BE HIẸ FLIN YA?

Be a yí sọwhiwhe do hia zinjẹgbonu Atọ̀họ̀-Nuhihọ́ lọ Tọn agọe tọn lẹ ya? Eyọn, pọ́n eyin a sọgan na gblọndo kanbiọ he bọdego ehelẹ tọn:

Be mí dona nọ hodẹ̀ hlan Jesu Klisti wẹ ya?

Lala. Jesu plọn mí nado nọ hodẹ̀ hlan Jehovah, podọ e ze apajlẹ dai na mí gbọn dẹ̀hiho hlan Otọ́ etọn dali. (Mat. 6:6-9; Joh. 11:41; 16:23) Enẹwutu, hodotọ etọn dowhenu tọn lẹ nọ hodẹ̀ hlan Jiwheyẹwhe, e ma yin hlan Jesu. (Owalọ 4:24, 30; Kọl. 1:3)—1/1, weda 14.

Etẹlẹ wẹ mí sọgan nọ wà to whemẹwhemẹ nado wleawuna hùnwhẹ Oflin okú Jesu tọn?

Onú tintan he mí sọgan wà wẹ nado nọ hodo tito Biblu hihia tọn he nọ yin awuwlena na nujijọ ehe to gbesisọ mẹ. Mí sọgan sọ nọ dovivẹnu nado wà susu dogọ to lizọnyizọn mítọn mẹ to ojlẹ enẹ mẹ. Podọ, mí sọgan nọ hodẹ̀ bo lẹnayihamẹpọn do todido he Jiwheyẹwhe na mí ji.—15/1, weda 14-16.

Nunina madonukun tẹwẹ mẹmẹsunnu he to Japon lẹ mọyi?

Yé mọ alọnuwe de yí he bẹ owe wẹndagbe Matiu tọn hẹn, ehe yin didesọn Biblu Lẹdogbedevomẹ Aihọn Yọyọ Tọn mẹ. Yé nọ ze e donukọnnamẹ to lizọnyizọn lọ mẹ, podọ gbẹtọ susu he ma jẹakọ hẹ Biblu lẹ nọ kẹalọyi i.—15/2, weda 3.

Ninọmẹ owhe kanweko tintan whenu tọn tẹlẹ wẹ gọalọ nado hẹn wẹndagbe lọ gbayipe?

Pax Romana, yèdọ jijọho Lomu tọn he nọ aimẹ na ojlẹ dindẹn zọ́n bọ hunyanhunyan depò to otò lọ mẹ. Devi dowhenu tọn lẹ nọ zingbejizọnlin gbọn ali dagbedagbe lẹ ji. Na mẹsusu nọ do Glẹki-gbè wutu, ehe zọ́n bọ azọ́n yẹwhehodidọ tọn yin hinhẹn gbayipe, etlẹ yin jẹ Ju he tin to ahọluigba lọ blebu mẹ lẹ dè. Podọ devi lẹ sọgan ganjẹ osẹ́n Lomu tọn lẹ go nado yiavùnlọna wẹndagbe lọ.—15/2, weda 20-23.

To owhe agọe tọn lẹ mẹ, naegbọn owe mítọn lẹ ma nọ basi zẹẹmẹ dọ kandai Owe-wiwe lẹ tọn de nọtena nuhe na wá jọ to nukọn mẹ sọmọ ba?

Biblu dohia dọ mẹdelẹ nọtena omẹ vonọtaun de. Dopo to apajlẹ he do ehe hia lẹ mẹ tin to Galatianu lẹ 4:21-31 mẹ. Ṣigba, nuhe sọgbe hugan wẹ yindọ, mí ni ma nọ to nulẹnpọn nado yọnẹn eyin mẹde kavi kandai de nọtena onú vonọtaun de blo kavi nọ wá tadona mọnkọtọn kọ̀n blo. Kakatimọ, mí sọgan dín nuplọnmẹ yọ́n-na-yizan lẹ he mí sọgan plọn sọn mẹhe yin nùdego kavi nujijọ he tin to Biblu mẹ lẹ mẹ. (Lom. 15:4)—15/3, weda 17-18.

Naegbọn papyrus pẹvi delẹ he yin didesọn fie ogbó nọ yin bibẹdo to hohowhenu to Égypte do jẹna ayidego vonọtaun?

To owhe kanweko tintan whenu, delẹ to papyrus mọnkọtọn lẹ mẹ bẹ hogbe Wẹndagbe —Johanu tọn delẹ hẹn. Yé na ko yin awuwlena owhe susu lẹ to whenue Johanu kàn owe etọn godo, podọ nuhe yé bẹhẹn lẹ yin kunnudenu dọ vọkan kandai Biblu tọn he mí tindo sọgbe taun bo sọgan yin jidedego.—1/4, weda 10-11.

Naegbọn e do yin tito owanyinọ de nado nọ de mẹhe waylando bo ma lẹnvọjọ de sẹ̀ sọn agun mẹ?

Biblu zinnudo afọdide nujọnu tọn mẹdidesẹ sọn agun mẹ tọn he sọgan hẹn ale wá lẹ ji. (1 Kọl. 5:11-13) Tito ehe nọ hẹn gbégbò wá na yinkọ Jiwheyẹwhe tọn, nọ basi hihọ́na agun wiwe Klistiani tọn, podọ e sọgan zọ́n bọ ylanwatọ lọ na gọ̀ biọ ede mẹ. —15/4, weda 29-30.