“Ahun He Gọ́ Na Zohunhun po Owanyi po Hugan Gbede Pọ́n”

OHỌ̀ plidopọ tọn lọ mẹ ko jẹ hihla ji vudevude to vendredi afọnnu enẹ to septembre 1922, na gbẹtọ 8 000 ko gọ́ ohọ̀ lọ mẹ. Azinponọ lọ lá dọ to tito-to-whinnu titengbe ehe whenu, mẹhe jlo sọgan tọ́n sọn ohọ̀ lọ mẹ, amọ́ e ma na yọnbasi nado gọ̀ biọ e mẹ.

Ohàn lẹ yin jiji to adà bẹjẹeji tọn lọ “Sinsẹ̀nzọn Pẹdido tọn” whenu, enẹgodo Joseph F. Rutherford hẹ oplò hodọtọ tọn lọ ji. Suhugan mẹplidopọ lẹ tọn sinai bo to jejeji na nuhe na bọdego. Omẹ vude to yé mẹ to yigọyigọ basi mapote na yozò lọ wutu. Hodọtọ lọ biọ to yé si po ahundopo po nado yì sinai bo dotoai. To whenue hodidọ lọ bẹjẹeji, be mẹde tlẹ doayi e go dọ avọ̀ daho de yin mimlán bo yin sìnsìn do aga ya?

Mẹmẹsunnu Rutherford dọhodo hosọ de ji, he dọmọ: “Ahọluduta olọn tọn ko sẹpọ.” Na nudi gànhiho dopo daa, ogbè gángán etọn to núdọ to ohọ̀ lọ mẹ, dile e to zẹẹmẹ basi do lehe yẹwhegán hohowhenu tọn lẹ yí adọgbigbo do lá wiwá Ahọluduta lọ tọn do ji. Sẹpọ vivọnu hodidọ lọ tọn, e kanse dọ, “Be mì yise dọ Ahọlu gigonọ lọ ko bẹ gandudu etọn jẹeji ya?” Mẹplidopọ lẹ yigbe po ogbè lélé po dọ: “Mọwẹ!”

Mẹmẹsunnu Rutherford dọ po huhlọn po dọmọ: “Enẹwutu, mì lẹkọyi ogle lọ mẹ, mì ovi Jiwheyẹwhe gigogán lọ tọn lẹ emi! Mì pọ́n, Ahọlu lọ to gandu! Mìwlẹ wẹ lilátọ etọn lẹ. Enẹwutu mì lá, mì lá, mì lá.”

To whenẹnu, avọ̀ daho he yin mimlán lọ yin vinvlọ́n dẹẹdẹ, bọ hogbe zodolanmẹnamẹ tọn ehelẹ yin kinkan deji dọ: “Mì lá Ahọlu lọ po Ahọluduta lọ po.”

Ray Bopp flin dọmọ: “Homẹ mẹplidopọ lẹ tọn hùn taun.” Anna Gardner dọ lehe “ohọ̀ lọ whàn gìgìgì na pẹhiho wutu do.” Fred Twarosh dọ dọ, “Mẹplidopọ lẹpo wẹ fọnṣite zẹnzẹn.” Evangelos Scouffas dọmọ: “E taidi dọ nude wẹ ze mí fọ́n po huhlọn po nkọ, bọ mí ṣite, podọ dasin wayi do mí.”

Susu mẹhe wá plidopọ daho lọ lẹ tọn wẹ ko nọ lá wẹndagbe lọ dai. Etomọṣo, todin yé mọdọ emi yin whinwhàn nado doafọna yanwle yọyọ de. Ethel Bennecoff dọ dọ Biblu Plọntọ lọ lẹ yí “ahun he gọ́ na zohunhun po owanyi po hugan gbede pọ́n” do zindonukọn. Odessa Tuck, he tindo owhe 18 to ojlẹ lọ mẹ, lẹkọ sọn plidopọ daho lọ po gbemima lọ po nado siọ oylọ lọ he dọ “Mẹnu wẹ na yì?” E dọmọ: “N’ma yọ́n fie n’jei kavi lehe n’na yì do kavi nuhe n’na yì wà. Onú dopo he n’yọnẹn wẹ yindọ n’jlo na taidi Isaia, mẹhe dọmọ ‘Yẹn die! Do mi hlan!’” (Isa. 6:8) Ralph Leffler dọmọ: “Na taun tọn, azán ayidego tọn enẹ gbè wẹ nujijla nado lá Ahọluduta lọ he to yinyin bibasi lẹdo aihọn pé to egbehe bẹjẹeji te.”

Matin ayihaawe, plidopọ daho 1922 tọn he yin bibasi to Cedar Point, Ohio ehe ko lẹzun nujijọ yẹwhehọluduta tọn ayidego tọn de to whenuho mẹ kakajẹ egbehe! George Gangas dọmọ: “Plidopọ daho enẹ dozolanmẹna mi ma nado nọ gọ̀n plidopọ de gbede.” Podọ e ma wàmọ pọ́n nugbo. Julia Wilcox wlan dọmọ: “Hogbe lẹ whèdo mi nado basi zẹẹmẹ lehe homẹ ṣie nọ hùn do tọn to whedepopenu he plidopọ Cedar Point 1922 tọn yin nùdego to owe mítọn lẹ mẹ. N’nọ jlo na dọ to whelẹponu dọ, ‘N’dopẹna we Jehovah, na dotẹnmẹ he a na mi nado tin to finẹ.’”

Mọdopolọ, susu mítọn to egbehe na nọ flin nuhọakuẹ susu he gando plidopọ daho de go lẹ, titengbe nujijọ he hẹn ahun mítọn jaya bosọ hẹn mí gọ́ na zohunhun po owanyi po na Jiwheyẹwhe huhlọnnọ mítọn po Ahọlu etọn po. Dile mí to nulẹnpọn do nuhọakuẹ mọnkọtọn lẹ ji, enẹ nọ whàn mílọsu nado dọmọ: “N’dopẹna we Jehovah, na dotẹnmẹ he a na mi nado tin to finẹ.”