Nọ Biọ Dona Jiwheyẹwhe Tọn to Odẹ̀ Mẹ

Nudagbe de tin he Jiwheyẹwhe na gbẹtọvi lẹ, enẹ wẹ odẹ̀, na e nọ hùnalina yé nado dọ nuhe to ahun ji na yé lẹ na ẹn. Yẹwhegán Davidi hodẹ̀ dọmọ: “Hiẹ Sisètọ odẹ̀ tọn E, dè we wẹ gbẹtọ wunmẹ lẹpo na nọ wá.” (Salmu lẹ 65:2) Amọ́, nawẹ mí gán nọ hodẹ̀ gbọn bọ Jiwheyẹwhe na sè?

NỌ ZE DEWE WHÈ WHENUE A TO DẸ̀HO BO NỌ DỌ NUHE TO AHUN JI NA WE LẸ

Odẹ̀ nọ hùnalina mí nado hùn ahun mítọn na Jiwheyẹwhe. (Salmu lẹ 62:8) E nọ vivi na Ganhunupotọ lọ eyin mí dọ homẹ na ẹn.

NỌ ZAN YINKỌ JIWHEYẸWHE TỌN

Tẹnmẹ-yinkọ voovo wẹ mẹlẹ nọ yí do ylọ Jiwheyẹwhe, amọ́ yinkọ dopo gee wẹ e do. Ewọ lọsu dọ: “Yẹn wẹ Jehovah. Yinkọ ṣie niyẹn.” (Isaia 42:8) Nudi whla 7 000 plipli wẹ yinkọ lọ Jehovah sọawuhia to Owe-wiwe lẹ mẹ. Yẹwhegán susu wẹ yí sisi do ylọ oyín Jiwheyẹwhe tọn tlọlọ to whenue yé to dẹ̀ho hlan ẹn. Di apajlẹ, Ablaham dọmọ: ‘Jehovah, jaale, dike yẹn ni dọho hẹ we dogọ.’ (Jenẹsisi 18:30) Mílọsu dona nọ zan yinkọ Jiwheyẹwhe tọn, Jehovah, to odẹ̀ mẹ.

NỌ HODẸ̀ DO OGBÈ TOWE MẸ

Ogbè lẹpo wẹ Jiwheyẹwhe sè, enẹwutu a gán hodẹ̀ do ogbè towe mẹ bo dọ homẹ na ẹn. Owe-wiwe lẹ na mí jide dọmọ: “Jiwheyẹwhe ma yin mẹnukuntahopọntọ gba, ṣigba to akọta lẹpo mẹ, mẹhe nọ dibusi i bo nọ wà dodo wẹ e nọ kẹalọyi.”—Owalọ lẹ 10:34, 35.

Amọ́, eyin mí jlo dọ Jiwheyẹwhe ni dona mí, dẹ̀hiho kẹdẹ ma ko pé. Mí na mọ nudevo he mí dona wà to hosọ he bọdego lẹ mẹ.