Ayajẹ He Gbẹzan He Bọawu Zinzan Nọ Hẹnwa

DANIEL PO MIRIAM PO wlealọ to septembre 2000 bo yì sawhé do tòdaho Barcelone tọn mẹ to Espagne. Daniel dọmọ: “Gbẹzan he gbẹtọ lẹ nọ pọnhlan di gbẹzan dagbe wẹ mí nọ zan. Na mí tindo agbasazọ́n dagbe de wutu, mí nọ yì dùnú to núdùtẹn dahodaho lẹ, nọ yì tògodo bo nọ do avọ̀ akuẹgegenu tọn lẹ. Mí sọ nọ tindo mahẹ gbesisọ tọn to lizọnyizọn lọ mẹ.” Ṣigba, nulẹ wá diọ.

To plidopọ daho de ji to 2006, hodidọ de fọ́n kanbiọ de dote he yinuwado Daniel ji sisosiso, dọmọ: “Be mí to nuhe go mí pé lẹpo wà nado gọalọna yé he to ‘sàmù jei hùhùtẹn’ lẹ nado wá aliho he planmẹ yì ogbẹ̀ madopodo mẹ lọ ji ya?” (Howh. 24:11) Hodidọ lọ zinnudo azọngban lọ nado hẹn owẹ̀n gbẹwhlẹngán tọn Biblu tọn lọ yì mẹdevo lẹ dè ji. (Owalọ 20:26, 27) Daniel flin dọmọ: “N’do numọtolanmẹ lọ dọ yẹn wẹ Jehovah to hodọna.” Hodidọ lọ sọ dohia dọ yè nọ mọ ayajẹ dogọ, eyin yè gbloada na lizọnyizọn mẹtọn. Daniel mọdọ hójọhó wẹ. Miriam uwọ ko to gbehosọnalitọ basi bo to vivi dona susu tọn dù.

Daniel dọmọ: “Tadona he kọ̀n n’wá wẹ yindọ ojlẹ sọ̀ na mi nado basi diọdo titengbe de.” E sọ wàmọ nugbo. E de gànhiho he e nọ yizan na agbasazọ́n pò, bo jẹ gbehosọnalitọ basi ji, bosọ lẹnnupọndo ayajẹ he ewọ po Miriam po sọgan tindo ji, eyin yé yì sẹ̀n to fie nuhudo wẹnlatọ Ahọluduta lọ tọn lẹ sù te.

AVÙNNUKUNDIỌSỌMẸNU LẸ​—PODỌ OWẸ̀N OJLOFỌNDOTENAMẸ TỌN DE

To mai 2007, Daniel po Miriam po jo agbasazọ́n yetọn lẹ do bo sẹtẹn yì Panama, yèdọ otò de he yé ko yì dlapọn dai. Aigba-denamẹ yọyọ yetọn bẹ lopo voovo he to Bocas del Toro Archipelago to lẹdo ohù Caraïbe tọn mẹ lẹ hẹn, bọ suhugan mẹhe nọ nọ̀ finẹ lẹ tọn wá sọn akọ̀ Guaymis tọn mẹ. Daniel po Miriam po lẹndọ, akuẹ he yé ko sẹdo na hẹn yé nado nọ Panama na nudi osun ṣinatọ̀n.

Yé nọ yí tọjihun po kẹkẹ afọ tọn po do yì lopo lọ lẹ ji, podọ yé gbẹ́ flin whla tintan he yé kùn kẹkẹ afọ tọn—na nudi kilomẹtlu 32 gbọn pópló lẹ ji to owhè ṣádada nù. Agbọ́ pé Daniel bọ e dibla ba ede mẹ pò. Amọ́, to owhé he to ali lọ ji lẹ gbè, whẹndo Guaymis tọn lẹ nọ yí yé ganji, titengbe to whenue asu po asi po lọ ko plọn hogbe delẹ to ogbè lẹdo lọ tọn mẹ godo. To ojlẹ vude godo, yé ko tindo plọnmẹ Biblu 23.

Ṣigba, to whenue akuẹ asu po asi po lọ tọn vọ̀, ayajẹ yetọn lẹzun awubla. Daniel flindọ: “Po dasin po, mí jẹ nulẹnpọn do kọlilẹ mítọn yì Espagne ji. E vẹna mí taun dọ mí jlo na jo plọnmẹ Biblu mítọn lẹ do.” Ṣigba, to osun dopo godo, yé sè owẹ̀n ojlofọndotenamẹ tọn de. Miriam dọmọ: “Mí yin oylọ-basina nado sẹ̀n taidi gbehosọnalitọ titengbe lẹ. Lehe homẹ mítọn hùn do sọ nado gbọṣi aigba-denamẹ mítọn ji!”

NUHE HẸN AYAJẸ WÁ NA YÉ HUGAN

To 2015, na diọdo he wá aimẹ to titobasinanu lọ mẹ lẹ wutu, e yin bibiọ to Daniel po Miriam po si nado lẹzun gbehosọnalitọ whepoponu tọn lẹ. Etẹwẹ yé na wà? Yé dejido opagbe he yin mimọ to Salmu lẹ 37:5 mẹ go dọmọ: “Jo aliho towe do alọmẹ na Jehovah; ganjẹ ewọ go, e nasọ yinuwado ota towe mẹ.” Yé mọ agbasazọ́n de nado penukundo yede go, podọ todin yé to sinsẹ̀n to agun de mẹ to agbegbe Veraguas tọn mẹ, to Panama.

Daniel dọmọ: “Whẹpo mí do tọ́n sọn Espagne, mí ma kudeji dọ mí na zan gbẹzan he bọawu. Ṣigba, to egbehe mí to mọwà podọ mí ma jẹdò dandannu depope tọn.” Etẹwẹ nọ hẹn ayajẹ wá na yé hugan? Yé dọmọ: “Alọgigọna whiwhẹnọ lẹ nado plọnnu gando Jehovah go nọ hẹn ayajẹ mayọnjlẹ wá!”