Yọ́n Pinpẹn Jẹhẹnu Jehovah Tọn lẹ Tọn to Gigọ́ Mẹ
“Mì nọ hodo apajlẹ Jiwheyẹwhe tọn, taidi ovi yiwanna lẹ.”—EFE. 5:1.
ETẸWẸ YIN GBLỌNDO TOWE?
Nawẹ mí sọgan hẹn pinpẹn-nutọn-yinyọnẹn mítọn na jẹhẹnu Jehovah tọn lẹ siso deji gbọn?
Etẹwẹ nọ zọ́n bọ mẹde do nọ yọ́n dọnsẹpọ?
Nawẹ mí sọgan hodo apajlẹ mẹnukuntamahopọn tọn Jehovah tọn gbọn?
1. (a) Jẹhẹnu Jehovah tọn tẹlẹ wẹ Klistiani de sọgan gbadopọnna? (b) Nawẹ mí sọgan mọaleyi sọn dogbigbapọnna jẹhẹnu Jiwheyẹwhe tọn lẹ mẹ gbọn?
TO WHENUE a lẹnnupọndo jẹhẹnu Jehovah tọn lẹ ji, detẹ lẹ wẹ nọ wá ayiha mẹ na we? Susu mítọn wẹ nọ lẹnnupọndo owanyi, whẹdida dodo, nuyọnẹn, po huhlọn po ji. Ṣigba, mí yọnẹn dọ Jehovah tindo jẹhẹnu he dọnmẹdogo susu devo lẹ. Na nugbo tọn, jẹhẹnu voovo Jehovah tọn 40 linlán ji wẹ owe mítọn lẹ dọhodo. Yí nukun homẹ tọn do pọ́n nugbo ojlofọndotenamẹ tọn he tin to sẹdotẹnmẹ gando jẹhẹnu Jehovah tọn lẹ go, ehe oplọn mẹdetiti tọn kavi whẹndo tọn mítọn sọgan gọalọna mí nado mọnukunnujẹemẹ lẹ! Aliho tẹlẹ mẹ wẹ mí sọgan mọaleyi sọn nupinplọn mọnkọtọn mẹ te? Nupinplọn enẹ sọgan hẹn pinpẹn-nutọn-yinyọnẹn mítọn na Otọ́ olọn mẹ tọn mítọn siso deji. Taidi kọdetọn de, lehe pinpẹn-nutọn-yinyọnẹn mítọn na Jehovah siso sọ, mọ wẹ ojlo mítọn nado dọnsẹpọ ẹ podọ nado hodo apajlẹ etọn nọ sinyẹn do niyẹn.—Jọṣ. 23:8; Ps. 73:28.
2. (a) Na apajlẹ lehe mí sọgan hẹn pinpẹn-nutọn-yinyọnẹn mítọn na jẹhẹnu Jehovah tọn lẹ siso deji do tọn. (b) Etẹwẹ mí na gbadopọnna?
2 Ṣigba, etẹwẹ e zẹẹmẹdo nado “yọ́n pinpẹn” nude tọn? Tofi, e zẹẹmẹdo nado yọ́n nujọnu-yinyin nulọ tọn taun. To paa mẹ, vudevude wẹ pinpẹn-nutọn-yinyọnẹn mítọn na nude nọ jideji. Di apajlẹ: Mí nọ wá yọ́n pinpẹn kavi yiwanna núdùdù yọyọ de to whenue owán núdùdù lọ tọn yí mí bọ enẹgodo, mí jẹ agó dopodopo kán ji podọ to godo mẹ wá jẹ didà ẹ na míde ji. Mọdopolọ, pinpẹn-nutọn-yinyọnẹn mítọn na jẹhẹnu Jehovah tọn de nọ jideji eyin mí jẹakọ hẹ jẹhẹnu lọ ganji, nọ lẹnnupọndeji, bosọ jẹ dido e hia ji to gbẹzan mítọn titi mẹ. (Efe. 5:1) Lẹndai hosọ ehe po awe he bọdego lẹ po tọn wẹ nado hẹn pinpẹn-nutọn-yinyọnẹn mítọn siso deji na jẹhẹnu Jiwheyẹwhe tọn devo he ji mí ma nọ yawu lẹnnupọndo lẹ. Gando jẹhẹnu dopodopo go, mí na gbadopọnna kanbiọ delẹ taidi: Etẹwẹ e zẹẹmẹdo? Nawẹ Jehovah nọ do e hia gbọn? Podọ nawẹ mí sọgan hodo apajlẹ Jehovah tọn to jẹhẹnu enẹ didohia mẹ gbọn?
JEHOVAH YỌ́N DỌNSẸPỌ
3, 4. (a) Nawẹ a na basi zẹẹmẹ mẹhe yọ́n dọnsẹpọ de tọn gbọn? (b) Nawẹ Jehovah na mí jide dọ emi yọ́n dọnsẹpọ gbọn?
3 Jẹnukọn whẹ́, mì gbọ mí ni dọhodo nuhe e zẹẹmẹdo nado yọ́n dọnsẹpọ ji. Nawẹ a na basi zẹẹmẹ mẹhe yọ́n dọnsẹpọ de tọn gbọn? A sọgan dọ dọ, ‘E yin mẹde he jọmẹ bo nọ hùndonuvo sọmọ bọ yè sọgan nọ dọho hẹ ẹ po awuvivo po.’ Hodidọ mẹde tọn kavi nuyiwa etọn, yèdọ ohia nukunta tọn etọn lẹ po lehe e nọ dọnudo we do po, nọ saba gọalọ nado yọnẹn eyin mẹlọ yọ́n dọnsẹpọ kavi lala.
4 Nawẹ Jehovah nọ dohia dọ emi yọ́n dọnsẹpọ gbọn? Dile etlẹ yindọ Jehovah wẹ Didatọ ganhunupotọ wẹkẹ gblagada mítọn tọn, ewọ hẹn mí deji dọ emi jlo bosọ to jejeji nado dotoai podọ nado na gblọndo na odẹ̀ mítọn lẹ. (Hia Psalm 145:18; Isaia 30:18, 19.) Mí sọgan yí whenu susu do dọho hẹ Jiwheyẹwhe to ojlẹ depope mẹ podọ to fidepope. Mí sọgan dọnsẹpọ ẹ po awuvivo po, na mí yọnẹn dọ ewọ ma na gblewhẹdo mí gbede na mí wàmọ wutu. (Ps. 65:2; Jak. 1:5) Ohó Jiwheyẹwhe tọn yí hogbe he mẹ gbẹtọ sọgan mọnukunnujẹ lẹ zan nado dohia dọ Jehovah jlo dọ mí ni dọnsẹpọ emi. Di apajlẹ, Psalm-kantọ Davidi wlan dọ, ‘nukun Jehovah tọn lẹ tin hlan dali mítọn’ podọ ‘adusilọ etọn wẹ ze mí dote.’ (Ps. 34:15; 63:8) Yẹwhegán Isaia yí Jehovah jlẹdo lẹngbọhọtọ de go bo dọmọ: “E nasọ yí awà etọn do bẹ lẹngbọvu lẹ pli, bo ze yé do akọ́n etọn nù.” (Isa. 40:11) Yí nukun homẹ tọn do pọ́n! Jehovah jlo dọ mí ni dọnsẹpọ emi pẹkipẹki kẹdẹdile lẹngbọvu de nọ voawu to whenue e to akọ́nnu na lẹngbọhọtọ mẹtọnhopọntọ etọn do. Lehe Otọ́ mítọn, Jehovah yọ́n dọnsẹpọ do sọ! Nawẹ mí sọgan hodo apajlẹ etọn to jẹhẹnu ehe didohia mẹ gbọn?
JẸHẸNU HE HỌAKUẸ TAUN DE
5. Naegbọn e do yin nujọnu dọ mẹho lẹ ni yọ́n dọnsẹpọ?
5 To agọe, yè kanse Kunnudetọ zohunhunnọ delẹ sọn awà voovo aihọn lọ tọn lẹ ji dọ, “Jẹhẹnu tẹwẹ mì nọ yiwanna hugan to mẹho agun tọn de dè?” Suhugan yetọn wẹ gblọn dọ emi nọ yiwanna dọ mẹho de “ni yọ́n dọnsẹpọ.” Nugbo wẹ dọ, Klistiani lẹpo wẹ dona wleawuna jẹhẹnu ehe to gigọ́ mẹ, ṣigba, titengbe mẹho agun tọn lẹ wẹ dona yọ́n dọnsẹpọ hugan. (Isa. 32:1, 2) Nado do nujọnu-yinyin jẹhẹnu enẹ tọn hia, mẹmẹyọnnu de basi zẹẹmẹ dọmọ: “Kiki eyin mẹho de yọ́n dọnsẹpọ wẹ mí sọgan mọaleyi sọn jẹhẹnu dagbe devo he e tindo lẹ mẹ.” Nugbo taun wẹ e dọ! Ṣigba, etẹwẹ nọ zọ́n bọ mẹde do nọ yọ́n dọnsẹpọ?
6. Etẹwẹ yin dopo to nuhe na zọ́n bọ mí na yọ́n dọnsẹpọ lẹ mẹ?
6 Dopo to nuhe na zọ́n bọ mí na yọ́n dọnsẹpọ lẹ mẹ wẹ nado nọ do ojlo nujọnu tọn hia to mẹdevo lẹ mẹ. Eyin mẹho agun tọn de nọ hò mẹdevo lẹ tọn pọ́n bo nọ tin to gbesisọ mẹ nado yí ede zan do ota yetọn mẹ, mẹmẹsunnu po mẹmẹyọnnu etọn lẹ po, gọna jọja lẹ na nọ dọnsẹpọ ẹ po awuvivo po. (Malku 10:13-16) Carlos he tindo owhe 12 dọmọ: “N’nọ doayi nuyiwa mẹho agun tọn lẹ tọn go to plitẹnhọ mẹ. N’nọ mọ lehe yé nọ konu yẹsẹ bo nọ do homẹdagbe hia do, podọ homẹ ṣie nọ hùn do yé go taun.” Na nugbo tọn, e ma ko pé dọ mẹho de ni dọ poun dọ emi yọ́n dọnsẹpọ, ṣigba ewọ dona nọ do jẹhẹnu ehe hia. (1 Joh. 3:18) Nawẹ mẹho de sọgan wàmọ gbọn?
7. Naegbọn kalti akọ́nnu tọn mítọn dido nọ saba hùn dotẹnmẹ hodọdopọ tọn dote, podọ etẹwẹ mí sọgan plọn sọn enẹ mẹ?
7 Lẹnnupọndo apajlẹ ehe ji: To agọe, mẹmẹsunnu de do kalti akọ́nnu tọn plidopọ tọn etọn to whenue e do agahun lẹkọ sọn plidopọ agbegbe tọn de he e yì to tògodo. To whenue aisinnunamẹtọ agahun lọ tọn mọ kalti akọ́nnu tọn lọ he ji e yin kinkan do dọ ‘Ahọluduta Jiwheyẹwhe Tọn Ni Wá!’ e dọna mẹmẹsunnu lọ dọ, “Mọwẹ, ni wá—amọ́, mí dona dọho pẹẹde gando ehe go.” Enẹgodo, yé wá dọhodopọ bọ aisinnunamẹtọ lọ kẹalọyi linlinnamẹwe mítọn lẹ po homẹhunhun po. Susu mítọn wẹ ko tindo numimọ mọnkọtọn lẹ. Ṣigba, naegbọn kalti akọ́nnu tọn plidopọ tọn nọ saba hùn dotẹnmẹ hodọdopọ tọn dote? Na to linlẹn de mẹ, kalti lọ nọ dọna gbẹtọ lẹ dọ, “Mì voawu nado dọnsẹpọ mi. Mì kàn fie n’jei sè mi.” Kalti akọ́nnu tọn yin ohia yinukundomọ de he nọ zọ́n bọ gbẹtọ lẹ nọ yọnẹn dọ mí to gbesisọ mẹ nado má nuyise mítọn lẹ hẹ yé. Mọdopolọ, mẹho agun tọn lẹ dona tindo ohia yinukundomọ lẹ he na zọ́n bọ yisenọ hatọ yetọn lẹ na nọ voawu nado dọnsẹpọ yé. Etẹwẹ yin delẹ to ohia enẹlẹ mẹ?
8. Nawẹ mẹho agun tọn lẹ sọgan nọ dohia dọ yé tindo ojlo nujọnu tọn to mẹdevo lẹ mẹ gbọn, podọ nawẹ enẹ nọ yinuwado agun lọ ji gbọn?
8 Nugbo wẹ dọ, aṣa lẹ nọ gbọnvo sọn otò de mẹ jẹ devo mẹ, ṣigba to paa mẹ, eyin mí konu yẹsẹ do mẹmẹsunnu po mẹmẹyọnnu mítọn lẹ po, na alọ yé, bo dọnudo yé po awuvivo po, enẹ nọ yin ohia lọ dọ mí tindo ojlo nujọnu tọn to yé mẹ. Mẹnu wẹ dona nọ ze afọdide tintan to whẹho ehe mẹ? Doayi apajlẹ he Jesu zedai lọ go. Matiu na linlin dọ, to opli de he Jesu basi hẹ devi etọn lẹ whenu, ‘Jesu dọnsẹpọ bo dọhona yé.’ (Mat. 28:18) Mọdopolọ to egbehe, mẹho agun tọn lẹ nọ ze afọdide tintan nado dọnsẹpọ yisenọ hatọ yetọn lẹ bo dọho hẹ yé. Nawẹ enẹ sọgan yinuwado agun lọ ji gbọn? Mẹmẹyọnnu gbehosọnalitọ de he tindo owhe 88 dọmọ: “To whenue n’biọ Plitẹnhọ Ahọluduta tọn mẹ, nukiko yẹsẹ po hodidọ tulinamẹ tọn mẹho lẹ tọn po nọ zọ́n bọ n’nọ voawu hẹ yé taun.” Mẹmẹyọnnu nugbonọ devo yidogọ dọmọ: “E sọgan nọ taidi numadinu de, ṣigba eyin mẹho agun tọn de dokuavọna mi po nukiko yẹsẹ po to whenue n’wá opli lẹ, e nọ vivi na mi taun.”
YỌ́N DỌNSẸPỌ BOSỌ NỌ YÍ DEWE ZAN NA MẸDEVO LẸ
9, 10. (a) Apajlẹ dagbe tẹwẹ Jehovah zedai? (b) Nawẹ mẹho agun tọn lẹ sọgan nọ yí yede zan na mẹdevo lẹ gbọn?
9 E họnwun dọ, mí ma sọgan yọ́n dọnsẹpọ eyin mí ma nọ yí míde zan na mẹdevo lẹ. Jehovah ze apajlẹ dagbe de dai to adà ehe mẹ. “Ewọ ma dẹn do dopodopo mítọn.” (Owalọ 17:27) Dopo to aliho he mẹ mẹho agun tọn lẹ nọ yí yede zan na mẹdevo lẹ te lẹ mẹ wẹ nado nọ de whenu dovo jẹnukọn podọ to opli lẹ godo nado dọhodopọ hẹ mẹmẹsunnu po mẹmẹyọnnu yetọn lẹ po, yèdọ yọpọ po mẹho po. Mẹmẹsunnu gbehosọnalitọ de dọmọ: “Eyin mẹho de kàn lehe n’te do sè mi bosọ nọte nado sè gblọndo ṣie, n’nọ mọdọ e yọ́n pinpẹn ṣie.” Mẹmẹyọnnu he ko to Jehovah sẹ̀n na nudi owhe 50 die de dọmọ: “Eyin mẹho de yí whenu zan nado dọho hẹ mi to opli godo, enẹ nọ hẹn mi tindo numọtolanmẹ dọ e yọ́n pinpẹn ṣie.”
10 Nugbo wẹ dọ mẹho agun tọn lẹ sọ dona hẹn azọngban devo lẹ di. Etomọṣo to opli lẹ ji, yé dona nọ hẹn ẹn diun dọ yé nọ yí whenu zan nado dọho hẹ mẹmẹsunnu po mẹmẹyọnnu lẹ po.
JEHOVAH MA NỌ HOMẸNUKUNTAPỌN
11, 12. (a) Etẹwẹ e zẹẹmẹdo ma nado nọ homẹnukuntapọn? (b) Nawẹ Jehovah yin apajlẹ de na mí na nuhe dù mẹnukuntamahopọn gbọn?
11 Jẹhẹnu Jehovah tọn devo he dọnmẹdogo wẹ mẹnukuntamahopọn. Etẹwẹ e zẹẹmẹdo ma nado nọ homẹnukuntapọn? E zẹẹmẹdo nado nọ wà dodo, ma nado nọ dawhẹ agọ̀ kavi tindo nuvẹun depope. Mẹnukuntamahopọn nujọnu tọn nọ bẹ onú titengbe awe hẹn: pọndohlan po nuyiwa po. Naegbọn onú awe ehelẹ do yin dandan? Na nukun he mẹde do nọ pọ́n mẹdevo lẹ to paa mẹ wẹ nọ whàn ẹn nado yinuwa hẹ yé matin mẹnukuntahihopọn. Sọgbe hẹ zẹẹmẹ hogbe dowhenu tọn he yin yiyizan to Owalọ lẹ 10:34 mẹ tọn, Jiwheyẹwhe ma nọ ganjẹ awusọhia gbonu tọn go, bo masọ nọ do nukundagbe hia mẹde hú mẹdevo. Enẹwutu, mẹhe ma nọ homẹnukuntapọn nọ na sisi mẹdevo lẹ na walọ yetọn wutu, e ma yin na awusọhia gbonu tọn kavi ninọmẹ dagbe yetọn wutu gba.
12 Na nuhe dù mẹnukuntamahopọn, Jehovah wẹ yin apajlẹ dagbenọ hugan. Ohó etọn dọ dọ ewọ “ma yin mẹnukuntahopọntọ gba” podọ e “ma nọ hò gbẹtọ lẹ pọ́n.” (Hia Owalọ lẹ 10:34, 35; Deutelonomi 10:17.) Ninọmẹ de fọ́n to azán Mose tọn gbè he do enẹ hia.
13, 14. (a) Ninọmẹ tẹwẹ viyọnnu atọ́n Zelofehadi tọn lẹ pannukọn? (b) Nawẹ Jehovah do mẹnukuntamahopọn hia gbọn?
13 Whẹpo Islaelivi lẹ nado biọ Aigba Pagbe tọn lọ ji, nọviyọnnu tlẹnnọ atọ́n delẹ pannukọn ninọmẹ sinsinyẹn de. Etẹwẹ jọ? Yé yọnẹn dọ, taidi whẹndo devo depope to Islaeli, whẹndo yetọn dona mọ mimá aigba tọn he yin otọ́ yetọn tọn yí. (Sọh. 26:52-55) Ṣigba, otọ́ yetọn Zelofehadi he wá sọn whẹndo Manasse tọn mẹ ko kú. Sọgbe hẹ aṣa Islaelivi lẹ tọn, visunnu Zelofehadi tọn lẹ wẹ tindo jlọjẹ nado dugu aigba enẹ tọn, ṣigba viyọnnu lẹ kẹdẹ wẹ ewọ tindo. (Sọh. 26:33) To whenuena e yindọ visunnu de ma tin to whẹndo lọ mẹ nado dugu aigba lọ tọn, be aigba lọ na yin zizejo na hẹnnumẹ lẹ wẹ ya?
14 Nọviyọnnu atọ́n lọ lẹ dọnsẹpọ Mose bo kanse e dọmọ: “Etẹwutu wẹ oyín otọ́ mítọn tọn lọ nado yin didesẹ sọn whédo etọn ṣẹnṣẹn, na ewọ ma tindo visunnu de wutu?” Yé vẹvẹna ẹn dọmọ: “Na nutindo de hlan mí to mẹmẹsunnu otọ́ mítọn tọn lẹ lọ ṣẹnṣẹn.” Be Mose gblọnna yé dọ, ‘Nude ma sọgan yin wiwà gando osẹ́n lọ go’ wẹ ya? Lala. Kakatimọ, e “hẹn whẹho yetọn wá OKLUNỌ lọ nukọn.” (Sọh. 27:2-5) Gblọndo tẹwẹ Jehovah na Mose? Jehovah dọna ẹn dọmọ: “Viyọnnu Zelofehadi tọn lẹ lọ dọho nugbo: hiẹ nugbonugbo na na nutindo ogú de tọn de yé to mẹmẹsunnu otọ́ yetọn tọn lẹ ṣẹnṣẹn; hiẹ nasọ hẹn ogú otọ́ yetọn tọn lọ nado juyi jẹ yé dè.” Jehovah sọ yinukọn hugan mọ bo hẹn gbedide enẹ zun osẹ́n to whenue e dọna Mose dọmọ: “Eyin sunnu de kú, bo ma tindo visunnu de gba, whenẹnu mìwlẹ na hẹn ogú etọn nado juyi jẹ viyọnnu etọn dè.” (Sọh. 27:6-8; Jọṣ. 17:1-6) Bẹsọn whenẹnu, Islaelivi yọnnu he tin to ninọmẹ sinsinyẹn mọnkọtọn mẹ lẹpo wẹ nọ mọaleyi sọn awuwledainanu enẹ mẹ.
15. (a) Nawẹ Jehovah nọ yinuwa hẹ omẹ etọn lẹ gbọn, titengbe agbátọnọ lẹ? (b) Kandai Biblu tọn devo tẹlẹ wẹ dohia dọ Jehovah ma nọ homẹnukuntapọn?
15 Nudide he do homẹdagbe po mẹnukuntamahopọn po hia nankọ die! Jehovah doyẹyigona yọnnu agbátọnọ enẹlẹ kẹdẹdile ewọ nọ wà do na Islaelivi he tin to ninọmẹ dagbe mẹ lẹ. (Ps. 68:5) Ehe yin dopo poun to kandai Biblu tọn susu he do nugbo homẹmiọnnamẹ tọn ehe hia lẹ mẹ dọ: Jehovah nọ yinuwa hẹ devizọnwatọ etọn lẹpo matin mẹnukuntahihopọn.—1 Sam. 16:1-13; Owalọ 10:30-35, 44-48.
MÍ SỌGAN HODO APAJLẸ JEHOVAH TỌN
16. Nawẹ mí sọgan wleawuna mẹnukuntamahopọn bosọ nọ do e hia to gigọ́ mẹ gbọn?
16 Nawẹ mí sọgan hodo apajlẹ mẹnukuntamahopọn tọn Jehovah tọn gbọn? Flindọ, mẹnukuntamahopọn bẹ adà awe hẹn. Nukun he mí do nọ pọ́n mẹdevo lẹ wẹ na zọ́n bọ mí na yinuwa hẹ yé matin mẹnukuntahihopọn. Na nugbo tọn, mẹde ma nọ jlo na lẹndọ emi nọ homẹnukuntapọn. Ṣigba, hiẹ na kọngbedopọ dọ e ma nọ saba bọawu nado yọ́n nuhe yin numọtolanmẹ mítọn gando mẹdevo lẹ go to gigọ́ mẹ. Enẹwutu, etẹwẹ mí sọgan wà nado yọnẹn eyin mẹdevo lẹ nọ pọ́n mí hlan taidi mẹhe ma nọ homẹnukuntapọn? To whenue Jesu jlo na yọ́n nuhe mẹdevo lẹ to didọ gando ewọ go, e kanbiọ họntọn dejidego etọn lẹ dọmọ: “Mẹnu wẹ gbẹtọ lẹ to didọ dọ Visunnu gbẹtọ tọn yin?” (Mat. 16:13, 14) Naegbọn mílọsu ma na hodo apajlẹ Jesu tọn to adà enẹ mẹ? Hiẹ sọgan kanhose họntọn dejidego de nado dọna we eyin vlavo hiẹ nọ homẹnukuntapọn. Eyin ewọ dọna we dọ, to whedelẹnu e nọ taidi dọ hiẹ nọ ṣinyan akọ̀, kavi dọ mẹhe sewé kavi mẹhe alọnu pọnte na lẹ ji wẹ a nọ hò jẹ hugan, etẹwẹ a dona wà? Hodẹ̀ vẹkuvẹku na Jehovah gando numọtolanmẹ towe lẹ go, bo vẹ̀ ẹ dọ ni gọalọna we nado jla pọndohlan towe do, na a nido sọgan nọ do mẹnukuntamahopọn etọn nkọ hia to gigọ́ mẹ.—Mat. 7:7; Kọl. 3:10, 11.
17. Aliho tẹlẹ mẹ wẹ mí sọgan yinuwa hẹ mẹdevo lẹ te matin mẹnukuntahihopọn?
17 To agun Klistiani tọn mẹ, mí nọ dohia dọ mí jlo na hodo apajlẹ mẹnukuntamahopọn tọn Jehovah tọn eyin nuyiwa mítọn hẹ mẹmẹsunnu po mẹmẹyọnnu mítọn lẹ po nọ gọ́ na yẹyi po dagbewanyi po. Di apajlẹ, eyin mí jlo na hẹjómẹ, e na yọ́n dọ mí ni nọ basi oylọna yisenọ hatọ wunmẹ lẹpo, yèdọ mẹhe ma wá sọn akọ̀ dopolọ mẹ hẹ mí lẹ, wamọnọ lẹ, tọṣiọvi lẹ po asuṣiọsi lẹ po. (Hia Galatianu lẹ 2:10; Jakọbu 1:27.) Humọ, to whenue mí to mahẹ tindo to azọ́n wẹndagbe Ahọluduta lọ tọn lilá mẹ, mí dona nọ lá owẹ̀n lọ na gbẹtọ wunmẹ lẹpo etlẹ yin na jonọ lẹ, matin mẹnukuntahihopọn. Homẹhunnu daho de wẹ e yin na mí nado tindo owe sinai do Biblu ji lẹ to nudi ogbè 600 mẹ. Dohia mẹnukuntamahopọn tọn he jẹna ayidego nankọ die!
18. To whenue a lẹnnupọndo lehe Jehovah yọ́n dọnsẹpọ bo masọ nọ homẹnukuntapọn do ji, etẹwẹ enẹ dona whàn we nado wà?
18 Na taun tọn, eyin mí nọ yí whenu zan nado lẹnnupọndo lehe Jehovah yọ́n dọnsẹpọ bo ma nọ homẹnukuntapọn do ji, pinpẹn-nutọn-yinyọnẹn mítọn na ewọ na siso deji. Podọ enẹ na whàn mí nado nọ do jẹhẹnu Jehovah tọn lẹ hia to gigọ́ mẹ to nuyiwa mítọn hẹ yisenọ hatọ lẹ po mẹhe mí nọ dọyẹwheho na lẹ po mẹ.
[Yẹdide to weda 8]
“OKLUNỌ ma dẹn do yé he to awhádo ylọ ẹ lẹ dè gba.”—Ps. 145:18 (Pọ́n hukan 9tọ)
“OKLUNỌ lọ Jiwheyẹwhe mìtọn . . . ma nọ hò gbẹtọ lẹ pọ́n.”—Deut. 10:17 (Pọ́n hukan 17tọ)
[Yẹdide to weda 10]
Viyọnnu Zelofehadi tọn lẹ yọ́n pinpẹn mẹnukuntamahopọn Jiwheyẹwhe tọn (Pọ́n hukan 13 po 14tọ po)