Biblu Nọ Diọ Gbẹzan Mẹtọn

ETẸWẸ whàn awhli de nado lẹkọwa nuplọnmẹ sinsẹ̀n tọn he mẹ e ko danbú sọn lọ kọ̀n? Pọ́n nuhe e dọ.

“Gbẹzan ṣie tindo zẹẹmẹ nujọnu tọn todin.”—LISA ANDRÉ

OWHE HE MẸ N’YIN JIJI: 1986

OTÒ HE MẸ N’WÁ SỌN: LUXEMBOURG

OTÀN ṢIE: OVI DUVANỌ

NUHE N’YIN DAI: N’whẹ́n to Bertrange, tòpẹvi adọkunnọ he nọ nọ̀ wiweji bo tindo hihọ́ de mẹ sẹpọ tòdaho Luxembourg tọn. Yẹn wẹ yin pòdevi to ovi atọ́n mẹjitọ ṣie lẹ tọn mẹ. Kunnudetọ Jehovah tọn wẹ mẹjitọ ṣie lẹ yin, podọ yé wazọ́n sinsinyẹn nado do nujinọtedo Klistiani tọn lẹ do ahun yẹn po mẹdaho ṣie lẹ po tọn mẹ.

To whenue n’biọ owhe aflanmẹ tọn mẹ, n’jẹ ayihaawe tindo ji gando nuplọnmẹ Kunnudetọ Jehovah tọn lẹ tọn go. To bẹjẹeji, n’dovọ́na ayihaawe ehelẹ, ṣigba yise ṣie jẹ mimiọn ji vudevude. Mẹjitọ ṣie lẹ wà nuhe go yé pé lẹpo nado deanana mi do ali he sọgbe lọ ji, ṣigba n’gbẹ́ alọgọ yetọn dai. Mẹjitọ ṣie lẹ ma yọnẹn dọ n’nọ yí whenu zan hẹ jọja he ma tindo sisi na aṣẹpipa sọmọ lẹ. E taidi dọ yé tindo mẹdekannujẹ, podọ gbẹzan yetọn nọ jlo mi. Mí nọ to agọ́ dù pé, nọ tindo kọndopọ zanhẹmẹ tọn bosọ nọ ṣì amasin-adínọ po ahàn sinsinyẹn po zan. To tintan whenu, họmẹ nọ hùn mi nado dogbẹ́ hẹ mẹhe e taidi dọ yé to vivi ogbẹ̀ tọn dù lẹ.

Na nugbo tọn, n’ma tindo ayajẹ. Gbẹdido hẹ jọja vọdonanutọ enẹlẹ wá jẹ apọṣi mi ji. To vogbingbọn mẹ, whẹho delẹ, taidi whẹdida mawadodo he gbayipe to aihọn lọ mẹ, nọ duahunmẹna mi taun. Dile ojlẹ to yìyì, n’tindo numọtolanmẹ flumẹjijẹ tọn sinsinyẹn.

LEHE BIBLU DIỌ GBẸZAN ṢIE DO: To gbèdopo, whenue n’tindo owhe 17, n’wá jẹflumẹ pete. Na onọ̀ ṣie doayi e go dọ n’ma tindo ayajẹ wutu, e dọna mi nado vọ́ Biblu plọn whladopo dogọ. E na mi tuli nado gbadopọnna nuplọnmẹ Biblu tọn lẹ podọ to enẹgodo, nado basi dide eyin n’na nọgbẹ̀ sọgbe hẹ yé kavi lala. Hodọdopọ ahundopo tọn enẹ hẹn diọdo ayidego tọn de wá gbẹzan ṣie mẹ. N’yigbe dọ mẹdaho ṣie Caroline po asu etọn Akif po ni plọn Biblu hẹ mi. Akif ma yin pinplọn whẹ́n taidi Kunnudetọ Jehovah tọn de gba, ṣigba e wá lẹzun Kunnudetọ Jehovah tọn wẹ. Na gbẹzan he Akif ko zan wayi wutu, n’mọdọ n’sọgan nọ dọho hẹ ẹ po awuvivo po, na nuhe sin hudo n’tindo niyẹn.

N’yọnẹn dọ gbẹzan ṣie ma sọgbe na Kunnudetọ Jehovah tọn de, amọ́ to tintan whenu, n’nọ lẹndọ nuhe n’yí gbẹzan ṣie do to wiwà ma dù mẹde. Ṣigba, dile n’to Biblu plọn, e wá họnwun na mi dọ walọ ṣie nọ yinuwado numọtolanmẹ Jehovah tọn lẹ ji. (Psalm 78:40, 41; Howhinwhẹn lẹ 27:11) N’sọ wá mọnukunnujẹemẹ dọ e nọ yinuwado mẹdevo lẹ ji ga.

Dile n’to dogbapọnna Biblu yinukọn dogọ, n’wá mọdọ whẹwhinwhẹ́n he sọgbe bo dutomẹji lẹ tin nado yise dọ Ohó Jiwheyẹwhe tọn wẹ. Di apajlẹ, n’plọnnu gando dọdai Biblu tọn susu he mọ hẹndi to aliho jiawu de mẹ lẹ go. Oyọnẹn mọnkọtọn gọalọna mi nado duto ayihaawe he n’tindo wayi lẹ ji.

To nudi owhe dopo godo he n’jẹ Biblu plọn ji, yẹn po mẹjitọ ṣie lẹ po yì dla mẹdaho sunnu ṣie pọ́n, mẹhe yin mẹdezejotọ to wekantẹn alahọ Kunnudetọ Jehovah tọn lẹ tọn mẹ to Allemagne. To whenue n’mọ lehe mẹdaho ṣie tindo ayajẹ do sọ, enẹ yinuwado ji e taun. Ayajẹ enẹ nkọ pẹpẹ dín wẹ n’te! Kunnudetọ devo he ze yede jo to finẹ lẹ lọsu yinuwado ji e ga. Yé gbọnvo taun na gbẹtọ he yiwanna gbẹdudu podọ nugbomadọtọ he n’nọ dogbẹ́ hẹ dai lẹ. E ma dẹn to enẹgodo bọ n’hodẹ̀ ahundopo tọn hlan Jehovah bo dopà nado yí pipotọ gbẹzan ṣie tọn do sẹ̀n ẹn. To owhe 19 mẹvi-yinyin mẹ, n’klan gbẹzan ṣie do wiwe na Jehovah gbọn baptẹm dali.

ALE HE N’MỌYI LẸ: Gbẹzan ṣie tindo zẹẹmẹ nujọnu tọn todin. N’nọ jaya nado plọn Biblu hẹ mẹdevo lẹ bo gọalọna yé nado yọ́n Jehovah po opagbe etọn lẹ na sọgodo po. Whẹndo ṣie lọsu mọaleyi ga na yé masọ nọ hanú gando go e ba.

N’yọnẹn dọ n’ko ṣinuwa wayi, ṣigba n’nọ tẹnpọn ma nado lẹnnupọndo nuṣiwa enẹlẹ ji. Kakatimọ, n’nọ ze ayidonugo do jona Jehovah tọn po mẹtọnhopọn owanyinọ he ewọ dohia mi po ji. N’kọngbedopọ mlẹnmlẹn hẹ hogbe Howhinwhẹn lẹ 10:22 tọn lẹ he dọmọ: “Dona OKLUNỌ tọn, e nọ hẹnmẹ wàdọkun, e ma nọ yí awubla do gọ́ ẹ gba.”

[Nudọnamẹ tangan lẹ to weda 20]

“Mí nọ to agọ́ dù pé, nọ tindo kọndopọ zanhẹmẹ tọn bosọ nọ ṣì amasin-adínọ po ahàn sinsinyẹn po zan”

[Nudọnamẹ tangan lẹ to weda 21]

“N’yọnẹn dọ n’ko ṣinuwa wayi, ṣigba n’nọ tẹnpọn ma nado lẹnnupọndo nuṣiwa enẹlẹ ji”