Kanbiọ lẹ sọn Wehiatọ lẹ Dè

Nawẹ okú nugbonọ Jiwheyẹwhe tọn lẹ tọn yin “nuhọakuẹ to nukun [Jehovah] tọn mẹ” gbọn?

▪ Psalm-kantọ de jihàn to gbọdo glọ dọmọ: “Nuhọakuẹ to nukun OKLUNỌ tọn mẹ wẹ okú mẹwiwe etọn lẹ tọn.” (Ps. 116:15) Ogbẹ̀ dopodopo sinsẹ̀n-basitọ nugbo Jehovah tọn lẹ tọn họakuẹ na ẹn taun. Ṣigba, hogbe enẹlẹ sọn Psalm 116tọ mẹ bẹ nususu hẹn hugan okú mẹdopodopo tọn poun.

Eyin mẹde to hodidọ ṣiọdidi tọn na, e ma sọgbe dọ ni yí Psalm 116:15 zan na matintọ lọ, eyin ewọ tlẹ sẹ̀n Jehovah po nugbonọ-yinyin po kakajẹ okú. Etẹwutu? Na zẹẹmẹ hogbe psalm-kantọ lọ tọn lẹ gbloada taun. Ehe dohia dọ okú nugbonọ lẹ tọn to pọmẹ họakuẹ na Jiwheyẹwhe sọmọ bọ e ma sọgan dike onú mọnkọtọn de ni jọ.—Pọ́n Psalm 72:14; 116:8.

Psalm 116:15 na mí jide dọ Jehovah ma na dike devizọnwatọ nugbonọ etọn lẹ to pọmẹ ni yin kúnsúdona sọn aigba ji. Na nugbo tọn, whenuho egbezangbe tọn mítọn dohia dọ mí ko jugbọn whlepọn po homẹkẹn vẹadi lẹ po mẹ bo gbọnmọ dali do kunnudenu he họnwun hia dọ Jiwheyẹwhe ma na dike mí ni yin vivasudo gbede.

Na huhlọn Jehovah tọn ma tindo dogbó bọ lẹndai etọn nọ mọ hẹndi janwẹ wutu, e ma na dike mí ni yin vivasudo to pọmẹ. Eyin Jiwheyẹwhe dike bọ enẹ jọ, e na dohia dọ kẹntọ etọn lẹ tindo huhlọn hugan ẹn—nude he ma sọgan jọ pọ́n gbede! Lẹndai Jehovah tọn dọ mẹhe yin nugbonọ na ẹn lẹ na nọ aigba ehe ji ma na mọ hẹndi—ṣigba onú mọnkọtọn ma sọgan jọ. (Isa. 45:18; 55:10, 11) Sinsẹ̀nzọn wiwe bibasi hlan Jehovah lọsu na tlẹ doalọte to aigba ji eyin gbẹtọvi depope ma pò nado sẹ̀n ewọ to adà aigba ji tọn tẹmpli daho gbigbọmẹ tọn etọn mẹ! Mẹde ma na tin nado wleawuna “aigba yọyọ” lọ—yèdọ ogbẹ́ gbẹtọvi dodonọ lẹ tọn he na nọgbẹ̀ to aigba ji to anademẹ “olọn yọyọ” lọ tọn glọ. (Osọ. 21:1) Mọdopolọ, Gandudu Owhe Fọtọ́n Klisti tọn ma sọgan yọnbasi eyin e ma tindo mẹjidugando depope to aigba ji.—Osọ. 20:4, 5.

Eyin Jiwheyẹwhe na dotẹnmẹ kẹntọ etọn lẹ nado và omẹ etọn he to aigba ji lẹpo sudo to pọmẹ, enẹ na fọ́n ayihaawe dote gando otẹn he mẹ e te po yinkọ dagbe etọn po go. Enẹ nasọ de yẹyi sọn Jehovah he yin Nupojipetọ Wẹkẹ lọ tọn go. Humọ, na Jehovah tindo sisi na ede podọ na oyín wiwe etọn wutu, e ma na dike omẹ nugbonọ etọn lẹ ni yin vivasudo to pọmẹ. Lẹnnupọndo ehe ji: To whenuena e yindọ Jiwheyẹwhe ma nọ dawhẹ agọ̀ gbede, e ma na nọma basi hihọ́na pipli gbẹtọvi he to sinsẹ̀n ẹn po nugbonọ-yinyin po lẹ tọn. (Deut. 32:4; Gẹn. 18:25) Eyin Jiwheyẹwhe dike bọ devizọnwatọ etọn lẹ yin vivasudo to pọmẹ, enẹ na jẹagọdo nuhe Ohó etọn dọ dọmọ: “OKLUNỌ ma to na gbẹ́ omẹ etọn lẹ dai gba na oyín daho etọn tọn wutu.” (1 Sam. 12:22) Na nugbo tọn, “OKLUNỌ ma na tùn omẹ etọn lẹ hlan gba, mọ e ma na gbẹ́ mẹdodugu etọn lẹ dai.”—Ps. 94:14.

Lehe e yin homẹmiọnnamẹnu nado yọnẹn dọ omẹ Jehovah tọn lẹ ma na yin vivasudo sọn aigba ji gbede do sọ! Enẹwutu, mì gbọ mí ni wà nuhe go mí pé lẹpo nado yin nugbonọ na Jiwheyẹwhe bo dejido opagbe etọn go, ehe dọmọ: “Avùnhonu depope he yè jlẹ do gowe ma na wà nude; odẹ́ he fọ́n do jiwe to whẹdida mẹ lẹpo wẹ hiẹ na gblewhẹdo: ehe wẹ ogú devi OKLUNỌ tọn lẹ tọn, dè e wẹ dodo yetọn sọn.”—Isa. 54:17.

[Nudọnamẹ tangan lẹ to weda 22]

Jiwheyẹwhe ma na dike omẹ etọn lẹ ni yin vivasudo gbede