sọ-nukun gba. Nukun gbẹtọ tọn ma sọgan mọnú hlan lẹdo gbigbọ tọn mẹ. Biblu dọ hezeheze dọmọ: “Mẹdepope ma ko mọ Jiwheyẹwhe pọ́n gbede.” (Johanu 1:18) Numimọ de wẹ Isaia mọ.a Etomọṣo, numimọ lọ dọ̀n ayidonugo etọn taun—e họnwun sọmọ bọ awuji Isaia, podọ e yinuwa taidi dọ Jehovah lọsu mọ wẹ e te nkọ.
Enẹgodo, Isaia mọ nuhe vlavo gbẹtọvi devo de ma ko tindo lẹblanulọkẹyi nado mọ to numimọ mẹ. E wlan dọmọ: “[Selafu] lẹ nọte to aga etọn [Jehovah], dopodopo tindo awà ṣidopo; e yí awe ṣinyọ́n nukunmẹ etọn, bo yí awe ṣinyọ́n afọ etọn, bosọ yí awe do zinzlọn.” (Wefọ 2) Selafu lẹ yin nudida gbigbọnọ he tin to otẹn he yiaga taun de mẹ. Isaia kẹdẹ wẹ Biblu-kantọ he donù yé go. Selafu lẹ nọ to gbesisọ mẹ to whepoponu nado yì bo wà ojlo Jehovah tọn. Yé nọ ṣinyọnnudo nukunmẹ po afọ yetọn lẹ po nado do gbégbò po sisi po hia Mẹhe nukọn yé tindo lẹblanulọkẹyi nado sẹ̀n te.
E ma yin nuhe Isaia mọ lọ kẹdẹ wẹ hẹn awuji i gba, ṣigba nuhe e sè lọsu. Selafu lẹ wleawuna hànjigbẹ́ olọn mẹ tọn de bo nọ jihàn po ogbè lélé po. Isaia wlan dọmọ: “Ode dawhá hlan awetọ, dọmọ, Wiwe, wiwe, wiwe wẹ OKLUNỌ awhànpa lẹ tọn.” (Wefọ 3) Hogbe Heblu tọn he yin lilẹdo “wiwe” bẹ linlẹn madodiho kavi wiwe-ṣeke tọn hẹn. Hogbe lọ sọ bẹ “linlẹn mẹdekannujẹ po kadaninọ mlẹnmlẹn sọn nuylankan mẹ po tọn” hẹn. To nuhe taidi hàngbe kiké mapote de mẹ, selafu lẹ nọ yí hogbe lọ “wiwe” zan whla atọ̀n nado zinnudeji dọ Jehovah yin wiwe jẹ obá godo tọn mẹ. (Osọhia 4:8) Enẹwutu, jẹhẹnu titengbe he nọ dohiagona Jehovah de wẹ wiwe-yinyin. To onú lẹpo mẹ, Jehovah yin Jiwheyẹwhe wiwe-ṣeke, madodiho podọ madoblọ.
Yinyọnẹn dọ Jehovah yin wiwe dona whàn mí nado dọnsẹpọ ẹ dogọ. Etẹwutu? To vogbingbọn mẹ na aṣẹpatọ aihọn tọn he sọgan wá klọmẹ kavi gbidikọnamẹ lẹ, Jehovah ma nọ wà nuylankan depope. Enẹwutu, wiwe-yinyin Etọn na mí jide dọ, ewọ na yin Otọ́ dagbe hugan, Gandutọ dodo tọn po Whẹdatọ he ma nọ homẹnukuntapọn po to whepoponu. Mí tindo whẹwhinwhẹ́n lẹpo nado deji dọ Jiwheyẹwhe wiwe lọ ma na hẹn mí jẹflumẹ gbede.
[Nudọnamẹ odò tọn]
a Owe lọ Étude perspicace des Écritures basi zẹẹmẹ dọmọ: “Eyin mẹde mọ numimọ de sọn Jiwheyẹwhe dè to whenue e to nukle, e nọ taidi dọ nulọ to jijọ to nukun etọn mẹ tlọlọ wẹ nkọ. To nukọn mẹ, mẹlọ sọgan flin numimọ lọ bo basi zẹẹmẹ kavi kandai etọn to hogbe etọn titi mẹ.”—Yin zinzinjẹgbonu gbọn Kunnudetọ Jehovah tọn lẹ dali.
[Nudọnamẹ tangan lẹ to weda 32]
Yinyọnẹn dọ Jehovah yin wiwe dona whàn mí nado dọnsẹpọ ẹ dogọ