Be Hiẹ Nọ Do Gigo Jehovah Tọn Hia Ya?
“[Mí nọ] do gigo Jehovah tọn hia taidi mẹpọ́nnu lẹ.”—2 KỌL. 3:18.
NAWẸ HIẸ NA NA GBLỌNDO GBỌN?
Mahopọnna dọ mí yin ylandonọ, nawẹ mí sọgan do gigo Jehovah tọn hia gbọn?
Nawẹ odẹ̀ po opli Klistiani tọn lẹ po nọ gọalọna mí nado do gigo Jiwheyẹwhe tọn hia gbọn?
Etẹwẹ sọgan gọalọna mí nado to gigo Jehovah tọn dohia zọnmii?
1, 2. Naegbọn gbẹtọvi lẹ sọgan do jẹhẹnu Jehovah tọn lẹ hia?
TO ALIHO de kavi devo mẹ, mímẹpo wẹ nọ di mẹjitọ mítọn lẹ. E ma yin nupaṣamẹ nado sè dọ mẹde ni dọna visunnu de dọ, ‘A di otọ́ towe taun.’ Podọ na viyọnnu de dọ, ‘A nọ wanu di onọ̀ towe.’ Ovi lẹ nọ saba hodo apajlẹ mẹjitọ yetọn lẹ tọn. Ṣigba etẹwẹ dogbọn míwlẹ dali? Be mí sọgan hodo apajlẹ Jehovah, Otọ́ mítọn olọn mẹ tọn ya? Dile etlẹ yindọ mí ma nọ mọ ẹn, mí sọgan mọ jẹhẹnu họakuẹ etọn lẹ gbọn Ohó etọn pinplọn dali, gbọn dogbigbapọnna nudida etọn lẹ dali, podọ gbọn ayihamẹlinlẹnpọn do Owe-wiwe lẹ, titengbe do ohó po nuyiwa Visunnu Jiwheyẹwhe tọn, Jesu Klisti tọn lẹ po ji dali. (Joh. 1:18; Lom. 1:20) Mọwẹ, mí sọgan do gigo Jehovah tọn hia.
2 Whẹpo Adam po Evi po do yin didá, Jiwheyẹwhe tindo jidide dọ gbẹtọvi lẹ na penugo nado wà ojlo etọn, nado do jẹhẹnu etọn lẹ hia, podọ nado pagigona ẹn. (Hia Gẹnẹsisi 1:26, 27.) Gbọn nuyiwa jijọ-di-Jiwheyẹwhe tọn lẹ gblamẹ, mí dona nọ do jẹhẹnu Mẹhe dá mí tọn lẹ hia. Eyin mí wàmọ, mí na tindo lẹblanulọkẹyi vonọtaun lọ nado nọ do gigo Jiwheyẹwhe tọn hia mahopọnna aṣa mítọn, obá he mẹ mí sewé jẹ, kavi akọ̀ he mẹ mí wá sọn. Etẹwutu? Na “Jiwheyẹwhe ma yin mẹnukuntahopọntọ gba, ṣigba to akọta lẹpo mẹ, mẹhe nọ dibusi i bo nọ wazọ́n dodo tọn wẹ nọ yin alọkẹyi to e dè.”—Owalọ 10:34, 35.
3. Numọtolanmẹ tẹwẹ Klistiani lẹ nọ tindo dile yé to Jehovah sẹ̀n?
3 Klistiani yiamisisadode lẹ nọ do gigo Jehovah tọn hia. Enẹwutu, apọsteli Paulu he yin jiji gbọn gbigbọ dali wlan dọmọ: “Mímẹpo, to whenue nukunmẹ mítọn he ma tindo nukunmẹṣinyọnnu do gigo Jehovah tọn hia taidi mẹpọ́nnu lẹ, mí nọ yin adàdiọna nado yin apajlẹ dopolọ sọn gigo mẹ jẹ gigo mẹ.” (2 Kọl. 3:18) To whenue yẹwhegán Mose jẹte sọn Osó Sinai tọn ji po zannu plẹ́bẹ́ he bẹ Gbedide Ao lọ hẹn lẹ po, nukunmẹ etọn to sisẹ́ na Jehovah ko dọho hẹ ẹ wutu. (Eks. 34:29, 30) Dile etlẹ yindọ Klistiani lẹ ma tindo numimọ mọnkọtọn bọ nukunmẹ yetọn ma nọ sẹ́, yé nọ gọ́ na ayajẹ to whenue yé to hodọna mẹdevo lẹ gando Jehovah, jẹhẹnu etọn lẹ, po lẹndai jiawu etọn na gbẹtọvi lẹ po go. Taidi mẹpọ́nnu hohowhenu tọn he yè yí ogàn do basi, mẹyiamisisadode lẹ po gbẹdohẹmẹtọ yetọn lẹ po nọ do gigo Jehovah tọn hia to gbẹzan po lizọnyizọn yetọn po mẹ. (2 Kọl. 4:1) Be hiẹ to gigo Jehovah tọn dohia gbọn walọyizan towe po wẹndagbe Ahọluduta lọ tọn lilá to gbesisọ mẹ po dali ya?
MÍ JLO NA NỌ DO GIGO JEHOVAH TỌN HIA
4, 5. (a) Taidi Paulu, etẹwẹ mí dona diahi hẹ? (b) Obá tẹ mẹ wẹ ylando ko yinuwado mí ji jẹ?
4 Taidi devizọnwatọ Jehovah tọn lẹ, mí jlo na nọ gbògbéna Mẹdatọ mítọn bosọ nọ pagigona ẹn to nuyiwa mítọn lẹpo mẹ. Ṣigba, e ma yin nuhe mí jlo lẹ wẹ mí nọ saba wà. Paulu lọsu diahi hẹ nuhahun mọnkọtọn ga. (Hia Lomunu lẹ 7:21-25.) Nado basi zẹẹmẹ nuhewutu mí nọ diahi hẹ ojlo agọ̀ mọnkọtọn lẹ tọn, Paulu wlan dọmọ: “Mẹlẹpo wẹ ko waylando bo whete do gigo Jiwheyẹwhe tọn go.” (Lom. 3:23) Mọwẹ, na mí dugu ylando tọn sọn Adam dè wutu, mímẹpo wẹ lẹzun afanumẹ ylando tọn, ehe to gandu do mí ji taidi ahọlu kanylantọ de.—Lom. 5:12; 6:12.
5 Etẹwẹ ylando yin? Nudepope he jẹagọdo jẹhẹnu, aliho, nujinọtedo po ojlo Jehovah tọn po. Ylando nọ hẹn haṣinṣan mítọn hẹ Jiwheyẹwhe gble. Ylando nọ glọnalina mí ma nado do gigo Jiwheyẹwhe tọn hia, kẹdẹdile nude sọgan glọnalina ogáyintọ de ma nado jẹ yanwle etọn kọ̀n do. Mí sọgan yọnẹn bo waylando kavi wàmọ to mayọnẹn mẹ. (Sọh. 15:27-31) Ylando doadọ̀do taun to gbẹtọvi lẹ mẹ bo hẹn yé jẹla sọn Mẹdatọ yetọn dè. (Ps. 51:5; Isa. 59:2; Kọl. 1:21) Gbọnmọ dali, gbẹtọvi lẹ to paa mẹ ma nọ wanu sọgbe hẹ ojlo Jehovah tọn, ehe zọ́n bọ yé ma tindo lẹblanulọkẹyi vonọtaun lọ nado do gigo Jiwheyẹwhe tọn hia. Matin ayihaawe, nudevo de ma nọ tindo nuyiwadomẹji ylankan do gbẹtọvi lẹ ji sọ ylando.
6. Mahopọnna dọ mí yin ylandonọ, nawẹ mí sọgan do gigo Jiwheyẹwhe tọn hia gbọn?
6 Mahopọnna dọ mí yin ylandonọ, Jehovah ko do ede hia taidi “Jiwheyẹwhe he nọ namẹ todido.” (Lom. 15:13) Ewọ ko wleawuna aliho lọ nado de ylando sẹ̀—enẹ wẹ avọ́sinsan ofligọ Jesu Klisti tọn. Gbọn yise didohia to avọ́sinsan enẹ mẹ dali, mí masọ yin “afanumẹ ylando tọn” ba, ṣigba mí tin to otẹn dagbe mẹ nado do gigo Jehovah tọn hia. (Lom. 5:19; 6:6; Joh. 3:16) Eyin mí zindonukọn nado hẹn haṣinṣan dagbe ehe go hẹ Jiwheyẹwhe, mí sọgan deji dọ Jehovah na dona mí todin, podọ e na hẹn mí zun mẹpipe bosọ na mí ogbẹ̀ madopodo to sọgodo. Dona nankọ die nado yin pinpọnhlan gbọn Jiwheyẹwhe dali taidi mẹhe sọgan do gigo etọn hia dile etlẹ yindọ mí gbẹ́ yin ylandonọ!
MÍ SỌGAN DO GIGO JIWHEYẸWHE TỌN HIA
7. Etẹwẹ mí dona kẹalọyi gando míde go nado sọgan do gigo Jiwheyẹwhe tọn hia?
7 Nado sọgan do gigo Jiwheyẹwhe tọn hia nugbonugbo, mí dona yọnẹn dọ mí yin ylandonọ. (2 Otan. 6:36) Mí dona kẹalọyi dọ mí tindo ayilinlẹn ylando tọn lẹ bo dovivẹnu nado nọ duto yé ji nado sọgan nọ do gigo Jiwheyẹwhe tọn hia to gigọ́ mẹ. Di apajlẹ, eyin mí jai jẹ ylando mẹdèpo tọn lọ, he yin yẹdide fẹnnuwiwa tọn pinpọn mẹ, mí dona kẹalọyi dọ mí tindo nuhudo alọgọ gbigbọmẹ tọn—bo dovivẹnu nado mọ ẹn yí. (Jak. 5:14, 15) Ehe wẹ afọdide tintan he mí dona ze eyin mí jlo na do gigo Jiwheyẹwhe tọn hia. Taidi sinsẹ̀n-basitọ Jehovah tọn lẹ, mí dona nọ gbadopọnna míde zọnmii nado yọnẹn eyin mí to gbẹnọ sọgbe hẹ nujinọtedo dodo tọn etọn lẹ. (Howh. 28:18; 1 Kọl. 10:12) Mahopọnna obá he mẹ ayilinlẹn ylando tọn mítọn lẹ sọgan sinyẹn jẹ, mí dona to avùnho sọta yé zọnmii nado sọgan do gigo Jiwheyẹwhe tọn hia.
8. Dile etlẹ yindọ mí yin mapenọ, etẹwẹ mí dona wà?
8 Jesu kẹdẹ wẹ mẹhe nọ aigba ji bo wà nuhe hẹn homẹ Jiwheyẹwhe tọn hùn to whepoponu bosọ do gigo Etọn hia to pipé mẹ. Dile etlẹ yindọ mí ma yin mẹpipe taidi Jesu, mí sọgan hodo apajlẹ etọn podọ mí dona dovivẹnu nado wàmọ. (1 Pita 2:21) Jehovah nọ yí nukun nujọnu tọn do pọ́n vivẹnudido po nukọnyiyi he mí nọ basi po, podọ e nọ dona vivẹnudido ahundopo tọn mítọn nado do gigo etọn hia.
9. Adà tẹwẹ Biblu nọ yiwà to gbẹzan Klistiani he jlo na nọgbẹ̀ sọgbe hẹ nubiọtomẹsi Jiwheyẹwhe tọn lẹ mẹ?
9 Biblu sọgan gọalọna mí nado mọnukunnujẹ lehe mí na do gigo Jehovah tọn hia do mẹ. Dandannu wẹ e yin dọ mí ni nọ plọn Biblu po sọwhiwhe po bo nọ lẹnayihamẹpọn do nuhe e dọ ji. (Ps. 1:1-3) Owe-wiwe lẹ hihia egbesọegbesọ na gọalọna mí nado pọnte dogọ taidi Klistiani lẹ. (Hia Jakọbu 1:22-25.) Oyọnẹn Biblu tọn wẹ dodonu yise mítọn tọn podọ oyọnẹn enẹ nọ hẹn gbemima mítọn lodo nado dapana ylando sinsinyẹn lẹ bo hẹn homẹ Jehovah tọn hùn.—Ps. 119:11, 47, 48.
10. Nawẹ odẹ̀ sọgan gọalọna mí nado sẹ̀n Jehovah to gigọ́ mẹ gbọn?
10 Nado do gigo Jiwheyẹwhe tọn hia, mí sọ dona “sinyẹnlin to odẹ̀ mẹ.” (Lom. 12:12) Mí dona nọ hodẹ̀ dọ Jehovah ni gọalọna mí nado sẹ̀n ẹn to aliho he e kẹalọyi mẹ. Enẹwutu, mí sọgan biọ dọ ewọ ni na mí gbigbọ wiwe, ni na mí yise dogọ, ni na mí huhlọn nado nọ pehẹ whlepọn, podọ ni na mí nugopipe nado “nọ yí ohó nugbo tọn lọ zan to aliho he sọgbe mẹ.” (2 Tim. 2:15; Mat. 6:13; Luku 11:13; 17:5) Kẹdẹdile ovi de nọ ganjẹ otọ́ etọn go do, mọkẹdẹ wẹ mí dona nọ ganjẹ Otọ́ olọn mẹ tọn mítọn, Jehovah go do niyẹn. Eyin mí biọ ẹ dọ ni gọalọna mí nado sẹ̀n ẹn to gigọ́ mẹ, mí sọgan deji dọ ewọ na wàmọ. Mí ma dona lẹn gbede dọ mí to tuklado e! Kakatimọ, mì gbọ mí ni nọ hodẹ̀ nado pà ẹ, dopẹna ẹn, dín anademẹ etọn titengbe to whlepọn glọ, bo biọ dọ ni gọalọna mí nado sẹ̀n ẹn to aliho he na pagigona oyín wiwe etọn mẹ.—Ps. 86:12; Jak. 1:5-7.
11. Nawẹ opli agun tọn lẹ nọ gọalọna mí nado do gigo Jiwheyẹwhe tọn hia gbọn?
11 Jiwheyẹwhe ko ze lẹngbọ họakuẹ etọn lẹ do alọmẹ na “afanumẹ nugbonọ podọ nuyọnẹntọ lọ” nado penukundo yé go. (Mat. 24:45-47; Ps. 100:3) Ahunmẹdunamẹnu pipli afanumẹ lọ tọn wẹ nado gọalọna yisenọ hatọ lẹ nado nọ do gigo Jehovah tọn hia. Opli mítọn lẹ nọ gọalọna mí nado basi vọjlado lẹ to gbẹzan mítọn mẹ bo hẹn jẹhẹnu Klistiani tọn mítọn lẹ pọnte dogọ, kẹdẹdile avọ̀tọ-tọ́ de nọ vọ́ avọ̀ mítọn jlado nado hẹn awusọhia mítọn pọnte dogọ do. (Heb. 10:24, 25) Enẹwutu, mì gbọ mí ni nọ yì opli lẹ do gànmẹ, na eyin mí yí whenu-gbigbọ do dó aṣa, mí ma na mọaleyi sọn alọgọ gbigbọmẹ tọn lẹ mẹ to gigọ́ mẹ nado sọgan basi vọjlado to gbẹzan mítọn mẹ taidi devizọnwatọ Jehovah tọn lẹ.
MÌ GBỌ MÍ NI HODO APAJLẸ JIWHEYẸWHE TỌN
12. Nawẹ mí sọgan hodo apajlẹ Jiwheyẹwhe tọn gbọn?
12 Eyin mí na do gigo Jehovah tọn hia, mí dona “nọ hodo apajlẹ Jiwheyẹwhe tọn.” (Efe. 5:1) Aliho dopo he mẹ mí sọgan hodo apajlẹ Jehovah tọn te wẹ nado wleawuna pọndohlan etọn nkọ gando whẹho lẹ go. Eyin mí nọ tẹnpọn nado yinuwa sọgbe hẹ linlẹn mítọn, mí na de yẹyi sọn ewọ go bo nasọ hẹn awugble wá míde ji. Na aihọn he mẹ mí te tin to anademẹ mẹylankan lọ, Satani Lẹgba tọn glọ wutu, mí dona dovivẹnu vẹkuvẹku nado gbẹwanna nuhe Jehovah gbẹwanna lẹ bo yiwanna nuhe ewọ yiwanna lẹ. (Ps. 97:10; 1 Joh. 5:19) Mí dona kudeji mlẹnmlẹn dọ aliho dagbe hugan he mẹ mí sọgan sẹ̀n Jiwheyẹwhe te wẹ nado nọ wà onú lẹpo na gigo etọn.—Hia 1 Kọlintinu lẹ 10:31.
13. Naegbọn mí dona gbẹwanna ylando, podọ etẹwẹ ehe na whàn mí nado wà?
13 Jehovah gbẹwanna ylando, podọ mílọsu dona wàmọ. Na nugbo tọn, mí dona họ̀nna ylanwiwa dile e na yọnbasi do podọ mí ma dona pọ́n obá he mẹ mí sọgan sẹpọ ylando jẹ po linlẹn lọ po dọ mí ma na jai jẹ e mẹ. Di apajlẹ, mí dona họ́ míde sọta atẹṣiṣi, yèdọ ylando de he na zọ́n bọ mí ma na pegan nado do gigo Jiwheyẹwhe tọn hia. (Deut. 13:6-9) Enẹwutu, mì gbọ mí ni nọla na atẹṣitọ lẹ kavi mẹdepope he ylọ ede dọ mẹmẹsunnu ṣigba bo nọ de yẹyi sọn Jiwheyẹwhe go. Nudopolọ wẹ mí dona wà eyin mẹlọ tlẹ yin hagbẹ whẹndo mítọn tọn. (1 Kọl. 5:11) Vivẹnudido nado dọnnu hẹ atẹṣitọ lẹ kavi hẹ mẹhe nọ mọhodọdo titobasinanu Jehovah tọn go lẹ ma na hẹn ale wá na mí. Na nugbo tọn, mí ma tlẹ dona jlo nado yọ́n nuhe yé dọ lẹ, vlavo to owe yetọn lẹ mẹ kavi to nọtẹn Internet tọn lẹ ji, na mọwiwà na hẹn haṣinṣan mítọn hẹ Jehovah gble.—Hia Isaia 5:20; Matiu 7:6.
14. Jẹhẹnu tẹwẹ mí dona wleawuna dile mí to vivẹnudo nado do gigo Jiwheyẹwhe tọn hia, podọ etẹwutu?
14 Dopo to aliho tangan he mẹ mí sọgan hodo apajlẹ Otọ́ olọn mẹ tọn mítọn te lẹ mẹ wẹ nado nọ do owanyi hia. Mọwẹ, mí dona nọ do owanyi hia di ewọ. (1 Joh. 4:16-19) Na nugbo tọn, owanyi he mí tindo to mídelẹ ṣẹnṣẹn nọ dohiagona mí taidi devi Jesu tọn lẹ po devizọnwatọ Jehovah tọn lẹ po. (Joh. 13:34, 35) Dile etlẹ yindọ mape nọ glọnalina mí to whedelẹnu, mí dona dovivẹnu nado nọ do owanyi hia to whepoponu. Awuwiwlena owanyi po jẹhẹnu Klistiani tọn devo lẹ po na gọalọna mí nado dapana ylanwiwa po nuylankan devo lẹ po.—2 Pita 1:5-7.
15. Eyin mí yiwanna mẹdevo lẹ, nawẹ mí na nọ yinuwa hẹ yé gbọn?
15 Owanyi nọ whàn mí nado wà dagbe na mẹdevo lẹ. (Lom. 13:8-10) Di apajlẹ, owanyi he mí tindo na alọwlemẹ mítọn na whàn mí ma nado hẹn adọzan alọwle tọn flu. Owanyi he mí tindo na mẹho agun tọn lẹ gọna pinpẹn-nutọn-yinyọnẹn na azọ́n yetọn na gọalọna mí nado nọ setonuna anademẹ yetọn bosọ nọ litaina yé. Ovi he yiwanna mẹjitọ yetọn lẹ nọ setonu bosọ nọ gbògbéna yé podọ yé ma nọ dọho mẹhẹngble tọn lẹ gando mẹjitọ yetọn lẹ go. Eyin mí yiwanna mẹdevo lẹ, mí ma na nọ mọdọ mí yiaga hú yé kavi dọhona yé po sisi matindo po. (Jak. 3:9) Mọdopolọ mẹho he yiwanna lẹngbọ Jiwheyẹwhe tọn lẹ na nọ yinuwa hẹ yé po awuvẹmẹ po.—Owalọ 20:28, 29.
16. Nawẹ owanyi nọ gọalọna mí to lizọnyizọn lọ mẹ gbọn?
16 Mí sọ dona nọ do owanyi hia to lizọnyizọn mítọn mẹ. Na mí tindo owanyi sisosiso na Jehovah wutu, mí ma na gbọjọ eyin gbẹtọ lẹ ma do ojlo hia kavi ma kẹalọyi owẹ̀n lọ. Kakatimọ, mí na zindonukọn to wẹndagbe lọ lilá mẹ. Owanyi na whàn mí nado nọ wleawu ganji bo nọ dovivẹnu nado yin mẹplọntọ dagbe to lizọnyizọn lọ mẹ. Eyin mí yiwanna Jiwheyẹwhe po kọmẹnu mítọn lẹ po nugbonugbo, mí ma na nọ pọ́n azọ́n yẹwhehodidọ Ahọluduta lọ tọn hlan taidi agbànpẹnmẹnu. Kakatimọ, mí na nọ pọ́n ẹn hlan taidi lẹblanulọkẹyi daho de bo nọ hẹn ẹn di po ayajẹ po.—Mat. 10:7.
TO GIGO JEHOVAH TỌN DOHIA ZỌNMII
17. Etẹwẹ mí dona wà eyin mí kẹalọyi dọ mí whete do gigo Jiwheyẹwhe tọn go?
17 Aihọn lọ to paa mẹ ma yọ́n lehe ylando nọ hẹnnugble sọ, ṣigba míwlẹ yọnẹn. Enẹwutu, mí yọnẹn dọ mí dona hoavùn sọta ayilinlẹn ylando tọn mítọn lẹ. Eyin mí kẹalọyi dọ mí yin mapenọ, mí sọgan plọn ayihadawhẹnamẹnu mítọn bọ e na nọ whàn mí nado wà nuhe sọgbe to whenue linlẹn ylankan de jẹ finfọn ji to ayiha po ahun mítọn po mẹ. (Lom. 7:22, 23) Nugbo wẹ dọ mí yin madogánnọ, ṣigba Jiwheyẹwhe sọgan na mí huhlọn nado wà nuhe sọgbe to ninọmẹ depope mẹ.—2 Kọl. 12:10.
18, 19. (a) Etẹwẹ nọ gọalọna mí nado tindo kọdetọn dagbe to avùnhiho sọta huhlọn gbigbọ ylankan lẹ tọn mẹ? (b) Etẹwẹ dona yin gbemima mítọn?
18 Nado do gigo Jehovah tọn hia, mí sọ dona hoavùn sọta huhlọn gbigbọ ylankan lẹ tọn. Gbaja gbigbọmẹ tọn he Jiwheyẹwhe na mí nọ gọalọna mí nado wà ehe po kọdetọn dagbe po. (Efe. 6:11-13) Satani to vivẹnudo klinkán-klinkán nado hò gigo he Jehovah kẹdẹ jẹna lọ yí. Lẹgba sọ to nuhe go e pé lẹpo wà nado hẹn haṣinṣan mítọn hẹ Jehovah gble. Ṣigba, mí nọ gbawhàn Satani tọn to whenue míwlẹ po gbẹtọ livi susu devo lẹ po hẹn tenọgligo bo to gigo Jiwheyẹwhe tọn dohia. Enẹwutu, mì gbọ mí ni nọ pà Jehovah taidi nudida olọn mẹ tọn lẹ he dọmọ: “Jehovah, yèdọ Jiwheyẹwhe mítọn, hiẹ wẹ jẹ nado mọ gigo, gbégbò po huhlọn po yí, na hiẹ wẹ dá onú lẹpo, podọ to ojlo towe mẹ wẹ yé tin bosọ yin didá.”—Osọ. 4:11.
19 Mì gbọ mí ni magbe nado to gigo Jehovah tọn dohia zọnmii, mahopọnna nudepope he sọgan jọ. Matin ayihaawe, homẹ etọn nọ hùn nado mọdọ gbẹtọvi nugbonọ lẹ to vivẹnudo nado hodo apajlẹ etọn bo do gigo etọn hia. (Howh. 27:11) Mì gbọ mí ni tindo numọtolanmẹ dopolọ taidi Davidi, mẹhe jihàn dọmọ: “Yẹn na pà we, [Jehovah] Jiwheyẹwhe ṣie E, po ayiha ṣie lẹpo po: yẹn nasọ nọ pagigona oyín towe kakadoi.” (Ps. 86:12) Lehe mí yí jejejininọ do to tenọpọn ojlẹ he mẹ mí na do gigo Jehovah tọn hia to gigọ́ mẹ te bo nọ pagigona ẹn kakadoi do sọ! Nuhe gbẹtọvi tonusetọ lẹ na wà po ayajẹ po to madẹnmẹ niyẹn. Be hiẹ to gigo Jehovah Jiwheyẹwhe tọn dohia todin po todido lọ po nado wàmọ kakadoi ya?
[Yẹdide to weda 27]
Be hiẹ to gigo Jehovah tọn dohia to adà ehelẹ mẹ ya?